منتديات ليلاس - !! @ حوار ما بعد الرواية @ !!

رجل من نار :: رواية حلوة من وجهة نظري القديمة كانت حب من أول قراءة ..طبعاً فيها تجاوزات بخصوص كذب البطلة وتماديها مع الشاب التاني ثيو ؟
لكن البطل برأيي مميز حنون عليها مع ان شخصيته قوية وكان مقهور من خداعها اللي أكتشفه من البداية لكن لأنها عجبته وحب يتعرف عليها أكتر استحمل ..شفتو كيف ساعدها في غسل الصحون وكمان لما فزعت في نومها وكيف ساعدها في أخذ الوصفة وو .. المهم حسيت انه انسان رقيق بالرغم من ظاهره الخشن .. أما البطلة وحدة مسكينة صغيرة لبست دور أكبر منها الغلط على عمتها اللي وافقتها أما هي حبت تساعد عمتها كان هدفها نبيل بالرغم من أسلوبها الغلط وسنها الصغير اللي ما خلاها تميز شخصية ثيو بدري و لا خلاها كيف تثق بالبطل لو أعترفت له وكانت صادقة ماكانت أتبهدلت وتعبته معاها يقولو الصدق منجاة والكذب حبله قصير ودا أتضح لنا في سياق أحداث الرواية دايماً أبطال الروايات ما يتبعو الخط المستقيم اللي هو أقصر الطرق و أريحها يختارو البهدلة والعذاب ليه ما أعرف !
تحليلي من قراءتي القديمة لها ما راجعتها قريب .
أما وعاد في المساء حسيت كأنها رواية بوليسية لأجاثا كريستي مو من روايات عبير العاطفية الحالمة مع ان شكل الصورة توحي بالعكس .. و البنت مفترية كيف قدرت تضربه لو قتلته ؟ بس تستاهل اللي جرى لها ونحن قلنا قبل كده سفر البنت وحدها ممكن يعرضها لمتاعب هي في غنى عنها ..و أبوها فينه عنها لو أتصل أو هي أتصلت قبل وصولها حتى لو من المطار أو ليلة سفرها من لندن لتأكيد حجزها ودا الشي الطبيعي اللي يعمله أي شخص عاقل قبل سفره .. أما في بقية أحداث الرواية في محاولاتها الهرب دا شي طبيعي يعمله أي انسان ..أما البطل ما حبيته لأنه روسي يعني ممكن يكون شيوعي ودي شخصيات ما تعجبني أبدا الملحدين اللي مالهم دين يحكمهم و لا عقل يبين لهم خطأ عقيدتهم الفاسدة ,, فأعتقد انه شي سيء ان الروايات دي تحاول تصورهم لنا بمظهر فاتن يوجي بالشجاعة و المثالية ..يمكن عجبتني تصرفاته في الاهتمام بالدجاج و تحمله لها وانه ما مد يده عليها بشكل آلي لما ضربته بقوة دا دليل انه انسان صبور ..وكمان عاطفي حنون انه كان متحملها ورجع يعترف لها بحبه ,, أقسى شي انك تعترفي لإنسان بحبك ويخذلك ..ودا الموقف كان مميز للبطل في تقبله رفضها بدون مايرد عليها رد جارح أو يخطفها أو يجبرها عليه زي بقية الأبطال ..وكمان يبين ضعف تفكيرالبطلة ليش ماقالت له في نفس وقت اعترافه كيف تحبني و أنت متزوج ؟ لو صارحته بشكوكها ماكانو ضيعو عليهم الوقت كان ممكن يتقبل الهزيمة و يصدق عدم حبها له ومايرجع لها تاني .
خلاص أنتهيت و الحمد لله من واجب اليوم .ترى حلي من مذاكرتي القديمة لهم ما راجعت جديد فياريت ما تدققوا على اجابتي .
وشكراً