كاتب الموضوع :
موزه
المنتدى :
القصص المكتمله
::الجزء الثلاثون::
بعد اسبوع من وفاة زهور// سلطان تعافى من التعب لكن قلبه للحين ماتعافى بعد اللي عرفه ولا يدري وش يسوي في حاله والكل لاهي عنه باللي صار لزهور.. كان ينام في بيته يبي يحس إنه بقى له شيء منها كان يروح لشغله ويرجع وينام ويقوم وفي باله شيء واحد أمنيه وبس...
في بيت أبوسلطان في الليل// كانت دلال في غرفتها وهي للحين مو مستوعبه إن زهور توفت وهي ماشافتها من يوم وفاة خالد إلا يوم تطلع من المستشفى ويروحون يسلمون عليها لأن حالتها ماكانت تسمح ولا حالة دلال النفسيه بعد تسمح، تذكرت دلال بقايا الإنسانه اللي شافتها كأن مافيها روح والحزن والقهر حافر معالمه بوجهها لدرجة إن دلال تأكدت إن زهور مستحيل توافق على الزواج بأي أحد لأنها تعرف وش كثر يعني لها خالد وشوفتها كذا تأكد هالشيء (الله يرحمك يازهور كانت فرحتك أنت وخالد كبيره في بناتكم ولا تهنيتوا معهم) نامت وهي تفكر من التعب لها أيام مانامت زين...
في بيت أم حمد بوقت متأخر بالليل//جلست أمنيه في الصاله وهي متأثره من وفاة زهور كل هالأسبوع ماتدري كيف مر عليها شوفة سلطان بعدها هالخبر كانت تقريبا بدت تغفي في مكانها يوم سمعت صوت شيء يطيح في غرفة أم حمد وراحت بسرعه تشوف، دخلت ولقتها تعبانه وبصعوبه تتنفس ولا هي حاسه فيها خافت ومادرت وش تسوي وبسرعه راحت تتصل في السواق عشان توديها المستشفى لكنه مارد أخذت النوته ودورت على رقم أبوسلطان ودقت ولا رد ولا أحد رد عليها في بيتهم حتى دلال ماترد على جوالها(حرام عليكم ردوا ياربي وش أسوي مين أكلم) كانت بتطلع للشارع وتطق على أي أحد من الجيران لكن خافت أحد يمر ويشوفها طالعه بهالوقت المتأخر ويمكن الجيران مايسمعونها، خطر في بالها سلطان مابقى غيره ماكانت تتخيل كيف بتكلمه لكن خوفها على أم حمد خلاها تدق وهي تتمنى يرد وفي نفس الوقت خايفه تكلمه، وبعد أربع رنات رد وهو مو مستوعب إنه رقم جدته واستغرب مين اللي يدق وليه...
سلطان_هلا
أمنيه_سلطان
سلطان حس إنه ذاب قلبه يوم سمع صوتها
أمنيه_سلطان تعال بسرعه أمي مريم تعبانه بالحيل ومالقيت أحد يودينا المستشفى
سلطان كان سرحان معها ومو مستوعب إلا إنه يسمع صوتها لكن يوم بدأ يركز...
سلطان_أمي مريم وش فيها؟؟
أمنيه_تعبانه ياسلطان تعال بسرعه الله يخليك أنا مو عارفه وش أسوي
سلطان_لا تخافين اللحين جاي
سكرت أمنيه وراحت تتطمن على أم حمد وشافتها للحين تعبانه قالت لها إن سلطان بيجي وهي ماتدري هي تسمعها أو لا وراحت تلبس عبايتها ورجعت عند أم حمد لين جاء سلطان اسمعته يطق باب الغرفه...
أمنيه_ادخل ياسلطان
دخل سلطان وبنظره سريعه مر على أمنيه قبل لايروح يشوف جدته ولقاها تعبانه بالحيل...
سلطان_عطيني عبايتها
مدت له أمنيه العبايه وصارت تراقبه وهو يحاول يرفع أم حمد ويلبسها كانت نفسها تساعده عشان يروحون بسرعه لكنها ماقدرت تتحرك من مكانها ولا قدرت تقرب منه خطوه وحده وبعد ما خلص سلطان شال أم حمد للسياره ولحقتهم أمنيه وعند السياره التفت لها سلطان...
سلطان_بتروحين معها؟
أمنيه_أكيد...إلا إذا كنت ماتبي
انقهر سلطان_اركبي ياأمنيه
وركبت أمنيه مع أم حمد ورى وفي الطريق كان الجو هادي لين تكلم سلطان كان يبي يتطمن على جدته وبنفس الوقت يبي يسمع صوتها قد مايقدر...
سلطان_من متى تعبت؟
أمنيه_تعشينا مع بعض ماكان فيها شيء لكن وهي نايمه فجأه..فجأه سمعت صوت في غرفتها رحت وشفتها في هالحال والسواق ما رد ولا عمي أبوسلطان
سلطان_هدي نفسك يا أمنيه إن شاءالله بتصير بخير
لكن حالة أم حمد كانت صعبه عرفت هذا أمنيه وهم واقفين قدام العنايه المركزه والدكتور للحين عندها، التفت سلطان على أمنيه وشافها واقفه وترتجف من البرد قرب منها وفصخ البالطو اللي عليه ومده لها...
سلطان_أمنيه اجلسي وتغطي البالطو شكلك بردانه
أمنيه_لا مو بردانه
لكن صوتها بين كذبها كان يرتجف لأنها طلعت من البيت بملابس خفيفه رفعت راسها له وحست إن الدنيا تدور فيها خوفها على أم حمد والأسبوع اللي مانامت فيه أثر في صحتها كانت بتطيح لكنها تمسكت في الكرسي وجلست ومد لها البالطو مره ثانيه وهو يطالعها بتفحص...
سلطان_أمنيه وش فيك؟
أمنيه اخذت البالطو_مافيني شيء
حطت البالطو على أكتافها والتفتت عنه وهو وقف بعيد عنها لكن ريحة عطره اللي حواليها ماتركتها في حالها وسيطرت على مشاعرها وذكرتها بأيامها معه اللي تحاول تنساها لكن كيف تنسى وسلطان بكبره قدامها، طلع الدكتور وراح له سلطان و أمنيه وراه...
سلطان_خير يادكتور طمني
الدكتور_السكر مرتفع بالحيل عندها
هذا آخر شيء سمعته أمنيه قبل تسرح في سلطان وهم يتكلم بعدين لاحظت إنه يطالعها مو عارفه من متى..ولا تدري وين راح الدكتور اللي كان يكلمهم ولا وش قال...
سلطان_أمنيه فيك شيء؟
أمنيه_لا ليه؟
سلطان_أناديك ماتردين!
أمنيه_سرحت شوي
سلطان بدون مايحس_أنت للحين تسرحين... آآ بأروح مع الدكتور أكمل الأوراق
أمنيه_وأمي مريم؟
سلطان بإستغراب_ماسمعتي الدكتور! لازم يحطونها تحت المراقبه ثمان وأربعين ساعه
أمنيه_خلاص روح كمل الأوراق أنا بأنتظر هنا
طالعها سلطان للحظه وراح مع إنه ماوده يتركها وجلست أمنيه تفكر(وأنا وين اروح؟ يعني اجلس في البيت لحالي مع الخدامه؟ أو اروح عند عمان سندس؟ أهم شيء تطمنا على أمي مريم وكل شيء يهون)
رجع سلطان وشافها جالسه وهو مايدري وين يوديها ودق على دلال ماردت...
سلطان_أمنيه
أمنيه تقوم وتمشي بعيد عنه شوي_أنا آسفه ياسلطان أنا عارفه إني سببت لك مشكله في وجودي هنا وعارفه إنك ماتدري وين توديني لكن أنا بعد مادري وين أروح عارفه إني ضايقتك برجوعي لحياتك لكن مو ذنبي إن مالي أحد بهالدنيا أنا....
ماكملت كلامها يوم حست إن الدنيا تدور فيها وماشافت شيء قدامها حست إنها ماطاحت على الأرض لأن سلطان مسكها سمعته يتكلم بس ماقدرت تستوعب وش يقول وبعدها فقدت الوعي،، سلطان نادى على الممرضات وشالوها كان خايف عليها من اليوم يحس إنها مو طبيعيه بس كان يحسبها متوتره لأنها معه لحاله مادرى إنها تعبانه، وقف برى الغرفه ينتظر الدكتور اللي يكشف عليها و هو يفكر بالكلام الأخير اللي قالته(كيف قدرت أتخلى عنك يا أمنيه! وأنا كنت كل شيء لك في هالدنيا! كيف تركتك ترجعين تعيشين لحالك ما أحد يهتم فيك! لميس كان عندها أهلها كان عندها كل شيء وكثير يتمنونها ليه اتركك عشانها؟ أنت ماأحد بيهتم فيك مثلي ماأحد بيفهمك مثلي أنا اللي ضيعتك مني ورحت ورى شيء أنا عارف من زمان إني ماعدت أبيه بس كابرت ومارضيت اعترف) وفكر إنه كل هالأسبوع ما مرت في باله لميس أبدا واختفى اسمها من حياته أول مارجعت أمنيه الوحيده اللي معها يحس إنه حي، طلع الدكتور...
سلطان_خير يادكتور؟
الدكتور_خير إن شاءالله هاذي دوخه بسبب فقر الدم وضعفها لازم تآكل غذاء صحي وتنتبه لصحتها أنت زوجها؟
سلطان كان بيقول ايه لكنه مسك نفسه .. كان يحس إنهم للحين متزوجين ولا يحس بالوقت اللي عاشه بعدها قبل دقايق كانوا قريب من بعض ويتكلمون عادي وكأنهم ما افترقوا أبدا...
الدكتور_يا أخي اسألك أنت زوجها؟
سلطان_هااه لا أنا..أنا ولد خالها
الدكتور_المغذي مدته ساعه بعد كذا تقدر تطلع وأنا بأكتب لها على فيتامينات ولازم تأكل
سلطان_إن شاء الله
راح سلطان يصرف الادويه واذن الفجر وراح يصلي واتصل على اهله وقال لهم اللي صار لجدته ولامنيه وبعد نص ساعه كانوا عنده في المستشفى وبعد ماتطمنوا على ام حمد...
دلال-سلطان وين غرفة امنيه
سلطان-تعالي اوصلك
ومشى مع دلال وقبل تدخل...
سلطان-دلال
دلال-نعم
سلطان-امنيه خلاص بتطلع اللحين بآخذكم للبيت عشان تآكل وترتاح
دلال-وامي مريم
سلطان-لازم يحطونها تحت الملاحظه يومين
دلال-اجل انا بأجلس عند امنيه في البيت لين تطلع امي مريم
سلطان-لحالكم؟؟
دلال-عادي كلها يومين
كانت بتدخل لكن سلطان ناداها...
سلطان-دلال
دلال-نعم
سلطان-بأطلب منك طلب
دلال-آمر
سلطان-امنيه تاخذ علاجها في وقته وتآكل زين ولاتطيعينها اذا قالت شبعانه او مالها نفس وخليها ترتاح
دلال طالعته باستغراب وحيره ليه كل هالاهتمام في امنيه كانت ملاحظه تغير سلطان من يوم شافها بس الظروف ماخلتها تجلس معه وتسأله...
سلطان-وين رحتي؟
دلال-لاتهتم انا بانتبه لها
دخلت دلال وشافت امنيه تطالع الشباك وسرحانه...
دلال-حمدالله على السلامه
التفتت امنيه-دلال! الله يسلمك
دلال-اخبارك اللحين؟
امنيه-الحمدلله امي مريم وش اخبارها؟
دلال-صارت احسن يله قومي
امنيه-وين؟
دلال-سلطان بيرجعنا البيت عشان ترتاحين
امنيه بفرح-امي مريم بتطلع؟
دلال-لا انا وانت بنرجع البيت وباجلس عندك لين تطلع
امنيه-لكن...
قاطعتها دلال-يله قومي قدامي بدون اي كلمه
طلعوا من المستشفى مع سلطان وفي الطريق كان مخيم الصمت عليهم لين ماوصلوا ونزلت امنيه ودلال.. وسلطان يراقب امنيه بابتسامه بعد ماقرر خلاص انه يترك لميس ويرجع لها مايهمه لو تخرب الدنيا اهم شيء يرجع لامنيه
دخلت امنيه ودلال البيت وشافوا الخدامه اللي كانت مفزوعه ماتدري وين راحوا و قالت لها أمنيه عن اللي صار و هدتها...
امنيه-مسكينه نسيتها ولا طرت على بالي
دلال تنفجر من الضحك-شكلها كأنه بخ بوجهها جني
امنيه تبتسم-حرام عليك
لكن دلال ماسكتت وزاد ضحكها ويوم شافتها امنيه وتذكرت شكل الخدامه اول مادخلو عليها بدت تضحك مع دلال وبعد دقيقه ياله سكتوا...
امنيه-شكلنا مشتهين الضحك
دلال-ايه والله تعبت من كل اللي يصير لنا
امنيه بعد لحظة صمت-وش اخبار نواف؟
دلال-ماكلمته من يوم عرفنا بوفاة زهور الله يرحمها
امنيه باستغراب-ليييه المفروض توقفين معه!!
دلال-انت مو عارفه اللي صار قبل
امنيه-وش صار؟؟
دلال-بعد وفاة خالد انا طلبت من نواف الطلاق
امنيه-الطلااااااق!! ليه؟؟
دلال-كنت احلم في خالد الله يرحمه كان زعلان مني ويقول اني ماستاهل نواف عشان كذا جتني فكرة اني اطلب منه الطلاق واقول لخالتي تقنعه يتزوج زهور ويربي بناتها معها
امنيه تصرخ-دلال انت صاحيه!لاتقولين انه طلقك؟
دلال-لا رفض
امنيه-وكل هالوقت وما قلتي لي!!
دلال-لاني اعرف انك ماراح توافقيني على اللي سويته وماكنت ابي احد يقول لي اني غلطانه
امنيه-وزهور اكيد رفضت
دلال-زهور الله يرحمها توفت قبل تعرف بالسالفه
امنيه-واللحين بتتخلين عن نواف؟
دلال-لا طبعا بس انا خايفه من ردة فعله انا رفضته اكثر من مره ويوم رجع كان يقول انه جاء من المطار لسلطان على طول عشان يبيه يوصل لي رساله وانا من ذاك اليوم ماشفت سلطان ولا سألته وش يبي نواف
امنيه-زين اسألي سلطان
دلال-مو وقته خلي نواف يرتاح
سكتوا شوي...
دلال-امنيه ابي اسألك
امنيه-عن؟
دلال-انت نسيتي سلطان؟
امنيه تتنهد-سلطان مجرد جرح قديم راح ألمه..بس آثاره تبقى طول العمر
دلال-انا بأ قوم اجهز لنا فطور عشان تاخذين علاجك وتنامين
راحت دلال وامنيه تفكر(آه لو تعرفين يادلال اني انسى عمري ولا انسى سلطان اللي رغم جرحه لي ما قل حبه في قلبي وانا من لي غيره عشان احبه ولولا عزة النفس كان ترجيته انه مايتركني بس أنا أعرف انه يشوفني قويه ولاأبي هالنظره تتغير)...
في كلية الطب\\جلست دانه تطالع بسندس وهي مقهوره عليها اكثر من شهر وهي مخطوبه لفواز وترفض انها تجيب طاريه وماترضى تسمع عنه ولا شيء..واللي قهرها زياده برود فواز وتذكرت كلامه يوم قالت له عن سندس(لاتلومينها ولاتضغطين عليها هي اللحين عندها فواز مجرد اسم بكره اذا شفتها من ثاني يوم بتقولك انها تحبني)...
سندس-داااانه وين رحتي صار لي ساعه اكلمك
دانه-والله اللي سرحانه فيه ماتبين تسمعين عنه شيء
سندس-اجل ارجعي المكان اللي كنت فيه
دانه-سندس الى متى؟
سندس-ماراح اطول لين يمل خالك وانت ادرى فيه بيمل بسرعه
بعد يومين طلعت ام حمد وراحت لبيتها ودلال جلست مع امنيه اما اهلها فكانوا يزورونهم ويروحون واليوم كانت ام سلطان بتجي عندهم وسمعوا جرس الباب...
امنيه-هذي اكيد خالتي افتحي وانا باروح فوق واذا راح اللي جايبها علميني
دلال-زين
راحت دلال وفتحت الباب وشافت امها ومعها وحده ثانيه ويوم عرفت انها ام خالد فرحت وشافت فجر والبنات اللي صار عمرهم اربع شهور وسلمت على فجر وجلست تلعب الصغار امها وخالتها دخلوا بعدين حست بظل فوقها رفعت راسها وشافت نواف يطالعها ويبتسم وظلت مطيره عيونها فيه بعدين وقفت قباله ومد لها يده وصافحته لكنه مسك يدها ولاتركها وهي ماقدرت تنزل عيونها عنه ولاتدري وش تقول..كل يوم تفكر بهاللحظه وكيف بتتصرف فيها..لكنها اللحين نست كل شي.. التفت نواف على فجر وطالعها وهي فهمت وش يبي واخذت البنات وراحت والتفت على دلال...
نواف يتنهد-تعذبيني بعد هاليوم ياويلك
دلال-ما راح اعذبك لاني تعذبت بعذابك
نواف-واللي اقوله يصير بدون اي اعذار
دلال-وانا موافقه على اي شيء تقوله
نواف-مع السلامه
دلال-وييييين؟؟
نواف يبتسم-لازم اروح المستشفى
دلال-انتبه على نفسك
نواف-لاتخافين اللحين بس ارتحت
راح نواف ودلال الدنيا مو سايعتها من الفرحه صح كان باين بوجهه الحزن والتعب لكن هي بتعوضه عن كل هذا اهم شيء انه مو زعلان منها وللحين يحبها بعد هالفراق والزعل...
صافحت كفي زمان راح و رجعلي يبيني**
مادري صافحته بيدي ولا في صدري حضنته**
كني في رجعته غيمه واختلط رملي وطيني**
ضاعت علومي وصبري كل ماجاني فقدته**
ارتبك فيني شعوري كلي من رجلي لجبيني**
ارتبكت ولا دريت باللي سويته وقلته**
رجع ونظرة عيونه ترتجي لا تخذليني**
مادرى اني في بعده عمري والله ماخذلته**
في شركة ابوسلطان في مكتب سلطان\\كان جالس متردد كيف يقول للميس انه بيتركها ماكان يبي يتركها وابوها اللي يقول لها هالشيء لازم هو يقول لها اول ويعتذر منها عشان كذا ارسل لها مسج<لميس فيه موضوع ضروري تعرفينه ابي اكلمك>
جلس ينتظر على اعصابه لين جاه منها مسج<خلاص ياسلطان بعد ساعه>
وكان في هالساعه يروح ويجي ومتوتر كان يبي يرتاح من هالموضوع بسرعه وبعد ساعه مرت عليه كأنها شهر دق عليها...
سلطان-مساء الخير
لميس-مساء النور
سلطان-وش اخبارك؟
لميس-تمام وانت؟
سلطان-الحمدلله
لميس-خير سلطان وش فيه؟
سلطان-مو عارف وش اقول لك؟ او كيف ابدأ؟ لكن انا راح اسوي هالشيء عشانك وعشاني لانك تستاهلين كل خير
لميس-اي شيء؟
سلطان-لميس انا بأفسخ الخطبه
لميس تشهق-لييييه؟؟
سلطان-انا آسف يالميس انا عارف اني اخطيت في حقك لكن صدقيني لو كان فيه امل اني اسعدك كان حاولت
لميس-وش صار ياسلطان؟اختلفتم مع ابوي مره ثانيه؟
سلطان-لا بس انا...
لميس تقاطعه-تحب وحده ثانيه؟
سلطان-ايه
لميس-امنيه صح
سلطان-كيف عرفتي؟!
لميس-لانك من يوم تزوجتها تغيرت بس انا اللي ماكنت اصدق نفسي اجل ليه طلقتها؟؟
سلطان-لاني وعدتك وحاولت ارجع كل شيء مثل ماكان حاولت انساها بس ماقدرت
لميس-ما صرت تحبني؟ّ
سلطان-لميس انا آسف وعاذرك لو ماتسامحيني او ماتفهميني
لميس-وهي تحبك؟هي اللي قالت لك تتركني؟
سلطان-لا صدقيني هي للحين ماتعرف وانا مادري ترضى ترجع لي او لا بس انا عارف اني ماراح اسعدك
لميس بعد صمت-سلطان ممكن اطلب منك طلب اخير
سلطان-تفضلي
لميس-لاتفسخ الخطبه اللحين خلها بعد اسبوعين
سلطان-ليه؟؟
لميس-زواج بنت خالتي سحر بعد اسبوعين مابي اذا رحت الكل يطالعني ويسألني عن سبب فسخ الخطبه
سلطان كان يبي ينتهي من هالموضوع بسرعه لكنه شاف ان من حق لميس عليه ينفذ لها هالطلب هي انتظرته شهور ووثقت فيه وخذلها..فعشانها بيصبر كم يوم...
سلطان-خلاص انا ماراح اقول لاي احد الا بعد زواج بنت خالتك ولاتزعلين او تتضايقين انت ألف واحد يتمناك
لميس-انا ماراح ازعل على اللي يبيعني ومثل ماقلت ألف واحد يتمناني وما راح اسامحك ابدا ياسلطان
سكرت ومثل ماتوقع سلطان انفجرت بالصياح وبعد ساعات دقت على سحر وجتها...
سحر-خير يالميس وش فيك؟ليه كل هالدموع؟
وقالت لها كل اللي صار وانقهرت سحر وبدت تهاوش وتسبه...
سحر-قلت لك يالميس من يوم يتزوج اتركيه ولا تصدقينه وانت اللي ماطعتيني
لميس-انا ياسلطان تتركني عشان وحده مثل هاذي
سحر-الطيور على اشكالها تقع خليه يستاهل بكره يندم
لميس-ما أكون لميس اذا جاء هالبكره وهم مع بعض.. انت للحين تعرفين البنت اللي في كليتها
سحر-ايه بس وش ناويه تسوين؟؟
لميس-تعرفين بعدين
بعد ايام في الكليه\\البنت اللي وصتها سحر تدور امنيه لقتها لهم وراحت لامنيه تكلمها...
البنت-مرحبا
امنيه-اهلين
البنت-انت امنيه؟
امنيه-ايه
البنت-فيه وحده جايه زياره للكليه معي وتبي تكلمك بموضوع يهمك
امنيه باستغراب-انا! مين؟
البنت-تعالي معي وتعرفينها
وراحت امنيه معها واول ماشافت لميس تذكرتها صح ماشافتها الا مره وحده لكن هالمره خلتها تحفظ ملامحها واستغربت وش تبي فيها...
لميس-صباح الخير
امنيه-صباح النور
تركتهم البنت لحالهم وراحت...
لميس-انا عارفه انك مستغربه من سؤالي عنك
امنيه-بصراحه ايه
لميس-انا بأفسخ خطبتي من سلطان
امنيه مصدومه-ليييييه؟؟!!
لميس-انا ماقدرت احب سلطان لاني حبيت واحد ثاني لكن يوم سلطان طلقك وهدم بيته عشاني رحمته وما قدرت اقوله لا وافقت يجي يخطبني يمكن ابوي يرفض لكنه وافق حاولت احسسه اني ماابيه لكنه يحبني ويتقبل مني اي شيء آخر شيء قبل امس اضطريت اقوله اني ابي نفسخ هالخطبه و تحطم وترجاني اتراجع لكني مااقدر استمر معاه ويوم قال لي انه تركك عشاني وانت كنت تحبينه وراضيه بأي شيء منه حسيت بالذنب قلت له الله بيعوضك لكنه قال مافيه اي وحده بتقبل فيه وقلبه دائما بيكون معي عشان كذا فكرت فيك اذا كان سلطان صادق وانت تحبينه انت الوحيده اللي بترضين فيه كذا وانا متأكده انك اللي بيفكر فيها بعدي يمكن بعد عشان يقهرني لاني ماكنت احبك دام تحبينه هاذي فرصتك استغليها يمكن في يوم يقدر ينساني ويحبك
امنيه كانت تسمع وهي مصدومه ان لميس بعد كل اللي سواه سلطان عشانها باعته واللي صدمها اكثر ان سلطان كان يعرف انها تحبه مع انها حاولت ماتبين هالحب لكن الظاهر انه حس وعشان كذا كان يجبر بخاطرها وبدأ يعاملها زين او يمكن استغل هالحب اللي مايهمه في اي شيء هذا اللي وصلها..الله اعلم باللي ماقالته لميس تركتها بدون اي كلمه وراحت وهي تحمد ربها ان ام ياسر بتجي الاسبوع الجاي عشان تطلع من حياة سلطان هالمره للابد(لا.. يمكن سلطان ما يرجع لي مره ثانيه حتى لو تركته لميس مو معقول يرجعني لحياة العذاب معه وهو مو مهتم الا بلميس بس عشان يقهرها! مو معقول لهالدرجه ماتهمه مشاعري!والا عشان يعرف اني احبه يبيني ارضى بأي وضع معه!مستحيل انا اكون عنده كذا)
********************
::الجزء الواحد والثلاثون::
في بيت ابوسلطان في المغرب//كانت دلال في غرفتها وتطالع مع الشباك تنتظر سلطان يرجع, امس رجعت من عند جدتها بس ماشافته جاء متأخر واليوم طلع بدري لكنها كانت تبي تعرف وش فيه له كم يوم مو على بعضه ومثل ماتقول امها انه بس في غرفته مايطلع منها الا على برى البيت وهي تنتظر دق جوالها وشافت رقم نواف...
دلال-هلا
نواف-مساء الخير
دلال-مساء الورد
نواف-وش اخبارك
دلال-تمام وانت
نواف-الحمدلله,دلال كنت بأكلمك بموضوع
دلال-خير وش فيه!
نواف-زواجنا
دلال حست قلبهاارتجف-وش فيه؟؟
نواف-ابيه بعد شهر
دلال-شهر!!
نواف-ايه اعتقد انك كنت مخلصه كل شيء
دلال-ايه بس..
نواف-دلال وش فيه بعد؟؟
دلال-زهور مامداها..
نواف يتنهد-الله يرحمها عارف انه ما مر وقت على وفاتها بس ملكتنا طولت بالحيل وانا وعمي اتفقنا نخليه زواج عائلي الا اذا كنت تبين زواج كبير؟؟
دلال بسرعه-لا ابيك انت
انتبهت للي قالت وحست ان وجهها احترق وسكرت جوالها ومن الخوف اقفلته(وش قلت!والله بأموت, اكيد اللحين ميت ضحك علي)
ومن القهر دخلت مرسمها ونست سلطان،
اما نواف فكان ذايب (الله عليك يادلال طلع اللي في قلبك لي! واللي مو راضيه تبينينه لي لكن جت من الله خلينا بس نتزوج وانا اعرف كيف اطلع اللي في قلبك)
من بكره في بيت أم حمد// جت دلال وأمها يزورون أم حمد كانت أمنيه في المطبخ تسوي القهوه ولحقتها دلال...
دلال_أمنيه وش فيك؟
أمنيه_مافيني شيء
دلال_إلا فيك باين إنك زعلانه
أمنيه_اشتقت لأم ياسر ولسندس والعيال
دلال_مابقى إلا أسبوع ويرجعون إن شاءالله
أمنيه_إن شاءالله
دلال_أمنيه زواجي بعد شهر
أمنيه بفرح_والله ألف مبروك
دلال_الله يبارك فيك
أمنيه بلا مبالاه مصطنعه_وسلطان متى زواجه؟
دلال_مادري من زمان ماكلمته
أمنيه_ليه؟
دلال_له كم يوم ماله خلق لأحد ولا يجلس في البيت مادري وين يروح
تأكدت أمنيه إن اللي قالته لميس صح وهذا سلطان مو طايق أحد لأن حبيبته تخلت عنه اللحين ذاق نفس الكأس اللي هي ذاقته بس اللي بيقهرها لو فعلا رجع لها عشان يعوض نفسه عن لميس مع وحده ترضى بأي شيء...
دلال_أمنيه وين رحتي؟
أمنيه_هاه لا هنا دام زواجك بعد شهر نامي اليوم هنا أنا بعد اسبوع بأروح وبأصير قليل ما أشوفك
دلال_بس كذا ولا يهمك أنام
مر الأسبوع ورجع أبوياسر وراحت أمنيه لبيتهم وصاروا يحضرون لملكة سندس اللي أصر فواز إنها تصير بعد أسبوع ودلال وأهلها مشغولين في التحضيرات لزواجها الكل كان فرحان إلا سلطان اللي كان يتحرك معهم بدون روح وكل تفكيره باللي بيقولونه أهله إذا فسخ الخطبه والأهم وش بيكون رأي أمنيه إذا طلب منها ترجع له...
في بيت أبوسلطان في الصبح//نزلت دلال من غرفتها وشافت أمها في الصاله...
دلال_صباح الخير
أم سلطان_صباح النور
دلال_وين أبوي وسلطان؟
أم سلطان_طلعوا
دلال_بدري افطرتوا
أم سلطان_ما أحد افطر
دلال_ليه؟ صاير شيء
أم سلطان_سلطان بيفسخ خطبته اليوم
دلال انصدمت_ليه
أم سلطان بعصبيه_مادري عن أخوك مو هاذي لميس اللي طلق عشان ياخذها ومارتاح لين خطبناها له اللحين صار مايبيها!
دلال استغربت(ليه ياسلطان سويت كذا! أكيد صار شيء بينهم) وهاليوم ماطلعت كانت تنتظر سلطان تبي تعرف وش صار، بعد العصر جاء سلطان وشافها في غرفته كان معصب وطفشان...
سلطان_دلال!!
دلال_بشحمها ولحمها
سلطان_غريب العروس جالسه في البيت اليوم
دلال_إذا اخوي بيفسخ خطبته هاذي مناسبه تستاهل
سلطان_فستخها
دلال_يعني خلاص!
سلطان_إيه
دلال_ليه؟
سلطان_بصراحه ومن الآخر أحب وحده ثانيه
دلال انصدمت_وحده ثانيه! وممكن اعرف مين هاذي؟
سلطان يتنهد_أمنيه
شهقت دلال_سلطان أنت تحب أمنيه!!
سلطان_إيه كنت أحبها بس أكابر ماكنت قادر أطلقها لو هي ماطلبت ولو شفت فيها شيء واحد يدل إنها تبيني كان ماتركتها حاولت انساها بس ماقدرت ويوم شفتها مره ثانيه عرفت إن حياتي ماكان لها معنى بدونها
دلال بفرح وحزن_كنت حاسه إنك تحبها كان باين عليك بس انت اللي مارضيت تعترف
سلطان_دلال أنت اقرب وحده من أمنيه قولي لي تتوقعين توافق؟ كانت تحبني؟ أنا شفت هالشيء في عيونها
دلال_سلطان اللي سويته في أمنيه مو هين ولا أدري وش بتكون ردة فعلها إذا عرفت إنك تبي ترجع لها
سلطان_دلال روحي كلميها
دلال_اليوم؟
سلطان_اللحين أنا تعبت من الإنتظار تعبت من التفكير لازم اعرف رأيها
دلال_خلاص ياسلطان أنا بأروح أكلمها و يارب توافق
سلطان_دلال الله يخليك اقنعيها قولي لها إني أحبها وإني بأعوضها عن كل اللي راح قولي لها إن حياتي من بعدها مالها أي معنى
في بيت أبوياسر//وصلت دلال وشافت سندس وباركت لها وجلست معهم شوي قبل تدخل هي وأمنيه الغرفه...
أمنيه_خير يادلال وجهك يقول إن عندك شيء بتقولينه؟
دلال_سلطان
أمنيه_وش فيه؟
دلال_فسخ خطبته من لميس
أمنيه باستهزاء_سلطان اللي فسخها؟!
دلال_إيه بس غريب ليه ما تفاجأتي!
أمنيه_وأنا وش دخلني؟ بس قولي لي ليه سلطان فسخ الخطبه؟
دلال_آآ أمنيه أنا ما أعرف أحط مقدمات سلطان يحبك ويبي يرجعك أمنيه سلطان يحبك من زمان بس....
أمنيه تقاطعها_دلال خلاص ماله داعي هالكلام اللي بيني وبين سلطان انتهى ومستحيل نرجع لبعض مره ثانيه أنا بديت حياة جديده ومابي ارجع للماضي ونسيته بكل مافيه
دلال منصدمه_يعني أنت ماتحبين سلطان؟!
أمنيه_أنا قلت لك من زمان إني نسيت سلطان
دلال_بس ياأمنيه سلطان يحبك ونادم إنه ضيعك ليه ماترجعين له يمكن الحب اللي في قلبك يرجع
أمنيه_ما كان حب سلطان أول شخص يدخل حياتي وكان طبيعي احس بشيء اتجاهه لكن أنا قررت إني أبدأ من جديد وبعد اللي شفته من سلطان مستحيل نرجع لبعض
حاولت دلال تقنعها لكن برود أمنيه وإصرارها على الرفض خلاها تقتنع إنها نست سلطان،
بعدها رجعت دلال للبيت وهي مو عارفه وش تقول لسلطان اللي ينتظرها وما ردت عليه وهو يدق عليها، وأول ماوصلت للبيت شافته ينتظرها في الحديقه...
سلطان_دلال وينك؟ ليش ما تردين؟
دلال_ماشفت جوالي
سلطان خاف من شاف ملامحها اللي خلته مايحتاج يسأل_رفضت؟
دلال_حاولت اقنعها بس هي قررت إنها تنسى اللي راح وتبدأ من جديد وما أحد يلومها اللي صار لها معك مو سهل تنساه
سلطان_أنا عارف إني ظلمتها بس أنا...
دلال بحزن_انسى يا سلطان لأنه باين إن أمنيه نست لدرجة إنها ما تفاجأت بفسخ خطبتك واستقبلت الخبر ببرود ولامبالاه
سلطان تركها وطلع (ببرود! و اللي شفته في عيونك! الحب اللي حسيته فيها كان وهم؟ لا ياأمنيه مستحيل ارضى إني اخسرك لازم ألقى حل لو اقدر بس أكلمك)
بعد يومين يوم الخميس في بيت أبو ياسر في ملكة سندس// اللي طلبت من أبوها إنها تكون عائليه وصغيره بس عناد في فواز اللي كان يبيها كبيره وكذا اقتصرت على المقربين بس عمانها وأهل فواز ولا كانت متحمسه للبسها ولا مكياجها لكن أمنيه جلست وراها لين طلعتها قمر بمنتهى النعومه لكن كل شيء هان عندها قدام هاللحظه اللي بيدخل فيها فواز .. حاولت بكل الطرق تلغي هالشوفه بس ما أحد وافق سمعت الباب ينفتح ويتسكر وظل طويل يقترب منها و وقف عندها مد لها يده ورفعت راسها تطالعه توقعت تشوفه مبتسم لكن بالعكس كان مكشر وهالشيء خلاها تخاف زيادة ما هي خايفه..مدت يد مرتجفه تصافحه مسك يدها وجلس قريب بالحيل منها ولو ما كانت في آخر الكنب كان قدرت تبعد عنه حاولت تسحب يدها منه لكنه كان ماسكها وحاطها بين يدينه حست إن ريحة عطره دخلت لين روحها وأخيرا تكلم وقطع هالصمت لكنها ماتوقعت يكلمها بصراحه من أول مره ويحرجها...
فواز_دانه تقول إنك تكرهيني وماتطيقين تسمعين اسمي صح؟
سكتت لأنها ماتدري وش تقول ماجتها الجرأه تقول لواحد مثل فواز أكرهك في وجهه...
فواز_سندس
سندس بصوت خفيف_نعم
فواز_وأنت تكلميني طالعي فيني
سندس قالت في نفسها(كيف ارفع رأسي وأنت لازق فيني وجهك في وجهي)
رفع وجهها بيده وطالعته بخوف كان قريب منها بالحيل و نظرته كانت توترها...
فواز_أنا ما أكذب أنا أحبك وأنت الوحيده اللي خلتني أحس إن مافيه أي شيء بحياتي له قيمه بدونها وأنت بتحبيني قولي أي شيء أسويه يخليك تحبيني وأنا بأسويه
سندس كانت تحس إنها مسحوره باللحظه مسحوره بكلامه مسحوره بالمشاعر اللي شافتها في عيونه ماكانت تتخيل أبدا إن أحد يحبها ويقول لها مثل هالكلام كيف إذا كان واحد مثل فواز...
فواز_سندس تكلمي أبي اسمع صوتك قولي كل اللي مضايقك مني
سندس لفت وجهها عنه_أنا...أنا مو مصدقه متى امداك...
فواز كمل اللي ماقدرت تقوله_أحبك
سندس_إيه
فواز_تصدقين لو أقول لك إني كنت دائما معجب فيك من كلام دانه عنك لكن ماكنت منتبه بس أول ماشفتك كل شيء صار واضح لي
سندس_أخاف أصدقك يجي يوم وتتغير
فواز_يعني أحب غيرك؟
سندس_إيه
فواز_أنا أحب غيرك؟
سندس_يمكن
فواز_لو لي غير هالقلب يمكن
رفع يدها وباسها وانحرجت سندس لأن يدها ترتجف مثل قلبها وطلعت بسرعه من الغرفه بدون ما تلتفت عليه، طالعها فواز وهي تروح عنه وهو مرتاح إنها ماجابت طاري سالفة أمنيه وإن كل خوفها وشكوكها كانت عشان تتأكد إنه يحبها والأهم إنها مارفضت هالحب، أما سندس فما صدقت إنها طلعت تسندت على الجدار وأخيرا قدرت تتنفس طبيعي وتذكرت شعورها اللي انقلب في لحظه(وين الكلام اللي كنت ناويه أقوله؟ ليه سكتني؟ليه راح كل اللي كنت أفكر فيه؟ وماصار شيء مهم غيره!)
قدر يذوب خافقي بسهوله..
يوم تمكن من عروقي شاله..
في كلمتين قالهن معسوله..
خلتني انسى عالمي وأحواله..
قبل يجيني كل شيء بأقوله..
بس المصيبه لا غديت قباله..
تبرد عظامي كأني مشلوله..
ولا اسمع غير كلام قاله..
دايم بعيني مايفارق زوله..
حتى بحلمي صورته وخياله..
حتى زلته صارت مقبوله..
غصب اسامح زلته وافعاله..
جتها دانه وهي سرحانه...
دانه_سندس وش فيك؟
سندس_هااه
دانه_هاه! اللي آخذ عقلك
سندس_انقص لساني ماقلت له الكلام اللي من شهر ارتبه
دانه_أحسن لأني عارفه وش كنت بتقولين
جت أمنيه_هاه العروس طلعت أخيرا
سندس_أووه مابي اسمع أي تعليق
وراحت عنهم...
أمنيه_وش فيها؟
دانه تضحك_الظاهر خالي آخذ عقلها
وقالت دانه في نفسها(الظاهر إنك سويت اللي قلته يافواز)
في بيت أم ندى//كانت نور ماره من عند غرفة نجلاء رايحه لغرفتها لكنها سمعتها تصارخ معصبه وشكلها تكلم في جوالها جاها فضول تعرف وش فيها ووقفت تتسمع...
نجلاء_لميس مو معقول ماأقدر اصدق إن سلطان يفسخ خطبتكم!
نور أول ماسمعت هالخبر كانت بتصرخ من الفرحه لكنها مسكت نفسها تبي تسمع باقي الكلام...
نجلاء_يحب وحده ثانيه! مين؟...... وليه ماتقولين لي؟ وأنت خلاص رضيتي بهالشيء......وش سويتي؟.....وتتوقعين ترفضه بعد الكلام اللي قلتي لها؟....
راحت نور لغرفتها وهي تفكر(سلطان يحب وحده ثانيه! متى حبها؟ وش قالت لها لميس النذله تبي تفرق بينهم لازم اعلم سلطان بس ماقدر أقوله شيء لين افهم السالفه عشان مايطلعوني كذابه زين يالميس الحمدلله اللي افتكينا منك أنا عمري ماحبيتك واللحين كرهتك زياده كنت احس انك طماعه مثل أهلك و مايهمك في سلطان الا مركزه و فلوسه.. مايكفي خسرنا أمنيه عشانك اللحين بتخسرين سلطان اللي يحبها صدق لزقه وذابحينا لميس ألف واحد يتمناها خلاص تروح لهالألف وتريحنا منها!)
في الكليه جت دانه لسندس...
دانه_أقدر أفهم ليه ما فتحتي الجوال تردين على زوجك اللي ازعجنا؟ وليه ماكلمتيني يوم دقيت عليك؟
سندس تطالعها_صباح النور
دانه_سندس؟
سندس_ماكنت مستعده أكلمه ومادري كيف بأكلمه؟
دانه_أنت للحين ماتبينه؟
سندس_مادري؟
دانه_سندس كلنا نسينا اللي صار حتى أمنيه فرحانه لك ليه أنت مو راضيه تفرحين؟
سندس_تبين الصراحه خالك يخوفني
دانه تضحك_يخوفك! توقعت أي شيء إلا إنك تخافين منه
سندس_يا ويلك تقولين له مو تسوين حما علي
دانه_سندس أنت من صدقك؟
سندس_إيه أنا حاسه إنه بيسيطر علي إن كان من أول مره قلب حالي كذا وما قدرت انطق كيف إذا صرت زوجته! بصراحه أنا كنت مخططه اتزوج واحد مخفه و اسيطر عليه
دانه ماتت ضحك_والله إنك شيء! سندس إذا كان الزوجين متفاهمين ويحبون بعض ماله داعي أحد يسيطر على الثاني المهم اليوم تفتحين جوالك
سندس_أحاول
وفي البيت حاولت تفتح جوالها لكنها كل ماتخيلت إن فواز بيكلمها تخاف وتهون (أنا ليه كذا خايفه منه؟ صدق إني غبيه)
سمعت أحد يطق باب غرفتها...
سندس_مين
أمنيه_أبوك دق ويقول يبيك في المجلس
سندس_زين أنا رايحه
وراحت للمجلس ودخلت بسرعه لكنها ماشافت أبوها واللي شافته خلى قلبها يطلع من صدرها شهقت وكانت بترجع لكن فواز كان أسرع منها مسكها من يدها وسحبها داخل المجلس وهي تحس إنها بتموت من الخوف...
فواز بعصبيه_سندس وش فيك؟!!
سندس_ليه جيت؟
فواز_جيت اسألك متى ناويه تفتحين جوالك؟
سندس_وجاي بس عشان تسأل!
فواز_سندس حرام عليك أنا تزوجتك أبي ارتاح لكن أنت مخليتني مثل الخبل، عندك فكره عن الإحراج اللي كنت فيه وأنا اطلب من عمي أشوفك وحنا مالنا يومين مالكين
سندس بإحراج_أنا آسفه ما قصدت
فواز_أنا مو جاي اسمع اعتذار أبيك تقولين وش فيك؟
سندس_خلاص اللحين بأفتح الجوال
فواز_آها يعني مثل اللي يقول مع السلامه
سكتت ماردت...
فواز_زين قولي مع السلامه أشوفك على خير أي شيء
سندس_مع السلامه
فواز_مع السلامه ساده كذا مافيه معها شيء!
فهمت سندس وش يقصد وطالعته بخوف...
فواز يضحك_امزح أنت من دون شيء صايره طماطه أشوفك على خير
ورفع يدها وباسها وسندس منزله راسها رفع راسها وطالع فيها لحظه ثم راح، أما سندس فوقفت على حالها تستوعب اللي صار فجأه تذكرت شكلها وركضت للمرايه وشافت نفسها ببنطلونها الجنز الفاتح و التيشرت الأبيض وشعرها القصير خصلاته متبعثره وجهها كان أحمر عشان كذا قال لها طماطه (وطالعه وشكلي كذا! أبي اعرف كيف واحد مثل فواز يترك كل هالبنات ويحبني أنا؟ صح أنا حلوه بس مو أحلى من أمنيه ليه تركها وحبني أنا؟ وش يشوف فيني أنا مو شايفته! معقول أهمه لدرجة يجي بس عشان يشوف ليه مافتحت الجوال) وتذكرت جوالها وراحت بسرعه تفتحه...
|
01-05-10, 10:12 AM
جديد مواضيع قسم القصص المكتمله
العرض العادي
