كاتب الموضوع :
ديييييما
المنتدى :
القصص المكتمله من وحي قلم الاعضاء
رد: قطرات من ألم الماضي فهل تنتصر؟؟
السلام عليكم ورحمة الله طابت اوقاتكم بكل خير
شكرا لكم جميعا...ومبروك عليكم هذه الايام
الفضيلة فاغتنموا الفرصة وكبروا...
الله أكبر الله أكبر الله أكبر ولله الحمد
الله أكبر الله أكبر كبيرا والحمدالله كثيرا وسبحان
الله بكرة واصيلا...
تفضلوا القطرة الثالثة وقراءه ممتعة لكم
لاتلهيكم الرواية عن عباداتكم واعمالكم..
القطرة الثالثة"
بإنهيار وهي منحنيه على ركبتيها..
تحاول تستوعب معقوله كيف كذا
كيف ميت يطلع للحياة بعد خمس سنوات
كيف مو ابوها قال لها انه ميت
رأته هي وتعرفه كيف تنساه
كيف تنسى شخص دمر حياتها
وقتل اخيها ..كيف ..رأته يناظر
لها ويبتسم من بعيد هو بدر ماغيره
كيف تنسى شكله هو نفسه ماتغير
غمضت عيونها يمكن حلم يمكن هي
تخيل ..اكيد الادوية اثرت عليها
وصارت تخيل..لا لا انا مو مجنونه
بعيوني شفته متأكده يارب يارب حلم
وحاولت تقوم لكن عجزت ناظرت
للمكان اللي رأته فيه مافيه الا سراب
غير موجود غمضت عيونها وهي
منهارة على الآخر ..ليتها سمعت
كلام ابوها وماطلعت ليتها بقت بالبيت
فزت بخوف ورعب بعد اليد اللي
وضعت على كتفها..
بخوف وانفاسه تتطاير"جود وينك وش فيك"
"شفته والله هو شفته"وبإنهيار وبكاء مرير"
كان هنا والله هنا ويناظر فيني"
عزام ضمها لصدره وبإستغراب وخوف
"مين مين تقصدين احد ضرك بشي
جود بشهقات وهي تضع يدها على فمها
تمنع نفسها ماتستفرغ(اكرمكم الله)
"بدر"
عزام والى الان مافهم شي وابد
ماذكر عليه مين تقصد وبتوتر
"جود مين بدر" وبعد عنها شوي
بعد مااستفرغت كل اللي ببطنها
وبإنهيار تام وتعب وهي تقاوم
الاستفراغ(اكرمكم الله)
"بدر الله خطفني وقتل فزاع"
وماقدرت تكمل ..كل جسمها يرجف
خوف ورعب وتعب والعرق يتصصب
من جبينها ..
فزاع ساعدها تقوم وناظر لعادل
اللي يناظر بخوف وهو مستغرب
"قدم السيارة"
بالجانب الآخر بسيارته غمض عيونه
تمنى يروح لها ومايتركها كذا
لكن كيف هذا مستحيل
يعرف انه عشق مننوع
وغلط..عشق الانسانه
الغلط..بنت عدوه
زفر بضيق وكمل طريقه قبل
ينتبه احد لوجوده ..كمل سيره
بسيارته ..ماتمنى انها تشوفه
كان يبي نظرة فقط من بعيد
لكن قدر الله وانتبهت له
وواضح انها عرفته والا كيف
انهارت كذا ..زاد سرعة السيارة
لازم يكمل اللي بداه
والا بيخسر ..لازم يصحح غلطه
عنيد ومايحب يخسر
شي ..لازم يكمل والا بيخسرها
وسرح بأفكاره..
بالخلف بالسيارة وهو يحاول
يطمنها ويخفف من رعبها وخوفها
"جود هدي نفسك مافيه احد"
"يعني كيف انا انجنيت والا كيف"
عزام وهو يناظر لها ويبتسم
"لا ياقلبي يمكن احد يشبه ويمكن مافيه احد
مجرد خيال"
تحاول تطرد كل فكرة سيئة من رأسها
يمكن كلام عزام صدق مافيه احد
خيال او احد يشبه ..
كحت بتعب وهي تشعر
بتعب وضيق بصدرها
ناول عادل اللي يسوق علبة ماء
"عزام اعطها ماء"
اخذ عزام علبة الماء وفتحها"جود"
اخذت الماء وشربت شوي وتركته
وهي تضع راسها على كتف عزام
وتسرح بأفكارها
الرياض2017
بعد ماتناولت فطورها..وخلصت
بعض اعمالها طلعت للصاله
عند امها وابيها..تصحى دايم الصباح وماتنام
لانها تنام بوقت مبكر وماتسهر ..
ناظرت للساعه بجوالها تشير الى التاسعة
تقدمت خطوات ودخلت الصاله
"السلام عليكم"
"وعليكم السلام"
قبلت رأس والديها وجلست
"اعتذر تأخرت اليوم ماافطرت معكم"
ابتسم لها والدها "لا عادي خوذي راحتك
بس خفت يكون فيك شي"
"لا بس يمكن لاني جلست ساعه بعد صلاة
الفجر تأخرت وغفيت"
ردت امها بإبتسامة"نوم العافية"
ابتسمت وهي تأخذ حبات تمر"معاذ مداوم اليوم"
"اي داوم ومانام شكله مواصل"
"الله يهديه كان نام ومايتعب نفسه
ودوامه كله تعب وشغل"قالها والده وهو
يقوم
ريما وهي ترتشف فنجان قهوة"عاد يبي له
نومه يوم ولا تكفيه" وناظرت لوالدها
"بتروح مكان"
رد وهو متوجه للخارج"اي بروح لجدتك طالبني"وخرج
هزت رأسها وكملت تشرب قهوتها..
ام فيصل وهي تحاول تفتح معها موضوع
وبإرتباك"ريما اقول"
ريما بإستغراب وهي تنزل الفنجان وبشك
"فيك شي يمه"
"لا بس بكلمك بموضوع"
"اذا موضوع خطبة صديق فيصل"ويضيق
"رجاء يمه لاتفتحينه والله مليت"
بضيق"ليه كذا ياحياتي انا ماابي الا لك
كل خير وابي اشوف عيالك .."
قاطعتها بطفش"واللي يشوفك يمه يقول
لي40 سنه او 30 "
"مابقى شي على 30 ترى عمرك 27
وابي اشوفك مستقرة وعيالك..
قاطعتها ريما وهي توقف"يمه زواج خلاص
انا ماافكر فيه والحياة مي واقفه على رجال
وانا الحمدالله مستقرة بحياتي ووظيفتي
وعندكم ماني محتاجه لا احد" وبضيق
وعيونها تغرق دموع"الا اذا عاد مضيق
عليكم وجودي وكلام الناس اللي مايرحم
هذا شي ثاني " وبكت "والله تعبت
يايمه كل ماشافتني حرمه او بنت قالت
هذهِ اللي طلقها بليلة زواجها اكيد فيها
شي ويارب لاتبلانا ..وبصوت عالي وهي تبكي
"حتى بدوامي بالمدرسة ماسلمت من الكلام"
وقفت امها لها وضمت وبحزن
"ماعليك من اي احد وكلام الناس عليهم
وانا يوم قلت لك ماابي اضيقك "
رفعت راسها وبدموع
"ماارتحت الا بالاجازة فالله يسعدك يمه
لا احد يضيقني ويجيب طاري خطبه وغيرها"
جده 2017
معصب وواصل اخر مراحل العصبية
له عشر دقايق وهو يمشي بالصالة
ويصارخ كيف لو خطفها مرة ثانيه
وش بيسوي بعدها كيف يسامح نفسه
ليش يسمح لهم يطلعون وين كان كل هالمدة
خمس سنوات ماترك اي مكان بالسعودية
مابحث عنه مع رجاله وكل تحركاته
كيف طلع بالوقت هذا تحديد...
تقدم بخطواته وانحى على ركبتيه عند
جود اللي منهارة وتعبانه ومستلقيه على الكنب
وعزام جنبها وخايف عليها وخايف من ابوه
وعصبيته..
"متأكده انتِ شايفته او لا" وهزها
"جود تكلمي وريحيني مااقدر اتحمل اكثر"
"يبه الله يهديك ماتشوفها منهارة"
بعصبيه وهو مو قادر يتحمل
"انت اسكت لاتكلم" وساعد جود تجلس
"جود "
تعدلت وهي تمسح دموعها وتحاول تتكلم
"يبه مو انت قلت انه ميت كيف طلع"
وقف وبإرتباك وهو يخفي عنها
"اي ميت" وبهروب عن اسئلتها
"خفت عليك انا اعوذ بالله من الشيطان الرجيم"
جود بتشكيك وهي تناظر لأبوها
"متأكد يبه والا فيه شي تخفيه ..وبحزن"والا انا
صار في شي"
تقدم لها وضمها لصدره وهو ماسك دموعه
"لا ياروحي مافيك شي هذهِ كوابيس وتعدي"
وضمها اكثر له
"او احد يشبهه ارتاحي انتِ "وناظر لعزام
"قوم جيب لها ادويتها بسرعة"
جود بحزن وعقلها مشوش
"خفت يوم شفتها وتذكرت فزاع و.."
قاطعها وهو يضع يده على شفتها
"انسي لاتذكرين اي شي مافيه الا مواجع"
جود وهي تحاول تطرد كل فكرة بعقلها وماضي
مر عليها..غصب جاء بعقلها هو واصحابة
ماتقدر تنسى والله ماتقدر..حاولت لكن ماقدرت
شعرت بغثيان وقامت بسرعة..
ابو عزام تنهد بضيق وتعب وهو يمسك رأسه
بعد ماشعر بصداع شديد...لا اله الا الله
لاحول ولا قوة الا بالله.. وانتبه لعزام اللي
نازل بخطوات وادوية جود معه..
"انتبه لها واعطها من ادويتها ولاتقول لامك لانها نايمه
تخوفها ولا وجدان بعد "ووقف "انا دقايق وراجع"
وطلع بسرعه واتصل على رقم لازم يتأكد
واتاه الرد سريعاً (السلام عليكم .اخبارك..الحمدالله
الا بسالك يابو مشعل وش سويت بالقضية..اي وبحدة "جود اليوم شايفته لازم تتاكد باسرع وقت..اي انا كل شي رفعته ومتأكد ..حاولت بس مافيه وجود له ابد..ماجد الله يوفقك جود ماابي تعرف بأي شكل انه عايش لازم يقبض عليه قبل يطلع على الساحه ويخرب كل شي ...زين ..واثق فيك انا ..وانا مااعطيت القضية الا واثق فيك..انتظرك ..مع السلامة..)
بمكتبه وبامر للعسكري:تذهب الان للمطار وتفقد
المسافرين زين
"امرك سيدي"
وقف وبحزم" بدر عبدالله ال...لاتنسى"
"حاظر طال عمرك " وخرج بعد ان القى
التحية العسكرية له...
جلس واخذ بعض الاوراق"الله يعين متى بنخلص
من هالبدر " وكتب كذا معلومة جديدة يمكن يستدل
فيها للمجرم...
مستلقي على السرير وجواله بيده بينام وتعبان..
لكن لازم يتطمن وينتظر رد عبدالرحمن ..
اووف هذا وينه تأخر لايكون سعود انتبه لشي
او صار لجود شي ...وانتبه لإشعار من عبدالرحمن
جلس وبحماس"وينك انت على اعصابي"
"مسوي لها شي انت"
"لا ليه"
"سعود جن جنونه والبنت دخلت منهارة وفيس حزين"
ابتسم بضيق وكتب"ماسويت شي بس شافتني"
"اها عشان كذا البنت بغت تجن "
"المهم انت انتبه لنفسك وامسح كل المحادثات"
"زين وبسكر سعود جاء ومعصب "
سعود بعد مانامت جود وتطمن عليها وتركها تصلي
ركعتين طلع ..مدة الادوية تنومها 8س الى 10 ..
تقدم واستغرب من ارتباك عبدالرحمن وفزته..
"فيك شي"
يحاول يتكلم بدون ارتباك وبإبتسامه
"لا "
سعود بعدم جدية للامر وهو ينبه على رجاله
"انتبهوا للبيت واذا دخلت حتى نمله لداخل البيت
او اسوار وحديقة البيت بوقتها تعرفون سعود من"
وخرج لخارج البيت ...
ايطاليا 2017
وضع جواله على الطاولة ..ورفع عبدالله النايم
على الكنب ..وذهب فيه الى غرفته..قبل مايكون
عبدالله ابن لصديقه فهو ابن اخته رحمها الله..
لم يعش ولم يحس بإحساس الامومة ..فقدها
منذ ولادته بثلاث اشهر..بندر لم يقصر معه
بأي شكل ..حرص على تربيته ورعايته وجلب له
مربيه ..اربع سنوات يبلغها ابن اخته ..وضعه على
سريره ومسح على راسه" الله يحفظك وسمى عليه"
استودعتك الله" وغطاه واطفى النور ..
بعد ذلك خرج من الغرفه بالصاله العلوية ..واستلقى
الله يعيني واحد مايرد والثاني معصب ومافهمت منه
شي ..الى متى يبقون كذا ..الله يسامحك يابدر
ويعينك يابندر ...وسرح بأفكاره..
ماينسى ابد قبل اربع سنوات وسبعة اشهر ..
كيف بدر اهتم فيه واهتم بأخته وحماه من كل شي..
وزوج اخته ببندر ..المريض ذاك الوقت بعشق ..
وحب من انسانه مستحيل الارتباط فيها..
لاينسى حب اخته لبندر وتعلقها فيه..
ولاينسى احترام بندر لها رغم عدم حبه لها..
ولاينسى هروب بدر المتكرر واختفاءه .. من اجل
عدم تعريضهم للخطر وجلب المصائب لهم..
ولكنه كان قريب لهم واختار ايطاليا مأمن لهم..
بعيدا عن اعماله ..
الرياض..2017
بعد ماطلع من صلاة المغرب..والى الان
مو مرتاح لزيارة اعمامه لجدتهم..كل زيارة
لازم يصير شي ..دخل الصالة ..وانتبه
لسارة ومنى جالسات وكل وحده سارحه
بافكارها..
"السلام عليكم"
"وعليكم السلام"
رمى نفسه على الكنب "جدتي وينها"
سارة بدون ماتناظر له وهي مشغوله
بجوالها.."بغرفتها"
ثامر وهو يناظر لمنى"انتِ حياتك كذا بس
مسلسلات وجوال 24 س"
منى بطفش وهي تقوم"على اساس انت
ماتمسك جوال ولا تتابع "وبسخرية
"ترى فقط المسجد تتركه"
تنهد بضيق وهو مايبي يتناقش معها وناظر
لسارة.
"الا توقعين عمي راشد وسليمان ليه بيجون"
سارة بضيق وهي تنزل جوالها
"يعني وش رأيك جدتي طالبتهم"وبصوت
منخفض"وسمعتها تقول لازم تجون البنت
ماتطلع عن عيال عمها وثامر احق فيها وبمالها"
تعدل ثامر بجلسته وكأنه مضروب بكهرب220
"نعم وش انا مالي بنات عم ماتزوجن"
سارة وهي مستغربه نفسه"والله ماادري من تقصد"
وبخوف"جدتي وتعرفها مع المشاكل واللي براسها
تسويه"
وقف "الله يستر يارب ويكتب كل خير"....
وطلع تارك سارة تفكر..مين هالعم ومين بنت العم.
وليش يجون ..وليش ثامر بالذات..ومين بنت
العم اللي عندها مال..ايش دخل ثامر بمالها...
الجد مجتمع بجميع ابناءه واحفاده..
وابد مافيه احد مستغرب جمعة الجد..
لكن الاستغراب من ايش الموضوع..
فيصل ومعاذ جنب بعض ويتهامسون
"توقع فيه سالفة خطبه شي"
"مادري والله مااتوقع" وسكتوا بعد ماتكلم الجد
بصوت جهوري"انا جمعتكم هنا بخصوص
عيال بنتي مريم وانتم تعرفون اعمامهم"
الكل انتبه وكمل الجد بجدية
"محمد الله يرحمه اخوانه كانوا ضده ومايبون
الزواج بأي طريقه لكنه عاندهم وتزوج بنتي مريم
واعطيته انا اسهم واشتغل عليها معنا بالشركة
واسس نفسه "وكمل بحزن وكبرت تجارته بالشركة
وبعد ماتوفى الله يرحمه كتب كل شي بأسم هديل وياسر
وخالد عياله"
"الله يرحمه"
كمل الجد بحزن"وعارفين انتم ان اعمامهم مايبونهم
ولا يبون قربهم والجدة مثلهم وانا خايف يطمعون
باموالهم وحلالهم بعد كل هالسنين"
ابو فيصل بجدية رد"ام سليمان من تحت لتحت
ونعرف وش سوت قبل بولدها الله يستر منها"
كمل ابو سلطان"وقبل سنه وش سوت بهديل"
رد ماهر اللي يكرهه هالسيرة وبسخرية
"هديل والله هي اللي لعبت..."
قاطعه ابوه"هديل غلطت وهم استغلوها"
الجد "المهم اسمعوا انتبهوا وانا ماقلت لياسر
او خالد مابي يعرفون او يحقدون على اهلهم"
معاذ تكلم"والمطلوب ياجد منا"
الجد وبراسه اشياء لكن بيأجلها لوقت مناسب
"انتظر ابو عزام بعد اسبوع وابلغكم بكل شي"
ابو فيصل بحزن"كلمته اليوم والاوضاع عنده شوي
متوترة"
ابو سلطان بخوف"عياله فيهم شي"
الجد يطمنهم جميعاً
"لا بس النوبات اللي تجي جود وتعرف سعود"
ماهر ومعاذ مع بعض"والله البنات الحين .."
قاطعهم الجد"وش فيهن البنات "
معاذ وهو يهمس لماهر"عاد الموضوع فيه هديل وجود"
الجد بنظرة"ترى انتم واشر لماهر ومعاذ "يبي لكم قرصة تصحيكم"
معاذ بإبتسامه"الله يطول بعمرك"
ضحكوا بعد تغيير وتصريفة معاذ لجده..
ومرت ساعه وهم يتحدثون بينهم..حديث
عائلي ودي جميل مع الجد...
في منزل الجده ام سليمان وابناءها سليمان
وراشد..وبينهم ثامر اللي كل كلمة وحقيقة
تصدمه..
راشد بعصبية" هديل بنت اخونا وحنا اولى فيها"
كمل سليمان بحده"لكن كيف جدهم ومالنا قدرة فيه"
ام سليمان بخبث وهي تمسك يد ثامر" هي مستحيل
بتروح معكم وبتترك جدها واموالها لكن عندي حل"
وناظرت لثامر"نخطبها لثامر وبكذا حتى ثامر
يتوظف عندهم ويأخذ كل شي ويسلمه لنا"
ثامر وكأنه مقروص وبإرتباك وخوف "لا مستحيل
اخذ...
قاطعه عمه بعصبية"اجل اقعد هنا بفقرك وعيشتك
هذهِ وبنت عمك اللي ماينتسمى عايشه عيشة ملوك
وامراء هي واخوانها"
كمل عمه سليمان مع تأييد من الجدة
"لاتصير غبي ومغفل مثلنا يوم ولد عمك جابها معه
بيتزوجها ويملك وحنا نوقف ضده"
الجدة بقهر وندم اللي يغبنك انها حبته وجت وعاندت
جدها وخوالها ورفضنا"
قاطعهم ثامر بإستغراب"وش السالفه"
الجدة بتحفظ"شيٍ ماضي مالنا فيه بس
انت فكر باللي قلنا لك وبكره نروح نزورهم انا وانت"
سليمان وراشد "واسمع كلام جدتك زين حنا نبي
مصلحتك لاتصير ضايع ومالك الا رأيك مثل ابوك
وعمك"
كمل راشد"عمك على الاقل احسن من ابوك
اسس نفسه وعياله والا ابوك مات بفقره ودجته"
قاطعه ثامر بقهر"اللهم يرحمهم جميعاً"
سارة وهي تسمع كل شي ..هزت رأسها بأسى
الى متى جدتها واعمامها كذا..جشع وطمع..
حمدت ربها ان ابوها الله يرحمه غير عنهم..
والا عمها اللي يتكلمون عنه وعن عياله اول مرة
تسمع به ..ولا تذكر ابد ان احد جاب له خبر
او تكلم عنه..جدتها واعمامها تعرفهم اذا دخلوا
بموضوع لازم يخربون كل شي ..
حزنت على هديل اللي ماتعرفها ابد الا فقط اسم
وشهرتها بالسناب..ولا كانت تعرف انها بنت عمها
يوم جديد..في منزل الجد عبدالله..
نورة وامها وياسر واحلى جلسه بعد صلاة
العصر تقريبا بساعه ..عادة ياسر مايحب
ينام العصر ويجلس مع جدته وخالته
اللي ربته وبمقام امه..ربته بعد ماتوفت
امه اثناء الولادة وكبر وهي امه واحلى
واغلى ام ..وبعد مابلغ عمره 12 سنه
توفى والده..له والده عشر سنوات
متوفي ولكنه الحمدالله رزقه الله بجد
وخوال في مقام والده ولاينسى اخية الاكبر
خالد واخته هديل...
نورة بحب وهي تقطع حبات عنب لياسر
"سم ياابوي"
ابتسم بحب ومد يده
"ماافضله كثير لكن بما انه من يد امي
مااردها "واكل العنب
ابتسمت نورة وبحب"الله لايحرمني"
الجده بإستفسار"ماكلمتك بنتك اليوم"
نورة بحزن وضيق "لا وكلمت ام سعد وقالت
نايمه اذا صحت ابلغها"
الجده بارتياح"اهم شي انها بخير"
ياسر بحزن على حال عمته اللي فقدت
ولدها قبل ثلاث سنوات وتغيرت كلياً ..
وتخاف انها تفقد غيره وخصوصاً ياسر..
وهديل لانها متعلقه فيهم بشكل..
لها بنت من طليقها قبل 20 سنه ..وعند والدها
تبلغ من العمر 22 س..
رد بحب وهو يطمن امه(خالته)"ماعليها عند ابوها
واخوانها ونايمه قالته لك ام سعد لاتخوفين نفسك"
ردت بضيق"ابوها وخالتها واعرفهم لكن مطمنه عشان
خواتها واخوانها"
قطع عليهم سوالفهم دخلت الخدامة
"ماما فيه ماما كبير عند الباب يبي انتِ"
الجده وقفت "انا"
وقف ياسر وبإحترام"اجلسي والله ماتقومين
انا اشوف"
الجده وهي تلف طرحتها"لا يابوي يمكن حرمه
مانعرفها"
ياسر وهو متوجه للباب"لا عادي اشوف مين
وادخلها"
ثامر واقف عند جدته اللي جابته غصب
وبالحر والشمس..وعلى الفورد ..لكن ايش
يسوي غصب عنه..اول مادخل اسوار قصرهم
ندم انه جاء مع جدته..ليش يجي لناس مايعرفهم
ولا من مقامهم ولا طبقتهم..ليته سمع كلام سارة
واقنع جدته ماتجي..قطع عليه افكاره صوت جدته
"تشوف ياابوي العز والغناة وش تسوي تقول
بيت ملوك"
طلع ياسر قبل يرد ثامر على جدته وبترحيب
"حياكم تفضلوا"
ثامر بإحراج "السلام عليكم"
ياسر بإبتسامه
"وعليكم السلام"
تكلمت الجده وهي تدقق بملامح ياسر
ماتخفي عليها هالملامح نفس ولدها يوم كان بعمره
وباستفسار"انت ولد محمد"
ياسر حرك حاجبه وبإستغراب"اي ليه"
ام سليمان وهي تبتسم مجامله "انا جدتك
ام ابوك واشرت لثامر "وهذا ولد عمك "
ياسر وقف ماعمره شاف جدته ابد لان جدته واعمامه
ماكانوا يبونهم وكذا مره يروح مع جده وخواله وطبعا
مااحد يستقبلهم ومن سنه تقريبا ابد ماحاولوا
يزورونهم لان جدته واعمامه قطعوا العلاقة معهم كلياً
"وليه ماتسلم وش شايف نفسك عليه"
ياسر وهو وده يتكلم ويقول كلام كثير لكن احترام لعمرها
تقدم وسلم بسلام بارد"جدتي وامي موجودات داخل
تفضلي"
وسلم على ثامر وراح معه لقسم الرجال...
ثامر بإحراج وموقف لايحسد عليه"اعتذر عن كلام
.."
قاطعه ياسر "حصل خير وتفضل "وراح يجيب له
القهوة..
نورة وهي تجدد القهوة بالمطبخ"والله اعرف ام سليمان
ماتجي بخير" وصفت الفناجيل بالصينيه
دخل ياسر "يمه عرفتي اللي جت تقول انها جدتي"
نورة بعدم ارتياح"الله يستر والله ام سليمان ونعرفها
هي وعيالها ايش عملوا بهديل"
ياسر وهو يضع الاغراض بالصينيه
"واضح والله من اسلوبها وواضح غاصبه اللي معها"
ثامر يناظر بالمجلس..واثاثه والديكور
والاكسسورات والرخام اللي موجوده بالمجلس..
وتنهد فرق كبير وشاسع بين بيتهم والقصر هذا..
وجدته مجتهده وجايه بتخطب له..
كل شي مختلف ..من بتوافق على واحد
فقير وعاطل وحتى سيارته فورد كل شوي
متعطل ..تنهد بضيق وهو يحاول مايوضح
شي ..الغنى نعمة عظيمه لبعض الخلق..
والفقر موجع واليم لبعضهم.
"حياك الله "وصب له قهوة
ثامر بعدم ارتياح من المكان"الله يبقيك"
ياسر نزل الدله وجلس..
عند الجده ونورة اللي ابد مو مرتاحات..
ام سليمان وهي تلفت وبإستهزاء"اي هذا اللي
ولدي تحدانا واخذ ..."
قاطعتها الجده "الله يرحمه وماله داعي الكلام
والحديث عن الموتى كلن يلقى عمله عند ربه"
كملت نورة "الكلام بموتى وغيره كله غيبه ومايجوز"
ام سليمان بكرهه"وين بنت ولدي بسلم عليها والا.."
قاطعتها الجدة "نايمه ومافيه ان او غيرها
بنت ولدك هاللي تقولين عنه مانسسى ايش
سويتي فيها انتِ وعمانها قبل سنه"
ام سليمان بإرتباك وتبرير"هذا ماضي ونسينا
وانا جايه بستسمح منها واتعذر واسلم
وبتمثيل للدموع وهي تمسح عيونها بطرحتها
"مابقى بالعمر شي والظفر مايطلع عن اللحم"
الجده "والله عاد نايمه"
كملت نورة"وماتصحى الا متأخر اذا بتنظرينها"
والا ود نورة تطردها وتهينها مثل ماسووه بهديل
لكن احترام وتقدير لكبر سنها ومكانها ببيتهم
ام سليمان بقهر وهي توقف"كأنكم .."
قاطعتها الجدة وهي توقف معها"بتجلسين
اعتبري البيت بيتك "
ام سليمان وهي تعدل عباتها"لا بعد يومين
نجي انا واعمامها ونسلم" وطلعت خارجه
لخارج المنزل...
ثامر بعد ماسلم ودقت عليه جدته طلع مسرع
وساعدها وفتح لها باب السيارة..
ماهر طالع وبإستغراب من الفورد اللي
رايح فيها ..والعجوز اللي تركب والشاب
اللي يساعدها...لبس نظارته وتوجه لسيارته
ثامر وهو يناظر بالشاب اللي قدامه
وسامه وجسم وعضلات..وطول ورزه
سكر باب سيارتها وحركها ومشى "واضح
وجه الفلوس اي لنا الله"
جدته"قلت شي"
"لا لا "وكمل طريقه لحيهم ومنزلهم..
بعيدا عن الاحياء الراقية والمنازل
الفارهه ..
ياسر بعد ماراحوا راح لجدته وامه..
الجدة بخوف"الله يستر منها"
نورة بعدم ارتياح"اي والله جيتها ماتطمنت"
"ولا انا بعد ماتطمنت قالت شي"
الجدة بضيق"قالت ابي هديل واعتذر منها"
جلس ياسر وبإستغراب"تعتذر ومن هديل"
صحت من النوم..وهي بسريرها ناظرت بالساعة
باقي نص ساعه على آذان المغرب..صلت العصر
وكملت نومها..فتحت جوالها ودخلت الواتساب..
بعد ماشافت اشعارات من جود..
قرأت وجلست بحماس وردت على جود
"جد بتجون بكرة" وراح صح واحد فقط..
نزلت جوالها ودخلت تغسل وجهها..
بعد 5 دقايق ..نزلت تحت وقالت للخدامه
تحضر قهوتها الخاصة ..بعد توجهت
للمجلس ودخلت وواضح
فيه سالفه ...
"السلام عليكم" وقبلت رأس جدتها وامها..
"وعليكم السلام"
جلست وبإستغراب"جايكم احد"
"جدتك ام سليمان"
كمل ياسر"وشكل عندها شي"
اخذت هديل القهوة من الخدامه ونزلتها
"مااتوقع ان عندها شي يمكن زيارة"
"كانت تسأل عنك وتقول انها بتعذر"
هديل وماتحب طاري السالفه اللي صارت
"ماضي ومر عليه سنه وراح بخيره وشره"
نورة بجد وهي تناظر لهديل
"ماضي لكن جدتك بتفتحه "
هديل بعدم مبالاه وهي ترتشف من كوب القهوة
"مااتوقع ان بتفتحه ويمكن عندها شي"
ياسر وقف"انتبهي انت لنفسك "
هديل بضحكه"ماعليك ماصاير شي
جدتي وامي وساوس "
وفتحت السناب وصورت جلستها وقهوتها
بصورة احترافية وكتبت خاطرة..
بعد يومين
ايطاليا 2017
احمد وبدر اللي وصل ايطاليا البارح..
بإنتظار وصول بندر من السعودية..
بحديقة المنزل وبالقرب من المسبح وعبدالله الصغير..
يلعب بالعابه..واحمد متوتر يعرف..
لقاءات بدر وبندر اذا بندر عاند بدر بشي...
بدر وهو ماسك جواله ويناظر بالساعة
"متأكد ان واصل المطار"
"اي متأكد حتى ارسلت سيارته ووصلته "
"طيب ليه تأخر "
"يمكن زحمه بالطريق او شي "
"لا لازم يعاند ويرفع ضغطي انا قايل له
اني موجود هنا"
"اي"
"اي ماتقدر تمسك لسانك"
بإبتسامة"مااقدر اكذب عليكم اثنينكم"
ابتسم بدر وتقدم للمسبح"وانا ليه احبك"
"وانا ماتحبني"
عبدالله بعد مايسمع صوت ابوه راح يركض
له"بابا"
جلس على قدميه ومد يديه له "هلا "وضمه
لصدره ويقبله بكل مكان..
بدر تكتف وتقدم"لا زين حسيت اخيراً"
بندر وقف وهو شايل ولده"اكيد بحس "
وابتسم ببرود..
تقدم بدر وسلم عليه وضمه"ليش مارديت علي"
بندر وهو ضامه"لان اعرف وش بتقول"
احمد بإبتسامه وحب"خلاص خلوني اسلم" وتقدم وسلم
على بندر..وهمس بإذنه"بدر عنده كلام كثير"
بنفس الهمس"ادري اعرف بدر"
بدر وهو يتقدم للبيت "تعالوا لداخل برد الجو
وعبود معنا يضره"
داخل البيت بدر بتوتر"بندر"
بندر وهو يعرف سؤاله"نعم"
"ماتقول لي ليش نازل جده"
بندر وهو يمد رجوله"عندي شغل خلصته
وجيت"
بدر بعصبيه"اي شغل يخليك تنزل جده"
بندر ببرود"اسمعني حياتي ومالك شغل فيها"
بدر وقف وبعصبية"انا اخوك واعرف مصلحتك
واذا المسأله فيها خطر وضرر على حياتك بتدخل "
بندر ببرود اكثر"شف انا اذا ماصارت جود لي
مااراح اجلس"
بدر بصراخ وهو واصل حده من العصبية
"جود بنت سعود تعرف من بنتتتتتتت سعوووووود"
بندر وقف وبعصبية"ادري انها بنت سعود
وماراح تكون الا لغيري برضى او غصب"
بدر وشوي يصفق بندر"غبي انت غبي مجنون"
بندر بصراخ"لا ماني مجنون وجود بتزوجها لو
يوصل الامر لخطف"
بدر وهو يضرب الطاولة برجله"حيوان انت تزوج
وحده سبق........." وماكمل لان بندر ضربه بكل
قوته مع وجهه وشفته بلكمه طاح على الارض
"من اللي سوا كذا فيها مو انت والحيوانات اللي معك"
بدر وقف ولكم بندر"صار وانتهى خلاص بس انت
مااسمح لك تزوج وحده اخوك دخل عليها قبلك تفهم"
ولكم بندر مع وجه "تفهم والا لا البنت هذهِ تنساها"
بندر بصراخ وهو يتضارب مع بدر"جود لي وماراح
تكون لغيري تفهم والا ماتفهم"
احمد وهو يحاول يفرق بينهم"اغبياء انتم مجانين
اخوان تهاوشون عشان بنت" وبكى عبدالله من الخوف
وهو يشوف ابوه وعمه يتضاربون..
بدر وهو طايح على الارض"عاد ليتها بنت .."
قاطعه احمد قبل يكمل"بدر واللي يرحم والديك
تسكت"
بندر بعصبيه وهو جالس على الارض ووجه كل
ضربات وخشمه ينزف"كله منك خاف عبود"
بدر يقلد صوته بسخرية"كله منك لو همك عبود
مارحت لمكان فيه خطورة على نفسك"
احمد بعصبية"خلاص انت وياه " ومد يده
لبدر يقوم"قوم اساعدك عشان اطهر لك
جرحك شفتك تنزف"
بدر ابتسم"لا اتركني هنا بس جب المطهر
وقطن"
بندر وهو يطمن عبود"مافيه شي لاتخاف"
احمد جاب مطهر وقطن ويعقم جرح بدر
"شكل النهاية بموت بضغط منكم"
بدر بألم"آي خلاص احمد فقعدت كبدي"
بندر وهو يحط معقم على دقنه من اظافر بدر
"تقل مخالب بس الله وكيلك"
بدر"ههههههههههههههههههههه حديتني انت"
احمد لبندر"اجلس بمكانك لين اخلص "
بندر وهو يناظر بالمرآه"بدر"
بدر بحب رغم هوشتهم وعنادهم"عيونه"
"مابي عيونك خلها لك الا وش جابك"
"افا هذا جزاي جاي اتطمن عليك"
"قلت لك بخير وبالله من بيعرف ان فيه بندر"
"يالوح انت توأمي ويحسبونك انا ويبحثون عنك"
وكمل بضيق"والا ادري ان مااحد يعرف ان
لي اخو وبعدين انا ليش معطيك جواز مزور
وهوية مزوره عشان تعيش وترتاح بعيد عني"
بندر بجديه"الى متى بتهرب طيب سلم نفسك"
بدر بضيق"اسلم نفسي مستحيل كيف بعيش
بسجن وبعدين لاتنسى لاقضية ولا قضيين"
احمد بحزن وهو يسكر المعقم"ماودي اقول
لك سلم نفسك و...."
قاطعه بدر "نفسي ماني مسلمها واصلا
مااحد يعرف مكاني واشر لبندر"
لكن انت بعنادك بيقبض عليك
وتسجن "
بندر ابتسم"عادي خل يمسكوني ويسجنوني
بالنهاية انت بتجي وتسلم نفسك وتنقذني"
بدر استلقى على الكنب"اسوي كل شي
الا هذهِ يابدر انا مستحيل اهين نفسي
واعيش بين اربع جدران لكن احذرك
انت ابتعد عن بنت سعود "
الرياض2017
في بيت الجد مجتمعين كل ابناءه واحفاده..
ابو عزام..ابو سلطان..ابو فيصل..ابو حاتم..
ابناء الجد مع اولادهم..
سعود بينهم ومو مرتاح لانه ملاحظ ان عزام
متضايق ومو مرتاح بالجلسة..بعد مافقد
توأمه فزاع تغيرت حياته ..وبعد نقلهم لجده
صار مايحب الجمعات ولا يفضلها فقط
صديقه مشعل ولد الضابط ماجد وبعد يكون
جمعتهم ببيت سعود او ماجد..صار انطوائي
بعض الشي..وغير اجتماعي..
جالس جنب معاذ وبهمس"معاذ"
معاذ ابتسم لعمه سعود"هلا"
"عزام شكله متضايق شرايك تطلع معه"
رد بضيق"والله ياعم قلت له ورفض"
"طيب يمكن غير رأيه اطلع معه"
"ان شاء الله بقوله بعد شوي"
ابتسم بحب وراحة"ماتقصر"
ابو فيصل"بكرة بما انها جمعه وش رأيكم نطلع
للمزرعه "
ابو سلطان بتأييد"اي والله حتى البنات يتونسن"
"والله يايبه البنات مايعجبهن شي الحين لامزرعه
ولا غيرها مايعجبهن الا السفر"
"اي واذا سافرن كله تصوير سناب ماادري ليه
يسافرن"
الجد بإبتسامه"عادي يصورن يوثقن سفراتهن"
سلطان تعدل"الا بما ان سفرات العايله سافرتوا
بقى سفرة الشباب"
ابو سلطان"ارتاح مافيه هالمرة لكم"
سلطان"ياسلام ليش"
الجد بإبتسامه"تسافرون بإجازة عيد الاضحى"
سلطان بفرح"حلو حلو"
ابو عزام وهو يمد فنجانه لفيصل"صب لي
القهوة تكيف والله من مسويها"
فيصل"اتوقع انه سلطان مااحد يضبطها غيره"
سلطان سمع اسمه وبلقافه
"وش فيني"
ابو عزام ابتسم "ابد نمدح القهوة وقال انها انت
مسويه"
سلطان تعدل بغرور"اي الزين مايجي الا من
الزين"
عند قسم الحريم ..الجدة مستأنسه ودايم
معوداتها حفيدتها وزوجات ابناءها على
الجمعه كل ويكند ببيتهم..
تفرح اذا شافت جود مستأنسه وهالمرة
جود غير مستأنسه غير عنها كل جمعه
صح لها اكثر من ثلاث اشهر مانزلت
للرياض..وولدها سعود كعادته كل بعد
اسبوعين يزور اهله بالرياض واغلب
زياراته لوحده او معه وجدان فقط..
بفرح وهي تمد صحن حلى لجود
"جود ياامي كولي"
ابتسمت"والله اكلت ياجدة وتعرفيني
مااكثر حلويات"
نورة بفرح وابتسامة"جمعتنا الليله غير
الله يتممها ولو نكملها بكره بالمزرعه"
"لا لا ياامه فكينا"
"الا والله وناسه نطلع "
"اي والله فكره حلوه"
"لا الجو حار وبالبيت هنا احسن"
"بالنسبه لي اللي يريحكم معكم بأي شي"
ام فيصل"انا اقول بالبيت عشان الاطفال"
كملت ام سلطان"اي والله دايم ينكدون
طلعاتنا والبيت على الاقل يلتهون بالالعاب "
معاذ واقف مع عزام بالحديقة..ويحاول
يتكلم معه بس واضح على وجه عزام
متضايق وسكت...
عزام بحزن بعد صمت "ماادري ليه الرياض تذكرني
بفزاع وخصوصا بيت جدي"
معاذ وهو يحاول يغير مود عزام"الله يرحمه وهذا
حال الدنيا" وكمل بجديه"لكن انت مره معذب نفسك"
فزاع بحزن ويديه بجيب بنطلونه ويناظر قدام
"والله غصب بس عجزت انسى حتى توظفت
بعد ماتخرجت على طول بشركة جدي بالفرع
عندنا بجده بشغل نفسي عن التفكير وانسى"
"انت درست 7 سنوات وتعبت بالهندسه كان
ارتحت شهر على الاقل وماضغطت نفسك"
"ادري والله بس قلت يمكن انسى وفشلت"
"طيب خذ اجازة شهر وسافر معنا"
بسخريه مع حزن"اسافر معكم هذا اذا وافق
ابوي"
"عمي سعود علي "
"لا انا مافكرت بالسفر هالمرة واذا بسافر
اروح مع اهلي"
"براحتك لكن انا ابي عشان ترتاح وتغير
جو ودايم سفرات الشباب افضل من العايله
اللي تقيدك"
عزام وانتبه للسيارات اللي جايه عند مدخل
القصر وبإستغراب"من اللي جاء
معاذ وهو يناظر وبنفس الاستغراب"ماادري
يمكن جدي عازم احد بس ماقال لنا"
عند مدخل القصر سليمان بحقد
"اي والله واخونا كان عايش بنعمه"
"اسكت اسكت لو فيه خير كان عطانا
والا كتب لنا شي قبل يموت "
ام سليمان بطفش"انتم ادخلوا وقدموا
سيارتكم واسكتوا"
ثامر بطفش وهو يتنهد "شكل اليوم عندهم
احد انا مادري وين طاوعتكم وجيت"
سليمان بعصبيه "انت ادخل ادخل"
ثامر ماسك نفسه"وين ادخل البوابه
على الاقل بتكلم مع الحارس"
فتح الباب عمه ونزل"لاتكلمه ولا شي ننزل هنا
ثامر "وجدتي المسافه بعيده عليها"
"انا وعمك ببنزل هنا وانت كمل مع جدتك"
معاذ دخل وقال لجده واعمامه ان فيه رجال
جايين ومعهم عجوز..
الجد وقف"سعود قم رحب بالضيوف"
طلع سعود وانصدم لانه يعرفهم وبإبتسامه مجامله
"الله حيهم تفضلوا"
"الله يبقيك ابو عبدالعزيز موجود"
"تفضلوا حياكم موجود ابوي"
ودخل سليمان وراشد مع ثامر...
وام سليمان راحت لقسم الحريم..
هديل سلمت على جدتها ببرود..
ماتمنت انها تسلم كذا لكن غصب..
شي بداخلها ..ذكرها بإهانه..
وحقد وكرهه..
ام سليمان بمبالغة زايده"ياهلا والله ببنت ولدي
عساك بخير"
هديل بنص ابتسامة"بخير انتِ اخبارك"
ام سليمان جلست "بخير دامك بخير"
عند الرجال..الكل مستغرب وينتظر
بترقب سبب زيارة الضيوف ...
سليمان نزل فنجانه"لي طلب ياابو عبدالعزيز"
الجد بتحفظ"اشرب قهوتك وكلامنا بعد القهوة"
راشد"واتمنى ان مانطلع الا بطلبنا"
"اذا قدرت عليه تبشرون"
ثامر يناظر بصمت وهو كارهه ماهر ومعاذ..
يحسهم مغرورين بزياده ومتكبرين ..اي
لا وجدتي واعمامي جايبين اخطب بعد..
والله ماتوافق علي انا وخشتي هذهِ وعندها
عيال خوال كذا...انا ماادري ليه طاوعت
جدتي وجيت وقطع عليه سلسلة افكاره
صوت ياسر"وين وصلت يارجال"
من زيارتهم الاخيره وهو حاب هالياسر
واضح عليه مسالم ومحترم وحيوي وبإرتباك
"هاه لا مافيه شي"
معاذ وهو ماسك ضحكته"ماهر تصدق
حسيت انهم خطابين"
ماهر بهمس"لايكون لهذا الس..."
قطع عليهم صوت سلطان بهمس"لاتغتابون
الرجال وعيب الكلام بالمجلس ينتبه لكم"
معاذ بطفش"فكنا انت"
عند الحريم ام سليمان وهي تفحص البنات
والله وكل وحده اجمل من الثانيه ..طلعت فيه
وحده اجمل من هديل وهديل على جمالها احسن
منها الله يرزقنا ...
الجدة ام عبدالعزيز"اجل وعيال ولدك عندك"
ام سليمان بمدح"اي الله لايخليني ثامر
عن عشر رجال"وناظرت لهديل"وماهو كل
بنت تستاهله"
جود بضحكه وبهمس لهديل"شكلها جايه تخطب"
هديل وهي تضرب فخذها
"مصدقه انا تكرهني لاتنسين وش سوت قبل
سنه"
ام سليمان وهي تناظر لجود وبإعجاب
"ماشاء الله الا هذهِ من بنته"
الجده وهي تسمي على جود"بسم الله
عليها ماشاء الله هذهِ بنت ولدي سعود"
ام سليمان بعد تذكر وبحسرة وحزن
"هذهِ بنت سعود اللي خطفت وصار بها
اللي اعوذ بالله الله يحمي بناتنا " وطبعاً كل
الانظار تحولت لجود..
وكملت بحسرة"والله خسارة هالجمال تقعد
بدون رجال و....."
قاطعتها الجدة بعصبيه"ماله داعي كلامك هذا
ياام سليمان انتِ جايه تشمتين والا تسلمين"
جود وصدرها يضيق وكأن احد كاتمها
وقابض عليها ردت بحزن وهي توقف"
والله ماشكيت لك حالي واحترام لسنك
والا مانتشرف نستضيف ناس كذا تفكيرها
وهمها"وطلعت مسرعه خارج المجلس...
ام سليمان بقهر"جمال بدون اخلاق صدق
الجمال ماهو كل شي ..."
قاطعتها نورة بقهر"ياام سليمان كلامك مايصلح
هذا وقدام البنت"
كملت ام عزام بحزن بعد صمت "واللي صار
لها شي غصب عنها "
ام فيصل بجدية"وقضاء وقدر تحسبين يام
سليمان هذا شي سهل عليها وعلى اهلها"
ام سليمان وهي ندمت انها تكلمت وبتغير
السالفه"الله يكفينا الشر ويستر بناتنا
وبنات المسلمين"
هديل طلعت على طول وراء..جود وبمحاولات
وهي تهدي جود اللي تبكي
"سمعتيها جايه تشمت "
هديل وهي تضمها"ماعليك منها الله ياخذ
جزاك من كل ظالم ليش تضيقين نفسك"
مسحت دموعها وبشهقات"على بالها ان حياتي
وتفكيري كله واقف على رجال "
هديل ضمتهاهي تواسيها "ماعليك منها ولاتاخذين
اي كلام بجديه من الناس"
مسحت دموعها وانفها المحمر "بعض الكلام
يجرج "وتحاول تبتسم بحزن"يعني هذهِ جدتك"
هديل بإبتسامه "جدة العدو"
ضحكت غصب"هههههههههههه"
باست خدها "اي اضحكي لاتضيقين
نفسك "وتقلد صوت ام سليمان
..."الا هذهِ المزيونه من هي بنت له"
جود ضربتها مع كتفها"وععع عليها وعلى
مدحها وجمالها"
عند الرجال...
الجد بعد مافجر قنبله لماهر واللي بالمجلس...
"والله هديل خاطبها ولد خالها ماهر ووافقت"
وناظر لماهر اللي طايره عيونه من الصدمه
مايقدر يتكلم ولا يخرب شي عند الرجال..
ثامر يناظر لماهر وبقهر...
اي والله اصلا من بيفكر فيني اصلا
شكل عادي ومنتف وعاطل...
راشد بقهر"وش يضمن لنا ان بنتنا
اخوانا موافقه وليه مااحد قال لنا"
تكلم خالد بصوت جهوري"والله ياعم ليش
نقول لكم البنت وانا اخوها الكبير وولي امرها
وانتم حتى عيال اخو ماحسستونا نجي بنسلم
ولا نلقى احد ..واحتد صوته "وغير كذا حتى
ابوي يوم يتوفى مااحد منكم جاء لعزاه كأنه
ماهو ولدكم"
الجد مايبي مشاكل وبجديه"والله لو البنت ماهي
فايته زوجناها وناظر لثامر"والله مااعرفك ياولد
ولا شي لكن واضح من شكلك رجال وماعليك
خلاف"
ابتسم ثامر بإحراج وسكت..
سليمان وهو يبي يوافقون على الخطبة بأي طريقة
"طيب بنسلم على البنت ونشاورها وهي تختار
وناظر لماهر بكرهه"هذا والا ثامر"
الجد بتوتر"زين "ووقف "خالد تعال معي" وناظر
لهم"بناديها وتجون بالمجلس الثاني"
معاذ وفيصل وسلطان وعزام وكل شباب العايله
يناظرون لماهر اللي متوتر وواضح مرتبك ومايقدر
يقول شي...
معاذ بضحكه وهمس"احلى جدي اختارك انت
لاميرته"
كمل سلطان بضحكه"والله وطلع جدي يحبها بعد
والا كيف يختارك لهديل بشحمها ولحمها"
ماهر بعصبيه"الله يأخذ عدوك انت وخفض صوته
بعد نظرة ابوه له وعمه سعود ...
خالد وهو معه جده ..
"ماعليك ماهر وواثق فيه ماراح يفشلك"
بثقه"ادري وانا ليه قلت ماهر لاني اعرفه"
بخوف"واذا هديل وافقت على ثامر ياجد
وش السواه واضح وراء خطبتهم سالفه"
"هديل ماترد لي طلب ماعليك" ونادى بصوت
جهوري "نورة يانورة ..هديل .."
نورة فزت لابوها وطلعت له "هلا "
الجد "نادي لي هديل وخليها تلبس
عباتها وتجي تسلم على اعمامها بمجلس
الرجال الثاني"
نورة بخوف"فيه شي يبه"
الجد يطمنها"لا تسلم على اعمامها"
بعد دقايق وصلت لهم هديل وهي مستغربه
وخايفه بنفس الوقت ومتوترة ..لاشافت اعمامها
وجدتها ماتنسى كيف اهانوها وطردوها قبل سنه
خارج المنزل ومافيه كلمه سيئة ماتلفظوا
عليها فيها..ولاتنسى حبها اللي سبب كل شي
وسبب لإهانتها لكرامتها وذلها...تقدمت خطوات
وهي متردده بعد ماقال لها جدها تسلم على اعمامها...
ماهر بعد ماطلعوا الرجال ومابقى الا رجال العايله
حتى ثامر طلع ...وقف ويدور بالمجلس
ابو سلطان بعصبية"وراء ماتجلس انت "
ابو عزام بضحكه"مالومه ابوي صدمنا كلنا"
ماهر تقدم وجلس على ركبه وعنده عمه سعود
"عاد توقع هديل من توافق عليه"
كل اللي بالمجلس انفجروا ضحك
"اقول لكم انا مستانس"
"اي انا ادري انه يحبها بس ساكت"
"اي مسوي ثقيل والله وطحت ومااحد سمى عليك
ياماهر"
كل هذهِ تعليقات الشباب لماهر اللي متوترة
وعلى اعصابه خايف هديل توافق على ثامر
يعرف ان هديل تكرهه بعد سالفتها مع ولد
عمها قبل سنه..رجوله ترجف من التوتر
ويحس بحرارة بجسمه ..فتح ازارير ثوبه
وجلس بضيق..
هديل بعد ماسلمت وقالها لها جدها
الخبر الصدمه واقفه وبصدمه وماهي
قادره تنطق بشي ماهر..الا وهو عاد
كيف توافق وتظلم نفسها وحياتها معه..
وكيف تكسر جدها وتفشله ...
تكلم عمها راشد وبتفحص لتغير وجهها
"ليه هم غاصبينك عليه"
خالد على اعصابه والجد متوتر بعد
يعرف ان هديل مستحيل تكسره
وتفشله...
سليمان "انتِ لك الاختيار ياثامر ياماهر"
هديل ومو قادره تنطق بشي وبعد صمت
وتفكير دام لخمس دقايق "موافقه على
................
نقف هنا
وقفه"دائماً يوجد من يستحق
التضحية و العطاء .."
موعنا الاسبوع القادم بإذن الله
سنابيdeema99d
|
21-08-17, 07:57 AM
جديد مواضيع قسم القصص المكتمله من وحي قلم الاعضاء
العرض العادي
