لمشاكل التسجيل ودخول المنتدى يرجى مراسلتنا على الايميل liilasvb3@gmail.com






العودة   منتديات ليلاس > القصص والروايات > قصص من وحي قلم الاعضاء > القصص المكتمله من وحي قلم الاعضاء
التسجيل مشاركات اليوم اجعل كافة الأقسام مقروءة

بحث بشبكة ليلاس الثقافية

القصص المكتمله من وحي قلم الاعضاء القصص المكتمله من وحي قلم الاعضاء


إضافة رد
نسخ الرابط
نسخ للمنتديات
 
LinkBack أدوات الموضوع انواع عرض الموضوع
قديم 19-04-17, 11:17 PM   المشاركة رقم: 156
المعلومات
الكاتب:
اللقب:
ليلاس متالق


البيانات
التسجيل: Mar 2012
العضوية: 236809
المشاركات: 305
الجنس أنثى
معدل التقييم: صباالجنووب عضو ذو تقييم عاليصباالجنووب عضو ذو تقييم عاليصباالجنووب عضو ذو تقييم عاليصباالجنووب عضو ذو تقييم عاليصباالجنووب عضو ذو تقييم عاليصباالجنووب عضو ذو تقييم عاليصباالجنووب عضو ذو تقييم عالي
نقاط التقييم: 707

االدولة
البلدSaudiArabia
 
مدونتي

 

الإتصالات
الحالة:
صباالجنووب غير متواجد حالياً
وسائل الإتصال:

كاتب الموضوع : فيتامين سي المنتدى : القصص المكتمله من وحي قلم الاعضاء
افتراضي رد: جنوبية برت حالي ولاادري وين ديرتهاوكل ماأسأل من ين انتي تجاوبني جنوبية/بقلم نبضي

 


البارت التاسع عشر


اشواق/

وهي تفتح عيونها تحاول تذكر هي وين

فزت واقفه وهي تحس جسمها كله

مكسر من نومة الكنب ،

شافت جدتها نايمة على الكنب

جنبها ماتدري كم مر عليها من

الوقت وهي نايمة ولا عندها

ساعة علشان تشوف الوقت

اخواتها أمها ايش صار عليهم.،!

خرجت من غرفة الحريم لصالة

اللي انواره طافية ماتدري وين جوالها.

راحت لغرفة أمها تطمن عليها

حصلتها نايمة والممرضه نايمة

على الكرسي الثاني قريب منها.

خرجت وهي تروح لغرفتهم فتحت

الباب والغرفة كلها ظلام الكل نايم

ماتدري الساعة كم شكل باقي

في الليل وهي نايمة من الظهر

ثلاث فروض ماصلتها .

فتحت النور وهي تروح تطمن على

ريم اللي باقي على نفس وضعها

الظهر نايمه حطت يدها على جبتها

حرارتها عادية .

اخذت جوال ريم وهي تفتحه وتشوف

انها الساعة 3الفجر .؟

يالله ربي لطف بحالها ونامت

كانت ناوية تاخذ لها حبوب منومه.،

نزلت جوال ريم وهي تروح لسريرها

وتاخذ جوالها وتشوف انه طافي.،

كالعاده دائم تنسى ان عندها جوال.

فتحت النور وهي خايفة انها تزعج

اخواتها بس محد قام اخذت لها

ملابس وادوات التنظيف وعطرها

واخذت سجاده وجلال صلاه.

واخذت لها بطانية جديدة

اخذت شاحنها وطفت النور

وخرجت الصالة .

نزلت اغراضها واخذت البطانية

وراحت تغطي جدتها اللي نايمه في الغرفة.

وخرجت اخذت اغراضها ودخلت الحمام .،

تحتاج انها تغير كل شي في حياتها

نامت وتوقعت انها بتقوم مروقه او مرتاحه

لكن بمجرد ماستوعبت انها صحيت

على طول كل شي صار ينعرض عليها

خلصت حمامها وهي تنشف شعرها

تعطرت ودهنت يديها ورجولها

خرجت وهي تذكر جوالها الطافي حطته في الشاحن.

لبست جلال الصلاه وهي تفرش سجادتها.

وتصلي الفروض اللي فاتتها

وبعدها صلت صلاة الوتر

وجلست على سجادتها مرة تدعي

ومرة تستغفر ومرة تفكر في حالهم .

حست انها عطشانه قامت وهي تخلع

جلال الصلاة وتدخل المطبخ .

اللي كان نظيف وعلى الفرن كم قدر.

فتحت القدور اخواتها مسوين عشى

الحمدلله اهم شي جدي وجدتي وعمي

يتجملون فيهم اخواتها مخلين لها آكل

رجعت تقفل القدور مالها نفس في شي.!

فتحت الثلاجه وهي تاخذ لها علبة مويه

وعلبة عصير .

خرجت الصالة وهي تجلس قريب من جوالها

فتحت جوالها جاها موجود من عمها

شكله بطمن على ريم.

فتحت الواتس وفيه محادثات كثيرة

شافت رقم مو مسجل مرسل لها فتحت

المحادثه وكانت عبارة عن صور

فتحتها وكانت مثل الكف على وجها.

يالله لطفك فيني كل ماقلت هانت جد

علم جديد.

مين ذا اللي جمع كل الحقائق والأدلة ضدهم.


استدعاء لها ولأمها من هيئة التحقيق والأدعاء العام.

أمها اعترفت لها بكل شي انها زورة

لهم جواز سفر وكل شي بس الكلام

ذا من زمان وهي دوبها تدري من أمها.

الله يسامحش يايمه شافت وقت الارسال من

11الصباح مصيبة كبيرة .!

قررت انها تتصل وتفهم كل شي .

:
:
محمد/

في المجلس مع اخوانه ماجاهم نوم

وقاعدين سوالف وهو على اعصابه

كل شوي يفتح الجوال ويفتح الواتس

وكان اخر ظهور لها قبل يومين.

فارس/شباب ماتلاحظون ان جدتي

جحدتنا من جينا هنا امس اتصلت

عليها قلت جده وينش تعالي فقدش

ابغى اسلم علاش .؟!

تخيلوا انها قالت لي ولاني فاضية

لك مشغولة مع بنات ولدي وعساهو

كل حزه سلام وقفلت في وجهي.،!

احمد/وهو يضحك معها حق والله كانت

شفقانه لين شافتهم محمد يلومها والله.،!

فارس/حتى جدي مسكين يحسب لما

تصالح معها انها بتعطيه وجه بس

طلعت جدتي ذيبه مطنشته وساحبه

عليه عند بنات عمي .

محمد/وهو يضحك والله رحمته جدي

اول ليلة قلت له جد تعال نام معنا

في القلط قال لا بنام انا وجدتك

هنا في المجلس مااحب نومة

الأرض وبعد ساعة دخل جدي

هو وبطانيته قلت له ها وينها

جدتي قال بعصبية مالك صلاح.!

فارس/ههههههههههه والله ان جدتي

ذيبه بس محد فلها غير ابوي ماشاء

الله حصل زوجه جاهزه لا خطبه ولانظرة

شرعية ولا مهر ولا شي كأنها طلبية من

مطعم وغير كذا شايلها بيده .؟

وحناهو وجدي يقولون مافي نظره شرعية.

احمد/وهو يضحك لا يسمعك بس ،؟

محمد/فز واقف وهو يشوف رقمها

حفظه عنده بعلامات استفهام.

قام مبتعد عن اخوانه لين خرج

من المجلس وهو يتفقد مفتاح سيارته

ولما تأكد انه في جيبه اخرجه

من جيبه وهو يفتح الباب الخارجي

ويضغط ريموت السيارة ويفتحها

ويدخل فيها ،؟!

تعمد انه مايرد ثالث اتصال منها

رد وليته مارد سمع صوتها اللي

كله بحه نعلبوها ذي عليها صوت يذبح.!

سكت وهو يسمعها تقول الووو

مين صاحب الرقم ذا لو سمحت،

محمد/زفر بقوة علشان يبعد تأثير

صوتها عليه قال بجفاء وانت متعودة

تتصلين على ارقام ماتعرفين من اصحابها.،

فجئه ماعاد سمع لها صوت رفع الجوال

وهو يتأكد إذا باقي على الخط معه.!

سمعها تقول عفوآ مين معي..!

محمد/معش اللي رفعتي عليه قضية

تحرش يادكتورة اشواق.،؟

سمع صوت شهقه منها وهي تقول

محمد ولد عمي.،!

كأنها مصدومة وتبي تتأكد .،،!

محمد/عمومآ اتوقع وصلتش الصور .

أشواق/بحده ايش تبغى مني ياولد العم.،

محمد/ابد سلامتش لش مهله الى بكره

الساعة 12الظهر تروحين تتنازلين

عن البلاغ اللي سويته ضدي.؟

اشواق /واذا ماتنازلت .؟!

محمد /عادي شفتي امش العجوز

ذي العصر انت وهي في القسم

الشرطة هي بتهمة التزوير.؟

وانت بتهمة السفر الى كندا والأمارات

بجواز سفر مزور.،!

ووقتها تعالي ايش يخارجك من محكمة

كندا ويمكن تنسحب منك شهادة الزمالة

الكندية يادكتورة اشواق لانك اخذتيها

وانت مقيمة في كندا بطريقة غير شرعية.؟!

ببساطة العقوبة لش انت وأمش على الأقل

سجن 20سنه وغرامه ماليه حول المليون

ومدري كم تساوي بعملة كندا انت اعرف مني!


محمد /ماسمع منها اي تعليق كأنها تحسب

مقدار الخسارة وتوازنها .،!

أشواق/قالت محمد ترضااها على اختك

اعتبرني اختك وأمي أمك.

والله ماكنت اعرف انه جواز سفر مزور.

محمد /بتقزز تخسين تكونين مثل اختي

اختي ماتناطح الرجال وتخالطهم لا حيا

ولا مستحى .،!

ولا تقارنين أمي فوزية الشريفة في أمش

النصابة الحرامية.،!

وحكاية انك ماتدرين شي مايخصني

القانون لا يحمي المغفلين.

سكتت فترة وبعدها نادته محمد لما سمع

صوتها اللي كله رجاء وضعف غصب عنه

حن قلبه عليها كأنه او مرة يسمع اسمه

قالت المقابل ايش يامحمد علشان

تعتقني انا وأمي.،!

محمد/اولا ذي مو أمش وحده نصابه مزورة حرامية.

ثانيآ قلت لش تتنازلين عن البلاغ الغبي ضدي .

ثالثا تعتذرين مني شخصيا،

رابعآ تروحين بكرة عند جدي تقولين

له جد انا موافقة على محمد ولد عمي

واخواتش معش سامعة.

لان ماهو على كيفش ترفضين وانت تعرفين

ان جدي وجدتي يبغونكم عندهم .

خامسآ والأهم تقديم استقالتش من مهنة الطب

وإلا قسم بالله اني لسود عيشتش انت وأمش.

ولا تفكرين تكلمين جدي او ابوي لأنهم كلهم

شايلين على امش وكلهم بيوقفون معي ضدها

وقفل بدون لا يسمع كلمة وحده منها.،!

نزل الجوال وضاق صدرة مايدري ليش

حس قلبه انقبض بس كان مجبر يضغط

عليها بأمها اتفق مع عبدالله يضبط له

محضر بكل التهم الموجهة لها وكلها كانت

اوراق عادية جدآ كلها كانت فوتوشوب

حتى انها بدون ختم هيئة التحقيق والأدعام

العام لأنه مستحيل يقدم بلاغ على بنت عمه

مهما كان وكانت فرصة اني اضغط عليها

توافق هي واخواتها وانا شفت جدي صدره

ضايق وجدتي تبكي علشانها رافضة

واهم هي انه راح يضمن انها ماعاد تدوام

في المستشفى وهذا اهم شي .!
.
:
:
:
:
اشواق نزلت الجوال وهي تحط يدها

على راسها يارب ساعدني انا استاهل

اللي قدمت بلاغ عليه لكن هو نرفزني

وكانت اعصابي تعبانه ماتتخيل

يكون ذا زوجها لا مستحيل

ذا مجنون ماعنده تفااهم ماتقدر

تعيش معه قامت واقفه وهي تتحرك

لغرفة امها حصلت الممرضة تركب

لها جلسة اكسجين قربت منها

وهي تلقاها صاحية وعلى غير

عادتها ماسلمت عليها ضغطت

الزر اللي في جنب السرير

الطبي لين عدلت أمها وكانت

شبه جالسة مسكت يد

أمها وهي تقول يمه لش

سويتي كل هذا ليش يمه

كله رجع على راسي انا

ليش يمه كان خليتنا نروح

عند اهلنا احسن من الحال

ذا اللي حنا فيه ليش يمه

زورتي اوراقنا ليش يمه

انت متخيله ان تعب دراستي

وغربتي في كندا كله بيروح

والسبب انت يمه كيف

زورتي اوراقنا يمه جاء

عليش وعلي بلاغ يمه

بتهمة السفر وتزوير جواز

السفر يمه على الأقل سجن

لنا 20-او30سنه غير

الغرامه المالية يمه انا ماعاد

تهمني حياتي بس انت

يمه شايفه وضعش كيف

يمه انا بين خيارين كلهم

اصعب من بعض.،!

يااوافق على ولد عمي يمه

او انسجن انا وانت يمه.

عايشة/بندم فات وقته ولاعاد يفيد

قالت لها لاعاد تلومين أمش يااشواق

ماعاد تفيد كلمة لو .،!
وافقي على ولد عمش ماهو علشان

لا يسجني لا والله وافقي عليه

علشان انا ارتاح علشان اخرج من هنا

وانا مطمنه عليش انت واخواتش.،!

ريم تطمنت عليها باقي انتوا.؟!

وولد عمش مستحيل يضرش

ولاقال لش كذا إلا انه يبغااش.،؟

أشواق /بقهر إلا يمه بيضرني فيش

انت يمه.؟!

عايشة /خليه على راحته الله يحسن

لي الخاتمة انا البارح كلمت ولد اخوي

وقلت له اني بجيه خلاص سلمت

الأمانه لأهلها وماعاد لي مكان هنا.

معي بيت في نجران وبجلس فيه لين

الله يختم لي .؟

اشواق/لا يمه والله ماتروحين ليش يمه

ذا بيتش وحنا بناتش ملزومين فيش.

عايشة /وهي تفك يد اشواق لا والله

منتوا بناتي امكم رقية وانا بس

ربيت .؟!

أشواق /يمه إلا انتي أمي انت اللي تعبتي

رقية مانعرفها مانعرف من الدنيا لا خاله

ولاجده ولا احد إلا انت انت اللي تعبتي

وسهرتي انت اللي علمتي ،؟!

عايشة/بحسرة وهي تذكر كيف البارح

لما جت هيلة تسلم عليها شافت في عيونها

الخوف واشياء ماقدرت تفسر إلا بتفسير

واحد ان كيفها ولدها الشباب تزوج عجوز

مثل ذي صح انها جاملتها وسولفت معها.؟

شافت كيف ان بنات ولدها ملتمين حول جدتهم

ويضحكون ويسولفون كأنهم يعرفونها من سنين.

عرفت ان الحق رجع لأصحابه مهما غاب .

قالت انا لازم اروح بس مابروح إلا بعد الملكه

باخذ الممرضة وواحد من السواقين معي

والمكان قريب وببينا الجوال يقرب البعيد،؟!

أشواق /ناظرت في أمها وفي قلبها عتب

عتب كبير بس ماتدري لمين لأبوها

اللي شرد من اهله ..او لأمها اللي

سوت اشياء كثيره لهم .

وعلشان تساعدهم سوت في المقابل

اشياء بتضرها هي اكثر .

خرجت بدون اي كلمة لانها تعرف ان

كلامها ماراح يغير من قرار امها

شي .؟!

وصلت الصالة وهي تسمع صوت

الأذان لبست جلال الصلاة

وصلت السنه وبعده الفجر

وبعده جلست تصلي ماتدري

كم ركعه بس كانت بحاجه انها

تكون قريبة من ربي هي تدري

ان ربي يعلم ايش في داخلها

حتى بدون ماتتكلم

كانت بس تقول يارب وتخنقها

العبرة ولا تقدر تكمل إلا بكلمة

يارب والباقي وحدك تعلمه،؟
:


بعد الفجر


ريم /
وهي تحاول تستوعب كلام امها واخواتها

تحس انهم يكذبون كيف ان علي عم البنات

يصير زواجها لا مستحيل .،!

امهاعايشة نادتها وقالت لها كل شي.

هي متزوجة من 18سنه قبل موت احمد ابو البنات

اعطتها خزامى عقد النكاح

وهي تفتحه و تناظر فيه بسرعة

لين وصلت عند اسم الزوج علي محمد احمد ال زايد


اسم الزوجة ريم منصور ناصر ال مزهي..


كيف يزوجونها بدون ماتدري


علشان كذا امها كل ما تقدم لها

عريس ترفضه بدون سبب مقنع.،!

مستحيل تسكت .،!


ريم بصراخ وهي تناظر في امها واخواتها

ماهو على كيفكم تتحكمون في حياتي

خلاص لحد كذا يكفي والله مااسكت لكم .

وانت وهي تأشر على خزامى تروحين

ذحين تنادين الكلب عمش اتفاهم معه

حسبي الله عليه وعلى ابوش مثل مادمروا حياتي.

خزامى /بعصبية ريم احترمي نفسش ياناكرة المعروف


تتحسبين على ابوي اللي ضفش

واعتبرش مثل بنته وعلشان خايف

عليش زوجش بأخوه جزاتهم يعني.

ماتفهمين انت امش وخوالش مايبغونش مرة

ريم/بصراخ وكمية الوجع من الحقيقة تزداد

رقعتها في قلبها الله لا يكثر خيرهم كان خلاني

خلاني ابوش واعتقني لوجه الله احسن من الحال هذا

خزامى /بقهر لو ماالله ثم ابوي ماكان حالش كذا

ماتحمدين الله تتبطرين على النعمة عشتي احسن


عيشه معززة مكرمة واحمدي ربي ان عمي زوجك شيخ

ولد شيخ لا داشر ولا سكير وقربت منها وهي

وهي تمد لها بورقة شوفي عمي اللي تسبين فيه

امس كله يراجع في إيجازة لش وموقعة من المديرة

ويقول السنه ذي راح تنقلين المدرسة اللي تختارينها

هنا في أبها .

ريم/ لما سمعت كلام خزامى جن جنونها وتصارخ لين

خرجت من الغرفة وهي تسب وتشتم ماخلت

احد إلا ودعت عليه نار في جسمها مستحيل تسكت

و تستسلم لهم دخلت الغرفه وهي تلبس عبايتها

وطرحتها واخذت نقابها وخرجت

وهي تشوف خزامى واقفة عند باب

الصالة اعترضت طريقة وهي تقول

ريم بلا خبال عن حركات الصغار

وين رايحة عمي نايم اهجدي اقول.

ريم/بعصبيه جعلها نومته لاعاد يقوم

انقلعي من وجهي وهي تصاارخ

صوتها وصل لكل مكان في البيت .
:
:
:
:
علي/بعد ماصلى الفجر هو وابوه وعياله

رجعوا ينامون وهي قاعد في المجلس

يفكر يحس كل انه مرهق امس كله

ماارتاح اهم شي انه راح وكلم خالة

وقال له بكل شي وحس بتغير في وجه

خاله وعياله بس اهم شي انه كلمهم.!

خرج من عندهم وهو يخلص اوراق ريم

اضافها معه في كرت العائله اخذ لها إيجازة

استثنائية يعرف واحد في إدارة التعليم ماقصر

معه وطلعت المديرة بنت جارهم في الرياض من زمان.

يحس بفرحه ماتوصف كأنه اول مرة

يتزوج باقي ريحتها لاصقه فيه.

تواصل مع خوالها وزوج امها علشان

ياخذ منهم موعد علشان يروح ويخطبها

رسمي على الأقل علشان نفسية ريم

بس انصدم لما خالها قال مالنا كلام

عليها مرة ابوها موقعنا على تعهد

بعدم التدخل فيها.

كلم زوج امها اللي حس من كلامه

ان ريم غير مرحب فيها عندهم ومحتار ايش يسوي..

سمع صوت صراخ قوي رفع يده وهو يشوف

الساعة6الصباح يالله صباح خيرر.

فز واقف وهو يخرج خطر على باله

انها العجوز عايشة جاها شي

خاف رغم انه يكرها كره مايوصف

خرج من باب المجلس بدون حتى مايلبس حذيانه.!

سمع صوت عياله اللي اكيد قاموا على صوت الصياح

يسألونه ايش صاار.!

وبدون مايلتفت لهم قال مدري.

خرج من السيب اللي يفصل

بين مدخل الحريم والرجال .

وهو يشوف خزامى تحاول تدخل

زوجته عرفها من اول ماشافها

ياحياة النكد ريم ذي والنهاية معها

شكله بيتعب معها ولا يلومها ابد

اللي صار لها شي ماهو بسيط.

وصل لهم وهو يسمعها تسب وتهاوش

قال بصوت عالي خلاص فكيها ياخزامى

وهو يقرب منها وخزامى تلقائي بعدت عنها

علي/خير ايش اللي صاير هنا الصراخ ذا

اللي واصل نهاية الشاارع .

ريم /لما شافته سكتت بمجرد ماسمعت صوته

الغاضب حست بخوف منه ماتدري ليش

سكتت فجئه وهي تشد على النقاب بيدها

كان اطول واعرض منها النسخه الثانية

من اخوه احمد كل الكلام اللي كانت بتقوله

نسيته شي خلاها تسكت غصب .

وهي تناظر في ملامح وجهه الحاده .

علي/وهو يناظر في وجها المصدوم وهي تناظر فيه

حس بأحساس حلو الشرسة ذي زوجته

اللي يشوفها يقول اكيد تدرس المتوسط او الثانوي

والله صغيرة وهو يشوف قصرها ونحافة جسمها

فرق بينها وبين خزامى اللي اطول منها بكثير ..

يمكن امها الخبيثه عايشة مزورة تاريخ ميلادها

مايصعب عليها شي.

بس تأكد لما حصل شهادة ميلادها .

لازم يكون شديد معها الظاهر ماينفع معها إلا الشدة .

قرب منها وهو يركز في عيونها اللي كلها

مليانه دموع متورمه من كثر مابكت يالله

ماتشبع ذي من البكاء لها ثلاث ايام وهي تبكي


رجع ناظر في خزامى وهو يبتسم لها وقال ايش فيها.

خزامى /بحب لعمها ناظرت في ريم ورجعت تناظر

عمها معصبه لانها عرفت انك زوجها وليش تاخذ لها

إيجازة،!

علي/وهو يقرب من خزامى ويحضنها بحب نسيت

احضنش اليوم فكها وهو يرجع يناظر ريم وبس معصبة

علشان كذا .،!

ريم /جن جنونها وهي تشوفه يتكلم ببرود

رجعت تصارخ وبس ها يعني ذا مايكفي

ايش دخلك فيني ليش تقدم لي على

إيجازة بصفتك مين ها وهي تصارخ.

علي /وهو يقرب منها مسك يدها وهو

يقول اص اسكتي ولا كلمة خلا.

ريم /وهي تحاول تحرر يدها من قبضته

فك يدي والله مااسكت مالك دخل فيني

فكني وهي تقاومه لين فكها مشت

وخلته واقف هو وخزامى قالت

والله ماغير اقدم عليك بلاغ

والله لاتحسب اذا ماعندي سند

انك راح تتحكم فيني خنقتها العبرة وهي تبكي

حسبي الله عليكم كلكم وعلى اخوك في قبرة

الله يجعل حوبتي ماتتعداكم .؟!

خزامى /بعصبيه هي انت لاعاد

تتحسبين احترمي نفسش.

علي/طفش منها تحرك بخطوات سريعة

وهو يشوفها تحاول تلبس نقابها مسكها

من يدها وهو يسحبها تعالي اقول بلا دلع.

عجز انه يسحبها كأن رجولها مثبته بغراء

اخر حل دنق وهو يحط يديه تحت رجولها

ويشيلها وهي ترافس وتبكي .

تجاوز خزامى اللي واقفه عند الباب

ودخل الصاله وهو شايلها.،!

دخل نفس الغرفة اللي امس دخلها

وقفل الباب برجله نزلها الأرض بشويش

مسك يدها لين تعدلت في وقفتها .

حس اول مرة في حياتها يعصب

كذا طبعه هادي لكن ريم ناوية

تطلع له الشيب من بدري،

شافها تمسح عيونها بكم عبايتها

وهو يناظر فيها بعصبيه وهي

ترجع لورا وهو يتقدم منها

لين لصقت في التسريحة

وهو قرب منها لين لمست رجوله

رجولها وهي تناظر فيه

علي/حاول قد مايقدر يضبط نفسه

ويصبر عليها االلي صار لها شي

ماهو بسيط شافها وهي تبادله نظرات

خوف وارتباك اخر شي غمضت عيونها

رفع يده وهو يفك طرحتها عن شعرها الأشقر .

قرب منها وهو يحط يده ورا ظهرها وقربها

منه لين لصقت فيه حس فيها وهي ترجف

بين يديه رفع راسها له وهو يشوفها تغمض

عيونها وتشد عليها بقوة صف رموشها الكثيفة

خشمها متوسط الطول بشرتها البرنزية الصافية

شفايفها الصغيرة المكتنزة كل شي فيها صغير

طفله والله .

رفع يده وهو يفك شعرها من ورا ويطيح جزء منه ع وجها

ريحة شعرها وارتجافها بين يديه هدوء المكان ماغير

صوت انفاسه المختلط بعطرها.

حس في نبضات قلبه تتسارع

من زمان عن الشعور ذا من زمان

ماعمره حس كذا شعور جديد وجميل مبطي عنه.

قال لها بصوت هامس ريم ،!

ماسمع منها جواب غير شهقات متقطعة .؟

رق قلبه لها رفع راسها مرة ثانية وهو يناديها

ريم افتحي عيونش.،!

ريم/وهي تحس انها معلقها رجولها

ماتلمس الأرض يده اللي على خصرها تحرقها .

شعور تحسه اول مرة في حياتها ماتدري ايش هو.!

كل ماحاولت تاخذ اكسجين دخل

لرئتها مختلط بريحة دهن العود الثقيل

تحس انها بتختنق من قربه من كل شي،

لما سمعت صوته وهو يناديها بصوت رخيم

ويشد على حرف الراء بثقل وهو ينقط اسمها .

حست نبضات قلبها تتسارع شعور ماتدري ايش هو.

حست فيه وهو يحضنها بقوة لصدره

حست انها تراخت بين يديه حست روحها تسكن .

فتحت عيونها لما حست بلمساته

على خدها وهمسه وهو ينطق اسمها بطريقة

ذوبت مفاصلها.!

وهي ترجف تحس لو فكها بتطيح،

بعدها من صدره شوي وهو يقول ريم اعرف انش تعبانه

واللي صار لش شي كبير ولا بيدي ولا بيدش شي .

واللي تسوينه ماراح يغير من وضعش شي .

ماكنت اتمنى ان زواجنا يكون بالطريقة

ذي ابدآ.،

لكن هو تم على كل حال ولعلى في الأمر خير.

ريم انت ذحين زوجتي على سنة الله ورسوله

ومستحيل اتخلى عنش مهما كان

وقبل كذا انت وصية الغالي احمد

علشان كذا انا تحت امرش في اي

شي تطلبينه إلا الطلاق مستحيل اطلق ..

ريم/بضياع ولا تدري ايش تبغى

بالضبط .؟!
امها تخلت عنها وهي صغيره علشان

زوجها اللي رفض وجود ريم .

ومستحيل ذحين يقبل فيها .

وماعندها لا عم ولا اخ ولا سند.

بس تحتاج تشوف امها.،!

ناظرت في عيون زوجها اللي كلها حنان وآمان.

رفعت يديها اللي ترجف

لوجهه القريب منها وهي تقول

بصوت مبحوح من كثر مابكت

وصارخت وبنبرة كلها رجاء اوعدني ماتتخلى عني.

علي/وهو يحس بيدها ولمساتها

الخفيفه على وجهه حس بفرحه

خلته ينسى كل شي

حتى خوفه من مواجهة جميلة

نساها تحت لمساتها لوجهه وكلامها له ونبرة الرجاء

في صوتها..

حضنها وهو يقول اوعدش

ياريم اكون زوج وسند وصديق

وكل شي والله ماتندمين والله.

ريم /رجعت تغمض عيونها واحساس

الضياع يرجع لها

فكت نفسها منه وهي تقول

ابغى اشوف امي عادي تقدر توديني لها .

علي/وهو يحررها منه ابشري

من عيوني اصلا كنت باخذك

لها بس ماكنت عارف كيف اقول لش

تجهزي وانا انتظرش باس راسهاوخرج ..

:
:
:

انتهى
غراس الجنة/سبحان الله والحمدلله ولا اله الا الله والله اكبر يغرس لك بكل واحدة شجرة من الجنة".

 
 

 

عرض البوم صور صباالجنووب   رد مع اقتباس
قديم 19-04-17, 11:24 PM   المشاركة رقم: 157
المعلومات
الكاتب:
اللقب:
ليلاس متالق


البيانات
التسجيل: Mar 2012
العضوية: 236809
المشاركات: 305
الجنس أنثى
معدل التقييم: صباالجنووب عضو ذو تقييم عاليصباالجنووب عضو ذو تقييم عاليصباالجنووب عضو ذو تقييم عاليصباالجنووب عضو ذو تقييم عاليصباالجنووب عضو ذو تقييم عاليصباالجنووب عضو ذو تقييم عاليصباالجنووب عضو ذو تقييم عالي
نقاط التقييم: 707

االدولة
البلدSaudiArabia
 
مدونتي

 

الإتصالات
الحالة:
صباالجنووب غير متواجد حالياً
وسائل الإتصال:

كاتب الموضوع : فيتامين سي المنتدى : القصص المكتمله من وحي قلم الاعضاء
افتراضي رد: جنوبية برت حالي ولاادري وين ديرتهاوكل ماأسأل من ين انتي تجاوبني جنوبية/بقلم نبضي

 

البارت العشرون


محمد/

وهو ينشف وجهه وهو معصب

ايش قلة الحيا ذي صراخها

صم أذني وجع يوجعها ازعجتنا

ذي من اولها كذا اجل الله يستر من تاليها.

فارس/

اللي مازال منسدح بالله صوت مين اللي قبل شوي.

محمد/مين غيرها زوجة ابوي الجديدة.

فارس/بكره ايش عندها حياة الفهد

كل يوم وهي تبكي.،

محمد/مدري عنها خلعت قلبي حسبت

جدتي فيها شي قلة حيا.

احمد/حرام عليكم ماتدرون عن ظروفها

ترى اللي صار لها شي ماهو بسيط.،!

وقبل يكمل سكت وهو يشوف ابوه

يدخل وهو ياخذ ثوبه اللي معلق

على الباب وشماغه ،؟

قال انا بروح عندي كم مشوار

بخلصه ويمكن اتأخر ماارجع

إلا الساعه 2في الليل.،!

بكرة الصباح رحلتنا على الرياض.،!

بيجونا خالي علي وعياله وابغاكم

تكونون معي .

ابوي وامي رافضين يرجعون الرياض

بيجلسون هنا مع بنات احمد.

وانت يامحمد واحمد ضبطوا

لكم إيجازة علشان الملكة .

:
:

بعدها بسااعة علي/

علي/
له ساعه من خرج من أبها وماسك طريق

نجران باقي حدود ساعة ونص ويوصل

المسافة بين ابها ونجران حدود247ك

تذكر اولاده اللي كل اسبوع

او اسبوعين مع الطريق ذا

اذا ماحصلوا حجز لرياض.،!

متى تخلص الحرب ذي على

خير كل يوم يدعي ان الله يرد

له عياله سالمين وينهي الحرب على خير.

ناظر في ريم اللي ساكته من ركبت

معه مسنده راسها على شباك السيارة

ماقال لها انها تواصل مع خوالها

وزوج امها مرة علشان تسمع هي

وتشوف وتقتنع .،!

خفف من السرعة وهو يشوف محطة

قريبة لازم يعبي بنزين وينزل يشتري

لها اي شي تاكله اشواق قالت له

انها من يومين او ثلاثه مااكلت شي

مايدري كيف باقي تقدر تتحرك.،

وقف وهو يفك حزام الأمان .

احتار ايش يجيب لها قرر يسألها ناداها ريم!

ماسمع منها اي رد توقع انها نايمة قرب ومسك يدها

ولما حست فيه فزت بقووة .

علي/بسم الله علاش ريم لا تخافين

بنزل البقالة ايش تبغين اجيب لش .

ريم /وهي تحط يدها على قلبها من الخوف.

عدلت نفسها وهي تفك يدها من يده

قالت بصوت مبحوح ما ابغى شي .،

علي/نزل وهو مقرر يشتري لها اي شي.،!

ريم /وهي تلف تناظر في زوجها لما استوعبت

الكلمة بس ماتدري ليش عورها قلبها ،

زواج غريب كم تمنت انها تتزوج وتفرح

انتظرت الفرحه ذي من زمان .،!

كان حلمها بيت وزوج واطفال .،!

جاء زوج بدون موعد وبطريقة

ماحبتها ابد تحس كأنها كانت حمل ثقيل.

ماعاشت ولا لحظه حلوه مثل ماكانت تخطط

لها لا فكرت لا استخارت ولا شي .،!

لو فكرت فيها من جانب ثاني علي

مناسب لها كازوج مناسب تمامآ

هي ماتدري كم عمره بس واضح

من شكله انه ماهو شايب .،؟

عنده اربع اولاد شباب وبنت وحده

مثل ماسمعت من اخواتها.،!

اخواتها اللي تحس انهم احسن وافضل

حال منها على الأقل رجعوا لهم اهلهم

شافت كيف الحب والأهتمام لهم من اهل ابوهم.

لكن هي ماتدري كيف بيكون استقبال امها لها.!

راح تحاول في امها راح تعطيها كل

اللي تملكه فلوس الفله والمحلات وكل شي

بمقابل انها تحس انها مقبوله او احد راضي

فيها .،؟

لفت وهي تناظر في زوجها اللي فتح

الباب وبيده اكياس.،؟

ماتنكر انه وسيم واجمل منها بكثير بياض بشرته

ماشاء الله ماتأثر بأي شي نفس بياض اخواتها.

والعوارض المحدده بدقه

لابس ثوب اسود ماسك على جسمه

المتناسق نظاره شمسيه من ماركة معروفة.

كبكه الفضي وساعته الفخمه .،!

بدون شماغ شعره الأسود الكثيف

واصل لين رقبته.

شافته وهو يمد لها بعصير وفطيرة

قالت له والله مااقدر مشكور،

وهي تلف بوجها عنه .

مسك يدها وهو يحط الفطيرة

بيدها ويقول ريم علشاني .

وبيده الثانية يحط علبة العصير في المكان المخصص له.

ناظرت في عيونه خاصة لما قال لها علشاني تبغى تتأكد

ليش قال لها كذا ،؟!

ماشافت في عيونه غير نظرات كلها حنان وحب.!

مسكت الفطيرة وهي تلف عنه اخذت قطعة منها

رفعتها لفمها من تحت النقاب.

بمجرد ماشمت ريحتها حست

بغثيان ومعدتها تقلب عليها.،

و بسرعه تنزلها وتسحب فاين وتحطها فيه.!

وتناظر فيه وتقول والله مااقدر احس برجع.؟

ماتدري ليش قاعده تبرر له

معقوله ان له خاطر عندها وخايفه عليه.،!

شافته يمد لها بعلبة المويه وهو يقول

طبيعي تحسي بغثيان لان معدتك

فاضيه كم يوم مااكلتي شي .،!

اشربي بس على الأقل مويه.،؟

صوته وهو يكلمها كله حنان .،!

اخذت المويه من يده وبمجرد مالمست

يده شالت يدها بسرعه .

شافته ينزل المويه ويرجع يشغل

السيارة ويحركها بدون ولا كلمة

ورجع الصمت في السياررة .،؟

غمضت عيونها وهي تتمنى توصل

بسرعه تبي تشوف امها هل تشبه لها ..!

هل عندها اخوان تتمنى ان عندها

اخوان تبي عزوه وسند .،؟

فتحت عيونها وهي تسمع صوته

الرخيم يكلم في الجوال.

علي/وبثقل يليق فيه هلا قاسم انا عند دوار النخيل

وين البيت .،!

ريم /تعدلت في جلستها وعرفت انهم

وصلوا حست في تسارع في نبضات

قلبها خايفه من المواجهه كثيرر،؟!

شافته يدخل حاره قديمه مررة

وقف عن بيت قديم بابه مفتوح..؟

وقريب منه عيال يلعبون على كومة تراب

ملابسهم كلها وسخه وشعورهم منكوشه .

بمجرد وقوف سيارتهم وقفوا يناظرون لهم .

بلا شعور ابتسمت وهي تقول اكيد اخواني .؟

لفت تناظر في زوجها وقالت انزل .

علي/بضيق لا انتظري لين يطلع لنا زوج امش.

ريم/حست بخوف من طاري زوج

امها اللي رفضها وهو سبب في كل

شي صار لها ايش كان بينقصه

لو خلاها مع امها.،؟

شافت زوجها وهو ينزل ويفتح

الباب الخلفي وينزل شماغه ويلبس

الطاقيه والعقال وبعدها رجع اطراف

شماغه لورا.؟

قاسم/واقف باب بيته وهو يشوف

السيارة الفخمه اللي واقفه

والشخص اللي ينزل.؟؟

راقبه بنظرات بارده وهو يلف

ويفتح باب السيارة الأمامي

وتنزل منه وحده اكيد انها ريم.،!

وذا زوجها ولد عز اكيد من شكلة

حتى في مشيته .،!

وقف قدامه علي وهو ماسك يد ريم

ريم بمجرد ماشافت اللي واقف قدامهم

تلقائي لصقت في زوجها .،؟

معقوله ذا زوج امها شكله يخوف

قصير وسمين لابس ثوب بني

شعره الأشعث.،!

عيونه الحمرا كأنها دم .

خشمه الكبير الافطس .

كرشه الكبير ماتدري كيف يقدر يتحرك منها.


وبدون اي كلمة منه كان بس

يتفحص زوجها بنظرات تخووف

شدة على يد زوجها بقوة تتمنى

تقول له خلاص نرجع .،؟

علي/وهو من شاف قاسم قدامه

عرف ان ابو ريم معه حق انه

يطلب من خوال ريم تنازل

وحمدالله الف مرة ان ريم ماكانت

تحت بيت الإنسان ذا.،؟

من نظرة عيونه عرف انه راعي شراب.،؟

حتى من ريحته وهو باقي ماسلم عليه.،؟

حتى ماكلف نفسه يرحب او يقول تفضلوا.

علي/وهو يتحسس المسدس الصغير اللي

في جيبه.،!

قال بصوت جهوري السلام عليك ياقاسم.،!

انا علي زوج ريم وهذي ريم جت تسلم على

آمها.،!

قاسم/وهو يناظر في علي قال وعليكم

السلام وهو يبعد عن الباب ويقول ادخل.،!

علي/ماارتاح وتمنى انه ماجاء هنا مرة

شد على يد ريم وهو يسمعها تقول علي

الله يخليك خلنا نرجع خلاص ماعاد ابغى

اشوف امي خلاص .،!

علي/وهو يمشي معها وماسك يدها افا

تخافين وانا معش لا إن شاء الله تشوفينها

وتنبسطين ومايصير إلا كل خير .،؟

دخلوا وكان البيت عبارة عن حوش

فيه غرف متفرقه بشكل مزري .

حتى الأنارة كانت ضعيفةشاف قاسم قدامهم يأشر

لهم .،؟

دخلوا عنده غرفة عبارة عن جلسة

ارضيه قديمةفيها بقع الوساخه منتشره عليها.

علب الدخان المبعثرة والشيش وعلب المويه بكل مكان

مكان مقررف .،؟

جلس علي هو وريم جنب بعض

وريم مافكت يده مرة وهي تتلفت

في الغرفه بخوف وهي تحمد الله

الف مرة انها ماعاشت هنا .

علي/وهو يناظر في قاسم اللي يناظر

في ريم بنظرت ماتطمن رغم انها ماخلعت

نقابها .،!
علي ماعجبته نظرات قاسم لريم وقال

وين عمتي امنه بنسلم عليها ونمشي .،!

قاسم /ويجلس بصعوبة من كرشته

قال جايه ذحين .،!

ثواني إلا يدخل عليهم واحد اسود

طويل ونحيف لابس بنطول جنز وبلوزة احمر.

بمجرد ماشافه علي فز واقف وهو

مستغرب دخوله عليهم بالشكل ذا

قاسم /على هونك ياعلي ذا ولدي

فادي من زوجتي الثانيه .

علي/بمجرد ماسمع كلامه عصب

وقال وليش يدخل كذا على زوجتي.،!

وإلا ماتعرفون سلوم العرب،

فادي اللي من شاف علي هب في

وجه خرج بسرعه.،!

قاسم /وهو يناظر في علي ماعليها

منه شي جاء بيسلم ريم مثل اخته .،!

علي/رجع جلس جنب ريم وهو يمسك

يدها وهو يشوفها كيف ترجف .

شد على يدها وهو يقول اش اهدي

ذحين بتجي امش ونطلع على طول

لاتخافي انا معش.،!

ريم /وهي تبكي بشويش تحس انها

ضايعة كأنها بوسط البحر وتتمسك بقشة.

جت لأمها على اساس خلاص بتجلس

عندها بس لما شافت الوضع ذا ماراح

تقدر تعيش هنا.،!

بتحاول في امها تاخذها معها راح تغريها

بفلوسها بتكتب الفله بأسمها اهم شي

تروح معها لازم تضحي بزوجها وعيالها

علشاني المره ذي مثل ماضحت بها علشان

زوجها،،!

علي/وهو كأنه جالس على النار عيونه على الباب

شوي .،!
وشوي على قاسم اللي ماارتاح له ولنظراته لزوجته

حتى لاضيافه ولا استقبال مثل الناس.

قال لقاسم ماشاء الله كم عندك عيال.

قاسم هو يشوف نظرات علي له قال

عندي 9اولاد من زوجتي الاولى بس،

علي/ماشاء الله وعمتي امنه كم عليك

منها عيال .،!

قاسم /ماحملت امنه مرة.

علي/مايدري ليش حس بفرحه

ان عياله من ريم مالهم خوال ابوهم

قاسم قال خيره فيما اختاره الله .،!

قاسم ماعلق وهو يشوف زوجته

تدخل ملتفه بعبايتها وهي تقول

هلا يامرحبا حياالله من جانا

علي/من شافها فز واقف وهو يشوفها تتقدم منه

وتمد يدهاوهي لابسه جونتي اسود.

صافحها وهو يرجع ويشوف ريم اللي باقي جالسة

ماوقفت بس تناظر في أمها ؟

دنق لها وهو يمسك يدها لين وقفت ويحط يده

على ظهرهاويدفها لقدام علشان تسلم أمها

ريم سلمي على امش .

بس ماتحركت وماسكه يده بقوة .؟

قال عمه قربي من ريم شكلها مستحيه من قاسم.

ريم /تناظر في امها بدون ماترمش ابد

وكل حماسها انها تشوفها راح ماتدري ليش.

حست في امها تقرب منها بخطوات ثقيلة

وهي تحضنها بقوووة فكتها وهي تحس في

أمها ترجف جلست جنب امها اللي تسألها

عن احوالها وريم ساكته ماترد.،!

علي/لما شاف الوضع كذا ناظر في

قاسم وقال ايش رايك نطلع برا

علشان ريم تاخذ راحتها مع عمتي.

قاسم /قام بصعوبه وهو يخرج وعلي

وراه اللي من تحرك فزت ريم وهي

تقول وين رايح لا تروح وتخليني.

علي/لما سمع كلامها اللي كله رجاء

حس قلبه يتقطع قرب منها وهو يلف

ويتأكد ان قاسم خرج رفع نقابها

وهو يقول لها بشويش مستحيل

اروح واخليش راح انتظرش برا وخرج.

ريم /وهي تناظر فيه لين خرج

وقفل الباب وراه وهي تحس

ان صدرها بينكسر من الضيق اللي

سببه خروج زوجهاحست انها خايفه حتى من امها.

ناظرت في امها اللي شالت نقابها

بعد ماخرج زوجها وقالت تستفسر انت أمي.

امنه/وعيونها كلها دموع حضنت بنتها

وقالت ايه انا امك ياريم سامحيني

والله لاهو بيدي الله شاهد ان امش من سنين

ماذاقت طعم السعادة .!

تزوجت ابوش غصبن عن اهلي رفضوا علشان انه

متزوج .؟!

رحت للقاضي وقلت له اهلي منعوني اني اتزوج

اللي اريد.


قام القاضي ارسل لأبوي واخواني

وزوجوني ابوش وهم مجبورين .

ابوي تبرأ مني وحرمني عليه هو

واخواني كنت طايشة وصغيرة .

ولا هتمت لهم رحت مع ابوش

وحملت فيش على طول .

سكنت مع زوجته هيا

اللي ماخلتني اذوق طعم الراحة

ولا ارتحت وانا محرومه من أهلي.

جيت اطلب رضا اهلي قالوا

طلاقش هو رضانا

احترت بين زوجي وبين اهلي.،

وبعد ولادتي فيش تغير ابوش

علي وصار يعايرني بأهلي اللي تبروامني.

جيتهم مرة ثانية اطلب رضاهم قالوا رضانا طلاقش.

فعلا طلبت الطلاق من ابوش وغصب طلقني

ويهدد ياخذش مني اخواني اخذوش من صدري

واعطوا ابوش وقالوا خذ بنتك

مالنا فيها حاجه وانا ابكي عليش.

وبعد ماخلصت العده زوجني

ابوي الله يرحمه قاسم ولد عمي

بعد مامات زوجته معه 9عيال

كلهم صغار .

وذقت مع قاسم اشد انواع العذاب.،!

ومازلت اتعذب .

سنين وانا ياريم مانسيتش كنت اقوم تالي الليل

وانا احس بنار بصدري واقول والله انها ريم

تبكي او جيعانه وانا مااعرف لش طريق!

من حر مافي قلبي على فراقش

دعيت الله اني ماعاد احمل من بعدش..!

استجااب الله دعوتي حتى الدورة

ماعاد جتني لحد اليوم.

جاني قاسم مرة بأوراق ابصم عليها.

ولا ادري ايش هي وقعتها واخذها

وخرج .ولما رجع سألته قلت له اوراق

ايش اللي بصمتني عليها .
قال تنازل مدى العمر عن بنتش ريم .،!

ضاقت بي الدنيا بكيت ايام وشهور وسنين.؟

جانا خبر موت ابوش طلبت اخواني وقاسم

يدورون لش رفضوا قالوا وقعنا محظر في الشرطة

مانتدخل في بنت منصور لا من قريب ولا من بعيد.


بكيت لين فقد النظر في وحده من عيوني.،!

قبل امس جاني خالش حسين

وقال لي ترى زوج بنتش ريم كلمني

ويقول بتجي تسلم عليش

بكيت كيف بنتي تزوجت وانا مدري ووينها فيه.؟

ماصدقته لاهو ولا قاسم ..؟

الا لما شفتش ذحين .

وهي تمسك وجه ريم

بشريني عنش انت اخبارش

وين كنت السنين ذي كلها.،!

كيف الله سوا فيش .

ريم /وهي ترجع وتحضن امها

اللي مالها يد في كل اللي صار

ماتدري هي تلوم امها او ابوها

او تلوم مين .،!؟

رفعت راسها وهي ماتبغى تضيق

صدر امها قالت انا بخير ابشرش

ولا ادري عن اي شي يمه

حتى انت مادريت انش انت

أمي إلا قبل كم يوم أمي عايشة زوجة ابوي

قال لي كل شي.؟

وحكت لأمها كل شي صاار لها في حياتها

وهي تشوف امها تبكي

حضنت امها بحب وهي تقول

يمه انا احتاجش جنبي يمه

انا يمه باخذش معي أبها

عندي هناك فله وعندي

خير كثير بكتب كل شي

بأسمش يمه بس تعالي معي.

وانا بطلب الطلاق من زوجي يمه ماابغاه ابغاش انت.

امنه/وهي تشوف بنتها قدامها عروس

كيف كبرت وهي بعيده عنها

وتطمنت اكثر انها معلمة سعادتها

لاتوصف وهي تسمع اخبار بنتها

اللي تشرح الصدر نسيت الم سنين فراقها

في لحظة لما شافتها.؟

لكن ماتقدر تخلي قاسم وتروح مع بنتها

غصب خلاها تشوف بنتها وشرط عليها

ماتدخل عند زوج بنتها إلا وهي لابسه

حجاب كامل كان يحط شروط تعجيزية لها.

قاسم اللي ذاقت على يده اشد انواع العذاب

خلاها خادمة عنده وعند عياله

اللي خرجوا نسخه من ابوهم أب فاسد

وضايع وعياله مثله تحمدالله ان ماجاها

عيال ابوهم قاسم.،!

مسكت يد ريم وهي تقول لها بحب

ريم وانا امش زوجش لا تفرطين فيه

عضي عليه بأسنانش بكل قوتش

زوجش شفته ماشاء الله رجال

كثر الله خيره حزة انه جابش

لي ودور وسأل كله علشانش.،!

حافظي عليه وانا بخير ماعلي

خلاف وبكون بخير اذا شفتش

مرتاحه ومبسوطه ،؟!

وأمش عايشه لا تنسينها لها جميل

في رقبتي ورقبتش ولا بنقدر نجازيها.

وقاسم زوجي و ولد عمي ولا بقدر اخليه مهما كان.

ريم /شافت الباب يفتح بقوة نزلت نقابها

بسرعة وهي تشوف قاسم يدخل فجئه

ودخل بعده علي اللي من شافها ابتسم لها

بسمته ذي مايدري قد ايش اسعدتها.

شافت امهاتوقف وهي تعدل نقابها

وتروح توقف جنب زوجها قاسم الكريه

قالت /الله يحييك ياعلي الف واعذرني

على القصور في حقك ..!

وقبل تكمل علي اللي يناظر في ريم

ابد معذورة يا أم ريم وابيض وجه

وشوفتش تكفي في ذمتي ايوالله اني صادق،

ريم وهي توقف جنب زوجها وتمسك يده

شد على يدها وهو يميل لها ويهمس

ها بشري ارتحتي ذحين .

هزت راسها له بدون صوت .،

علي/قال ياعمه ان شاء الله بسوي حفلة

لريم في أبها ولا استغني عن حضوركم

انت وقاسم ابيكم تجون تشريف لريم

وانا بكلم خوالها .،!

وقبل ماترد امنه قال قاسم بطمع في

علي من شاف سيارته وهيئته قال

من وين لها فلوس وسيارة ووين نسكن

ابها ولاهي قريبة وانت شايف كيف حالتنا.

علي/عرف انه يبي فلوس بس لجل عين

تكرم مدينة بيسكته بكم قرش علشان

يجيب عمته لريم .،!

ويعرف اذا اعطاه الفلوس مستحيل

يعطي ام زوجته شي قال بحكمة

ابشروا بالخير اعطني رقم حسابك

واحولك لك مامعي ذحين شي .

قاسم/ بفرحة قال ثواني بس واروح اجيب

بوكي فيه رقم الحساب وخرج بسرعة.

علي/بعجله قرب من عمته وقال عمه

مهر ريم 70الف ريال .

واخرج عشرة الآف وقال شيليها بسرعه قبل

يجي قاسم .،!

كسوه لش من ريم الوقت كان

ضيق ولاقدرت تشتري لش اي شي.!

وهذي الفين ريال جهزي نفسش

فيها لزواج ريم والالفين ذي كسوه لخوال ريم .

واعتبريني ولدش اللي ماجبتيه

اذا انت منتي مرتاحة مع قاسم ابشري تعالي

واسكني في عيوني قبل بيتي مع ريم مايلحقش

ضيم وانت في بيتي ،

وقبل ماترد دخل قاسم وهو

غصب يتنفس بسبب سمنته

وهو يمد لعلي برقم حسابه

علي /اخذ رقم الحساب وطلع جواله وهو يصورة

ويقول خلاص ذحين امر اقرب صراف واحول لك ،؟

مسك يد ريم وهو يقول راح اتصل على قاسم واعلمه

وقت الزواج وراح اجهز لكم شقة وكل شي بيننا اتصال.؟

ريم /ماتدري هي تضحك او تبكي

كل مشاعرها مختلطه في بعض

ودها ترتمي في حضن زوجها

وتشكره من كل قلبها مايدري

كيف ان تصرفه مع امها افرحها

كثير كثير خاصه لما قال الفلوس

ذي كسوه من ريم هي مافكرت

حتى مجرد تفكير .،!

حتى خوالها مانسيهم .،!

حط يده على ظهرها وهو يدفها لأمها ريم سلمي

على أمش لازم نمشي تأخرنا.!

قاسم /بطمع لا والله ماتسرون ذا الليل باتوا معنا.


علي/ضحك وهو يناظر فيه مجنون

علشان ينام هنا هو وزوجته قاعد ذحين

كأنه قاعد على شوك يبغى يخرج بأي طريقة .

قال كثر الله خيرك ماتقصر ياقاسم .

امنه/وهي تحضن بنتها وتوصيها

ريم ماراح اوصيش إلا في زوجش

وبس شفتي كيف اكرمني من حبه لش

حافظي عليه ياريم اذا تبغين رضاي

حافظي على زوجش .،!

واعرف ان الضره مثل العلقم وانا ذقت

لكن نصيحة من امش لا تختلطين فيها

ابد امسكي بيتش واذا ارضيتي زوجش

صدقيني ماراح يفرط فيش .،!

وزوجش دواء ياريم حافظي عليه.؟!

ويله تأخرتي عليه قدامكم طريق طويل .

ولافكرت حتى تقول لهم باتوا معنا

البيت كله ثلاث غرف يادوب يكفيهم.،!

سمعت زوج بنتها يأكد على زوجها

حضور الزواج .،!

:
:
:

فارس/
هو في المجلس مع جده واخوانه يحس

انه بيطير من الفرحة كان يتمنى

يتزوج وراح صوته وهو يقول زوجوني

محد اعطاه وجه حتى الفلم اللي سواه

ماستفاد منه .،!

وسبحان الله لما كنسل سالفة العرس

جتها عروسه من حيث لا يحتسب

ياجعلني فدوة للمشهورة ياناس.!

هو ماينكر ان صدره ضاق لما عرف

انها بنت عمه ولا كان يتمنى انها

تكون كذا ابد هو مايرضى على

اخته تكون مشهورة وتصور تسوي

اعلانات وتخالط الرجال .

كيف ذحين زوجته مشهورة .،!

راح يتفاهم معها ويشوف حل

يناسبة ويناسبها لانه غير منطقي

انه يجي ويقول لها من البداية

ممنوع لا هي متعوده على الشي ذا من زمان.

وبعدين لها فضل كبير عليه بعدالله في نجاح مشروعة.

ونشرت حسابه وصارعنده عدد

متابعين كبير ماكان يحلم فيه

حتى انه صار يسوي اعلانات صغيرة بمبلغ حلو.

المهم انها بتصير زوجته وبعدها

كل شي بيتيسر ان شاء الله .

لما جده قال خلاص فارس ياخذ

خزامى بغى ينط ويكسر جدته

من الفرحه لكن مابين اي ردة فعل

يحس قلبه يعوره على أمه وشايل كثير على

ابوه ليه يتزوج على أمه رغم انه يعرف

طبيعة علاقة ابوه وأمه خاصة بعد مرض

أمه بس ماله حق يتزوج مرة مايتخيل

ان وحده راح تشاركهم في ابوه.

ابوه اطيب إنسان شافه يحبهم حب

غير طبيعي مايذكر ولا مرة هاوش

احد فيهم معطيهم حريتهم متفاهم معهم.

شاف جدته تدخل معها صحن فيه

براد شاي وفناجيل وجده من شافها

قام ياخذ الصحن من يدها ويرحب

فيهاوالله انبسط كثير ان علاقة جده

في جدته تحسنت ورجعت مثل

ماكانوا يتمنون .،!

لف وهو يناظر في اخوانه كل واحد

على جواله بالله ذي اشكال ناس بتتزوج

محد فيهم مبسوط يمكن احمد اهون

من محمد اللي ماد البوز شبرين

رجع يناظر في جده وجدته اللي جالسين

جنب بعض حب يطقطق عليهم شوي .،!

عدل من جلسته وانسدح وحط يده على

وجه وقال ياجد خذ راحتك انت وجدتي

واعتبروا ان محد عندكم حب انه يحرج

جدته اللي متأكد ذحين انها مستحيه.؟؟

الجد(محمد)/وهو يعرف خبال فارس

هو ودك انك تقوم تخرج تراه ازين لنا ولك.

سمع اخوانه يضحكون وجدته .

نط وهو يوقف مشى لعندهم وهو يقول

إلا انت ماهو ودك تلعن الشيطان وتخلينا

نشوف حريمنا تراه مايجوز وحرام نتزوج

ولا نشوفهم نظره شرعية .

الجد(محمد)وهو ينزل فنجان الشاي من يده

انت صل مثل المسلمين في المسجد

وحلق شعرك ذه وبعدين تعال قول حرام.

فارس/حط يده علئ جبهته وهويناظر في اخوانه

اللي يضحكون افا دمرت جبهتي ياجدي العزيز

دنق وهو يسحب جدته من يدها هيا قومي.!

هيله/(الجده) وهي تضحك فك يدي ياذا الخبل

وين تبغى بي .،!

فارس /قومي ادخلي داخل ولاعاد اشوفش

تجين عنده يقصد جده مثل مااحرمنا من حريمنا

حتى انت ماعاد يشوفش إلا بعد زواجنا.،!

فك يد جدته وشرد وهو يشوف جده يمسك

علبة المويه ويحذفه بها تآلم وهو يدنق ويمسك

كعب رجوله اح اح يارجولي ايش ذا قسم

بالله ولا راجمة صواريخ المفروض انك على

الحد الجنوبي ماشاء الله الله لا يضرك

الجد(محمد)وهو يضحك احسن حبذا انها

في راسك اللي مليان خبال.،؟!

فارس/وهو يشوف جدته تمسح عيونها من كثر

ماضحكت ايوه قدش تضحكين مع رجلش علي

مااسرع مانسيتي قال لش كلمة وتخرفتني .،!

المفروض ماتسامحينه إلا بمهر جديد وعرس

جديد وماتروحين معه إلا بعد شهر.،؟

هيله/وهي تضحك على خبال فارس

كيف بالله بيزوجون الخبل ذا وزوجته مجنونه

اخس منه قالت والله ان شوف بنات احمد قدامي

خلاني انسى كل شي وابو احمد ماقصر معي

جعله سالم .،!

فارس /افا يعني انت ايش دخلك يافارس صح.،£

عمومآ ياجده انا اواخواني نبغى نشوف حريمنا

نظره شرعية ابسط حقوقنا .،!

محمد/لا والله ياجد ماقلنا له وشورك سديد.،!

الجد(محمد)وهو يناظر في سميه محمد والله

ولو كنت تبغى انت وهو ماتشوفون ظفر وحده

فيهم.؟!

فارس /وهو يضحك شكرآ ياجد على الشفافية.

الجد(محمد)فارس تعال اجلس وخلك رجال

قبل يخرج مني يمين ماعاد تتزوج بنت ولدي.

فارس /لما سمع كلام جده اخذ المجلس خطوة

وحده وهو يوقف عند راس جده ويبوسه انا في

جه الله ثم في وجه المزيونه اللي جنبك والله اني

امزح والله لا تصدقني ماعاد ابغى اشوفها

خلاص وهو يجلس جنب جده سم نسمعك .،!

الجد(محمد)

بنات عمكم وافقوا مثل ماقلت لكم اليوم

الكلام لك ولأخوانك وتراكم تعرفوني زيني

انا مازوجتكم بنات ولدي وانا مرخص وحده

فيهم او اني عجزان بهم لا والله .!

وبنات احمد ماهم بحاجه شي مني

ولا منكم ربي مغنيهم عنا كلنا من وهم

صغار لحد اليوم .،!

لكن زوجتهم وانا ابغى اطمن عليهم عند

عيال عمهم وتراهم امانه عندكم ووالله

اللي تجيني تشتكي منكم ان تقولون ليتنا

مافعلنا .،!

اسمع يامحمد انا اعطيتك الدكتورةاشواق اللي تسوى

عندي الف رجال .

لا تجيني تشتكي منك والله مااوقف لك

إلا هنا وهو يأشر على حلقه .،!

والكلام لكل ولأخوانك كل واحد فيكم

يدفع مهر 70الف .!

والعشاء والقصر علي انا لاني بعزم

كل الشيوخ وبيجوني وفود قد وعدهم

في زواجكم اني اعزمهم.

وانا وجدتك قررنا نجلس هنا في الجنوب

ديرتنا وقلت لأبوك وقال وانا معكم من

زمان وانا ابغى ارجع الجنوب علشان

دوام عيالي .،!

وأميرة بتتزوج قريب وبتجي هنا مع زواجها

وامها ولا بتصبر هنا .،!

وكنت بشترط بيت شرعي لكل وحده

من بنات احمد.؟!

لكن كل وحده معها فله وبدال ماتروح تستأجر

ادفع اجر لها .!

واشواق حلفت علي انا وجدتك إلا نسكن

معها في فلتها تقول كبيرة ولا حبيت

اكسر في خاطرها بنت الغالي

رحت امس وسحبت 60الف ريال واعطيتها

مساعده مني ومن جدتها في الفله.،!

وخزامى /معها فلتها يسكن الخبل ذا

معها ويدفع لها اجار نفس اختها .،!

وندى /ابوك يااحمد يقول انك بتسكن

معه هو وامك بيحط لك جناح واذا رحت

دوامك تجي تجلس عندي انا وجدتها.،!

والملكه راح يوم الخميس وبيجي ابوك ونشوف

متى عشاء زواجه.

بسوي لكم زواج كبير وبعزم كل اللي

اعرفهم .،؟

محمد/ رفع عيونه لأخوانه اللي ساكتين

هو ماعنده اي اعتراض على كلام جده

الوقت اللي بيكون موجود هنا بياخذ زوجته

عند أمه واذا خلصت اجازته ييرجعها بيتها

هو مايجي من نجران إلا كل 6او 7ايام على

حسب الأوضاع هناك.،!

قال جد خلاص كلامك على متمه ان شاء الله

وانا بعزم جدي وخوالي ترى .،!

محمد(الجد)

وهو مايحب يسمع طاري جده ولا خواله

خاصة جده جابر اللي كان صديقه الروح بالروح

لكن من بعد طلاق علي لبنته صارت بينهم مشاكل

وقضايا في المحكمه.!

قال بأستخفاف لجده اعزمه والله محد درى عنه

وإذا عزمته مين بيجي معه جدك محد يعرفه ولا

قد ذكر في المجلس .،؟

محمد/بزعل على جده لانه قلل من قدر اهل

أمه اخذ جواله وقبل يخرج ناظر في جده

وقال بزعل لو مرة وحده قدر اهل أمي علشاني

وخرج .،!

هيلة /وهي تنادي محمد تعال جعلني قبلك

جدك مايقصد والله انهم ونعم بهم وبك وانهم

غالين رجال .،!

الجد(محمد) لا والله ماهم غالين الغلا اللي

بيني وبين جابر ارخصته من حزة ماوقف

لي في المحاكم .؟!

هيلة /بصدق وقف لك في المحاكم

علشان بنته احرمتها من ولدها

اخذته من صدرها وهو لحمه حمرا يرضع.،!

الجد(محمد)بالله لا تغثين خاطري بطاريهم

الله يقطعه من طاري.،!

انتهى

غراس الجنة/سبحان الله والحمدلله ولا اله الا الله والله اكبر يغرس لك بكل واحدة شجرة من الجنة".








 
 

 

عرض البوم صور صباالجنووب   رد مع اقتباس
قديم 19-04-17, 11:37 PM   المشاركة رقم: 158
المعلومات
الكاتب:
اللقب:
ليلاس متالق


البيانات
التسجيل: Mar 2012
العضوية: 236809
المشاركات: 305
الجنس أنثى
معدل التقييم: صباالجنووب عضو ذو تقييم عاليصباالجنووب عضو ذو تقييم عاليصباالجنووب عضو ذو تقييم عاليصباالجنووب عضو ذو تقييم عاليصباالجنووب عضو ذو تقييم عاليصباالجنووب عضو ذو تقييم عاليصباالجنووب عضو ذو تقييم عالي
نقاط التقييم: 707

االدولة
البلدSaudiArabia
 
مدونتي

 

الإتصالات
الحالة:
صباالجنووب غير متواجد حالياً
وسائل الإتصال:

كاتب الموضوع : فيتامين سي المنتدى : القصص المكتمله من وحي قلم الاعضاء
افتراضي رد: جنوبية برت حالي ولاادري وين ديرتهاوكل ماأسأل من ين انتي تجاوبني جنوبية/بقلم نبضي

 

البارتين المفروض تنزل بكرة ارسلتها ام يزيد

بس قلت لها بكرة مايمديني انزلها إلا السبت

قالت خلاص نزليها الليله

 
 

 

عرض البوم صور صباالجنووب   رد مع اقتباس
قديم 20-04-17, 01:06 AM   المشاركة رقم: 159
المعلومات
الكاتب:
اللقب:

البيانات
التسجيل: Apr 2017
العضوية: 325063
المشاركات: 121
الجنس أنثى
معدل التقييم: ثرثرة حنين عضو على طريق الابداعثرثرة حنين عضو على طريق الابداعثرثرة حنين عضو على طريق الابداعثرثرة حنين عضو على طريق الابداع
نقاط التقييم: 336

االدولة
البلدSaudiArabia
 
مدونتي

 

الإتصالات
الحالة:
ثرثرة حنين غير متواجد حالياً
وسائل الإتصال:

كاتب الموضوع : فيتامين سي المنتدى : القصص المكتمله من وحي قلم الاعضاء
افتراضي رد: جنوبية برت حالي ولاادري وين ديرتهاوكل ماأسأل من ين انتي تجاوبني جنوبية/بقلم نبضي

 

بارتين فخمه وملئيه بالاحداث

محمد نذل واناني غصب شوق على نفسه وعلى انها تترك الوضيفه
اكره الي يستغل ضعف الحرمه ويتسلط عليها

الجد ماله حق يحتقر جد محمد وينقص من قدره بس علشانه وقف ضده في المحكمه ولاول
مره اتعاطف مع محمد الجلف الوقح الي اكرهه
ريم وصدمة الحقيقه المره وماكان لها حق تدعي على احمد واهو ماله ذنب في تخلي اهلها عنها والحين الو تدعي له عمرها كله ماوفته حقه بعد ماشافت واقع امها وحياتها المترديه

ننتظر التتمه على شوق

 
 

 

عرض البوم صور ثرثرة حنين   رد مع اقتباس
قديم 20-04-17, 08:35 AM   المشاركة رقم: 160
المعلومات
الكاتب:
اللقب:
قارئة مميزة


البيانات
التسجيل: Feb 2015
العضوية: 289774
المشاركات: 1,941
الجنس أنثى
معدل التقييم: شيماء علي عضو ماسيشيماء علي عضو ماسيشيماء علي عضو ماسيشيماء علي عضو ماسيشيماء علي عضو ماسيشيماء علي عضو ماسيشيماء علي عضو ماسيشيماء علي عضو ماسيشيماء علي عضو ماسيشيماء علي عضو ماسيشيماء علي عضو ماسي
نقاط التقييم: 4305

االدولة
البلدEgypt
 
مدونتي

 

الإتصالات
الحالة:
شيماء علي غير متواجد حالياً
وسائل الإتصال:

كاتب الموضوع : فيتامين سي المنتدى : القصص المكتمله من وحي قلم الاعضاء
افتراضي رد: جنوبية برت حالي ولاادري وين ديرتهاوكل ماأسأل من ين انتي تجاوبني جنوبية/بقلم نبضي

 

محمد المجنون الزفت .. زفت 😠😠 >> زفت السبة الرسمية بمصر 😂
المهم
خليتها تترك شغلها يا معفن
لو مكان اشواق بروح اقول لجدي 🙍🙍
قال مفيش شغل قال 😡

بس صراحتن يعني صراحتن زعلت عليه في النهاية 💔

الجد وكبرياءه الفزيع الشنيع المريع
والله ؟!
حارم بنته من ولدها وحارمه من حفيده وتباه يقولك حلالك وانا ما لي دخل ؟!
يا اخي حرام عليك والله !!
يا جعل جابر يجي ومعاه صفوف رجال ويعلمك ان الله حق 😒😒

ريم
شفتي ان الله رحمك من الحقير زوج امك 😒😒
امها طبعا غلطانة بالماضي 😑
اللهم الا لو كانو بيزوجونها قويسم وزفت وقتها 😑😑
الحين مدري ليش ما تتركهم وتروح مع بنتها
يعني اكبد اخوانها عرفو طبعه
يمكن ما تبا تثقل على بنتها من البداية
نشوف اخرتها وين بنوصل

 
 

 

عرض البوم صور شيماء علي   رد مع اقتباس
إضافة رد

مواقع النشر (المفضلة)

الكلمات الدلالية (Tags)
ماأسأل, أبها, انثى, تجاوبني, يالي, ديرتهاوكل, جنوبية, جنوبية/بقلم, ولاادري, نبضي
facebook



جديد مواضيع قسم القصص المكتمله من وحي قلم الاعضاء
أدوات الموضوع
انواع عرض الموضوع

تعليمات المشاركة
لا تستطيع إضافة مواضيع جديدة
لا تستطيع الرد على المواضيع
لا تستطيع إرفاق ملفات
لا تستطيع تعديل مشاركاتك

BB code is متاحة
كود [IMG] متاحة
كود HTML معطلة
Trackbacks are متاحة
Pingbacks are متاحة
Refbacks are متاحة



الساعة الآن 08:53 PM.


 



Powered by vBulletin® Version 3.8.11
Copyright ©2000 - 2024, Jelsoft Enterprises Ltd.
SEO by vBSEO 3.3.0 ©2009, Crawlability, Inc.
شبكة ليلاس الثقافية