لمشاكل التسجيل ودخول المنتدى يرجى مراسلتنا على الايميل liilasvb3@gmail.com






العودة   منتديات ليلاس > القصص والروايات > قصص من وحي قلم الاعضاء > القصص المكتمله من وحي قلم الاعضاء
التسجيل مشاركات اليوم اجعل كافة الأقسام مقروءة

بحث بشبكة ليلاس الثقافية

القصص المكتمله من وحي قلم الاعضاء القصص المكتمله من وحي قلم الاعضاء


إضافة رد
نسخ الرابط
نسخ للمنتديات
 
LinkBack أدوات الموضوع انواع عرض الموضوع
قديم 05-05-17, 10:05 PM   المشاركة رقم: 936
المعلومات
الكاتب:
اللقب:
قاريء مميز


البيانات
التسجيل: Jul 2009
العضوية: 147465
المشاركات: 585
الجنس أنثى
معدل التقييم: دودي وبس عضو جوهرة التقييمدودي وبس عضو جوهرة التقييمدودي وبس عضو جوهرة التقييمدودي وبس عضو جوهرة التقييمدودي وبس عضو جوهرة التقييمدودي وبس عضو جوهرة التقييمدودي وبس عضو جوهرة التقييمدودي وبس عضو جوهرة التقييمدودي وبس عضو جوهرة التقييم
نقاط التقييم: 1271

االدولة
البلدSaudiArabia
 
مدونتي

 

الإتصالات
الحالة:
دودي وبس غير متواجد حالياً
وسائل الإتصال:

كاتب الموضوع : ضمني بين الاهداب المنتدى : القصص المكتمله من وحي قلم الاعضاء
افتراضي رد: الحظوظ العاثرة بقلمي / ضمني بين الاهداب

 


مسا النور والسرور ،،

تسلم الايادي ضمضم بارت جمييل جمييييل ومن العيار الثقيل ماشاء الله 😍


باين ان عقاب للحين موجوع من حر مايونس الا يجيب سيرة نفود ويدقه بالعظم ،، اتوقع اذا اوجعه بتبرد حرته ويقدر يسامحه،، بس وقتها هل بندر بيقدر بيسامحه ..؟

احسه زي الأطفال لمن يضاربون كل واحد يبي يكون هو اخر واحد يضرب ،، نفس عقاب هو يبي يكون اخر واحد يووجع ،، والمخ اللحين شغال شلون يوجع بندر ،،

نفسه طويل مع عمشا يوم سافهته صار يحوسه عندها ان شاء الله تستمر ع هالموال معه اجل يوجعها بعدين يساومها ع حبها له بدون اي اعتبار للي سواه معها..



مااتوقع يستغل المهر وهي تكلمه بكل هالحب والآريحيه،،
وقت مقابلتهم يمكن يطب عليهم غتار ماهو هذا نظامه في كل مكان اطلعلك😆

وهج الله يفشل العدو هو كل العالم تدري بهرجتها 🤕
عقاب في راسه موال من اول ماعرف عن السالفه يسال رياش اذا هو غتار ،، يعني لو غتار عنده خطه ثانيه وبما انه غيام فهو عنده شي ثاني،،

مااحس لو ساعده في زواجه من وهج بيسبب مصيبه ينفجع منها رياش ويقوله ان بندر مارح يسامحه،،
وقتها غيام اللي بيوجع أبوه ،، يعني وان حصل وأخذ وهج بيقدرون يضغطون عليه ويطلقها ،، او بيتركونه للزمن وهو بيطلقها ،،

اللي بيوجعه من عقاب اتوقع يسبب لغيام فضيحه مالها أولي ولا تالي ينفصل بسببها او يبلغ عنه الهيئه ويطير سمعته او يفضحه عند اهل ورد أو اي شي زي كذا ،،

اقتباس :-   المشاركة الأصلية كتبت بواسطة ضمني بين الاهداب مشاهدة المشاركة
  
‎أغلق هاتفه وعينيه تنظر لايطار الصورة الفارغ امامه...لاشيء فيه غير انه خشبي قديم جدا جدا...يرافقه في مكتبه ولا يتزحزح من مكانه ومتضح قدمه مع عصرية ديكور مكتبه ...!


برواز قدييم وجدا يعني شي من الماضي وبدون صورة،،
ممكن كانت صورة تجمعه مع بندر و ابوه ،، بس اذا هو شال الصورة ليش احتفظ بالبرواز وقدامه عينه ،،! يحير هالعقاب



فخر مسكينه يوم تبي تعرف عنه اي معلومة نط بوجهها،، والله ان غتار جاي بشياطينه وذابحه حبها يوم ينط عندها ومامدى الحبر يجف ع الورق ..
شكله ناوي يدخلها بينه وبين عقاب أتمنى انها ماتسمح له بهالشي ،،

بعدين دقيقه انا شكيت انه شافها اش الغرور اللي فييه معقوله مافي اي تعليق ،، بس ماتشبه ابوه ولا عقاب وتشبه امها .. وهذا وهو تمقل بالصور بعد😒

خاطري ترسله فايروس ضغيرون باسمها ع جواله مو يمسح اللي بجواله بس الا يخليه يخمد ولا عاد يشتغل 💀

حركته مستفززه جاي يرفع ضغطها ويمشي بس يمكن هذا من فرحته ان الملكه تمت بس هو مايعرف يعبر 👻
اصلا ليتها سفهته وخلت الجوال معه طالما انه مقفل ،، اللي سواه فشله قدام اخوها بس يظل اهون من ان عقاب يشوف،،

بس صدق ضحكني يوم قالها تبين عصاي باين متاثر من الطقطقه ع رجله البنت وأبوها ي ماشاء الله 😂

ع العموم اللي استفدناه من هالعثرة لا عاد احد يحط بصمته لان أسرع للوصول لها مافي 🤗



رياش ع انه بثر ،، بس نقطه تحسب له انه يستفيد من أفلام رشدي اباظه ،، ما راح تمثيل الرجال ع الفاضي😂




يعطيك العافيه ويسعد قلبك ام زيزو 💕

 
 

 

عرض البوم صور دودي وبس   رد مع اقتباس
قديم 06-05-17, 03:49 AM   المشاركة رقم: 937
المعلومات
الكاتب:
اللقب:

البيانات
التسجيل: Apr 2007
العضوية: 27044
المشاركات: 34
الجنس أنثى
معدل التقييم: coha عضو على طريق التحسين
نقاط التقييم: 93

االدولة
البلدSaudiArabia
 
مدونتي

 

الإتصالات
الحالة:
coha غير متواجد حالياً
وسائل الإتصال:

كاتب الموضوع : ضمني بين الاهداب المنتدى : القصص المكتمله من وحي قلم الاعضاء
افتراضي رد: الحظوظ العاثرة بقلمي / ضمني بين الاهداب

 

السلام عليكم ورحمة الله وبركاته

صباح الخيرات والمسرات على آل ليلااااس ومن يعز عليهم

بالأول: سلمت يداك أم اليزيد ولا عدمناك ياغالية

ثانياً: تعليقاتي المتواضعة ع.البارت

1/ مصيبة عقاب القادمة ح.يستدرج المهر بالكلام عن زوجها وهي ح.تكب عشاها [بالرغم من عقلها الراجح وشخصيتها القوية ]

2/ انا من مؤيدين خطبة عقاب لوهج ،، خطبة فقطططططط ليييش؟

عصفورين بحجر واحد

* قرصة إذن لعموش ( تراني مستغني عنك ولا تهميني)

* يوجع غيام الغبي ويتسبب في مشكلة كبيرة بين بندر وولده وممكن ينجلط بندر منها
طبعاً ح.يحصل تدخل سريع وكبير من غتار ويمكن كمان يوجع الفخر ولما تجي تشكي لأبوها حبيبها يرد عليها بكل برود ( من دا الحال وأبردى)

دمتم بود

 
 

 

عرض البوم صور coha   رد مع اقتباس
قديم 06-05-17, 06:44 AM   المشاركة رقم: 938
المعلومات
الكاتب:
اللقب:
كاتب مميز
إمْبرَاطوّرة الحَرْف


البيانات
التسجيل: May 2010
العضوية: 164346
المشاركات: 1,383
الجنس أنثى
معدل التقييم: ضمني بين الاهداب عضو متالقضمني بين الاهداب عضو متالقضمني بين الاهداب عضو متالقضمني بين الاهداب عضو متالقضمني بين الاهداب عضو متالقضمني بين الاهداب عضو متالقضمني بين الاهداب عضو متالقضمني بين الاهداب عضو متالقضمني بين الاهداب عضو متالقضمني بين الاهداب عضو متالقضمني بين الاهداب عضو متالق
نقاط التقييم: 2774

االدولة
البلدSaudiArabia
 
مدونتي

 

الإتصالات
الحالة:
ضمني بين الاهداب غير متواجد حالياً
وسائل الإتصال:

كاتب الموضوع : ضمني بين الاهداب المنتدى : القصص المكتمله من وحي قلم الاعضاء
افتراضي رد: الحظوظ العاثرة بقلمي / ضمني بين الاهداب

 

بسم الله الرحمن الرحيم
.
.
.
العثرة السادسة عشر
.
.
.
مدخل
.
.
.
متعود التلويح للمقفين
سوقي على درب النوى ركبك
الحب مثل السيف ابو حدين
ان ماطعن جنبي طعن جنبك
وانتي مثل زهرة شهر تشرين
يحرقك قيض العشق لو هبك
تجنبيني قد ماتقوين
تغانمي نصيحة محبك
شوفيني ذنب وقبل تقترفين
تقربي في تركة لربك

لعبدالله تركي السهلي


.
.
.

بداية

صباح الخير قراءة ممتعة للجميع
.
.
.
لاتليهكم الرواية عن الصلاة في وقتها
.
.
.

يجلس في منتصف الصالة يتناول قهوته بهدوء تام...وكأن لاأحد ينتظر منه كلمة ...
قلب الايباد الذي يحمله على عدة مواقع عقارية منشورة...
كان يضع قدم على قدم مرتدي لثوب بني اللون شتوي..متحرر من اي شي يغطئ رأسه...
انيق فخم في عينيها...
همست /كنت انتظر منك من البارح كلمة لو صغيرة وانا ابدا حياتي الجديدة...

وكأنه لايعلم بوجودها اصبعه مازالت تلامس الشاشة.../مثل ايش...؟

بوجع/مثل مبروك او الله يوفقك...او اي كلمه من اب لبنته...!

رفع عينيه لها...
يكره ان يراها بتلك المشاعر الضعيفة حتى وان كان با الفعل قد قسى عليها...يكره ان يراها ان تستجدي شي ولو مشاعر..

عقاب انزل الايباد بجواره وضع يده بهدوء على الكرسي ../اظن انك اقدمتي على هذي الخطوة وماتنتظرين مني كلمة مبروك اواي كلمة تشبها...

فخر /كيف ماانتظر كلمة مثل ذي منك ليه هو انت معودني على ان بينا حواجز او ان مشاعرنا ماتكون واضحه لبعض طول عمرك معي يايبه مثالي...

عقاب ببرود/ عشان كذا استاهل انك وقفتي اليوم ند لي معهم...

زفرة بهدوء /انت عارف وجهة نظري ...

ابتسم ببرود/وانتي بعد عارفه وجهة نظري...خلاص كل واحد فينا يتحمل الي هو يشوفه صحيح دكتوره فخر....!



ترسم بيننا مسافات عملاقة...
توجع قلبينا يا ابي...




انتي اميرتي الغاليه
انتي وجع قلبي اليوم



فخر ترتدتي عبائتها وهي تربط على روحها/طيب يبه عن اذنك...

كانت تقترب منه بهدوء وتعانق خده بقبلة من ثم تنسحب تحت عينيه...

.
.
.
أما كسرنا كؤوس الحب من زمن..؟فكيف نبكي على كأس كسرناه...؟
.
.
.
بعد عدة ساعات



عندما أنتهت من جولتها الروتينيه كانت الممرضه تخبرها ان هناك من أقاربها ينتظرها في مكتبها..!
ولا تدري أي الاقارب من ينتظرني...قد يكون احد من أخوالها راجع هنا وأراد القاء السلام والمباركة...!
شدت الخطوات لمكتبها ..وعندما فتحت باب مكتبها والقت السلام لشخص يجـلـس بكل هيبة العالم على الكرسي المجاور لمكتبها..!
لآتعرفه..!
لم تلتقـي به...!
لكن ملامح وجه أقتحمت روحها بلا أدنى أذن ..وهي تلقي النظرات المتفحصة لشخص الذي وقف هو هو...!


نعم هو




ياجمال الحكايات والصباحات التي اتت بك...



تظاهرت بعدم معرفته وقلبها يؤلمها همست بهدوء..\أي خدمة..الممرضه قالت لي ان في واحد من اهلي ينتظرك في مكتبك..والي اشوفه اني ماعرفك ولانت من اهلي.؟
أرتسمت على شفتيه ابتسامة هادئه وهو يلتقط عقاب اخر وبهدوئة البندري..\أنا عمك بندر ...!





وقفت للحظات وهي تتفحص الواقف امامها...
لحظات من سنين ..!
كل ساعة فيها الف الف الف سنة.!






ماذا فعلت بنّا ياعقاب....!!!
أسمها العريق الذي يزين بطاقتها الطبية..!
الوجع الذي يتغلل روحـي يا عقاب..!
هـاهي أبنتك بـ ببالطو ابيض لم تجعلني أراها في يوم..!
أي قلب حملة..وأي عناد جبلة عليه..وأي سنين لم تجعلك تلين.!.
لاأدري ما الفخر الذي تلبسنـي الان..!
وانا اراها بكل تلك الحشمة وهي في هذه الوظيفة المرموقة..,





همست ..\عمي بندر..
هز رأسه بهدوء وهو يؤكد من ثم يبرر..\عارف المكان ماهو مناسب وعندي حكـي واجد وماقدرت اشوفك الا هنا..وماوصلتي ماشاء الله المكانه الي انتي فيها الحين الا انتي وحده فاهمه وعقلك كبير وبتفهميني ان شاء الله...!


الصمت الذي عبر المسافة التي بينهم..كفيلة ان تسمع صوت الانفاس المتعثرة..دقات دقائق الساعة المركونة على المكتب..

المسج الذي اتى هاتفها..صوت ممرضة تنادي على احد المرضى با اسمه الثلاثي..!

بكاء طفل وهدهدت أم في مكان ما..!


همست بـهدوء..\تبريرات وش ياعم..هذا طولـي ولآشفتكم ولاعرفتكم...وأبوي كأنه مقطوع من شجرة ..!


بندر بعد صمت موحش همس..\طيب تقدرين تستأذنين خلينا نطلع لمكان هادي أقدر فيه اكلمك وانا عمك يمكن تلقين لي عذر..
ترددت لكن ما القت نظره لـوجه حتى همست..\أقدر اطلع بس مكان قريب لاني ماقدر أتأخر..!
أشرق وجهه با ابتسامة..عندما رأتها ظنت ان الشمس أضاعت مكانها وخرجت من هنا..,
يالله...أي وجه يملك..!




.
.
.
أما كسرنا كؤوس الحب من زمن..؟فكيف نبكي على كأس كسرناه...؟
.
.
.

بعد ساعة ونصف...




المهر وهي تضع حقيبتها بجانب الكرسي وتنظر للذي امامها بكامل اناقته...
هل هي تحلم...
هل هو عقاب هنا في مكان واحد ...!


ابتسم وهو يتناول الشوكة /شوفي انا واحد ميت جوع بتجلسين تناظريني ومستحية باكل كل شي واخليك...

المهر تتناول الشوكة ايضا/لاعاد وش السحى الي تقول انا وحدة حامل وبتشوفني اكل عن اثنين فلا تنفجع ...

ضحكا واردف/ امداك عرفتي وش جنسه والاباقي...!

ابتسمت / جنسه ولد ياعمي وودي اسميه اسم غريب وحلو...

بغرور الدنيا /سميه على عمك عقاب واضمن لك ان الولد بيصير رجال بقوله وفعله...

ابتسمت بخجل/كفو ياعمي يابخته الي اسمه عليك..

بخبث/اي عززي لعمك عاد رجلك بيطق عرق براسه لو يدري ...

همست بهدوء/تبي الصدق هو للحين ماقلت له شي او بشكل صحيح ماحد يدري اني حامل...ماعلمت احد للان...!



شعر بوخز في روحه...
وهي تخصه بهكذا امر...
وهو يتشرب اللئامة والخبث ضدها...!

استفسر بستغراب/ يعني ماعلمتي الا انا...؟

شربت قليل من العصير/تبي الصدق ايه ولاتسألني ليه قلت لك انت بلحالك لاني مدري ليه...مصيري اقولهم الحمل عاد مايتخبى...!

ابتسم بستغراب من ثم همس بضيق يريد تغير موضوع/وش ها الاوراق الي معك شكلها تخص شغلك...؟

ابتسمت وهي تضع كفها على الدوسية /هذي الله يطولي في عمرك مشروع خلاص قرب يخلص ها اليومين وهي لمحلات شوكلا مستوردة جنبها بضبط كوفي نسائي بعمالة نسائية ومحل منتجات اسر منتجه وصالة رياضية نسائية افكر تكون كلها بمجمع صغير وحلو وداخل معي عدد من الشركاء وان شاء الله ينجح خصوصا انه نسائي بحت...

ابتسم على فكرها وذكائها العملي.../ماشاء الله شي حلو ومتى تفتتحونه...

المهر/نهاية الاسبوع ان شاء الله وفي تغطية اعلامية متفقين معهم ولازم تشرفني بحضورك...

عقاب /اجل بقول لفارس يدعمك اعلاميا هو الاول في المملكة في السناب وعنده متابعين كثار و بنحضر كلنا افتتاحك وبدعمك الذكي والمجتهد يستاهل من يدعمه...

ابتسمت / جعلك تسلم انا ناجحة في شغلي بس للاسف فاشلة جدا بحياتي الشخصية مانقدر نشيل كل شي بيد وحدة...

وبوجع/ يمكن قصرت با اشياء كثيرة عشان احقق ذاتي وارضي نفسي كنت احس اول داخلي طاقة لازم احقق استقلال ذاتي لنفسية انا وحدة ماحب التبعية والغاء الشخصية احب تكون لي مساحة...

وبهدوء/عشان كذا جات مواقف كثيرة تخليني مع ابو بنتي نتصادم با الاراء والقناعات...هو يبي له شخصية تتبعه وين مايروح وتوافقه على كل شي وانا العكس ...وذا الي خلانا نوصل لطلاق الثاني والانفصال الحالي للاسف...


صدم من تصريحها با الانفصال/طلقك رجلك...،،!





وفي ذات المكان وعلى الجانب الاخر من المطعم...



كانا قد دخلا وحجزا لهما طاولة خاصة..جلـسا..طلبت لها قهوه عربية فقد خمنت أنه صاحب قهوة عربية ..
الصمت الذي يحلق على انامل الغياب الموحش...
الوجع الذي يقبع هنا...
عندما أنزلت نقابها وقامت بترتيبه لجوارها...
شعر بـ أن روحه المتعثرة قد وقعت هنا..قد مزقت تماماً..
وقد قضى عليها الان عقاب تماماً..!
وهو يراها بـتلك الصورة..وتلك الملامح الموجعة..المتغلغة با الوجع..!
ياالله..هل الملامح بعضها تحمل خناجر سامة..!

زفر..والتنهيدة المتعثرة تخرج منه..!

أبتسمت بتوتر..
ساد الصمت من جديد...,

همس بهدوء..\انا مدري وش قال لك عقاب ذي السنين كلها والا وش برر قطيعته لنا..يابنتـي..أ..
قاطعته بمصارحة \أبد قال لي ان اخوه الكبير اخذ بنت عمه الي يحبها والمشكلة انه كان متزوج مرتين وماحلا في عينه الا الي يبيها اخوه..
أبتلع زفرة حارقه ليهمس..\بس ماقال لك ان عمي كان يحرجنـي دايم وكنت ارفضها مره وثنتين وثلاث..وان عمي كل ماكان يعرض بنته علي كنت اقول له انا مابيها الى ان قالها لي بوجه رياجيل كانو حاضرين وماقدرت ارد عمـي في وقتها..
من ثم اردف بهدوئة البندري/خصوصا ان واحد ملقوف من الجماعه قال زوجها عقاب ماعنده مره قال عمي انا مابيها الالبندر فخفت لارفضتها بعد قدام الناس يقولون اكيد مايرفضها دايم الا فيها شي يسود الوجه...وهذي بنت عمي شعرة من شعر وجهي...
أبتسمت..\مع اني ضد هذا الشي بس كان المفروض تقول أجل بزوجها أخوي..هو الي يبيها وهاويها ..!
بندر يبتسم لهجومها ويمتصه..\أبوك يا فخر كان بوقتها مطفوق راعي نشب كان مفشلني في الرياجيل افككه منهم ماكان مثل مافتحتي عينك وشفتيه اليوم..وعمي كان مايدانيه ولايحبه وحالف ماتاخذه البنت وفوقها البنت كانت رافضته..يابنتي انا ماابرر انا اقول لك الصدق
من ثم اردف..\ وحتى يوم أضطريت اخذها ماقدرت اجلس معها الا سنه ماقدرت اتقبلها الله يغفر لعمي فتح باب كنا كلنا في غنى عنه..ولآتحسبيني يابوك طول ذا السنين في سهود ومهود لا والله اني على جمر كل ماحاولت اصلح الي بيني وبين عقاب لقيته يسكر ابواب ان حنا نشوف بعض ماهو بس نصلح لين انقطعت اخباره مع السنين..
وبمحاولات متعبة..\مشكلتي انا وعقاب مثل الليل والنهار مايتفقون هو يشوف المواضيع كلها بعكس الي انا اشوفها...والشي كله عنده عناد وتكسير روس ماعنده سياسيه ماعنده تريض في المواضيع مثل الي ياكل اللقمة حاره حتى لو احرقت لسانه وفمه اهم شي ياكلها..!
همست بمقاطعة..\ والحرمة الي فرقتكم ياترى تستاهل ذي السنين الي فيها قطاعة كلها..!
أبتسم بهدوء..\شوفي يابنتـي الزين ماهو مقاس يمكن قلبك يتعلق بواحد مافيه ذرة زين بس كذا من ربك..وبعدين ام المُهر فيها حقها الله يطول بعمرها عند رجال الحين غيري وعليها عيال وعايشة حياتها ومتواصلة معي وانا عمك وحاطتني مثل اخوها ماقالت طلقني خلاص بقطعه و ماهي مثل ابوك قطعني كن بيني وبينه دم..



الحديث معه أسر روحي..!
الحرف اذا خرج من شفتيه كأنه لاينتمي لحروفنا الابجدية..!
الهدوء الفاصل بين حكاياته التي يسردها يشبه هدوء الفجر..!


وضع كفه على كفها الممدوه..شعرت بـشي ما انتفض في روحها وهي تشعر بلمسته في قلبها تماماً..
الدفئ الذي سكبه في كفها..كفيل با ارتعاش روحها..!
همس..\ انا متوسم فيك شي انتي ماتتخيلينه..أشوفك شي فاقدة من سنين..



ثواني من الوقت تتبعثر...عينيها تعانق الكف الذي على كفها...
بعقلانية الفخر وضعت كفها الاخر فوق كفه وبجدية/وخطوتي هذي ياعمي عشان عقاب ...عقاب وانت لازم تتصافون...!


عمي...!
هل اخبروك ياجميلة كيف وقعت تلك الكلمة في قلب عمك...؟

ابتسم وهو يتراجع ويرتشف القهوة.../تكلمي يافخر لاتسكتين والله انك في وسط قلبي تجلسين ماهو قبال عيني...

ابتسمت برقه/ ابد وش تبيني اقول..

بندر يشير بيده /انتي دكتورة اطفال...

ابتسمت/ايه...دكتورة اطفال حقت عظام ابوي كنت من انا صغيره وهو يحفزني ادخل طب والحمدلله ماخيبت ظنه...

من ثم اردفت/وانت تكلم لي شوي عنك عن حياتك شغلك يومك...!

غارق بها/ اشتغل من سنين في تجارة الاثاث وعلي حاكم الي شفتيه وغيام مابعد شفتيه هو والمهر...وغتار عاد شفتيه اظن...وابد يومي كله من بدايته لنهاية شغل واذا فضيت قنصت...

ابتسمت/تحب القنص ياعمي والبر...

بندر/ايه احبه وينقي النفس البر ...


تناولا الاحاديث المطولة والحكايات الهاربة والاوجاع المنهزمة ...


.
.
.
أما كسرنا كؤوس الحب من زمن..؟فكيف نبكي على كأس كسرناه...؟

.
.
.
فارس يرتدي ساعة رياضية انيقة وقد أنتهى لتو من الاعلان لها على سنابه...
وضع هاتفه وعينيه تنظر لتلك الصامته منذو ان استيقضت ...
فارس ببرود/ كأن كلامي البارح ماهو عاجبك وش فيك اليوم ماسمعتيني صوتك...

عهد /وش تبيني اقول ...قلت يمكنك ها اليومين الي راحت رجعت شوي من فارس القديم وصدمتني البارح بشيء ماتوقعته منك...

فارس بهدوء/ انا واحد مابي التزامات وتربية من الحين عندي سفر واجد وعندي امور كثيرة ومابي بنص ها الامور يطلع لي بزر ...خوذي مانع حمل وخلاص سكري الموضوع...

من ثم اردف /ويالله بسرعة البسي عشان نروح لمطار ومانتأخر...

بغضب وهي ترمي مابيدها/وربي كانك بتاخذني للجحيم خلني عند امي احسن...!

بتهكم/ماشاء الله ماتبين سويسرا اذكر من احلامك السفر صوريها لصديقاتك وهايطي جاتك من الله اسبوع مدة اعلاني الرياضي هناك ...

عهد بجدية/ فارس مابي اروح معك مكان وعقب كلامك البارح انا حتى مو طايقه اشوف وجهك اذا ماتبيني اروح ل امي خلني عند عمتي...!

وقف واغلق ياقته /اجهزي بس انا بنتظرك بسياره ..!

تجاهلها وهي تبتلع غصة مرارة موجعه...
تحب الاطفال...لايحق له ان يفعل هذا بها...
تشعر ان الاستقرار هو طفل بينهم ...
كيف اشعر با الاستقرار معه وهو يرفض الفكرة جملة وتفصيلا

.
.
.
بعد عدة ساعات..
.
.
.

بفزع /وش فيك...وش صاير...!

كان هو قد قفز من مكان لها وتناول يدها واتكئة عليه ..

عمشاء بتحامل /مافي شي عثرة بمطبخ والحمدلله مافي شي بس اوجعتني الطيحة ...

بغضب/والخدم وينهم وانتي وش مدخلك المطبخ اعطيهم معاشات على وش...وين الي يوجعك وينه...؟

كان قد اجلسها على الاريكة ومدة هي ساقها بوجع...جلس بكل كبرياء عقاب على ركبتيه شد قدمها التي تمسدها...

عمشاء تحاول منعه/تكرم يابو فارس مافي شي بس الم بسيط فيها...

مسد ربلة ساقها وقدمها...شعرت بهتمامه وخوفه...شعرت به...
تعلم انها غالية عليه وجدا...
لكن مانطق به جرح به روحها المتولعة به...
تعلم بانه في الحقيقة شفاف...
وأي شي صغير قد يحركه بعنف...
فاهو بكل غرور الدنيا في اليومين الماضية عندما رأني بتلك الصورة نزل لقدمي ومسدها بهتمام وخوف...!
هو عقاب..!
هو الحب الموجع ..!
هو العناد المتجذر ...لكن النهر المتدفق...

همست بوجع وهي تضع يدها على كتفه/عقاب قم مافيني شي...

وقف بعد ان أطمئن /ماتبين مستشفى يعني...

همست/لا...انت وش فيك جاي بدري اخبر ذا وقت مشيك ماتتركه...

جلس بجوارها /مشيت العصر واجد مايحتاج امشي الحين بعد...فخر وينها...

عمشاء /باقي مارجعت...

لتو انتبه لها...!
كانت ترتدي كف بخواتم الخمسة في يدها هدية لها منه في زمن ما...وكانت ترتدي فستان بلون الذهبي فتبدو ك سبيكة ذهبية
منتثر على يديها نقش الحناء الهندي...شعرها بقصته الجديده ينتثر بشكل شبابي على اكتافها...

كان يريد ان يسألها عن الاحتفال الذي حضرته عن تفاصيل يومها..
كان يريد ان يخبرها بقلقه البالغ عليها الان وهي تمسد قدمها وترفض ان يذهب بها...
يريد ويريد
لكن شخصيته العنيدة غير سلسلة...
يعلم بأن في داخله جبل من العناد والجبروت.،،
وانه في الحقيقه لايستحق مخلوقة ك عمشاء
يعلم بأنه يصيبها في مقتل في ذكر العنود
يؤلمها ويمزقها في ان يقترب من حدود غيرتها،..

ضعي رأسك على كتفي الان..اخبري جبل العناد انك لم تسئمي منه...!




في اتفه التفاصيل اجدك متولع خائف علي
تناقض نفسك ..،
تقتلني في التفاصيل الكبيره وتقلق في عثرة بسيطة..!
روحي هرمت من قصة العنود...هرمت...!
والقصة التي اهرب منها يجب ان اواجهها...يجب..!
انت ياعقاب لاتأتي الا هكذا...!

.
.
.
أما كسرنا كؤوس الحب من زمن..؟فكيف نبكي على كأس كسرناه...؟

.
.
.

في سويسرا...

في فندق يطل على بحيرة ثون...كانت هي تنظر لمنظر بشيء من العبوس...
هو ادخلها الجناح الفندقي الفخم ونزل فورا لبدأ بتصوير اعلانه...

تشعر بوحدة عظيمة...حتى وهي الان في اجمل احلامها...
لكنه حلم باهت..
تشعر بأنها في سجن بلا موعد محدد للافراج...

شعرت با الغيرة الشديدة في مطار الرياض وهي ترا تحلق المعجبين حوله...
تشعر بضألة...بأنها لاشي بجواره
بأن لديه محيط كبير ذو نمط سريع واضواء وشهرة..وهي الجانب المظلم من حياته...
حتى في احد حوراته القريبة سألوه من دفعك لهذا النجاح الحالي؟ قال زوجتي...!
الجملة هذه لو قيلت ﻷي زوجة في العالم لشعرت با الفخر لكن انا اعلم جيدا مقصدة شعرت بقلبي يحترق...!

الحقيقة هي لم تصور رحلتهم لصديقاتها...تشعر بسذاجة الان لكل شيء ولاتدري لما...

لاتعلم كم مضى من الوقت وهي تنظر خلف الزجاج في كرسيها الوحيد والبطانية الصغيره تحتضنها...
لاتعلم كم بللت اهدابها والمفترض انها سعيدة...
لكنها غير سعيدة...

لم تشعر بدخوله ولابقائها يتأملها لبضع ثواني الاحين همس/ نايمة والا صاحية...!

التفتت بهدوء/جيت...

انزل الجاكيت / هلكان ابي انام ...

صمتت وتركها ورمى بنفسه على السرير الفخم وبهدوء/تعالي جنبي ماراح انام وانتي صاحية...

بهدوء/الي يسمعك يقول انك مو تاركني كل ذا الوقت..

فارس/شغل ياعهد والا تبيني اقابلك واخلي شغلي اظن ماترضين

كان يقولها بتهكم وهو يستوي بجلوس على السرير ويشير بيده ان تجلس بجواره


نهضت وصعدت السرير وجلست بجواره...

هو مال لها ووضع رأسه في حجرها ببساطة...وعندما شد اصابعها ليدسها بشعرها همست بهدوء/ تدري فارس انا حايمة كبدي منك خلاص ماعاد بتقبلك عقب اخر نقاش بينا...واحس ان حنا غلط ارتبطنا ببعض...

لم يعرها اهتمام بقى على وضعيته واصابعها على خصلات شعره...

من ثم التفت ببرود الدنيا وشدها يريد قبلة يغيضها بها لكنها دفعتهىقبل ان يتمها و بعصبية /انت تبي تجنني ترا اعصابي خلاص تعبانه منك...!

اعتدل بجلوسه/انتي ماتقولين لي ليش معصبة...؟

عهد تشعر با الاشمئزاز منه.../ليش معصبة انت متزوجني عشان ايش دامك ماتبي مني اطفال...

فارس بهدوء/انتي تعرفين ليش انا مكمل معك ومتمم زواجنا عشان خالتي وامي وهذي سيرة انا مليت اعيد فيها عشان يستوعب مخك هذي من ناحية...

اردف/من ناحية ثانية كيف تبيني اخليك تجيبين اطفال وامهم سطحية وحقت مظاهر وبتربي عيالي على نفس اسلوبها...ومابي اربط نفسي فيك وحياتنا شد وجذب مثل ماتشوفين

عهد بعصبية/اجل ليش احس بكل لمسة منك شي عكس الي تقوله..اذا ضميتني حسيت انك فارس الي يحبني اذا ..

قاطعها/عادي عهد انتي عشانك توك نونه ماتعرفين طبع الرجال ترا الرجال اذا حضرة اي انثى اي انثى طبيعي جدا يكون شي ثاني في علاقتهم ماهو مسألة مشاعر قد ماهو احتياج فطري

وقفت/احتياج فطري ليش شايفنا حيوانات كل همها غريزتها...انا بشر كتلة من مشاعر واحاسيس وانت قاعد كل يوم تقتلك جواتي فاهم تقتلك جواتي ...


تركته وتوجهت لشرفة...البرودة في الخارج هي نيران معارك في داخلها...
معارك ترفع هي راياتها البيضاء في بدايتها...لاطاقة لها بفارس ...
جميع طاقتها استهلكتها معه...وبعد نقاش الاطفال تشعر بانه قضى على كل المتبقي...تشعر بفداحة عثرة ارتباطهم


شعرت بلحاف يلتف بها وذراعية تلتف حول ذراعيها...هو جليد في الافق وبينها وبينه ايضا...!
يراها كما يرئ رجل انثى...!

القبلة التي على شعرها المنثور هي باردة...الاحتضان الظاهري بدفئ لكن الحقيقة صقيع...

كلاهما ينظران للافق...

أشار با اصبعه لمكان ما/بجهة هذيك كان التصوير حق الاعلان...باقي لنا وقت طويل والاعلان مع انه كم دقيقة الا انه متعب..

تشعر بذراعه القويه تحتضنها بقوة عندما لم يجد جواب...عبث بشعرها على ذراعه وجمعه كله لجهة الاخرى من ثم طبع قبلة على كتفها..!

.
.
.
أما كسرنا كؤوس الحب من زمن..؟فكيف نبكي على كأس كسرناه...؟
.
.
.
وضعت حقيبتها بجوارها واغلقت الباب /غيام تاخرت واجد..

غيام يحرك سيارته/معليش طلعت لي شغله قبل اجيك قلت اخلصها واخذك...

القى نظرها على يديها التي لم تهدئ اصابعها المملؤة بخواتم ناعمه لون طلاء اظافر هادئ...وترد بضحك على اتصال اتاها من احدى شقيقاتها...

القى نظرة لهاتفه كانت هناك رسالة منها...قرأها من ثم اغلق هاتفه ...

هي اغلقت هاتفها ايضا ودسته بحقيبتها وهاهما يدخلان سورهما الصغير نزلت هي قبله وانزلت عبائتها وجلست على كراسي الخوص الموضوع في حديقتهم الصغيرة التي لم تكتمل بعد

هو كان يشد الخطوات كان يريد الدخول لكن تراجع لها/وش بتقعدين هنا لهذا الوقت امشي ادخلي...

ورد تشير لمكان ما /ابي اعلق هنا الشتلات ونزرع هناك الشجر الي وريتك البارح بجوالي ..وابي هنا مكان لشواء صغينون وبجيب فوانيس قزاز بنثرها هنا بفتحات بتطلع بيرفكت...والمكان هذاك بخليه فاضي ان شاء الله اذا ربي رزقنا اطفال بحط له رمل هناك والعاب..ممم وابي احط مرجيحة ورد بركن هذا ماراح تكلفنا واجد وديكور حلو...

ابتسم /الله حتى عيالنا حطيتي لهم مكان...

ورد بخبث/اي عيالنا والاماتبي عيال مني...!

بستغراب وببساطة/الا ابيك انتي ام عيالي ليش فيه شي بطريق...!

تشعر بفرحة من تعبيرة البسيط والمباشر /لابس ان شاء الله ربي يرزقنا...

من ثم اردفت /غيام تصدق مع تخبيصك والعشر بنات الي تحبهم بس احس انك امان واستقرار لي مع انك ماسويت اي شي يعزز هذا الاحساس عندي ..

يسايرها/ العشر بنات هذولي شأن خاص لاتدخلين فيه عشان مايوجعك راسك خلاص خلينا نتفق على نقطة انك ماتدخلين في الي مايخصك وبتشوفين استقرار فعلي في علاقتنا...!

ورد /هو المفروض اني اشوفهم شي عادي عشان كلكم كذا بس قلبي ياكلني ماقدر احس بعض الاوقات ودي اتحول زومبي واكلك وارتاح...حبك مسبب لي خلل بنظام..!

هي لاتشعر بأي احراج من تاكيد حبها له بينما هو يشعر عندما يسمع تلك الكلمة منها بأنها متعلقة بشخص الخطأ...!

همست وهي ترفع كلتا يديها بتعب/تكفى شيلني مافيني حيل امشي احس طاقتي كلها راحت عند اهلي برقص ...!

بتهكم /لاوالله رجليك ترقص هناك وهي نفسها الي بتوديك لغرفتك

كان يطفئ الانارة الخفيفه/اخلصي بس...

عندما اولاها ظهره وكان يريد ان يرد على اتصال كان هي قد تشبت بظهره وقفزة كطفلة وعانقت يديها رقبته وبثانية كانت تضع راسها على كتفه من الخلف...هو سايرها وامسك بيديها من الامام/تدرين لو اطيحك انه حلال كنك قردة تنقزين بلمح البصر

ورد بخبث/والله هذا ان دل دل على رشاقتي وخفتي وبعدين مايهون عليك تطيحني كيف تطيح قلبك با الارض...

ضحك بتهكم وهو يشد الخطوات لداخل ويغلق الباب بقدمه/مره واثقه ...

تقبل خده/مره...!
.
.
.
يوم جديد...
.
.
.

.../مافي نبض...لازم ننزله يا المهر وانتي عارفه ان لو مانزل مشكلة كبيرة..

تشعر بصدمة من الخبر وبهدوء/الحمدلله على امره...تقدرين تنزلين اليوم..بجلس ماراح اطلع...

الدكتورة /مافي مشكله وافضل بعد بس اتصلي على من اهلك...

المهر بتفكير/امي مسافره من امس ولاابي اقلق مخها بعد بدق على ابوي ...

الدكتورة /زوجك افضل...

المهر /زوجي برا المملكه...

تناولت هاتفها واتصلت على بندر..لم يرد...كررت الاتصال وهي لاتعلم انه في اجتماع مغلق مع غتار...!


ارادات الاتصال با خالتها عبير لكن جاءها اتصاله المفاجئ...!



.../هلا عمي...


بثقل موزون/وشلونك طيبه...البارح حلمت فيك...!
ابتسمت بتعب/خير ان شاء الله الله يجعله رؤيا خير...

عقاب وهو يرتاح بكرسيه / حلمت ان معك طير في يدك وطار...مدري قلت يمكن عندك شغله تجاريه بتدخلينها ومنتي متوفقه فيها

ابتسمت /لاوالله بس الظاهر ان الطير الي في بطني مقررين علي بعد شوي عملية وعن اذنك ياعمي بدق على غيام يجيني مع خالتي عبير

استوى بجلوسه /ماتشوفين شر انا جايك الحين وش اسم مستشفى..

المهر /عمي مايحتاج

عقاب /ماعليه وينك فيه...،!


اقفل منها ووقف وهو يعدل شماغه بعد ان اخذ اسم المستشفى كان سكرتيره يدخل في ذات التوقيت /ابو فارس الاجتماع مع هذال جاهز

عقاب/ماعليه اعتذر لي منه عندي ظرف عائلي مايحتمل اني اتاخر عليهم...

.
.
.
نقف هنا
.
.
.
همسة محبة / ركعة في جوف الليل هي حديثك المسائي مع السماء لاتغلق باب الحديث...
.
.
.
اللقاء يتجدد يوم السبت القادم ان شاء الله
.
.
.

 
 

 

عرض البوم صور ضمني بين الاهداب   رد مع اقتباس
قديم 06-05-17, 07:31 AM   المشاركة رقم: 939
المعلومات
الكاتب:
اللقب:

البيانات
التسجيل: Mar 2017
العضوية: 324072
المشاركات: 6
الجنس أنثى
معدل التقييم: راويه الحربي عضو بحاجه الى تحسين وضعه
نقاط التقييم: 27

االدولة
البلدSaudiArabia
 
مدونتي

 

الإتصالات
الحالة:
راويه الحربي غير متواجد حالياً
وسائل الإتصال:

كاتب الموضوع : ضمني بين الاهداب المنتدى : القصص المكتمله من وحي قلم الاعضاء
افتراضي

 

السلام عليكم ورحمة الله وبركاته.. صباح الورد 💘💘
يسلموو على البارت الجميل الله يعطيك العافيه..
صراحه أنا يقرقع في صدري توقع من زمااان من طلعت المهر بالروايه فما أدري إذا أحد ذكره قبلي أو لا لأني ماأقرأ التعليقات..
أتوقع أن فارس يتزوج المهر فممكن يطلق عهد أو يخليها على ذمته 🤔
..
غيام كبر بعيني في هالبارت وحبيته 😍
عقاب مدري وشهوله متعب نفسه لاهو اللي مرتاح ولاهو اللي مريح غيره..
ممكن دامر يتزوج وهج توقع شاطح يمكن ليش لا 😂😂

..
وبس والله أهم شي طلعت اللي يقرقع بصدري من زمان ولاقدرت أكتبه غير اللحين

.
أحبتس ياكاتبة حروف سعادة بالنسبة لي 💘

 
 

 

عرض البوم صور راويه الحربي   رد مع اقتباس
قديم 06-05-17, 08:01 AM   المشاركة رقم: 940
المعلومات
الكاتب:
اللقب:

البيانات
التسجيل: Feb 2017
العضوية: 323574
المشاركات: 203
الجنس أنثى
معدل التقييم: عذبتهم بشموخي عضو سيصبح مشهورا قريبا جداعذبتهم بشموخي عضو سيصبح مشهورا قريبا جداعذبتهم بشموخي عضو سيصبح مشهورا قريبا جداعذبتهم بشموخي عضو سيصبح مشهورا قريبا جداعذبتهم بشموخي عضو سيصبح مشهورا قريبا جداعذبتهم بشموخي عضو سيصبح مشهورا قريبا جدا
نقاط التقييم: 502

االدولة
البلدSaudiArabia
 
مدونتي

 

الإتصالات
الحالة:
عذبتهم بشموخي غير متواجد حالياً
وسائل الإتصال:

كاتب الموضوع : ضمني بين الاهداب المنتدى : القصص المكتمله من وحي قلم الاعضاء
افتراضي

 

يسسعد صباحكم بكل خييير اهل ليلاس🌹😘ويسعد صباحك بكل خييير ضمضم💜يسعدكم ربي جميعا🌹. ابدااااااااع ضمضم ماشششاء الله عليك كل عثره تبدعين فيها اكثثثر واكثثثثر🌹🌹 فخخخر وعقاب مو راضي يرضى عليها صحيح غلطت بسسس خلاص المفروض كان حاول يقول لها مببببروك اوجع قلبها💔صحيح هي اوجعت قلبه💔بسسس هي ماوافقت عبث واختارت حياتها وهي ماتعرف الشخص اللي تبغى تربط نفسها فيه عشششان الصلح وزي مافرقتهم مره بتجمعهم مره💪.
الاحداث اليوم كله جميييله جدااااااا بسسس 😤 اجمل حدث لقاء المهههههر وعمها عقاب ولقاء فخخخر وعمها بندر وسبحان الله في نفسسس المكان👌كنت متوقعه ان المهههههر بتعلم عقااااب عن حياتها😬 بصراحه وش اللي يخليها تقول كل شششي لعمها😁 وابوها واخوانها ليششش مافكرت تعلمهم😤بصراحه ماحبيت شششخصية المههههر في البدايه كانت تعجبني الحين ماحبيتها😣😬يعني ماقدرت تعامل ابوها مثل عمها عقاب وتنزاح هالحواجز😤 ويعني بينزل الجنين وراح يجي عقاب ويشوفها ويمكن يتقابلون هو وبندر وغتار في المستشفى بسسسس في وقتها وش بتقول لهم كيف عمها يدري عنها💔ويمكن تجي شطحه ثانيه ان غيييام يشوفه عند المههههر ويتكلم معه وبعدها يخطط له😇😇فيسسس يفكككككر😁الحين الكل بيعرف عن حمل المههههر واولهم داااامر مدري وش بتكون ردة فعله يعني هو طلقها طلقتين يقققهههر وهي بعد تقققققههههر💪يبغالهم تكفييييخ💪. لي عوده في وقت ثاني بآذن الله للتعليق على باقي الاحداث ولقاء فخخخر وعمها بندر💜فقدنا غتتتار😁😁😂عاد برجع اقراها مره ثانيه وثالثه ورابعه😂😁واعلق بعدين بآذن الله💜😍

 
 

 

عرض البوم صور عذبتهم بشموخي   رد مع اقتباس
إضافة رد

مواقع النشر (المفضلة)

الكلمات الدلالية (Tags)
الحظوظ, العاثرة
facebook



جديد مواضيع قسم القصص المكتمله من وحي قلم الاعضاء
أدوات الموضوع
انواع عرض الموضوع

تعليمات المشاركة
لا تستطيع إضافة مواضيع جديدة
لا تستطيع الرد على المواضيع
لا تستطيع إرفاق ملفات
لا تستطيع تعديل مشاركاتك

BB code is متاحة
كود [IMG] متاحة
كود HTML معطلة
Trackbacks are متاحة
Pingbacks are متاحة
Refbacks are متاحة



الساعة الآن 09:51 PM.


 



Powered by vBulletin® Version 3.8.11
Copyright ©2000 - 2024, Jelsoft Enterprises Ltd.
SEO by vBSEO 3.3.0 ©2009, Crawlability, Inc.
شبكة ليلاس الثقافية