الفصل ثلاثة وخمسين
يود ان يمسي سقيما لعلها
اذا سمعت عنه بشكوى تراسله
-كثير عزة –


بـــــدر 11 سنة , فراس 19 سنــة ..
وقف فراس بسيارته قدام ابتدائية البنين ... ابتسم بدر وهو يركب مباشرة : غريبة أنت جاي ؟!
فراس برواقة وبيدة بيره يشربها .. ويده الثانية يسوق مع نظاراته الشمسية : خلصت محاضرات اليوم بدري قلت ياولد رح مر اخوك بلا ماينصع بالشموس لأن السواق اليوم مشغول شكله
بدر : غريبة مشغول
فراس : ابوي موصيه باشغال له والظاهر بينمسك فيها طول اليوم
بدر : واسوم طيب ؟
فراس : هذانا بنمرها اللحين ... وآيه ترا اليوم ابوي وعمي عبدالرحمن طالعين كشته تجي ؟
بدر : مدري على حسب .. بكرة عندي اختبار جغرافيا واخاف مقدر
فراس : عموما اذا بتروح لاتعطي ابوي خبر باختبارك عشان ماتجلس غصب
دق جوال فراس .. ابتسم وهو يرد : هلا نايف ........... هههههههههه لا عاد !؟ ..... ايه اليوم رايح ان شاء الله ليش لاتقول انك ماحتجي ؟........... تعال يخي نوسع صدورنا شوي كلها كم شهر وننكبس امتحانات قبول........ ع خير اجل
سكر السماعة وهو يوقف قدام مدرسة ابتدائية البنات .. وتطلع طفلة 9 سنوات وتركب وهي تدخل راسها بين المرتبتين القداميه وتضم فراس من رقبته وتبوس خده : فراااااااااااااس
فراس وهو يرد لها بوسه بخدها : ههههههههه هلا بلوشتي !
اسماء بابتسامة شقاوة : اليوم اخذت أميرة الفصل
فراس : ياعيـــني على الأميرات
اسماء : عشان كذا ودني ملاهي اليوم !
فراس : ايه يالحياله هذي خطتك ... بكرة ان شاء الله
اسماء بحمق : لا اليوم !
فراس : مشغول اليوم .. قلنا لك بكرة ماراح اطير
بدر باحباط : ليش ناسي انك بكرة بتطير مع ابوي امريكا ؟
فراس التفت لبدر : وانا بروح للأبد ؟ كلها سنة وتعدي
بدر بقهر : بس انا ابي اروح معـــك !
فراس بتذمر : اوهوووه رجعنا لنفس السالفة .. رايحين نلعب انا ؟ شغل وراجعين
بدر : وبتخلونا لحالنا ؟
فراس وقف سيارته عند القراش وهو ياشر لابوه اللي جالس مع ام فراس بالحديقة : شف هذا ابوك رح تفاهم معه
نـزل بدر واسماء وفراس وراهم وهم يجلسون مع اهلهم بالجلسة ... فراس : شمجلسكم هنا بالقايله .؟
ابو فراس : وش قايلته والله الجو عليل اليوم !
اشر فراس لابوه بعيونه لبدر اللي كان حمقان .. ابو فراس ابتسم : اشوف بدور زعلان ! شفيك حبيبي ؟
فراس : يبي يروح معنا بكرة .. خبرك هذي سالفتنا لها شهر
ابو فراس : افا كيف نروح كلنا ومن بيصير رجال البيت عقبي ؟
بدر والمدحه ازاحت نص الهم : انا ..
ابو فراس وهو يضرب ع ظهره بفخر : والنعــــم ولدي
بدر : بس زعلي هذا شاسوي به !؟ مقدر ما أزعل لانكم بتروحون !
فراس وهو ياكل تمره : ولا يهمك جيب زعلك هذا انا ازعل عنك
ام فراس : وبعدين حبيبي من يجلس عندي انا اذا رحتوا كلكم ؟
بدر اللي رضى بعد كل هالمدح : خلاص طيب ... ( طالع ابوه ) بس المره الجايه انا اروح معك مو فراس !
ابو فراس : من عيــــوني
فراس : يمه وين أنس وياسمين ؟
ابو فراس : ناموا وتركناهم .. امس سهروا امك طول الليل
فراس وقف : مو بكيفهم رايح اصحيهم !
ام فراس : لا فراس واللي يسلمك بعد الشين ناموا
فراس : لانك يمه تتركينهم ع راحتهم ينامون ويصحون .. بصحيهم اللحين وقبل الليل ولا واحد فيهم يغمض عيونه
ام فراس باستسلام : على يدك
فراس بعزيمة : بتشوفين والله لاعدل لك نومهم في يوم
فتــــح بدر عيونه وهو عاقد حواجبه بضيق من النومة الغير مريحة .. والذكرى اللي زارته على شكل حـلم .. يمكن هالذكرى مميزة لأنها اخر جلسة لعائلة سوا .. بعد هالذكرى ماعاد اجتمعوا .. الكل تغير .. وبالأخص صاحب الإبتسامة المميزة .. والروح المنطلقة .. والشباب النشيط .. بعدها سافر ورجع .. وكلش انهار ... يحس بهالجرح للحين يعتصره .. كان ينتظر بكل صبر رجوعهم .. ورجع لهم خبر موت أبوه يهز البيت .. ثم رجع لهم إنسان ثاني تماما اسمه فراس بالكنية بس .. تنهد من طيف هالذكرايات بهالليل قد ايش يضايقه ..
***
صحت نشيطة بصبـاح بدري .. ألاصوات العائلية معبية الفيلا اشبعتها نشاط .. التفتت لاسماء اللي نايمة بالسرير جمبها وهزتها : اســــوم .... اسماااااء ... بنت !
اسماء فتحت عيونها : شنـو ميهاف وش هالقلق ؟!
ميهاف : قلق هاه؟ قومي اخلصي خل نفطر ونوسع صدورنا
اسماء جلست بكسل : يله هذاي قمت
ميهاف وهي تفتح شنطتها تنقي لبسها : إلا ماقلتي لي وش سر هالمزاج اللي تنشط فجأة امس !
اسماء تنهدت وهي تضم وسادتها لصدرها : الحب راضاني
ميهاف : اسوم ! وين راضاك معه ؟!
اسماء : اقول شف من يتكلم ... انتي وبدر تتراسلون من قبل تنخطبون حتى يعني مافيها شي لو صار رقمه عندي
ميهاف وطاري اسمه يعكر جوها .. تنهدت : ولو انتبهي اسوم .. لا تتهورين واللي يسلمك
اسماء وهي تسحب لها لبس وتدخل الحمام : ماعليك اموري تمام
سحبت ميهاف لبسها وهي تفكر بنفسها .. الكل اموره تمام الا هي , ليش حظها ضارب كذا .. حتى لما حاولت تتراضى معه سحب نفسه ورفض .. تنهدت وهي تلبس وتجلس عند المرايه تضبط شعرها المستشور .. وصوتت لاسماء : اسماء انا سبقتك ! عجلي
دخلت عند اهلها وجدها كان جالس مع الحريم : هلا والله بالطش والرش والبيض لا فقس ! ياصح النوم
ميهاف وهي تبتسم لجدها وتجلس جمبه : هلا فيك حبيبي .. شلونك ؟
ابو عبدالرحمن : بشوفتس صرت بخير
ميهاف : غريبة فين البنات .؟!
ام فراس : الكل نايم حتى ابتسام غريبة عليها للحين نايمة !
ابو عبدالرحمن : حتى نايف ماشفناه ! افطرنا دونه يستاهل
ميهاف : لا اسوم صحيتها معي بتجي اللحين
ام عبدالمجيد : الله يرضى عليك آجل روحي صحي سجى مره وحده
ميهاف وهي توقف : من عيوني
راحت بطريقها لغرفة سجى انتبهت لصوتها يعني صاحية .. لكن لفت انتباهها المكالمة على الجوال : ودااد يفوتك الرحلة كلش وناسه ! ..................... لا طبعا غادة مالت عليها منكدة علي وعلى الكل ....... لا الباقين بخير ومشتاقين لك ............. الا الغريبة ميهاف ! مو من صدقها .... تخيلي مبسوطة وتضحك وفالتها ما كأن بدر راميها عند اهلها وحالتها حاله ! ................... ايه اقولك تضحك ومزاجها احسن مني حتى ...........ايه شفتي حتى ميهاف الحلوه على قولتهم ما مشت .... الزين غسال يدين وانا اختك ... عاد الصدق اصلن ميهاف شاينه ماعاد اشوف فيها هالزين اللي يقولونه .................لا ..
ابعدت ميهاف ماتبي تسمع وهي تحس بقهر .. هي فعلا زعلانة على حالتها بس ماتبي تعترف بحزنها وتعيشه .. تعبت من نفسها من خطبها بدر وكلش مو تمام : ................................
انتبهت لاسماء تطلع من الغرفة وتلتفت لها : تو مارحتي لاهلي ؟!
ميهاف ابتسمت ابتسامه صفراء : إلا بس قالوا اصحي سجى وصعدت اشوفها طلعت صاحية خلاص
اسماء وجوالها بيدها تراسل بحماس وهي تكلم ميهاف : الله يهديك كان ماصحيتيها !
ميهاف نـزلت دون تعلق وهي ترجع لجلسة اهلها ..
ابو عبدالرحمن : هاه يابنتي صحيتيهن ؟
ميهاف : صاحيات يبه بس اللي تلبس و هذي اسوم وراي
اسوم رفعت عيونها من الجوال وهي تدخل عليهم : صبااااااح النور والسرور والشر عنكم يزول يارب
ام فراس : وش هالصبح الشمس من وين طالعه ! مزاجية انتي لاجاز لك طنقرتي ولا جاز لك رضيتي
اسماء وهي تجلس جمب امها وبرواقة : وانا متى زعلت اساسا ! الله لايجيب الزعل لكل الموجودين
ام فراس : إلا عمي متى راجعين ان شاء الله ؟!
ابو عبدالرحمن عقد حواجبه : وين غادة .؟!
ام فراس : شكلها للحين نايمة .. نناديها ؟
ابو عبدالرحمن : لا اتركوها نايمة براحتها . . بس هي اللي تقرر متى نرجع هالطلعة طلعناها عشانها وبنرجع عشانها
***
إبتســــام صحت من النوم وهي تدق على غادة بس مافيه رد .. تنهدت بضيق !
التفت لها نايف اللي كان منسدح وللحين بهيئة النوم ويلعب بجواله : شفيك ؟
ابتسام وهي تكمل تلبيس عيالها : ادق على غادة ماترد مدري شسالفتها وترتني
نايف : مع بنتها ومبسوطة وشفيك عليها ؟
ابتسام : بنتها مو معها .. تركتها نايمة بغرفة البنات ( تنهدت ) بطلع اللحين وبشوفها
نايف تثاوب : وانا بعد بقوم اللحين جدي له ساعه يدق علي
ابتسام عقدت حواجبها : وليش ماترد ؟!
نايف : لأن لو ارد قال لي تعال .. وانا لزوم اتمغط ساعه
ابتسام هزت راسها : والله جدك فيه الخير اللي صابر عليك
وقف نايف وهو يلبس ع السريع وفي طريقه برا شال مشعل معه : حبي ترا مشيعل معي
ابتسام : انتبه له زين !
خلصت تسريح شعرها وترتيب نفسها .. تستعد تطلع.. وحملت عبدالرحمن بين يديها وهي تــنزل : صباح النور
كان الكل موجود ماعدا غادة : صباح الخير
ابتسام عقدت حواجبها وهي تجلس : غادة وينها .؟
ام فراس : ماجت للحين .. غريبة عليها كل هالنوم
ام فراس اللي ماكانت متطمنة لحالتها من امس : عموما انا بصعد الحين وبشوفها
ابتسام : لا ارتاحي انا بروح اشوفها .. فراس موجود ولا أصعد عادي ؟
ام فراس وقفت : لا مو موجود بس انتي اجلسي ولدك معك .. انا بروح اشوفها
اسماء : اقول بنات انا جويعة ما أفطرت .. من مشتهيه تفطر معي ؟
سجى : فيه بوفيه قريبه من هنا عندها فلافل يشلع القلب .. نروح نحرد له ؟!
اسماء :قدااااام .. ميهاف يله قومي ؟
ميهاف : انتظري غادة طيب يمكن مشتهيه معنا .. ( ألتفتت لابتسام ) ابتسام ماودك تروحين وتتركين الصغنون معي ؟ من امس مامشيتي حتى بس جالسة معاهم
ابتسام : لا حبيبتي ماتقصرين اتركيهم وانتي اطلعي انبسطي
***
غـادة كانت تبلع ريقها بصعوبة وهي قدام مكتبه .. وبيد مرتجفه سحب ملف موجود تفتحه بس كان شغل طبيعي .. عضت ع شفاتها واضح انه مستحيل يجيب هالأمور معاه لكشتةة شاليه .... حضنت راسها بين يدينها وهي تحس بتوتر فضيع .. حركت يدها الفارة دون قصد وانفتح اللابتوب قدامها .. رفعت عيونها وهي تنتبه لكلام بالإنجليزي .. ضيقت عيونها تحاول تعرف .. وهي تسحب جوالها من جيب بنطالها تحاول تترجم انطق الباب ... انخبصت وهي تقوم بسرعة من مكتبه لايكون هو ! نطقت بتوتر : ميــــــــــن !
: انا ام فراس .. صاحية ؟
ابعدت غادة شعرها لورا اذنها هي تفتح الباب بربكة : هلا خالتي
ام فراس : مالبستي بعد ؟ يله امي البسي انزلي البنات يبونك تحت
غادة هزت راسها بموافقة : ان شاء الله جاية اللحين
ام فراس : مو تأخرين .. بسرعة
غادة : ما حتاخر ان شاء الله
سكرت الباب وهي تقفله ... وتمشي ناحية النافذة وتطل ع الجلسة وكان فراس جالس معاهم بجلسة الرجاجيل .. تنهدت بتطمن يعني ماراح يجي ... طلعت جوالها وهي ترجع لجهازه وتحاول تترجم .. لكن امالها خابت كانت مجرد رساله عادية كلها معاملات ..
ابعدت من مكتبه وهي تفتح شنطتها بكئابة .. كانت صاحية طول الليل ومافاتها لما صحى بنص نومه وجلس على مكتبه لحد الفجر دون يشتغل مجرد يفكر أو فارقه النوم ....
بعد ماجهزت مشت بخطوات كسولة وهي تدخل على الاهل المجتمعين وتو بتتكلم استقبلها صوت اسماء المتحمس وهي تلف طرحتها : غدووو بسسرعة البسي عبايتك فيه بوفيه قريبة بنروح نفطر !
غادة تنحنحت : صباح النور
: صباح الخير
التفتت لاسماء : والله يا اسوم اكفيني هالروحة بجلس مع رنيم وبفطر هنا
ابتسام : ماعليك من رنيم انا موجودة .. روحي انتي
غادة جلست جمب ابتسام وهي تبتسم لعبدالرحمن اللي بحضنها : لا وبعدين مشتاقة للحلو هذا بجلس وربي عجزانة
ميهاف : آجل انا بعد اعذروني عجزانة !
شهقت اسماء : حسبي الله عليكم ! بتخلوني انا وسجى بس نروح !
سجى : ياشينك ميهاف تعالي وربي راح ننبسط يمكن بالطريق بعد ناخذ لنا مشوار فله شي
ميهاف طالعت سجى بنص عين : قلت ماراح اروح ومالك دخل تزننين علي
سجى عقدت حواجبها باستغراب من لهجتها : اووكيه تمام ماله داعي تدفين كذا ! خرعتيني بجد
شاحت ميهاف عنها دون نفس : ....................
اسماء رمت عبايتها بضيق : آجل فيها خيره ! بروح اقول للخدامه تسوي لي توسته وتخب علي بعد !!!
ام فراس : مو تهونين وتجين بعدين تقولين ماتتركوني اسوي اللي ابي ! تبين تروحين طسي
اسماء : ماراح اطس لحالي ! مالت ماعندكم جو
ام فراس : غدو حبيبتي جدك يقول متى حابه نرجع ؟!
غادة بانحراج : ع راحته هو شعلاقتي انا ؟
ام فراس : هو مختار الطلعة خصيصا عشانك .. فانتي ردي له
غادة : لا انا ماعندي دوام ولا دراسة ولا غيره ... فاضية , اسالوا اهل الدوامات متى هم يقرروا
***
ابو عبدالرحمن كان جـالس يتقهوى وعيونه على لؤي .. اللي كان يشرب فنجاله بهدوء واخيرا سأل : وين هيثم ؟
ابو نايف : مانام هنا امس رجع وراه دوام
لؤي : اهـا .. انا بعد اليوم راجع ان شاء الله
ابو نايف : ليش وش وراك انت ؟!
لؤي وهو يلتفت لفراس : فراس بيرجع اليوم فقلت ارجع معه وش يجلسني ؟
ابو عبدالرحمن : وفراس شعندك بترجع اليوم ؟
فراس : حلا هو .. جلسنا يوم ووسعنا صدورنا خلاص ! طابت نفسي وبعدين بكرة مواعيدي كلها مهمة مقدر اكنسلها
ابو عبدالرحمن : آجل خل نرجع اليوم كلنا وبس .. وش قيمتها جالسين مع حالنا !
فراس هز كتوفه : بكيفكم والله
ابو نايف : شدعوه يبه نرجع كلنا ... خل فراس يرجع لشغله وحنا يمدي البزارين مساكين مبسوطين مامداهم يتوسعون
: صبـــاح النور
التفتوا لنايف وولده اللي بيديه وهو يجلس ..
: صبـــاح الخير
ابو عبدالرحمن وهو يبتسم : من هذا اللحين مشعل ولا دحيم ؟
نايف : هههههههه هذا مشيعل
ابو نايف : سميي وينه اجل .؟
نايف : والله خطفت اقرب واحد قدامي .. وبعدين سميك مبوز خفت ابلش به ويقلبها لي صياح مشيعيل هويجد فجبته هو
لؤي وقف : انا رايح اتمشى طابت من الجلسة
أول ماراح لؤي التفت ابو عبدالرحمن لنايف وفراس بهجوم : امحق اخوان اكبار انتو الثنين !!
نايف تفاجئ : وش هالشطحة يبه شصاير ؟
زفر فراس دون نفس : بدينا ...
ابو عبدالرحمن : لؤي وبدر ! ولا واحد فيهم صاحي ... وما كن عندهم اخوان كبار , تحركوا شوي ساعدونا اقل شي
نايف : الله يهداك يبه اللي بيسمع كلامك بيحسبك تحكي عن فهد وأنس ! ليش لؤي وبدر وراعين نشيل همهم ؟!
ابو عبدالرحمن : يعني لاكبروا نهملهم ! ليش انتو مو أهلهم !
نايف : والله يايبه انا اهلي اساعدهم على عيني وراسي .. بس ماني تابع لهم افهموا هالشي , مثل ما لؤي عنده حياه انا عندي وكل واحد يتصرف بنفسه
ابو عبدالرحمن : لا وتعرف ترد يالتيس ! كيف بتربي اللي بحضنك وانت حتى اخوك ماعرفت تحل مشكلته
نايف بنفاذ صبر : بتكملون هالموال اقوم ولا شلون ؟
ابو عبدالرحمن التفت لفراس : وانت اشوفك ساكت ؟!
فراس ببرود اعصاب : ذاه زعل وذاه غيرته الأيام وكلن لاهي .. المهم انا باكل وبنام وبشتغل وداهيه تاخذهم كلهم
ابو عبدالرحمن صفق : ما شاء الله تبارك الرحمن .. قد ايش انا مبسوط وانا اسمع ردودكم ! ولا واحد فيه شوي احساس ويقول اخوي ؟
فراس وقف : انا استأذن برتب شنطتي امشي
ابو عبدالرحمن بعصبية : فارق ! هذا انت اذا ما أعجبك تمشي
نايف وقف .... أبو عبدالرحمن : وانت وين بعد !!
نايف : ريلاكس يبه رايح اشتري اغراض من البقاله .. تبون شي ؟
ابو عبدالرحمن بقهر : آبد ! ما كاني اتكلم
راح نايف مطنش .... ابو نايف بعصبية : شف حتى ولده تركه هنا .. وين المسؤولية بس
عـند فراس /
كانت اعصابه ابرد من الثلج .. كأن موضوع بدر مات عنده خلاص ماعاد يأثر , دخل ناحية الفيلا وهو يوقف لما حس بصوت انوثي بالحوش .. لكن بعد ما أدرك الصوت اكتشف انه صوتها فسمح لنفسه يدخل .. كانت منحنية بوقفتها وهي ماسكه يدين رنيم وترجع لورا وهي تساعد رنيم في انها تخطي : عاشت قـــماري .. حبه .. حبه
فراس مشى مباشرة لداخل كانه ماشافها .. عقدت غادة حواجبها لما انتبهت له يدخل على طول : ........ شافني ؟
جلست رنيم بهدوء وهي تنادي فهد : فهــود !! تعال حبيبي اجلس عند رنيم لحظة
دخـلت لداخل وهي تنتبه للبنات جالسين .. طالعت ام فراس : خالتي فراس دخل ؟
ام فراس : آيه من شوي راح لغرفته
هزت غادة راسها وهي تتوجه للغرفة وهي متوترة من عجلته .. لايكون شي يخص الرسالة .. دخلت بتردد وهي تنتبه لشنطته الصغيره جالس يرمي فيها ملابسه واغراضه .. حتى انه ما اعار أي ردة فعل لانها دخلت : ................
غادة بتوتر : راح ترجع ؟
فراس تجاهلها تماما وهو يكمل شغله ويمشي ناحية جهازه واوراقه يرتبها : ............
غادة سكرت الباب وراها وهي تخطي كم خطوة ناحيته : عــندك شغل ضروري ؟بترجع لحالك ؟
فراس رمى الملف اللي بيده على الطاولة بنفاذ صبر وهو ينطق بين اسنانه : أيه راجع ! لحالي مو لحالي مالك دخل ... شي ثاني ؟!
غادة وردة فعله احرجتها اكثر .. نزلت راسها : آسفة ..
فراس شال شنطته على كتفه .. غادة الي كانت قريبة من شنطة ملابسه شالتها بين يديها : راح اساعدك الثنتين ثقيلة ..
فراس مشى ناحيتها وهو يسحبها من بين يديها : محد طلب مساعدتك !
غادة ( مزاجه كذا ليش ..؟ عشان الرسالة اكيد ... ) ماقاومت تسأل قبل يطلع : صاير شي ؟
لكن الجواب ماكان حتى تردد بمشيه .. سكر الباب وهو يطلع
مشت بخيبة للنافذة وهي تشوفه يفتح الباب الخلفي يرمي شنطته ثم يركب قدام ويحرك سيارته .. وأمنيتها انها تكون جمبه , تبي تساعده .. تبي تشيل معه نص همه .. بس مو قادرة كيف ولا حتى شلون تبدا .. ماتتمنى منه غير نظره .. عسى هالنظرة ترد لها الروح عقب أمس ..
***
دخـل أبو عبدالرحمن البيت وبين يديه مشعل .. استقبلته أبتسام : يوه عمي أنت اللي ماخذه
ابو عبدالرحمن : وانتي مسلمه الولد لنايف نطله عندنا وذلف ولاعاد رجع
ابتسام : شاسوي بعد خذاه دون يشاورني حتى
ابو عبدالرحمن جلس وهو ينطق بعصبية : هالولد أصلن مايتولى شي ! اطلب منه طلب مايرد علي مطنش
ام نايف : هذا نايف طول عمره .. مو شي جديد
ابو عبدالرحمن بانفعال : بأكسر له راسه لين يتسنع .. اخوه حالته حاله وهو مبسوط وفالها ! ابفهم متى صاروا الأخوان كذا كانهم مايعرفون بعض .. ( ألتفت لام فراس ) لا من عيالتس ( ورجع لأم نايف ) ولا من عيالتس ! كلهم بداهية
ام فراس : ليش شمسوين بعد ؟!
ابو عبدالرحمن : يقالي أحاكي الكبار العاقلين ابيهم يوقفون مع اخوانهم .. وكلن رده زي وجهه ! واحد كأني احكي عن واحد من الشارع مو أخوه والثاني يضحك كأني اقوله نكته !! ابفهم انا متى صاروا عيالي كذا ؟!
ام نايف بقلة حيلة : وانا اصلن اشوف هالنايف عشان اتفاهم معه .. لا هو ولا اخوه كلن هاج وحاقرني
ابو عبدالرحمن : شلون ماعاد تدرين عنه !! تزوج وانهبل يعني ..؟!
ابتسام حست بدقه لها : ........................
الكل سكت .. محد بيده شي .. : ....................
ابتسام بقهر نطقت عقب صمت باسلوب محترم: بعد إذنك ياعم .. أنت الكبير هنا ومالنا امر عقب امرك , قدرت عليهم ؟
ابو عبدالرحمن بضيق : شلون يعني !!
ابتسام : يعني جالس تعاتب خالتي .. ليش ماقدرت تصلح الوضع ؟! ليش انت قدرت تصلحه عشان نقدر حنا ؟
ابو عبدالرحمن بانفعال : قصدتس مالي حق اتكلم يعني ؟!!
ابتسام بانضباط اعصاب : وانا ماقلت كذا .. انا اقول لاتحمل المسؤولية ناس مالهم علاقة , اذا نايف تزوج وأنهبل فهذا من نفسه .. ماله داعي تتهم أحد
ابو عبدالرحمن ضيق عيونه فيها وهو ماتعود احد يرد عليه : ..................
ابتسام : ما أدري ايش صاير بالضبط بس على حد علمي ان صاحب المشكلة هنا لؤي .. وانا أشوفك تهاوش أم لؤي وأبو لؤي وأخو لؤي .. كل اللي حوله وماخطر ببالك تبدا من لؤي نفسه ؟! المشكلة تنقص من جذورها مو من فروعها
ابو عبدالرحمن اللي ماكان يحب أحد يعلمه الصح : شرايتس تقومين تعلميني الصح من الغلط اللحين بعد ؟!
ابتسام وهي مستغربة نظرته لها كأنه منتقدها : عموما هذي وجهة نظري .. اذا ما أعجبتك كبها بحر ( شالت مشعل بين يديها وهي توقف تصرف نفسها من الجو اللي توتر بسببها دون قصد )
لبست عبايتها وحطت عيالها بعربيتهم طلعت لبرا وهي تتنفس براحة وتنطق بقهر : يوه يا ابتسام كان ضروري تتكلمين كذا ؟! ليتني سكت ..( عضت شفتها بقهر وهي تمسح ع المكان بعيونها ) وين نايف ! ( طلعت جوالها وهي تدق على رقمه )
: الــــو ؟!
نايف : هــلا والله
ابتسام : نايف انت وين ؟!
نايف : وين يعني موجود .. ليه ؟
ابتسام : انا قدام الشاليه .. لو سمحت تعال ابيك
نايف بضيق : ضروري ؟ لأني مع العيال اللحين وبينزلون يفطرون .. خليها بعدين
ابتسام : نايف !! مو رايقة والله .. بتجي اللحين ولا مافيه بعدين لاعاد تجي
استسلم نايف :اففف زين ... خمس دقايق ..
***
كان لؤي مسند ظهره ع سيارته ومتكتف ويراقب العيال وهم يستعرضون مهارات القيادة .. : ماودك تروح معهم ؟
انتبه لأبوه جمبه قال دون نفس : لا ماودي
ابو نايف تنهد : غريبة مارحت مع فراس ؟
لؤي : كيفي عاد
ابو نايف : لؤي ! تكلم زي الناس ..؟ انا اجي احاول معك وانت تلطس نفسي بهالاسلوب
لؤي : معناها افهم انك معد تحاول
ابو نايف بحدة : لـــــــــــؤي !!!!!
لؤي التفت لابوه بنظرات حاده : يصير انك تشتاق لنفسك اكثر من كل الناس .. وبسببك انا صرت كذا يعني لؤي القديم انتهى خلاص
ابو نايف : وبعدين يعني .. بتجلس كذا لاشغل لا نفس زينه لا كلام لا شي ..
لؤي : عدل اتوقع .. انت حرمتني من بنتي وانا بحرمك من ولدك
ابو نايف : تعاقبني يعني ؟
لؤي دون نفس : اعتبرها زي ماتبي !
ابو نايف : ماشي ماشي .. بس انا للحين ماسويتها بس بيجي يوم اسحبك تعيش حياتك غصب
لؤي ببرود : اساسا مو غريبة عليك
ابو نايف : بس انتبه يابوك تكون استهلكت الاحساس الصح على الانسانه الغلط
لؤي : صار يبه صار .. حتى لو كانت انسانه غلط .. اللحين حتى لو تجي الانسانه الصح بتحصلني دون احساس
***
وصل نايف لعـندها وهو يمشي دون نفس ويدينه بجيوب بنطاله : هاه ابتسام .. لو يطلع الموضوع سخيف وقتها ب ..
قاطعته ابتسام : تعال نجلس بمكان بكلمك
عقد نايف حواجبه : تكلميني في شـنو ؟
ابتسام : انت جدك ليش زعلان عليك ! شمسوي هالمرة بعـد ؟
نايف كبس عيونه وهو ينطق بقهر : مناديتني عشان كذا !؟
ابتسام : نايف ترا دون شي منقرفة لاتجلس تفلم علي بعد انت ... شمسوي !
نايف دون نفس : ماسويت شي ! مجرد ماتدخلت ... وكيفي حريتي مابي اتدخل !
ابتسام : ايه بس انا اشوفك ساحب نفسك بزياده .. يعني مهما كان يضل اخوك اقل شي كلمه
نايف رفع حواجبه : بعد انتي بتصيرين لي زي أهلي ؟
ابتسام : اساسا انا من اول ماحبيت طريقتك مع اهلك .. ما كانهم اهلك ماعمرك وقفت معهم
نايف : كيفي .. مابيهم يتدخلون بمشاكلي ولا ابي اتدخل بمشاكلهم
ابتسام : بس انا اللحين عندي ولدين .. واذا بربيهم ابي اربيهم يحبون بعض ويصيرون اخوان ووقت يصير شي لواحد فيهم الثاني يساعده ! كيف بعلمهم هالشي وانت ابوهم ؟
نايف مسك راسه : رجعنا لاسطوانة كبسولة الزمن .. ( مسك كتوفها وهو ينطق برجاء ) ابتسام حبي .. لا تستعجلين تجعدين وجهك ووجهي معك .. خلينا مبسوطين اللحين بشبابنا .. صرت اعيش حياة مشيعل ودحيم عقب مدري كم سنه اكثر من حياتي .. ( كمل بيأس ) واللحين واللي يسلمك خلاص اتركيني اروح اكمل كشتتي ؟
ابتسام رفعت حواجبها : انا جالسة اكلمك بموضوع مهم وذابحة عمري وانت همك هالدشير اللي مدري متى تنقلب سياراتهم ! ؟
نايف بقهر : شنو مهم ! لا يخصني .. ولا يخصك ولا شي !!
ابتسام : امنيتي مره اشوف تسوي الشي الصح !
نايف : هذانا اسوي شي صح وما اتدخل بمشاكل غيري وعايش حياتي بسلام
ابتسام بتشديد : الشي الصح نايف مو الشي السهل !
نايف بتذكر : واللييييييييل .. ( دق جواله .. رد بضغط ) هلا ؟! خلاص يخي خمس دقايق وجايكم .... لا لاتبدون !
في نص مكالمته عطته ابتسام ظهرها وهي تدخل وتحس انها الغلطانة اللي نادته اصلن .. انسان سخيف دون مبادئ !!
اما نايف زفر بقلة صبر لما سكر السماعة وهي تمشي بطريقها نادى بيأس : إبتسام !
ماردت عليه وهي تكمل طريقتها وعربية التوأم قدامها تدفها ... ضغط ع جواله بقهر وهو يبعد عن الشاليه وينتبه للؤي واقف عند سيارته مشى ناحيته وهو يتكتف قدامه وينطق بقلة صبر : شخبارك اخوي ؟
لؤي عقد حواجبه : شعندك ؟
نايف بتهكم : انا اخوك اللي جاي يحاول يخليك تبتسم ! واذا ماقدرت بزعل معك ... اخلص قرر ترا اخلاقي قافله !
لؤي : حمدالله والشكر شتحس به انت ؟
نايف بنفعال : انت اللي شتحس به ! مبوز 24 ساعة ... ترا مو حالة بلش برطمك الممدود يتعدى على حياتي اتهزأ من جدي ثم من أمي .... ( كمل بنفعال اكثر ) لااااااااااا ثم تكمل الوناسه بزوجتي جايه تهاوشني بعد عشانك
لؤي : اذا هم ملقف مو مشكلتي ترا
نايف وهو يمشي بطريقه للعيال : إلا مشكلتك ! ولو سمحت صلح عمرك قبل انفجر ترا قفلت قسم بالله ... طالعين نتونس قلبناها مصحة نفسية للؤي بن عبدالرحمن ماعندنا شغل حنا !
***
اسماء اللي كانت عكس الموجه الغاضبه بالمكان .. كانت جالسة بروقان على الكنب وتكتب رسالة مزينه بمشاعرها ترسلها له .. /
حيـــــــــــــاتي !! وحشتني 
ليش رجعت بسرعة كذا ؟ " آف " ...
مرآ ملل .. ماحد معطيني وجه غير سجى الز** ...
المهم !!!!! اشتقت لي ؟! "$
سكرت جوالها وهي تزفر : يله ننتظر الرد السنة الجاية
التفتت لها ميهاف اللي كانت جالسة بملل : وش السنة الجاية ؟
اسماء : ولا شي .. " ابتسمت " تصدقون انتو اغبياء ؟ وين غادة .. ترا فرصة ان فراس راح مفروض نوسع صدورنا بيدينا ورجلينا
سجى تنهدت : انتو فيكم حيل تقومون اساسا ؟ زلايب
ميهاف بنرفزة : والله الواحد مايعرف كيف يرضيك ياسجى .. ان زعلنا وجلسنا قلتي زلايب .. وان قمنا وانبسطنا صرنا مو طبيعيين ودون مشاعر ! حددي موقفك
سجى مافهمت : شقصدك ؟ مين قال صيرو طبيعين ولا راح اتكلم
ميهاف رفعت حواجبه بعدم تصديق : لا بجد ؟! صدقتك
تو بترد نطقت اسماء بعصبية : والله يااسجى دام هالفلقة براسك لاتكلميني .. اااه ياحسرتي
سجى كشرت : على بالك مبسوطة ان راسي انفلق .. ترا ماتسوى علي فلقة هالراس عشان خطيبك اللي طعزني بجبهتي لا ويناكخ بعد لاتتحركين .. لا تتحركين !
اسماء بعصبية : لااااااااااا طال عمرك وجاهك حبيبتي .. مفروض يمسح على شعرك وخدك ويقول معليش حبيبتي تحمليني ؟!
سجى : لا بس شوي اسلوب ... مالت قدرك هالمتحجر
اسماء وقفت بانفعال وهي تهدد بيدها : وعلى بالك يعاملني زيك .. انتي حدك بزر غشيمة طاحت من الدباب وانشق راسها .. اما انا اسوم خطيبته وحبيبته و ...
صرخت فيهن ام فراس : وجعع بعد ! رجعنا للخناق وقلة الادب ابلمن
سجى : لا لحظة خالة خليها تكمل ... كملي كملي يا اسوم خطيبته وحبيبته ترا حارتنا ضيقه ونعرف بعض ! مو كأنه اخر كشته ضعتي ليل كاااااااااااااامل وهو اللي لقاك ؟! لا وفوق الضياع خربتي كيبل الكهرب كله .. وهو شاهد على الوضع .. اتوقع اطيح وينشق راسي ارحم من هالفضايح
اسماء رفعت حواجبها وهي تتكتف : والله عاد عاجبته مالك دخل انتي
سجى التفتت لميهاف بقهر : وانتي ميهاف ترا اليوم كله تدقيني .. سلامات شعندك !؟ ناكخي زي بعض البزارين وقولي الزبدة ولا حركات الخز خليها لك
شهقت ام عبدالمجيد : سجــــــــــى ! وش دخل ميهاف المسكينة طول اليوم هاجدة
ميهاف باسلوب محترم ماتقدر تتجاوزه حتى في غضبها : ولا شي ياعمري .. بس ابيك تفهمين انا انسانه مستقلة كوني زوجة فلان ولا بنت علان ولا اخت مدري مين مايغير حقيقة اني مستقلة ولي حريتي .. وهي الأهم عندي من كل شي والحزن بالقلب مو بغيره .... احيان لازم تحطين امورك الشخصية على جنب وتلتفتين للاهم وتمشين بحياتك .. الاستقلالية طبعي ومو معناها شي ثاني مثل بدر رماني ولازم اقلبها مناحة !
سجى : ايه وانا ايش قلت ؟
ميهاف : انا ماني غبية ياسجى .. فاهمة وش قاعد يصير حولي
سجى : افففففف نفسيات صدق .. انا بطلع اتنفس والعب بالدبابات
اسماء : جيبي صديق للي بوجهك بطريقك
طلعت غادة من غرفتها وهي تجلس معهـم . . . التفتت لها اسماء بعصبية : وانتي بعد سلامات ! ترا اقرفتيني بمزاجك .. ياترجعين غادة الاولى ياترجعين غادة الأولى !
غادة : هههه والله مافيني شي بس ما أدري .. احس الثمامة حلوة يوم مو اكثر انكتمت شوي
اسماء : على اساس اليوم الي قبله انبسطتي وفليتيها ؟ امس كله ماشفناك
غادة ( من وين انبسط وانا للحين مو مستوعبة اللي شفته امس ) : امس رحتوا تلعبو بالدبابات وانا بصراحة ما أعرف ماقد جربتها
اسماء : تعالي ونعلمك !
غادة : عاد حصل خير .. كويس مارحت هذي وحده انفلقت
اسماء : من جدك الدباب ماله دخل هي الغشيمة
: غــــــادة اسفرت وانورت ... وينتس يا ابوتس اليوم كله ماشفتس ؟
غادة ابتسمت لما شافت ابو عبدالرحمن يدخل : هلا عمي .. حياك
ابو عبدالرحمن : وين كنتي خافسة ؟!
غادة : والله موجودة بس صدف وقت تدخل ما أكون فيه
ابو عبدالرحمن التفت لنورة : شفتي قليل الرجا فراس هج لحاله ورجع للرياض
ام فراس : كيـــف رجع !! مو على اساس بيجلس معنا ؟
غادة بدفاع مباشرة : عنده شغل خالتي وماقدر يأجله عشان كذا ..
ابو عبدالرحمن : وش هالشغل اللي اهم من اهله ؟!
غادة : هو كذا يبه مشغول على طول .. الله يعينه كل هم الشركه على راسه , وبعدين فراس عاقل أكيد ماراح يرجع الا عشان شي ضروري
ابو عبدالرحمن ابتسم : ههههههههههههه بنات جدة يخرعن الواحد ! مايحكي الواحد عن رجلهن بشي الا يقبن بوجهي ياساتر
اسماء : هههههههههههههههههههههه سنافيات يبه ماينفع لك الا هن
غادة بانحراج من انفعالها بردة فعلها : على كل يبه ياليت نرجع اليوم .. عادي ؟
ابو عبدالرحمن : لعيونتس كلش عادي .. ( مسح على شعرها ) بنتعشى وبنمشي ان شاء الله
غادة هزت راسها برضى : تمام
توجهت غادة للمطبخ عند ابتسام اللي كانت تسوي رضعة عيالها : إبتسام حبيبتي
ابتسام : لبيه
غادة برجاء : عادي رنيم ترجع معاك اليوم ؟
ابتسام عقدت حواجبها : مو على اساس بتاخذينها عندك خلاص ومايهمك فراس ولا غيره ؟
غادة باحباط من تراجعها السريع : آيه .. قلت كذا بس .. ما أقدر اتركيها عندك احسن .. وانا بس يتصلح الوضع عندي باجيبها
ابتسام : من عيوني حبيبتي .. البيت بيتك وبيتها
غادة بامتنان : تسلمين لي ياقلبي
***
لـؤي اللي كان جالس لحاله بالجلسة والسماعة باذنه : وانت وش شطحتك هذي فجاة !
فراس : شغل ورجعت .. وبعدين لي فترة راسي مستلج كويس اليوم البيت هادي انام لين يطخ راسي
لؤي : ايه انت رحت وانا جدي قلب علي
فراس ببرود : تستاهل .. اساسا ما مسود وجهنا غيرك انت وبدر
لؤي : اففففففففففففففف ! تبوني اندم يعني ؟ خلاص ندمت .. ندمت اني عرفتها من الاساس بس اللحين حالتي ماتسمح اسمع كلامكم حتى
فراس : لاتندم على حرب عقلتك .. خذ عبرتك وامشي
لؤي بقهر : واحد مقطوعه ذريته مثلك مستحيل يفهمني
فراس دون نفس : حن علينا يا الأبو العاقل الفاهم وخلنا نتفاهم .. عقل انس اكبر من عقلك ياراعي الذرية
لؤي : انا الغلطان اللي داق عليك ! تبي شي ؟
فراس ببرود : سلام
سكر فراس السماعة وهو يدخل البيت الخالي من آي حس .. صعـد مباشرة وهو يوقف وقفة عند مفترق طرق .. غرفته يمين والدرج يسار .. ماوقف كثير دخل غرفته وهو يفتح درج معين وياخذ مسجله وشريط معين ويطلع لفوق ويسترخي على كرسيه وصوت نبيل شعيل المميز ينتشر بالمكان بآغنية – اعتبرني حلم - .. رمش عيونه بثقل وكسل وهو يستشعر احاسيس المغني ..
أعتبرني حلم عابر في منامك , أو مجرد ليل به جفنك سهرني
لو تجي صدفة توقفني امامك .. مايهم بوقتها وش تعتبرني
اعتبرني حلم عابر في منامك , او مجرد ليل به جفنك سهرني
لو تجي صدفة توقفني امامك .. مايهم بوقتها وش تعتبرني
انتقلت عيـونه لصورته لـ آخر صورة له مع أبوه وبدر .. وهو يحس ثقل بصدره , كأنه خان مسؤولية أخوه ..
لا تسلم حيل ابتجاهل سلامك , مستحيل اربح انا انسان خسرني
عيش بالغفلة وخلك في ظلامك , نور حبي ماطفى ياللي هجرني
آعتبرني حلم عابر في منامك , او مجرد ليل به جفنك سهرني
لو تجي صدفة توقفني امامك .. مايهم بوقتها وش تعتبرني
له فـترة مالجأ لمجموعته الموسيقية .. يمكن لأن له فترة ما ضاقت فيه الدنيا كذا , وانتقائة بالموسيقى مايناسق إلا روحه اللي ماتبوح إلا بهالطريقة ..
انت الدمعات الندى ماهي ختامك , وإنهمار الدمع منك ماجبرني
واعتبرني حلم عابر في منامك , ولا تدري ليه مثلك يعتبرني ؟!
انت الدمعات الندى ماهي ختامك , وإنهمار الدمع منك ماجبرني
اعتبرني حلم عابر في منامك , ولا تدري ليه مثلك يعتبرني ؟
اعتبرني حلم عابر في منامك , او مجرد ليل به جفنك سهرني
لو تجي صدفة توقفني أمامك , مايهم بوقتها وش تعتبرني
فور توقف الأغنية .. مد يده يعـيدها وعيونـه كسولة .. روحه كسولة وهو يتنهد بكتمة .. إنتبه لجواله يرن برسالة .. له سآعه يرن ومارفعه .. وهو يرخي راسه على الكرسي المنسدح تقريبا ويغمض عيونـه ويغرق قد مايقدر بأفكار اكثر من الهم بقلبه
***
غـادة كانت جالسة بس بالها مو معهـم وهم يتعشون رايقين .. وهي مجهزه شنطتها خالصة وتبي بس ترجع بسرعة .. اسماء اللي كانت جالسة وتاكل رن جـوالها برسالة أخيرا الرد وصل .. فتحته وهي تقرا :
سجى الز .. ؟ آآه قصدك البنوته اللي عالجتها أمس ؟
غصت اسماء بلقمتها لما قرت .. ودخلت نوبة كحة ام فراس ضربت ظهرها وهي تغافص : بشويش بشويش !! مويه ياسجى
صبت سجى المويه وهي تسرع ناحيتها .. اسماء التفتت لها بنظرات نارية وهي تسحبها من شعرها : يابنوتة التبن تعالي اشق راسك مره ثانية عشان تعرفين
سحبتها ام فراس من شعرها وهي تضرب كتفها : وجععع بعد !! انهبلتي ؟ هذا جزاها اللي جايبه لك ماء
سجى بقهر : وججعع بعد جعل يدك الكسر ... حيوانه انتي ؟!
اسماء وهي تكفح كممتها : بوريك من الحيوانة اصبري
تو بتنطق لها دق جوالها برساله ثانية .. قرتها وهي اعصابها فايره /
اسماء اعقلي امزح .. خلي البنت بحالها
كبست عيونها بدهشة وهي تكتب بقهر /
يمه شدراك ؟! @@
رد /
بالعادة مايمديني ارد عليك يجيني الرد على طول .. هالمرة تأخرتي
اعترفي صغرتي عقلك مرة ثانية ؟
شدت على شفايفها بحياء من نفسها ورفعت عيونها لسجى : آسفة !
سجى كشت عليها : طيري بس .. يمه قومي نروح بس طابت نفسي من العشاء
كشرت وهي ترد على رسالته /
انت الله يهداك بعد  ... وش بنوتته ؟! بتذلني عشان عالجتها يعني ؟
ثم ماعاد فيه رد .... وقفت غادة وهي تشيل الصحون : يله خل نرتب نرجع
ابتسام وهي تاكل : شفيك مستعجلة اصبري ناكل
غادة بتذمر : لكم ساعه تاكلون ماخلصتوا ؟!
ام فراس : هاو غادة شفيك مستعجلة ؟ اصبري ناكل
تنهدت غادة باحباط : اجل انا برا شبعت حمد الله
طــلعت برا وهي بعبايتها وتجلس على العتبات ورنيم بحضنها وتبوس خدها بنعومة : الله يسامح ماما راح تتركك هالمرة بعد ؟!
رنيم ضحكت دون تفهم : ........
ابتسمت غادة وهي تمعط خدها بخفه : والله مالي عذر ... غير انه ... ( عضت على شفتها وهي تتنهد ) ماعدت اعرف حتى شاقول عنه ياماما
فتحت جوالها وهي تفتح على اسمه .. حتى بخدمة الواتس ماله صورة أو رساله تعبر عنه .. منغلق من كل الطرق : .. بس انا لازم بالقليل ماعاد انكد عليه .. بالقليل ..
: غااااااااااادة !
التفتت لاسماء اللي كانت تلبس طرحتها : يله بسرعة بنروح !
وقفت حماس وهي تبوس رنيم بقوتها وتوديها لابتسام : يله ابتسام بتواصل معك بعدين
ابتسام ابتسمت : ولا يهمك عيوني
خذت ابتسام رنيم وبيدينها عبدالرحمن وسجى معها تساعدها بمشعل لحد ماوصلوا السياره وخذاه نايف منها .. أول ماركبت عقد نايف حواجبه : بترجع معنا ؟!
ابتسام دون نفس : عندك مانع ؟ انا وحده احب اهلي مو مثل غيري
رفع نايف عيونه لفوق وكأنه يتهيأ لاسبوع الزعل .. التفت لرنيم وهو يبتسم بمجاملة : هلا بالأفندية رنيم .. على راسي والله
ساق وهو يحوس بفمه ومو عارف وش يقول : ............... على فكرة ترا كلمت لؤي
طالعته ابتسام بنص عين : ................
نايف : شتطالعين ! اقولك يعني تراني اخوه وقلت له يعقل ... شي ثاني ؟
ابتسام : طيب إيش داعي العناد من اول ؟
نايف : يا ابتسام انتي ماتدرين وش مشكلة لؤي .. صدقيني مالها حل عشان كذا انا ماحاولت من أول !
ابتسام باستغراب : ليش وش مشكلته ؟
نايف تنهد : مقدر اقولك .. بس مشكلته اكبر من شغل وماشغل ..
ابتسام بتفهم : ولو .... حتى اذا ماتقدر تساعده اقل شي خله يعرف انك موجود
نايف : حتى هالشي ماودي اكون فيه ... خليني فيك وفي عيالي احسن للكل
ابتسام : رجعنا ؟! مشكلتك اليوم انه جدك يهاوش داخل .. وانا مو عارفه وش السبب ! ولما اتصل عليك تطلع تلعب ! يعني طبيعي اتنرفز
نايف : جدي احقريه وش بتسوين بعد ؟!
ابتسام تنهدت : ليتني حقرته صدق .. رديت وشكله خذا على خاطره
نايف : يكون احسن .. خله يخج منك مره وحده
***
فور وصـولهم للبيت .. نطقت غادة وهي مسرعه تصعد : تصبحون على خير
: وانتي من اهله
مسكت طرف عبايتها بيدها وهي تصعد الدرج بسرعه لحد ماوصلت للشقة ... كانت هادية تماما تنهدت وهي تنتبه للباب مسكر والنور طافي .. همست : آكيد نايم
فكت عبايتها وهي تمشي للباب باطراف اصابعها وتفتحه بشويش .. وايقت براسها لكن ماكان نايم كان جالس على السرير مسند ظهره على راس السرير وممدد رجله وبيده كتاب والسهرايه بس مشتغله .. ولابس نظاراته النيرد .. عقد حواجبه وهو يطالعها : جيتـوا ؟!
غادة وهي تفتح الباب بالكامل وتسمح لنفسها تدخل .. نطقت وهي تعلق عبايتها بمكانها : ايه تعشوا وجينا
فراس : وواضح فضولك عن الثمامة طلع على الفاضي ؟! اشوفك من رحنا هناك ماسويتي شي غير مد بوزك ؟
غادة ابتسمت : بالعكس .. شفت النجوم هناك أول مره اشوفها كذا .. ماعمري شفتها بهالصفاوه
فراس رفع حواجبه وهو يرجع لكتابه : خلصي اللي تبين واطلعي
غادة حاست بفمها باحباط .. نزلت عيونها وهي تلعب بيدينها بتوتر وتسأل : اليوم .. ( توترت لما رفعت عيونه لها يسمعها وكملت بتوتر ) كنت متضايق قبل تروح ... صاير شي ؟
فراس ضيق عيونه فيها .. وهو يطالع حركتها بيدها وهي تفرك اصابع يدها .. سكر الكتاب اللي بيده وهو ينزع نظاراته ويجلسها بالطاوله جمبه ويبعد الغطا من رجله ويوقف ويمشي بخطوات معتدله لحد ماسند يديه الثنين على طرف السرير وتكى عليه وهو عاقد حاجب : انتي اللي صاير معك شي ؟
غادة كبست بعيونها : لا .. ليش ؟
فراس حاس بفمه : ما آدري عنك .. مو لهالدرجة مافيه احساس حتى بالنسبة لك
غادة حست كأنه احد يضرب طبل بقلبها .. رفعت يدها لا شعوري لصدرها كانها تحاول تهديه من نظراته اللي تخرقها وعيونها لمعت : ..........
فراس وهو يفصفصها .. يدها اللي كانت ترتفع بجرأة في وجهه تحولت ليد متوترة تفرك بعض بصراع داخلي .. عيونها اتجاهها مشتت .. نبرة صوتها الحادة صايره مشوبه بخوف .. : ............
غادة عضت على شفتها : انا سألتك ايش صاير .. ليش تسألني ؟
فراس رد مباشرة : جاوبي واجاوب !
كبست بعيونها ... وهي ترفعها له وتنطق بصوت خافت : انا سألت أول ..
فراس : دامك سألتي اول جاوبي أول كمان
غادة اهتزت شفتها وهي تطالعه .. كبست ودمعه طاحت على خدها لاشعوري ! عقد فراس حواجبه وهو مستغرب وضعها ..... غادة مسحت دمعتها بسرعة وهي تنطق بصوت مهتز : اففف .. وش هذا بعد ..
فراس وهو عاقد حواجبه : تبكين ؟!
غادة وهي تمسح دموعها وتحاول جاهدة تتماسك : لا وش ابكي .. بس شكل .. ( مالقت عذر ) ما أدري داخل عيوني شي
فراس ماعرف وش يتصرف .. دموعها كانت مربكة .. ملامحها الشقية كانت مرتبكة أكثر من اللازم : امسحي دموعك يابنت الحلال وش صار عشان تبكين
غادة هزت راسها وهي تعطيه ظهرها وتمشي بسرعة ناحية الدولاب تسحب بجامتها : ماصار شي . .( مشت بسرعه تطلع ) تصبح على خير
سكرت الباب وراها وهي تسند ظهرها على الباب وتتنفس بصعوبة .. اما فراس كان في حيرة وهو يهمس لنفسه : شفيها انجنت ؟!
اما غادة لبست بجامتها وجلست على الكنبة وهي ضامه ركبتها لصدرها وتحس بكتمة .. سحبت كرتون المناديل قدامها وهي تبرشم على ظهره باحباط من نفسها .. هي مو عارفه تتماسك حتى عشان تحاول تشيل همه ..
***
بــــدر _ الساعة 8 صباحا /
كان مبكر على غير العادة .. طلع من محل تقنية بعد ماصلح جواله .. وهو يستقبل المكالمات اللي غالبها من جـده ..
في ذات اللحظة وصلته رسالة مفاجئة من ميهاف ! وقف الدم في اوجدته .. بلع ريقه وهو يفتح ../
أنسيتني ؟
ارميت حزنك على كاهلي ورميتني ؟
الكبريائك هيبة تعطيك حق الإنتهاك ؟
الذكرياتنا ضعف يؤدي بها الى ساحات الهلاك ؟
أأضعتني ؟
أأضعت الطريق الذي يؤتيك لي ومحيتني ؟
أهذا حبك الذي بدوامه لطالما وعدتني ؟
جـلس بمقعد على الطريق وهو ينعصر على كل كلمة قراها .. مسك راسه بتفكير .. يرد ولا مايرد .. وبأي وجه يرد ؟! كتب بإحتقار لنفسه .. وهو يتمنى ماعاد ترد على رسالته /
ربما لم اعاشرك دوما , مثلما كان ينبغي علي
ربما لم احبك كثيرا , قدر ماكنت استطيع
لكن , كنت طوال الوقت في بالي
كنت طول الوقت في بالي
وكانت أمنيته حق .. ماعاد ردت , تنهد بتعب .. شجالس يسوي بحياته ؟! له شهر معلق بنفس النقطه ... صار لازم يوقف .. رن جواله ( ابوي نايف ) ... رد مباشرة وكأنه كان ينتظر آي شخص : هلا يبه !
ابو عبدالرحمن : هلا هلا هلا ؟!!! لا بدري ترد !!
بدر بخيبة : ادري اني خايب والله .. ( تنهد ) بس كويس دقيت .. اقدر اشوفك ؟
ابو عبدالرحمن : سلامات ياولدي فيك شي ؟!
بدر وهو يتنحنح : لاا سلامتك .. بس انت من جيت للرياض ماقدرت اقابلك زي العالم والناس
ابو عبدالرحمن : ماني بعيد ! ببيتكم تعال ..
بدر بصوت خافت : غير بيت فراس ..
ابو عبدالرحمن اللي ماصدق ان بدر يتعدل شوي : خلاص واعدني باي مكان وبجيك اللحين
***
صحى فراس من نـومه وهو يلبس .. ويرش عطره الفخم الرجالي , جلس على جهازه وهو يفتح رد الدكتور على رسالته اللي كانت صارمة بأن أي معلومه تتسرب بيندم طول عمره ! .. :
أعلم .. أعلم أني اقسمت لك ان يكون هذا الشي سر بيننا ..
لكن الموضوع الآن يتعدى مقدرتي .. لذلك اعطيتك الجهه المسؤولة اتمنى ان تفيدك
ضرب بقبضته على الطاولة وهو ينطق بعصبية : الله يلعنك !!
مسك جواله مباشرة وهو ينقل الرقم المسؤول ويتصل : مرحـبا !
: أهلا كيف استطيع خدمـتك ؟
فراس : انا هنا للاستفسار عن التحقيق القائم على دكتور لديكم
: نعم صحيح هناك تحقيق بشأنه
فراس : هل سيتم نشر أي مخالفة بأسمه ؟!
: كل مخالفة لها ظروفها ..
فراس مباشرة : تزوير شهادة وفاة ! ؟
: على الاغلب سيتم إنباء أهل الميت بهذا التزوير.. ومعاقبة القائم عليه بالطبع
فراس على على شفته وهو ينطق : فهمت .. شكرا
: العفـو
زفر وهو يسحب سيجارته من جيبه ويشفطها بنفس واحد .. وهو مستعد يقتل المسؤول اذا هذا بينهي السالفة ! مستحيل يترك اللي تعب عليه هالسنين ينفضح ...........
وقف يطلع وبطريقه انتبه لها نايمة بطريقتها الفوضوية نصها بالكنبة ونصها برا .. انحنى للطاولة ياخذ له منديل انتبه لنص الشعر المكتوب بخطها /
و حزن اتمنى انتشال جذوره من اعماقك ..

عقد حواجبه وهو يطالعها وهي نايمة وخنادق دموعها من امس مازالت على خدها .. جلس القرفصاء قدام الطاولة اللي تفصل بينه وبين كنبتها .. وهو عاقد حواجبه ويحاول يفهم دموعها أمس .. فجأة دون مقدمات بكت .. خلل يده بشعره بحيره ... وهو ينتبه لها تنقلب بنومتها ..وحواجبها تنعقد بضيق .... وشعرها الطويل منتثر حولها بجاذبية .. وقف مباشرة وهو يمسح على وجهه ويهمس بضيق : مبلط حضرتي هنا !
طــلع مباشرة وهو يضرب الباب وراه بقوه نوعا ما .. أول مانزل الدرج كان جده تو طالع من غرفته التفت له : صباح الخير
فراس : صباح النور
ابو عبدالرحمن : رايح الدوام ؟
فراس : آيه .. تامر شي ؟
ابو عبدالرحمن : لا بالتوفيق .. كلمني بدر اليوم وطلب يقابلني وهذانا بروح اشوفه
فراس ببرود : آكيد بيدق عليك .. مرد الكلب للقصاب
ابو عبدالرحمن بعصبية : فرااااس !
فراس : آكذب ؟
ابوعبدالرحمن : لا لاتكذب ! بس لاتتكلم عن أخوك كذا ماتحس انت ؟
فراس وهو يكمل طريقه ينزل : خليت الإحساس لكم
رن جواله وهو يركب سيارته رد : نعم مسعود !
مسعود : كيفك طال عمرك ؟! صباح النور
فراس : اخلص شتبي ؟
مسعود : آخر تحرياتي تقول أن سارا والكر صارت في شركة نشر لـ ..
قاطعه فراس بعصبية: ولــــــــعنة !!! وش رايك تقولي بعد وش افطرت ووش لبست ؟!
مسعود : المعذره والله .. بس انت كلفتنا نراقبها عشان كذا
فراس واعصابه منتلفه : تراقبونها قبل شهر ! وانت للحين مشتق ... آخر همي بنت الكلب وش سوت دامك ذابح عمرك على كلامي خلني اوصل وما أحصل الاوراق اللي طلبتها كامله
مسعود : حاضر
فراس سكر السماعة وهو يدق على رقم ثاني وهو يحرك سيارته : الو !
: هلا والله
فراس : دون مقدمات ... فيه محقق بأعطيك أسمه تتوجه له مباشرة وتعرض عليه اللي يبغى مقابل تغاضي عن تزوير !!
: حاضر
فراس : وياويلك يعرف اني انا اللي وراك .. اذا قبل كان ابيها واذا رفض اقصر السالفة دون أسمي
: تمام
فراس بتحذير : بعضهم يسوقون الشرف في البداية بس انت اضغط عليه معليش
سكــر السماعة وهو يحاول يتجاهل رعب تخيلاته لو تنتشر هالمعلومة ! اول ماوقف سيارته بموقفه بالشركة إنتبه للؤي جالس عند الباب ووقف لما شافه وهو ياشر له بكاس قهوه بيده .. تنهد وهو ينزل ويمشي مباشرة : اذا جاي تدق حنك فترا مو فاضي لك
لؤي رفع حواجبه : طول عمرك مو فاضي
فراس : خلاص تمام مالي خلقك ولا أبي اشوفك تيسر !
لؤي عقد حواجبه وهو يطالعه : شفيك مالك خلق ..؟! صاير شي .. على فكرة ترا جاي اشوفك عقب ما انسلت فجأة من الثمامة
فراس بانفعال : انقرفت .. طابت نفسي ماخذيني عشان يعاتبوني عن بدر اربعه وعشرين ساعه ! شنو انا ماوراي الا هو
لؤي : هو مشكلة بدر فعلا مفروض تنحل .. الكل ضايق ومو عارف شلون ..
قاطعه فراس بتشديد : تضل مب مشكلتي ! انا قلت له انطل زوجتك ؟ انا قلت له يشتهر ويفشل ؟! انا قلت له يفلس ... يحمد ربه اني دفعت ديونه ولا لو علي كان تركتهم يربونه ويحطونه بالسجن بستين داهيه
لؤي : خلاص هـــد شوي .. ليش منقهر كل هالقد !؟
فراس : اساسا انت مو بعيد عنه ... كلكم بزران وما أسخف منكم طايحين لي مريضين عشان مشاكل ماتسوى
لؤي بقهر : مو شرط تكون المشكة صفقه فاشله ولا دعم منقطع ولا ماليه متدهوره ولا اسهم عشان تعتبر مشكلة تسوى
فراس باصطناع للتفهم : اوه صح .. لازم تكون سارا والكر بالذات عشان تعتبر مشكلة ؟
لؤي عض على شفته واسمها يطعن فيه : اللحين وش جاب هالطاري ؟
فراس دون نفس : قلت لك من أول مالي مزاج .. اتركني واللي يسلمك
لؤي هز راسه بقهر : خلاص رايح من وجهك .. الشرهه علي اللي جاي اشوف شخبارك
قبل يروح نطق فراس : لؤي ! ........ الحياة قاسية .. قاسية جدا وما تهتم بمشاعرك الرهيفة , فارفع علومك .. معادهي حالة هذا حقك على نفسك
التفت لؤي نص التفاته وهو يهز راسه . ثم يكمل طريقه ..
***
غــــادة /
بعد ماصحت من النوم وكان الوقت متأخر ومتأكدة ماراح يكون موجود دخلت غرفة النوم وهي منشدة لمكان السرير وتمشي ناحيته حتى وصلت للكتاب اللي كان يقراه آمس كان عنوانه انجليزي وواضح أنه لشخصية سياسية رجعته مكانه بإحباط وهي تمسك جوالها وتتصل على رقم إبتسام : ألـو ؟!
ابتسام : هلا حياتي شخبارك ؟!
غادة : طيبة ماعلي .. انتي كيفك ورنونتي شعلومها ؟
ابتسام : هذا حنا جالسين كلنا نتقهوى مع أبونا
غادة حست باحباط .. رنيم دخيلة بوسط عائلة ابتسام .. تنهدت بضيق : معليش عارفة انك مو ناقصة وعندك توأم و ..
قاطعتها ابتسام : شب غادة ! شنو انا طالبه منك تحنيني ؟ بالعكس رنوم ما شاء الله هادية ما أحس بوجودها بالعكس تساعدني ... المهم ! شرايك تزوريني اليوم ؟ ترا اذا مالاحظي من يوم تزوجتي ماجيتيني ولا مرة !!
غادة حست باحباط من نفسها : ودي والله .... اصبري بحاول اجيك ان شاء الله
ابتسام : آيه حبيبتي حاولي تكفين
غادة : برد لك خبر بعد شوي
سكرت السماعة وهي تتصل على فراس .. وداخلها تزعزع صار معتاد معه : .............
جاها الرد بصوته الثقيل : نعــــم ؟
غادة لا شعوري وقفت وهي تكلمه : ااا ... هلا ... السلام عليكم
فراس : وعليكم السلام .
غادة وهي متوقعه رد سيء : كيفك ؟
فراس : غادة شتبين مو فاضي للكاعتك !
غادة : ما حأشغلك ... بس لو سمحت بروح لإبتسام ... رنيم عندها وانا اقل شي بزورها
فراس : يعني دموعك امس بسبب رنيم ؟!
غادة تلعثمت من طاري الموضوع وهي منقهره من نفسها اللي بكت دون تحس بنفسها : ............................
فراس وهو ينتبه لوليد يدخل ويأشر له ان الإجتماع بيبدا .. نطق مباشرة: بجي للبيت مغرب بوديك وقتها
غادة نطقت مباشرة : اذا موافق اقدر اروح مع السواق لا تشغل حالك
فراس بتشديد : قلت حوديك .. خلاص انتظريني
غادة ابتسمت لاشعوري : اوكيه
سكرت السماعة وهي تضم الجوال لصدرها ونبرة صوته الهادية تتردد باذنها
(( أنتظريني ))
(( أنتظريني ))
(( أنتظريني ))
مولعة هي بكل تفاصيله .. صايره حالتها تتجاوز الهوس .. هوس بهالقصة الحزينة ..
***
بـدر كان جالس بالكافي مع جده .. /
ابو عبدالرحمن : عتـــبي عليك كبير .. كبير جدا بس معليش خل نتكلم بهداوة اللحين
بدر : حقك تعتب علي .. ( تنهد ) انا شخصيا ماراح الومك اللحين لو ماعطيتني مجال
ابو عبدالرحمن : تكلم يا أبوك وش وصلك لهنا ؟
بدر بضيق : وصلني الغبنة .. يبه ليش انا لازم ادور طريقه اشتغل فيها ! مؤسسة أبوي حق فراس بس .. حنا مو عياله ؟
ابو عبدالرحمن : من قال ؟ روح اشتغل مع اخوك محد بيلومك !
بدر : لآ يبه .. انا مابي اشتغل مع فراس ! ابي اخذ حقي كامل بالنص وراح ابيعه وابدا شغلي الخاص اللي يهمني .. ادارة الأعمال مو اختصاصي
ابو عبدالرحمن : اذا هذي مشكلتك فمقدور عليها .. بس انا يابدر أبيك تعدل حياتك كلها مو بس شغلك .. وانت فاهم وش أقصد
بدر بهم : مابي اظلم ميهاف اكثر من كذا .. ماراح افكر اواجهها لحد ما أرجع مثل أول , مقدر اكلمها وانا دون وظيفة ولا دخل ولا شي
ابو عبدالرحمن : قول هالكلام لها ! قول راح ارجع حياتي زي أول وبجيك .. لا تتركها كذا
بدر نزل راسه : راح احاول
ابو عبدالرحمن تنهد : يا أبوك لاتكون من اللي يقضون الشطر الأول من حياتهم يشتهون الشطر الثاني من حياتهم .. ويقضون الشطر الثاني نادمين على الشطر الأول .. فاهم ؟!
بدر ابتسم بخفه : فاهم ..
ابو عبدالرحمن : قوم معاي اللحين آجل ..
بدر عقد حواجبه : لوين ؟
أبو عبدالرحمن : لبيتكم .. ما اشتقت لامك ؟
بدر بنفور : قلت لك يبه انا بيت فراس ماراح ادخله
ابو عبدالرحمن بعصبية : تعدل ياولد ! وش بيت فراس ؟! هذا بيت ابوكم فهاد اللي خيبته كبيره وهو يشوفكم بهالحال ... تعال معي سلم على امك وبالمرة نكلم فراس بقسمك من مؤسسة أبوك
بدر سكت بمضض : .............
ابو عبدالرحمن : وبعدين أنت مصدق ان اخوك بيطردك ! اخوك ابرك الساعات يوم يشوفك متعدل
بدر تنهد : خـلاص زين
ابو عبدالرحمن : ايه تعدل يله قدامي !
***
فراس أول ماطلع من الإجتماع دخل مكتبه وهو يفتح جواله ويحصل مكالمة من الشخص الموكله لقضية أبوه .. دق عليه مباشرة جاه الرد : هلا والله
فراس : ايش صار معك ؟
تنهد بخيبة : رفض
فراس بعصبية : نــــــــــعم ؟! شتقول انت
: هذا اللي صار .. بصراحة انا حسيته رفض لأنه ماصدق اني ممكن ارشيه , ممكن لو يعرفك شخصيا ومكانتك يحصل استثناء ... حاب اجيب طاري اسمك ؟
فراس مباشرة : لا ! اسمي لا ... " تنهد " خلاص مع السلامة انا بحلها
سكر السماعة بقهر وهو ينادي على السكرتير : وليــــــــــــــد
دخل وليد : سم طال عمرك
فراس : ادخل الحجوزات وأحجز لي على امريكا بعد يومين
وليد : حاضر
فراس : ولا اقولك .... حطها بكرة
وليد : ايه بس بكرة فيه اجتماع العملاء
فراس : عارف ! راح احضر الإجتماع قبل اسافر .. انتبه لحجزي يكون مسائي
وليد : ان شاء الله
***
غـــادة شغلت الفواحة بالغرفة قبل تطلع وخذت عبايتها وهي تـنزل ... حصلت اسماء وامها جالسات ودخلت على كلمة ام فراس
: تصدقين مخوفتني رجعة بدر .. مدري اخاف يشوفه فراس وينشبون مثل اخرمرة
اسماء : لاحول يمه عاد فراس يكبر عقله شوي .. على شنو محسوب علينا الكبير !
غادة وهي تتذكر سخرية بدر بالكلام منها اخر مرة كان هنا (ايه انا غلط .. انت الصح عطه خبر يسافر بيوم العرس ويحضر لمحكمة بس ويتزوج بالخشاشه .." كمل بانفعال " ولا تنسى اهم شي خله يحبسها بغرفته قبل هذا كله !؟ ويخربها ثم يتزوجها ستيره ... حسافه اختنا مو مطلقة وببنتها عشان تكمل الزيجة الـ .. )
ام فراس انتبهت لغادة : هلا غادة حياك ليش واقفة ؟
اسماء تخصرت : اشوف عبايتك بيديك .. وين ان شاء الله
غادة : بروح لإبتسام اختي
ام فراس : ما شاء الله حلو ... طيب تبين اقول للسايق يوديك ؟
غادة وقلبها مفعم : لا فراس بيوديني ان شاء الله اذا جا
- رن جرس البيت -
اسماء : هذا جدي اكيد وبدر !
ام فراس : غادة حبيبتي قومي عشان يجلسون هنا ماننفصل
غادة : خلاص انا بكون فوق آجل
ركضت اسماء تفتح الباب ... ووجها يتهلل بشوفة بدر : بـــــــــــــــــــــــــــــــــــدر !!
ابتسم بدر من قلب وهو ينحني يسلم عليها : يا روح بدر
ضربت اسماء صدره بخفه وهي تنطق بعتب : روحه .؟ روحه ياكذاب كم لي ماشفتك ؟!
بدر وهو يقرص خدها بخفه : عيارتك بعدين .. خليني ادخل اشوف امي
اسماء وهي متشبثه بذراعه : يله نروح سوا
ابو عبدالرحمن : شفت يالخايب .. اخوانك يحبونك وينهبلون فيك وانت جاحدهم !
بدر قبل يدخل همس لأسماء : فراس موجود ؟
اسماء : لا طالع من صبح للحين ماجا
هز بدر راسه بصمت وهو يدخل
***
بعد ما أنتهى من دوامه الساعة 7 مساء .. توجه لبيت لؤي اللي بالاصل يعتبر من املاكه وهو يضرب الجرس .. فتح الباب لؤي وهو يرفع حواجبه : غريبة جاي !
فراس وهو يدخل : الله يحييك
لؤي تنهد : نعم فراس على اساس ماتبي تشوفني حتى ؟!
فراس وهو يجلس : بتفهمني انك انجرحت اللحين ؟!
لؤي وهو يجلس : آيه .. شدعوه جايك اسال عنك وتكرشني كذا !
فراس : حقك علي .. لا تشيل معك اهم شي تدري ان هالدنيا ضيقه اذا ماوسعني خاطرك
لؤي : وش كان ضاغطك اجل .؟
فراس : شغل ...... ( زفر ) والله تعبان ومنتهي وبروح البيت انام , بس قلت اشوفك قبل
لؤي : ماتجلس نتعشى سوا ؟ وبالمرة نسولف ونسمر
فراس : لا مقدر .. اساسا بكرة وراي سفر
لؤي: لوين ؟
فراس : واشنطن .. تخاوي ؟
لؤي : ودي والله بس انت عارف .. ذيك الدير ضاقت علي خلاص
فراس باصرار : منك لله تعال .. اساسا رايح هناك شغله بسيطة بخلصها وبجلس فترة اريح راسي هناك
لؤي : غريبة .. مو بعادتك تطلب استجمام بعيد عن بيتكم
فراس : لكل حاجة مرة أولى
لؤي : طيب ليش ماتاخذ زوجتك معك ؟ هي أولى وبعدين ناسي انكم ماسافرتوا من لما تزوجتو
فراس بإنزعاج : لؤي قسم بالله تتكلم كأنك ماتعرف وش بيني وبينها يعني ! كم مرة بغرد أنها زيها زي الغريب عندي!
لؤي : وانا كم مرة بقولك حرام ؟! هذا وانت اللي مسوي فيلسوف علي وانك تخاف ربي ... خاف ربك اجل الزواج رباط مقدس من ربك من راسك أنت تهمشه كذا ؟
فراس بضيق : وعلى بالك مو عارف هالحكي انا ؟ وقد مايفت بكبدي ما أقدر اسوي اكثر من كذا ...
لؤي : انا عموما مستغرب أنك مطنش كذا .. ( كمل بمزح ) ليش البنت مو حلوه آجل ؟
فراس طالعه بنص عين : .........................
لؤي : شفيك ماني غريب .. تقدر تكلمني ! ليش ما تأثرت فيها ياهي مو حلوه يا أنت كرهك للحريم موصلك لمرحلة عجز
فراس وكلام لؤي استفزه : شـــقصدك ؟
لؤي : يعني يمكن عندك مشكله بجد .. مشكلة جديه تحتاج علاج
فراس بنرفزه : لا مــاعندي مشكلة !
لؤي : أتوقع اجل هي دامها مطلقة شينه آجل
فراس : لؤي بسطرك انت وحكيك اللي زي وجهك ! ( كمل بإنزعاج ) انا ماشي , وآنت اذا بتروح معي عجل رد لي خبر
لؤي تنهد : على خير ... يله في امان الله
طلع فراس وهو يركب سيارته ويسكر الباب بقهــر ..ويمسك طريـــقه للبيت
***
زفر بدر وهو جالس مع آهله : انا بمشي جت من الله دام فراس متأخر للحين
ابو عبدالرحمن : انثبر مكانك بيجي .. ( التفت لام فراس ) وينه تأخر للحين ؟!
ام فراس : آدق عليه .؟
ابو عبدالرحمـن : ايه دقي شوفيه
مسكت أم فراس جوالها تتصل .. لكن الخط كان مشغول , نظرا لاتصاله على جهة اخرى ...
ردت غادة بحماس واضح بصوتها : هـــلا !!
فراس : خمس دقايق واكون عند الباب أنزلي
غـــادة : اوكيه
سكر فـراس السماعة وهو يمسك طريقه حـتى وصل للبيت وعيونه توسعت وهو يشوف سيارة بدر عند الباب .. هز راسه وهو يتراجع عن هالمواجهه ..
..
عـند غادة /
نزلت بعبايتها وهي تسابق خطواتها .. فور مرورها من الصالة وقفها أبو عبدالرحمن : غادة ؟!
غادة وقفت : هلا عمي
ابو عبدالرحمن : وين ؟
غادة : رايحه لإبتسام اختي بزورها
ابو عبدالرحمن ضيق عيونه : ومين بيوديك ؟
غادة : فراس برا حيوديـ. ...
قاطعها ابو عبدالرحمن : ارجعي لفوق .. بيوديك بعد ما أخلص كلامي معه
غادة حست انه معصب . . فرجعت دون تناقش وهي توقف عند راس الدرج وكلها توتر وهي تنتبه لابو عبدالرحمن يطلع لبرا ويقاطعه صوت بدر : خلاص يبه مافي داعي .. واضح مايبي يشوفني انا بمشي وبس
نطق ابوعبدالرحمن بعصبية : خلك محلك !!! انا رايح اجيبه وراجع .... وهالمشكلة تنتهي اليوم ! الله يرحمك يافهاد
طلع ابو عبدالرحمن وهو ينتبه لفراس مسترخي على كرسيه ومسند راسه على ذراعه .. مشى ناحيته وهو يضرب زجاج سيارته .... انتبه له فراس وهو يفتح الشباك : هلا يبه
ابو عبدالرحمن : أنــــزل أبيك .. اخوك داخل تعال كلمه
فراس رفع حواجبه : متأكد يبه تبغاني اشوفه ؟
ابو عبدالرحمن بعصبية : آيه ابغاك تشوفه ! مو اخوك ؟!
فراس هز راسه بصبر : ولا يهمك .. غالي والطلب رخيص , انا بس عشانك ترا مابغيت ادخل
مشى لداخل وهو عازم مايردع نفسه نهائي ... يكفي بلعها قهر آخر مره قابله , دخل الصاله وهو ينتبه لأم فراس توقف وبدر جالس على الكنبة بهيئته الرثة ونظراته الحادة : ....................
ام فراس :هلا يمــه وينك تأخرت ؟
فراس مشى بخطوات هادية وأبو عبدالرحمن جمبه : هـلا فيك .. وين تأخرت الساعة تو 8 ( التفت لبدر وهو يتظاهر بالدهشة ) الله من عندنا ؟! يامرحبا ومسهـلا
بدر دون يتحرك : هلا فيك .. لمعلوماتك ابوي نايف هو اللي اصر علي اجي
فراس قطب حواجبه بأسف وهو يلتفت لابو عبدالرحمن : آلله يسامحك يبه ليش سحبته غصب عنه ؟ ( التفت لبدر ) بس انت لا تزعل روح ارفع عليه قضية بتهمة سلب الإرادة .. عاد المحاكم تخصصك مايحتاج اعلمك شتسوي ؟
ابو عبدالرحمن : فـــــراس !!!
بدر بقهر : اتركه يبه .. ( ابتسم بسخرية ) خله يتكلم عشان تفهم ليش انا مابي اجي ولا أبي اشوفه
فراس وهو يجلس باريحية ويحط رجل على رجل : عاد تصدق لي اسبوع جالس افهمهم ليش انت ماتبي تشوفني بس مايفهمون !
بدر بقهر وهو يعدل جلسته ويشبك يدينه ببعض : دام كذا انا راح ادخل بالموضوع مباشرة .. انا جاي هنا اطالب بقسمي من شركة أبوي اللي هو النص
فراس وملامح سخريته وصوته المستهزئ قلب للجد .. فتح عيونه وهو ينطق بهدوء : نعـم ؟
بدر : آيه .. انا كلمت جدي وهو وافقني انا راح ارجع ابني حياتي واحتاج قسمي عشان ابيعه وانا حر وش اسوي بعد كذا
فراس رفع حواجبه بدهشه وهو ينقل عيونه بين بدر وابوعبدالرحمن : ..................وأنت شقلت له يبه ؟
ابو عبدالرحمن : وانا اقول معه حق .. خله ياخذ قسمه ويرجـع يبني حياته
فراس شاح بنظره عنهم وهو يحاول يجمع اعصابه .. رجع يطالعهم وهو ينطق بين اسنانه : لا .
بدر عقد حواجبه : نعــــم ؟
فراس بتشديد على حروفه : لا .. ( كمل بحده ) قروب السماء اقرب لك منها يابدر .. والله وعزته ماتبيع ولا حتى بريال
بدر التفت لجده بقهر : سامع !! وتقولي اخوك وبيفهمك
فراس نطق بعصبية : وانت تكلم جدي ليه .... تعال كلمني انا !! انا اللي راح عمري في هالمؤسسات ومن حياة ابوي .. عشر سنين اذا ماكانت آكثر وانا اتعب فيها ... ولا راح ينباع منها شي ... ابيعك بطفسه ولا ابيع منها شي !
ابو عبدالرحمن رفع صوته : فراس هـد شوي !
فراس وقف وهو ينطق بانفعال : بـــدر فهاد الشمري ! صاحب القرارات الحكيمة ... حاقرك له اسبوع ورد عليك اليوم وعلى طول وافقت على قراره ؟! بس خل انبهك على شغله .. هالمؤسسات محد له علاقه فيها .. واللي كان راح ياخذه من أبوي مايتجاوز نص قيمة اللي انا بنيته اليوم .. بس بجد ذكي آخوي .. ماخذى قسمه لما كانت الشركة ابسط من كذا بكثير .. لا احتراني اكبرها واحطها عالمية ثم قال يله قسمي ... تخسى إلا انت ماورثتها من أبوي عشان تارثها مني
بدر : هذا حلالي مثل ماهو حلالك ... بس هذا انت طول عمرك طماع واناني و ....
قاطعه فراس : وحقير وأكرهك وحيوان !! قول اللي تبي .... ماظرني نباحك .. هذا انت تشوفني بالشاكلة اللي انت عليها على مزاجك وهواك .. وتناديني باسوآ مافيك .. عشان كذا انا ماراح اوضح لك شي غير انك ماراح تتجرأ تمد يدك على حلالي لا انت ولا غيرك !
ابو عبدالرحمن : أنا اقول بكرة نجتمع بالشركة ونشوف راي المجلس هناك .. واللي يقولونه هو اللي ينفذ
التفت فراس لجده : راح يقولون ايه كلام بدر صح .. واذا يبغى النص ياخذه ( رفع اصبعه بتهديد ) بس والله ثم والله ثم والله هذي ثلاث حلفات .. لو ياخذ النص ويبيعه انا ماعاد لي دخل بهالمؤسسة كلها .. وخلو النص ينباع والنص الثاني يضيع دون مدير ... وخلها تصير قصة فهاد بن نايف اللي ضيعوا عياله حلاله
بدر نطق بعصبية : اتحداك تسويها !!
فراس بثقة وهو شاد على قبضته : لا راح اسويها .. انت بس مد رجلك بكرة للشركة !
بدر : كويس انك معترف انك مضيع حلال ابوي ... مثل ماضيعت أبوي قبله
ام فراس قلبها اعتصرها على طاري زوجها .. وعيالها اللي يتهاوشون : بدر ! فراس !! خلاص سكروا هالحكي لا ازعل عليكم
فراس بقهر : انا ضيعت ابوي ؟!
بدر : ايه ضيعته ..... !!! ما انتبهت له وانت هناك ... ومصدق نفسك الكبير و ....
طاح كف على خد بدر ... شهقت اسماء وهي تشوف فراس وعيونه تقدح نار من عصبيته وسحب ياقة بدر مباشرة : ماضاع أبوي إلا يوم انحسبت انت عليه ولد ... يشتهر مثل مايبي ويفسق مثل مايبي ويلعب باعراض الناس مثل مايبي ..
ركض ابو عبدالرحمن وهو يسحب فراس من خصره لكن مافيه امل لان فراس متشبث بياقة بدر : خل براسك شغله وحده ( اشر لأمه بيده الثانيه ) لو ما هالمرة امك وتحبك كااااان علوم .. لأنه لو علي !!! انت بالسجن من زمان .. ادع ربك يطول عمرها لأن غير هالكرت ماعندك
ام فراس سحبت بدر بكل قوتها من يده وهي تنطق بين دموعها : ماعندكم احساس انتو ! تبون تموتوني قهر ... تبون تقتلوني !
ابو عبدالرحمن وهو يطالع فراس بغضب : كذا يعــــــــــــــــني ؟!
فراس ببرود : قلت لك مابي ادخل .. تحمل نتيجة اصرارك ..
بدر اللي كان يمسك رقبته ويطالع فراس بحنق : ويقولون ليش تكره اخوك ؟!
فراس طالعه باشمئزاز : تخسى الا انت تصير أخوي !
ام فراس مسكت راسها بيأس ودموعها على خدها : ابي اعرف ليش يصير كذا ليش ؟!
بدر وقف : انا ماشي ... اصلن انا الغلطان اللي جاي هنا
مشى بطريقه وهو يطلع .. بينما التفت ابو عبدالرحمن لفراس بعتب : مبسوط اللحين ؟
فراس رفع حواجبه وهو يقول بنكف : بنشوة السعادة يبه .. بنشوتها .. ( التفت لامه وقلبه يعتصره على شكلها .. عض على شفته وهو يعطيهم ظهره ويصعد لفوق ..)
غادة اللي كانت دموعها نزلت وهي تسمع كلامهم .. وآسفها على قلبه اللي يعاني دون احد يفهمه ! تمنت تصرخ بوجههم كلهم وتفهمهم وش صار بحياته .. : ................
توسعت عيونها بألم وهي تنتبه له يوصل لفوق .. طاحت عيونه المتعبه اللامعه عليها : ...............
غادة وهي تحس بسكين نغزتها من منظر عيونه اللي متماسكه دمعاتها : ......................
فراس كمل سحب رجله متجاوزها .. غادة مسكت يده مباشرة وهي تنطق بقلق : فراس !
فراس رفع يده الحره من تشبثها وفرك بها عيونه وهو يلتفت لها بنظرات مهمومه و بصوت متعب : نعـم غادة .
غادة وفمها يترجف .. بلعت ريقها وهي تسأل : انت بخير ؟
سحب يده منها بخفة .. وهو يعطيها ظهره وينطق بهدوء مهموم : أنـزلي لامي .. خليك معها
غادة تمنت تجلس معه .. لكن طلبه كان مستحيل ترده : إن شاء الله
كمل طريقه لفوق .. بينما هي مسحت دموعها وهي تـنزل , كانت اسماء وامها وابو عبدالرحمن جالسين وام فراس تنطق بشكوى : والله ربيتهم وتعبت وانهديت .. ما توقعت بيوم بشوفهم بهالشكل
ابو عبدالرحمن : الغلط على فراس ! انا ماصدقت بدر يجي ... ينفره بهالشكل يعاقبنا يعني ؟!
اسماء : ايه بجد .. حنا ماصدقنا نشوف بدر يجي هو يخور السالفه كلها
غادة قبضها قلبها .. محد فاهمه , محد مستوعبه .. نطقت بهدوء : ماحاولتوا تعرفون شفيه ..
انتبهوا لوجودها فجأة ... ام فراس : هلا غادة
ابو عبدالرحمن رد على سؤالها : وش فيه يعني .. مسكين فلس شغله وفلوسه وزوجته مو عنده
نطقت بقهر وهي تقاطعه : ما أقصد بدر ! ( كملت بغصه ) ليش تسألون عن الكل غيره .. آكيد عنده سبب .. ليش محد يحاول يفهمه .. ليش تحطون كلش فوق راسه
ام فراس وقلبها دليلها : ليش ؟! انتي تعرفين شي ؟!
غادة وهي ما انتبهت لنفسها .. تنهدت بتعب وهي تجلس جمب ام فراس : لا .. بس أنا اعرف ان فراس يحبك آكثر من نفسه .. وده ينحرق ولا دمعتك تنزل .. خالتي ليش تشكين في اسبابه ..
ام فراس بقهر : بس انا تعبت .. مابي عيالي يتشتتون كذا ! حتى لو عذرته .. مقدر ما أزعل
غادة تنهدت : مصير كلش يتصلح ان شاء الله
ابو عبدالرحمن : هدي بالك يانورة قومي اللحين ونامي .. والصباح رباح ان شاء الله
اسماء بتعب : صادق انا انهد حيلي بقوم انام
راح الكل ينـام .. بينما غادة صعدت بسرعة وهي توقف بتردد قدام غرفته وتحاول تسمع صوت لكن مافيه أمل .. تنهدت وهي تطق الباب ... انفتح بعد فترة وهو ينطق بهدوء : نعم ؟
غادة : امك نامت ..
فراس بتمتمة بينه وبين نفسه : كويس .. ( رفع عيونه لها ) خلاص تصبحين على خير
تو بيسكر الباب مسكته بيدهـا .. عقد حواجبه وهو يطالعها : ................
غادة بقلق : أنت كويس ؟ يعني اللي صار تحت ... ( عضت على شفتها ) مو سهل ..
فراس طالعها ببرود : وش صار تحـت ؟ ضربت اخوي وبكيت امي وعصبت بجدي .
غادة باصرار : مو صـح .. ( كمل بغصه ) ليش تحمل نفسك الذنب ؟!
فراس رد بانفعال: الكلام الشين اللي قلته كان اقدر اقوله بشكل احسن .. مثل مالكلام الكويس نقدر نقوله بشكل شين ! عشان كذا مفروض قبل افكر وش اقول ! مفروض فكرت شلون اقوله ( كمل بخيبة ) ولا كان تركت الكلام مرة وحده والسكوت من ذهب ..
غادة بعزاء له : بس الواحد مايقدر يكون عقلاني على طول ..
فراس عقد حواجبه وهو يطالعها : وآنتي شدخلك اللحين ! احد شكى لك الحال ... ترا بجد مالي خلقك تعبان دون شي و..
قاطعته غادة : بس انا مصره ارسم على شفايفك ابتسامة !
فراس ببرود :وانتي ليش تهتمين ؟
غادة ارتجفت شفتها وهي تطالع نظراته الكئيبة : ...............
زفر دون نفس وهو يمسك مقبض الباب يسكره : غادة وربي مالي خلقك .. اندفسي نامي وخلي هالليلة تمر على خير
مسكت الباب باصرار و تكلمت برجفة وعيونها تلمع : خلني ارجح هالشعور اللي دايم انكره .. خلني اقولك بقلة حيلة اني حبيتك ..

كاتبتنا الجميله كل عام وأنتي بخير و أيامك سعيده…
وربي يعوده عليك وعلينا بالخير والبركه…
ومشكوره على البارت الجميل…
فراس معور قلبي بشكل يتظاهر بـ القسوه وداخله متهشم ومكسور… اللي تعب نفسه على حفظه راح يبان مع الأيام… فتره صعبه يمر فيها… الله يعينه ..
غاده والقنبله اللي فجرتها بوجهه كيف راح يكون صداها…
سجى عسى لسانك القص .. طول عمري أكره الأشخاص الإستفزازيين وفي كثير من هـ الشاكله نواجههم في حياتنا الله يعين بس…
لؤي مدري وش اقول بس من البدايه الانسانه اللي اختارها غلط وجرب يعيش حياته بـ السر والحين نتيجة هـ الاختيار طفله مالها ذنب .. الله يجمعه معها…
أسوم الله يسعدك…
ميهاف وبدر هـ الأثنين مدري كيف راح يجتمعون ومن البدايه كانت حياتهم مو مبنيه على التفاهم ..
نايف وابتسام صحيح نايف من النوع اللي مايدقق ولا يتحمل مسؤوليه بس وقت الجد رجل يعتمد عليه… بس يبيله يبتعد عن اللامبالاه ويهتم اكثر…
ومدري عاد اذا نسيت أحد ..
كاتبتنا الجميله ألف شكر لك وتسلمين على بارتاتك الجميله وربي يسعدك…
بـ إنتظارك… .

السلام عليكم هو في فصل اليوم او لا متحمسة كثير اعرف رد فعل فراس على كلام غادة تطنيش كالعادة ام تقلب الامور بينهم فعلا وخصوصا بعد كلام لؤي مع فراس عن مشاعرة اتجاة النساء منتظرينك حبي