" تشابتر ثمانية وأربعين "
- كن لي غريبا , فالأحبة يرحلـون .
بـدر بنبرة على حدود الإنفجار موجهه للطرف الثاني بالسماعة : قــــلت لك تصبر شوي ! .............. معناها باللعنه بيعها ماعاد تهمني ......... اندري عنك اقلقتني من امس ماوقفت اتصالات خلاص مابيها......... انقلع
سكر السماعة بينما انتبه لصوت وراه : شفيـك عسى ماشر ؟
التفت لنايف اللي يطالعه بقلق من نبرته : ....... هلا نايف
نايف : العالم بزواج وانت جالس تصارخ هنا ... شفيك شصاير ؟
تنهد بدر : عارف انه زواج .. كنت طالع اللحين اساسا
نايف : تعـــال ..؟! طالع وين تو بدري ؟
بدر : اهم شي باركت للمعرس وش اجلس اسوي بعد ؟ ضايقه فيني الدنيا مالي خلق اقابل احد
نايف : ليه شفيك من كنت تكلم اللحين ؟
بدر تنهد : لاتشيل هم نايف ... مو شي نفسها المشكلة القديمة , مافيه جديد يعني ؟
نايف : بتتسهل إن شاء الله .. تعال ندخل نجلس شوي على العشاء ثم نطلع , مو حلوة يعرفون انك موجود بس ماحضرت عشاهم
بدر : رضا الناس غاية ماتلزمني ! فراح أطلع مالي مزاج احد
نايف تنهد بضيق : أصبــر خلك مكانك , بعطي ابوي خبر وجايك
بدر وقفه : لا تجي نايف .. مالي خلقك لا انت ولا غيرك ..
نايف بقهر : شفيك انت ؟! واذا حياتك صارت مبهذلة مو شرط انت تصير حيوان !!
بدر : يالله يانايف وربي ....
قاطعه نايف : وبعدين وين بتروح ؟ بترجع البيت ..؟ وش بتسوي ! خلك من هالهدوء والطفش كودك تنسى هالغم اللي انت فيه
بدر بكئابة : انسى هالغـــم ؟ ماظني هالغم ناوي ينساني
نايف : اسمعني ! دون نقاش خلك مكـانك شوي وراجع وقتها راح نطلع للشاليه ولا للبحر اللي بخاطرك عاد يارجال والله لو آخر الدنيا
ودخــل مباشرة , بينما بدر تنهد بهم ... وهو يتجاهل كلام نايف ويفتح سيارته ويبتعد عن القصــر
***
أثناء ماغادة جالســـة مع البنات بالطـاولة , والكل يتكلم بحماس عن شكل وداد ..
التفتت ميهاف لغادة وهي تنطق بقلق : غـادة كيفك عقب أمس ؟ ان شاء الله احسن ؟
غادة ابتسمت : لا احسن مرة حمدالله
سجى بمقت : إلا هو كيف طحتي فجأة كذا ؟ ماكان فيك شي ؟
غادة صايرة تكره الحدود اللي رسمها فراس اتجاه هالمخلوقة .. ماعاد تقدر ترد عليها زي أول : إيوه انا كمان كنت احس نفسي تمام فجـأة ..
: غـادة ؟
التفتوا لابتسام اللي واقفة : كيفكم صبايا ؟
ميهاف : بخيــــر ياعسل انتي شلونك ؟ وكيف دحومه ومشعل ياربي وحشوني ابيهم !
ابتسام : حمدالله هههههه ومشعل ودحيم مساكين مستحيل اجيبهم مكان ازعاج كذا حياك بكرة شوفيهم
ميهاف : هههه يادوبني طلعت اليوم ! الا انتي زورينا خل نشوفك
ابتسام : ودي والله بس بكرة برضـوا لازم اروح للشركة اختم اجازتي وكم غرض ابيه
ميهاف : بجد ؟! انا كمان بكرة بروح ازور قسم مع بابا .. وبابا اكيد ماراح يجلس معاي , نروح سوا ؟
ابتسام : من عيوني اكيد " ألتفتت لغادة " , غدو معليش ثانية ابيك بشغلة
رجعت غادة كاسها وهي توقف وتعدل فستانها .. مشت مع ابتسام اللي وقفت معها بممر فاضي : شــصار امس ؟ ادق ماتردين ؟ شسويتي عقب طلعتي ؟
غادة رسمت بسمه تهدي فيها ملامح ابتسام القلقه : ما سويت شي .. طلعت ولما رجعت البيت ارتحت
ابتسام : والشاطر زوجك وش سوى ! مافاتني ان كل اللي فيك بسببه اكيد .. اصلن مافيك بلا غيره
غادة : سيمـو روقي ... ماقصر طلعنا المطعم و ....
ابتسام حست بقهر : ولأن طلعتوا المطعم خلاص تمام ؟ غادة انتي ايش كان فيك اساسا ؟ مر عليك اسبوع بشع .. شصاير؟
غادة بضيق : ابتسام مو وقـته وربي ... زواج والناس
ابتسام : متى وقته ..؟! وانا متى جلست معاك من تزوجتي اخذ علومك ؟ محبوسة بهالبيت ماتنشافين
غادة تنهدت : مافيه شي يـنقال ...
ابتسام بقهر : اسمعي تتكلمين معي ولا انا بروح لام فراس اللحين وترجعين معي اليوم ! مو معقولة صايره كأني ما اعرفك , ما اشوفك الا بهالزيارات
غادة : إبتســام ........
ابتسام : شنو ؟ نعـــم ! ترا انا ساكته من أول .... بس عقب طيحتك قدامي أمس لا والله معد أقدر ..
غادة مسكت يدها : راح تعورين قلبها والمسكينة مابيدها شي ... " تنهدت " انا تمام اللحين صدقيني
ابتسام : طيب ليش اغمى عليك ؟
غادة دورت مهرب ماحصلت : ......... كنت ضايقة وما اكلت كويس وصار كذا ..
ابتسام : تراوغيني غادة ؟ وليش كنتي ضايقة ان شاء الله ؟
غادة : عشان رنيم ..
ابتسام تنهدت براحة .. كان براسها شي أكبر : وللحين مارضى لرنيم ؟
غادة : ولا بعـــمره راح يقتنع ..
ابتسام : كلمتي ام فراس عن هالموضوع ؟
غادة باحباط : مقدر اكلمها .. المسكينة شايله هم الدنيا دون اتكلم ..
تو ابتسام بتتكلم ... قاطعتها غادة وهي تنتبه للصوت العالي بالقاعة : يغنون هالاغنية ؟ احبها بجد تعالي ندخل
ابتسام دخلت معـها وهن يجلسن جمب بعض .. وعيون ابتسام تراقبها تحاول تكتشف هالضحـكة من قلبها ولا عشان تمشي الوضع .. قربت من غادة وهي تهمس باذنها : ليش ماتقومين ترقصين ؟
غادة : الشوط لأهل العريس إيش دخلني اقوم ؟
ابتسام : هههههه شوفي البنات كلهم قاموا مو مشكلة يعني
غادة : لا شكل البنات يعرفونهم .. انا اول مرة اقابلهم
ابتسام : هههههههههههه ياحياتي شوفي اسوم مسكينة انسحبت بالبطيء
غادة : هههههه عاد ميهاف واللي لابسه نيلي ماقصروا
جلست اسماء عندهم : غادة ليش ماقمتي ؟
غادة : ههههههه انتي اللي ليش هونتي ؟
اسماء بحلطمة : رقصكم يالعرب كله مالي فيه .. مايعجبني ولا اعرفه !
ابتسام غمزت : اجل خل نبشر اخوي ان المزة شاكيرا مالها في العرب
غادة : ههههههههههههههههههه مــن جد !
اسماء برطمت : تمقتون فيني من اللحين ؟
ابتسام : شدعـوة ؟ ان شاء الله انك شاكيرا وأطلق بعـد
اسماء بقهر وقفت : لا مانيب شاكيرا ولا حتى الطقاقه موزة ! " كملت طريقها وهي تتحلطم " فوق الخطبة والسحبه ينكتون بعد !
ابتسام : هههههههههههههه شفيها عصبت !
غادة : البنت مستعجلة وأنتو دلوخ مافهمتو !
ابتسام فتحت عيونها : من جدك ؟ بس .. بس هيثم يقول مافيه لحد الإجازة
غادة رفعت كتوفها : وهذي المشكلة
***
أم فراس : ان شاء الله الف مبروك الله يسعدهم يارب وعقبال سجى وعبدالمجيد
ام عبدالمجيد : تسلمين يا أم فراس .. وعقبال مانفرح بباقي عيالك
ام فراس : آمين يارب .. يله ودعناكم الله
طـلعت أم فراس والكل ركب السيارة مع السايق .. زفرت اسماء : حشى الفجر بيأذن !
ام فراس : مو حلوه نطلع بدري كذا وام عبدالمجيد مسكينة وبنتها مخبوصات بالشغل ! وهي اللي ماتقصر معنا بكل مناسباتنا
اسماء تسندت على الكنب : والله وتكسرت رجولي صدق تعب
ام فراس : يله معليش شوي ونوصل
فـور وصولهم البيت كان صوت الأذان يعلن وقت الفجر (( الصلاة خير من النوم .. الصلاة خير من النوم ))
تثاوبت اسماء : يله نصلي ثم اموت لليوم اللي عقبه
اول مادخـلوا كان فراس نازل الدرج وهو لابس ... اسماء بقهر : شوفوا وجهه بس صحي شبعان نوم ! وحنا حالتنا حاله .. متى رجعت اجل ؟!
فراس : وانتي وش قاهرك ! بالعرس ولا بالبيت كنتي بتسهرين للفجر
ام فراس : ايه والله يقالها فارقه معها اللحين
نـزل أنس وطلعـوا مباشرة للصلاة .. بينما صعد الكل مكانه يصلون ويستعدون للنـوم ..
***
ميهــاف /
كانت تطـالع المراية وهي تمسح مكياجها الثقيل .. وهي بدت تضيق من كل هالمكياج تبي تنام وبس , رن جوالها بمسج .. عقدت حواجبها وهي تسحب وتفتح الرسالة اللي كانت من بدر :
مــــا لعيني كلما أغمضتها لاح في الأجفان طيف من سناك ؟
مالذي أصنعه ؟! ومـاحيلتي ؟! وأنا في كل مـــا حولي أراك . !
رجعت تسكر جوالها دون ترد .. دايمـا تكره اسلوبه العسلي اوقات زعلها , كأنه ينوي يشفط كل اللي بخاطرها بهالكلام , بس وقت يكون الموضوع خيانة .. حتى هالكلام ماعاد ينفع ...
رمت مناديل المكياج وماهمها الباقي من مكياجها ولبست بجامتها وهي تدفن نفسها بسريرها .. كل وقت نوم ترسم لها جلسة مع مستقبلها ... وش لازم تسوي ؟ ترجع له ؟ تتركه ؟ تحبه ؟ ماتحبــــه ..؟!
وكل ليلة تسفر عن نتايج متناقضه تماما .. استسلمت للنوم مباشرة شكرا للتعب اللي ماعطاها وقت لهالتفكير ..
***
بعـد الظهيرة .. بيت أم فراس /
دخل فراس البيت ... ام فراس بتعجب : هلا والله " طالعت الساعة " غريبة طالع بدري اليوم ؟! بالعادة ماتجي الا عالعصر عشان كذا ما استعجلت بالغداء
فراس وهو ينحني يبوس راسها : فجأة طرت علي سفرة بكرة ولازم اجهـز لها ... " التفت للصالة وين ماكان اسماء جالسة قدام التلفزيون مع انس وياسمين يتابعون " يا ساتر .. هالثلاث جالسين قدام التلفزيون دون هواش ؟
ام فراس : لا تنظلهم حمدالله ماصدقت انهم هاجدين ! وبعدين وش هالسفرة بكرة ؟
فراس : سفرة شغل وش بتكون يعني ..
جلس فراس بالصالة وهو يطالع اللي يتابعونه .. فلم هوليودي اكشن
انس بحماس : الله شوفو كيف طارت سيارته ! هذول السواقين ولا بلاش وحنا منثبرين عند ساهر
اسماء : ولا البنت ياحظها الكلبه ! مبسوطة مع هالمزيون وسيارته وانا منثبره هنا
فجأة الشاشه تحولت لأسود ... كبست اسماء بعيونها وهي تلتفت لفراس اللي الريموت بيده : ليششششش طفيته !!!!!
نطل المفتاح على انس : هذا مفتاح سيارتي بتحصل ملف بالمرتبه القدام جبه ... وانتي امي بالمطبخ الحقيها ! ولا مصدقة حالك بزر للحين
اسماء بقهر : امي ماتبغاني !! وبعدين انتظر الفيلم يخلصص حرام تحمست معه
فراس باحتقار : حياتكم راحت متابعات فاضية وصار كل واقعكم افتراضي .. تابعي وقت تكون امي جالسة اللحين انقلعي
اسماء بزعـل تكتفت : مابي !
فراس رفع حواجبـه : نعــــم ؟!
اسماء بقهر وقفت : احسن اصلن بروح اتابعه بغرفتي
فراس طالعها بنص عين : تقولين انا مره وفيني خير عتبي درجه وحده بس
اسماء وقفت مكانها قبل تصعد : شنـــو ؟
فراس اشر براسه للمطبخ : وش تنتظرين ؟
اسماء ضربت برجلها على الارض وهي تمشي بعصبية ناحية المطبخ : كلش كلش غصب محد يقدر يستقل بنفسه شنو بزارين حنا !!
رمى فراس الريموت بعد ماسحب توصيلة التلفزيون وصعـد لغرفته .. طقق اصابعه وهو يفرز الملفات اللي يحتاجها لسفــرته
الطـابق السفلي .. كانت اسماء متربعه فوق طاولة المطبخ وتتكلم بقهر : قبل شوي طلعت طلع ماخذ التوصيلة وش هالنجاسة !
ام فراس هزت راسها : اسماء تراك اجعتي راسي ... انقلعي برا
اسماء : فراس يقول خلك مع امي !
ام فراس بنفاذ صبر : خلك معها ساعديها مب افقعي مرارتها ! يوه
اسماء بيأس طلعت جوالها ..دخلت لعـند هيثم , آخر ظهور قبل ساعة ونص .. تنهدت بطفش حتى يوم خطبت ماتحس بشي مميز .. بوزت وهي تنطق بهدوء : يمه ..
ام فراس : هلا
اسماء : ابغى اتملك ..
ام فراس فتحت عيونها بوسعها : نعــــم ؟!
اسماء : يوووه اسمعيني قبل ... انا يعني مابي اتزوج اللحين اوك بنتظر , بس اقل شي بتملك ..
ام فراس تنهدت : يا اسماء السالفة مب سالفة ملكة او زواج .. السالفة ان البنت مو هي اللي تقرر , وش ودك يعني يروح اخوك يحاكي الولد يقول تعال تملك على بنتنا ؟ لازم تجي منهم مب منا
اسماء : ماقلت كذا انا ... يعني حاولي تكلمين ابتسام ..
ام فراس : لا والله لا اكلمها ولا شي ... بتقول وش هاللي رامين نفسهم علينا ! وبعدين انتي ركزي على دراستك اللحين ووقت تخلصين يحلها ألف حلال
اسماء : يعني اللحين المشكلة كلها دراستي !؟
ام فراس : ايه ولا ودك تجين دون شهادة دون شي ... اجتهدي اللحين وبيمر الوقت ماحسيتي صدقيني
اسماء تنهدت بيأس : .............................
فتحت جوالها وهي تكتب له رسالة /
مســاء النور ! ~
امس كان زواج بنت عمتي  , ياحليلـ/ـها عادي تتزوج حتى وهيِ تدرس -_-"
ممـكن نتقابلَ بمكان ؟! فيه كـلام ضروري ماينفـعَ ينقال هنـا ..
رد ليَ بدري , اوك ؟! "$
سكرت جوالها عقبها وهي تنطق بملل : غادة ظنك للحين نايمة ؟
ام فراس : اصعدي شوفيها .. خلها تتغدا معنا
نزلت اسماء من الطـاولة وهي تصعـد لفوق , طقت الجرس ... بعد فترة فتحت غادة : هلا اسوم !
اسماء : فينك يادوبه .. لا صحيتي يختي انزلي على طول
غادة : أنس موجود ومابي افصلكم
اسماء بنفاذ صبر : يا هالأنس شايب عمره 40 ! توه بزر ياعالم
غادة رفعت حواجبها : وانا شدخلني ...؟ عموما انتي اصعدي معاي طيب
اسماء : لا الغداء جاهز تحت بنـزل ..انتي اللحين تعالي معي بنتغدا بالحديقة
غادة : مجهـزة غداي خلاص
اسماء : اوكيه .. راح اتركك بس اسمعي ترا بكرة بنطلع انا وانتي السوق , بخاطري اشتري لي كم حاجة احسس نفسي فيها اني مخطوبة
غادة حست فمها بضيق .. عشقها الأول والاخير السوق بس فراس أولا والفلوس ثانيا : ما ادري .. ع حسب اخوك ..
اسماء : فراس بكرة مسافر ! يعني مايدري عن شي مو لازم تقولين له
غادة : وانتي مصدقة أن اخوك مو مخاوي ! بسم الله على قلبي كلش يعرفه ..
اسماء : هههههههههههههههههههههههههههههههه في هذي معك حق .. طيب مو مشكلة قولي له وبس ! يعني انتي متى طالعه للسوق ما أتوقع يرفض ..
غادة هزت كتوفها : بشوف ..
اسماء : يله اجل انا بنزل اتغدا
في طريقها لتحت رن جوالها برسالة من ( الحب ) :-
وش هالحاجة المهمه اللي ماتنقال على الجوال ؟
اسماء تنهدت بقهر وهي تكتب بحماس /
حــــاجآ /= ., انتَ شو بتنقص ؟ وقت نتقابل حـ أقولك ,
جاها الرد مباشرة /
خـاطبك مو متزوجك ! اعرفي الفرق قبل تطلبين طلب غبي زي هذا
اسماء انقهرت من رده .. ( وش يعني خاطبك مو متزوجك ؟ ) /
والله هُ صعبة أقولها هنآ  , حاول بسَ ربع ساعة ماحنطولَ
جاها الرد /
لا .
فتحت اسماء عيـونها على وسعها .. وصلت لمرحلة حرفين وبس !! وش يعني لا دون تبرير حتى ..... حاولت بشتى الوسائل تكتب رسالة مضبوطة ترد على رفضه . لكن ماقدرت .. شدت على شفايفها وهي تسكر جوالها وتنـزل مسرعة ..
ام فراس : الله لاجاب الغلا ! وينك صحنك برد ..؟
اسماء بطريقها لبرا : شبعـــــانه !!
ام فراس : هاو وش شبعانه ما افطرتي ولا شي ... تعالي بلا هبال تغدي
اسماء كانت مستعجلة ماسمعت كلمة امها الأخيرة .. تنهدت ام فراس بقلة حيلة : طايرة !
فراس بتبلد : اللي ياكل على ضرسه ينفع نفسه .. ليش متعبة نفسك معها ماهي بزر ترا
عـند اسماء .. مجرد ماطلعت للجلسة بالحديقة وجلست تحت المضلة الواقية من الشمس , وردت خدودها وهي ترسم بذاكرتها أن اليوم اول مكالمة بينهم .. رغم انها حافظة تفاصيله كانت متشوقه لصوته على السماعة كيف راح يكون .. ضغطت اتصال وهي تهز رجلها تنتظر الـرد .. لكن انقطع الخط والطرف الثاني ما أستجاب همست بقهر : يقولي اتصلي ومايرد ...
***
أذان العـــصر /
كانت إبتسام ترتب سجادتها بعد ماخلصت فرضها .. وبعدها التفتت ليزيد اللي جالس قدام اخوانه المسدوحين بالأرض على ماتخلص : يزيد حبيبي روح البس جزمتك وخلك جاهز .. بابا بيصلي ويجي
يزيد هـز راسه وهو يقوم .. بينما ابتسام لبست عبايتها بحيث تكون جـاهزه وعيونها عليهم وهم بالارض مشعل نايم بينما عبدالرحمن يتابعها بعيونه
: اححححمم
التفتت لنايف اللي تو دخل : ها جاهزين .؟!
ابتسام وهي تلف طرحتها على راسها : ايه جاهـزين خذ عبدالرحمن معك .. مشعل مسكين نايم باخذه انا
نايف تلفت : وين يزيد ؟!
ابتسام : وصيته يلبس جزمته .. اكيد بغرفته
انحنى نايف وهو يرفع عبدالرحمن من طرف ملابسه ... شهقت ابتسام برعب وهي تنطق : الله ياخذ بليسك يانايف شتسوي !
نايف بعد ما رفعه حاوطه كويس بيديه : جالس اخذه معي
ابتسام بعصبية : وتشيله كانك جالس تشيل كيس البقالة !! ناوي تمشع ولدي لي انت !
نايف : مو أول بزر اشيله كذا .. يزيد من عرفته وانا اقشعه كذا وهذا هو حمدالله بصحته وعافيته
ابتسام : وإذا ! عيالي لو سمحت شيلهم زي الناس أو اتركهم انا اخذهم
نايف : ياليييل التدقيق ... ( نزله بالارض ورجع يشيله بلطف مبالغ فيه .. ثم طالعها ) كذا كويس ؟
ابتسام برضا : ايه كويس لاعاد تشيلهم الا كذا ! ( انحنت تستقبل مشعل بلطف لحضنها ) يله مشينا لا نتأخر على ميهاف
نايف نادى : يــــــــــزيد اعجل ترا بمشي واخليك !
ركبـــوا السيارة ... ابتسام : والله ماكان ودي اتركهم الثنين عند خالتي بيزعجونها كنت ناويه احطهم مع غادة بس هي اصرت
نايف : امي عايشه حياتها كلها مع البزورة لاتخافين عليها
ابتسام : راح احاول اعجل .. مهما كان بيتعبونها
نايف : مشيعل من اللحين مامنه خوف هلامة ما أشوفه الا نايم ... ودحيم هذا سمي حبيب القلب تصبر عليه
ابتسام كشرت : وش مشيعل ودحيم ! كرهتني باسماء عيالي
نايف : .... اللحين ميهاف وش تبي معاك بالشركة .؟
ابتسام : ما أدري والله ماركزت ع كلامها .. اتوقع بتزور قسم مدري ايش
أول ماوصـلوا .. تو إبتسام بتنزل قاطعها : خلك بالسيارة لاتنزلين ! هاتي البزارين انا بنزلهم
ابتسام : ليش .؟! بنزل اعطي الشغالة خبر بحليبهم و ..
نايف قاطعها : مو ضروري بنرجع علــى طول ! انتي اذا نزلتي حلفت عليك امي تتقهوين وراح عصرنا كله
ابتسام : كيف بتشيلهم الثنين .؟ لازم انزل ! لاتخاف ماراح اوافق
نايف فتح بابها وهو ياخذ الثنين : ترا وزنهم ريشه ..!
ابتسام : يووووه يانايف انتبه لايطيحون
دخل نايف واستقبلته امه مباشره بهلع وهي تسرع بمشيها ناحيته وتستلم واحد منهم بيديها : ليش شايلهم كلهم لحالك الله يهديك .؟! وين ابتسام !
نايف : ابتسام برا .. لا نزلت صار يومنا سنه عارفكم انتو وحكيكم , وين ميهاف .؟!
ام نايف وهي تربت على ظهر عبدالرحمن وهو يضحك بوجهها : وهالمشعل ما اشوفه الا نايم !
نايف : أبوه وين بيروح .؟ " تنهد " شفتي يمه ان سوالفك ماتخلص ... اللحين اسئلك وين ميهاف تكلميني بمشعل !
: جيت جيت
كانت تنـزل الدرج مسرعه ووجهها يزداد بشاشه وهي تطالع التوأم : يا روحـــهم .... شكلي بهون واجلس العب معهم بس
نايف زفر : ميهاف ..!
ام نايف بعصبية خفيفة : وانت شعـندك ..؟ مو بعادتك تكون مستعجل كذا !
نايف بتذمر : أمس مانمت .. فلم ورا فلم وراح الليل وصبح الشيوخ صاحين من فجر الله وصياح .." مسح على وجهه " فلو سمحتي اعجلي علي اخلصكم ارجع انام !
ميهاف : وش هالتطوع ..؟ طيب ارتاح بالبيت نام بيودينا السواق
نايف : والله اقدر اقترح هالإقتراح بس مو فاضي اتهزأ يوم كامل .. واللحين ؟ ممكن تشرفين
ميهاف : ههههههههه تعجبني ابتسام والله ما عرف لك غيرها .. يله اسبقني جايتك
نايف تجاهل تعليقها : يمه لؤي وين .؟
ام نايف : مدري عن هـالولد طالع من صبح
نايف : ظنك احصله بالشركة ؟
ام نايف : اكيد وين بيكون يعـني .؟ ماله زود طلعات
وعـلى طـآري لؤي , كان جالس بمكتب أبوه وجواله بيـده يفتح شي معين بعدها حط الجـوال قدام أبوه اللي ملامحه كانت مذهـوله وهو يطالع الصورة ثم يرجع يطالع لؤي : وليش طيب .؟!
لؤي ببرود : مو أنت كان ناوي تشتري لي بيت .؟ خلاص انا اخترت البيت .. اشتره لي
ابو نايف نفخ : تستــــهبل علي ؟ وش بتسكن لحالك له ...؟!
لؤي : حرام ارتاح ؟
ابو نايف : وانت وش عليك قاصر ببيتنا .. مو مرتاح ؟
لؤي بتبلد : نهائي ..
ابو نايف ضرب على الطـاولة : طالعني وقت احاكيك !!! انا لي شهر مسلك لتصرفاتك واقول بكيفه ... بعت البيت ببلاش وسكت .. سيبت الموظفين يومين ورا بعض وسكت ... صرفت مشرف مهم وسكت ! لمتى عـاد ترا قفلت ..؟ على اساس ابيك تعقل شي .. شايف كل مالك تستهبل زود ! على بالك تعاقبني بهالتصرفـــات ..؟!
لؤي رفع عيونه الباردة لأبوه : أقل شي أسويه لبنتي اللي راح تكبر ماعرفتني .. اني اكون مو بخير دونها , روحتهم ارهبت قلبي من الحياة خلاص .. وبعمرك ماراح تشوفني بخير بعدهم ..
أبو نايف تنهد وهو يحاول باللين : لؤي يابوك أنت خلاص رجعت تشوف حياتك ... ليش تسوي كذا .؟ صدقني انت اللي بتتحسف بالأخير
لؤي ابتسم ابتسامة جانبية بسخرية : كانك تقول راح ارميك بالنار بس ممنوع تصرخ ..
ابو نايف نطق بصرامة : لــــــــــــؤي !!!
لؤي تـنهد وهو يرخي جسمه على الكنب : من الأخر بتشتري لي البيت ولا اشوف فراس .؟ مو كافي حسابي اللحين للحين موقفه
ابو نايف : ................ ومـطولة سالفة هالبيت ؟ لمتى يعني بتجلس بهالبيت لحالك
لؤي : ابد .. لين اموت
ابو نايف : اجل روح لفراس خله ينفعك .. انا مستحيل ابعدك بيدي !
لؤي وقف : معناها كثر الله خيرك ..
طـلع مباشرة وهو يرمي الملف بطريقه على القسم ويستعد يطلع دون يكمل واجبه الوظيفي كامل .. كالعادة , بطريقة أنتبه لنايف جالس بصالة الإستقبال ومتكتف ومنزل راسه .. تعجب لؤي من وضعية جلسته قرب شوي اكتشف انه نـــايم , ابتسم دون نفس وهو يهز كتفه : نايف !
فتح نايف عيونه : خلصـتو ؟ " استوعب الشخص " لؤي .؟ هلا
لؤي جلس جمبه : ههههههههههههه ماعندك بيت تنام فيه .. وش جايبك تنام هنا
نايف كبس عيونه بثقل : سؤال وجيه ..
لؤي : حالتك صعبه .. امش بوديك معي البيت
نايف : مقدر إبتسام وميهاف هنا لازم ارجعهم معي
لؤي : اهـــــــــا قول كذا ... طيب ارجع نام انا بجيبهم اذا خلصت
نايف : المدام متوحمه على سواقتي .. ماسكه معها محد يوديها ويجيبها غيري
لؤي : هههههههههههههههههه حقها يخي , عاد انت كلش مكتفي
نايف تثاوب : هات مفتاح مكتبك باخذ لي غطه على مايخلصون
لؤي رمى المفتاح عليه : هاك نوم العافية
نايف تثاقل طوله وهو يفرك عيونه ويتوجه ناحية قيلولته , بينما لؤي طالع ساعته وهو يتنهـد ... بعد 5 دقايق دخـل فراس .. وقف لؤي وهو ينطق بتذمر : وينك يخي لي ساعة من عزمتك.؟
فراس : وانا ماوراي غيرك .؟!!
لؤي طالعه بنص عين : وش عندك بعد .؟
فراس : عندي سبع مشاوير تنتظري وبكرة مسافر لازم اجهز .. فاعجل علي
لؤي : طلبي مره سخيف عقب كل هالأشغال .. كان قلت اني انك مشغول وماراح اصر عليك
فراس : لا تشيل هم اساسا قبلك عمي متصل فيني يبغاني
لؤي : معـناها اصعد شوفه وانا بنتظرك تخلص
فراس : وليش ماتجي معـاي تشوفه ؟
لؤي : تو نـازل منه وبعدين يبيك انت وش يجيبني معك ؟
فراس : بكيفك اجل
صعـد لفوق لعند مكتب أبو نايف .. وقف عند السكرتير : فيه احد جوا .؟
السكرتير : ايوه فيه مدام داخل
عقد فراس حواجبه .. مو بعادة أبو نايف يتعامل مع حريم : وهالمدام مالها أسم ؟
السكرتير بانحراج : لا العفـو ... المديرة السابقة إبتسام مشعل آلمرزوق
فراس رفع حواجبه : لحـالهـا .؟!
السكرتير : ايوه .. راح تدخل .؟
فراس جلس على الكنب الجانبي : لا استناه يخلص
مـاطولت ابتسام بمرور دقيقة طـلعت .. أول ماطلعت أنتبهت للشخص اللي وقف من الكنب الجانبي , الجو القاتم هذا مايجي من غيره واقف بزيه السعودي الكامل الثوب والغترة البيضا مع الملامح الحادة ... كشرت وهي تطـالعه حاقده علي كثر ماتشوف كئابة غادة ..
فراس انتبه لنظراتها المحدقة له .. استشعر مباشرة شرارات الحقد من ناحيتها , ابتسم ابتسامة استفزازية وهو ينطق : شوي على عيونك لاتطلع من مكانها .. " كمل بهمس مسموع " معاد به حيا
كان قصده الأستفزازي واضح .. وناجح , ابتسام حست بقهر فضيع منه هذا هو نفس الشخص اللي طلع نفسه من كل المشاكل اللي صارت زي الشعره من العجين وحطها كلها براس اختها .. واللحين مو تاركها تتهنى بحياتها , نطقت بثقة : مو شايفه قدامي رجال يملى عيني عشان استحي .. شايفه زباله , عمر احد استحى من زبالة ؟
فراس رفع حواجبه من ردها القوي : شالحيلة طيب ؟ مايملى عين بن آدم إلا التراب
إبتسام حست بسفاهة هالإنسان قدامها .. حاجب مرفوع بغرور مع نبرة باردة , حاولت تمسك اعصابها : ماراح اقولك غير حاجة وحده بنات الناس مو لعبة عندك .. اذا منت قد احترامها فعيوني اوسع لها من بيتك
فراس اختفت ابتسامته الساخرة .. وهو ينقل بصره بين السكرتير اللي مستغرب الوضع , ابتسام انسانه محترمه وعملية اول مرة يشوفها معصبه كذا .. رجع فراس يطالع ناحيتها : تكلميني عن الإحترام وانتي اللي جالسة تجيبين طاريها بهالشكل قدام اجنبي .؟ لا تضحكيني ..
دخـل المكتب مباشرة بينما همست ابتسام بكراهية : حثالة صدق ..
طلعت من جناح مكتب ابو نايف وهي تنـزل للصالة بالمكان اللي كان فيه نايف .. ماحصلته استغربت فتحت جوالها تحاول تدق عليه مارد : غريبة وين راح هذا بعد ؟!
انتقلت من رقمه لرقم ميهاف : هلا والله
ابتسام : هلا فيك .. انا خلصت شغلي انتي لسى ولا كيف ؟
ميهاف : لا والله خالصه من أول بس استناك , يله اقابلك عند البوابة ؟
ابتسام : لا لحظة نايف معاك ؟
ميهاف : لا والله .. ليــش ؟
ابتسام : ما أدري رجعت للمكان اللي قال بنتظركم فيه ماحصلته .. قلت يمكن راح معاك
ميهاف : دقيتي عليه طيب ؟
ابتسام : مايرد ... شوفيه حولك وانا راح اشوفه اذا حصلتيه قولي
ميهاف : يالله ... اوكيه تمام
***
طقت اسماء الجرس على الشقة وعلى ملامحها التكشير والملل بعد انتظار طويل لمكالمه ... فتحت غادة الباب : هلا سوم تو بنزل عاد !
اسماء بزهق : معناها البسي قبل تنزلين لأن عمتي بتجي هي وبناتها ( كملت بكسل ) يوه صح وداد تزوجت جعلها الضده قصدي هي وبنتها
غادة : هاه ..؟ غريبة فجأة كذا ..
اسماء : امي عازمتها .. تبي تسالها عن وداد وعزايمها ومدري شعندهم
غادة باحباط :اوكيه لاحقتك ..
دخلت وهي تحس بقهر من انقلاب موجة اليوم .. تراجعت لغرفتها وهي تنسق لبسها بكسل .. تاففت بزهق بعد حيرة بين بلوزتين ايها انسب للتنورة : أي شي يمشي !
لبســـت وهي تسحب جـوالها وتنزل .. اول ما نزلت انتبهت لأصوات تحت من ظمنها صوت أم عبدالمجيد , تنهدت يعني
موجودين .. توكلت على الله ونـزلت وهي ترسم ابتسامة مجاملة : السلام عليكم
التفتتـــوا لها : وعليكم السلام ورحمة الله وبركاته
غادة : كيف الحال شمسوين ؟
ام عبدالمجيد : حمدالله بخير وصحه ننشد الله العافية .. انتي كيفك ؟
غادة : مبسوطة حمدالله .. وكيف وداد .؟ وكيف الزواج معها؟
ام عبدالمجيد : ههههههههههههه مبسوطة من اليوم ابي اكلمها وعقب الشين كلمتني خمس دقايق وصوتها ماينسمع
غادة انحسرت .. تستوعب انها ماجربت وضعية العروسة ولا مشاعر ان اول يوم زواج شي مميز .. حتى احمد وهو أبو بنتها رماها ببيت أهلها في صباحية عرسها .. وفراس غني عن التعريف .. : الله يوفقها يارب
سجى كانت تراقب دون صوت غير رد السلام بالبداية ... تنهدت وهي تنطق : وين اسوم مو شايفينها
ام فراس : تحصلونها برا بالحديقة تقول بجهز لنا حنا يالبنات جلسة
غادة : يؤ ليش ماقالت لي اطلع اساعدهـا ؟
ام فراس : ماراح تعجز منها لحالها والشغالات معها شتبي بعد ؟
غادة عضت لسانها ثم قالت : سجى يله نروح لها ..
سجى بثقة وهي تمشي قبلها : اعرف دربي عشت هالبيت اكثر منك ترا !!
غادة كشرت من اسلوبها وهي تمشي قدام وحاقرتها .. ماتمنت تطلع معها بعـد , تنهدت باحباط وهي تدخل المطبخ وتطـلع كاس ماء تشربه تبرد اعصابها .. بعدها طلعت كانو جالسين بالفعل , اشرت لها اسماء : حيــــــــــــــــها ! تعالي اسمعي السالفة حماس
تنهدت غادة وهي تقرب وتجلس : هلا شسالفته
اسماء بحماس : هههههههههههههه عيدي من الأول ! وداد مسكينه
سجى : ههههههههههه شنطتها تبعت الفندق ... حاطه فيها قميص ناعم طويل دون اكمام .. حضرتها مستحية تلبس شي مرة جريء ! وانا الله لايوريكم طلعته وحطيت لها كل الألوان الصارخة والموديلات اللي عارفين عشان غصب تلبسها ! بغت تاكلني داقه علي بتبكي تقول ماراح البس شي
اسماء شهقت ثم اطلقت ضحكتها : هههههههههههههههههه رجلها بيبوس راسك !
غادة استثقلت النكته وكل شي ... دون شي طاري الزواج وشبابية الأيام الاولى تغربل مزاجها : ...........................
سجى حاست بفمها : لايكون كلامي ما أعجبك .؟
غادة : مين قال .؟ بس مو بخاطري اضحك ... شايفتها ثقالة دم !
اسماء : حرام عليك وربي تضحك هههههههههههههههههههههههههههههه !
غادة هزت كتوفها : راي شخصي .. انا ما اعجبتني
سجى : عمرها ما اعجبتك بعد ! وعععوه ماثقيل دم الا خشتك
غادة ببرود : برضو رايك الشخصي بكيفك ..
***
بـــالشركة .. ارتفع ضغط ابتسام وهي ماتركت مكان ماحصــلته فيه , اختفى فجأة ! رفعت جوالها وهي تتصل بميهاف : ألو !
ميهاف : هلا حصلتيه .؟
ابتسام بنبرة نافره : لا وبطلت ادوره ... راح اخذ لي تاكسي وارجع البيت , تجين معاي ؟
ميهاف : ايوه طبعـا من ارجع معه اجل .؟ يله اجل اشوفك عند البوابة
ابتسام : طيب .
سكرت ميهاف السماعة وهي منحرجة من مزاج ابتسام اللي واضح معصب مرة ! ( بحقه نايف يخاف يممه ! ) , رجعت جوالها شنطتها وهي تمشي ناح الأصنصير عشان تـنزل ... قبل يتسكر الباب قاطعته يـد بعروق ناتيه , ميهاف اللي كان متسنده بكتفها على الجدار تنتظر .. غيرت وقفتها وهي تنتبه للي يدخل ! ما توقعت تحصله هنا نهائي ..
بدر كانت حالته اسوأ .. دون شي قرفان من كلش , وأبو نايف متصل عليه فجأة مايدري وش يبي ! واللحين يقابلها بعد من بين كل الأوقات .. سحب رجله بهدوء وهو يدخل وياخذ بينه وبينها مسافه معقولة وريحتها اللي اشتاق لها كثير تلفحه قامتها القصيره اللي تجذبه خصوصا لاصارت جمب طوله الفارع .. نطق بنبره هادية : كيـفك ؟
ميهاف بنبرة اهدى : بخير ..( ثواني ) ............. وأنت ؟
تنــهد تنهيدة من قلب وهو ينطق بطرفها : عايش
ميهاف هزت راسها .... أنفتح الأصانصير طلعت مباشرة , وطلع هو وراها .. تو بتتوجه للبوابة نطق : أول مرة اشوفك هنا .. غريبة عليك
ميهاف بنبره لها مقصد : وظيفتي ! جايه اشوفها
بدر هز راسه : اهـا ... بالتوفيق اجل
ميهاف : ........ وأنت ؟ على حد علمي مابينك أنت وابوي مواويل ..
بدر : على حد علمي بعد ... بس جتني رسالة اجي معناها أجي ..
ميهاف طالعته وكانها تبي تنطق شي بخاطرها لكن تراجعت وهي تهز راسها وترجع تدير ظهرها ناحيته .... بدر ملامحه الهادية تحولت لتكشيره غير راضيه نهائي .. نطق بهمس بينه وبين نفسه : غبي ! ويوم اخيرا قدرت تشوفها هذا اللي قدرت تقوله !
سحـب رجله ناحية جناح أبو نايف ...أول مادخل : السلام علــــــــ.......... ( انقطع سلامه وهو ينتبه لفراس جالس مع ابو نايف .. وكشر بقرف وهو يكمل ) عليكم
فراس دون نفس : وعليكم السلام
أبو نايف : تفضــــل أجلس !
بدر لو واحد غير أبو نايف رفض مباشرة .. لكنه متفشل بما فيه الكفايه منه فجلس : .................
ابو نايف نقل بصره بينهـم : تدرون ليش انا مناديكم اليـــوم .؟!
فراس : اذا مصلح اجتماعي فترا مالها طعـــمة .. ( عدل جلسته ) وهو لو الجاهل هذا سكت ما اختلفنا اساسا , انا من ناحية .. والإعلام من ناحية .. وأهل زوجته من ناحية .. والمحررين من ناحية .. ( ابتسم بسخرية ) اتوقع مشاكله تكفيه دوني فأنا اقول صالحه مع كل هاللي ذكرتهم اللحين ووقتها حياه متى ما بغى .؟
بدر : واللي يقولك اني ناوي اصـــالح كل هاللي ذكرتهم ماعـــداك أنت بالذات !
فراس : ابرك لي وأقرد لحظك .. كل اللي حتصالحهم مابينفعونك كثري , عايش على رزقي طول عمرك واللحين طلع لك ريشة وماتبيني .؟
ابو نايف : عيــــــــال !! انا تارك المشكلة واقول بكيفهم .. بس وقت سمعت انك يابدر رافع قضية .؟ قضية خاسره ومامنها فايدة غير الشوشره عليكم .... ابوكم الله يرحمه كان سمعته مسك واللحين انتو ناوين تدمرون كلش ... ابوي كلمني وناوي عليكم لو ماتهدون عن هالهبال
فراس وقف : انا اللي عندي قلته ... تاركني اقطع لك مشوار للشمال واترك اشغالي عشان سالفة بزارين ! لو معطيني خبر مافكرت اجي حتى
ابو نايف تنهد : متى طيارتك بكرة .؟
فراس : عصـــر بإذن الله
ابو نايف : في امان الله .. ومر جــدك قبل تسافر عتبان عليك جدا !
فراس تنهد : يصير خير
طـلع مباشرة بيــنما بدر كان مازال داخل ..... ابو نايف زادت نبرته شدة موجهه لبدر : وبعـــدين ؟!! مو كافي انا اللي مناديك وانت المفروض تجي تعتذر على تصرفاتك ..
بدر تنهد : حقك علي ... بس وش طالع بيدي ؟
ابو نايف : ماراح اوجع راسك وراسي ! بعطيك الـــــزبدة .... وجود بنتي المتزوجة في بيتي بهالشكل مو مرضيني !! فهي وحده من الثنين يا ماتكون في بيتي .. يا ماتكون متزوجة ... وانت كيفك !
فتح بدر عيـونه : من جــــدك ...؟ بنتك في بيتك بناء على طلبها وانا شاري راحتها بس مو معناها اطلقها
ابو نايف : وليش تطلقها ..؟ ماتقدر ترجعها بيتها يعني ؟؟
بدر تنهد : يصير خير
ابو نايف : معناها اصرف نفسك انا عندي اجتماع !
وقف بدر وهو يـــطلع وهموم الدنيا على راسه فوق ماهـو مهموم ... نـزل للدور الأرضي وهو يتوجه ناحية سيارته , تو فتح الباب بيركب أنتبه لشابتين قدام الرصيف يحاولون يصطادون تاكسي ... وما فاته أن وحده من هالثنتين هي ماغيرها ... ركب سيارته وهو يتوجه بها ناحيتهم لحد ماوقف عندهم ... فتح الدريشة : السلام عليكم
ابتسام : وعليكم السلام والرحمة هلا والله
بدر انتبه لتجاهلها ... : جايين مع نايف انتو ؟ وينه عنكم
ابتسام بنرفزة الدنيا كلها : انشقت الارض وبلعته
بدر : ههههههههههههه .. معناها تفضلوا اوصلكم بطريقي
ابتسام : تسلم اخوي والله بس ماودي اتعبك
بدر : افا مافيها تعب ولا شي .. تعبكم راحه
ابتسام وافقت خصوصا وهي تبي توصل البيت باقرب فرصة ..ميهاف ركبت قدام وهي مالها خلق تحس باحباط بقوه ..
بدر : سيارة نايف قدام الشركة للحين يعني ماراح .. غريبة ماحصلتوه .؟
ابتسام انتظرت ميهاف ترد .. لكن الظاهر ان الكلام اللي يقال عن انها مطنقره ببيت اهلها صح , : ايوه اشوفها .. بس حست الشركة بكل مكان ماحصلته !
بدر : مو غريبة عليه نيوف .. حركاته
ابتسام : الله يعين
استمر الطريق في صـــمت مجرد من نظرات يختلسها بدر لها وهي معلقة عيونها بالشارع وصاده عـنه ... أول ماوصلـوا البيت فتحت ميهاف الباب مباشرة حتى قبل وقوف السياره , مسك بدر يدها : ممكن لحظة .؟!
ابتسام نـزلت تدخل ... بينما ميهاف التفتت له بقهر : نعم شتبي ؟
بدر اشترى طن من الصبر .. خصوصا هو مايتحمل هالأسلوب بس كيف اذا كان غلطان ؟ حرك سيارته : نتفاهم شوي .. اتوقع عطيتك مساحتك بما يكفي
ميهاف باصطناع : اوه حياتي كنت جالس تعطيني مساحة .؟ وانا ع بالي انه مايهمك !
بدر : تكلمي كويس .. انا مو جالس أنكت ! يحق لك تزعلين بس انا عطيتك اللي عندي ... راح تصدقين الغريب فوقي يعني ؟
ميهاف بانفعال : شنو عطيتني اللي عندك ؟ اللي عندك ان كان بينكم علاقة ويوم تزوجتني بطلـــتو !! مفروض اصدق .؟ من شب على شي شاب عليه
بدر : لأني كنت فارغ قبل ... بس وقت التزمت فيك صدقيني ماشفت غيرك
ميهاف عضت على شفتها : التزمت فيني ؟ كلها كم شهر ... كم شهر مليانه مشاكل ومناقشات وصراخ .. هذا التزامك؟
بدر : في هالحالة انا حاس ان ايامنا الحلوه هي اللي لسى ماعشناها .. ليش مانرجع زي أول ؟ ننسى المشكلة ونعامل بعض طبيعي ما كأن صار شي " لين نظرته " بداية كل زواج طبيعي يمر بتصادم اراء .. بس مع الوقت تمشي .. انا اللحين موافق على وظيفتك خذي كل وظايف الدنيا ماراح اعترض .. بس ارجعي البيت
ميهاف : تخدع نفسك .؟ انت في شوي حطيتني في بيت اهلي ونسيتني تماما ! واللحين عشان بابا كلمك وبس ..
بدر : انتي مو شي عادي عشان انساك بهالسهوله .
ميهاف نطقت بقهر : معناها وينك الفترة اللي راحت .؟ ماكان فيه احد يبعدني عنك ولحد ياخذني منك .. بس ابي اسأل ليش جيت من الأول دام ناويها غياب ؟
بدر فتح عيونه بوسعها : غياب !! ( ارتفع صوته ) من اللي انلطع بمجلسكم مرتين ينتظرك تقابليه وكل شوي يقولو ماتبي تشوفك !! من اللي شحذ رضاك وانتي راميته ..... لا وفوقها اراسلك حتى ماتردين ! واللحين صرت انا المقصر ؟
ميهاف : شايف ! هذا انت ماعمرك تحط نفسك غلط .... لازم انت صح صح .. وقت تغلط صعب عليك تكون غلطان ! صعب تترك الناس يعاتبونك على غلطك ..... وانا محتاجة اعاتب الشخص اذا غلط علي ..
بدر : عاتبي بس لاتكذبي ... اجل انا ماهمني ولا حاولت اراضيك ؟
ميهاف : هذا اللي انا شايفه . . ووقت اشوفك زي اللحين يكون لأنك خايف من نظرة الناس لك .. خايف من نظرتك لنفسك انك وحيد في بيت
بدرعض على شفته : مو صح
ميهاف باصرار : إلا صح ! لو اليوم بابا ماكلمك ... كنت حشوفك اساسا ؟!!!!
بدر سند راسه على المرتبة : ......................................
ميهاف هزت راسها : لا ماكنت حشوفك .. بحياتي , انا عارفه ... وانا مقدر ارجع زي اول دون ما أحسني محبوبه لنفسي مو لشي ثاني ..
بدر بتعب : مو عارف شا أقول لك ... بس ميهاف حياتي تعبانة هالفترة بمايكفي .. لاتزيدينها تعب .. ارجعي بيتك انا محتاجك ماعدت طايق نفسي ..
ميهاف : آسفة ....
بدر شد على شفايفه وهو يسند مرفقه على الطاره ويمسح على وجهه : متــى أجل .؟
ميهاف : اســـأل نفسك ..
شد بدر على المحرك بقوه .. وهو يرجع السيارة بسرعة لعند الباب ..: ................
ابتسم ميهاف بسخرية : كنت عارفة أنك مستحيل تتغير بدر .. باسلوبك يابدر تنحب , تحترم , تعشق .. بس كمان تترك ..
بدر ما التفت لها حتى .. ميهاف قررت تنـزل مافيه فايدة من انها تتأمل منه شي , نـزلت وهي تسكر الباب وراها وتدخل .. بينما بدر مجرد ماتسكر الباب حرك سيارته ! وهو يحس بقرف من كلش .... ولا يقدر يسافر حتى بسبب المادية التعبانة ! يكره كلش .. يكره كيف محد يهتم فيه زي أول ... ماعاد مركز اهتمام احد ..
***
في سيارة فـراس .. كان لؤي جمبه : ......... وهذا اللي صار
فراس : وابوك ليش زعلان ؟ فكه منك ونفسيتك الخايسه لو مكانه اشتري لك بدل البيت عشره
لؤي ابتسم دون نفس : فهمه هالشي ..
فراس : عموما انت اشر على البيت اللي تبغى ويحضر لك
لؤي : ادري جالس اثقل عليك .. بس خبرك ابوي للحين ...
قاطعه فراس : تف من فمك افا عليك ! عقب كل هالسنين تقولي كذا .؟ مايجهلك لؤي انت لو تطلب عيوني ماتغلى عليك .. كل اللي ابيه منك تكون مبسوط وبس
لؤي : تســلم .. حلو ان فيه احد في صفي عقب كل هالمهزلة
فراس : انا اتفهمك لؤي , صح .. بس مو اتفق معك وقت تحط هاليأس قاعدة حياتك ووقت تتخبى ورا قرفك على اساس مافيه حاجة بتنفعك .. اليأس شعور مو حالة !
لؤي تنهد : آسكت يارجال انت مو عارف انا وش جالس اعيش .. فلا تفتح المواجع
فراس : وقت يكتب لك ربي الفرح محد راح يمنعه عنك .. معناها ان اللي ماتتسمى مو مكتوبة لك , فارضى بحكم ربك
لؤي : انا رضيت .. بس أبوي .. ابوي مقدر اسامحه !
فراس : لانه ابوك ماتقدر تسامحه .؟
لؤي : لا غلطان .. مقدر اتحمل اعيش مع شخص سطحي وارائة متباينة وماعمره التزم بكملته معي ! خلنا بعيد احسن
فراس : عموما انت كبرت ويحق لك تستقل
لؤي : وانا اقول كذا بعد ..
فراس : أقـــول لؤي .. متى آخر مرة شفت جدي .؟
لؤي قطب حواجبه يحاول يتذكر : زمان والله .. يمكن من رجعت للسعودية المرة اللي فاتت ماشفته
فراس : كويس مو لحالي يعني ... خل نزوره سوا بكره قبل اسافر
لؤي : ليش وانت متى آخر مرة شفته .؟!
فراس : والله مبطي عنه يمكن قبل شهرين .. مع اني مو بالعادة اقطع فيه , واللحين ابوك يقول انه عتبان علي مرة
لؤي فتح عيونه : قبل شهرين .؟! قبل زواجك حتى !!
فراس : آيه تقريبا
لؤي زادت دهشته : يعـــني ماقابلك عقبها لا أنت ولا زوجتك ؟
فراس بنرفزة : وانا شاسوي اذا هو مو بالرياض ولا بالقصيم ! جالس بالنص المشوار لحاله سفر .. اكيد ماحصل لي فرصة
لؤي : وانت شاطر ماسويت زواج محترم عشان يجي ولا غيره .. ولا حتى عطيته خبر ! ياسواد ليلك منه بس
فراس : .. المهم أنت بكرة خلك جاهز تروح معي وبس
لؤي : تمــام ..
فراس : وين ارميك فيه .؟
لؤي : ليش انت وين رايح ؟
فراس : مو يمك بقفل اجتماعات هالأسبوع وعقبها البيت اجهـز اغراضي وانام بدري , وراي مشوره بكره
لؤي : خلاص وقفني هنا راح اخذ تاكسي
وقف فراس : يله في أمـان الله
***
الحـــديقة /
كان الجـو يزداد رواق مع غروب الشمس .. وسوالف البنات المتداولة ..
اسماء : هههههههه عقبها على طول شرت الساعة لي
غادة : تخوف الاشياء اللي تتحقق اول ماتتمنينها .. يمه تحسينها مقلب !
اسماء : بجججد عاد تو قبلها بدقيقة اشوف صورتها اقول نفسي فيها جتني على طول
سجى : عاد تصدقي هالساعة وداد كان نفسها فيها قبل زواجها .. بس ماحصلت
اسماء : احسن عشان ماتصير مثلي !
( دق جـوال اسماء )
كبست عيونها وهي تنتبه للمتصل ( الحب ) .. رفعت راسها للبنات : بنات شوي مكالمة ضرورية وراجعة
وقفت بسرعة وهي تبعد عـــنهم وتدخل البيت وتصعد غرفتها مباشرة وتسكرها عليها بكل سرعتها قبل تتسكر المكالمة ... تحس بلهفة في قلبها وهي تشوف اسمه على الشاشه لأول مرة .. : كيف ارد ! اقول هلا ولا الو ولا كيف !!!
تنحنحت وهي ترد : هـــلآ والله
نبض قلبها زاد وهي تسمع صوته .. أول مرة تستشعر صوته بهالشكل : هلا بك زود .. شلونك ؟!
اسماء تحس دقات قلبها مسموعة .. فعلا تحبه تعشقه بجنون .. : كويســـه ... انت كيفك ؟
هــيثم : تمام .. معليش دقيتي علي ظهر وانا بنص شغله مهمه ماقدرت ارد
اسماء وهي تدوح بالغرفة : لا لا عادي لاتشيل هم ! ( كملت بحياء ) أهم شي انك دقيت ..
هيثم : إيـوه امريني .. وش الموضوع الضروري ؟
اسماء بلعت ريقها .. عشان كذا تبي تقابله تبي تقيس تعابيره وقت تعطيه الخبر ....
هيثم بصوته الهادي : اسمـاء .؟
اسماء بربكة : أيـــوه هلا !
هيثم : ويـنك .؟ تكلمي اسمعك
اسماء قررت تقول اللي بخاطرها وتخلص : أتكلم اكيد .؟ فاضي مو مشغول ..؟
هيثم : لـو مو فاضي مادقيت عليك
اسماء تنهدت : ...... أول حاجة اوعدني ماتزعل وماتنقد ولا غيره ..
هيثم : ليش .؟ مسوية حاجة غلط عشان ازعل ؟
اسماء : يوووه .. لا مو كذا ..
هيثم : اجـل .؟
اسماء : يعـني .... يمكن افكاري ماتعجبك ..( تداركت موقفها ) بس ان شاء الله راح تعجبك !
هيثم : اسمـاء تكلمي .
اسماء بحيرة : ماوعدتنــي .؟
هيثم : ماراح اوعدك شي ! انتي تكلمي اللحين ونتفاهم
اسماء بخوف : يعني يمكن تزعل ..
هيثم : بسكر السماعة والله ! تكلمي
اسماء بلعت ريقها : زين .. زين , شفت اليوم .. لما قلت لك نطلع ..و و .. وأنت رفضت ..
هيثم قطب حواجبه يحاول يفهم قصدها : ......... ايوه ؟
اسماء عضت على شفتها : الصيفية .. مرة بعيدة ! وانا ما حقولك اللحين ..
هيثم قاطعها : بعيــدة ؟
اسماء بقهر : ايه بعيدة مره
هيثم احتفظ بتعليقه لنفسه : ....... ايه .؟
اسماء : فانا أقــــول .. هالفترة .. اقل شي يعني .. ( فتحت الشباك من خنقتها ) نتملك ( كملت بسرعة تشرح ) عشان وقت أقولك خل نطلع مايصير شي غلط واقدر اشوفك و . . . .
قاطعها هيثم : بس لاتكملين .
اسماء حست بانحراج ..نطقت بربكة عقب صمته : ........ هاه وش قلت ؟
هيثم : وش تتوقعين مني أقول ..؟
اسماء : ...... ما أدري .. أي شي ..
هيثم تنهد : دام قلتي اللي بخاطرك آجل خذي اللي بخاطري ! ســؤالك ما أعجبني .. وانه جا منك انتي بالذات سبب لي خيبة للأسف , هه بنت تعرض نفسها .؟ متى صارت هذي .؟ ويوم صارت ماصارت الا معي .؟ يخلف حظي ! حتى لو هذي رغبتك يعني باعتقادك لو انا هالشي بخاطري ماراح اقوله ؟ دام ماقلته معناها ماخططت له معناها ما أعجبني ..
اسماء كل كلمة قالها تصفقها من جهه : ............................
هيثم ما أكتفى كمل : هذا قصـــدك في رسالتك لي عن بنت عمك مدري بنت عمتك وقت قلتي ياحليلهم عادي يتزوجون بالدراسة ( كمل بسخرية ) حاسدتهم ياعمري ؟ ... لا وجالسة تدقيني بالحكي كويس عرفت اللي بخاطرك عشان افهم ! عقدتني لساني صراحة .. مافيني الا اقول ياحسافة هالمكالمة
اسماء انقهرت : ممكن تقول لا مابي اتملك وخلصنا !! ماله داعي انت كمان تدق بالحكي ...فهمت اني اكبر قليلة ادب وحيا شفتها بحياتك !
هيثم : أقول اسمـاء ..؟ خل اعطيك معلومة تشيل هالفكرة من راسك تماما ..
بلعت اسماء ريقها من اسلوبه : ..........................
هيثم : اشياء كثيره فيك ما أعجبتني .. ساكت لأنك بس خطيبتي بس ناوي احطها على الطاولة كلها وقت نتزوج إن شاء الله , فأنا اقول استانسي بحياتك اللحين ولاتستعجلين على شوفتي
اسماء وصلت حدود صبرها : ياسلام !! دام مو عاجبتك ليش خاطبني !!
هيثم بنفور : نعــم ؟!!!
اسماء : أيــوه جاوبني ! دام كلي ما أعجبتك وما أدري ايش ليش تنشب نفسك معي !
هيثم : أولا ماقلت كلك ما اعجبتيني .. قلت اشياء كثيرة فيك ! ولا تسألي سؤال مستفز زي كذا .. حتى لو مقتنع بقراري تشككيني
اسماء عضت على شفتها بقهر : مـثل .؟ وش ما أعجبك .. قول اللحين ليش تأجلها !
هيثم : من عيـوني أقولك ... خل نبدا بالطرحه اللي ما أشوفها على وجهك إلا مع اهلك ! على بالك ماعندي مشكلة اخذ وحده كلن شايف وجهها ؟
اسماء انتبهت فعلا أن ابتسام وغادة ماعمرهن كشفن وجههن .. بس هي وسجى حتى ميهاف ماتسويها : ........... طيب عادي .. مو بس انا نص بنات الرياض كذا مو معناها انهن عيب بالعكس نصهن بنات عوايل
هيثم : ما سألتك عن وضعهن ..وبصراحة نص اللي اشوفهن بهالشكل مغازلجيات ! حتى انتي
اسماء شهقت : انــــــــــــا .؟!!
هيثم : لا يالعاقلة انصدمتي !! واضح قد ايش العالم جالسين يطبلون لك بس انا ماجبت حاجة من كيسي ... نص المستشفى يعرفك ! عشان هالسبب بالذات مستحيل أقولهم اني تزوجت ام عيون زرقاء اللي تجي المستشفى .. بموت مليون مرة قبل اقولها
اسماء : تستحي مني .؟
هيثم : عندك اخوان .. روحي حطيهم بموقفي ! أي رجال عنده غيره ماراح يتشرف بالطريقة اللي جيتي فيها
اسماء عضت على شفتها حتى ادمت : ............................ شكرا
هيثم : زعلتي .؟ تو قلت لك نقطة من بحر
اسماء تذكرت كلام غادة ( هالإنسان بالذات يقدر يكون أكبر كابوس بحياتك ) : ..........................
هيثـم انتبه لدكتور يأشر له من بعيد .. اشر له ثم نطق : انا كلامي خلص ..
اسماء قاطعته : سلام .
سكرت السماعة مباشرة ... وهي ترمي الجوال وتمسك راسها , على بالها اعترفوا لبعض وانخطبوا خلاص ! تعرف الرجاجيل يتملقون فترة الخطبة ... يجاملون ! لا شعوري نزلت دموعـها كانت متحمسه تكلمه وتسجل ذكرى أول مكالمة لهم بس الظاهر أن مافيه حاجة تستاهل تسجل ...
عـــند الحديقة /
مـجرد ماراحت اسماء وغادة تحس الدنيا ضاقت ! اخر شي تبيه تجلس مع سجى لحالهم تنهدت بضيق ( الله يسامحك يا اسماء )
سجى : تصدقي .؟ وقت شفت طقم وداد من زوجها .. ياي مرة يجنن ! فكرت اني اذكر طقم نايف لابتسام وبدر لميهاف بس أنتي ماعمري شفته .... معقـولة ماتلبسيه .؟
غادة هذا اللي كانت خايفة منه وقت يكونو لحالهم على طول يصير الموضوع مضايقات واضحة : امبلا لبسته بس شكلك ما انتبهتي
سجى : بجــد ؟ أجل وريني اياه جايز اكون ناسيه
غادة : مالي خلق اصعد اجيبه
سجى : مالك خلق ولا ماعندك ..؟
عـــند الباب تو فراس دخـل البيت ... دخل للبيت مباشرة وهو ينتبه لأمه وام عبدالمجيد : مـــاشاء الله عمتي هنا ... حيا الله من جانا والله نورتي
وقفت ام عبدالمجيد تسلم عليه : آيــه سافرت وداد وجيت اتسلى مع أمك عاد
ام فراس : اجلس يا امك خذ لك فنجال
فراس : لا يعطيك العافية يمه .. مشغول لراسي بصعد اخلص شغلي وقت يجي وقت العشاء عطوني خبر وبس وبكروه بنام بدري
ام فراس : من عيــوني اجل
صعـد فراس مباشرة .. بعد بدقايق دخلت غادة من القرف واسئلة سجى .. : خالتي وين اسماء .؟
ام فراس : مدري عنها دخلت تركض كانها ملحوقه وصعدت وعقبها مانزلت
غادة : ايوه دق جوالها وراحت تكلم وطولت .. جيت اتفقدها
ام فراس : مدري عنها هالبنت
جلست سجى جمب امها ... ام عبدالمجيد : دقي على اخوك او السواق يجون
ام فراس : وين الله يهداك .. اجلسي تعشي معنا
ام عبدالمجيد : لا والله ماقصرنا .. خلاص لازم ارجع اشوف عيالي بعد
ام فراس : من عيالك عاد ..وداد وتزوجت وسجى معك وعبدالمجيد اعرفه مايقر بالبيت
ام عبدالمجيد : محمد بيزعل اكيد بيرجع جويع ويبي يتعشى
ام فراس : براحتك اجل
دقت سجـى على عبدالمجيد مايرد .... : يمه مايرد
ام عبدالمجيد : اكيد توه برا الشبكة ... المشكله السواق بإجازة , معليش نشوف سواقكم ؟
ام فراس : والله فداك بس سواقنا عقب 10 محد يركب معه خلاص
ام عبدالمجيد : هاو وش هالنظام العجيب .؟
ام فراس : هذي جناية اسماء علينا ... استهبلت هي والسهرات ويرجعها السواق فحط فراس هالنظام
ام عبدالمجيد : مزدي فيها اجل
ام فراس : الله يهديها ماينفع معها الا كذا .. اجل اصبري اشوف لكم فراس , غادة يا أمي فراس تو صعد روحي قولي له
غادة ( يمه متى رجع .. ) : ان شاء الله
ام عبدالمجيد : لا لا فراس ياعمري شكله تعبان ووراه سفر وبينام .. خلاص بدق على لؤي اشوفه
ام فراس : لا افا عليك في بيتنا وتدقين على لؤي ؟! غادة روحي شوفيه
سجى تمنت غادة تتكربع من الدرج وتنكسر ولا تصعد له : ....................
صعدت غادة وهي تطق الباب على غرفته .. جاها صوته : مـــن !
غادة تنحنحت : انا غادة . .
فراس : مفتوح
فتحت الباب وهي تدخل ... كان واقف عند مكتبه ينزل ملفات من الرفوف ويرتبها بشنطة اوراقه رفع عيونه لها : ما شاء الله صرنا نعرف نستأذن قبل ندخل ..
غادة فتحت عيونها : ومتى دخلت اصلن دون استأذن .؟
فراس : امداك تنسين ! المهم اعجلي شتبين .؟
غادة تنحنحت : أمـــك تقول عمتك تبي احد يوصلها بيتها .. وصلها
فراس عقد حواجبه : وولدها وينه ان شاء الله
هزت غادة كتوفها : شعرفني .؟
زفر بضيق : قولي لهم يجهـزون بسرعة .. ( همس بقرف ) كني ناقص بعد !
غادة تو بتطـلع وقفت ... التفتت له بنبرة ناعمة : فراس ..
فراس عقد حواجبه : وش بعد .؟
غادة وهي تلعب بيدينها : بتسافر .؟
فراس : ايه بكرة ان شاء الله
غادة : طيب ... اسماء بكرة طالعه للسوق , و .. وانا زمان عن السوق , معليش اروح معها .؟
فراس : روحي .
غادة فتحت عيونها : جـــــد .؟!
فراس : أهــــون يعني ! قلت لك روحي خلاص
غادة : شكــــرا ... طيب طلب ثاني !
فراس : ياليل غادة مو فاضي لك وربي .. اخلصي انزلي قولي لهم يجهـزون لايروح وقتي اكثر من كذا .
غادة باحباط : بس طلب صغير .. ماحياخذ من وقتك
فراس بنفاذ صبر : وش وضعك انتي ! يعني اصرفك وانتي عارفه اني جالس اصرفك .. مع ذلك ماتتصرفين !
غادة : اوكيه بقول اللي عندي عقبها بتصرف
فراس رمى الأوراق من يده لإنعدام التركيز وهو يسحب شماغه المثني على كرسيه ويحطه على كتفه .. مشى ناحيتها بنفاذ صبر وهو يمسك كتوفها ويلفها ناحية الباب ويمشيها قدامه لحد ماطلعت وسكر الباب وراه : واللحين خليني بس أنزل ماحصلتهم جاهزين !
غادة فتحت عيونها : شنـــو بتنزل اللحين !
فراس وهو ينزل اول درجة : ايه بنزل لي دقيقة من وصيتك
غادة شهقت : كيف اقولهم وانت نازل معي !!
فراس : مب مشكلتي ...
غادة ركضت تــــنزل الدرج قبله .... اول ماوصلت الصالة ماحصلتهم : وينهم !
ام فراس : ام عبدالمجيد الله يهداها ماتبي تأخره قالت بجهز برا على مايجي
تنهدت غادة براحة جت من حظها : حمممممدالله
ام فراس : هههههههههه بسم الله عليك .. شفيك .؟
غادة التفتت لفراس اللي تو نـزل .. ام فراس : هلا يمه .. عمتك وبنتها ينتظرونك برا
فراس طالع غادة : سلمتي هالمرة !
ام فراس : بالقوة حبيبي ... اول ماترجع بيكون العشاء جاهز
طـلع فراس .. مجرد ماطلع انتبه لكلام ام عبدالمجيد وبنتها ...
ام عبدالمجيد : وانتي عيب تقولين لها كذا !
سجى : كيفي قاهرتني ... بس تخيلي طلع صدق شكل فراس ماعطاها طقم لزواجها , يوم سألتها صرفتني ورفضت توريني اياه ... وانا فعلا ماشفته عليها من قبل
ام عبدالمجيد : ولو حنا مالنا علاقة ! كيفهم
سجى : حـلوه مالنا علاقة كيف ....
فراس سكر الباب بصوت عشان ينتبه لوجوده ... ام عبدالمجيد : اعذرنا على الكلافه والله بس ...
فراس : لا كلافة ولا شي .. حياك أي وقت
سجى بحياء : كيفك فـــراس .؟
فراس رماها بنظرة دون يرد ... ركب سيارته مباشرة , سجى استغربت تجاهله ..
كان ساكت طـول الطريق ماعدا من بعض الردود السطحية على ام عبدالمجيد .... بينما سجى كانت تطالعه طول الطريق وتنقهر زيادة تحس حرام كل هذا في غادة ... عزائها الوحيد ان واضح امورهم مو تمام نهائي بشكل واضح
***
صحـى نايف من نومـــته... عقد حواجبه وهو ينتبه انه خذا نومه مشبعه من قلب دون مايحس , سحب جواله وهو يفتح عيونه بوسعها لما انتبه للوقت !! الساعة 10 !! وقف مباشرة وهو يلبس جزمته ويسحب جواله ومفاتيحه ... 34 مكالمة فائته من إبتسام .. 12 مكالمة فائته من ميهاف ... 5 مكالمات فائته من امــه .. مكالمة من لؤي .. 17 مكالمة فائته من أبوه !
المشكلة ان الجوال ماكان مصمت معقول كل هالمكالمات ولا أنتبه ولا صحى .. نـزل تحت للموقف سيارات قليلة الكل طلع ... ركب سيارته وهـو يدق على إبتسام , اشغلته في وجهه .. ركبه الهم من اللحين ! اكيد معصبه ..
دخــل البيت وهو يستعد للأسسسوا ... أنوار البيت طافية تماما والجـو مخيمه الهدوء وقف عند غرفة يزيد وفتحها بهدوء كان نايــم , صعـد لفوق عند غرفة التوأم كــانو نايمين , دخل غرفتـه وكانت هي نفس الشي نايمة ... تنهد بضيق اكيد بتـزعل عقب الشين يطلع معها مشوار ولما طلع ينام ويسحب عليها بهالشكل ! طـلع من الغرفة وهـو ينزل للمطبخ .. سحب له تفاحه من سلة الفاكهه بالطاولة وهو يحس بحيرة .. شالسواه شبعان نوم اللحين وكلهم نايمين .. استلم كاميرته من طاولة الصـالة وهو يفتح لابتوبه , كلم مطعم يوصل له برقــر ويسهر له على كم فــلم .. وش يفيده الهم اللحين ! لاحق بكرة اذا صحت إبتسام تسود عيشته
***
رجــع فراس البيت /
حصل امه واخوانه الصغار انس وياسمين على الطاولة قدام العشاء ينتظرونه .. سحب كرسيه وجلس : فين اسمـاء .؟!
ام فراس : مدري عنها بغرفتها وتقول مابي العشاء ومابي شي
فراس : كويس يعني راح نتعشى بهدوء
ام فراس : الله يهديها .. متى طيارتك يمه .؟
فراس : عصر بس من صبح راح اطلع
ام فراس : ليش .؟
فراس : بطلع مع لؤي لخط القصيم نشوف جدي وراح ارجع قبل العصر الحق على طيارتي
ام فراس : يوه وش هالمشوار كلش .. اترك زيارة جدك لحد ماترجع نزوره كلنا مره وحده
فراس : لا بشوفه قبلها .. من شهرين ماسمع مني شي , دون شي بيكون شايل علي اني تزوجت دون خبر ولا زيارة ولا شي
ام فراس : يؤ ؤي يؤ يؤ يؤ صح ! صدق انك خايب ... الله يعينك
فراس : مب مشكلتي اذا مابفمي طعم الزواج عشان اقوله !
ام فراس : انتي اللي تفلت طعمه بنفسك وانا امك
فراس كمل أكله دون يرد ... بينما سالت ام فراس : كم بتجلس بسفرتك هذي .؟
فراس : على حسب ... بالقليل ثلاث ايام بالكثير اسبوع
أم فراس : رد لي خبر أهم شي
فراس : ان شاء الله
خلص من عشــاه .. صعـد لغرفته بمجرد ما مسك مقبض بابه لأجل يدخل قاطعه صوت رجلينها وهي مسرعة تنـــزل ... : لحـــــــــظة !
فراس همس : اللهم طولك ياروح .. ( التفت لها ) نعـــم .؟
غادة كانت بنفس لبس الزيارة لكن رجلينها حافية نظرا لاستعجالها ودون مكياج .. : بما انك حتسافر لمدة .. وانا مقدر اكلمك مثل ما انت عارف فاحتياط بقول لك كلش اللحين .. لو سمحت أبي ...
تنهد فراس وهو يقاطعها : وين جوالك .؟
غادة كبست بعيونها : شنو ؟
فراس : صقهــى.؟ أقول وين جوالك !
غادة استغربت : فوق
فراس : راح يومي فيك انا ... ( سحب القلم اللي بجيب ثوبه .. سحب معصم يدينها النحيل وهو يكتب على يدها باطرافها الطويلة )
غادة بلعت ريقها وهي تحس بمسكته لمعصمها بيد .. ويده الثانيه يكتب على راحة يدها ونظراته المركزة ... وقف كلش حولها وهي تحس نفسها بتنفجر , مرتين تحس بلمسته اليوم ! مرة بغرفته واللحين .... على عكس كل الجفا والقسوه حوله ....بالمرتين كلها كانت يدينه دافيه .. اليد الوحيد اللي كانت بنفس الدفى كانت يد أبو هيثم الله يرحمه .. زمان ما استشعرت يدين دافيه بهالشكل .. انعتقت من الجو المكهرب وهي تنتبه له يفلت يدها ويرجع قلمه لجيب ثوبه : هذا رقمي مو معناته تزعجيني ! بس مالي خلق استقبل كل طلباتك مره وحده
غادة رفعت يدها وهي تطالع رقمه : ......................
فراس : وأظافر ابليس هذي قصيها !
غادة كبست عيونها .. كانت اظافرها مبروده بشكل مرتب ومطولتها : ان شاء الله .. تـ .. تصبح على خير
دخل فراس وهو ينطق : تلاقي الخير
غادة ضمت يدينها لصدرها وهي تبتسم بوسع .. صعدت ركض لفوق وهي تسحب جوالها من كومة سريرها وتسجل رقمه بشـــوق ... وقفت عند الأسم .. سمته بأسمه دون شي , ثم ضغطت اتصال وهي تدق وعاضه اظفرها بين اسنانها تنتظر رده بشوق ... لكن انقطع الإتصال , كشرت وبعدها بثواني وصلها مسج ( وصل . )
انقهرت يعني مايبي يسمع صوتها ... لكن مايهمها رجعت تطالع يدها وهي تستشعر دفى يدينه , تتمنى ماتغسل يديها وتترك رسمات خطه على يديها على طول ..
***
صحـــت إبتسام لصلاة الفجـر .. استغربت انه مو جمبها , معقولة للحين مارجع بدا يدخلها خوف يكون صاير معه شي .. سحبت روبها وهي تحطه على كتوفها بإهمـال ..تو طلعت جوالها بتدق انتبهت لصوت طفيف تحت .. وقفت عند الدرج وهي تنتبه لظلام ومجرد صوت شاشة التلفزيون .. نـزلت بخطوات هاديه انتبهت له منسدح على الكنبة ويتابع فلمه .. تراجعت بهدوء لفوق وهي تتوعده داخلها ... صلت الفجر ونـامت مباشرة ..
***
الســاعة 8 صباح /
كان لؤي لبس وخلص ... نـزل بعد مكالمة فراس مباشرة وهو يركب معه : وربي الوقت بدري مرة !
فراس : على مانوصل على ما نخلص على مانرجع يادوبني الحق طيارتي
لؤي : يله مشينا ع قولتك عسانا نلحق
حـرك فراس سيارته وهــم يمسكون خط القصـيم .. بعد الطريق الطويل وصــلوا , تنهد لؤي : عطيته خبر انك بتزوره ؟
فراس : اجل شعبالك .؟ بقط وجهي دون موعد !
لؤي هز كتوفه : وانا شعرفني ؟
فراس : يله ندخـل
نـزلوا لمزرعة أبو عبدالرحمن التقليدية .. بالنخيل المتعارف عليه بالقصيم ومناطقها , أبو عبدالرحمن أرمل من سنين وعايش هنا لحاله بهدوء يناسب مرحلته العمريه .. رغم قوته ونشاطه قرر يستريح خلاص
كان جالس بجلسته المعتـادة بمزرعته .. لما انتبه لهم نطق بعصبية : الله لايحييكم
ابتسم لؤي على اسطوانة جده المعتاده .. باس راسه : بالخير ياتاج راسنا
ابو عبدالرحمن : هلا بوليدي .. ( طالع فراس بعصبية ) اما انت ابعد عني يالخايب !!
فراس تربع قدامه وهو يسايس نفسه : آمر .. انا قدامك ومالك الا اللي يرضيك ! وانا غلطان وخايب ع قولتك واعترف
ابوعبدالرحمن ضيق عيونه : كم لي ماشفتك ياقليل الحلا !!!
فراس : وش تبيني أقولك .؟ الشغل متراكم هالفترة لأني نقلت مقر شغلي للرياض .. ويادوبني الحق نفسي
ابو عبدالرحمن : مالك عذر ! المشتهي مايستحي
فراس : افاا هذا وانا فراس .؟
ابو عبدالرحمن : فراس اللي اعرفه مايقطع فيني ! ( كمل بنرفزه ) ووين مرتك ؟ كذا ياخايب زواج فجاه دون شي .. وفوق كل هذا ماتجي تزورني توريني اياها
فراس : بس كذا ..؟ خلاص اعتبره صار راح تزورك
ابو عبدالرحمن : غصب عنك !
فراس : انا لله .. مو غصب عن احد , شفيك ناسي حبة الضغط اجل .؟
لؤي : ههههههههههه وبعدين جدي حنا عزمناك لمحكمة يوم عرسه ليش ماجيت ؟
ابوعبدالرحمن : على آخر عمري احضر اعراس خشاشه بالمحاكم ! سوو عرس زي العالم والناس واجي .. ( التفت لفراس ) تسمي هذا عرس .؟ ليش ما تزوجت زي العالم والناس
فراس : ماله داعي صجة مالي مزاج اعزم احد !
ابوعبدالرحمن : ومتى بتجيني اشوفها ؟
فراس تنهد بضيق : انا مسافر لشغل عصر .. وقت ارجع تزورك من عيوني
ابو عبدالرحمن : ليتني اقدر اصدق !
فراس : افا وانا عمري قلت كلام دون فعل .؟
ابوعبدالرحمن : يله اجل اعجل خلص شغلك تعال اشوفها
فراس : على خيــر ... بس اللحين ناقصنا فطور سوا ونسولف لك عن كلش
لؤي : وبعدين جدي انت مقصر ماجيت حتى تشوف عيال نايف
ابو عبدالرحمن : ماعاد عليكم حلا اجي اشوفكم ! كل واحد متبجح بعمره ويحسب انه ملك زمانه
لؤي : هههههههههههه افا حنا كذا
واستمرت السوالف بين الجد وأحفاده .. والحب القاسي اللي تعود يعطيهم اياه ..

تسلمين على هـ البارت كاتبتنا الجميله…
بداية زعلتني اسماء متهورة جداً في قراراتها وهيثم تركيبته صعبه وماراح يمرر كل شيء تسويه مرور الكرام وانا معاه في سالفة الغطا… صحيح نص تصرفاتها فيها تهور بس من دون قصد اهي من حبها له ودها كل شي يتم بالسرعه بس هاذي الخطوة تجي من الرجال مايصير كل اشوي ناطه له بسالفه ومن دون سالفه واهو جالس يجمع عليها والحساب راح يكون عسير خصوصاً عقليته كأي رجل شرقي غيور على محارمه ومايقبل اي احد يقرر عنه…
فراس وغاده نتمنى تتصلح الأمور وبما انه سمع الملقوفه سجى ان شاءالله قريب بيفرح قلب هالمسكينه بـ هديه…
سجى كل شي تسويه من الغيره وحاقدة على غادة بسبب حبها لـ فراس… الله يشغلها بنفسها بس…
ابتسام ونايف الله يعينك على العقاب ..
بدر وميهاف انا من البدايه ماحبيت ميهاف تصرفاتها موموزونه وتنظر للأمور بسطحيه… صحيح بدر غلطان 100% بس تعطيه فرصه وتحاول تبدأ معه صح…
لؤي ضحكني وله عين يطلب بيت من أبوه مره ثانيه الله يهدي النفوس بس…
كاتبتنا الجميله شكراً لك وربي يسعدك…
و بـ إنتظارك…

تسلمين عزيزتي الكاتبه

اسماء ملح الروايه بجمالها وجمال شخصيتها
غادة انسانه مستفزه لم استطع التعاطف معها
بدر وميهاف نفس الغرور ونفس الشخصيات يتوافقوا بالطبع

ابتسام
الف شكر على تهزيئ فراس ولو ان كنت خايفة ليقلبها على دماغ غادة بس الحمد لله كان عاقد سلام مع العالم شكله
هيثم أسلوبه حقير كالعادة، وده مش معناه ان أسماء بتتصرف صح لكن ماينفعش توجه واحد أو تنصحه بأنك تقوله انت زبالة قوي غير نفسك
دلقتها عليه طبعا سبب كبير في وصلة التهزيئ اللي خدتها
هنشوف هتعمل ايه بعد ما شافت كلام غادة واقع قدامها
فراس وغادة والأمن مستتب وحسن معاملة نوعا ما
يلا بالانتظار وتحياتي