كاتب الموضوع :
ارادة الحياة
المنتدى :
القصص المكتمله من وحي قلم الاعضاء
رد: احبك ذاتي بقلمي / ارادة الحياة .
عجزت اجد عذرا لوصلهم فذبحهم قطع كل طرق وصلي
تناديني اشواقاً بداخلي هلمي فيقول لها صوت افعالهم ابقي بعيدا ولاتتسرعي رضيت بالبعاد لتبقى صورتهم اجمل ويكبر ودهم بعيدا عنهم
(8)
في الدوام المسائي في الجامعة هناك العديد من النماذج البشرية منها الطموح الذي لم يحالفه الوقت ومنهم من فتحت الحياة عينه لضرورة العلم ومنهم من يرى الجامعة مكمل من مكملات الحياة شهادة ليس الا ولان المسائي يجب ان يدفع مبلغ من المال نرى فيها البذخ المادي في اعلى مستوياته لبس اكسسوار اصاحب شركات وسيارات فارهة
بالمختصر استعراض راقي للمكانة المادية
اجلس اراقب البذخ واراقب الصيد والصيادون العجيب ان الفريسة والصياد كلاهما ينصب الشباك او بلاحرى الكل مشروع فريسة والكل مشروع صياد
جلست بقربي من هي على شاكلتي الا يقال الطيور على اشكالها تقع واني وهي وقعنا مع بعضنا بفارق عمر قدره عشر سنوات
قالت بلهجتها السريعة وعيونها التي تتحرك بسرعة حين تتكلم
اكلج هوازن هذا شكد طالع حلو هذا ابو شركة الموبايلات
نظرت بطريقة حذرة الى من تكلمت عليه لكي لا ينتبه لنظراتي
اجبت بهدوء :صدك وسيم وكشخة وشوفي الحلوات داير مدايرة
اجابت بنظرة ذات معنى: بس هو عينه على وحدة بس
اجبتها بعد ان اخذت نفس عميق: هالة فدوة لعينج هاي السالفة لا تعيديها اني ما خلصانة من امي وعمي وانتي تزيدين عليه
اجابت بسرعة :هاي شبيج الرجال مظل وحدة تعرفج و واحد يعرفج ما حجة وياها خوش رجال وضع المادي مريح حتى اخلاقياته
قاطعتها
قائلة :وج يا اخلاقيات ظلت حلوة ما مشة وياها ظلت صغيرة ما ظحك وياها
اجابت مدافعة :شنو صوجه هنة يذبن روحهن عليه
قلت بجدية : وهو مايكول لا
ثم قلت :اكلج هالة ترة انت اكثر وحدة تعرفين شنو بي اني حبيت واحد ونسيت قلبي من نسيته
اجابت :بتلقائيتها المعروفة متشتاقيلة
اجبتها بسؤال: انت تشتاقين لابو اولادج
اجابت بسرعة: اشتاق لايام ساعدتي وياها من كنت ام بيه ما انكر بس قلبي كارهة
اجبتها بمرح هاي اشلون رهمتيها
اجابت بهدوء:هوزان اني لو اعيد قصتي الف مرة محد يصدك الي صار بية وبدون سبب
عايشة عيشة سعيدة رحت ازور اهلي بغير منطقة ظليت يمهم اربعة ايام رجعت لكيت رجلي مزوج بيتي وبغرفتي وبملابسي
طردني من البيت اني وثلاث اطفال بعز ازمة العراق وقت الحصار ما اخذت قشاية من البيت ليش على شنو ما اعرف
اجبتها بمحبة: هو الخسران والله عوضج بخلفتج
اجابت بصدق: هوازن انت صغيرة بعدج
قاطعتها ضاحكة: ياصغيرة ست وثلاثون سنة صغيرة مال شنو
اجابت بمحبة :بعدج مرغوبة بعدها الناس اتخطبج اختاري شخص مناسب الج لا تبقين بلا رجال اني لو ما الاولاد ازوج
ثم اكملت ضاحكة: هو اني طاح بيدي الزواج وما ازوجت تعرفين بالعراق محد يدور وحدة عدها ثلاث اولاد الا اذا متيم بحبها
ثم اكملت ظاحكة: والمتيم ما شفته لا شابة ولا عجوز
ضحكنا سويا لتعليقاتها المحببة
ثم قلت :هالة اني انجرحت وما حجيت وداويت جرحي وجرح اهلي واحس العمر الباقي من حقي اني وبس ما اريد شريك بي اعرف دانيال راح يجي يوم ويدور على ابو ومراح امنعه لان اني من هسة ارتب وضعي لهذا الشي واعرف عمي يزوج ومؤيد يزوج واكيد راح ينشغلون ويجوز يتغيرون وهم اكلج ارتب وضعي اريد اعيش سعيدة وي نفسي
اجابت بهدوء: حياة مثالية تعتقدين تحصليها
اجبت بجدية: حياة واقعية اني ارفض الزواج لذلك لازم اكون متحملة مسؤولية قراري
اجابت بتساؤل :متنقهرين اذا يوم صادفتي ولكيتي مزوج ومكمل حياته وهو مو قف حياتج
اجبت بصدق: الكل يعتقد وكفت حياتي علموده
ماكو واحد يشوف التطور الي اني وصللته لان اتشوفون استمرار حياتي بالزواج وتوقفها بعدم بالزواج
واني الي اجاني من الزواج الي كفاني تدرين من طلع من البيت كنت اتمنى تاركلي رسالة يبرر فعلته ظليت ادور وادور وادور ما لكيت يعني حتى ما اهتم اعرف شنو سبب طلعته ومن وصلت ورقة الطلاق لعمي اتوسلت بعمي لا يصير عصبي ويروحلة بكل برود ويكله اني حامل
اجابت بذهول :يابرود اعصابج اشلون تحملتي
اجبتها بجدية: تدرين كلت لعمو اذا كال ما عليه مو ابني سجلة باسمك بس طلع شريف وكال الي اطلبووا نفقة اي شي بالخدمة
اجابت بلوم: وانتي تنازلتي عن كلشي
اجبتها بصدق: لان ملايين الدنيا كلها مترجع لحظة من عمري كظيتها وياها بخديعة الفلوس تريح ضميرة بس تبقيني على تواصل وياه عمر خفت اموت ويموت دانيال ويجي يوم يكون احد ورثتي وخفت يموت ويموت دانيال واشوف نفسي من ورثته رفضت حتى هاي الصلة الورقية
اجابت بتهكم: وعمج المخبل مشة وياج
اجبتها بصدق: عمي واني اثنين مجروحين وردنة نقطع علاقة ومانرجعها
اجابت بتهكم :وهو هم اشلون دار بال (داربال كلمة عراقية بمعنى اهتم )الكم وقع واتخلص من مسؤوليته وماكلف نفسه يسأل
قلت: خل اكمل الج وازوج قرايبة وطلع خارج العراق
اجابت بذهول :يمة منج وتكليها برود هشكل
اجبتها بصدق: يعني اذا حر كت اعصابي اغير واقع حال كلما اذكر واريد احترك اكول لنفسي هوازن يعني انتي حركتي اعصابج شنو راح تغيرين وكلما افكر هواي بي اروح اصمم فستان او اترجم كتاب او اغير ديكورغرفتي ما اخلي تفكيري بي يسببلي حزن لا اقتل تفكيري بي بتطويري لنفسي
اجابت بتساؤل:وهسة
اجبتها بصدق :نسيته عندي هواي اهتمامات اكثر منه
ثم قالت :ودانيال
قلت باستفسار :شبي داني احلى رجال بحياتي
اجابت: ميذكرج بي
اجبت بصدق: لا يذكرني بنفسي كلما اشوفه احب نفسي واطورها اكثر حتى ميجي يوم يشوفني عالة عليه
اجابت بمحبة: الله يهدي عليج ويكبر ويبر بيج
اجبتها بمحبة :ويهدي اولادج عليج
اخذتنا الاحاديث حتى تفرقت الجموع من حولنا فاسرعنا خلفها لعلنا نلحق على ما تبقى من المحاضرة
مع هالة اكون في حالة من البوح لا تنتهي
******************************
منذ البارحة وانا اتقلب على جمر افتعلت عددة مشاكل بالعمل اتصلت بام مؤيد واخبرتها بعدم رغبتي بالزواج في الوقت الحاضر ووعدتها اني افكر بالموضوع بعد عودة مؤيد واخر قرارتي لهذا اليوم اقفلت المعمل وتركت السيارة حيث تقف بمكان قريب من المعمل وذهبت سيرا على الاقدام الى معرض محمد القاسم استفذت اغلب شحناتي السالبة بالسير سريعا ووصلت الى المعرض وانا منهك القوى استقبلني بحفاوة جلست متعبا وامسكت كوب الماء الذي كان على مكتيه وابتلعته دفعة واحدة
قال بود:الف عافية شبيك قاطع جزيزة
اجبته بهدوء:هو الي عنده اخوتي لو يحصل جزيرة مو يقطعها يهاجر الها ويخلص من ولاية يسكنون بيها
اجاب بلوم: احمد ربك غيرك يتحصر
اجبته بجدية :ابو ياسمين قهروني وقهروا اخوي وخلفته البارحة مؤيد يخابر يتوسل اجي على روحي واروحلهم علمود يقبلون يزوجوا خلود واليوم الصبح مرجعين العمال والشبابيك ويردون غير موديل مو اني مفتح المعمل حتى بس اشتغل الهم وكل هذا واكول ميخالف انكسرت هوازن ما اريد اكسر مؤيد
اجابني بهدوء: كان خلصت السالفة لو مزوجها لابن عمكم بدل الغريب
قاطعته واني اتاكل من الداخل والغضب ينهش نياط قلبي: هو اني لو اعرف صاحبي يطلع نذل اني ما ازوجها لابن عمي عبالي انطيتها للاحسن صاحبي وابن عائلة كلت ذولة طماعين وجاين من طرف ظافر كلت مدبرين سالفة شمعرفني السالفة التعبانة دبرها صاحبي
اجابني بود: هسة انت ماصدكت عوف هاي السالفة اندفنت هسة شنو الجديد
اجبت بوهن: اريد اروح اخطب خلود لمؤيد تجي وياي
بدا الوجوم واضح على ملامحه ثم قال: اني وانت نروح نخطب من ظافر لا هواي راح يوافق روح اخذ من بيت طارق الجاسم وكم واحد من وجهاء المنطقة
اجبت بفخر : انت وياهم
جاب بود: طلعني من السالفةا
اجبته باصرار :بطلت ما اروح
اجاب بحدة :اكلك انت تريد سبب حتى تبطل روح وفضها خل نشوف تاليتها ويلة اروح وياك وامري لله
تنفست الصعداء :وقلت انت عندي مثل سعد الله يرحمه ويطول بعمرك ترة غالي عندي
اجاب بهدوء: الله يعز قدرك ويرحم سعد ربى ونعم ما ربى
ثم قال :شوكت ناوي تروح
اجبت بهدوء :بعد امتحانت اخر السنة
اجاب بدهشة :مو بعد وكت ترتب الوضع من هسة
قلت : اربط نفسي بكلام حتى،ما اتراجع
قطع كلامنا اتصال هاتفي
رحب بالمتصل بود عالي وكان الموضوع استيراد اثاث مكتبي فخم وودع المتصل بقوله ا:دلل ابو خالد وبينة اتصال
قلت باستغراب : من شوكت عندك علاقة بي
اجاب باحراج : من ايام وفاة المرحوم
ونهض يتابع احد الزبائن وبقيت استذكر
النعش الذي توسط غرفة الضيوف الذي يحوي جسدا كانت تدب به الروح قبيل سويعات
كنا نمزح ونتبادل الكلمات المرحة عائلة جمعتها جلسة شاي في عصر يوم شتائي غائم فجأة سقط كوب الشاي وتفرقت الجموع وتجمعت حول شخص واحد نحاول معرفة مابه عيونه بالكاد تفتح ونفسه ضاق ولسانة يردد الشهادة بصوت خافت حملته مع مؤيد واسرعت به للمشفى وهناك كانت الصاعة قالها الدكتور بصراحة انه منتهي ببساطة منتهي يعني غادرت الروح الجسد ووضع في نعش ونترقب اجتماع الاهل لندفن العزيز
يجتمعون حوله وكلهم ينتظرون كعكة الورث يتغامزون ويتلامزون ولم اجد بجواري غير خالد ومحمد القاسم حملو النعش معي ووضع العزيز في مثواه الاخير وكانوا سدا منيعا لصد محاولات الاخوة الاقتضاض علي وعلى عائلة سعد
فاجئني بقوله ا:نت تعرف اذا ابو يعرف بالي سواه ابنه ما يرضة عليه وترة دائما يسأل عليك ويكول قاطع
اجبتها بجد :انت تعرف مخليت بخاطر هوازن هي تصور ابو اذا عرف راح ينظرنة نظرة دونية وبصراحة اني هم ما حبيت نكون بهيج موقف
اجاب بلوم: ضيعتوا حق الولد
اجبته بجد: حقه محفوظ يمنة خالد صفحة وانطوت
اجاب :تدري هسة هو وين وشيشتغل
اجبته بحقد: ولا اريد اعرف راح لا رد شنسة منه خليها بالقلب ابو ياسمين ترة خالد ذبحني وراح
اجاب بهدوء: وضعكم لازم يصلح وانت بهاي السالفة معتبرني غريب خليني ادخل على الاقل اكون طرف صلح طرف يعرف الجد بحفيدة
اجبته بهدوء: انت اخوية مو غريب بس رجال صار اله اكثر من عشر سنوات ماسائل تتوقع يريد اهلة يعرفون عنده ولد
اجاب بهدوء: متعرف ظروف الناس الا تواجههم
اجبت بجدية: واجهته وكال اني مهاجر وما الي رجعة واجهتة وكتلة ليش ازوجتها وانت هاي نيتك ما جاوبني ظل ساكت واجهت وكلتله اتسجل الولد باسمك وبعد معليك قبل وهو ساكت قبل يتخلى عن ابنه صح احنة شرطنا كل شي بس هو ما اعترض ولو بالكذب كنت اتمنى بكل شرط اكوله يكول لا بس هو كان بكل شرط يهز راسه ويكول اي
قاطعني قائل:ا الوقت كان صعب وانت تعرف خالد قراراته متهورة بس هسة
قاطعته قائلا:اقلب ورقة وخلينا بمؤيد رتبلي بعد ناس حتى نسويها جاهة كبيرة بلكي ينحرجون
اجاب بود ادلل
بعض ذكريات الماضي عندما تقتحم الحاضر تصبح هاجسا يوقظ مواجعنا
*****************************
ان القاطعة وهم من يصلوني
في كل ماجرى من نغزات وتصرفات عندما ابتعدت لم اخبر زوجي عن السبب الحقيقي وعندما يسألني يكون الجواب اشعر بالغربة في وسطهم فافضل الابتعاد
وهاي هي اختي كعادتها تاتي لزيارتي ربما لاذنب لها في ما اشعر ولكنها جزء من مشكلة انا بطلتها
اراقبها وهي تتحدث مع بناتي
قالت :هديل اخبارج بالدراسة
اجابت هديل وهاتفها يرافقها وعينها لاتفارقة :الحمد لله تمام
اعادت السؤال بصيغة اخرى: يعني سعياتج متفوقة لو على الحافة
كان جواب هديل ثابت :الحمد لله
ثم قالت : بنت حماي تذكريها
اومائت هديل ببراسها بمعنا نعم
قالت:ماشاء الله تريد تطلع من اللاوائل درجاتها مفولة هاي غير الخطابة الي كل يوم ابن عائلة شكل
اجابت هديل :بلا مبالات خوش بنية حبابة الله يوفقها
قلت بمحاولة قطع سيل الاسئلة :هدولة ماما سويلنة كيكة اشو مشتهية كيكة وخالتج هنا
انصاعت هديل لرغبتي مكرهة
وبدأت باستجوابي
فتحت الاستجواب بقولها : سامر سكر عالي كلشش تعرفين
تفاجئت فسامر اخي الصغير
قلت بتسائل: من شوكت يمعودة ماعدنة احد بعمره صار بي سكر
اجابت بحزن: من النق من اخذها الي هسة تنق براسه
اجبت بلامبلاة: الله يهديها ماعدها عقل
قالت بحذر: متسألين عليه
اجبت باصرار :لا
اجابت بهدوء: متسوة
قلت :بالنسبة الج متسوة لان انت مو صاحبة الموضوع اني تعبت واني ابرر تصرفاتهم تنجمعون وتعزلوني ومن اعتب تكلون منعرف تردين تجين
قاطعتني قائلة: مو انتي اتضوجين من مرة علاء ونعرف متحبين جمعة هي بيها
اجبتها بهدوء: رحم الله والديج وعلاء الابن الكبير للعائلة متستغنون عنه بس عادي تستغنون عني
اشوف بعيني من تسافرون تتفقون ومن واحد يسافر بيهم يخابروج ويدزون عليج واني اخر اهتماماتهم
وحاولت مقاطعتي
ولكن قلت:مو غيرة ولا حسد انت اختهم واني اختهم مشفت واحد خابرني وكلي تعالي راح اسافر تعالي وياي
حاولت المقاطعة
ولكن قلت: ادري نسوانهم يرتاحن الج ومايرتاحن الي وبالتالي هم يرتاحون الج وميرتاحون الي ولاتحجين ادري اني اتحسس وطبعا مو من حقي اتحسس واجبر الناس ترتاح الي
بس بنفس الوقت من حقي ابتعد عن ناس مترتاح الي نسوان الاخوة ميرتاحن الي ويحشن دماغ الخوان والاخوان يصدكون غير علاقة وغير خوة
اجابت بهدوء: انت متعبرين وتاخذين الامور بحساسية
اجبت: اكلج رحمة لاهلج قبل هاي الوضعية لو اضل سنة مااروح ماكو واحد يدك بابي ويكول اشلونج
قاطعتني قائلة: علاء حاول بس انتي ما واصلتي
قلت :وهاي سالفة متنتهي تتحججون عليه ترة بالاخوة ماكو واحد يتحجج على الثاني اكو واحد يحب الثاني
اجابت بهدوء :تعتقدين يعني وياي ما يسون هذا الشي
اجبتها بجد :نسوانهم ميشوفنج ند وانت اتسمعيهن حجي وتتعمدين ادغثيهن الغريب اني الي مااسمعهن حجي ولا يوم جاية مني غثة بقصد وبدون قصد الهن يشوفون تصرفاتي كلها غثة الهن ما اريد ابالغ نسوان اخوتج الغيرة ذابحتهن علاقتي بيهن بلاياها اخوتي اشوفهم اشلونك خوية يكلي هلابيج وانتهت السالفة بدل ما كل يوم مشكلة شكل
اجابت بحذر :انتي من سالفة هديل كطعتي
اجبتها بجد: مراهقة وحاسبتيها مثل متحاسبين وحدة تخون زوجها ما اريد ازعلج كان عمرج خمسة وعشرين من شفتج تحجين وي رجال بالتلفون ما سويت شي كلت اختي تفتهم تعرف تتصرف وما حاسبتج تجين انتي من وراية تحاسبين بنتي والله شنو شفتيها تحاجي ولد بالفيس بوك
اجابت بهدوء: انت تعرفين اني اريد مصلحتها وكان وصلت لغير مواصيل لو ما اني مدخلة
اجبتها بجد :متوصل لان كله حجي فيس لاطالعة وياه ولا شايفته
اجابت نسيتي: شسوت من كانت باللاعدادي ما سوت نفس الشغلة واجت تواعد الولد
اجبتها بحزم :طبعا بهذا كله ما الوم احد غيري ليش كتلج ليش خليتج بالصورة باسرار بيتي
اجابت بتايد: صح المفروض متكلين
اجبتها بقهر: عبالي عندي حبايب يشيلوني من حيل مابية ماتخيلت يجي يوم والحبايب تعير بي
قاطعتني قائلة: لو موهشكل قصدي بس
قاطعتها: ممكن اطلب منج طاب
اجابت :اي ادليلي
قلت: البيت الي كان فاتحلج اسراره ومعتبرج وحدة منه يبقى طول عمره فاتحلج بابه بس تعذريني الشغلات هاي تعتبر شخصية وصفحة وانطوت والعائلة كلها وضعها تغير احنه صرنا ناس تحب ناس ناس قلبها على ناس ولاتزعلين بنت حماج الي ديخطبوها وتريد اطلع معدل الله يوفقها بس احنه ميهمنة نسمع اخبارها
اجابت بهدوء: مو اكلج تتحسسين
اجبت بحدة :وانتي متفهمين الحجي اول ما قررت ابتعد كتلج ما اريد اسمع اخبار اي احد بيهم وماعلي بيهم وانت اجيبين اخبارهم كتلج معليج بناتي اني وياهم نتفاهم هاي الاسئلة الي من جو الي جو
عمري مكنت غبية عنها بس قبل كنت انحرج ارد عليه هسة بصراحة ما اريدج اتسأليها لبناتي
وانتهى الكلام بقدوم هديل محمل بصحن الكيك واكواب الشاي
يجروني جرا للابتعاد عنهم ااصرخ باعلى صوتي اني لا اريد وصلكم سعيدين وبعيدين وسلام بيننا حين القاء هذا يكفي
واقع اخترته وتجربة قررت عيشها الغاية منها راحة ذاتي وتألف افراد اسرتي
لنا لقاء قريب باذن الله
قراءة مفيدة وممتعة اتمنى لكم
|
29-05-16, 05:04 PM
جديد مواضيع قسم القصص المكتمله من وحي قلم الاعضاء
العرض العادي
