في صباح الثلاثاء نزلت وصايف من السياره الهمر السوداء ودخلت للجامعه ..
مشيت وهي تدور بنضرها .. يمكن تشوف البنت اللي تدور عنها .. بس ما شافت شي ..
دخلت للكلاس وجلست عالكرسي وطلعت جوالها تقلب فيه كالعاده ..
جلس سيف جنبها وقال: جم تعطيني ..؟!
انفجعت ولفت عليه بعدين قالت: شتقصد ..؟!
سيف: عرفت كل شي عن ذيج البنيه .. جم تديني ..؟!
وصايف: اللي تبيه المهم شسمها ..؟!
سيف: وعد ..؟!
وصايف: ايه وعد ..
سيف: اممم اسمها اسيل الرملي ..
وصايف: اسيل ..؟!
سيف: ايه وسنه اولى جامعه ..
وصايف: اولى ..؟!
سيف: ايه ..
وصايف: ايه هيه .. ماكو غيرها اكيد هي بنتها .. اكيد هي بنت سميه ..
سيف بإستغراب: سميه ..؟!
وصايف: بس .. بس بنتها ما كان اسمها اسيل .. اسمها سجى ..
سيف: شقاعده تقولين ..؟!
وصايف: يمكن غيرت اسمها ..
سيف: وصـــايف ..
وصايف: ها ..
سيف: شتقصدين بكلامج ..؟!
وصايف: لا .. ولا شي ..
وحطت جوالها في شنطتها وقامت وقالت: هي يت اليوم ..؟!
سيف: لا .. لها اسبوع غايبه ..
وصايف: ليش ..؟!
سيف: ما ادري .. يمكن ضروف ..
وصايف: شهالضروف اللي تخليها تغيب كل هالمده ..؟!
سيف: وانا شاللي يدريني ..؟!
فجلست بقهر عالكرسي وقالت: طيب شتعرف اكثر عنها ..؟!
سيف: اممم اعرف ان لها 3 اخـ......
الدكتور: السلام عليكم ..
الطلاب: وعليكم السلام ..
سيف: خلاص اكمل لج بعد المحاضره ..
لفت وصايف وجهها تطالع في الدكتور وهي حدها مقهوره ..
كان الدكتور في عالم الشرح وهي في عالم التفكير .. كانت تفكر في اسيل وفي اللي سوته امها ..
كان فيه صوت داخلها يقول: اسيل مالها ذنب في اللي سوته امها .. حرام الظلم .. اتركيها في حالها ..
بس وصايف كانت مصره انها تاخذ بحقها وحق امها من اسيل ..
وصايف في نفسها: "لا .. لازم اوريها واواجهها باللي سوتها امها فينا .. هين .. والله ما تفلتوا من ايدي .. والله لأندمكم .. والله لأوريكم" ..
قاعده تهدد في نفسها مع كل ذكرى تمر عليها قد صارت .. قاعده تهدد في اسيل وامها .. الانتقام يجري بدمها ..
سيف: وصايف وين رحتي ..؟!
صحيت وصايف من عالمها وقالت: ها ..
سيف: المحاضره خلصت .. وين كنتي ..؟!
لفت وصايف حواليها وشافت الطلاب يخرجون من الكلاس .. استغربت .. معقوله ساعه ونص وهي سرحانه في عالمها ..
سيف: وصايف انا احاجيج ..
لفت وصايف عليه وبعدين قامت وقالت: جم الساعه ..؟!
سيف: الساعه تسعه وثلث ..
وصايف: عيل بروح البيت ..
سيف: اللحين ..؟! باجي محاضرتين ..
وصايف: مابي احضر شي ..
سيف: طيب لحضه لحضه ..
وصايف: نعم ..
سيف: مو انتي قلتي لو يبت معلومات عن البنت تديني اي شي ابغاه ..
فتنهدت وقالت: جم تبغى ..؟!
سيف: نو نو .. انا ما ابي فلوس ..
وصايف: عيل شنو ..؟!
سيف: ابيج تياوبين عن سؤالين ..
وصايف: واللي هو ..؟!
سيف: اولا انتي ليش جذي ..؟! اقصد انتي ليه مسوده نفسج بذي الملابس ..؟! يعني شقصتج بالضبط ..؟! والسؤال الثاني انتي شتبغين من ذي البنت ومين هي سميه ..؟!
طالعت وصايف فيه وقالت: سوري ..
سيف: لا لا مافي سوري .. انتي وعدتيني انج تديني اللي ابيه وانا ابي اجابه عن هذا السؤال ..
وصايف: وانا راح اخلف الوعد خلاص ..؟!
سيف: لا مو خلاص .. راح تياوبين يعني تياوبين ..
وصايف: سوري .. ما عاش من يغصبني على شي ما ابيه ..
سيف: منافقه ..
وصايف: مين .. انا ..؟!
فهز كتفه وقال: ما ادري مين .. بس سمعت انهم يقولون اللي يخلف الوعد منافق ..
وصايف: قول اللي تبي تقوله بس انا ما راح اخبرك عن شي محد بالدنيا يعرفه غير امي اللي انقتلت ..
سيف بإستغراب: انقتلت ..؟! امج انقتلت ..؟!
فأنتبهت وصايف لكلامها وقالت: لا ما انقتلت .. قصدي ماتت .. غبي ..
وخرجت برى الكلاس وهي تقول في نفسها: "غبي غبي واكبر غبي" ..
ركبت سيارتها وراحت لبيتها ..





================================================== ==================






في الكافتيريا كان سامي وريان جالسين .. يزيد غايب وعماد وصالح في محاضرتهم ودانا في المحاضره كمان ..
ريان: قولي وش هي مخططاتك للاجازه ..؟!
سامي: امممم اولا بأقعد بالبيت وثانيا بأقعد في البيت وثالثا بأقعد جوا البيت ورابعا بأقعد داخل البيت واخر مكان هو بأقعد بوسط البيت .. يعني اجازة اسبوعين تقريبا تقول وين بأروح ..؟! تبيني اروح ازور اهلي مثلكم .. مافي احد ازوره ..
ريان: ههههههههه مسجين .. طيب وعمك ليه ما تزوره ..؟!
سامي: ما اعرف وينه ..
ريان: هههههههه ..
اسند سامي دقنه على ايده وقال بهدوء: سمعت آخر خبر ..
ريان: ايش ..؟!
سامي: بنت عمي ميته ..
ريان بتفاجئ: شنو .. من جد ..
سامي: ايه .. سمعت ابوي يتكلم مع عمي ويقول كيف بنتك .. بعدين قال ماتت .. بعدين قال ضاعت .. بعدين قال قول الصراحه هي ماتت ولا ضاعت .. وبعد فتره طويله قال ابوي بطريقه انه متفاجئ وقال انت تقصد ان زوجـ ... وما كملت الباقي لأن الغوريلا والجحش مرادوه شكني وانا اتنصت ..
ريان: طيب ما سألت ابوك ..؟!
سامي: لا .. ولا ابي اسأله ..
ريان: طيب وش اللي خلاك تتوقع انها ميته ..؟!
سامي: من حجي ابوي ..
ريان: طيب هو قال ماتت وقال ضاعت .. يعني يمكن تكون ضاعت ما ماتت ..
سامي: ريان لا تفتح لي باب التفاؤل وبعدين انصدم ..
ريان: شوف قلبي حاسس انها ما ماتت .. يمكن ضاعت .. انت لا تختار طريج التشاؤم .. ياخي تفائل في حياتك ..
سامي: اخاف من الصدمه ..
ريان: جبان .. دوم جبان من اللي ياي .. اسمع انت ما راح تخسر شي لو سألت عنها .. يعني لو طلعت ضاعت فهذا شي حلو لأنك اكيد بتشوفها .. واذا طلعت ماتت ما راح تحزن لأنك ما تعرفها اصلا .. صح ولا لا ..؟!
سامي: آه ما ادري .. بس اقولك شي وما تضحك ..
ريان: قول ..
سامي: احس اني اعرف بنت عمي من زمان مع اني ما شفتها .. يعني احس اني شفتها وسولفت معها .. اقصد اني احس بأحاسيس غريبه وانها تعرفني كمان .. يعني اقصد انها مجرد احاسيس واشياء احس فيها فاهمني ..؟!
ريان: فاهمك .. والمفروض من ذي الاحاسيس تتأكد انها حيه وما ماتت ..
سامي: اخاف ..
ريان: من شنو تخاف ..؟!
سامي: اخاف ان ذي الاحاسيس تكون من الشيطان عشان يصدمني في النهايه ..
ريان: اووووف .. سامي انت غبي .. كل ما انفتح باب تسكره بتشاؤمك .. اسمع ..
سامي: ها ..
ريان: شسم عمك ..؟!
سامي: ما ادري .. سألت ابوي وضحك علي ..
ريان: من حقه يضحك .. في احد في العالم ما يعرف ايش اسم عمه .. المشكله ما عندك غير هالعم ..
سامي: يوووه خلاص لا تتفلسف ..
ريان: طيب ليه ما حاولت تعرف اسمه .. اقصد طالع في اوراق ابوك .. اكيد اسم عمك مكتوب ..
سامي: ياخي ذا سلطان محمد الراهي .. مستحيل تدخل الجناح حتى .. تبين افتش في اوراقه .. ياخي طييييير ..
ريان: سامي مو انت تحب المغامره ..؟!
سامي: ايه احبها بس ضد الراهي لا ..
ريان: اوووف منك .. طيب حاول تدور عن احد اسم ابوه محمد الراهي .. اذا لقيت فهذا بيكون عمك ..
سامي: ادور فين ..؟! في قطر كلها .. لا اكيد انت مينون ..
ريان: المشكله يقول ابي بنت عمي وابي اشوفها وهو مو راضي يتحرك .. سوداني انت ..؟!
سامي: لا مو سوداني ..
ريان: إلا سوداني لأن السودانين كسولين لآخر حد ..
سامي: اوووف ..
ريان: اوووفين ..
سامي: في ويهك ..
ريان: خلك جذي غبي .. يمكن تكون بنت عمك ضايعه وفي مشكله ومحتاجه مساعده وانت يالس هنا .. واحتمال بعدين تموت بسببك ..
سامي: ها ..
ريان: لا تقول ها .. هذا اللي بيصير اكيد ..
سامي: طيب وينها ..؟!
ريان: وانا شدراني .. بنت عمي ولا بنت عمك .. روح دورلها انت ..
سامي: كيف ادورلها ..؟!
ريان: مالي شغل انا .. كنت بساعدك بس انت شخص كسول وخواف ومتشائم وعشان جذي ما راح اتدخل ..
سامي: ريان بليز لا تكون نذل ..
ريان: ..............................
سامي: خلاص ريان انا ما راح اكون كسول ولا خواف ولا متشائم ..
ريان: من جد ..؟!
سامي: ايه من جد ..
ريان: طيب اسمع .. اول شي لازم تعرف اسم عمك بأي طريجه .. واذا كان صعب فأعرف اسم بنت عمك .. مع ان اسمها يمكن ما يفيدنا ..
سامي: ليش ..؟!
ريان: بما انها ضاعت فهذا يعني انه يمكن احد لقاها .. فأذا لقاها فإما بيوديها لدار الايتام او يربيها .. وهي لمن ضاعت كانت صغيره واكيد ما تعرف اسمها .. فأكيد اللي لقاها سماها اسم ثاني فعشان جذي اقول يمكن اسمها ما يفيدنا ..
سامي: وانت شدراك انها ضاعت وهي صغيره ..؟!
ريان: لأنه مستحيل وحده تضيع وهي كبيره .. واذا ضاعت وهي كبيره فبتكون فاهمه وبتروح عند اي مركز شرطه وتبلغ عن نفسها يا ذكي ..
سامي: ايه صح ..
ريان: فعشان جذي لازم نعرف اسم ابوها وبعدين نــ......
سامي: لحضه عندي سؤال ..
ريان: ايش ..؟!
سامي: اذا كانت صغيره وضاعت ولقاها واحد وسماها بأسم عنده فهذا يعني ان اسمها ماله فايده .. طيب اسم ابوها كمان ماله فايده صح ..؟!
سكت ريان بعدين قال: صح .. كيف راحت ذي عن بالي .. اذا الشخص اللي لقاها ما عرف اسمها فهذا يعني انه ما يعرف اسم ابوها كمان ..
سامي: بسم الله علي اعرف افكر ..
ريان: اول مره تييب شي مفيد ..
سامي: طيب اذا كان اسم ابوها واسمها مالهم فايده فكيف بنلقاها ..؟!
ريان: اممم خلني افكر ........... لقيتها .. انت عندك صوره لها وهي صغيره ..؟!
سامي: ما ادري .. ليش ..؟! الصوره بتكون لطفله واكيد ما نقدر نعرفها وهي كبيره ..
ريان: لابد انه يكون فيه شبه ولو بسيط .. فبندور واذا لقينا بنت تشبهها نسألها جم سؤال ويمكن نقدر نطلع شي يفيدنا .. بس المهم انت تعرف جم عمر بنت عمك ..؟!
سامي: اللي اعرفه انها اصغر مني بسنتين ..
ريان: هذا يعني ان عمرها 19 سنه .. يعني تكون اولى جامعه ..
سامي: طيب يمكن تكون رسبت وهي في ثالث ثانوي ..
ريان: يمكن .. المهم اللحين انك تييب صوره لها بأي طريجه خلاص ..
سامي: اوكي .. بشوف ..
ريان: وانشالله بعدين نفكر في الباجي ..
طالع سامي ورى ريان بعدين قال: ريان ..
ريان: نعم ..
سامي: بقولك شي ..
ريان: وشو ..؟!
سامي: هذا الشي عن اروى ..
ريان: لا بلييز لا تقول شي عنها ..
سامي: بس الموضوع جدي ..
ريان: والله .. طيب وشهو ..؟!
سامي: قبل فتره طلبت انها تقابلني في مطعم .. توقعتها مقابله مثل اي مقابله مع اي بنت بس كانت المقابله غير .. البنت تحبني ..
ريان: ما يبت شي يديد .. كل البنات يقولون لك انهم يحبونك ..
سامي: البنت هذي غير .. البنت لمن كانت تقابلني قبل كانت تدعي انها تحبني .. هي بنفسها اعترفت وقالت انها ما كانت تبغى انها تحبني لأنها تعرف اني لعاب .. تعرف ليش نقلت الترم اللي راح ..؟!
ريان: لا ..
سامي: عشانها تبي تبعد عني لمن حست نفسها بتميل لي ..
ريان: معقوله ..؟! يمكن تضحك عليك ..
سامي: تبجي .. كانت تبجي .. البنت صاجه .. هي بنفسها قالت اني حاولت ابعد بس ما قدرت .. كانت تصيح جدامي وكانت تشهق وتقول بس مو بإيدي اني احبك .. البنت ما كانت تجذب ..
ريان: طيب انت شسويت ..؟!
سامي: قلتلها تبعد عني ..
ريان: معقوله .. مو من عادتك تبعد احد ..
سامي: اذا شفت ان البنت اللي جدامي حبتني ابعدها عني لأني مستحيل احب احد .. فاهم ..؟!
ريان: طيب هي شقالت ..؟!
سامي: رفضت وقالت غصب عني احبك ومو قادره ابعد عنك .. حاولت فيها بس في النهايه قامت من عندي وهي تبجي ..
ريان: تتوقع انها بتسمع الكلام ..؟!
سامي: آآه ما ادري ..
فسكتوا فتره بعدين قال سامي: ريان .. بسألك سؤال يخص بنت عمي ..
ريان: اسأل ..
سامي: افرض اننا بعد كل هالتعب والبحث اكتشفنا انها ميته .. وش بنستفيد ..؟!
عصب ريان وقال: افرض اني اخذت راسك وصكيته في الجدار .. وش بيصير ..؟!
سامي: هههه ما كان قصدي يا ريان ما كان قصدي ..
ريان: غبي ..
وقام فقال سامي: وين وين ..؟!
ريان: الحمام .. تبي تيي وياي ..؟!
سامي: لا شكرا ما ابي ..
ريان: احسن عشان ما تقول افرض ان الحمامات كلها مشغوله وش بتستفيد ..؟!
وراح .. ضحك سامي عليه بعدين فتح جواله يدقق فيه شويه لين يجي ريان ..





================================================== ==================





وقف وائل سيارته قدام الجامعه ونزل واتصل بفارس ..
وائل: فارس وينك ..؟!
فارس: انت ييت ..
وائل: انا جدام باب الجامعه ..
فارس: طيب انتضرني .. اللحين بيي ..
وائل: طيب بسرعه ..
قفل وائل وانتضر فارس .. وبعد فتره جاء ..
فارس: ها تأخرت ..؟!
وائل: يعني .. ياللا ندخل ..
فارس: مستعيل مرره ..
وائل: بلا هذره زايده .. خلنا ندخل ..
فارس: طيب ياللا ..
فدخلوا داخل ولفوا عشان يدورون لآرثر وبعد فتره ..
وائل: اخاف يكون غايب ..
فارس: لا مو غايب .. انا الصباح شفته ..
وائل: حلو .. طيب انت قلي شكله عشان اقدر ادور عليه معاك ..
فارس: واحد شعره اشقر وعينه خضرا وبس ..
وائل: من جد ..؟!
فارس: ايه ..
وائل بهدوء: ليش اسيل كانت تمشي معاه ..؟!
هز فارس كتفه وقال: ما ادري ..
سكت وائل فتره وهو يفكر ..
فارس: هذا هو ..
لف وائل بسرعه على ناحية آرثر اللي كان جالس مع شلته ..
وائل: هذا هو ..؟!
فارس: ايوه ..
فراح وائل عنده وقال: آرثر ..
طالع آرثر فيه وقال: نعم ..
وائل: ابيك شوي ..
استغرب آرثر وقام معاه وبعدوا شوي عن باقي الشله ..
آرثر: اي خدمه ..؟!
وائل: شتعرف عن اسيل ..؟!
آرثر بتفاجئ: اسيل ..؟! انت تعرف اسيل ..؟!
وائل: ايه .. واللي ينبي هو اخوها ..
لف آرثر على فارس وتذكره لمن خرج مع ابوه وراحوا لمستشفى الطب النفسي ..
وائل: اللحين ممكن اعرف وش نوع العلاقه بينك وبينها ..؟!
آرثر: اولا ابي اسأل سؤال .. مين اللي دخل اسيل لمستشفى الميانين ..؟!
تفاجئوا وائل وفارس وقال وائل: وانت شدراك عنها ..؟!
آرثر: لا ترد على سؤالي بسؤال آخر ..
وائل: مو من حقك توجه لي الاسئله .. ياوبني وقول شنوع علاقتك بأسيل ..؟!
آرثر: مين انت عشان تسألني ..؟!
فارس: هذا ولد عمها ..
آرثر: ولد عمها ..؟!
وائل: ايه ولد عمها .. ممكن تياوب على سؤالي ..؟!
سكت آرثر فتره بعدين قال: بعد خمس اسابيع كنت راح ايي واخطبها ..
انصدموا من كلامه وقال وائل: انت .. انت شقاعد تقول ..؟!
آرثر: اللي سمعته ..
مسكه وائل من بلوزته وقال بعصبيه: انت مستوعب اللي قاعد تقوله ..؟! انت واحد حقير .. كيف تفكر انت ..؟! نفسي افهم شلون تجرأت وسويتها ..؟! ياوب يالجلب ..
آرثر: انا ماني فاهم ايش سبب عصبيتك .. بس حبيت ابين لك اني احبها وهي تحبني ..
وائل بصراخ: جــــــــــــذاب .. انت واحد جذاب .. هي ما تحبك .. ما تحبك يالجذاب ..
فارس: وائل اهدأ شفيك ..؟!
وائل: قول الصج ولا تجذب ..
بعد آرثر ايد وائل وقال: لو سمحت انا ما ارضى احد يتهمني بالجذب .. روح اسألها اذا كنت مو مصدقني ..
هز وائل راسه بعدم تصديق وقال: مستحيل .. انت اكيد تجذب علينا .. مستحيل ..
فتذكر وائل كلام اسيل ..
:::::::::::::::::::::::::::::::::::::::::::::::::: ::::::
اسيل: لا تقــــــــــــول حيــــــــــــاتي .. انت اكيد بتسوي سوات آرثر .. اذا كنت مثل آرثر فأنا اكرهــــــــــــك .. تعرف شنو يعني اكرهــــــــــــك .. اكرهــــــــــــك كثر ما اكره آرثر ..
:::::::::::::::::::::::::::::::::::::::::::::::::: ::::::
وائل في نفسه: "هو يحبها وكان بيخطبها .. وهي تقول انها تكره وانفعلت وعصبت لمن سمعت اسمه .. معقوله تكون من جد تحبه وفي احد سحرها عشان تكره .. لا مستحيل .. مستحيل اسيل تحب احد .. مستحيل ومحال" ..
طالع في آرثر وقال: في احد يحبك ..؟! اقصد في بنت ثانيه تحبك غير .. غير "وبالصعوبه" اسيل ..؟!
سكت آرثر بعدين قال: ليش تسأل ..؟! لا تقول اترك اسيل وروح للبنت الثانيه لأني مستحيل اسويها ..
عض وائل على شفته وقال: مستحيل تسويها وتحب غيرها ..؟!
آرثر: ايه ..
وائل: بس انا ما قصدت بسؤالي هذا الشي .. انا اقصد شي ثاني .. فياوبني وقول في بنت ثانيه تحبك ..؟!
آرثر: في بنت بس انا انهيت كل شي بيننا .. بنت خالي اليزا ..
فارس بدهشه: اليزا ..؟! مو هي اللي كسرت ايد اسيل ..؟!
طالع آرثر فيه وقال: ايوه بس انت شدراك ..؟!
فارس: عرفت من اسيل ..
وائل: اليزا كسرت ايد اسيل ..؟!
فارس: ايوه ..
وائل: وش هو السبب ..؟!
فارس: ما قالتلي ..
وائل: عيل ماكو غير اليزا .. اكيد هي ..
فارس: لا ما اتوقع ..
آرثر: شتقصدون ..؟!
فارس: اختي مسحوره يا اخ آرثر ..
آرثر بصدمه: ايــــــــــــش ..؟!
وائل بحقد: مثل ما سمعت واكيد انسحرت بسببك .. روح عند اليزا واسألها وين حطت السحر ..
آرثر: بس اليزا مسافره لها اكثر من اسبوع ..
وائل: واسيل مسحوره لها اسبوع .. اسأل بنت خالك عن مجان السحر .. لأن السحر ما ينفك إلا اذا عرفنا وين مجانه ..
آرثر: مستحيل .. اليزا ..؟!
وائل: ايه اليزا ماكو غيرها .. كله بسبتك .. لو ما قربت من اسيل جان ما صار اللي صار .. مو بعيده انك تكون انت اللي سحرتها ..
آرثر: ما احب احد يتهمني يا استاذ وائل .. انا احب اسيل ومستحيل اسوي جذي ..
وائل بصراخ: لا تقــــــــــــول احبهــــــــــــا .. اكيد ضحكت عليها .. اسيل ماهي غشيمه عشان تحبك انــــــــــــت ..
آرثر: قول اللي تبي تقوله .. انا ما راح اهتم .. باااي ..
وراح وخرج برى الجامعه ..
وائل: جلب .. جلب .. جلب ..
فارس: وائل انت شفيك معصب عالريال ..؟!
وائل: مافي شي ..
فارس: امبلا في شي ..
وائل: لأنه السبب في اللي صار لأسيل ..
فارس: بس هو ماله شغل .. بنت خاله هي السبب ..
وائل: انا تأخرت عن اسيل .. باي ..
فارس: باااي ..
فركب وائل سيارته وراح للفندق وهو يحس بشي انطعن فيه من كلام آرثر .. معقوله يحب اسيل ..

اما عن آرثر كان في سيارته متجه لبيته وماسك جواله يتصل على اليزا ..
وقف السياره قدام البيت وقال: ليش ما ترد ..؟!
اتصل مره ثانيه ودخل للقصر فشاف قدامه امه نازله من الدرج ..
الام: ايش اللي رجعك بدري يا حبيبي ..؟!
طالع آرثر فيها بنضرات حاده وهو ساكت ..
الام: شفيك تطالع فيني جذي ..؟! آه تبي تعرف ليش ما رحت اليوم الجامعه .. اخوك اللي ببطني اذاني وما قدرت اروح للشغل ..
آرثر: يمه كله منك .. ليش اخرتي خطبتي عن اسيل ..؟!
الام: ها ..؟!
آرثر: لو خطبتها جان حطيت حد لإليزا ولتصرفاتها .. لو خطبتها جان اليزا استسلمت للواقع وبعدت عن اسيل ولا تسحرها .. بنت اخوج يا يمه سحرت البنت ..
الام بصدمه: لا اليزا ما تسويها ..
دق آرثر على اليزا للمره الثالثه وهو يقول: الا تسويها ونص .. اللي يخليها تكسر ايد البنت يخليها تسحرها و ........................ اخيرا رديتي يالجلبه ..
اليزا: عزيزي تحدث بالتركي حتى افهمك ..
آرثر بعصبيه: اريد ان افهم لماذا قمتي بسحر البنت .. جاوبي لماذا ..؟!
اليزا بصدمه: ماذا .. انا اسحر اسيل يا آرثر .. هل هذا معقول انك تشك بي ..؟!
آرثر: مالذي ادراك اني اقصد اسيل من كلمة بنت ..؟!
اليزا بإرتباك: ها .. لقد .. لقد توقعت انها اسيل ..
آرثر بعصبيه: اليزا جاوبــــــــــــي وقولــــــــــــي الحقيقــــــــــــه ..
اليزا بعصبيه: انني اقول الحقيقه يا آرثر .. انا لم اقم بسحر اسيل ومستعده ان اذهب للكنيسه واحلف على كتابي المقدس ..
آرثر: لا تحلفي لي بأشياء قذره ومحرمه ..
اليزا: ان ديننا ليس بشي قذر يا آرثر ..
آرثر: بلا قذر ولا تجادليني بهذا ..
اليزا: اتعلم بأنه لو عرف القسيس بما قلته ستعاقب يا آرثر ..
آرثر: اليزا هذا ليس موضوعنا ..
اليزا: لم اسحرها يا آرثر .. ورب من اوجدني انني لم اقم بسحرها ..
آرثر: اذن لما ارتبكتي عندما قلت كيف عرفتي ان الفتاه هي اسيل ..
اليزا: لا شأن لك .. انا مشغولة الآن .. باي باي ..
وقفلت .. قفل آرثر وقال: في شي جذب في كلامها .. الحقيــــــــــــره ..
لف وطالع في امه بعدين طلع فوق لغرفته ..
الام: ياربي .. من يوم طلعت اسيل وطلعت المشاكل من وراها .. ودي اعرف وش المميز فيها ..
نزلت وجلست تطالع في التلفزيون ..





================================================== ==================

كانت ريما تتسوق في المول .. لها اكثر من اسبوعين ما راحت وناقصها اشياء كثيره ..
كانت تتسوق وهي تفكر بأشياء كثيره ومن هذه الاشياء هو موضوع اسيل واللي صار لها ..
دخلت مطعم وجلست تاكل وهي تقول: اسيل وينها اللحين طيب ..؟! آخر شي اتذكره انها دخلت المستشفى ..
سكتت فتره بعدين قالت: يحسبوها مينونه .. احسن ..
حركت الملعقه في الصحن وهي تتذكر شي حصل يوم الاحد اللي فات .. حصل هذا الشي وهي في المستشفى ..
:::::::::::::::::::::::::::::::::::::::::::::::::: ::::::
كانت ريما منسدحه على سريرها وهي حاسه بصداع خفيف يسيطر على راسها ..
رفعت راسها لمن شافت الباب انفتح ودخل شخصين للغرفه ..
ريما في نفسها: "اشاكلهم ماهم عربيين" ..
...........: هااااللو .. كون ايدن ..<< معناته صباح الخير <<
.........2: اهلا آنسه ريما .. انا اسمي مايكل وهذي اسمها اليزا ..
ريما: طيب وبعدين شتبون ..؟!
مايكل: ان الآنسه اليزا هي من تريدك .. تريدك في موضوع يخص من تحبين .. اي يخص آرثر ..
تفاجأت ريما وقالت: آ آر آرثر ..
اليزا: ايفيت .. << اجل <<
مايكل: نحن نعرف انك تحبين آرثر .. وتحبينه جدا .. ونعرف انك اكتشفتي ان اختك اسيل تحبه ايضا وهو يحبها .. ونحن هنا لنساعدك ..
ريما: ماني فاهمه ..
مايكل: انا واليزا اصدقاء لآرثر ونعرف طبائعه جدا .. نعرف انه اذا احب احدا فأنه يخلص فيه حبه .. لكن اذا تغير هذا الشخص فأن آرثر يضطر الى تركه .. وهذا يعني انه بأستطاعتك ان تردي آرثر اليك ..
ريما بدهشه: من جد ..
مايكل: اجل ..
ريما: كيف ..؟!
مايكل: بالسحر يا آنسه ..
انصدمــــــــــــت ريما وقالت: الســـ ـــســ ـحـــر ..
اليزا: ايفيت ..
ريما: مو معقول ..
مايكل: من يحب يجب ان يفعل اي شي من اجل حبيبه .. انه مثل مشهور عندنا .. ان قمتي بسحر اسيل وجعلها تكره وتطلب ابتعاده عنها فسيؤثر هذا فيه .. لأن آرثر لا يحب شخصا لا يحبه .. وبالتأكيد سيتخلى عنها ويبحث عن شخص آخر .. ان الكره في ملعبك فلا تفرطي بها يا آنسه ريما ..
سكتت ريما فتره وهي تفكر فقال مايكل: لم انتي متردده .. الم تقولي انك تحبين آرثر .. ان لم تفعلي شي من اجله فهذا يعني انك كاذبه في اقوالك ..
ريما: لا مو جذابه ..
مايكل: اذن ستفعلين هذا وتسحرينها اليس كذالك ..
ريما: بس بس هذي اختي ..
مايكل: انا لم اقل اسحريها طول عمرها .. بل حتى تتزوجي بآرثر ومن ثم ابعدي السحر .. ولا تقولي هذي اختي .. لو كانت اختك لتركت آرثر من اجل ان تسعدك .. انها ليست اختك ..
سكتت فتره بعدين قالت: اوكي ..
مايكل: رائع .. والآن ارتحت لأن صديقي سيأخذ فتاه تعمل اي شي من اجله ..
ريما: ........................
مايكل: والآن الى اللقاء ..
اليزا: كلي كلي ..<< وداعا <<
وخرجوا ..
:::::::::::::::::::::::::::::::::::::::::::::::::: ::::::
ريما: وها انا سحرتها .. بس الاخ آرثر ما زال متمسك فيها لآخر درجه ..
وسكتت تتذكر كلامه لمن قال انه يحبها وراضي فيها حتى لو كانت مينونه ..
ريما: كلامهم كله خطأ .. آرثر مستحيل يكون لي .. مستحيل .. هو يحب اسيلوه ومتعلق فيها لآخر درجه .. ابي افهم اسيلوه وش سوت له .. ابي افهم ..
قامت وشالت اغراضها وراحت للبيت .. وصلت ودخلت داخل فشافت ام ماجد توها تخرج هي والام من المجلس ..
ام فيصل: ايلسي شوي ليش مستعيله ..؟!
ام ماجد: والله ودي بس تأخرت عن البيت .. اكيد بألقى حرب بين غيدا ومحسن مثل دايم ..
ام فيصل: ههههه سلميلي عليهم ..
ام ماجد: اوكي من عيوني .. مع السلامه ..
ام فيصل: مع السلامه ..
جت بتلف ام ماجد بس تذكرت شي وقالت: ايه صح نسيت .. غيدا قالتلي اسألي عن اسيل ليش غايبه لها مده ..
ام فيصل: ها .. آآه راحت عند عمها ..
ام ماجد: وليش .. الوقت مو مناسب لأنها تزور عمها ..
ام فيصل: هههههه شنسوي .. البنت الصغيره والمدلله ..
ام ماجد: هههه اوكي سلميلي عليها ..
ام فيصل: ان شالله ..
لفت ام ماجد وشافت ريما فقالت: اهلين ريما كيفج ..؟!
ريما: الحمد لله ..
ام ماجد: يقولون انج تعبانه وانا اشوفج ماشالله تمام ..
ريما: يكبرون السالفه اكبر من حجمها ..
ام ماجد: فعلا .. ياللا مع السلامه ..
ريما: باي ..
خرجت ام ماجد وراحت للبيت ..
الام: ريما .. انتي كنتي برى ..؟!
ريما: ايوه ..
استغربت الام بقوه وقالت: مو قبل جم ساعه كنتي فوق وكانت حالتج مبهذله مره وتبجين ..؟! مسرع طلعتي للسوق ..؟!
شالت ريما الاكياس وطلعت فوق وهي تقول: احنا في زمن السرعه يا ماما ..
طالعت الام فيها بإستغراب .. وقفت ريما في نص الدرج ولفت على امها ..
ريما: ماما ..
الام: هلا حبيبتي ..
ريما: وين اسيل ..؟! وايش آخر اخبارها ..؟!
الام: يوووه لازم تذكريني فيها ..
رفعت ريما حواجبها وهي تقول في نفسها: "ابي افهم ليش امي تكرهها .. اللي اعرفه انه مافي ام تكره بنتها .. بديت احس انه فيه شي .. وشي جايد وايد" ..
الام: سمعت انها هربت من المستشفى ..
ريما بصدمه: وشــــــــــــو ..؟!
الام: هربت .. ابي افهم وحده مينونه كيف تقدر تفكر وتهرب .. كيف ..؟!
ريما: هربت ..؟! مستحيل تهرب من حالها .. اكيد هو هربها ..
الام بإستغراب: انتي شتقولين ..؟!
طلعت ريما لغرفتها ورمت الاكياس فوق السرير وجلست على كرسي التسريحه ..
ريما بحزن: اكيد آرثر هربها .. آرثر مستحيل يحب غيرها .. انا مستحيل اخليه يحبني .. يعني خلاص آرثر مو لي .. لا ما اصدق .. انا احبه .. ما اقدر اصدق انه ما يكون لي .. ليش جذي .. اول مره احب .. والله هذي هي اول مره احب فليش ما اتوفق في حبي له ..؟! ليش ..؟!
سمعت صوت داخلها يقول: لانك عاصيه .. مستحيل تتوفقين في حياتج وانتي ساحره البنت .. مستحيل ..
هزت ريما راسها بقوه وفتحت الدرج تاخذ لها حبوب تهدي الصداع اللي بدأ يجي لراسها ..





================================================== ==================





في العصر .. كان سامي في غرفته يفتش فيها ويدور على اي البوم صور لبنت عمه .. دور ودور ومالقى شي ..
جلس عالسرير وقال: آاآه مالقيت شي .. انا متأكد انه كان عندي البوم صوري وانا صغير وكان فيه جم صوره لبنت عمي .. ابي افهم وين طس ..؟!
لف بعيونه في الغرفه عشان يدور مجان ما دور فيه ..
طالع فوق دولاب الملابس وقال: هذا المجان ما دورت فيه .. بس اكيد مافي شي لأني ما اتذكر اني طلعت فوق الدولاب ابدا .. يعني ماكو لزمه اني اتعب نفسي وادور ..
ولف ع الكنبه وقال: ما دورت تحتها لأنه مافي احد يحط شي تحتها .. يعني ماكو لزمه اتعب نفسي وادور ..
انسدح عالسرير وقال: يمكن الوالد المحترم اخذها ..
اخذ جواله وارسل رساله كتب فيها ..
(( دورت في غرفتي ومالقيت ولا شي ابدا .. شسوي .. )) ..
ارسلها لريان وبعد ربع ساعه ارسله ريان ..
(( دور في غرفة ابوك او اسأل ريندا اكيد تعرف شي )) ..
جلس سامي وقال: هذا من صجه ..؟! قال ادور في غرفة ابوي قال .. مع نفسك .. بسأل ريندا احسن ..
قام ونزل تحت يدور على ريندا .. وقف في نص الصاله الآماميه وتنهد ..
سامي: البيت كبير وايد وتعب ادور فيه كله ..
سكت وبعدين نادى بأعلى ماعنده: رينـــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــدااا اااااااااااااااااااااااااااااااااااااااااااااااااا اااا ..
جلس عالكنبه يرتاح وياخذله نفس ..
خرجت ريندا من الجناح الشرقي للقصر وقالت: نعم ..
طالع سامي فيها وقال: وبكل برود تقولين نعم ..
ريندا: لم .. هل تريدني ان اصرخ بأعلى صوتي واقول نعــــــــــــم ..؟!
سامي: يعني تعرفين اني صرخت بأعلى صوتي .. المفروض تييبين لي ماي وياج ..
ريندا: آسفه .. في المره القادمه انشالله ..
سامي: ما علينا هذا مو موضوعنا .. كنت ابي اسألج عن شي ..
ريندا: ماهو ..؟!
سامي: تعرفين وين البوم صوري وانا صغير ..؟!
ريندا: وماذا تريد منها .. هل تريد استعادة ذكريات الطفوله ..؟!
سامي: لا ابدا .. هذا اللي كان ناقص اني اتذكر نفسي وانا صغير ..
ريندا: اذا ماذا تريد من الالبوم ..؟!
سامي: ابي اشوف صور بنت عمي ..
ريندا: لما هل تريد خطبتها يا سيد سامي ..؟! ههههههه ..
سامي: يوووه منج ياريندا .. خليني اخلص كلامي ..
ريندا: اكمل اكمل ..
سامي: لا تقاطعيني بتوقعاتج السخيفه ..
ريندا: حسنا هيا اكمل ..
سامي: ابي صور لبنت عمي عشان اقدر اعرف شكلها عدل ..
ريندا: الم اقل لك من قبل انك تريد خطبتها ..
سامي بنرفزه: رينــــــــــــددددا ..
ريندا: ههههههه آسفه ..
سامي: لا تقاطعيني ..
ريندا: حسنا حسنا ..
سامي: ابي احفظ شكلها واعطي رفيجي ريان نسخه من الصوره ..
ريندا: اها .. رفيقك هو من يريد خطبتها .. يالي من غبيه ..
سامي: ريندا انتي وحده مو معقوله .. سكتي بلييييييييز ..
ريندا: حسنا سأسكت ..
سامي: ان قاطعتيني ماراح اكمل ..
ريندا: حسنا لن اقاطعك ..
سامي: اووووف المهم نبي نحفظ شكلها عشان ندور عليها .. انتي تعرفين ان بنت عمي ضاعت ..؟!
ريندا: لا لا اعلم ..
سامي: بنت عمي ضاعت وانا وريان بندور عنها .. انا ما اعرف شكلها وعشان جذي نبي صوره لها عشان نقدر نعرفها وبعدين ..
وسكت فقالت ريندا: وماذا بعد ..؟!
سامي: ما ادري .. نلقاها وبس ..
ريندا: آها ..
سامي: المهم وين البوم الصور ..؟!
ريندا: وما ادراني ..
سامي: ما تعرفين ..؟! اللحين متعبتني اشرح واشرح وفي الاخير ما تعرفين ..
ريندا: لم يجبرك احد على الشرح ..
سامي: صج صج انج نذله ..
ريندا: لم لا تسأل والدك .. لابد انه يعلم مكانها ..
سامي بضيق: مابي ..
ريندا: انت حر .. سأعود الى عملي .. هل تريد شي مني ..؟!
سامي: لا ..
ريندا: حسنا ..
ورجعت لشغلها .. جلس سامي يفكر بعدين طالع فوق جهة جناح ابوه ..
سامي: اتهور وادخل افتش ولا لا ..
مراد: انصحك انك ما تدخل ..
لف سامي ورى وعصب لمن شافه وقال بعصبيه: وانت شدخلك ..؟! لا تتلقف مره ثانيه .. خلك بعيد عني احسن لك يا مرادوه ..
مراد: شفيك عصبت .. انا قدمت لك نصيحه يا سامي ..
سامي: لو سمحت قول سيد سامي .. انت مجرد مدير منزل وانا من اصحاب هذا المنزل ..
طالع مراد فيه وكتم عصبيته وقال ببرود: ايه صح نسيت ..
سامي: انتبه لا تنسى مره ثانيه عشان لا اوصل هذا الشي لرئيس هذا البيت خلاص ..؟!
مراد ببرود: يصير خير ..
سامي: واضح واضح ..
مراد: شنو اللي واضح ..
سامي: واضح انك معصب وتتصنع البرود ..
تفاجأ مراد وقال: لا انت غلطان يا استاذ ..
سامي: No No مو غلطان ..
ولف سامي وطلع فوق وهو يحس بفرح ان رفع ضغط مراد ..
سامي: بس ما احس اني رفعت ضغطه مره .. احسه عصب شوي وانا ابغاه يعصب بقوووه ..
وقف عند باب جناحه وبعدين لف نضره على جناح ابوه وطالع فيه فتره ..
لف ورى يطالع في الصاله وما شاف مراد .. تردد بعدين تقدم عند الباب ووقف قدامه .. لف مره ثانيه عالصاله وما شاف احد ..
تردد بقوه وحس بخوف .. ومع هذا فتح الباب ودخل وقفل الباب وراه بسرعه ..
سامي: ااووه احس نفسي سويت انجاز ..
طالع في ساعته وقال: باجي ساعتين ويرجع من شغله .. يعني يمديني ادور عن اسم عمي ..
مشي في الصاله واتجه لغرفة النوم فقال: لا ما اضن .. اكيد الاوراق تكون في مكتبه ..
لف على المكتب وفتح الباب ودخل .. طالع في الغرفه وكان فيه مكتب كبير ودولاب مليان اوراق وطاوله صغيره ..
سامي: يمكن تكون في الدولاب ويمكن في المكتب .. بدور في المكتب اول ..
جلس عالكرسي وفتح اول درج وطلع كم ملف وقعد يقلب فيه ..
سامي: اووووف كلام كلام كلام .. اكره القرقره الزايده ..
قلب في الاوراق وكانت اكثرها صفقات واملاك واراضي وشركات في قطر وفي خارج آسيا واشياء كثيره ..
دخل الاوراق في الدرج وفتح الدرج اللي تحته وكان نفس نوعية الاوراق ..
فتح الدرج الثالث وبعدين الرابع وبعدين فتح الدرج الخامس وكان فيه ملف ازرق ..
فتحه وكانت اول ورقه هي شهادة ميلاد ابوه ..
سامي: حلو .. واخيرا شفت اوراق خاصه ..
فتح الورقه اللي بعدها وكانت صوره لبطاقته الشخصيه ورخصه سياقة سياره واشياء ثانيه ..
فتح الاوراق لين وصل لصوره قديمه لكرت العائله الخاصه في سامي وابوه ..
لف الورقه وفتح اللي بعدها وكانت اوراق قديمه مرره .. وكل الاوراق اللي بعدها كانت اوراق قديمه ..
وسط هذي الاوراق كان فيه عقد زواج .. ماكان عقد زواج ابو سامي .. كان عقد زواج عمه ..
اول ما شاف سامي الورقه انبسط وطالع فيها .. جت عينه على اسم الزوجه ..
سامي: اسمها سميـ.......
حس قلبه بيطير من مكانه لمن سمع صوت يقول: لهدرجه وصلت وقاحتك يا سامي ..؟! ما توقعت ..
رفع راسه وشاف ابوه واقف عند باب المكتب ويطالع فيه ..
اول مره يحس سامي برعب ماله مثيل ابدا .. ومن شدة الرعب ماحرك شي من مكانه وعيونه على ابوه ..
جاء الاب واخذ الملف من ايد سامي وقلب فيه وباين عليه انه معصب لآخر حد بس ماسك نفسه ..
رفع الاب راسه وطالع في سامي وقال: انت عمرك ما تجرأت انك تدخل جناحي .. شلون هالمره تدخله وتفتش في اوراقي الخاصه ..؟!
رمى الملف بقوه عالمكتب وقال بحده: اكثر من عشر سنوات وانا خارج قطر وعمرك ما دخلت لجناحي ابدا .. ولمن انا ييت وقررت استقر هنا دخلت للجناح .. ابي افهم ايش المقصود من ذا الشي ..؟! تتحداني مثلا ..
طالع سامي فيه وهو يتمنى ينتهي هذا الامر بسرعه .. جسمه كله يرتجف من داخل من الخوف ..
مشي الاب واخذ له سيجاره من فوق الطاوله وولعها واخذ له كم نفس منها بعدين لف على سامي ..
الاب: ما ياوبت على سؤالي .. انت شتقصد من ذي الحركه ..؟! انك تتحداني لمن تدخل مجان انا مانعك من دخوله ..؟! او انك تبي تثبت لي انك صاير كبير وتقدر تسوي اي شي بدون استئذان ..؟! ياوب ..
لف سامي وجهه وهو مو داري وش يقول او كيف يجاوب ..
الاب بعصبيه: طالع فيني ولا تلف ويهك ..
انفجع سامي ولف وجهه عليه برعب وسكت .. نادرا ابوه يعصب واذا عصب يصير اكبر شيطان عالارض ..
حط الاب يده عالمكتب وقال: ريان ..
طالع سامي فيه بصدمه ..
الاب: ريان هو اللي قالك ادخل غرفة ابوك صح ..؟!
هز سامي راسه بلا من شدة الصدمه ..
الاب بحده: لا تجذب ياسامي ..
طالع سامي في ابوه وهو مو مصدق .. ابوه شدراه بالامر .. كيف عرف .. ابدا مو مصدق ..
الاب: يمدحون دراسة الجامعه في الخارج .. شرايك اسفرك برا تكمل دراستك .. عالأقل تبعد عن شلتك ذي وتعرف شلون تسمع كلام ابوك وتحترمه .. توني ادري اني فعلا مقصر بتربيتك يا سامي ..
سكت سامي ومارد عليه .. لأنه لو رد راح تزداد المشكله اكبر من كذا ..
رفع الاب ايده من فوق المكتب وطالع في سامي وقال: حتندم كثير لأنك دخلت هذا المجان .. حتندم كثير وايد يا سامي ..
وخرج من الغرفه .. حط سامي ايده على وجهه وقال: انت شسويت يا سامي شسويت ..؟! ليه ليــــــــــــه يا سامي ..؟!
سند راسه على ايده وقال: غبي غبي .. ليه جذي .. ليه جذي يا سامي ..؟! ياربي شسوات ..؟! شسوي اللحين ..؟!
قام من المكتب وراح لغرفته بسرعه وقفل الباب وراه ..
وقف عند الباب يطالع في السرير بإستغراب .. جاء عند السرير واخذ جواله وكان مفتوح على رسالة ريان ..
رمى الجوال وجلس عالسرير ودخل في دوامة تفكير ..





================================================== ==================





يوم الاربعاء مر عادي عالابطال ..
اسيل" على نفس حالتها ووائل دايم عندها ويحاول يسوي اي شي عشان تخرج من حالتها بس مافي فايده ..
سامي" ما راح للجامعه ابد ولا رد على اي اتصال ولا قابل ابوه ابدا ..
ريما" باقي لها شوي من الحبوب اللي تاخذها وهي إلى الآن ماهي داريه ايش نوع هذي الحبوب ودايما تفكر في اسيل ..
دانا" في هذا اليوم ما راحت الشغل وتفكر انها تفصل منه عشان ترتاح ..
آرثر" ماراح للجامعه ويحاول يطلع اللي سحر اسيل بس مو قادر ..
ابو فيصل" انجن جنونه وهو يدور على اسيل بس من دون فايده ..
والباقي نفس حالتهم والوضع عادي ..



..:': يوم الاربعاء في العصر :':..
كان طارق في السياره مع اخته سهام راجعين للدوحه بعد ما اخذها عشان يوديها لصاحبتها ..
كانت تسولف وتسولف ومتحمسه بالسواليف وهو ساكت ونادرا يرد عليها بشوي رد ..
صحيح انها حست بالطفش بس في مخها ستين الف سالفه ولازم تقولها له ..
سهام: وعشان جذي قالت انها راح تأدب الفصل ومافي اختبارات تحسين مستوى ابدا ..
طارق: .............................
سهام: اصلا هي حيوانه ولازم هي اللي تتأدب مو احنا .. تخيل انها تغيب كثير ولمن تاخذنا تاخذنا اكثر من حصه وحده .. تضغطنا بالدروس واحنا مانقدر نستوعب كل هذي المعلومات دفعه واحده .. رحنا اشتكينا للمرشده فحطت الغلط فينا وتقول لو انكم تذاكرون اول بأول جان قدرتم تستوعبون بس انتم مهملين و و و وهاك سب وشتم فينا .. اقسم بالله نتمنى اننا ما رحنالها ..
طارق: ...............................
سهام: فاتفقنا نروح للمديره .. تخيل شقالت ..؟! تقول انتم اصلا مايهمكم إلا اصطياد اخطاء المعلمات .. وتقول حتى لو ان المعلمات ما عندهم خطأ تطلعون فيهم ستين خطأ .. خلاص يا طارق احنا انينينا .. اووووف منهم .. كل هذا كوم ولمن غبت الاحد كوم ثاني .. سألتنى ابلة الغياب وقالت ليش غبتي يا سهاموه .. تخيل حتى الابلات يقولون سهاموه .. الله يعينني على هذي الحياه .. المهم قالتلي ليش غبتي فقلت كنت تعبانه .. قالتلي انتي اصلا تعرفين تتعبين .. رفعت ضغطي بذي الكلمه .. ليه انا مو بشر عشان اتعب .. رديت عليها وقلت وانا رافعه حاجبي ايه كنت تعبانه عندج شي .. تنرفزت الابله وقالت جدامي عالاداره .. ولمن شافتني المديره قالت ما كفاج تنفيق كلام عالمعلمات فصرتي ترفعي صوتج عليهم بعد .. وهاك تعهد وتعهد ورى تعهد .. صرت حتى لو احط مناكير يكتبوني تعهد .. حاقدين علي وبقوه ..
طارق: ....................................
سهام: قلت لأمي كل شي فخاصمتني وقالت سهاموه يالجلبه عيب عليج جذي .. احترمي معلماتج لأنهم بحسبت امج .. يخسون يكون بحسبت امي .. هذا اللي كان ناقص .. ما يكفيني ام وحده تقول سهاموه ييون المعلمات بعد .. لا لا يا حبيبي شكرا .. ام وحده تقول سهاموه وحده احسن من ستين ام وستين سهاموه .. المشكله اللحين هي في وكيلة المدرسه .. مره كنت انا وصاحباتـ.......
طارق بصراخ: بــــــــــــــــــــــــس .. قر قر قر .. هنديه انتي ولا شلون .. من يوم دخلتي وانتي فاتحه سلك سوالف .. والله ولا العجايز يسولفون قد ما تسولفين .. ما تعرفين تسكتين .. سالفه ورى سالفه وسالفه ورى سالفه ..
سهام: شفيك عصبت علي انت بعد ..؟!
طارق: مو قادر اركز في الطريج من هذرتج .. الناس يسولفون بس مو مثلج .. الحمد لله اني ادرس بعيد عنج عشان اقدر اذاكر واركز في دراستي ..
سهام: يعني ما اهمك انا ومشاكلي في المدرسه ..؟!
طارق: لو انج بنت مثاليه جان محد قدر يكلمج .. تستاهلين هذا كله من دجتج ومشاغبتج في اسياب المدرسه والحصص ..
سهام: اللحين بعد كل هذا اللي انا قلته ما حنيت علي او حزنت لحالي .. هذا وانا اختك الوحيده يا طارق ..
طارق: بليييز .. باجي ربع ساعه ونوصل .. تقدري تسكتي فيها ..؟!
سهام: اوكي بسكت .. هذا يزاتي اني اونسك في الطريج .. صج ناس ما تستاهل ..
طنشها طارق ومشيوا وبعد ربع ساعه وقف وقال: سهام ..
سهام: نعم ..
طارق: وين بيت رفيجتج ..؟!
سهام: طارق ..؟! شذا السؤال ..؟! اعطيتك العنوان مرتين قبل ..
طارق: الاول كان في جاكيتي وضاع والثاني كتبته في موبايلي واتمسح .. لا تضيعين وقتي وقوليلي وين بيت رفيجتج ..
سهام: آآه منك يا طارق .. امش امش خلني اقولك العنوان ..
فقالتله العنوان وبعد فتره وقف طارق قدام القصر وقال: وصلنا ..
طالعت سهام في القصر وقالت: ان شالله يتحطم هالقصر فوق اصحابه يا رب .. بس اكيد لمن تكون شهد مو مويوده ..
طارق: حرام تدعين على صاحب القصر .. هذا بدل ما تحسين بطيبته انه ترك بنت تشتغل عنده وهي ماكملت دراستها ..
سهام: طيبه ..؟! هههههههه بليز يا طارق لا تضحكني ..
طارق: يمكن يكون عصبي بس له فضل اكيد ..
سهام: هههههههههه اقول انا بنزل قبل لا تنفقع مرارتي من الضحك .. وطبعا بعد العشا تعال خذني عشان يمديك توديني بيتنا ..
طارق: يصير خير .. انزلي بس اخرتيني ..
سهام: بايو يا اخوي ..
ونزلت وراحت عند الباب ودقت الجرس وبعد فتره فتحت وحده ..
الخدامه: نأم ..
سهام: نئامه ترفسج .. ابي ادخل عند شهد ..
الخدامه: استنى شوي ..
سهام: ما راح استنى .. ابي ادخل .. وخري عن طريجي ..
ودخلت .. فلما شافها طارق دخلت حرك السياره وراح ..
سهام: شــــــــــــهــــــــــــد ..
الخدامه: لا تصرخ عشان بابا راشد مافي يزعل ..
سهام: خليه يزعل انا شدخلني .. المهم وين شهد ..؟!
الخدامه: شهد في غرفه حقها ..
سهام: وين غرفتها ..؟!
الخدامه: اول حاجه انت استأذنت من بابا راشد انك تدخل بيت حقه ..
سهام: هيه هيه انا بنت مو ولد عشان تحاجيني اني ولد .. وكمان مين هذا راشد اللي يمنعني انا سهام بنت علي العالي .. ما ولد اللي يمنعني عن شي انا ابيه او شي اتمناه .. وكمان انا ما ييت عشان اشوفه .. انا ييت عشان رفيجتي شهد مو رويشدان ذا .. ولمن اقولج وين غرفة شهد لا تسوين يعنني اعرف اتكلم واتفلسف .. المفروض تقولين وين الغرفه وانتي حاطه لسانج في حلقج ..
الخدامه: بس بس انت قرقر واجد .. ما يعرف يسكت .. اووووف ..
سهام: نعم نعم ..؟! عشنا وشفنا .. شغالات ويتأففون .. اقول احترمي نفسج قبل لا اديج دروس في الاحترام ..
شهد: سهام ..
لفت سهام وشافت شهد واقفه عند باب واحد من المداخل ..
سهام: شهــــــــــــــــــــــــد ..
وراحت لها وحضضضضضضضضضضضضضضضنتها بقووووووووووووووووووووووووووووه من قلب ..
اما شهد فبكت وهي تقول: وحشتيني وايد وايد يا سهام ..
سهام: وانتي اكثر حياتي ..
وبعد فتره من وحشتيني واشتقلتك واشياء معروفه جدا راحوا لغرفة شهد وجلسوا فيها ..
سهام: احسن الله عزاج يا شهد ..
شهد: مشكوره ..
سهام: اسمعي شهد عادي لا تزعلي .. احمدي ربج انه اعطاج اخوان وماخلاج وحدج .. اعرف وحده اهلها كلهم ماتوا وبقيت وحدها .. هذا قضاء وقدر ولازم ما نعترض عليه ..
شهد: اعرف اعرف .. بس امي ماتت بدري .. ماتت واحنا بأمس الحاجه لها ..
سهام: شهد ما يصير جذي تعترضي على قضاء الله .. حالتج وايد احلى من ناس كثير .. اصبري لأنه اكيد بيكون فيه فرج في النهايه ..
شهد: انشالله ..
سهام: طيب امس زرتي اخوانج وشفتي شنو اللي ناقصهم ..؟!
نزلت دموع شهد وبكت ..
سهام بإستغراب: شهد شفيج ..؟! اخوانج فيهم شي ..؟!
هزت كتفها بمادري وهي تبكي ..
سهام: كيف ما ادري ..؟!
شهد: راشد .. راشد قال ممنوع تزورين اهلج ..
سهام بعصبيه: شنــــــــــــــــــــــــو ..؟!
شهد: يقول امج ماتت فمافي روحه هناك ..
قامت سهام وقالت: هذا زودها وايد وايد ولازم اربيه ..
شهد: وش بتسوين ..؟!
سهام: انا اللحين اراويج شنو بسوي ..
شهد بسرعه: سهام لا تكفين ..
سهام: معليش هذا لازم يتأدب ..
شهد وهي تبكي: راح يخاصمني انا ويضربني انا .. بليز سهام لا تسوين شي عشاني ..
جلست سهام بقهر وقال: الجلــــــــــــب ..
شهد: .............................
سهام: طيب كلمي ابوه وقولي له يخليج تزورينهم واكيد بيوافق ..
شهد: راح يوافق بس راشد ماراح يرحمني لأني عصيت اوامره ..
سهام بصراخ قهر: جلــــــــــــــــــــــــــــــــــــــــــــــــ ب آآآآآآآآه ..
شهد: سهام خفضي صوتج ..
سهام: قاهرني قاهرني ..
شهد: بحاول فيه مره ثانيه و ........
دق جوال شهد في هذا الوقت .. اخذت الجوال وشافت رقم غريب ..
شهد: رقم غريب ..
سهام: طيب مين ..؟!
شهد: اقولج رقم غريب وتقولين مين .. صج انج غبيه ..
سهام: يوووه يا شهد ردي ولا تدققين ..
شهد: اخاف ..
سهام: جبانه ..
اخذت الجوال من شهد وردت وقال: نعم خير ..
شهد: بسم الله في احد يرد جذي ..
المتصل: الو .. انتي مين ..؟!
سهام: انت اللي اتصلت فممكن تقول مين ..
المتصل: ابغى شهد ..
سهام: ما راح اعطيك شهد إلا لمن تقول مين انت ..
المتصل: انا شادي ..
سهام: ها .. اخوها ..؟!
شادي: ايه .. ممكن شهد ..
سهام: ايه اكيد ..
اعطتها وقالت: خذي اخوج شادي ..
اخذت شهد الجوال وقامت وقالت: الو هلا حبيبي شادي كيفك وكيف اخوانك .. كيفكم كلكم ..؟!
شادي: مو بخير ..
شهد بدهشه: وليش ..؟! شصار لكم ..؟! شادي شصار ..؟!
شادي: ليه ما ييتي عندنا امس .. كنا ننتضرج عشان نقولج ان صاحب البيت يقول اطلعوا من البيت ..
جلست شهد من الصدمه وقالت: شنو ..؟!
شادي: يقول انا خليتكم تسكنون في البيت عشان امكم بس اللحين انا آسف ما اقدر اخليكم وانا عندي ولد بيتزوج وبحطه في البيت .. قالنا يوم الاحد ابغى البيت فاضي ..
شهد: مو معقوله ..
شادي: حاول عيسى فيه بس ما رضي .. دور لنا عيسى بيت ثاني بس ما لقى .. كلها اسعارها غاليه مرره .. شهد وين نروح ..
رمت شهد الجوال وبكت عالمخده من شده هالمشكله .. استغربت سهام واخذت الجوال ..
سهام: شادي ايش السالفه ..؟!
شادي: <<<< حكالها السالفه <<< ..
سكتت سهام بعدين قالت: خلاص قفل انت وبعدين شهد بتتصل عليكم ..
شادي: طيب ..
قفلت سهام الجوال وقعدت تهدي شهد وتواسيها وبعد عشر دقايق ..
سهام: صدقيني كل هذا اجر عند الله يا شهد ..
شهد: اطيح انا في المشاكل عادي اقدر اتحمل بس اخواني ما اقدر يا سهام ما اقدر ..
سهام: كل مشكله لها حل يا شهد صدقيني .. لابد يكون فيه حل ..
هزت شهد راسها وهي تقول: إلا مشكلتي .. إلا مشكلتي يا سهام مالها حل ..
وبكت فحضنتها سهام وهي تفكر في مشكلتها ..
فتذكرت شي وقالت: شهد .. فيه حل وايد يريحني ويريحج ..
بعدت شهد عنها وقالت: حل ..؟! شنو هو ..؟!
سهام: انا شفت فلم رائع وقدرت اطلع لج حل منه ..
شهد: وش هالحل ..؟!
سهام: اسمعي .. مو صح راشد قالج مافي روحه للبيت ..
شهد: ايه ..
سهام: اسمعي قولي له عندي اغراض كثيره نسيتها هناك وقول للجندي ييبها لي .. فراح يقولج لا روحي انتي .. حاولي ترفضين فأكيد راح يصر انج تروحين .. المهم بعدين تروحين عندهم ..
شهد: بس .. ما يبتي اي حل لمشكلة البيت ..
سهام: انتي ما انتضرتيني لين اخلص كلامي ..
شهد: طيب كملي ..
سهام: المهم بعدين تروحين البيت وتلمين اغراض اخوانج كلهم وحاولي تقللين عدد الجنط ..
شهد: وبعدين ..؟!
سهام: استأجري تاكسي واركبي فيه انتي واخوانج ..
شهد: وين اوديهم ..؟!
سهام: مو انتي عندج مشكلة البيت .. طيب ودي اخوانج لبيت ثاني بدل ذا اللي اخذ البيت منكم ..
شهد: يقول شادي ان الاجارات مرره غاليه ..
سهام: مو لازم تدفعين ..
سكتت شهد تطالع فيها بعدين قالت: معليش يا سهام ماراح اقبل منج ولا شي ..
سهام: ومين قال اني بعطيج ..؟!
شهد بإستغراب: عيل شنو ..؟!
سهام: سكنيهم في بيت من دون ما تدفعي شي ..
شهد: قصدج اني اسرق بيت ..؟! سوري انا مو سراقه ..
سهام: حتى انا مو سراقه عشان اقولج اسرقي ..
شهد: عيل شنو .. لا تيننيني يا سهام بليييز ..
سهام: سكنيهم هنا .. اقصد في قصر رويشدان ..
شهد بصدمه: شنــــــــــــــــــــــــو ..؟؟؟!!
سهام: وش اللي شنو ..؟! انا ما قلت شي غلط .. اخوانج صغار ويحتاجون عنايه وخاصة اختج شادن وفي نفس الوقت ما تقدري تركين الشغل .. اجمعي الاثنين في واحد .. اشتغلي وانتبهيلهم في نفس المجان ..
شهد: انتي مينونه ولا شنو .. هذا راشد ومستحيل يوافق يا سهام ..
سهام: ومين قالج تستأذنين ..؟!
شهد: ايش ..؟!
سهام: اذا استأذنتي اكيد ما بيوافق .. ييبيهم من دون لا يدري ..
شهد: سهام انتي شفيه مخج ضارب .. سهام اكيد انتي مينونه ..
سهام: القصر وايد عود .. ودايما اصحاب القصور ما يلفون قصرهم كله .. يعني مثلا بسألج سؤال .. هذا الجناح خاص بالخدم قد دخله راشد ..؟!
شهد: ابدا ..
سهام: عيل ما يدري شنو اللي داخله ومستحيل يدخله اصلا .. لو يبتي اخوانج هنا ماراح يدري ابدا والخدم انتي قلتيلي انهم يحبونج واكيد بيسترون عليج يا شهد ..
شهد: سهام كلامج مو معقول ..
سهام: معقول ونص .. جناح الخدم فيه باب خلفي يودي عالحوش وبعده للشارع .. تقدري تستأجرين سياره اجره توصل اخوانج يوميا للمدرسه .. صدقيني ما بيدري ولا راح يدري ..
شهد: بس يا سهام ..
سهام: لا تقولي بس .. انتي في مشكله وايد كبيره .. لو يبتيهم هنا راح ترتاحين ومستحيل راشد يكتشف .. واذا حصل واكتشف المصيبه بتكون اهون من ان اخوانج يتشردون في الشارع .. لو رفضتي هذا الحل اكيد اخوانج راح يتشردوا بسبتج يا شهد .. فكري زين ..
سكتت شهد وهي تطالع في سهام ..
سهام: لا تترددي يا شهد وثقي فيني ..
شهد: سهام السالفه صعبه ..
سهام: بس مو اصعب من ذي المشكله صح ..؟!
شهد: .........................
سهام: ياوبيني صح ..؟!
شهد: صح ..
سهام: حلو .. هذي هي شهد اللي اعرفها ..
شهد: مشكوره كثير يا سهام مشكوره ..
سهام: خلاص احرجتيني ..
شهد: هههههههههه ..
وبعد سوالف كثيره وبعد مرور الوقت جت الساعه ثمانيه واتصل طارق على سهام وقالها انا انتضرك ..
سلمت سهام على شهد وودعتها وطلعت معها للصاله عشان توصلها لباب القصر بس راشد كان موجود في الصاله من اول ..
قام راشد وطالع في سهام باستغراب وقال: منو ذي ..؟!
شهد بإرتباك: ا ا هذ هذي ....
سهام: انا سهام يا اخ راشد ..
راشد: انا ما عندي غير اخت وحده فلا تقولين يا اخ فاهمه ..؟! شهد مين ذي ..؟!
شهد: هذي ر رفيجتي سهام ..
راشد: رفيجتج ..؟!
سهام: ايه رفيجتها عندك مانع ..
راشد بعصبيه: جــــــــــــب ولا كلمه .. انا حاجيت شهد ما حاجيتج ..
سهام: تخسى تقولي جب .. ما عاش من يقول لبنت العالي جب .. فاهم ..؟!
شهد: سهام بس ..
راشد: نعم نعم نعم ..
سهام: نعامه نعامه نعامه ترفسك لين يلصق بطنك بظهرك يا رويشدان .. صج انك انسان عمري ما شفت مثله بحياتي .. ان شالله يصبك حادث وتدخل المصحه النفسيه بسببه وبعدها دغري عالقبر يا رب ..
فتح راشد عيونه من العصبيه وقال: لسانج ذا يبيله قص يا بنت العالي .. اطلعي برى بيتي قبل لا اتهور واضربج .. اطلعي بسرعه ..
شهد: خلاص اطلعي يا سهام .. اقسم بالله انج راح تندمي ..
سهام: اسمع .. انا طالعه بس مو عشانك انت طلبت .. لا يا حبيبي عشان رفيجتي شهد اوكي ..
راشد: اقول طلعي برى ولا عاد اشوفج في هالبيت ..
سهام: اوكي انا حأطلع بس قلبي راح يتبرد لمن ييوا ناس ويسكنوا وانت ما تدري ..
راشد: انتي ما تفهمين .. اقولج طلعي برى ..
مسكت اعصابها وقالت ببرود: اوكي بأطلع .. باي يا اخ رويشدان ..
وخرجت وهي تضحك .. تنرفز راشد مره وطاح تهزيء في شهد وتهديد وتحذير و و و .... .... ... الخ ..





================================================== ==================





في صباح يوم الخميس .. الساعه تسعه ونصف صحي فارس من النوم واخذ له دش وجهز نفسه عشان يروح اليوم لأسيل ..
وقف قدام المرايه يطالع في نفسه نضره اخيره بعدين خرج من الغرفه وشاف البيت هادي وشكلهم نايمين .. نزل من الدرج فدق جواله ..
فارس: هلا وائل ..
وائل: كيفك ..؟!
فارس: تمام .. وينك انت ..؟!
وائل وهو يتثائب: توني صاحي من النوم وقلت بأتصل عليك عشان اصحيك ..
فارس: توك صاحي ..؟! مو كأنك امس قلت لي تعال من الساعه تسعه تماما .. وش اللي نومك لين تسعه ونص ..؟!
وائل: لأني نمت امس متأخر ..
فارس: طيب كيف اسيل ..؟!
وائل: لا بأس ..
فارس: يعني مو بخير ..
وائل: لا مو لهدرجه ..
فارس: خلاص انا ياي اللحين عندها ..
وائل: اوكي سي يو ..
فارس: باي ..
قفل فارس الجوال ونزل من الدرج فسمع ابوه يناديه ..
لف وشاف ابوه واقف اعلى الدرج ..
فارس: هلا يبه ..
الاب: وين رايح في هالوقت ..؟!
فارس: بروح عند رفيجي اذاكر ..
الاب: آخر واحد توقعته يجذب علي هو انت يا فارس ..
فارس بحذر: شتقصد ..؟!
الاب: انت تعرف اني ما انام الليل ولا ارتاح من كثر ما ادور على اسيل وفي النهايه تكون انت .. تكون انت يا فارس مخبيها ومتعبني ادور عليها .. ما توقعتك جذي يا فارس ..
طالع فارس فيه بعدين قال: ........................................... ..


لهنا خلص البارت الخامس والحمد لله .. المهم ان شالله اقابلكم في البارت السادس الجزء الاول .. واللحين ممكن تجاوبون على هالاسئله ..
+ ريما .. بدا اللحين ادمانها عالمخدرات من جد .. وكمان كانت هي اللي سحرت اسيل من بعد تحريض اليزا .. هل راح تفك السحر بنفسها او احد يجبرها ..؟!
++ مصعب جيران اسيل مجننهم مرره .. تتوقعون انا جبته كذا او عندي سبب ..؟!
+++ شفتم اللي صار لدانا من نايف .. تتوقعون بعد هذا راح تشتغل ولا بتبطل ..؟!
++++ عرفت وصايف طريق لبنت الحرمه اللي سببت لها ماضي موحش .. وتقول انها راح تصارح اسيل باللي سوته بأمها .. ايش تتوقعون ..؟!
+++++ سامي بدأ خطوة البحث عن بنت عمه .. وفي بداية البحث كشفه ابوه ووعده انه راح يخليه يكمل دراسته برى .. وش تتوقعون ..؟!
++++++ شهد وسهام .. هل بالفعل شهد راح تسويها وتجيب اخوانها يعيشون عندها .. واذا جابتهم هل راح يكشفهم راشد اللي ما يخفى عليه شي ..؟!
+++++++ الاب عرف ان اسيل عند فارس .. وش بيصير ..؟!
اعرف اني كثرت الاسئله بس مافي مشكله .. ابيكم تتعبوا وانتم تقرون .. ههههه اشوفكم في الجزء الاول ..
مع تحيات اختكم / صـ‎رخـ‎ة الـ‏‎مـ‎شـ‎تـاقـ‎ه .......
|$[ نهاية البآرت ]$|