كاتب الموضوع :
غنادير الشقى
المنتدى :
ارشيف خاص بالقصص غير المكتمله
الجــــزء الثامــــن عشــــر"
اللقاء المرتقب <
وصل عناد وقعد عالكرسي: اشلونج يابنت اخوي
حور : ماظن يهمك ادخل بالموضوع شالمطلوب
عناد: هههه يكون احسن
حور : ادخل بالموضوع شالمطلوب وتبعد عن خالتي سعاد وبناتها
عناد : تسكنين عندي مده انا احددها
حور : اشكثر المده
عناد : للحين ماحددت بعد اسبوع تسكنين عندي
حور وقفت : بعد الاسبوع الوعد بس خذها مني شي يغضب الله ماني مسويته وانت عارف قصدي لاتحسب اني سلعه رخيصه بتاجر فيها اظنك فهمت
مشت وخلته
وقلبها يعتصر من القهر كانت تمشي بسرعه عشان توصل لسيارتها وعيونها بدت اتغرغر بالدموع"
في نفس المكان"
نايف كان قاعد ينتظر سعود وشاف حور وعمها عناد وكان وضح الخبث في عيون عناد وواضح العصبيه بردت فعل حور وبالاخص انهم ماطولوا بالقعده حتى ماطلبوا شي يشربونه "
سعود وصل : السلام عليكم
نايف : وعليكم السلام
وينك ابطيت
سعود : ابد خلصتلي كم شغله وجيت
نايف : ليتك استعجلت شوي
سعود مستغرب: وش عندك
نايف : وانت جاي ماشفت احد
سعود : انت اشعندك اتكلم بالقطار من اشوف
نايف : اسمع قبل لاتجي بدقايق كانت حور قاعده ومعها عناد وكأن فيه شي يخطط له عناد الخبث امبين في عيونه
سعود عقد حواجبه : قاعده معا عناد اشعندها هذي انهبلت جايه للموت برجولها طيب سمعت شقالوا
نايف : لاماسمعت بس اللي شفته عناد كان يبتسم بخبث وحور واضحه العصبيه عليها
سعود تنهد : اكيد مصيبه جديده جايبها مااقول إلا الله يعين هالبنت عليه
من القهر والضيقه ماحست بنفسها إلا وهي واقفه قدام المقبره وقفت سيارتها تذكرت حديث الرسول صلى الله عليه وسلم عن زوارات القبور وماقدرت تنزل تزور قبور اهلها "
حطت راسها على السكان واعلنت دموعها مجراها دموع القهر والحزن والضعف والخوف من المجهول"
تمنت لو كان ابوها عايش ويحميها من نوايا عمها تمنت لو كانت امها عايشه تاخذها بحضنها وتشكيلها "
تمنت وجود جدتها معاها اللي تفهمها من عيونها ووجودها بحد ذاته يمدها بالقوه "
تعبت وهي تكتم وتحط بقلبها تعبت وهي تضحك والحزن ذابحها وتعبت من المسووليه وتعبت وتعبت وووو ..... "؟
سمعت دق خفيف على الدريشه رجعها لواقعها"
رفعت عينها المليانه دموع : لاااا مو وقته يشوفني وانا بهالحال
خذت نفس ومسحت دموعها نزلت الدريشه :
بندر بنفعال : عسى ماشر حور صاير شي
حور اتحاول تكون طبيعيه : هلا اخوي بندر
ابد سلامتك مافيه شي
بندر : ليه جايه المقبره
حور نزلت راسها : ابد مافيه شي بس اشتقت لامي وابوي وجدتي وماحسيت بنفسي إلا وانا جايه اهني
بندر كسرت خاطره : رحمة الله عليهم وانا اخوج هذا طريق كلنا ماشينه وهذي حكمه الله
حور : ونعم بالله جزاك الله خير يلا انا استأذن
بندر : خليني اوصلج شكلج تعبانه ولانتي قادره تسوقين
حور : لالا مايحتاج مافيني شي بس اذا ممكن اطلبك طلب
بندر : ابشري وانا اخوج
امري
حور : مايامر عليك ظالم بس مابغيت احد يعرف انك شفتني اليوم بالذات منايل
بندر احترم رغبتها وماحب يكثر اسأله عليها : مايحتاج توصين
حور بنبرة حزن: يلا انا استاذن مع السلامه
بندر : بحفظ الله
شغلت حور سيارتها ورجعت للبيت اما بندر دخل المقبره يزور قبر امه وابوه وفي راسه يدور ألف سؤال وسؤال ماقتنع بعذر حور وكان متأكد ان فيه سبب ثاني غير السبب اللي قالته "
حور بعد مااطلقت العنان لدموعها حست بشوية راحه تنفست بعمق خذت تلفونها دقت على منار"
منار : هلا حوره
حور : هلا منور شخبارج
منار: تمام وانتي
حور : الحمدالله شوفي حبيبتي تجهزي انتي وخلودي
بنروح مشوار
منار: وين
حور : بعدين تعرفين
منار : بيطلعون ويانا البنات نرجوسه ومنوله
حور تنرفزت : اوف تحقيق لا بس حنا ولاتقولين لخالتي سعاد شي انا بكلمها
منار باستغراب : خلاص إن شاء الله لاتعصبين
حور : يلا سلام
منار : سلام
دقت حور على الخاله سعاد قالت لها انها بتروح ويا منار وخالد للعم مصطفى عازمهم
ووافقت سعاد بس قالتلهم لاتأخرون"
بيت الجده هيا"
دخل بندر ولقى جدته والعنود ونوير قاعدين بالصاله يتقهون
بندر بابتسامه :مساكم الله بالخير
الكل : مسا النور
الجده هيا: هلا ومرحبا بنور البيت ياعسى عيني ماتخلى من شوفتك
بندر قعد جمب جدته بعد ماحب راسها: ولا اخلا من شوفتج ياراس المال
نوير : أي والله الكلام الزين لبندر اما حنا لنا الكد والكرف لاوبعد مايعجبكم
الجده : انطمي انطمي اللي يشوفج يقول قايمه ببيوت المنطقه كلها وبعدين اتسمين غسيل شويت الملابس وخم البيت شغل حنا قبل الوحده منا اتحوف البيت والغنم والبقر حتى
العنود تقاطعها : يمه مايحتاج تكملين حفظنا هالسالفه من كثر ماتقولينها
نوير : تصدقين يمه لو احسب يمكن قايله هالسالفه الف مره
الجده هيا حذفتهم بالفناجيل بس مالمسهم شي انحاشوا للحوش
الجده هيا معصبه : نعنبوا الخشه الشينه انتي وياها ماعليه دواكم عندي لسنتكم طالت(خشه=وجهه)
بندر فاطس من الضحك : هههههههه وسعي خاطرج يالغاليه مهوبقصدهم
الجده: إلا قصدهم قليلات الحيا لكن ماعلين انا اعلمهم ان ماخليت الخيزرانه ترقص على جلدهم ماني هويا بنت متعب
بندر يمسك نفسه: ونعم يابنت متعب بس هم يضحكون يمه ماعليج منهم انتي راس المال سامحيهم
الجده صاده عنه وتقهوا
بندر يغير السالفه : اقول يمه منايل وينها هي مانزلت اليوم
الجده مالها خلق لمنايل: قصدك الاميره لامانزلت الظاهر خايفه لحد ياكلها صاكه عليها في هالغرفه طرشت عليها البنات كم مره اتجي اتقهوا معنا لكن ماعبرتنا ولاعطتنا وجهه
بندر عصب وقام : خير إن شاء الله
فتحت باب الغرفه بقوه "
منايل ماهتمت له منبطحه عالسرير وقدامها الابتوب
بندر زادت عصبيته : ماشاءالله مرتزه بالغرفه ولاهامج شي
منايل طالعته ببرود : والله ماعرفنا لكم إن نزلنا ماعجبكم وان قعدنا ماعجبكم
بندر معصب : من اللي جايب هالزفت اللي قدامج
منايل بنفس البرود: أي زفت
بندر نرفزه برودها بزياده : لاتستهبلين الابتوب هذا من وين
منايل ببرود: هذا لابتوبي قلت لماماتي ادزه لي ويا السايق خلص تحقيقك وإلا بعد
بندر عصب وسحب الابتوب منها : هذا الشي تنسينه الابتوب والخرابيط مو عندي فاهمه
منايل نزلت من السرير معصبه : عطني لابتوبي مالك شغل فيه ابوي شاريلي ياه لاصرت انت اللي دافع فلوسه تكلمي
بندر : لاترددين لاتخليني اكسره على راسج فاهمه
منايل : لامو فاهمه ومالك شغل باشيائي الخاصه وعطني الابتوب قبل لادق على ابوي واعلمه
بندر : انتي اتهدديني يعني وريني اشبتسوين
منايل طلعت تلفونها من الكبت : الحين ادق على ابوي يشوف شغله وياك
بندر سحب التلفون من ايدها وحذفه على الطوفه بقوه خلاه ينكسر نصين
منايل انقهر : ياحقير يامنحط اصلا مافيك ذرت رجوله لو انك رجال ماتزوجت وحده عايفتك
بندر ماتحمل الكلام حذف الابتوب عالارض ومسكها من كتوفها يهزها بقوه وعينه من العصبيه شرار احمر : من الحقير والمنحط تكلمي
منايل خافت من عصبيته : هدني اقولك هدني
دخلت الجده والبنات
الجده مسكت بندر : تعوذ من بليس ياولدي هدها
العنود ونوير يحاولون يفلتون منايل منه بس ماقدر
بندر صرخ : اطلعــــوا برى خلوني اادبها
الجده تهديه : عشاني ياولدي تعوذ من بليس وهدها
بندر من العصبيه ماعاد يشوف : ماني بهادها والله لادبها من جديد والله لاعلمها السنع
اطلعوا بــــرى
منايل تبكي وحالتها حاله : وخر عني وخر
والله لاعلم ابوي
بندر جن جنونه زياده: وبعد اتهددين انطمي مابي اسمع حســــج تسمعين وإلا لا
العنود : خلاص يابندر فديتك بتسمع هدها خلاص تكفى
الجده تحب كتفه: طالبتك ياولدي طلبه هدها خلاص سامحها ماعادهي بعايدتها
بندر انقهر من جدته وهي اترجاه يكره احد يترجاه وشلون لاصارت جدته هي اللي تطلبه واترجاه ضغط على كتوف منايل اكثر ودزها ومن قوة دزته طاحت على الارض هي والعنود ونوير اللي كانو ماسكينها"
بندر : شوفي هالمره هديتج عشان خاطر امي لكن ان عدتيها بتشوفين اللي مابعد شفتيه
منايل كانت طايحه على الارض وماسكه كتفها والعنود ونوير ماسكينها
بندر قبل لايطلع من الغرفه : لاتطلع من الغرفه ولا اشوفها نازله او ماسكه تلفون البيت وان اطلعت من الغرفه والله مايحصل لها خير
الجده عشان يهدا : ابشر
ابشر باللي تامر فيه
اول ماطلع من الغرفه منايل قعدت تسب وتلعن فيه : الله ياخذه الحيوان هين ان ماعلمت ابوي حسباله ماوراي ظهر مسوي فيها رجال يستقوي علي
الجده عصبه : شوفي عويذ الله من شرج ولاعاد تدعين على ولدي
منايل مقهوره وتبكي: لا والله ماشفتي إشسوى فيني وإلا عاجبج
الجده : ولدي مايعصب إلا من شي وانتي اكيد قايله شي
منايل : اي خلاص انا الغلطانه وانا اللي بغيت اكسر ايده ولدج ابد ملاك مايغلط ولا يسوي شي
الجده قامت عشان تطلع : ماقول إلا الله يهديج يلا يابنات اطلعوا خلوها براحتها
منار وخالد مصدومين : حــــور شتقولين
حور بهدوء : اللي سمعتوه انا لازم اروح اقعد عند عمي
منار : زين ليش فهمينا شالسبب بتروحين للموت برجولج
حور : روحتي هذي ضروريه لازم ابعد عن بيت خالتي سعاد عشان مايلحقها ضرر
منار منفعله : ضرر شنو فهمينا
حور : اوكي انا بفهمكم لكن الكلام اللي بقوله مابي اي مخلوق يعرفه
منار وخالد : طيب
حور : عناد يبي يضر خالتي سعاد وبناتها عشانها ضامتنا عندها ببيتها وواقفه بوجهه وعشان يبعد عنهم بيكون الثمن نسكن عنده وانا وافقت مابي اي ضرر يلحق خالتي سعاد وبناتها مابي يصير فيهم شي بسببنا
خالد : خلاص حنا بعد روح وياج مستحيل تعيشين انتي في مكان وحنا في مكان
حور بخوف : لا انتوا لا بيت عناد مافيه امان وانا خايفه عليكم وبعدين نسيتوا ان المدارس بعد اسبوع
منار : شوفي رجلنا على رجلج لوبتروحين للموت بروح وياج ماراح يفرقنا إلا الموت
حور : بس بيت عناد لا
خالد : لابس ولاشي نسيتي وصية جدتي نسيتي اشقالت نسيتي كلمتها يوم تقولنا لاتفرقون وجودكم مع بعض يزيدكم قوه
حور : لامانسيت بس انا خايفه عليكم
خالد : لاتخافين علينا الله الحافظ
حور : ونعم بالله
منار مسكت ايد حور : دام انتي معانا ماعلينا خوف
حور : وشلون على مدارسكم
منار : حتى انتي شلون على كليتج
حور : انا عادي الكورس هذا ماني مداومه بداوم الكورس الجاي
منار : مو مشكله انتي ودينا وجيبينا
حور : اصلا سيارتي بخليها عند خالتي سعاد حتى كروت البنك بنخليها عشان اذا كانت خطته ياخذنا نعيش عنده عشان يستفيد من معاش ابوي مايحصل شي واذا سألنا عن معاشه نقول تروح بديون ابوي
خالد : خلاص نستأجر سايق
حور سكتت بعدين جات ابالها شخص : خلاص لقيتها انحلت إن شاء الله بكلم العم مصطفى وبقوله وماراح يقصر معانا وبعدين هو الوحيد اللي اظمنه
منار : الحين جينا للمصيبه الكبيره خالتي سعاد شلون بنوصل لها الخبر اكيد
بترفض وماراح تسمح بأي نقاش بهالموضوع
حور تنهدت : آه ياخالتي سعاد كاسره ظهري ماتستاهل منا إلا كل خير
منار : بتقولين لها
حور : اكيد بقول لها بنروح لعناد بس ماني قايلتلها عن السبب
خالد : بس اكيد بتسأل ماهي ماره عليها السالفه
حور : انتوا مالكم شغل خلوا خالتي سعاد علي بس المهم انتوا لاتقولون شي ولاكأنكم تعرفون شي
منار : واذا سألتنا عن سبب قعدتنا عند عناد
حور : قولوا حور ماقالت لنا شي كل اللي قالته تجهزوا بروح نقعد عند عناد فتره ويوم سألناها عن السبب قالت تجهزوا وبس
خالد ومنار : إن شاءالله
الساعه 12 الليل "
منايل بعد الهوشه خذت لها شور بارد ولبست برمودا فوشي وتشيرت رصاصي وماطلعت من غرفتها من صارت الهوشه حتى الاكل ماكلت حست بجوع شافت الساعه 12 استانست الجده والبنات نايمين هالحزه وبندر شكله بينام برى الليله
نزلت للمطبخ فتحت الثلاجه مافيها إلا خضره وخبز ولحم ودجاج يعني الاشياء الاساسيه"
دورت تبي عصير توست جبن بس مافيه"
منايل منقهره : اووف في احد ماعنده جبن قيمر أي شي اوف منهم مره ثانيه اذا رحت لأهلي بروح للجمعيه واشتري كراتين من كل شي وإلا اقول احسن شي اجيب ثلاجتي واحطها بغرفتي إللي اهني اذا قعدت على عالحال بموت من الجوع" سمعت اصوات من بطنها "
بس انا الحين جوعانه شسوي كله من هالعله كسر فوني وإلا انا كنت ابي ادق على اهلي شالسوات فكري يامنايل فكري "
جات ببالها فكره وركضت لصاله تشوف تلفون البيت موجود
شافته موجود ابتسمت ابتسامه عريضه وركضت دقت على سايق اهلها ومارد
: اووف اكيد نايم هذا ينام من الساعه11 مافيه إلا كنتاكي ادق عليه بس اخاف يوصل بندر والطلب ماوصل (شافت ساعتها) لاشكله مطول
دقت على كنتاكي وطلبت وجبه زنجر مايو"
كانت قاعده عند التلفون وحدها متوتره خايفه يوصل بندر قبل لايوصل الطلب والله لايسويلي سالفه لاراحت ولاجات
بعد نص ساعه من التوتر دق التلفون وبسرعه رفعت السماعه
: ألو " موجود برى يلا خلاص
راحت ركض عند الباب وكانت اتكلم راعي المطعم من ورا الباب
منايل : لوسمحت عطني الطلب من فوق الباب
المطعم : حاطر خودي
(رفع لها الطلب ومدت ايدها وخذته ودفعت له الفلوس )
توها واقفه تفتح الطلب تشوفه وإلا تسمع صوت من ورا الباب
بندر معصب : انت شعندك واقف
المطعم خاف : طالبين طلب وانا وصلتو
بندر : خلاص روح ولاعاد اشوفك جاي
طلع المفتاح بسرعه وفتح الباب
اما منايل او ماسمعت اركضت تبي تنحاش قبل يشوفها بس ماامداها بندر كان سريع بفتحت الباب وشافها
بندر معصب :منايل ووجع (وراح يركض يلحقها )
منايل من الخرعه طاح البيبسي من ايدها بس ماهتمت للبيبسي وركضت على الدرج وهي ماسكه باقي الوجبه وهو يركض وراها بس المسافه كانت بعيده بينهم
واخيرا بعد جهد جهيد وصلت غرفتها بسرعه دخلت وقفلت الباب
تسندت عالباب وتنفست بارتياح طالعت الوجبه اللي بيدها وبلوزتها اللي امتلت من البيبسي وابتسمت "
وصلها صوته من ورا الباب
بندر مقرب من الباب ويتكلم بصوت واطي عشان ماحد يسمع : منايل افتحي الباب دام النفس عليج طيبه
منايل ماردت عليه وبخاطرها تقول : ليش انا بايعه عمري افتحلك
بندر : تسمعين يامال الصمخ افتحي
منايل بخاطرها : صمخ يصمخك ان شاءالله
بندر : هين وين بتروحين مني هين
منايل تكش عليه من ورا الباب "قربت اذنها من الباب اسمعت خطواته نازل من الدرج وارتاحت
قعدت تربعت وطلعت الساندوش وبدت تاكل واتلذذ فالاكل كانت حدها جوعانه
بعد ماكلت واشبعت خذت لها شور ونامت براحه بالاخص ان بندر مو موجود وياها بالغرفه"
الصبح الساعه 10 "
فتحت عيونها شافت الساعه وابتسمت على الفرق قبل ببيت اهلها ماتقعد الا عالساعه وحده الظهر والحين من الساعه 10 تحس نفسها شبعانه نوم
قامت خذت روبها ودخلت الحمام تأخذ لها شور
بعد ماخلصت من الشور البست اسكني اسود وقميص طويل ابيض مشجر بأسود جففت شعرها ولفته بشكل عشوائي وحطتلها مرطب كرز لشفايفه
رشت عطر فلنتينوم
وجهزت عشان تنزل تقعد وياهم وتعتذر من الجده اللي حست انها علت صوتها عليها وبالاخص انها مره كبيره"
انزلت و شافت الجده والبنات قاعدين بالصاله حست بشوية ارتياح من عدم وجود بندر
الجده اول ماشافت منايل نازله بهالبس خزتها وصدت ناقده عليها "
منايل استغربت من نظرات الجده لها اللي خلتها توقف عند اخر درجه حتى انها شكت بنفسها قامت اطالع ملابسها : اشفيها عاد انا اليوم لابسه قميص طويل عشان افتك من الهواش
شجعت نفسها بنفسها : يلا شسويلهم كل واحد حر بلبسه
منايل بابتسامه : صبــــاح الخير
الجده ارفعت على صوت الرادو وقربته من اذنها وسوت نفسها ماسمعتها
العنود ونوير بابتسامه : اهلين صباح النور
راحت منايل وحبت راس الجده : صبحج الله بالاخير خالتي
الجده بدون نفس : هلا هلا
قعدت منايل جمب الجده
العنود : منايل شاصب لج قهوه وإلا حليب
منايل ابتسمت: حليب ولا عليج امر
العنود صبتلها حليب : اتفضلي
منايل ابتسمت لها : مشكوره
نوير : منايل ترى بندر جاب صمون وجبن اذا تحبين تأكلين منه شكله حفظ شاللي تاكلينه واللي ماتاكلينه
منايل كانت تشرب الحليب ومن سمعت طاري بندر شرقت : كح كح كح
الجده اطقها على ظهرها : بسم الله عليج جيبي الما يالعنود
جابت العنود قلاص ماي وشربتها الجده :
منايل تنفست : خلاص خلاص خالتي
الجده : بسم الله يابنتي سمي بالرحمن وانتي تشربين
منايل : مسميه ياخاله بس شرقت
سمعت صوت جاي من وراها لانها كانت معطيه ظهرها للباب
بندر : صباح الخير
منايل تبلعمت من سمعت صوته
الجده بابتسامه : يامرحبا ياصباح الرضا
العنود ونوير : صباح النور
حب بندر راس جدته وقعد جمب منايل : كيف اصبحت الغاليه
الجده : بخير جعلك بخير انت وينك رحت اشوفك الساعه 8 وماعينتك فالدوانيه
بندر وهو ماد ايده ياخذ فنجال القهوه من العنود : ابد اتصل علي واحد من الربع وقفت فيه السياره خلص بانزينها ورحت جبت له بانزين
منايل من قعد جمبها بندر وهي حاطه حيلها بالحليب تشربه
التفت عليها بندر : روحي سويلي توست بجبن
منايل اخترعت والتفتت صوبه : هــــاه
بندر : اقول روحي للمطبخ وسويلي توست بجبن وحطي معها شرايح طماط
منايل قامت بدون ماتقول كلمه
في المطبخ "
كانت فاتحه الثلاجه اطلع طماط
اسمعت باب المطبخ تسكر والتفتت جهة الباب طاح قلبها يوم شافت بندر مصكر الباب ومتسند عليه "
سوت نفسها طبيعيه ومو خايفه طلعت الطماط وراحت تغسله وقصته وحطته بصحن "
خذت التوست والجبن حطته عالطاوله وبدت اتحشي التوست جبن وطماط
مشى صوبها وقعد على الطاوله كان حيل مقرب منها ويلحس الجبن بأصبعه "
منايل توترت وارتبكت من قربه منها "تحاول تسوي نفسها طبيعيه :
اتكفيك صمونتين وإلا لا
بندر يقرب اذنه منها : شتقولين ماسمعت
منايل منزله راسها ومشغله نفسها بتحشيت التوست : اقول اتكفيك صمونتين وإلا تبي زياده
بندر يسوي نفسه توه ينتبه : أهــــا لاتكفيني بس سوي زياده لج
منايل : لا انا مابي مومشتهيه
بندر : اكيد ماتشتهين عشان انصاص الليالي ادقدقين عالمطاعم
منايل طاح قلبها وراحت صوب الثلاجه من طقت ادور شي
بندر راح صوبها ووقف وراها بالضبط مسكها من كتفها ولفها صوبه : يلا سمعيني صوتج خابر السانج يلوط اذانج
منايل رافعه حاجبها مسويه نفسها عادي مو خايفه : عادي شنو يعني طلبت وجبه ماسويت جريمه
بندر يصر على اسنانه : وبعين قويه تقولين عادي طالعه لرجال انصاص الليالي وعادي
منايل فتحت عيونها : هاي هاي لاتقعد اتبلا إشايفني ماتربيت من قال اني طلعت له
بندر ايتمصخر : اجل اشلون خذيتي الطلب بالعصا السحريه
منايل اتقلد طريقة كلامه : لاوالله مو بالعصا السحريه على قولتك
بندر باستهزاء : اجل
منايل بانفعال: بعد اشلون خليته يرفع الطلب من فوق الباب ومديت ايدي وخذيته
بندر : ماشاءالله عليج بطله
منايل خزت من فوق لي تحت قهرها : ممكن اتوخر بطلع
بندر بعصبيه مسكها من كتفها : شوفي يابنت الناس دقدقه عالمطاعم انسيه تلفون البيت لاشوفج ماسكته ولي بغيتي تاكلين الثلاجه مليانه
منايل باستهزاء : اي صح مليانه حفظت الوانها الخيار اخضر والطماط احمر واليمون اصفر والخبز ابيض واذا تطورتوا شوي جبتوا جزر وخس وبقدونس
بندر ضغط على كتفها اكثر : تحمدي ربج غيرج مايلقى الخبزه اليابسه
منايل معصبه : الحمدالله والله يديمها من نعمه بس انا وحده ماحب الخضره حيل يعني يوم تقول لاتطلبين من المطعم يعني اموت من الجوع عشانك
بندر بحده : تنثبرين لين اجي واتقولين لي وإلا دقي علي بدال الدقدقه عالمطاعم
منايل : اولا ماعرف رقمك وثانيا ماحب اطلب من احد شي وانا متهاوشه وياه
بندر هد كتفها: اسمعي الكلام اوصلج والله اني لاعاد اشوف
قاطعته منايل : لاتقعد اتحلف واتوعد خلاص شكرا بخلي اهلي يشترون لي ثلاجه واحطها بالغرفه وبترسها من كل شي بخاطري
بندر عصب ومسكها من ايدها : وانا ياللي واقف قدامج طرطور وإلا ماني برجال
منايل : آآآي هد ايدي عورتني
بندر : شوفي من طلعتي من بيت اهلج محد مسؤؤل عنج غيري فاهمه
منايل : خلاص هدني
بندر هد ايدها وحذفها ومشى وخلاها
منايل ماسكه ايدها اتعورها : كش عليك ياكرهي له ماواطنه بعيشة الله من حلاتك وإلا حلات بيتكم حتى ثلاجتكم اتسد النفس نفس وجهك
بندر طل عليها من باب المطبخ : شتقولين
منايل تخرعت : بسم الله ماقلت شي اكلم عمري بعد هذي حرام وممنوع
بندر : أي عادي كلمي عمرج مثل المجانين الحمدالله والشكر ماقول إلا يالله صلاح العقل
منايل نرفزها : أي كيفي انا مجنونه اشتبي
راحت تمشي عشان تطلع من المطبخ تبي تروح لغرفتها حط ايدينه على الباب وسكر عليها
منايل بدون مااطالعه : وخــــر
بندر : قولي لوسمحت وخر وذيك الساعه افكر اوخر او لا
منايل عصبت : ماني قايل شايفني خدامه عندك وخر ترى مالي خلقلك
بندر: اي اجل خلي عنادج ينفعج وهذي وقفه وماني موخر ووريني اشبتسوين
منايل اطالعه وناقده عليه : استغفرالله ياربي انت فيك انفصام شخصيه صح
بندر : اكيد بيجيني انفصام شخصيه دامني متزوج وحده مجنونه
منايل : هيهيهي ماتضحك
بندر باستهزاء : ليه انا قلت نكته عشان تضحكين
منايل : يعني وبعدين
بندر : ولاقبلين قولي لوسمحت وخر ويصير خير
منايل نرفزها حيل : مابي اقول زين بتوخر وإلا شلون
بندر : شلون
منايل بصوت عالي : ياخالتي تعالي شوفي بندر ايدي اتعورني بسبته
بندر انصدم وفتح عيونه ماتوقعها تنادي جدته : ألعن ابو شكل بليسج وأمي اشدخلها بالموضوع
ماسمع إلا صوت جدته جايه من وراه : خير خير والصيحه على هالصبح
بندر على طول وخر من الباب : مافيه شي يمه اتدلع
منايل : شوفي ياخالي شوفي ايدي شلون صايره حمرا منه زين ماكسرها ترى ماحنا عبيد عنده
الجده هيا : خلاص يابنيتي روحي غرفتج مايصير إلا كل خير
مشت منايل ورفعت حاجبها لبندر واضحكت وكأنها اتقول انتصرت عليك
بندر يكره حركاتها بس مايقدر يقول شي بوجود جدته
بيت الخاله سعاد "
خالد من قام من النوم ورجوله اتعوره كان معلي على التكيف ومنزله عليه "
منسدح عالغنفه فالصاله وتعبان "
جاته حور ومعاها صينيه فيها ريوق له وزيت زيتون : يلا الحين تريق وبدلك ارجولك بزيت زيتون وماعليك إلا العافيه
خالد ذابحته رجله : آآه ذابحتني رجلي اليسرى مابي ريوق
حور ادلك رجله بزيت زيتون : زين ليش من البدايه اتعبثون انت وفهيدان بالمكيف انا اصلا رافعته ومقصره عليه عشان ماتمرضون تروح انت يالغبي اتنزله عليك
خالد : اشدراني كنت احس انه حر وعليت عليه آآه ياحور احسها بتنكسر من الوجع
حور مستمره في التدليك : من البرد دخلها هذا انا ادهنها وبس تدفى بيهدى العوار
نزلت منار وراحت لصاله : صباح الخير
حور التفتت صوبها : اهلين صباح النور
منار باست خد حور وراس خالد : اشفيه تعبان
حور : نزل المكيف عليه واذبحته ارجوله
منار شافت ارجول خالد حيل ضعاف وقامت تستهبل : ياربي سلم عصاقيل زيتونه
خالد عصب : انطمي يابقرة كي دي دي
حور تبتسم : خلاص ياثنين لازم نجره من صباح الله خير
منار تلمس رجله : هههههههه استغفرالله ياربي عود اسنان مو رجل
خالد ماله خلق : حور شوفيها خليها تذلف
حور : منور ووجع ترى مو وقت غشمرتج البايخه
منار تمسك ضحكتها : اسفه اسفه يابو العصاقيل اوه اقصد يابوالشباب
حور : وبعــــدين خلاص عادي روحي تريقي ويا منول بالمطبخ تلقينها هناك
منار : اوكيك وهالريوق اللي عندكم لمنو
خالد : لي ولا انتي ماكله معي عندج مانع
منار : بعد لسانك طويل مكسوره واتبرد
حور : خــــلاص فجرتوا راسي روحي يالسوسه تريقي مع منول
منار : خلاص ريلاكس ليش معصبين
حور : ترى حدج رايقه طسي دام النفس عليج طيبه
منار راحت : خلاص رحنا بسم الله علي بغوا ياكلوني بقشوري مايسوى علي ريوق
حور : هاه الحين رجلك احسن
خالد : اي الحمدالله احسن بواجــــد
حور : يلا تريق وانا بروح اجيب لك الحاف من فوق
خالد : ان شاءالله
حور : إلا فهد وينه ماشفته
خالد : فهد راح مع خالتي سعاد للجمعيه
سعود ونايف راجعين من المسجد " وقف سعود سيارته ونزلوا عشان يدخلون البيت
قابلوا عذاري تبي تطلع : سلام
نايف وسعود : وعليكم السلام
سعود : وين على الله
عذاري : بتمرني رغود
وبنروح انتغدى برى
سعود : خير إن شاءالله مافي البيت أكل
عذاري : هذي رغود وصلت
سعود ماألتفت ماله خلق يشوفها : كملت
نايف انجهر : أنا ولد ابوي انتوا اتشوفون اللي اشوفه
سعود التفت بسرعه شاف رغد جايه صوبهم واتبسم لابسه عبايه شفاف ومن تحت العبايه لابسه نفنوف ضيق لي فوق الركبه لونه احمر والشيله كل شعرها امبين يعني وجود الشيله والعبايه مثل عدمه
رغد بمياعه وعيونها على سعود وشوي وتلزق فيه : مرحبا
سعود يوم شافها بهاللبس الجن الازرق قام يرقص قدامه سحبها ودخلها داخل البيت
رغد : سوسو اشفيك حبي اشوي شوي علي
عورتني
سعود معصب : يابنت اللذينا اشهالبس
رغد : شنو لبس عادي
سعود واصل حده : عذاري روحي جيبي عبايه واسعه وشيله ساتره
عذاري خافت وراحت ركض فوق
رغد : ليش عبايه وهذي اللي علي اشفيها
سعود ماعد مسك عمره عطاها كف ودزها ومسك العقال يبي يكمل عليها : انا بربيج من جديد
مسكه نايف : تعوذ من ابليس ياسعود هذي ماهي بكفو
رغد تصارخ واتنافخ : ليش اتمد ايدك حسبالك انا خدامه عندك كيفي إن شاءالله اتفصخ مالك شغل دام ابوي راضي
سعود ايتفلت : هدني عليها خلني اربيها
نايف سحبه لبرى : انت صاحي بالعنه بتروح اتعلم ابوها وبيقعد يتفلسف على راسنا وبيسب ويلعن ومالكم شغل في بنتي وانا امربيها احسن تربيه
سعود عصب : هي بنت عمي وفي وجهي الناس لي شافوها بيقولون بنات ال&&&&& صايعين مهوبقايلين بنت فلان بيشبكون بنات العايله كلها
نايف : اذا ولي امرها راضي شنسويلها
دق تلفون سعود وشاف الرقم : هاه هذا هو داق
سعود حطه اسبيكر: ألو
ابورغد : والعنه يالخسيس يالردي
سعود انفعل : اسمع لاتقعد اتغلط ماني بخسيس ولاردي الخسيس إللي يعجبه تبرج محارمه والردي إللي يتفاخر في تفصاخهم
بو رغد جن جنونه : تقصدني ياكلب
سعود : ماني كلب وماقصدتك لكن انت عاجبك لبس بنتك
ابورغد : بنتي حره في لبسها ولاحد له شغل فيها وبعدين بنتي اتحب تتبع الموضه
سعود ناقد عليه : امحق موضه والله بنتك وامثالها شوهوا صورة العبايه
ابو رغد : احترم نفسك ياولد لا اتوثم فيك ياكلب واسمع الكلام ولاعاد اشوفك متعرض لبنتي
سعود : اجل اسمع الكلام اللي يجمد على الشارب بيتنا يتعذر بنتك وان شفتها لابسه هالبس والله ماخليها تدخل البيت وخلها اتجنب خواتي
ابو رغد عصب : لكم الشرف ان ادخلت رغد بيتكم لكن من اليوم ورايح بحرمكم هالشرف (وصك التلفون بوجهه )
نايف باستهزاء : اللهم لك الحمد والشكر الناس يكبرون ويعقلون وعمك هذا يكبر ويستخف زياده
سعود : نايف ادخل عليها وخلها تذلف من البيت والله ان دخلت بذبحها
نايف : ياابن الحلال لاتذبحها ولاتهتم فيها كل راعي مسؤؤل عن رعيته وهي ابوها على راسها وراضيلها فاضعفتها البست وإلا قعدت أنا الحين بروح اقولها تذلف ولا
قاطعته رغد وهي طالعه : انت واشكالك اللي تذلف اصلا انا مااتشرف ادخل بيوت فيها اشكالكم وانت ياسعود والله ماانسالك مدت اليد ولردها لك بس بطريقه ثانيه طال الزمن وإلا قصر
سعود ماقدريتحملها مسك العقال يبي يحذفها فيه لكن مسكه نايف وهي راحت تركض لسيارتها"
حور بعد ماصلت المغرب كانت قاعده بغرفتها واتفكر ماباقي إللى يومين وينتهي الاسبوع وهي للحين مافاتحت الخاله سعاد بالموضوع"
قطعت منار عليها حبل افكارها : حور فاضيه
حور : أي تعالي وصكي الباب وراج
دخلت منار وصكت الباب : اشفيج قاعده بروحج
حور : افكر شلون افاتح خالتي سعاد بالموضوع
منار : حور ماباقي إلا يومين وتنتهي المهله وانتي للحين مافاتحتي خالتي بشي
حور تنهدت : ادري وهذا اللي كاسر ظهري لازم افاتحها بالموضوع باسرع وقت بس خايفه من ردت فعلها
منار : حور كلهم متجمعين تحت وهذا احسن وقت اتفاتحينهم بالموضوع
حور : يعني رايج اقولها الحين
منار : أي هذا احسن وقت
حور تنهدت : شورج وهدايت الله يلا ننزل
انزلوا البنات حور عورها قلبها وهي اتشوف خالتها تلعب بلاستيشن ويا فهد وخالد هي فريق وخالد وفهد فريق "
ترددت وبغت اتهون لكن منار ضغطت على ايدها وهزت راسها بمعنى لاترددين"
قعدت منار عند نرجس اللي كانت اتحل كلمات متقاطعه وحور قعدت على القنفه وعيونها على خالتها تنطرها اتخلص لعب عشان تفتح وياها الموضوع وتفتك اما منال كانت لاهيه على اللاب "
اسرحت حور بفكارها وماانتبهت لعمرها إلا على صوت ضحك فهد وخالد على الخاله سعاد عشان فازوا عليها وهي كانت معطتهم على جوهم واتغشمر وياهم "
الخاله سعاد : الله يقطع بليسكم نسيتوني احط حنا على شعري يلا انا بروح احني شعري
حور : لحظه خاله لاتروحين ابي اكلمج بموضوع دام الكل مجتمع
الخاله سعاد باستغراب : خير إن شاءالله عسى ماشر
حور : ماشر إن شاءالله بس انتي ارتاحي
قعدت الخاله عالكرسي ومنال ونرجس هدوا اللي بإيدهم وصار كل تركيزهم لحور
حور خذت نفس وبدت اتكلم : خاله انتي تدرين اشكثر انا واخواني نحبج ولو انلف الدنيا بكبرها ماراح نلقى احن من قلبج علينا
الخاله سعاد : حور اشفيج صاير شي دخلي بالموضوع على طول
حور : خالتي خليني استرسل بالكلام
سعاد : خلاص كملي
حور : انا ادري كلكم بتقولون ماله داعي هالمقدمه كلها لكن انا اشوف هالمقدمه اهم عندي من الموضوع نفسه انا ادري مهما قلت وزدت فالكلام عمري مااوفي بحق خالتي سعاد اصلا مادري امي الله يرحمها لو كانت عايشه بتسويلنا نفس ماسوت خالتي سعاد اللي عمرها مافرقت بينا وبين عيالها اللي من بطنها اصلا وجودها في حياتنا هو الامان بكبره انا ادري ان الموضوع اللي بقوله بيضايقها واهون علي تفقد عيوني نظرها ولا اشوفج متضايقه بسبتي لكن شسوي في امور فالحياه لازم الواحد يضحي عشان مايضر اشخاص غالين في حياته
منال خلاص توترت : حور وإللي يرحم والديج دخلي بالموضوع ترى وترتيني
حور وقفت قدام الخاله سعاد وفتحت ايدها : خاله لمينــــي
الخاله سعاد وقفت باستغراب وعلامات التوتر بانت عليها وماردت حور اسحبتها لحضنها ولمتهــــا
منار ماقدرت تمسك عمرها دمعت عينها بس ماحد انتبه لها
حور تمت لامه خالتها بقوه : خليني اشبع من حضنج يمكن ابطي ماعاد اتلميني ولاتأخديني بحظنج
سعاد حست بنغزه شديده بقلبها مسكت حور من كتوفها ووخرتها من صدرها وهزتها : حــــور اشصاير تكلمي
حور وخرت من سعاد ومسحت الدمعه اللي انزلت ماتبي تضعف واتردد : للحين ماصار شي بس بيصير لاني خلاص خذيت القرار
منال عصبت : خــــلاص عاد صبت عظامي تكلمي
حور خذت نفس وقوت نفسها : عناد عرض
الخاله سعاد من اسمعت طاري عناد حطت ايدها على قلبها عرفت ان فيه شي كبير بيصير
حور كملت : عناد عرض علي اعيش انا واخواني عنده لفتره هو يحددها مقابل انه يبعد عنا ولاعاد يأذينا وانا وافقت ( حور ماقالت لهم عن تهديده لسعاد وبناتها وانهم لو تموا قاعدين عند سعاد راح يحرق بيت سعاد ويعتدي على بناتها لان حور عارفه انها لو قالت لسعاد عمرها ماراح تسمح لها يروحون حتى لو كلف الثمن حياتها)
الخاله سعاد عصبت وامسكت حور من كتفها وتمت اتهزها : بأمر منو اتوافقين مو على كيفج ولا راح تسكنون عند احد غيري دام راسي يشم الهوا فاهمـــه
حور خلتها على راحتها حتى ماحاولت اتهد عمرها من سعاد على الرغم من ان ضغط وهز الخاله لكتوفها عورها: بس انا خلاص وافقت وعطيته الرد وبعد يومين بننتقل عنده
نرجس ومنال انصدموا ومانطقوا بولا كلمه
سعاد جن جنونها : يعني شنو عطيتيه خبر وانا مالي اهميه بعد ماقررتي وخلصتي يايه اتقوليلي
حور بهدوء : انتي على العين والرأس بس قراري هذا عشانا كلنا
سعاد هدت كتوف حور : مو على كيفج ماراح اخليج اتروحين حتى لو احبسج بالغرفه
حور قربت من سعاد عشان اتهديها : خالتي
سعاد صرخت عليها : لاتقولين خالتي دام هالتفكير برأسج تنسين انج اتعرفين وحده اسمها سعاد
حور عورها قلبها بس مسكت نفسها عشان ماتضعف : انا مالي غنى عنج بس هالشي خارج عن ارادتي
سعاد منفعله حيل : شنو خارج عن ارادتج قوليلي السبب الحقيقي اللي عشانه بتهديني واتروحين له السبب اللي قلتيه ما اقنعني قوليلي انا قصرت عليكم بشي ضايقتكم بشي
حور نزلت راسها وادمعت عينها : لا والله عمرج ماقصرتي علينا بشي انتي امنا اللي ماجابتنا
سعاد : لاتقولين اني امج وانتي بنتي لان مافيه بنت تطلع عن شور امها
حور : خالتي تكفين لاتقولين هالكلام تراه يذبحني
سعاد : وانتي وكلامج اتشوفينه مايذبح ولا يحز بالخاطر انكم اتخلون بيتي واتعيشون عند عناد ليش ليش ياحور انا قصرت بشي والله اني احبكم
واخاف عليكم مثل ماحب عيالي اللي من بطني
حور بحزن : ينقطع الساني اذا قلت في يوم انج قصرتي معانا بشي وللمره المليون اقولج لو كانت امي عايشه يمكن ماتسوي اللي سويتيه لنا
سعاد : عيل ليش تبين اتروحين
حور تنهدت : لاتسأليني عن السبب لانج مصيرج اتعرفين مع الوقت بس في هالوقت بالذات مااقدر اقول شي لكن كل اللي اتمناه اني مااطلع من البيت إلا وانتي راضيه
سعاد : واذا مارضيت بتطلعين
حور تنهدت : انا مجبور
منال عصبت : حور موعلى كيفج تبينا نشوفج اتقطين نفسج بالنار ونرضا
حور : صدقيني يامنول انا بس بساير عناد انا عارفه اشيبي يبي معاش ابوي واجار البيت
وسيارتي وكل هذي بتم عندكم
منال : انتي ليش تضعفين له عناد شمهددج فيه قولي
حور : الكلام بهالموضوع ماعاد يفيد
سعاد : يعني رضاي وعدمه واحد
حور : لاوالله رضاج عندي بالدنيا لكن فيه امور مجبورين عليها
سعاد بصرامه : يعني بتروحون
حور هزت راسها بنعم
سعاد : عيل وانتي طالعه من الباب انسي شي اسمه خالتج سعاد
(ومشت تصعد الدرج رايحه لغرفتها )
الكل انصدم وحور قعدت عالغنفه وحطت ايدها على وجهها وبدت تبكي بحرقه اتحس نفسها بين نارين ان تكلمت اويلاه وان اسكتت اويلاه"
منال ماقدرت اتحمل شكل حور راحت لها ولمتها : حور انتي ليش اتسوين جذي قوليلي عناد مهددج بشي قايلج شي ليش اتروحين للموت برجولج
حور وسط دموعها : منال اذا اتحبيني لاعاد تسأليني عن شي لاني والله تعبت من الهم
منال تمسح على راس حور : طيب قوليلي خليني اشاركج همومج
حور وخرت من منال ووقفت تبي اتروح لغرفتها : كل اللي بقوله وابيج اتوصلينه لخالتي سعاد اتمنى انها مااتخلى عنا بهالظروف لاني محتاجه لها اكثر من اول ومالي غنى عنها
صعدت الدرج رايحه لغرفتها وهي حيل حزينه اللي كانت خايفه منه صار كانت خايفه من زعل الخاله سعاد وهذا هو صار "
--------------------------------------------------------------------------------
العصر في بيت الجده هيا كانوا قاعدين فالحوش الجده والبنات دق الباب وراحت العنود تفتح كانت وحده من خدامات اهل منايل "
شافتها منايل من الدريشه : العنود ولاعليج امر دخليها انا الحين نازله
العنود دخلت الخدامه "
الجده : هذا من وش تبي
العنود : يمه هذي خدامه اهل منايل
الجده : وشفيها جايه
العنود : مدري يمه
انزلت منايل وياها سلة ملابس واول ماشافتها الخدامه اركضت تأخذ الملابس : هاي نينا
نينا : هاي مدام
منايل : wash and iron form these clotes
نينا : اوكي مدام
خذت الخدامه الملابس ومنايل قعدت وياهم بالحوش
الجده باستغراب : انتي ليش معطتها كل هالملابس
منايل : عشان اتغسلها وتكويها وابجيبها لي
الجده : كل هالملابس اتغسلها وتكويها
منايل :أي خالتي شسوي صار لي اسبوع ماوديتها لاهلي عشان يغسلونها ويكونها الخدم
الجده ناقده عليها : ليه وانتي وش ناقصج رجل وإلا ايد ماتعرفين اتغسلين ملابسج
منايل استغربت وضحكت : ههههههه منو انا اغسل الملابس ليش إن شاء الله والخدم اللي جايبهم ابوي زينه
الجده : بس انتي الحين في بيت رجلج ماعادج في بيت ابوج
منايل : والله شسويلكم ماعندكم خدامه
الجده : يابري حالي بنات اخر زمن الرباده اذبحتهم رفلات ومايعرفون السنع
منايل ماردت عليها قامت وراحت لغرفتها
العنود : يمه شوي شوي عليها طول عمرها متعوده عالدلع والراحه
الجده عصبت : انطمي انتي مستانسه على خبالها وهبالها حتى ملابسها ماتعرف اتغسلها من خبالة امها اللي ماعلمتها
نوير بصوت واطي عشان ماتسمعها جدتها : يابري حالي تبي البنت تكرف ليل ونهار
العنود : اقول ابلعي السانج وسكتي لاتسمعنا حطت لنا سالفه لا راحت ولا جات
دخل بندر وابتسم يوم شافهم قاعدين بالحوش من زمان ماقعدوا فيه : السلام عليكم
الجده : عليكم السلام ياهلا والله ومرحبا بالغالي ولد الغالي
البنات : وعليكم السلام
نزل بندر وحب راس جدته ورجولها : شخبار الغاليه
الجده : بخير جعلك بخير دامني اشوفك فأنا بصحه وعافيه
بندر ابتسم : جعله دوم وهالمزايين شعلومهم
العنود ونوير ابتسموا : طيبين الله يطول بعمرك
وقف بندر : يلا عن اذنكم انا بروح اتسبح وانزل لكم
الجده : اخذ راحتك جعلني ماذوق فرقاك
بندر وهو ماشي : الله لايخليني من وجودج ياراس المال انتي
دخل الغرفه لقاها قاعده اتحط وتمسح بهالمكياج "
بندر : بسم الله الرحمن الرحيم
منايل طالعته بنظرت استحقار : منك
بندر يبي يقهرها : اتلطخين بهالالوان تبين الزين ولافيه فايده
منايل عصبت : عاد اتصدق انت اخر واحد يهمني رايه
بندر فتح الكبت ومالقى ملابسه : اقول خلي هالخرابيط وقومي عطيني ملابسي
منايل طالعته بنص عيل : خير إن شاءالله وانت ليش ماطلع لعمرك
بندر : الكبت مافيه شي وين ملابسي
منايل هزت كتوفها : وانا اشدراني عنها
بندر على طول راح لسلة الملابس الوسخه ولقاها مليانه ملابسه الوسخه : هذي الملابس وسخه
منايل : مادري
بندر عصب : شلون ماتدرين ماغسلتي ملابسي
منايل بانفعال: شنــــو انا اغسل ملابس هذا اللي ناقص والله ليش ماوديتها المصبغه
اذا ملابسي ماغسلها هالمره اغسل ملابسك
بندر : اجل من اللي يغسل ملابسج ياسندرلا
ليكون خواتي
منايل : والله الله يخليلي ابوي تارس البيت خدم وكل ثلاث او اربع ايام يجون ياخذون ملابسي يغسلونها ويكونها
بندر : وملابسي طول هالفتره من يغسلها
منايل بثقه : خواتك يجون وياخذون سلة ملابسك ويغسلونها
بندر : وبثقه اتقولين خواتك يغسلونها انتي ماتعلمتي السنع عند اهلج
منايل باستغراب : انا بفهم ليش معصب سألتني وجاوبتك يعني هذا الصج خواتك ياخذوا ملابسك ويغسلونها وين المشكله
بندر : والمصيبه انج ماتعرفين وين المشكله ومستانسه ان خواتي يغسلون ملابسي وانتي موجوده
منايل : والله ماعرفنالكم ياهالناس يعني هذا نظامكم من قبل لااجيكم خواتك يغسلون ملابسك خلاص اذا ماتبيهم يغسلونها خلاص ودها المصبغه
بندر نرفزته زياده : انتي ماتفهمين عربي انتي ماتعرفين ان الزوجه هي اللي تغسل ملابس زوجها
منايل : لاوالله وإن شاءالله تبيني اغسل ملابسك هذا اللي ناقص
بندر بحده : وليه إن شاء الله ماتغسلينها
منايل : ماعرف ولا ابي اعرف
بندر هز راسه : إن شاءالله انج بتعرفين والحين يلا قومي انزلي معي
منايل : وين
بندر : اتعلمين الغسيل
منايل شهقت : نعــــم شنــــو اتعلم الغسيل من قال ابي اتعلم هذا اللي ناقص
بندر : اي والله صدقتي هذا اللي ناقصج مابعد تعلمتي الغسيل ويلا قدامي امشي تعلمي
منايل : مابي ماني ماشيه ولا متعلمه واللي بتسويه سوه
بندر : انتي بتمشين فاحسن لج امشي بالطيب لا امشيج بالغصب
منايل قعدت على السرير وتربعت وخذت صبغ الاظافر اتصبغ : وماردت عليه
بندر ايتنرفز من هالحركات خذا الصبغ : هذي الوسمه وبنقطها فالزباله ويلا قدامي امشي
منايل : ماني نازله وان قربب مني والله لعظك
بندر : بعد اتهددين يعني منتي قايمه بالطيب
منايل : خلاص ماتفهم انت مابي اقوم
مسكها بندر وشالها ومنايل ترفسه وتصارخ واخر شي شافت مافيه فايده عظت صدره
بندر عورته العظه بس يبي يقهرها : وهذا حدج ماعندج ماعند جدتي
منايل اتزيد في العظ بس مافاد
وصلوا للحوش ونزلها
منايل معصبه : انت اشتبي تراك غاثني
بندر : جعله دوم المغثه ومابعد شفتي شي للحين
الجده : ياولدي وشفيكم
بندر : مافيه شي بس بنعلمها الغسيل
الجده : يامال فرقى العين هذي وين اتعرف اتغسل هذي إلا اتلبس واتزين
منايل : عليــــج نور انا ماعرف إلا اتلبس واتزين سمعت امك اشقالت
بندر : أي هذا اللي تبينه بس بعيد عن خشمج العنود جيبي سطل
منايل : شنو سطل عبالك ايام قبل حسبالك درب الزلق
بندر مارد عليها : اخلصي يالعنود جيبي سطل وصابون
منايل : اي والله يالعنود
جيبيله خليه يغسل ملابسه وافتك من هواشه
بندر يجاريها : اي صدقتي
جابت العنود الاغراض : تفضل
خذا بندر السطل وحط فيه ماي وصابون وحط في السطل ماي : تفضلي ياطويلة العمر استريحي جمبي
منايل : هههه شنو انت بتغسل بايدك ماعندكم غساله
بندر : لا افا عليج اغسل بايدي وانا عندي غساله بشريه تعالي اقعدي جمبي
منايل شكت فالموضوع :
شنو لا مابي اقعد جمبك
(راحت وقعدت بين العنود ونوير على الزوليه)
الجده عصبت : وجع ان شاءالله قومي غسلي ملابس رجلج وخلي الدلع الماصخ عنج
منايل ماسكه ثوب العنود خايفه : والله انتوا ماخذيني وتدرون اني ماعرف هالاشياء ولا ابي اعرفها
بندر جا صوبه : طولت اللسان لاعاد اسمعها ان قالت امي شي قولي تم فاهمه
منايل : انا ماطولت اللساني وبعدين هذا الصج انتوا ليش تزعلون من كلام الحق
نوير : خلاص يابندر انا بغسل ملابسك وماله داعي الهواش ويعني لاتلمون منايل عمرها ماتعودت على هالشي
منايل استانست وودها في هالحظه تقوم اتبوس نوير وتلمها بردت قلبها
الجده معصبه : انتي انطمي ومالج شغل وإذا ماتعرف اتعلم واتصير مرتن صاحيه اتعرف السنع
منايل تقول بخاطرها شايفتني مجنونه مثلا"
بندر : هي بتقوم اتغسل يابالطيب يا بالغصب
منايل انقهرت منه : ماني قايمه ولاني غساله بشريه على قولتك وتراك مصختها انت وكلامك واسلوبك ترى ماتنجبر نفس(ن) على نفس خلاص يابن الحلال طلقني وفكني من شرك ترى بيت ابوي اللي ظمني عشرين سنه بيظمني باقي عمري
بندر عصب يكره طاري الطلاق اذا جابت سيرته وده يذبحها : لو اتموتين ماطلقتج وبعدين انا إللي احدد متى اطلق فاهمه وإلا تبيني افهمج بطريقتي
منايل وقفت وتخصرت : يعني اش بتسوي بتمد ايدك وإلا بتحبسني بغرفه تراني زهقت منك ومن عيشتك اللي تقصر العمر
بندر جن جنونه ورفع انظره شاف بريعصي على الطوفه خذا انعاله
منايل اول ماشافته مسك انعاله خقت ومن الخوف تقبظت فالعنود ونوير
بندر حذف البريعصي واذبحه وشاله في جريده
منايل شافته ذبح شي بس مادرت شنو
جا صوبها وشايل بيده الجريده : تقولين اشبتسوي بتمد ايدك والا تحبسني افا عليج لا هذا ولا ذاك اليوم اسلوب جديد
منايل ماسكه العنود ونوير حيل واطالعه وحدها خايفه ماتدري شنو ماسك
بندر بحده : بتقومين اتغسلين الملابس والا اقومج بطريقتي
منايل هزت راسها بلا
بندر قرب منها : اتقولين لا (قرب منها الجريده عشان اتشوف البريعصي)
منايل اول ماشافت البريعصي نطت بحظن العنود وقعدت اتصارخ وتبكي وخاشه وجهها بصدر العنود : يبــــــــه يمــــــه يبـــــــه الحقني الله يأخذك وخـــر عنـــي
العنود ضمتها ونوير قامت :حرام عليك يابندر البنت بتستخف
بندر عوره قلبه عليها بس خذاها مسألة عناد : نوير اسكتي ولا اتدخلين وانتي يامنايل قومي لاورب الكعبه ادخله في ملابسج
منايل بغت اتموت من الخرعه تبكي واتصارخ وحالتها حاله "
الجده ساكته وراضيه باللي يسويه بندر تبيها اتسنع واتعلم الشغل "
نوير اتعرف عناد بندر لي ركب راسه اركبه : خلاص يامنايل امشي قومي غسلي وحنا بنقوم انغسل وياج
العنود بحنان همست باذنها : قومي ووالله ماخليه يقرب البريعصي منج
منايل تطمنت للعنود ونوير وقامت وياهم وعيونها منتفخه من البكي واتشاهق شكلها يكسر الخاطر كانت تمشي وماسكه العنود ونوير "
بندر واقف يطالعهم ومنقهر من نفسه انه سوا هالحركه فيها يكره يزعل أحد" بس منايل تقهره بكلامها
قط البريعصي فالزباله وراح يغسل ايده"
العنود ونوير قاعدين يغسلون ملابس بندر ومنايل قاعده جمبهم وبس حاطه ايدها فالماي من طقت انها اتغسل وهي ماتعرف في الغسيل أي شي"
خلصوا غسيل ملابس ونشروها عالحبل راحوا يبون يدخلون داخل ومنايل كانت تمشي وياهم
بندر وقف قدامهم : يعطيكم العافيه
العنود ونوير : الله يعافيك
منايل ماطالعته ولاحطت عينها بعينه مالها خلق له كرهته ماردت عليه مشت تبي تروح لغرفتها
بندر وقف قدامها ماخلاها تمشي يبيها اطالعه
منايل مارفعت عينها فيه وراحت للجهه الثانيه وراح قدامها ماخلاها تمشي
العنود ونوير حسوا وجودهم غلط راحوا وخلوهم على راحتهم
بندر مسك إيدها يبي يروح وياها للجهه الثانيه من الحوش عشان ياخذ راحته بالكلام وياها لكن منايل ماعطته مجال سحبت ايدها منه ومشت تبي تدخل داخل البيت "
بندر شاف انه احسن يخليها لين تهدا اعصابها خذا غترته من على المركى وطلع برا البيت"
بيت الخاله سعاد"
الكــــل كان حزين"
منار ترتب اغراضها فالجنطه ونرجس قاعده عندها وحدها حزينه وكل وحده فيهم خانقتها العبره وساكته"
حور خلصت ترتيب جنطة خالد وحطتها بالصاله اللي فوق "
قعد فهد عند الجنطه حزين وخالد جا وقعد جمبه"
فهد : انت اذا رحت بتنساني وبتعرف على ربع غيري
خالد حط ايده على كتف فهد : افا عليك انت اخوي احد ينسى اخوه وبعدين حنا بنشوف بعض كل يوم فالمدرسه
فهد : بس مو مثل الحين "الحين كل شي انسويه مع بعض انروح نصلي فالمسجد مع بعض وناكل مع بعض وانام مع بعض ونلعب مع بعض
خالد حزين : ان شاءالله فتره ونرجع نعيش مع بعض
في غرفة منال وحور ماكان الوضع احسن بالعكس كان اسوء لان منال بس قاعده عالسرير وتبكي "
حور ترتب اغراضها والعبره خانقتها بس ماسكه نفسها بالغصب
منال تبكي : يعني خلاص باجر بتروحون يعني ماراح اتغيرين رايج
حور : انتي ليش تبجين يكفيني إللي فيني وانتي اتزيديني
منال : يعني بتروحون واتخلونا وماتبيني ابجي تبين اضحك مثلا
حور خلصت ترتيب وماعاد قدرت تمسك عمرها اكثر قعدت على السرير عند منال وجات عينها بعين منال ولاإرديا قامت تنزل دموعها لاشعوريا
ثنتينهم لموا بعض وتموا يبجون وحالتهم حاله"
حور ضامه منال حيل: انا ابيج اتقويني وانتي اتزيديني
منال ماسكتها حيل ماتبي اتهدها : ماقوى على فراقج دقيقه علميني شلون بتغفى عيني وانتي مو يمي
حور تنهدت : يكفي ان زعل خالتي كاسر ظهري لاتزيديني بكلامج
منال : شوفي حالي وانتي للحين مافارقتيني وشلون لارحتي وخليتيني
حور : انا محتاجه دعواتج يامنوله والله اني تعبانه من فراقكم بس علميني شسوي وانا مافي يدي حيله
منال وخرت منها وبدت تمسح دموع حور بيدها وحور سوت نفس الحركه لمنال
منال : اوعدج اني ادعيلج بكل صلاه ومهما طال البعد ماتغير ومتى ماحتجتيني بتلقيني حتى لو الكل تخلى عنج مستحيل اتخلى عنج
حور : صدقيني لو ألف
الدنيا كلها مستحيل القى احن من قلوبكم علينا
منال حبت اتغير الجو : وبعدين اذا رحتي مو تنسين رفيجتج كل ماشفتي ولد عمج المزيون ابوكشه صوريه ودزيلي ياه
حور ابتسمت :اخاف تحترق كاميرة فوني
منال بضحك :اخاف بس تبين تروحين وتسوين قصة حب وياه واتخونين رفيجتج
حور :وجع صج فاضيه من حلات ابوكشه عشان القيه وجه
منال :هههههه ياحلوه وحلو كشته وغمازاته
حور :ههههه ماتخلين سوالفج
منايل خذت مخدتها والحافها وراحت اتنام عند العنود ونوير"
الساعه 11 الليل "
جا بندر ودخل سيارته فالحوش فتح الدبه ونزل ثلاجه حجم وسط
صعد فوق وراح غرفته
فتحها ومالقى منايل وانصدم وعلى طول راح غرفة البنات دق الباب عليهم"
اسمعته نوير وقامت تفتح الباب: هلا بندر
بندر بخوف : وين منايل
نوير تفرك عيونها فيها نوم : منايل نايمه عندنا
بندر ابتسم برتياح : متى نامت
نوير : نايمه من الساعه 10
بندر بصوت واطي : نوم العافيه
نوير سمعته وحبت تحرجه : الله يعافيك
بندر ابتسم بحراج : يلاتصبحين على خير واسف ازعجتج
نوير : لاعادي اخذ راحتك
بندر وهو نازل من الدرج : يلا عن اذنج
نوير : اشفيك نازل وين بتروح بتنام فالدوانيه
بندر : لا برقد في غرفتي بس بروح انزل الاغراض من السياره
نوير : اجل بنزل اشيل معك
بندر : لامايحتاج ارتاحي
نوير : إلا والله بنزل
بندر : إللي يريحج
نزلت نوير ويا بندر شالوا الثلاجه وحطوها بغرفة بندر وعقب بندر قال لنوير ترجع تنام وهو جاب باقي الاغراض ماخلى شي فالجمعيه ماشراه من عصاير وككاوات وبطاطات وهمبرقر وتوست وجبن بانواعه وصمون ونقت وشبس وكتشب ومايونير ماخلى شي"
ضبط مكان الثلاجه وشغلها وحط الاغراض في وعقب ماخلص جمع الكراتين والوسخ ونزلها لزباله "
رجع لغرفته يبي ينام لمح شي مكتوب عالمرايه"
وقف قدام المنظره وضحك وهو يقرأ الكلام المكتوب بالحمره " (اكرهك ومااواطنك )
خذا كلينكس ورش كلونيا فيه ومسح الكلام وراح ينام على سريره"
الساعه 10 الصبح "
قعدت منايل التفتت ماشافت العنود ونوير : ياحليلهم اكيد قاعدين من الساعه ثمان خن اروح اخذلي شور وابدل ملابسي وانزل لهم
خذت مخدتها والحافها وقبل لاتطلع لمحت شكلها بالمنظره انصدمت من عيونها منتفخه وصايره حمرا "
فتحت باب غرفتها وانصدمت وهي تشوف بندر متمدد على السرير ماتوقعت بيكون موجود دايم يقوم من الساعه 7 اذا عنده دوام واذا ماعنده يقعد الساعه 8"
بندر ابتسم لها: اهلــــين
سوت نفسها مو مهتمه ولا كأنه موجود دخلت حطت مخدتها والحافها على الكرسي وفتحت الكبت تأخذ ملابسها
قام بندر وراح لها"
منايل حست بوجوده وراها وتوترت من قربه بس ماعطته وجه "
بندر قرب منها حيل : صباح الخير ياحلو
منايل سافهته ماردت عليه
مسكها بندر ولف جسمها كله صوبه وضمها على صدر : ادري اني غلطت لكن انتي السبب نرفزتيني بالكلام وإلا انا هذا مهو اسلوبي
منايل تصنم جسمها وتجمدت حست عظامها تيبست
بندر رفع ايده اليمنى وتم يمسح على راسها ويده اليسرى لف فيها خصرها : من حقي انج كزوجه تغسلين ملابسي ومن حقي تطبخين لي ومن حقي اشياء واجد انا متغاضي عنها وانا ماغلطت في طلب حقوقي لكن غلطي الوحيد اني اعرف ان عندج رعب وخوف من الحشرات واخوفج فيها
منايل حست نفسها بيغمى عليها من كثر ماهي تحس نفسها بتقطع من الخجل وبالذات وهي اتحس بحرارة انفاسه قريبه منه
بندر مسك وجهها بكفوفه و قربها من وجهه : شوفي لاتظنين اني متحسف عشاني ابيج اتعلمين الغسيل والطبخ لاوالله ماني متحسف ولاني مهون من هالشي ولاني متأسف إلا على شي واحد ان الدموع كلها من سبت الخوف اللي لليوم وعيونج منتفخه بسبت الخوف اللي انا سببه ( باس عينها اليمين وعينها اليسار وجبهتها ) انا اسف على الرعب اللي سببته (وطلع من الغرفه وخلاها )
منايل للحين متجمده في مكانها ومو مستوعبه الللي صار تحس بيغمى عليها "
بيت الخاله سعاد"
اجواء الحـــــزن مخيم على البيت كله اليوم او بالاحرى بعد ساعتين بيمر عناد يأخذ حور وخوانها يعيشون عنده"
خوف من المجهول وإلا احساس بضياع جميع المشاعر موجوده فيهم لكن شعور الحــــــــزن هو سيد الموقف "
الكل كان قاعد بالصاله ماعدا الخاله سعاد قاعده بغرفتها زعلانه عليهم ورافضه اتشوفهم او اتودعهم وفي نفس الوقت حزينه حيل وخايفه عليهم وللحين عندها امل انهم يهونون"
خذت حور تلفون البيت تبي ادق
منال خنقتها العبره : خلاص مليتي منا تبين ادقين على عنادوه ياخذك ويحرمنا منكم
حور ابتسمت ومن داخلها هم وحزن مايعلمه إلا الله : لي ملت عيوني نظرها مليت منكم وبعدين من قال بدق عليه
منال برتياح : هاه بدقين على منو
حور : ناقص وحده غاليه على قلبي ماوادعتها
منال نزلت راسها بحزن والدمعه بعينها من طاري الوداع
حور دقت على بيت الجده هيا "
ردت العنود : ألو
حور : ألو مرحبا
العنود : مرحبتين
حور : صباح الخير ياحلوه
العنود عرفتها : هلا ومرحبا ياصباح الورد يالله حيها
حور : الله يحيج اشلونج وشلون الوالده والاهل
عساكم بخير
العنود : كلنا بخير وماعلينا اخلاف ومانسأل إلاعنكم
حور : بعد عمري تسأل عنكم العافيه
العنود : طمنيني عنكم شلونج وشلون اخوانج
حور : كلنا بخير الله يسلمج
العنود : عسى دوم
حور : ماني مطوله عليج يالغاليه بس بغيت منايل ضروري اذا مافيه مانع
العنود : ابشري بس شوي لان بيني وبينج بندر مانعها من التلفون واذا شاف التلفون بايدها بيسويلها سالفه بس ولا يهمج بضبط الوضع واخليها ادق عليج بس عطيني خمس دقايق
حور : طيب خلاص انا بنطرها على الخط والله يعطيج العافيه ماقصرتي
العنود : ماسوينا شي يلا انا بروح اشوف
نوير كانت قاعده فالحوش ويا جدتها وبندر"
وقفت العنود عند باب الصاله واشرتلها بإيدها عشان محد ينتبه لها "
فهمت نوير وجتها : خير وش فيج
العنود : اسمعي حور على الخط تبي اتكلم منايل ضروري وانا ابيج اتلهين بندر وامي وانا بروح اناديها
نوير : خلاص ازهليها وانتوا اذا خلصتوا عطوني اشاره
العنود : خلاص زين
نوير رجعت للحوش عشان اتلهيهم والعنود راحت تركض اتنادي منايل "
العنود دقت الباب بسرعه : منايل بسرعه افتحي
منايل افتحت بخوف : خير اشفيج
العنود : بسرعه انزلي حور على الخط تبيج ضروري وقلت لنوير اتلهي امي وبندر وانا براقب الوضع يلا بسرعه
منايل بفرح : يــــلا
انزلوا البنات العنود وقفت ورا باب الصاله اتراقب "
ومنايل ركضت لتلفون : ألو هلا حبيبتي
حور بشوق : هلا حياتي شلونج طمنيني عنج
منايل : حور انا مشتاقه لكم حيل لازم اشوفكم
محتاجه اسولف وياكم وافضفض
حور ترددت تقولها شي عن موضوع روحتهم لعناد : منايل اشفيج صاير شي
منايل : صايره اشياء موشي واحد تكفين حور مشتاقه لشوفتج
حور ماقدرت اتروح وماتشوفها واتسلم عليها : خلاص شوفي متى يطلع رجلج
منايل : يمكن بعد ربع ساعه يروح ويا امه للمزرعه
حور : خلاص انا جايه بس ترى ماني مطوله بس بسلم عليج واشوفج
منايل استانست : مو مشكله اهم شي اشوفج ياحياتي
حور ابتسمت : يلا سكري لايطب عليج بندر وإلا امي
منايل : أي والله صدقتي يلا مع السلامه قبل لايجكوني
صكت منايل السماعه : العنود خلصت
العنود اشرت بإيدها لنوير بمعنى خلصنا"
لبست حور عبايتها : منول تروحين وياي
منال : لامالي خلق اقابل احد روحي انتي ولاتأخرين
حور : بس بسلم عليها وارجع
بعد نص ساعه وصلت حور وكانت منايل تنطرها عند الباب "
دقت حور الباب ومن الفرحه على طول فتحت منايل "
منايل ضمتها : هلا وغلا حبيبتي اشتقت لج حيــــل"
حور لامتها بقوه : وانا اكثر منايل شوفتج اتكفيني عن كل شي اهم شي اني شفتج
منايل ماهدتها: حور وربي فقدتكم انتي ومنوله بالاخص من بعد ماكسر تلفوني شين الحلايا انا ماحبه اكرهه
حور ابتسمت : مسرع ماامداكم ماصار لكم إللي حتى شهرين توالناس توكم ماعرفتوا بعض اصبري الصبر مفتاح الفرج
منايل : حور شنو هذا يبيني اغسل ملابسه واطبخ له انا حدي اسوي توست بجبن واصلا انا متهاوشه وياه تخيلي يبي يدخل البريعصي بملابسي
حور : ههههه ياحلوج وحلو سوالفج شوفي مااقدر اطول اكثر بس بقولج كلمتين المره بطريقتها واسلوبها تقدر تكسب الرجال وتخليه يتعلق فيها ويحبها
منايل : انا اصلا ابيه يطلقني مابيه يتعلق فيني ماقدر اعيش عيشتهم
حور شافت ساعتها : منايل انا تأخر يمكن مانلتقي مره ثاني كل اللي ابيج تعرفيه اني احبج ومهما طال الغياب مستحيل انسى اغلى صديقتين عندي انتوا مو بس صديقاتي انتوا خواتي
منايل بخوف : حور ليش تقولين هالكلام صاير شي
حور سحبتها ولمتها : موصاير شي بس اشتقت لج
منايل شكت ان فيه شي بس ماعرفت شنو
حور : يلا انا اخليج ديري بالج على نفسج
منايل : حور تكفين توالناس
حور : مااقدر اتأخر اكثر يلا فمان الله حبيبتي
منايل ودعتها : فمان الكريم حياتي
رجعت حور للبيت قبل لايوصل عناد بنص ساعه دخلت سيارتها بالحوش وعطت مفتاحها لمنال وعطتها بطاقات السحب حق معاش ابوهم وقالت اذا احتجت شي بقولج تسحبين وتعطينها نرجس تعطيها منار فالمدرسه أومي ومي اتوصلها لي ويا فوزيه لانها ماتضمن عمها يمكن يأخد البطاقات غصب عنها او يسوي أي "
وصل عناد وبدوا يركبون اغراضهم وكان حده مستانس يرحب ويهلي وحيالله عيال اخوي وإن ماشالكم البيت بتشيلكم عيوني "
الــــوداع الاخير"
نزلت الخاله سعاد ودعت منار وخالد ورفضت تسلم على حور "
مشت سعاد تبي تصعد الدرج واتباهى بعدم الاهتمام وهي من داخلها حزينه"
وقفت قدامها حور ودموعها تنزل لاإرديا : صح انج خالتي وعلى العين والرأس ولج حق تأخذين بخاطرج مني لكن موعلى كيفج تحرميني اوادعج
الخاله سعاد قلبها يعتصر بس سوت نفسها مو مهتمه
حور طاحت عند ارجولها وضمتها : ادري انج اتكابرين وادري ان كل اتسوينه من ورى قلبج بس صدقيني مصيرج مع الوقت تعرفين السبب وتعذريني
سعاد العبره خنقتها رفعت راسها وكأنها تمنع دموعها ماتنزل
حور تبكي وتشاهق : حتى لو زعلتي علي بس انا متأكده لو احتجت لج بأي وقت بلقاج الصدر الحنون اللي يضمني
سعاد اتكابر وهي خلاص واصله حدها صدت ودموعها تنزل : هذاك قبل كنت الصدر الحنون اما مجرد ماتطلعين من هالبيت تنسين شي اسمه خالتج سعاد
حور ضمت ارجولها اكثر : انتي تطلبين المستحيل مافيه قلب ينسى دقاته
وقفت حور ومسحت دموعها بكفوفها ومشت : منور وخالد يلا مشينا
ودعت حور منال ونرجس وفهد وخدامتهم كارين لانهم بيخلونها في بيت الخاله سعاد مايقدرون ياخذونها وياهم "
سعاد ماقدرت تستحمل اكثر وفي نفس الوقت ماتبي تضعف راحت بسرعه للمطبخ عشان ماتضعف واتناديها "
اما حور كانت اتجر خطواتها مثل اللي يمشي ووده احد يناديه عشان يرجع"
كانت في كل خطوه اتمنى خالتها سعاد اتناديها وتحضنها لكنها للاسف وصلت للباب وركبت السياره وماتحققت هالامنيه"
حور ومنار وخالد كلهم ركبوا ورا محد ركب قدام ويا عناد"
اما عناد كان ينكت ويسوالف عليهم سوالف ماصخه ومحد منهم معطيه وجه ولاحتى منتبهين له"
وصلوا لبيت عناد وكانت فوزيه فاستقبالهم وعلى طول خذتهم لغرفتها "
مر اسبوع على وجودهم ببيت عمهم وبدت الدراسه حور وقفت قيدها اما منار وخالد تكفل العم مصطفى بتوصيلهم"
الوضع للحين مستقر وعناد للحين ماطلع خياسه وسهراته الحمرا والفسق والفجور"
لكن حور ماتطمنت له وعمرها ماراح اتطمن له وكانت حريصه حيل على نفسها واخوانها لدرجه انها صارت تمنع خالد يروح للمسجد بروحه صار اغلب الوقت يصلي في البيت واحيانا يمر العم مصطفى يأخذه وياه للمسجد ومنبهتهم مايرحون ويا عناد ولاحتى فواز"
وبينها وبين نفسها كانت تقول هذا الهدوء إللي يسبق العاصفه عناد وزوجته ماهم خالين من الشر والحقد اللي مالي قلوبهم"
انتهــــى البــــارت"
اتمنــــى يحوز على عجابكم "
|
31-01-12, 05:30 AM
جديد مواضيع قسم ارشيف خاص بالقصص غير المكتمله
العرض العادي
