بسم الله الرحمن الرحيم
اللهم يا الله عليك ببشار واعوانه,
اللهم احصهم عددا وابدهم بددا ولا تغادر منهم أحد,
اللهم إنهم طغوا وبغوا وعاثوا في الارض الفساد,
وساموا المسلمين سوء العذاب,
اللهم عجل بنهايتهم واشفي صدور قوم مؤمنين ,
اللهم لاترفع لهم راية واجعلهم لمن خلفهم عبرة وآية,
اللهم اجعل بأسهم بينهم شديد,
وفرق جمعهم وشتت شملهم,
أنك ولي ذلك والقادر عليه ,
ولاحول لنا ولاقوة الابك,
انك على ذلك شهيد وبالاجابة جدير.
.
.
هلا وغلا بكل الغوالي الي يعطرون متصفحي المتواضع سواء با لردود او الاعجاب او التقييم او الشكر..,
او با الرسائل الي تجيني على الخاص ممتنه للجميع..,
البارت اهداء لكل من سطر في متصفح نوح الحمام ولو بكلمه وحده من دون استثناء..,
سواء مدح اونقد اوحتى يسأل عن مواعيد البارتات دليل اهتمامه با الروايه..,
اهداااء خاااص للغاليه صدوود
اليوم بنشوف عوق المزايين والمواجهه الاولى مع زياد وجهآ لوجه
.
.
يا الله تعالوا معاي...!!
وسالفه جديدة؛
.
.
.
البارت الثامن والعشرون
.
.
.
نغمة رساله على جوالي..
يارب سترك
فتحتها من زياد؛
(الجادل اللي حلاها غير
ضيعت في شمسها فيي
بعيونها سلسبيل رماح
و الموت بالسود متهيي
موت و انا اموت انا بالموت
كثيرها غرق شويي
لا قلت تكفين قالت جاك
و ان جيتها فجأة تعيي
و لا قلت مالي و مال الغيد
قالت وهم بينهم زيي ؟
و ان قلت انا تبت مالي كار
مقفي زمانين عن غيي
قالت و هي تلتفت للناس
زياد موته على يدي
محبك
زياد ابو العنود)
حتى رسايلك هبال..,
ياربي دخيلك لايكون عرف بس اني حامل والا ما قال ابو العنود...؟!
انا ما ابيه يرجعني الا علشاني ماهو علشان حملي ..,
ابي اعيش معاه وانا واثقه انه يبيني ماني على هامش حياته..؟!
ما ابي يرجع لي احساسي اني مفروضه عليه فرض ..,
والا مصيري مثل ما قالت امي راجعه راجعه مالي غناة عنه يعني وين بروح ..!
انا وضعي غير البنات لو بيتركني بتاكلني الناس بدون ملح..؟!
حاجتي لزياد اكثر من حاجته لي بكثير لا اهل ولا سند مالي الا اتمسك فيه..؟!
ابي ارجع وانا نفسيتي مرتاحه ماهو اضيع حياتي با التفكير يبني ما يبني..؟
خوله بضحك\صباح الخير دبه ..
عوق بضحك\هلا خوله حرام عليك لا تحطميني تقولين دبه...,
خوله\عادي حامل اكيد بتصيرين دبه..
عوق بترجي\خوله تكفين ما ابي احد يدري..!
خوله بدهشه\العمى يشوف حملك الي متى بتخبين انتي وش فيك..؟!
عوق تبتسم\خوذيني على قد عقلي ..,
خوله\امتحان بناتك الاثنين جاهزه..,
عوق\الحمدلله كل شي جاهز..؟!
خوله با ارتياح \الحمدلله مافي شكاوي عليك ولا على الماده..,
والبنات عادي عندهم ناقشتهم قلت تبون النحو يوم با الحاله والا مع ماده
كثير قالوابكيفكم ما تفرق معانا المادة مفهومه..,
عوق تبتسم\الحمدلله هذي نعمه من الله..,
خوله با امتنان \الله يجزاك خير والله شلتي هم عن البنات..,
عوق \خوله تدرين اني انا المادة الي ما افهمها
اعيد وازيد على نفسي واعاني بجد لين احفظ ..!
لكن با الشرح اوصل المعلومه صح والبنات يتقبلونها مني من فضل ربي..؟!
خوله با اعجاب \عوق لا تستهينين بنفسك فيك مميزات كثيره ما شاء الله عليك..,
بنت اختي بثالث ادبي تدرسينها تقول استاذه عوق ثقافتها عاليه..
عطوها مواد الثانويه العامه بتبدع لكم فيها..
حصةالنحو مرات تصير حصة دين ومرات اجتماعيات ومرات عربي واحيان علم اجتماع ..,
عوق بضحك\ لا والله تبالغ بنت اختك لكن حلو انك تغيرين شوي من روتين الدرس..,
وتجيبين معلومات عامه فيها قيم وتغرسينها بطالباتك..
اردفت عوق بتساءل\خوله اي وحده بنت اختك ما اعرفها..؟
خوله با استغراب \ما عرفتيها رانيا عبد العزيز ..,
عوق بدهشه\عرفتها لكن ما طرالي انها تقرب لك ابد ما كنها منكم فرق بينها وبين امها..؟
خوله تضحك \ ولا تشبه احد فينا نسخه من اهل ابوها لكن تعجبك ذكيه وشاطره..,
عوق\لا ما عليها ما شاءالله متفوقه..,
اليوم مافي شي خوله بطلع بدري..؟!
خوله\خلاص وقعي حضور واطلعي ما عليك ..,
طلعت للبيت على 8الصباح احس نفسيتي اليوم غير..,
افضل بكثير من الايام الي فاتت..
دخلت المطبخ من زمان عنه قلت للخدامه تكتب الاشياء الي ناقصه ..!
طلعت لسوق اشتريت اشياء كثيره ناقصه بيتنا..,
اخذت مفرش لسريري ثقيل انا دمي بارد واحس با البرد بسرعه..,
احس كل يوم تنخفض درجة الحراره اكثر..,
اليوم الجو غيم وحلو ما ادري انا اشوف الدنيا كذا والا هو فعلن الجو حلو..!
دخلت المطبخ طرى لي اصلح غدا وارسل فيه السواق لعمال يشتغلون في بيوت قريبه من بيتي..!
صلحت الغداءبدري وزعته بصحون وغلفته ارسلت فيه الخادمه تعطي السواق يوزعه..
قبل اتزوج كل فتره كنت اطبخ ووزع لعمال يعرفهم سواقنا..,
لكن من تزوجت تركت ابواب كثيره من ابواب الصدقه..!
لكن ان شاء الله ملحوقه...
صلحت سفره غداءكامله ونويت اكلم خالتي نوره تقول لبناتها يتغدون معاي ..,
اكيد كل بناتهاالي يدرسون غايبات السبت تبدى الامتحانات..,
بعزمهم يتغدون عندي ويرجعون يذاكرون يعني فترة راحه لكن يقضونها معايا..,
خصوص الجوهره زواجها بعدالا متحانات وانا مقرره مااحضره ما ابي احد يكشف حملي ..,
بشوف وش نا قصها واكمله لها عايلة مسلط مهما سويت مستحيل بجازيهم على رعايتهم لي
خليت الخدامه ترتب غرفتي من زمان ما رتبتها من قلب وتفرش لي المفرش الجديد..,
اول كنت اكره دخول الشغالات لغرفتي لكن الحين صرت اتعب بسرعه من الشغل
ما اقدر اسوي اكثر من شغله بنفس الوقت ..,
ودخلت للمطبخ مبطيه عن العزايم وترتيبها..,
خلصت شغلي واخذت دش عن ريحةالطبخ الي بديت اتقبلها..,
با اكلم خالتي ام ابراهيم واحضر السفره واغرف الاكل..!
غرفتي تغير شكلها حسيت صار فيها حياه..,
سبحان الله كيف كنت دافنه نفسي وانا حيه..!
باقي البخور الي مع الشتاء يعطي جو ويغير النفسيه
لبست قميص بيت جديد غامق يخبي ها البطن الي صارشكله كنه مخده جايه با العرض ..,
وسرحت شعري تذكرت يوم يسحبه زياد ورتبته بتسريحه بسيطه ...,
حطيت روج وكحل ورشيت عطر خفيف العطور كلها كرهتها
حتى الشامبوالمعطر ما احبه ما تقبلت ريحتها الا من اسبوع..,
يعني معقوله تأثير الوحام بدا يخف لبست اجلال الصلاة وصليت الظهر
بكبر اتسنن دق جوالي الا زياد بسم الله هذا وش يبي ..,
دق اكثر من مره ياربي ياهو لحوح ها الانسان وش دراه اني موجوده..,
رديت عليه
زياد\مرحبا عوق انتي في البيت..!
عوق \ليش ..؟!
زياد \كنت مار من عند بيتكم وشفت سواقكم وسألته عن خالتي رجعت اولا..؟
وقال لي انك موجوده طالعه بدري اليوم..,
عوق \امي بتتأخر ماراح تجي ها الوقت..,
زياد \طيب افتحي الباب انا عند الباب بسرعه..,
صعقني كلامه هذا وش جابه ها الحين لو اني تمنيته ماجا..,
زياد \عوق انتي معي..,
عوق با ارتباك \هاه ايه هاه بتفتح لك الشغاله انا شوي تعبانه ..,
زياد\مو مشكله انا ما راح اطول فترة البريك وماشي..,
ياربي وش اسوي منين طلع لي هذا لا بعد كاشخه انا وجهي وبخور وغدا..,
ان دخل كشف كذبتي ودرا بحملي..,
ابد ماهو وقتك يا زياد استاهل انا الي عطيته وجه...؟!
ناديت الخدامه وقلت اذا سأل عني قولي مدام تعبانه وبتنام..,
وش اسوي انا حتى صلاتي ماكملتهاللحين اجلال الصلاه على راسي ..!
سمعت صوته يقرب من غرفتي ويناديني..,
دخلت سريري بسرعه وغطيت كل جسمي لا يشوف مني شي وتسندت على ظهر السرير وحطيت مخده على بطني ..,
دق الباب وعلى طول بسم الله فتح الباب ودخل للغرفه ما انتظر حتى اقول ادخل..,
مد يده يسلم واضطريت امد يدي له ودنق وسلم على خدي ..,
زيادبقلق \سلامتك عوق وش فيك الخدامه تقول تعبانه مره..,
عوق بتوتر وارتباك\لا بس شوي بردانه وتعبانه تخبر تعب حريم..,
زياد يضحك بتهكم \ اهااا تعب حريم ..!! ماعليك الا العافيه ان شاء الله..,
سحب كرسي وجلس عليه الاخ شكله مطول..,
اردف زياد با ابتسامه\ماشاء الله وش عندك عطر وميك اب وحركات وانتي تعبانه..,
عوق با ارتباك\ يمكن اثر ميكاج وعطر الصباح لما طلعت للمدرسه..,
زياد يناظر حوله \عوق احس شكل غرفتك احلى من اول مره دخلتها ..!
عوق بملل \ علشان ترتبت اول مره انت شفتهاكانت حوسه..!
زياد يقرب الكرسي اكثر لسرير عوق ويحط يده على المخده وبهمس \متى بترجعين تنورين بيتك..؟
عوق تبلع ريقهابرتباك\زياد ماهو وقته ها الكلام انا الي الآن احس بمرارة كلامك بحلقي..
زياد يكتف ايديه ويسند ظهره للكرسي ويتنهد بوجع\عوق انا اي كلام بقوله ادري انه ناقص..
يمكن علشان ما اعرف اعتذر او ما تعودت اعتذر
لكن والله عارف نفسي غلطان والغلط راكبني من ساسي لراسي..؟
عوق بضيق \انا صدمتي فيك يبي لها وقت
تدري الي الآن ماني مستوعبه كلامك ذاك اليوم ولا انت كيف قلته..,
زياد بحزن ووجع\عوق انا كنت راح انجن كل مافكرت لو امي توفت وانا بعيد عنها..,
او كنا مسافرين مثل ماخططت بداية الملكة
والله اني افز وارتاع بدون شعور كل ما جا في بالي لو امي ماتت وانا بعيدما شفتها..!
تتوقعين سهل علي يوم اسمع صوت نجلاء تبكي وهي تناديك
او وقفتك بالليل في الشارع والعالم طالعه لصلاه ..,
خفت اطلع ويتطور الموضوع اكثر واكثر..,
ويمكن نستفز بعض واقول كلام اكبر من الي قلته
انا طلعت صدق قدامك ولا تكلمت كنت عاجز عن الكلام
وخفت يصير بينا صدام وعناد با الشارع ..,
لكن وقفت قدام المسجد اراقبك ما قدرت حتى ادخل اصلي الا لماشفتك ركبتي سيارتكم
ورجعت لحقتك بسيارتي لحد ماوصلتي بيتكم وتطمنت عليك ..,
اردف زيادبا انكساروترجي \ عوق وش الي يرضيك واسويه الا الطلاق..!
عوق بتوتر \انا بقولها لك صريحه انا استخرت با الطلاق مرات ماهو مره ولا ابي اتطلق..,
اردفت عوق با ارتباك وتردد\وانت لو تبي تشوف حياتك عادي مع غيري..؟!
وقف زياد حسبت انه خلاص بيمشي الا راح وجلس على مكتبي ويفتش بسم الله وش يدور..,
اخذالبوم صور زواجنا والبوم صور طفولتي كنت اتفرج فيها وتركتها فوق مكتبي ..,
ورجع على الكرسي مع الالبومات ..,
زياد يناظرالصور\حرام عليك عوق كيف تقولين ها الكلام انا راضي بوضعنا هذا..,
لكن لا تقولين شف حياتك مالي حياه مع غيرك..!
عوق بملامه \ انا هذا قراري ولا راح اتراجع عنه وش يضمني انك اذا زعلت ما يتغير كلامك ..,
زياد\انتي وين من البنات هذولي..,
عوق\ماعرفتني بينهم..,
زياد يبتسم ويرفع حاجب\ما ادري لكن بشبه من عندي..,
الي تضحك وسنونها طايحه تشبه نفوله بنت جزاع يمكن امهازوجة جزاع..!
والبنات الثنتين الي جنب بعض اتوقع بنات مسلط يشبهون عياله..؟
وهذي الي لابسه عبايه شكلها عباة امها والطرحه ما ادري كيف جايه من خوات جزاع..
والي شعرها طويل وعلى جنب يقال يعني انها تسريحه شكلها انتي..!
عوق تبتسم\كلامك كله صح..
زياد با استغراب\والصوره هذي الولد الصغير الي اتوقع انتي الي شايلته اما عبدالله او نمر عيال مسلط..,
عوق تبتسم \ صح هذا نمر وقتها عمره اقل من سنه ..,
زياد يضحك \والله شكلك تحفه با الصوره شايله شنطه وشايله الولدوش حادك على ها التعب..,
عوق بخجل\ نلعب حريم وهذا كأ نه ولدي والشنطه معاي جايه زياره لريم صورتنا اخت ريم الي بياخذها نواف..!
زياد يناظر المخده الي على بطني \ الله كريم..
حسيت بطني مغصني ويا الله ابلع ريقي ..!
عرفت معنى المثل كاد المريب ان يقول خذوني
زياد با استغراب \قديمه حيل الصور..,
عوق \مومره لكن الكاميرا فوريه وتحسسك انها قديمه..!
زياد بدهشه وفرحه \صور زواجنا ماشاء الله متى طلعتيها والله انها في بالي ..!
عوق\ طلعتها ريم يوم شافتني تأخرت عليها..؟
زياديفتح الالبوم يبتسم بحب\تدرين انك الحين احلى بكثير من الصور احس في شي زاد حلاك حلى ..
اردف زياد بضحك\ بنات خواتي ازعجوني يقولون وين صور زواجك..!
عوق با ارتباك\عادي تبي الصور خذها ..؟
زياديغمض عيونه ويتنهد بهمس \وش ابغى با الصور اذا الاصل للحين قلبه شايل علي..!!
سكت ما ابي اطول الكلام معاه..,
زياد بضيق\نجلاء مره متأثره من الي صار بينا وتقول انا السبب خربت بيتك بدون قصد..,
عوق \نجلاء مالها ذنب كلمتني اول ماجيت عند امي..!
زياد يبتسم \انا عطيتها الرقم وقلت لها تكلمك ..!
اردف زياد\ ترى كم مره يبون يجونك هي والبنات لكن مستحيات وخايفات ما تعطينهم وجه والا تطردينهم..!
عوق با استنكار\لا والله متى ماجو حياهم الله ..!؟
زياد بضحك\لو يسمعونك جو لك بكرا..!؟
عوق با ارتباك وذعر\لا زياد تكفى انا تعبانه ومرهقه ها اليومين وبعدها امتحانات وتصحيح اذا فضيت خبرتك ..َ!
زياد بتهكم \ تم يا مرهقه والف سلامه عليك انا ماشي توصين شي..!
عوق بتوتر \ما عليش زياد ما اقدر اوصلك للباب ..,
زياد\عادي انتي ارتاحي عارف طريقي يالله سي يو..
مشى زيادوما صدقت بس طلع مع الباب واقوم اقفل الباب واكمل صلاتي..
الله يسامحك عيشتني برعب ما بغيت تمشي..,
طلعت علشان اشوف عزيمتي لبنات ام ابراهيم...!؟
كلمتهم قالوا جايات من يفوت طبخ عوق..؟!
حضرت السفره ورتبتها ولبست شال طويل بحجة البرد ما ابي احد يلاحظ حملي منهم..
دخلو بنات ام ابراهيم الجوهره وروان وميعاد وملاك يا الله من زمان احس عنهم..,
سلموا وعتاب وهواش اني قاطعه ..
عوق با استعطاف \ طيب انتوا ليش ماتمرون..؟!
ملاك \انتي داريه عوق احنا ما نطلع الا لبيتكم وحتى بيتكم لازم عزيمه..؟!
روان تضحك \يعني افهميها عوق ملوكه موعارفه توصل المعلومه ليش ما تعزمينا ونجيك..؟!
عوق \ترانا بيت واحد تجون بأي وقت ماهي بينا ها الاشياء..
ميعاد با استنكار\تبين امي تتبرى منا كل ما قلنا ها الكلام هاو شتنا..!
عوق بدهشه\ليه يا كافي بيتنا ماهو بيت مسلمين..!
الجوهره بضحك\وكل هذا علشانه بيت مسلمين ..!
تعرفين احنامانجي الانسهرامي تقول انتن ازعاج وام عوق ما تستحمل اصواتكن تسوهرن الليول..!؟
الناس وراها صلاة فجرعاد الافضل انا ما نجيك هذا قرار النوري الاخير..!
عوق بتهكم\طيب يا خليفات ريم توني عرفت انكن خوات ماغيروكم با المستشفى..؟!
امي بتتأخر با البر مرو علي اذا خلصتو ا امتحانات الحين معذورات..,
ملاك بسخريه \ورانا عرس الشيخه الجوهره من يوم نرفع روسنا الا جا العرس..!
عوق \الف مبروك جوجو..
الجوهره تبتسم بخجل \الله يبارك فيك ..!
ميعاد\ عوق لازم تحضرين خلينا نستانس عرس الجوهره بيصير خطير الي ما يشتري يتفرج..!
عوق \اكيد ان شاءالله بيصير حلو ماشاء الله جماعتكم واجد اذكر عرس ريم..!
روان با استهزاء \لا عوق القصد ماهوكذا..ّ!
ميمي تقصد ان حريم خوالي شابين على امي شبه..
اول ريم تزوجت جزاع والحين الجوهره اخذت نواف..!
عوق با استغراب\ خير ان شاءالله وخالتي وش دخلها..!
ميعاد ترفع حواجبها بقهر\والله من الحسد يا عوق والا صدق امي وش دخلها..!
خالتي نفلا هي الي بغت الجوهره ولا ماكان تم العرس
خالي وعياله ما يشكون خيط با ابره الا بشورها حتى امي وريم عارضوا
وامي قالت لنواف فكنا يا نواف بنات عمك وراك والجوهره بيجيها رزقها..
ورغم معارضة امي وريم الا ان نواف اصر على الجوهره..,
عوق با استنكار\ليش يعارضون البنت اذا جا يخطبها الرجل الكفؤ ما يجوز انها ترفضه شرعآ..
تستخير وتتوكل على الله..,
روان \والله اذا جينا للجد ترى عيال خالي عبد الرزاق ماعليهم..!
راعين صلاة وصلاح وصلة رحم وبارين في والديهم يعني مافي شي يعيبهم و خالتي نفلا تعرفينهاشوي حاره..!
ملاك بحزن\حتى خوالي الثانين من ورى حريمهم الله يهديهم..!
قبل كم يوم واحد من خوالي يقول لأامي ليت حريمنا مثلتس ..
يمدن ايديهن ويرجعن بعظام وانتي يا نوره تمدين يدتس وترجعين بلحم..!
عوق بتعجب \وش قصده من هالكلام !
ملاك \قصده ان امي اذكى من حريمهم هي تجيب لنا اللحم وحريم خوالي يجيبن لبناتهن العظام..؟
عوق\ياربي على التفكير ترى المزوج الله ماهو الناس..!؟
ميعاد \من يفهم ها الكلام والله امي تكسر الخاطر ان كانه من عماني والا خوالي..!
روان\تخيلي عوق انها بس تبي الستر منهم لكن محد معجبه..؟
عيال عماني وامهاتهم حسبي الله عليهم
كل ماجا احد يسألهم عن الجوهره بيخطب نشبوله قالوا لاتخطب نبيها..!
موقفين حال الجوهره لا هم الي جو يخطبون ولاهم الي قالوا خلوها تعرس ..!؟
ينتظرون امي تخطب لابراهيم من بناتهم وبعدين يتكرمون يخطبون..!
وابراهيم اخوي يا قلبي عليه صغير..,
توه مخلص دبلوم ومتوظف من وين بيفتح بيت..؟!
ملاك بتهكم \والحين وش استفادو عماني ابراهيم حلف ما ياخذمنهم لو يقعد بدون عرس..!
عوق با استنكار وملامه\ليه يحلف هذي قسمه ونصيب الواحد ما يدري وين قسمته..؟
الجوهره بقهر\ابراهيم معه حق يا عوق يقول انا ماني لعبه لهم يفرضون علي بناتهم ..,
عماني سوو علينا ليله سودا بعد ملكتي على نواف..,
وينهم من زمان انا ما طلعت لهم فجاءه ..!؟
من متى وانا مخلصه كليه وقاعده با البيت ..!
اردفت الجوهره بقهر وسخريه\ريم اكبر مني بسنه وهذاهي عندها 3اطفال تعرفين جماعتنا يزوجون البنات بدري..,
عماتي وعماني بينهم ماشاءالله الي فيه خير من عيالهم اخذوه لبناتهم والا بنات مسلط بطقاق..؟
وابراهيم اصغر مني بسنتين وهو ولد كانوا مخططين عليه..!
عوق \ وش عليك منهم خلاص انتي تزوجتي وماعليك من الي يعارض والا يوافق ..؟!
روان بحسره وقهر\عوق شي يحرق القلب فعايلهم فينا..!
تخيلي وحده من حريم عماني دايم تسب عيال خالي عبد الرزاق ماهم عاجبينها
يوم سمعت ان خوالي يدورون لنواف بيزوجونه
راحت وخطبت نوف بنت خالي عبد الرازق على امل ان خوالي يخطبون من بناتها
تحسب الناس عميان ما تشوف ولا تدري وش تفكر فيه ..,
لكن تعرفين خالتي نفلا جنيه ورافضة اصلن مبدأ الشغار خذ اختي واخذ اختك
خلتهم لين يملكون على بنتها وصقعتهم بخبر خطبة الجوهره..
حرمة عمي بغت تنجلط بس وش تسوي تورطت واخرتها قالت لعمي لا تترك الجوهره ياخذونها خوالها
نبيها لسلطان وسلطان اصغر من الجوهره با اربع سنين وطردهم ابوي صاحين انتم ازوج بنتي واحداصغر منها
وللحين طالب يدرس با الجامعه..,
ملاك بقهر \الله يكفينا شرهن ماهن مرتاحات الا لازم نصير مثل حظ امي..,
ونتزوج شيبان ما يصير ناخذ شباب
عوق \ انسوهم خلاص الرازق الله وعمي مسلط يستاهل كل خير..,
روان بوجع\ابوي عندنا با الدنيا كلها الله يطول بعمره لكن من مثل ابوي ...
انا لو يخطبني واحد مثل ابوي كان تزوجته لو انه كبر ابوي الحين وانا مغمضه ماتراجعت..
عوق بمحبه واعجاب \عمي مسلط من الي مثله والله عندي اغلى من الاقراب ..!
روان \والله حتى ابوي يعتبرك وحده من بناته..!
ملاك بضحك\روان خبري عوق كيف ابوي تزوج امي تصلح مسلسل بدوي قصتهم..!
روان تبتسم\ سالفتهم تهبل اسمعي عوق ..,
عوق بدهشه\لايكون عن قصة حب ..,
روان بضحك\ هي قصة حب لكن بين ابوي وجدي ابو امي..,
ابوي اكبر اخوانه توفى ابوهم وعماني وعماتي توهم صغار
وابوي قام فيهم وكدوتعب عليهم وزوجهم كلهم..
يوم تقدم با العمر انتبه لنفسه وخطب من ناس واجد ورفضوه ..
ابوي يقرب لجدي ابو امي من بعيد ويعزون ويقدرون بعض مره..,
زاره ابوي مره وقال له جدي وراك للحين ما اعرست..,
قال يا ابو عبد الرزاق ضيعت شبابي على اخواني..؟!
والحين تناصف عمري وكل ما خطبت انرفض اني كبير با العمر..,
قاله جدي ولك عندي الي ما ترفضك..,
وتزوج امي وربي رزقهم فينا الحمدلله
ميعاد\ربي عطى ابوي على نيته..!
عوق \الطيبون لطيبات الله عوض تعبه في اخوانه..,
روان \وليتهم يستاهلون ناشبين لنا نشبه الله يرزق خواتي من عنده
عوق \ماعليه يابنات هذا حال الناس ما وقفت عليكم الحياه متناقضات محد يشوف خطاه..!
ميعاد بقرف\بالله غيرو ها الموضوع المآساوي احنا جايين ننبسط ورانا السبت البعبع الله يعينا نواجهه..!!
عوق\الجوهره خلصتي شغلك..؟
الجوهره\خلصت من زمان ..,
ميعاد بسخريه\هي خلصت بس عساها ما تقعد بالليل تهوجس والصباح تهبل في امي لسوق..,
المشكله انها من هبالها ترجع تشتري نفس الشي مرتين..!
روان بضحك\عوق لو تشوفين نمر جننها يقول انتي لو ماخذه رجل عوق وش كان سويتي فينا..!!
عوق وهي عوق ما سوت سواياتس ولا شرت مثلتس..؟
عوق بضحك \لا عاد نواف والله يستاهل زياد يمدحه ما شاءالله ..!
ملاك تضحك بتهكم \ما قلنا شي لكن الجوهره على ان نمر توه يتعلم يسوق..
وتعرفين شفقة العيال با السواقه اول ما يتعلمون طفش من السواقه بسبب كثر مشاويرها لسوق..!
عوق \لا تبالغين ملوكه احرجتي جوجو..,
روان ب استغراب \عوق ترى شفنا رجلك قبل ندخل كان واقف عند بابكم يكلم جوال..؟!
يوم شافنا ركب سيارته ومشى..,
ميعادبدهشه \استغفر الله ما عرفته الا بسيارته اذكرها يوم عرستس متغير ونحفان ..!
استغربت عوق الطباخه رجلها جسمه كذاوالله يوم العرس ماكان كذا..!
الجوهره\شكل عوق تطبخ له لكن تاكل الاكل قبل يوصل تشوفينها صايره دبه ..,
عوق بضحك \ كان موجود رجع لشغله فترة غدا عندهم وبعدين ترى شغله مرهق علشان كذا الاكل ما يبين فيه..!
روان بضحك\لا قصدك بسم الله عليه ها الاكل وين يروح مع طوله ماشاءالله..,
ملاك بممازحه \ فكونا من رجل عوق المهم تكفين عوق تعالي معانا..,
شوفي جهاز الجوهره كانت تلوم ريم صارت اخس منها..!
روان بتهكم \ملوكه بالله احناوش خسرانات كله بكرا يرجع لنا مثل ريم..!
عوق بمشاكسه\سبحان الله با الانسان ينصح ولا ينفذ ليتني سجلت نصايحكم وسمعتها لكم يوم جهازي ..!
ميعاد\والله عوق لاتتحسفين على شي انتي الي ربحانه فيهم..؟
عوق بتساءل\جوجو اخذتي مفرش والا باقي ..!
الجوهره \لا للحين باخذه ان شاء الله بعد الامتحانات يمكن ينزل شي جديد..!
عوق \لا تشترين باخذلك على ذوقي..
الجوهره منحرجه\تسلمين والله ماله داعي ..,
عوق با اصرار\شاريته شاريته والله لا ازعل لو اسمع انك شريتيه المفرش خلاص علي..
روان \من قدك جوجو عوق ام الذوق بتشتري لك مفرش..,
انبسطت مع البنات اليوم وطلعوا بعد صلاة العصر..
صليت العصر وبريح شوي من الصباح وانا اشتغل..
اخذت الجوال علشان المنبه لا تفوتني صلاة المغرب..,
<معلومه قريتها مره ودايم تحفزني ما افوت ها الفريضه>
( صلاة المغرب فإنها الساعة التي تاب فيها الله تعالى على آدم عليه السلام
فما من مؤمن يصلي هذه الصلاة محتسبا ثم يسأل الله تعالى شيئا إلا أعطاه إياه)
لقيت تنبيه رساله فتحتها من زياد؛
(ام العنود طبخكم اليوم ريحته شي مو طبيعي
من طلعتي من بيتك اما مطاعم والا خدامات خواتي مافي احد يحن على حال اليتيم الي مثل حالي
والله ما اصدق بس متى احد يعزمني كأني ماني شايف خير)
ياليل ابو لمبه هذا ماهو جايبها لبر..؟
بينط لي كل شوي ماني فاضيه كل يوم عذر علشان ما يشوفني..,
ارسلت له؛
(هذا طبخ خدامتنا كان عندي بنات عمي مسلط جايات يشوفوني عارفين اني تعبانه وتغدوا)
اكيد هو داري انهم بنات ابو ابراهيم شافهم يوم يطلعون من بيتهم
الي مقابل بيتنا على طول ودخلوا عندي ..,
ناديت الخدامه وقلت لها صحيني على اذان المغرب..,
جوالي قفلته مره وحده عارفه ان زياد ماهو معتقني وانا ابي اناااام..,
نمت وصحتني الشغاله على اذان المغرب صليت وقريت اذكاري وردي متعوده اقراهم على طول بعد صلاة العصر
لكن اليوم اخرتهم بعد المغرب اليوم فاضيه لا تصحيح ولا تحضير..,
الحمدلله حتى نفسيتي افضل بكثير من الايام الماضيه طلعت لسور بيتنا الجو بارد..؟
رجعت لغرفتي البوم الصور على مكانه فتحته فعلن زياد متغير عن يوم زواجنا..
من تزوجت تو كملت خمس شهور وزياد مره نحف على نحفه يمكن متأثربموت امه الله يرحمها
تذكرت امي اشتقت لها بكلمها لكن خلاص ما راح اقول لها ترجع خلها تستانس..,
فتحت جوالي وكالعاده تنبيه رسايل
رساله من زياد؛
(تسمحين لي اليوم اجيك واتعشى من طبخ خدامتكم
من يوم شفته با الحافظات وانا انسدت نفسي عن الاكل
مشتهي طبخ خدامتكم ارحمي حال اليتيم الي ماعنده ام
ولا علشان انتي عندك ام تكبرتي علينا)
لاحول ولاقوة الا بالله هذا وش الحل معه..
ارسلت له ؛
(مو مشكله بقول لخدامتنا تطبخ لك وتحضره لك با المشب الخارجي تعشى وتتوكل على الله انا تعبانه وبناام )
ارسل على طول ؛
(اللهم اجز عنا كافل اليتيم خير الجزاءاللهم اجعله مع الرسول الاعظم في الفردوس الاعلى)
عسى بس ما يقول افتحوا انا عند الباب
ارسلت له؛
(اذا انت تبي عشا مضبوط خلك في بيتكم واذا خلصت الشغاله عطيتك خبر)
ارسل؛
(على اني قريب من بيتكم لكن خلاص برجع وانتظر اتصالك)
ارسل بعدها رساله؛
(طويله قصة عيونك وانا عمري بها موجود
تعيشني الا مل لحظه وتكسر حاجز الواقع
يقولون من قديم الوقت من سافر مصيره يعود
وانا سافرت بعيونك ولا ادري متى راجع)
يا ليل الرسايل الا ماعاد تخلص هذا وش بلاه..
يا خوفي ان سيارته عند بابنا ماهو على قولته قريب هذا ما صدق اعطيه وجه..,
بخلص شغلي لا يطب علي هذا خلاص اخذت رجله على بيتنا والله ما عاد يفك..,
صلحت عشا لزياد وحضرته له بالمشب..
وحذرت الخدامه اذا سألها زياد من صلح العشا تقول هي..!
ارسلت لزياد عشاك جاهز وخبرت الخدامه تنتبه للباب الحين بيجي زياد..
ودخلت غرفتي وقفلتها تحسب لجنون زياد وكلمت امي على جوال سعد قبل تنام..,
ام عوق\هلا وش عندتس اليوم داقه مرتين..,
عوق\لا يمه حياتي بس مشتاقه لتس..,
ام عوق\الله يسلمتس وشلون امورتس ..
عوق\ابشرتس طيبه من البيت للمدرسه..
ام عوق\وال مسلط اخبارهم..,
عوق\ماعليهم طيبين عرس الجوهره اول الاجازه تحضرين..,
ام عوق \عندي خبر اشوف يمكن اني احضره..
نوره ما مرتس ..؟
عوق\الا والله ماتقصر تمر هي وبناتها..,
ام عوق\ الحمدلله ما قصروا قبل بيقصرون ها الحين المهم لا تنسين وصاتي لتس
عوق \وش وصاته يمه..,
ام عوق \والله ماعندي الا سعد وام ناصر وشابين نارنا..
ازين من حبست البيوت الي جابت لنا الامراض والتكاتره الي يعلون القلب بسوالفهم..!
عوق\يمه وش تقولين ..!
ام عوق\سلامتس يوصل سلامتس وهم بعد يسلمون عليتس..
عوق بخوف\يمه اسم الله عليتس وش فيتس
ام عوق \مافيني غير العافيه ما ابي شوفت التكاتر والله لايحيجنا لهم ..
ولا تتركين البيت لين اعود وماهو تفتحين الباب لكل من هب ودب..!
وانا موصيه نوره ما تخليتس تعستس كل يوم ..,
عوق با ارتباك\طيب يمه..؟!
ياربي امي وش قصدها بكلامها لايكون تدري ان زياد هنا يا فضحي منها وهي اخر مره طاردته..,
تلميحاتها ماتبي سعد واهله يدرون وش بيني وبين زياد
لكن توعدني لودرت اني عطيت زياد وجه
انا وش خلاني ارد عليه واعطيه وجه يويلي منها لودرت من الشغاله انه دخل غرفة نومي
والا اني طابخه له عشا وجا وتعشى
هي وش قلبها عليه كان خلتني بس انا
وهي محايده بينا..,
انا استاهل كبرت السالفه وامي دخلت فيها..,
حتى لو برجع وشلون بحط عيني بعين امي عقب الي قلته لها..,
قمت صليت العشا وفتحت قرآني اللهم اني اسألك الانس بقربك
اخذني الوقت وانا اقرا قرآن ..,
ما انتبهت الا على صوت الجوال وناظرت الساعه كانت ثلاث الفجر
والمتصل زياد
ما رديت عليه قمت كملت صلاتي وانسدحت بفراشي اخاف انام وتروح علي صلاة الفجر..,
امي حياتي بعيده والا هي الي كانت تصحيني ما ترتاح لين اصحى قدامهالصلاة الفجر
ارسل زياد عوق؛
(اذا انتي صاحيه ردي)
ما رديت
ارسل رساله ؛
(تسلمين حبي على العشا والله ما ادري وشلون اشكرك انتي وخدامتك يوم عطفتواعلى حال اليتيم المسكين الي هو انا)
ارسلت له؛
(الحمدلله يوم اعجبك العشابوصل شكرك للخدامة )
ارسل؛
(عوق تكفين ردي ما فيني نوم)
يا بلشتي انا وش خلاني ارسل بينشب لي مثل امس سبحان الله بكل شي مستعجله
وان درت امي اني اكلمه بتزعل علي وهذا ازعجني يدق برد عليه وبسكر الصلاه قربت
عوق بحده\نعم انت ماتنام..,
زياد\هلا اخيرآرديتي
عوق بتهكم\والله من ازعاجك رديت..؟
زياد\مسموحه ام العنود..,
عوق بتذمر\ياليل ام العنود..
زيادبحزن\ليش هذا اسم امي الله يرحمها ماهو عاجبك..,
والله لو يصلح ان الواحد يسمي بناته نفس الاسم لو يجوني عشر بنات مالهم الا ها الاسم..,
عوق\وانا وش دخلني الموضوع هذا احتفظ فيه وناقشه مع امها..,
زياديضحك \وهذا انا اتناقش معها..,
عوق بسخريه\يا حليلك تحلم بروح اتعشى جوعانه..,
سكرت وبدون ما انتظر جواب زياد
فتحت باب غرفتي وطلعت با كل شي ذبحني الجوع ..,
دخلت المطبخ الا بوجهي ....
.
.
.
(كلمه اخيره)
يا ابن آدم . خالف موسى الخضر ثلاث مرات , فقال : هذا فراق بيني وبينك ..
وأنت تخالف الله في اليوم مرات , ألا تخشى أن يقول لك :
هذا فراق بيني وبينك ؟!
الحسن البصري
.
.
.
الي الملتقى قريبآبأذن الله
وسالفه جديده
طيف الأحباب
ام الوليد
تذكروني واحبابي بدعوه طيبه
25-02-12, 07:34 PM
جديد مواضيع قسم القصص المكتمله من وحي قلم الاعضاء
العرض العادي
