السلام عليكم..
ام سوونــــــــــــــــــــه داائمااا داائماااا انتي بالمقدمه.. تعجبيني ويعجبني حرصتس على التواجد هنا مهما كانت الظروف اللي تواجهينا لاابد نلقاتس هنا ببارت جديد وقووووي ويجمل احداث واكشنات.. ام سوونه أي لف يوو>>فيس يغازل..هخهخهخه
ام سوونه بالله عليتس فياااض هذاااااا خليه يصدم ويتعوق مؤقتا بس ..جعله للبلاا اللي يبلاهـ مسووي نفسه زعلان على نجود ومتأثر من وضعها.. واللي يقهر اكثر انها يبي يستمر بالسالفه عشان يحر امها الله يحرك يااشيخ تنبل ماتفهم انت..
مازاتلت اقول ان ام فياااش بيكون لها يد بالموضوع وبتحاول تحل هالسالفه قبل تكبر..بس اهم شي ام طارق هذي يقضبونها قبل تخرب الباقي..

طارق:صرااحه حسيت انك اليوم مبدل مهوب طارق اللوح حق الاجزاء اللي قبل ..لااااا حسيتك راكز وعااااقل وفاهم وقااعد تتتصرف بحكمه.. الله يديم هالعقل عليك يااارب..

ترف ابو عبدالله هالمشفوح هذااا احس يبي له شي يوقفه عند حده وللحين مدري وشوو؟؟ الشي صرااحه لو يعرف طارقه باللي يسووويه معتس والله ان يحده بالسياااره لين يقلب..
بس تعالي اقوولتس خليتس بعيدجه عن سوالف فياض ونجود واتركي ام طارق على جنب ..هذي مخرفه ولا عندها ايمان بس انتي هدي اللعب شوويه . ولو اني صرااحه ما الوومتس عقب الكلام اللي سمعتيه باللي تسووينه بس ان جينا للجد طارق تراهـ احسن من ابو عبدالله..>>فيس خايف تتهوين وتصرين على الطلاق وتاخذين هالشايب البصباااصي اللي يوديتس للدوام..

عزّيز وغنادر.. احلى شي يااغندوره عنصر المفاجأه ايه خليه من الحين يعرف الطموح اللي انتي تبينه وغير اصلاا ان شكلتس فاجأتيه بهالشخصيه ..اتوقع انه بيشوف شخصيه مختلفه نهاائياا عن ندى اللي ماتهتم الا بنفسها وشكلها بيشوف وحدهتهتم بعقلها ومستقبلها يعني اشيااء مشتركه بينكم..

عزيز تدري انك قهرتني بكلامك لديمه .. وهي صادقه الحين بس انتبت للي انت كنت تسوويه..؟؟والله اني راحمتها مرررررره مافيه احد يحس فيها من اهلها من تبيها يااحظي تسوولف معه معك والا مع اخوها الثاني والا مع ابوها المشكين والا امها اللي تهتم برجلها وشكلها كل حياتها مخليتها رهن اشارته.. والله انها مسكينه جاي الحين بتحرمها جلسة البنات اللي للاسف ماتحس انها منهم..
بس الحين طلع لنا رياض وغير كل توقعاتي.. بيتزوجها وبياخذها معه وهناااااك بيخليها تتعرف على ولده وهي اللي ببتفاهم مع الولد واحس ان ديما قادره على هالشي..

ام سوونه الله يحفظتس ياارب مبدعه كالعاده..بانتظار البارت الجاااي بكل شووق اذا الله احيانا واعذريني على هالرد تدرين النفسه بدت تدخل جو الدراااسه وهذي الله لااايوريتس اذا دخلته صاارت مااصخه مرررررره..هع

السلااام علييكم ..


طوولت عليييكم .شووياات ..
ي الله .. الله يعيييين



ي الغوااالي الباارت اذا مو الليله ..
فـ غداا بأذن الله ..


وراااح يكوون فيه اجاباات لتسااؤلااتكم
اذا مااقدرت ارد عليكم وحده وحده ..


.. مشكورررررين حباايبي ع التفااعل ..

السلاام علييكم ..



[ 9 ]
____





كانت سرحاانه وعاقده حواجبهاا ..
وبااين في خاطرهاا شي !!

سألتهاا غنادر /
يمممه ووش فيتس !
من الصبح انااديتس ماارديتي علي ..
ماسمعتيني !!

.. ماتحب احد يقطع عليها جوهاا وسرحانها ..
ردت / اهاا وش تبين ؟؟

/ يمممه كلمي مرت عمي ناصر
وعلميها ببعثتي ،،
خلي ولدها يشووف لي وشلون يقدموون
على البعثه ..
عشان اجهز اورااقي كلها*
ومايفووتني شي !

.. ندى /
هههههه وراهاا عاد صارت مرت عمي ناصر !!
طوول عمرناا نقوول ام عزيّز !

غنادر / ماتحب احد يجيب سيرته قدامهاا
ماهوب خجل ،،
بس تستقرف من هالساالفه والتعليقاات الباايخه ..
ردت بنظره /
وقبل لاتنطق .. سألت امها بحيرره ..
بناات ديمه بنت عمكن ماعااد لهاا ذا الايام زوله !!
وينهي مااتجي !
عسى مانتن بـ مزعلااتها !!
والا انتي يا غناادر قايلتن في اخوها شي !

/ لا والله ولا جبت سيرررة اخوها اصلاا
لابخييير ولا بشرر ..

ردت ترف بعد ..
/ ولاا اناا .. من قبل الاختباارات باسبووع ماشفناهاا !!

.. قومن كلمنهاا وانشدن عنها*
واعزمنهاا ،،

.. دخلت ريم عليهم والجزمه في يد .. وولدها في يد *وتهدد ..
/ ووقسسسسم باالله ثم قسسسسم بالله
لين عااد شفتك مااشي مع عياال اكبر منك
لا اقطعك تقطيع ..
وبالخيزراانه مهووب بالجزمه وبس ..


انفلت من يدهاا بمقااوومه ..
وبتمرد لآسنهاا /
مهووب على كيفتس*
اناا ولد ابووي مهووب ولدتس
ومالتس *دخل فيني ..
لحقته تبي تضربه وهج !
رمت الجزمه بقووه على الجداار .. وبكت !!

*
•
•


.. اليووم فاايق وراايق ..
.. ومتفررغ لها ولاشغالهاا ..


[ طــــارق ]
_______



.. بما ان عزام اخووه العزابي مقيم في الشرقيه*
وقليييل مايجيهم ..
قرر يسكن مع اهله ..
واستأذنه يضم غرفته لجنااحه لانها الاقرب ..
يبي يخليهاا صاله جانبيه ..
والصااله الصغيره اللي تبع الجنااح بيوسع
فيها غرفة النووم ..

كاان كذا تخطيطه ..
وبدو العمال يشتغلون بقسمه ..
وامه ثاايرره و معصبه على اللي بيسوويه ..


.. دخل ابوه وهي شاايشه وطايشه وتهااوش عليه
وهو باارد *و ماارد .. مااكنه يسمع ..
وابووه وراهاا دخل ماحست به من الشياطين اللي فيهاا ..
سكت يحتريها تطلع اللي في خاطرهاا
وطواالة لسانها وعوابتها وين بتوصلهاا ..!



/ والله مااتطب علي بنت الزيــــن*
ولاا تدخل لي بيت ..
مالقيت الا ذاا البوومه ..
تقط وتحط علشانهاا !!
وذا العمااميل داخلين ظاهررين بأمرهاا
جعله ماايبنى لهاا بيت ولا يعمر لها وطن ..
ولاا...


/ يمممممه استغفررري ..!
البنت ماسووت لتس شي
ولا بعد شفتي خيرهاا من شرهاا لذا الحين ..

/ انطم وكل تبن ..
تدافع عنهاا يااولد سوير!!
هذا وهي مابعد جت وحكمت ..*
جعل الفار ماايملك داار ..
والله ان .....

جااها صووته من وراهاا ..
وقاطعها ابو سلماان و كبده غليله*
من لقافتهاا و طولة لسانها ..
وبعد الكلام اللي نقله عبدالله ولد نجوود
له ..
واللي حضر المووقف كله
وشاافها وهي تهجم على جدته وابوه في بيتهم
وتلاسنهم ..
ونقل له حرفياا وش قاالت ووش ردو عليهم ..
ومشى مع جده بيشوف ووش يسووي ..
اصلاا مابغى الجيه مع امه ..
الا عشاان يقوول لجده ووش سووت امه سااره
ب امه بحر الزين ..
واااقف وراا جده .. و يتفرج على اللي بيصير ..



/ اقطعي واخسي انتي ..
الولد وبياخذهاا وبيسكن في بيت ابوه
مهووب بيتس ..

وانتب يا العوبااا دواتس عندي ..
سحبهاا بيدهاا بيدخلها غرفتهم ..
وقف له طاارق ..

/ تكفى يبــــه .. طلبتك ..
خل امي في حالهاا ..
تخبرهاا تشووش شووي وتهداا ..

يحسب ان ابووه مادرى عن اللي صار
وان غضبه بس عشان كلامهاا له ..
ومتوقع بالكثيرر يخانقهاا بغرفتهم*
وان زودهاا دفهاا على وراهاا كاالعااده ..
*

.. صك البااب في وجهه بعد مادخلهاا قبله ..
نهررره ...
/ وراااااك ورااااك عوود ورااك ولا لك شغل ..
رزع البااب وماعطااه فرصه يرد او يترجااه ..

داارت عيوونه حوله وحوااليه ..
له عقاال من الصوووف من عشر سنين ما لبسه ..
معلقه يخوفهاا به .. وماسطى يعطيه لاحد ..

قرب من الشمااعه اللي هو معلق عليهاا
خذه وقعد يمغطه بين يديه وينفض الغباار عنه ،.

وعيونهـٓــــا بتطلع من مكااانهاا من الصدمه ..!
ووش يبي فيٓـــــه ..!
لايكوووووون بـ.........

قطع تفكيرهاا وهو يلووح به فووق رااسه
ولـ ابعد ماتووصل له يده ..
هووى به عليهاا بكل ماعطااه الله من نشااط وقووه ..

وقع على عضدهاا وهي انلجم لساانهاا
لها الحييين ماهيب مصدقه ..!


قبل نص الضررب الآ كله من نصيب عيالهاا
اللي يحاموون عنهاا ..
والضرباات الخفيفه بيده ماتستنكرهاا ..
بس هالمرره لا ضرب باليـــٓد ولا عياال يتفدونهاا ..

.. لمت يديهاا على وجهها لا يجيه ضرب العقاال ..
ودموعهاا تصبصب ولااا نطقت ..!

بهااالعمــــــر وتنضرررب !!


.. مايدرري ورااه رحمهاا يوم شافهاا تداري
وجهها من العقاال .. وهو اللي نااوي يكفر فيهاا ..
.. رمااه جنبهاا واستغفر ربــــه ..
همست بغصه /
تووووووووبه ماعودهاا ..
هي للحين ماتدري وش اسبااب ضربه ..
تحسبه عشاان هواشهاا على طاارق ..


.. مسكهاا بشيلتهاا ورفع راسهاا له وبغضب ..
/ المااا مايرووب والزااني مايتووب يابنت متعب ..
وروحتس لآل فيااض و فضيحتس لناا عندهم
والله ماا تعدي على خييير ..
*
.. انتٓــــٓي طااااااااااااالق يابنت متعب !!

.. فتح البااب بسررعه ..
وفز له طاارق اللي عرف من عبوودي سبب ثورة ابووه ..
وكوووفنه لين حب الارض ..



بلهفه / يبــٓـٓـه الله يرضى عليييك
اسٓـ...،

بهدوووء /
خذ امك .. وطلعهاا لبيت سلماان ..
ماا ابي ارجع واشووف ظلهاا اهنــٓـا ..


/ تركه وراااح لامه ..
ماحست بخطوااته ولا قربه منهاا
الا يووم رفع *راسهاا له ..

ردت / ابوووووووك طلقني ..
وارتمـٓـــت بحضن ولدهــٓــٓاا تبكي حظهاا ..


•
•

.. في بيت سلماان ..
عرف بالساالفه قبل لايوصله طاارق وامه ..
..*
امر ساره تصلح قهووه على السرريع ..
واتصل في هيثم اخوهاا يجي ياخذهاا ..


[ ببيت سلماان ]
___________


ساره / سلماان وش ابي ذا الحزه في بيت اهلي !
العياال بيناموون ..

سلماان بعجله /

صلحي قهووه بسررعه وتولمي
بيجي هيثم ياخذكم ..
*والعياال ماعندهم دواماات خذيهم معتس ..
وبعد كم يووم امركم اخذكم ..


ساره / طب ليييش !
وش هالرووحه العاايبه ؟؟



سلماان / اوووص لااتناقشين
بعدين اقوولتس ..

طلعت لاخوهاا *وقلبهاا قارصهاا ..

.. وبعدهاا بووقت *..
على القهووه اربعتهم ..

ولحد الحين مادرى الا هم ..
وزين ان البناات كاانن بالسووق*


.. مارضت تطلع له الا بعد ماترجاهاا سلماان
ووعدهاا مايصير الا اللي هي تبيـــه ..


سلماان / الله يرضى علييكم بس
عقب ها العمر تطالقـــوون !!
حنا ياعياالكم تحملناا الشين قبل الزين عشاان هاالعييل
وانتم تطالقوون عقب ما شيبتـــوو !!
والله ان درن البناات ان ينهبلن ..


ابو سلماان / امك مفكووكن رسنهاا
تهيت و تبيت على كيفهاا ..
تبي من يقيدها ويشكمهاا *وعسااه يفيد معهاا


*ام سلماان تبكي /
*لاتقيدني ولاا تقربني*
انا في بيت ولدي وانت في بيتك
والحمد لله انها جت منك قبل ما اطلبهاا


سلماان / يممممه !
الله يرضى عليتس
وش هالكلاام ،.،



اما طاارق فكاان يغلي غلي ..
الضرب اللي كلته امه في قلبه يووجعه ..
خاااصه بعد مااشف مكاان المحطه ..!


ماقدر ينطق بحررف لانه محشي غيض من ابووه ..
يبي يطلقهاا يطلق
بس لا يهينهاااا ويضربهاا ..
مهماا قاالت ومهماا سوت تظل امه ،.


ابو سلماان /

.. امك ذي لوهي حرمةٍ سنعه تسان فكت الناس من شرهاا
وقعدت تباري بيتها ورجلها وعيالهاا
مهووب كل يووم وهي مهبهبه تدور المشاكل دواره ..

جت بتكلم وضغط سلماان على يدها
خاايفٍ تجيب طاامه و تعقد الامور اكثر مما هي متعقده ..

اما طاارق فهو لازاال ضااغط على نفسه واعصاابه
ومنتفخ من الحرره اللي فيه ..
بس ابوووه مااله علييه حيله ..!



سلماان بهدووء وموده /
ياا والديني الله يرضكم عليكم
اذكروو ربكم وادحروو شيطاانكم ..
الطلاق في سااعة غضب ماايقع ..
وانا بانشد الشيخ بكره و ابتأكد اكثرر ..


واميمتي بتمسي الليله عندي
وبكرره تنور بيتهاا ..
وامي عرفت غلطهاا والله يلعن الشيطاان ..


ابو سلماان /
ماترجع لبيتهاا لين ترووح لال فيااض اللي فشلتناا فيهم .. وتحب روسهم وتعذر لهم ..


هنا طاارق انفجر.. *بااح صبـٓــره ..
وقف وهو يحس جسمه ينتفض من القهر ..
مااعٓـــــــاد الااا ذي !!!



.. امه بشيبهاا تنكس راسهاا وتذل روحها وتعتــــذر ..!
.. هي غلطت صح ..
بس هو اعتذر بدالهـــا واعتذاره يكفـــي ..


.. تساارعت انفااسه وهو يحااول يكبت صووته لايرتفع في حضرة ابووه ..
على قد ماا قدر خفض صووته ..
.. ولو ان نبرة الحزم والجد والاصرار في صوته قدحت ..


/ امـــــي ماتروووح لاحد ..
اعتــــذار واعتذرت عنهاا ..
واللي حصل حصل ..
نعزمهم ونعشيهم ويكــــون هذا اعتذارها
مهووب لازم تهين روحهاا لفلاان وفلتاان ..



ابو سلماان بغضب*وقف /

على تبــــن انت ..
انت ولدي مهووب انا ولدك ..
لاجو عياالك احكمهم ..
وامك بترووح لهم ورجلهاا فووق رقبتهاا ..
والا مالهاا مقعااد في بيتي ..


طاارق بتحفز /
*
.. اجل بنت الفيـٓــــاض بعد مالهاا مقعاد على ذمتــــي ..!
لانها من طرف ابووه الخطبه والملكه
يبي يمسكه من ها الممسك ..



سلماان صرخ فيــه وهو يدفه ورااه /
خيييير .. بنت النااس لعبه بيدك !
اذكر ربك واسكت والا انقلع ..


ابو سلماان /

هه .. ماحرمت الا عمررك ..
طلقهاا وبجوزهاا لعزام اخوك
هو اكبر منك وابر ..

.. حط عينــــه بعين ابووه بتحدي ..
/ بس لاتنسى تقولــــــه وراك خطبتها هي بالذاات ..
اوول لعمرك ..*
وتاالي يوم ردوك لي ..
ويوم بغيت اطلقها تبيهاا له ..!



.. ارتبكـ و اشتحن صدره ..
يحس عرقه نضح في ثواااني ..
سكتـــــٓه بكٓـــــــف خلااه يلف ورااه ..!

.. انصدم ..!
ماارفع نظره لابووه ماله ووجه ..
هو غلطــــــان و يستااهل ..
بس مقهوررررر .. كف كف يااابووي !!


طلع وتركهم مصدوووومين والصمت حليفهم ..


.. اما ابو سلماان قعد على حيله*
ورااسه ونظرره عند موااطي رجووله /

.. دعاا في نفســٓــه ..
جعلهاا يدٍ تعطب اللي انمدت عليــك ياا ولدي ..
طاارق غيرر وغلااه غيرر ..
وبضربه على وجهــه اهاانــــٓه ..




•
•


ابعتـــــذر كان تقبل معاذيـــري ..
** *وابقبّــــل يِمْنى على خدِّي صفعتـ..

*
[ طاارق ]
______




.. مارف له رمش ..
ولا نزلت له دمعــــه ..

.. بس يبي يختلي بنفسه ويعيد حسابااته ..
صحيح ماهيب اوول مرره يضربه ابووه ..
ياماا كل عن امه محطة عقاال والا شطفة عصاا ..
والا حذفه باقرب شي عنده ..*


لكنهاا اوول ضرربه مقصووده*
موجهه له عمداا ومن ابووه خص ..
واوول كف يااكله من احد من يووم دخل المدرسه ..!

.. يستااهل معترف ..
بس الكف اووجع قلبه ..
وواثرره بااقي اشد وجع ..

.. هو بيطلقهـٓــا وبيفتكـ ..
ولا رااح يتزووج الا لمن يستقل بنفسه وببيته وتجاارته عن اهله ..
ويجي له مزااج على الزوااج ..

واذا عزام بياخذهاا وهي واهلهاا رضوو
بكيفهم ..
بالطقــــــــــااق ..

.. دق جواااله اكثرر من مرره وحطه صاامت ..
مااله مزاااج لاحد ..
ولا يبي يشووف جنس مخلووق ..
بيناام الليله بالاسترااحه ..
وبكره بيحلهاا الف حلااال ..


.. اهتز جوااله برسااله ..
فتحهاا بيشووف من ....

نجود ( طاارق بالله رد علي ضرورري
سلماان جواله مقفل .. وفياض بيجي ياخذ اهله*
وان درا اني بالسووق بياخذني معه اكيد )

زفر بطفششش ...

/ اوووووووف قصة حياتهااا ..
اتصل فيهاا ..
واستفسر باي سووق هم عشان يجيهم ..



•
•



[( بالسووق )]

- ام فيااض -




.. ناادرا ماترووح لها الاسوااق ..
خاصه بعد ماتطلقت ريم صارت هي اللي تطلع مع خواتها له ..

هي بيتووتيه وهمهاا زوجها وعيالهاا وبيتهاا ..
.. بس تبي تكلم نجوود ضروري ..
واضطررت تجي هناا ...
.. تعرف ام سلماان ماعليهاا اتكاال ..
متهورره وتطير في العجه ..
واجبهاا تنصحهاا وتوعيهاا*
عقبها تسووي اللي تبي ..



*قعدت بخجل على كنبه في كفي ..
وهي تحس ان كل هاالعاالم يناظرونهاا
وعارفيين انها جاايه للسووق .،


.. تحررك اصابعهاا وهي تستغفر بتوتر ..
وعيونهاا ماسطت ترتفع في هاالبناات اللي مايستحن ..


.. بصوت ثقيل مايبين اللي بداخلهاا
همست لترف /

كلمي نجوود استعجليهاا ..
ابووتس بيجي لا اذن العشاا ..!
واختس ورااي فالبيت ماذاقت شي ..


.. اشررت ترف /
يمممه هذي نجوود جت ..

ام فياض / ي الله قوومن انتن
وخذن عنوود معكن خلووني معها لحالناا ..


*.. تقابلو مع نجود ..
وخذو عنوود معهم وراحوو يتسوقوون حولهم ..

.. قربت نجوود وسلمت على ام فياض بجموود ورسميه ..
حست فيها ام فيااض ..

جلست ومدت لها ام فيااض يدها وهي تضغط عليهاا ..

/ نجوود يا امي ..
ترااااي *والله ماادريت عن عرس فياض لين قالي قبل ماتدرين بليلتين ..
وربي شااهد اني مارضيت ولا سعيت له ..
ولا بغيت العلم يجي مني يجرحتس زود ..
بغيته هو اللي يكلمتس .. وياخذ مافي خاطرتس ..
وتدرين منه ازين من غيرره ..
والله يابنتي من الروووووعه حلني بطني
ولا رقدت من الهم ذيك الليله ..


.. نزلت دموعهاا بصمت ..
ورااح اللي في خاطرهاا على ام فيااض /


.. ياخاالتي اللي سوااه مهووب سهل !
*جرررررحنــــي والله جرحنـــي ..

ضغطت من جديد على يدها /
ادري ياامي ..
بس الشكووى على الله ..
مقدر ومكتوووب .. ونصيبــه ..
مابيديناا نرد شي ..

.. هناا انهاارت تبكي ..
يعنـــي خلاااص ..
ماعااد هوب لهاا لحالهاا ..!
بيصير لهااا شررريكه في كل شي ..!

.. قامت ام فيااض من كرسيهاا
وجلست جنبهاا تهديهاا
وهي تلفت عسا ماشافهم احد ...

وبهمس / يابنت اذكري ربتس
حنا في السووق والعاالم ينااظرونتس ..
ارفعي راستس وتعووذي من ابليس ..


وكل شي صغير يكبر الا المشااكل والهم
تبدا كبييييره وتصغر تصغر لييين تذووب ..


.. رفعت راسهاا ومسحت دموعهاا ..
سالتهاا ام فيااض سوأل غير متووقع ..

/ انتي تحبيـــــن فيااااض !!

تفاجأت بالفعل ..
هي لحد الااان وبعد هالعشرره الطووويله*
اكتشفت ان مشااعرهاا ملخبطـــــه ..
وماهي بقاادره تحدد مشااعرهاا تجااهــــه ..

تحس بغييييره عليه اذا شاافته يتشيك ويهتم بنفسه اكثرر من المعتااد ..!
اذا جلس عندهاا تتمنى يطلع ..
واذا ساافر تــــبيه يرجــــع ..


دائماا تعيييد وتزيييد عند اهلهاا*
انهاا تبي الله يحفظه لعياالها مهووب عشانهاا ..
دايماا تردد في نفسهاا ولاهلهاا*
انهاا ماتحبـــــه بس مالها عذر تنفصل عنـــه ..
وهي عندهاا عياال ولا له بديل منزله من عينهــا ..
ماا تحبــــه و تبيـــــه ..
يبقى لهاا بس خليه بعيـٓـد ..
او يمكٓـــن ماعطت نفسهاا وعطته فرصــــه يحبهاا وتحبه ..


المهٓــــم لايتزوووج ..
سوااااء تحبـــه او لااا..


.. تأملت خالتهاا وحياتهاا مع انهاا الحين كبيره ..
اووول اهتماماتهاا زوجهاا ..
قبل كل شي ..!


اذا فيه مناسباات وزجها بيقعد بالبيت ..
قعدت مااراحت ..

ترسل بناتهاا ينوبوون عنهاا ..


واذا زوجهاا رايح لنفس المنااسبه ..
وبيرجع بدرري ..
ترجع معه ..
وهي عاارفه انه متعشي وما يبي الا فرااشه والنووم ..
ترجع والمنااسبه توهاا ما ابتدت ..
تترك كــــل شي عشاانه وله ..


.. مااتذكر انهاا في مرره استقبلت زوجهاا وهي معبسه ..
تبتسم لو هـــي مالها مزااح ..
تشووووف الحب في عيــــوونه وعيونهاا ..
تشوووف حنيتهاا علييه وشووووقه لهاا ..


اول ماجتهم ..



تذكر .. كاانت مستنكرره العلااقه اللي بينهم ..
مرررره غريبــــه عليهاا ..
امهاا وابوهاا ماهم كذاا ..
امهاا وابوهاا في حرب وضررب ..
ومشااكل و هوشاات ..


.. ماتذكر انهاا قد انتظررت فيااض عشاانه ..
تناام قبله .. وعذرهاا هو يتأخرر وماانيب فااضيه اسهر له ..
وورااي قوومه بدري عشاان العياال وندارسهم ..


.. تسووي حلوياات واكلاات سنعه ..
وتوديهاا لفلاانه وعلاانه .. وهو محرووم ،.
اكله من ايدين الشغااله .. كل يووم بطعم و نكهه على الله**..


.، ماعمرهااا قطعت لحمه وقربتهاا له ..
او اتصلت عليييه تقوول ابيك انت !!!
اذا كلمته .. جيب كذاا وكذااا وسكرت بدوون كلمه زيااده ولو حتى جبرخااطر ..


.. مره سمعت مكاالمه خالتهاا .. تطلب منه يجيب للبناات مندي من المطعم ..
طراا في بالهن وعطو امهم تكلم ابووهم
لانهاا تعررف له .. ولاا يقدر يرد لها طلب ..



واندهشت ....
/ جعلني ما ابتسيك !!
/ من لهن غيررك ..
/ هههه عااد ووش نسووي ؟
شهووة ام اصيل واخياتهاا ..
لا ماجاب لهن ابووهن ماحدٍ ملتفت لهن ..
/ تسلم مااتقصر*
الله يطول عمررك على الطااعه ..
!!!!!!!!!!!!


وقتهاا كاان تقووول في خاطرهاا ..
خييير ووش ذا الادب الزاايد*
ماا اقتنعت باسلوبهااا ابد ..
والله لوو اني اطر منه !!
ملزوووم فيناا ..
بس الحين ..
عرفت من الصح ومن هو الغــلط ..





سوأاااااااال بسيط ..
*كاان كفييل بانه يرجعهاا لسنييين وراا في لحظاات ..


.. ومهماا كاان لو مااتحبـــه ..
مستحيييل تقووول هاالشي لامه ..


بربكه ردت بعد مااصحت من سرحانهاا ..
اااا اكيد احبه ..
رجلي وابو عيااالي ..


هزت راسها بتأكيد /
اجل واناا امتس ارجعي لبيتس
وضفي عيااالتس ..
وانتبهي لرجلتس ..
ماادور غيررتس الا وهو يبي شيٍ مااحصله ..!

.. اوجعتهاا بالكلااام*
وهي تحسسها انها مقصره بحق ولدهاا
معقوووله كاانت تدري وساااكته !!
والا من بااب مااتبي تدخل !!


.. دق جوالهاا وردت بهدووء /
هلاا ابووي ..
ايه حناا خلصناا ..
لا مااعليك .. اللي ماقضووه يقضوونه بكره والا بعده مع رياض ..




عرفت انه فيااض ..
*دق قلبهاا وارتبكت ..

خافت يطلب يكلمهاا
ويحرجهاا عند امه ..

لكنه ولاااا سأل حتـــــٓى ..!


اتصلت في اخوانهاا ولااا حصلت احد ..
بااقي الرجاا في طاارق ..
جواااله يدق ومايررد ..*
مهووب غريبه عليييه التطنيش اذا ماا اشتهى يرد ..
ارسلت له رسااله متأكده انه بيقراهاا
ثواااني واتصل فيهاا ..




•
•

يعجبني !
** الذيّ يخبرک بـ زعلہُ ' *
** بـ إنِزعآجہ مِْـِْ♡̨̐ـِْنْ تصرف ما !
** يفتح لگ ; طريق لـ / توضح السبب
** [ - عگس الذيّ يگتم . .
** * * *و ربمّآ ظن الحق معہَ


[ ديمٓـــه وتــٓرف ]
____________


.. رجعوو للبيت ..
وتفاجأو ب ام عبدالعزيز عندهم ..
هم ماابينهم رسمياات ابد*
وللحين على شغل الاولين ..
تجيهم ويجونهاا بدوون موعد ساابق او اتصال ..


.. طلعت لها غنادر تستقبلهاا
بما انهاا الوحيده اللي بالبيت
بس حلفت عليهاا ام عزيز تطلع *تذااكر
وانهاا من اهل البيت ..
طلبت من الشغااله تسووي قهووه
ودقاايق ونزل لهاا ريااض ..
وابووه دخل بعد مااصلى وسلم على جااره المريض ..


.. كاانت تقهووى وجنبهاا بنتهاا الهااديه على غيير العااده .،
وبعد انقطااع خمس اياام عن بيت عمهاا ..
بتسلم لانهاا فعلاا اشتاقت لهم وبترجع مع امهاا
مااهيب جاالسه ..

وقبالهم ابو فيااض وريااض وبحضنه ولده ..

.. انحرجت ام فيااض .. يوم شافت ضيوفهاا سابقينهاا
ورجلها وولدهاا ينتظرونهاا ..
هلت ورحبـــت .. وجلست تقهوويهم ..
اما ترف سحبت ديمـٓــه معهاا لغرفة الحرريم
تبي تشوووف وش علتهاا مع ذا الغيبااات ..


ديمه / *بغصه .. وهذاا اللي صاار ..

*ترف / طيييب يااغبييييه*
لو انتس دخلتي في المستوودع
اللي براا مااحد دراا عنتس
ولا طلعوو للصلااة اطلعي ..


/ لاا استحيت انزل قداام ريااض
بثووب سعوود الضيييق
اناا مربربه وسعوود معصقل
وبالمووت دخل فيـٓني ..
كنه ثووب رقااصه من ضيقه ..

/ هههه لو زرقتي بسررعه مهووب ملااحظ ..
قعدتي تلبسين عبايتس وقبض عليكم ههه



/ ديمه بجززع ..
اسكتي والله بغيييييييت اجيب العيد على نفسي من الخووف ..
قلت بيمصع رقبتي لاشااف ايمي بثووب سعوود ..
بس الحمد لله .. ربتس ستر*
الحمااره من شاافت طرف ثووبه قعدت وراا الكفر ..
ما شااف *الاا اناا ..
واخووتس الغبــــي تنح ..
يسااله عزيز وهو مفهـــي ..
خفت يكب العفش كله وكذبت عليييه قبل يتكلم الفااهي ..

ترف / هههه ووعلّه بلااا عله*
مااكنتس تسبييين اخووي !

ثوااااااني ووشهقت وهي تضرب صدرهاا
.. هـــيء .. يعني شاافكم جايين مع بعض ولاا قاال شي !!

ديمـٓــه ..*
/ اوووووف يااااليل الغبااااء ..!
يعني بيشوفناا مع بعض وبيرحب في اخوتس !!
لا التنحه الثاانيه جلست وشاالت الثووب اللي عليهاا ..
ولو مااقاامت كاان رحت في خبر كااناا ..

*
ترف /*
هييييه تراااي اكبر منتس*
ماانيب اصغر عياالتس تقوولين لي غبيه
خبطتهاا على رااسهاا بمززح ..




.. ثواااااااااني وجاهااا مسج ..
غررريبه .. من عرف رقمهاا !
اليووم شااريته ..
لو امهاا ماابعد اعترفت لهاا ان شااريه جواال ..

قرت المسج باستغراااب ..
والصوره الرمزيه حقته رجاال متلثم بشمااغ ..!

( رسمتــــكـ صورهـ بـ الالواان فـ خياالي ..
*وابيكـ تسكنـ الصورهـ وتحققـ آماالـــي .. ) *


طنشت وسكرررتٓ ..

ردت لديمٓـــه تكمل معهاا ..
/ المهم .. الكلااام اللي قااله عزيز مهووب صحيح ابد ..
انتي مثل خوااتي والله ..
وقسسم ماالتس دااعي انتي واخووتس
حتى امي .. تسألناا عنتس ..
وفااقدتس ..
تقوول ليااكم مزعلينهاا والا ساابين في اخوهاا
والاا والاا ...
لو حناا ما نبيتس ماادقيناا ندورتس
كل يووم ..
بس حناا تعرفينٓـا بيتناا داخل وظااهر
وضيوووف وجيراان ماتقدر نخلي
امي لحاالهاا ابد ..
بعدين يااحماره مرره ثاانيه تزعلين
او يجي في خااطرتس شي*
قووووولي مهووب تنطمييين وتسكتييين ..
يمكن طيب ظنتس غلط زي هالمرره ..


دخلت الشغااله بـ عبوودي ولد ريااض
وهو يتفلت ويضربهاا ...
قاامت له ترف وخذته منهاا ..
كاان يبكي بصمت ويضربهااا ..
ضمته وصرخت في الشغااله .. ووووين مفااتيحه !!!!

.. هالمفتااح ماايبيه يطيح من يده ابدً
اذا خذووه منه يضطررب ويعصب ويضررب ..
عذووه ايااه وهدااا وبداا يقلب بالمفتااح
بحركاات روتينيه وهو جاالس بعاالم ثااني جنبهاا ...


سألت ديمه /

هذاا ولد ريااض اللي يقولوون !!
وراااااه كذاا .. شكله مهوووب طبيعي..

ترف بتأثر وعينهـــا علييه /
فيـٓـٓه توحٓــــــد ..


•
•


.. شاف طاارق واقف عند بواابة السووق
متكتف وسرحاان ولاا كأن هالعاالم حووله ..

ينتطر خوااته يطلعوون ..*
لانه موقف سياارته بعيــد مااله خلق زحمه*
ونزل عشاان يدلهم عليهاا ..


[ فيـــــااض و طــــارق *]
________________



نزل بيكلمٓــــه ع السرريع وكأن المووضوع عادي ..
بينماا السرآ *ورراه وخوااته وامه يركبوون
هم واغراضهم ..
فااجئه فيااض ...


/ سلااام علييكم

انتبه طاارق وهو يمد يده له ..
/ هلااا وعليكم السلاام ..

/ قلت بتااخذ نجوود يوومين ثلاث وبتردهاا
وفاات خمس اياام ولاحس ولااخبر ..

ع العمووم انا مستعجل الحين
بكرره العصر امر آخذهاا
خلهاا تجهز ..

/ هو كاان منتبه يووم يسلم عليييه ..
بس سررح وهو يتخيييل ردة فعل فيااض
اذا درى باللي ناااوي علييه ..
ثم طررا علييه ردت فعلهاا هي ..!
كاان عاااقد حوااجبه ويفكـــر ..
ماا انتبه الا لماا عطااه فيااض قفااه ..

.. تذكر انه نساااا ..
نساا ووش يبي منه فيااض ووش قااله ..!
لحقه لبااب السيااره ودرعم يفتح البااب ..

تراااجع لوراا بقووه وحررج وهو يشووف*
سوااد عباايه .،
مدت يدهاا ام فيااض له تبي تسلم عليه ..
ورجع قررب ...،
هذي من محااارمه ..!
خاااالته .. اكيييد خاالته ام فيااض ..*
رجع وهو متلخبط وسلم عليهاا وحب راسهاا
سلم سرريع ع اللي وراا بدون لايهتم من هم ..

ورجع نظره لفيااض ...
تعااال وووش تقوول انت قبل شووي .. نسيت !
وفرك جبهتته كانه يبي يتذكر ويركز ..


فياض يحسبه بيعترض /
سلامااااات ..
اقوول خل نجوود بكره العصر تجهز ..
بمرهاا ..

/ اهاااا .. تذكرت ..
طييييب ..

وهو مااتذكر لانه ماا سمع اصلا.،
اما فيااض استغرب بس طنش ..!
*

.. اماا اللي ورااه ..
فكااان قلبهٓــا بيووقف من الفررحه بشووفته ..
.. ابد مااحسبت حسااب لهاا الشووفه ..
.، صحيح قاالت طلق ..
بس هوو رفض ..
يعنــــي يبينــــــــي ..


.
.


.. بخطوااات ثقيله وولده معه ..*
اتجه لغاايته ..
ولده خبــــل وهو العــــاقل ..
لازم يتصــرف ..


•
•

[ ابو طــٓاارق ]
_________

.. اتصل في ولده وعطااه امر وسكر السمااعه في وجهه
ماايبي يسمع له اي اعتِـــذار او اعتراااض ..


وبصراامه /

طويرررق اسبقني لبيت عمك ابو فيااض ..
اناا في الطرريق ..
وبكل بسااطه سكر الجواال بدون لايسمع صووته حتاا ..


.. يحس بانفعالااات كثيييره ..
حتى لوو بيطلقهاا ..
مااايبي اخووه ياخذهاا*
وتقاابله طوول العمر وهي مااهيب له ..!


بيقعد يتذكر كل ماشاافهاا ..
.. نعوومة ايديهاا
.. وملمس شفاايفهاا
.. ولمعة الدمع بجفونهاا ..!


.. بيسمع ضحكتهاا و بتفتــــــنه ..
.. بيشووف زعلهاا ولاله حق يراضيهـــا ..
.. بتدخل وتطلع دوون شورره و بأمره ..!

.. اتصل في ابووه يبي يأجل الموضوع
لين يشووف له صررفــه ..
مااايبــي عزااام يااخذهاا ..
*

ولو خذهاا عزااام ..
بيضطرر يطلع من الرياااض بكبرهاا ..
صعبــٓه عليييه يتقبل هـ الامرر صعبــه ..


.. لكن ابووه ماارد ..
عاارف انه ساافهه ..


.. قرر يستنــــٓذل ..
ويمرمطهاا ما طلقهااا*
عشاان ترفـٓــض اخووه ..


.. دخل ووجه عاابس ..
سلم وجلس ..
وابووه يلخصه بعيٓـــنه يرااقب ردة فعله ..

مااقدر ينتطرر وهو يشووفهم يلعبوون باعصاابه
ويتكلموون عن العقاار والارااضي ..
والمشااريع اللي سهله ومرابحهاا حلووه ..
وهو بحريقــٓــــــه ..

بتر حديثهم بثقل ورسمييه *..

.. يااا ابوفياااض اناا وبنتــــك ماا........

كمل عنــه ابووه وهو يقطــــعه ..

مااعاد به صبرر .،
يبي يقدم عررسه بعد هـ الاسبووعين ..
نبي نخليييه حفل صغير للاهل ..


ولارجعوووو من السفر
نسووي حفل كبييير*
ونعزم القااصي والدااني ..


ترااجع بظهرره ع الكنب ..
*وزفـر براااحه ..*
اهم شي مااتاخذ اخوووه وهــي طليقتــٓه ..!
مهووب حباا فيهاا ..
بس ماايبي علااقته باخووه تتأثرر بأي شكل ..

ابو فيااض /*
السااعه المبااركـٓه
ابد ماهناا خلااااف ..
واتفقوو على الترتيباات ..



•
•
*



*

[ انتهى .. قرااءه ممتعه ]*

تسلم يدينك روايه رائعه
طارق شخصيه متناقضه ما يبي ترف ولا يبي تاخذ اخوه
نجود حالها حال كثير من النساء لا تعرف قيمة زوجها الا اذا تزوج عليها
ابو طارق وامه زوجان جمعتهم العشره ولم تجمعهم الموده و الرحمه

ام وسن يسرني ان اكون من المتابعات لروايتك

يسلمو ام وسونة على البارت المليء بالاحداث .........عن جد اشتقنا لك ولابطالك وللاحداث والمفاجأت الغير متوقعة


ترف وطارق

طارق ليه هالتفكير بطلاق ترف وهي مالها ذنب بالي سواه ابوه في امه وبعدين الحق كله على فياضوه الاناني الي مافكر بتبعات الي سواه وانو ممكن اخته تدفع الثمن وتنهدم حياتها

طارق وفكرة طلاقه لترف لو وصلت لترف ايش بتكون ردة فعلها اكيد بتنهار وتنصدم والله يستر من الي ناوي عليه طارق ..

وكرهه انو عزام اخوه ممكن يتزوجها بعده جات بوقتها علشان يحط بباله انو لو تركها ماراح يوقف نصيبها وبتتزوج غيره وحتى لو كان غير عزام هو ماراح يتقبل الفكرة لانها تهمه ومايقدر يتخيلها مع غيره وان شاء الله تقديم الزواج يكون من صالح الاثنين .........


نجود وفياضوه

يعني نجود كان لها دور كبير في حياتها الباردة مع فياض وبأرادتها صدمتني بصراحة مخليته اخر اهتماماتها ولما فكر يشوف غيرها صحت من غفلتها ان شاء الله تصلح غلطتها وتهتم ببيتها وبزوجها وتغير البرود الي عايشته وتكسب قلب فياض وهيوه تكون صفر على الشمال وتحمد ربها انو هيا ماهي ند قوي لها وبتخسر عندها وعند سناعتها بس لازم تشغل عقلها وترجع بيتها وتخطط كيف تحافظ على زوجها لها وبعيد عن الانانية هيوه الي قبل فترة كانت بتموت على طارق والحين بتذبح نفسها وتاخذ فياض بنشوف كيف بتتعامل معاه اذا تم هالزواج



ديمة ورياض

ديمة طلعت عاقلة وقدرت تطلع نفسها من مصيبة كانت كفيلة تدمر علاقتها مع عزوز زين انو عبايتها عندها وتصرفت قبل ماتروح بيتهم ......

حلو انها فضفضت لبنات عمها عن الي صار علشان تعرف مدى اهميتها عندهم واعتقد انها بتكون زوجة رياض المستقبلية بس كيف ومين الي بيختارها مااقدر اخمن


غنادر وعزوز

غنادر ليه ماتبغي طاري زوجها عند احد هل هو خجل او ماتبي ندى تستهزء فيه وتغيضها ........وعنادها واصرارها على البعثة هل بتتحقق او لا لانها حتى لو ماتزوجت عزيز سفرتها كانت شبه مستحيلة لانو كانت حاطة ببالها تقنع اهلها تسافر عند رياض يعني اصرارها ماراح يكون الا عناد وابوها مابيطلقها علشان سفرتها الي ماكان موافق عليها قبل يعني اذا وافق عزوز بيكون برضاه وقناعته غيره لا ومايهمه بس اعتقد اذا تعرف على غنادر وشاف شطارتها بيحقق لها رغبتها وحلمها بس بعد عدة مناوشات بينهم



ام طارق مع اني مقهورة منها بس وربي عورت قلبي لما انضربت من الشايب ضرب مو هين عجوز وجدة وتنضرب وتنهان صعبة بحقها وحق عيالها بصراحة تعاطفت معاها مهما كان هي مقهورة على بنتها

والشايب المخرف اجل خطب ترف لنفسه وجع ليه عاد من صغر سنه مالت عليه كان تزوج هيوه او مريوم علشان يقهر فياضوه وينقد بيت بنته من الانهيار مو ياخذ ترف ......

عزام مين هل بيكون له ظهور او لا ؟؟؟؟؟؟؟؟ شكل شخصيته شي ......


سلمان شكل فكرة زواجه تلاشت خلاص وسويرة تفتكر انو يبغيها تبعد علشان يخطط لزواجه الي شكله مابيصير من عيونها بس اذا فياضوه تزوج اتمنى سلمان بعد يتزوج علشان سويرة تحط حرتها في هيوه الي مبسوطة لها وعلشان مايمديها تتشمت بنجود


في انتظارك يالغالية على احر من تنور خخخخخخ