كاتب الموضوع :
حديقة الظلام
المنتدى :
القصص المكتمله من وحي قلم الاعضاء
الفصـلْ الخآمسْ ..
¤ { " يُـمه " بـِدُونِجْ تايــه أنـآ بِكِلْ دَرِبْ
دموعـي غرقتْ عينـي قمتْ أنتفض أرجف بقوة بدأ العرق يتصبب من جبيني وشهقاتي تزيد مع آهاتي جرحي نزف أشواكه بدتْ تغزني بقوة بلا رحمة ،، أكرهه بس أخاف منه أكثر أخااااف والله أخاف
[ سيف ] طفل متمرد قاسي حقير خبيث لأقسى حد ،، طفل حاول بكلْ الطرق إنه يبعدني عن الكل ،، أمـه خالوه روضة ،، فطوم إخته بالرضاع ،، خالد نصفه الثاني ،، منصور ذراعه اليمين ،، عبدالله خادمه المطيع ،، سالم عدوه اللدود .. انسانْ ماكر كان يحاول بأي طريقة يبعدنيه عنهم بس كانت برائتي وطيب قلبي جدام مكره هو الدرع الواقي ...
أكرهه ، أكره كل شي فيه نظراته صوته حركاته كلماته حتى ابتسامته لي كلها خبث ،، ماريد أشوفه و ترجع نظراته نفسها حركاته كلماته ابتسامته ولا مواقفي ومواجهاتي معاه
انتفضت أقوى مع شهقة عالية ودموع أكثر بدت تشق طريقها ع خدي البارد حتى تحرقها بحرارتها,,, تذكرت ذاك المكان المظلم لي ما كان فيه غيرنا مسكت رقبتي وبديت أنتفض وأحاول آخذ نفس وأنا أذكر قبضة يدينه القوية لي كانت تحاوط رقبتي وهمساته القاسية غمضت عيوني بقوة وأنا أحس بدموعي لي تحرقها بملوحتها ما أبا اذكر هاليوم الا هاليوم خلاص انا طويت صفحته نسيت مابا أرد أذكر ماباااا,,,
ارتحت من اليد لي انمدت لي سحبتني وحضنتني بقوة ،، ما عرف منو لي حضني لأنه كان دافن ويهي بصدره الوسيع ،، مش مهم منو المهم انيه حصلت لي حضن يلمني حضن ارتحت لـه وايد و يد حنونه قعدت تمسح ع شعري كنت محتاجة لهالحضن من زمااان كأنيه أعرفه ومجربة دفاه ،، دفنت روحي بهالحضن أكثر ،، وقعدت أتمتم : يمه وينج يمه محتاجة لج يمه بدونج أنا تايهه يمـه وينج رحتي وخليتيني بهالدنيا بروحي محد يبيني حتى خالوه روضة راحت يمه هيه عندج الحينه خالوه تسمعيني خالوه ليش سرتي و خليتيني هالحين منو بيدافع عنيه خالوه أخاف منه والله انتي تقولين انه طيب بس هو يكرهني و قاسي معايه خالوه كان يبا يذبحني يضيعني ،، يبه وينك يبه ليش رحت وخليتني عندهم كل من يحبني راح وتركني يبه حتى خاليه بيروح وبيهدني بروحي يبه خاليه مريض يبه خاليه يعاني أسمع أنينه كل ما كلمته وأصيح يقول لا تخافين وهو خايف أكثر منيه ،، آآآه يبه يمه أباكم ارجعــوو
رحلــتو ،، وعشـتْ بعـدكمْ آهــآتْ وجرآح
رحلـتو ،، ومآ بقى لي غير دمعـة تخوني كل حينْ
قعــدتْ على صوت رولا ،، حاولت أبطل عيوني بس ما قدرت عيوناتي تعورنيه ،، تأوهتْ بقوة وأنا أرفع جسمي وأستندت بشبريتي وأنا أضغط بقوة على راسي ،، بطلت عيوني بقوة وأنا مستغربة وأتسآءل شو صار .؟ متى رقدت .؟ منو لي لحفنيه ..؟؟ وقفت فجأة وأنا أذكر الحضن العميق لي كنت محتضنته ،، ضميت نفسي بقوة و يلست أطالع رولا لي كانت مستغربة من حركتي
قلتلها بسرعه : متى رقدت ..؟ شو صار ..؟؟
ردت بهدوء : ما صار شي كنتي عم بتبكي ونمتي فجأة
: انتي لي لميتيني ..؟؟
: أنا لما جيت كنتي نايمة والدموع بعينك
شهقت وقلت : رولا لا تجذبين في أحد يا ضمني و بعدها رقدت من غير لا حس ما شفتي حد عندي بالحجرة
صدت عنيه وقالت : ماشفت حدن ،، أحمد وعلي برا بدن ياكي .؟
قلت وأنا أحك يبهتي : ياربييه نسيتهم الساعه جم الحينه
قالت وهيه تطلع من الحجرة : الساعه 5
طلعت وراها وأنا أشوف علي وأحمد لي واقفين عند باب الجناح قلتلهم بسرعه : سوري والله نسيت اتريوني شويه بتغسل وبنهي أخبر يدوه
علي : خبرتها قالتليه تعرف خالك ما يرضى بوسيط صاحب الحايه هو لي لازم يروح يرمسه
تأففت : افف ان سرت خبرته ما بيرضى أحمد انت خبره هو بوك
أحمد : وذا انه بويه ما بيرضى لو شو لأن نحن اروحنا بنسير
: انزين خبرو منصور وسالم والبنات يمكن بيسيرون
علي : لا لا لا لا لا لا ما نبا هاييل ما بيخلونا نسرح ع كيفنا بيوقفون لنا وقفه الا وين سايرين وشو تسوون ها حلال وها حرام عيب ومنقود
ضحكت : هيه يعني أنا لي بخليكم ع راحتكم
أحمد : هيه ،، وبعدين الاتفاق انه نحن بس لي نسير وما نييب حد ويانا
: بس تعرفون انيه ما أرمس مع عميه لأن ان رمسته بينقلب كل شي
أحمد : لا هو اليوم مستانس ويمكن يرضى الا اكيد بيرضى يلا عاد سيري نبا نطلع ع الساعه 6 عسب يسدنا الوقت لأنه أكيد بيقول ترجعون الساعه 9 للعشا
: ها اذا رضى بعدين شو ها انتو كبار الحينه ليش جيه يعاملونكم ع انكم صغاريه وكل شي محدد بوقت
علي : أونه أساس التربية جذا و لا جان كلهم صاعو واختربو
: ليش هالحينه محد فيهم عوي
علي : بس حمدان خويه لي غير
قلت بهمس : حتى سييييييف .؟
أحمد : سيف أحسن واحد فيهم بس شويه معقد
رفعت حايب واحد وقلت : معقد .؟؟
أحمد : هيه خواته مستحيل يرمسن ويانا لو الموت منقود اونه والود وده ما ييلسن عندنا ع طاولة وحده
قلت وأنا أعطيهم ظهريه : زين تريوني بتغسل وبييكم
دخلت الحجرة ومنها للحمام يلست أتأمل ويهي بالجامة ،، أنا ليش تخبرت عن سيف هو منو عسب أتخبر عنه بس لازم أعرف هو كيف عسب أعرف أتعامل وياه ،، وليش أعرف أصلا أنا ما بحتك فيه وان شفته ما بسويله سالفة ولا باخذ وبعطي وياه بالكلام باختصااار بتجاهله ،، قعدت أتأمل الجامه وأنا أبطل الماي انرسمت لي صورته ونظرته المفاجأة لشهقتي بعد ما شفته ،، و انرسمت صورة الشاب لي بالمطار عنده يالله نفس العيون الواسعه بس لي اختلف النظرات فرق بين نظرة سيف المتفآجأة ونظرته لي كلها اشمئزآز نظرة تحرق ونظرة ثانيه تحير ،، فرق بينهم وبين بعض مع ان الشبه بينهم كبير بس صاحب العيون الحارقة أوسم وأجمل بوااايد عيون واسعه خشم مثل حد السيف أسنانه البيضة المرصوصة ع شفايفه لي فيهم الشفة السفلى أكبر عن العلوية كل شي فيه مرسوم بدقة ... حطيت يديني تحت الماي ورشيت جم رشه ع ويهي عسب أمحي صورهم من مخيلتي ،، بطلت عيوني والصورة ما انمحت جنهم قاعدين يتأملوني بنفس نظراتهم من الجامه بديت أرش الماي ع الجامه وأنا أنتفض بقوة ،، مابا أصيح خلاص خلاص منو هم واحد ما عرفه ولا يعرفنيه موقف صار بثواني وافترقنا وخلاص والثاني مُجرد حَـشرة حَـشرة حَـشرة حـَشرةْ تحـومْ حـِولي تلطخنـيْ بقذآرتها تزعجنيْ بصوتهـآ المزعج أشردْ منهـِـآ بصريخْ ..شي أشمئز منــهْ أكرههـ .. هذآ هُـو سيف بإختصــآرْ .............!!!
نزلنــآ تحت بهدوء ،،
سألت : وينه ..؟؟
علي : منو .؟
: منو يعني عميه ناصر ..؟
أحمد : بالصالة الثانيه
: أي وحده .؟
أحمد وهو يأشر ع الصالة لي ع اليسار : هااي
: منو عنده .؟
أحمد : الشياب والشباب كلهم متيمعين
: انزين سير ازقره قوله انيه أبا برمسه
أحمد : تستهبلين ..!!
: لا صدق سير خبره الريم تباك
علي : الحينه خاليه هو لي ايي لعندج ..؟
: هيه ولا ما برمسه والكل هناك
أحمد : ترا سيف محد سار يرقد
اطالعته بنص عين : شو قصدك .؟
أحمد : ما شي .؟
: انزين يلا طفو جدامي
علي : لا بويه سيري اروحج نحن مالنا شغل بنسير نلعب
أحمد : هيه سيري قوليله انج انتي تبين تسيرين وتبينا وياج هب نحن لي خبرناج
: طاااااع يالهروم تخافون هاا
أحمد وهو ينفخ صدره : لا منو قال بس نتقي شر الحليم اذا غضب
ضربتهم ع راسهم بخفيف وقلت : مالت ،، لهالدرجه يعني راصين عليكم حشا هب عيشه هاي خلاص سيرو ما بسير وياكم مكان
علي : أفا أفا ،، لا لا خلاص بنيي وياج شو نسوي بعد
: لا أمزح ، سيرو أنا اروحي بسير أرمسه
هديتهم ومشيت للصالة بهدوء ،، قعدت أتأملهم من بعيد كانو عماميه راشد و ناصر بس لي قاعدين وعميه فهد هب وياهم ،، خالد ومنصور قاعدين عند عميه راشد يسولفون و سالم ووياه واحد اكيد انه عبدالله عند عميه ناصر ،، أول ما شافوني سكتو
: السلام عليكم
: عليكم السلام
تحمحمت وقلت وأنا أطالع عميه ناصر : عميه أباك بسالفه .؟
حسيت انه استغرب فرد : ارمسي محد غريب هنيه
قلت وأنا أضم يديني ع جتوفي : هو طلب صغير اتمنى انك ما تردني
عميه راشد : انزين تعالي ايلسي بلاج واقفة بعيد
صديت عنده : لا ماعليه مستعيلة بخذ الجواب منه وبسير
حسيت انه عميه ناصر استغرب أكثر تم يطالعني بتعجب فقلت : اليوم الخميس وباجر اجازة الويكند ؛؛
سكت أطالعه فقال وهو ما زال يطالعنيه باستغراب : انزين ..؟؟
: قلت يعني بدال الملل بطلع اتمشى
: دايم تطلعين من غير شوريه شو فرقت اليوم .؟؟
: بشل ويايه أحمد وعلي لأنيه حسيت انهم مالين القعده بالبيت
قال بسخريه : والله ..؟
قلت بملل : هيه ،، [ حسيت بإذلال وأنا أطلب منه خاصة بعد نبرة السخرية لي حسيتها منه فكملت بعد شوي ] أتمنى يعني تتكرم و ترضى
يلست أطالعه وهو يطالع اليالسين جنه ياخذ رايهم وعقب قال : قبل العشى تكونون بالبيت
: بنتعشى برا ..؟؟
وقف وقال : الساعه 9 تكونون بالبيت واذا تأخرتو دقيقة وحده مالكم طلعه بعدها
تأففت وقلت أنا محتقرة الوضع لأول مره أحس بإذلال : انزين بنتعشى برا و عشر بنرد
قال وهو يمشي : تسع تكونون بالبيت
طلع وهدنا ،، يلست أتأمل القاعدين لي ما نطقو بحرف و اكتفو بأنهم يطالعونيه باستغراب ،، طلعت و هديتهم وأنا أتأفف الشرهه هب عليه عليّ أنا لي مسويه له سالفه وأوني سايرة أستأذن منه ولا هو منو يكون عسب أستأذن منه ،، بس أنا جيه تربيت ماسوي شي ولا أسير مكان غير من بعد ما أستأذن من أكبر شخص بالبيت وعميه ناصر هو الأكبر ،، و الله انه ما يستاهل ان حد يرمسه لو سايرة ماخذه اذن يدوه بعد احسن بشلهم ولا عليه منه هم كبار الحينه هب صغار يتحكم بهم جذا ،، يلست أطالع الساعه الحينه الساعه 6 أحس ما بيكفينا الوقت زين منه وافق من غير نقاش غصبا عنه أصلا وان مارضى جان سرت غصب عنه منو هو اصلا عسب ما يرضى ،، وصلت عند أحمد وعلي لي كانو يلعبون أو يمثلون انهم يلعبون
قلتلهم : يلا نشو عندكم نص ساعه بس ست ونص أحصلكم بالسيارة ولا ما بوديكم
قالت فطوم لي يالسه بآخر الصالة : وين بتسيرون ..؟؟
صديت عندها وقلت : بنسير القرية العالمية
فطوم : خبرتو خاليه ناصر ..؟؟
رديت بملل : هيه تونيه مخبرتنه
نوف شهقت : وافق ،، ولا تخبرونا من متى وأنا أقول لمنصور وسالم يودونا وهب راضين
أحمد : ترا ما بنوديج ويانا لا تحاولين بس نحن الثلاثه بنسير
نوف : جب انته انزين اصلا أنا لي ماريد أسير وياكم
قالت وحده يالسه عند سارة : اشو تبون بالقرية ترا محد يسيرها هالحينه ما فيها شي يستاهل
طنشت رمستها وأنا أرفع حاجب واحد : شرات ما خبرتكم ان تأخرتو بسير وبهدكم
مشيت ولحقونيه وكلن مشى لحجرته ،، كان جناحي ع يمين جناح عميه ناصر ،،أول ما وصلت حصلت خالوه عاشة سانده روحها عند الباب قلبي نغزني فسرت عندها ع طول مسكت يدينها
: خالوه شو بلاج ..؟
قالت وهيه ترص ع يديني : لا ماشي بس دايخه شوي نسيت آخذ دوايه بوقته
: زين تعالي ويايه بوديج حجرتج تريحين
: لا لا فديتج خلينيه بسير المطبخ أشوف هالبشاكير شو يخبصون تعرفين عمج بعد ما يعيبه شي
: بس انتي تعبانه بخلي رولا تشوفهم انتي ارتاحي
ابتسمت وقالت : رولا يكفيها عشاج لي تعابل به ،، ما عليه خلينيه أسير ما برتاح جيه
رديت الابتسامة وقلت : خلاص انزين بس بخلي رولا عندج اتريي بخبرها تيي وياج ( يلستها بالكرسي لي جريب جناحهم ) لا تتحركين انزين بخليها تييج احينه
هزت راسها وابتسمت ،، هديتها وسرت لجناحي زقرت رولا ،،
ياني صوتها من الـ clothes room :: هيني هوون
سرت عندها بسرعه شفتها قاعده تبخر ليه الملابس لي مظهرتنهم
وقالت : وافئ عمك .؟
قلت وأنا أتأملها : هيه
: اوك راح أعطي ويليم خبر ،، البسي الفلات شوز لأنو راح تتعبي هونيك
ابتسمت وقلتلها قبل لا تطلع : أم منصور تعبانه أباج تشوفينها لأن شكلها ما يبشر بخير التعب ظاهر عليها
: ييه شو فيا الصبح كانت عم تضحك و منيحاا
: مدري تونيه شفتها دايخه وكانت بطيح تقول ما خذت الدوا بوقته انتي شوفيها وطمنيني عليها ،، سيري ترا هديتها روحها برا عند باب جناحها
هزت راسها وحطت المبخرة وظهرت ،، بديت أبدل ملابسيه بسرعه ،، سكيني أسود عليه نقشات ذهبية بدي أصفر منقوش بكتابات باللونين الأخضر والذهبي .. وعليه جاكيت أسود قصير مخطط بذهبي ورمادي والشوز أسود ما عيبني فسرت دورت غيره خذت واحد مسكر من جدام بنقشات ذهبية رماديه وبنفسجية .. سرت عند الجنطة الصفرا بسير طويل ذهبي،، تأكدت من وجود بوكي العلج الكلينكس علب النظارات جنطة الميك آب لي ما استخدمها ،، رفعت حايب واحد وأنا أطالع علبة الاسعافات الأولية الصغيرة ضحكت بهدوء هاي رولا عليها طلعات مدري كيف ،، سكرت الجنطة وسرت عند التسريحه بطلت شعريه المرفوع ذيل حصان وجعدته مدري ليش حسيت برغبه انيه اشوفه مجعد نفس قبل ،،اسبوع وأنا كله رافعته بسبب سيف خفت يطلع لي فجأه والحينه هو راقد وأكيد انه ما بينش ولا بشوفه اليوم من ارد برفعه ،، سرت قشعريرة بجسمي بس من تذكرته كل ما تناسيته أرجع اتذكره ،، هزيت راسي بقوه أنفضه من باليه وبدبت أتزهب ،، حطيت كريم مرطب ع ويهي ومرطب شفايف لبست النظارة لي باطار أخضر فاتح و ساعتي الذهبية بسير أسود كانت الساعه 6 ونص ،، فبسرعه رتبت شعريه ونزلت وأنا أشل فوني لي لمحته جريب الجنطة زين انيه ما نسيته ،، نزلت بسرعه تحت خطفت ع يدوه بحركه لا ارادية صرت غصب عنيه اذا بظهر من البيت امر عندها احب راسها وأخبرها انيه بظهر ،،
وصلت السيارة لي كان واقف عندها ويليم وهو يبتسم رديت له الابتسامة وركبت وأنا أضحك لأن علي وأحمد كانو سابقيني ،،
: ههههههه ماشاء الله سريعين
علي : هيه اشو عبالج عيل
قلت وأنا أطالعهم بكناديرهم والحمدانيه : شعنه ما لبستو بدل بدال هالكنادير أحس ما بتاخذون راحتكم
أحمد : لا لا حلاته لبسنا شعنه نلبس بدل
علي : هب عايبج شكلنا يعني
: لا بالعكس روعاا بس قلت يمكن ما بتاخذون راحتكم
،،،
دخلنـآ القرية من البوابة رقم 4 ،، ياربااااه شو هالزحمه ،، والأشخاص أشكال وأنواع ومن مختلف الجنسيات كلنا مجتمعين بمكان واحد ،، عربي أعجمي أفريقي أسيوي أمريكي أوروبي فقير غني ،، بمختلف الديانات ،، تمنيت للحظة وأنا أطالع العوايل لي متناثرين هنيه وهناك يكون خاليه عندي ،، اشتقت له وايد صرت مارمسه غير دقايق بسيطة لأنه بدأ مرحلة العلاج خانتني دمعه وأنا أتذكر مكالمته الاخيرة
مكالمة مؤلمة .....
قال وهو يكح بقوه : يقول الدكتور انيه بديت أدخل بالمرحلة الثانية لأن الأعراض بدت تظهر
شهقت وأنا أسمع صوت كحته لي تزداد بلا توقف : شو يعني .؟
سكت دقايق وهو يكح كحات متقطعه وبعدها خذ نفسه بصعوبة : باجر بسوي شويه فحوصات و بيحددون موعد العملية
: عملية ... كيف يعني بيستأصلونه ،، مايصير علاج من غير عملية
ضحك ضحكة قصيرة وعقب قال : علاج بليا عملية يعني ما شي غير أمل بسيط ع قولة الدكتور زين ان نحن اكتشفنا المرض وهو بمراحله الأولى وما تطور للمراحل الباجيه
قلت بصوت مهتز أقرب للهمس : جم نسبة الشفا
رد بنفس الهمس : 40 % ،[ تنهد بهدوء و بعدها قعد يكح كحات طويلة و هو يئن كل شوي وأنا أصيح مع كله آه منه بعد وقت قالي بصوت مهتز ] الريم بخليج أحينه برتاح باجر ورايه جلسة فحوصات من يحددون موعد العملية بخبرج
رجعت للواقع بهزة يد أحمد وهو يزقرني ،،
قلتله : خير شو مستوي ..؟
أحمد :: من الصبح أزقرج وين سرتي .؟
: هنيه ما تشوفني عندك شو بلاك ..؟
أحمد وهو يضحك : ما بلايه شي انزين شو تبين تتمشين ولا تلعبين ترا هالحينه الساعه 7وربع
: بكيفكم وين ما بتسيرون أنا وراكم
علي : عيل شوفي أي لعبة نلعبها تلعبينها ويانا
: اوك
أحمد : هب تقولين خلاف أخاف ومدري شو
يلست أطالع الألعاب ضحكت وقلت : هاي الألعاب ولا شي عندي لعبت لي أخطر عنهن
،،
يلست بتعب وأنا ميودة راسي لي يدور ،، مسكت بطنيه بيد وحطيت الثانيه ع حلجي وأنا أحس بلوعة
: يا ربيه راسيه يدور شو هاللعبة دوخت براسي الا ادور فيه
علي وهو يبطل ليه دبه الماي : هاي رابع لعبة نركبها و جيه صابج عيل لو نلعب باجي الالعاب شو بتسوين
: لا لا ماشي غيرها سيرو العبو انتو أنا بتم هنيه تعبت الصراحه
أحمد : بتمين اروحج
قلت وأنا أظهر فوني من الجنطة : سّيف رقمك عنديه من تي الساعه ثمان ونص بتصل بكم لا تحاتون ما بتحرك من هنيه
شل الفون كتب رقمه ورن رنه لتلفونه ورجع ليه الفون وقال : ان ضايج بج حد اتصلي بنا
هزيت راسي وأنا أضحك ع رمسته ،،
مرت دقايق بسيطة وأنا أتأمل الناس لي يتمشون من غير أي تعبير ،، والشباب لي رايحين ورادين بنظراتهم لي كانت تخترقني وتفصلني تفصيل نظرات كرهتها وكنت أصد عنها ،، كان الإزعاج هو الجو المسيطر ع المكان كرهت وضعي وكنت أبا أمشي بس أحس بدوخة وراسيه بدأ يعورنيه أكثر ،، فقررت أستقر فمكانيه ولا أتحرك منه ،، دقايق وحسيت بأحد جريب من الطاولة خفضت نظريه وشفتهاا تهتز بدموعها لي مغرقة ويهها بملامحه العذبة الملائكية خدود محمره من الصياح شفايف صغيرة بعيون واسعه مغرقة بالدموع وخشم صغير ،، اطالعتها باشمئزاز ياربيه اشو تبا ما حصلت حد تصيح عنده غيريه قمت من مكانيه ويلست بعيد عنها بحيث انيه ما أشوف شكلها الباكي ،، بس بدأ صوتها يعلى وصياحها يزيد ،، سديت أذانيه بيديني أففف مالقت تصيح غير عنديه عصبت ويلست أطالعها بقهر ،، هب بس حشرة الناس وهالأغاني لي هنيه وهناك بعد يات تحشرنيه هاي بصياحها ، نشيت شليت أغراضيه ومشيت بعكس اتجاهها أدور لي مكان هادي ،، بس مدري ليش صديت أطالعها بعد ما خطيت بعض خطوات طويلة.. لقيت مجموعه شباب عندها و واحد منهم يرمسها مدري ليش انتفضت وأنا أتذكر ذاك اليوم المظلم رجعت لها بسرعه سحبتها من يدها
زاد صياح البنيه فصرخت عليها : اشو تبون منها خوزو يلا وانتي بس خلاص اسكتي [ زاد صياحها فصرخت أكثر ] أفففف بس خلاص ما تفهمين
سحبتها ويايه وأنا أمشي يلين ما ابتعدنا عن الشباب لي كانو يطالعونيه باستغراب وقفت ونزلت لمستواها وقلت : بس خلاص لا تصيحين شو بلاج وين أهلج
[ صمت وصياح ]
: أفففف انا منو ضربنيه ع يدي وجبرنيه ارد أشلج انا الغبية انتي بترمسين ولا شو .؟
[ صمت وصياح]
يلست أمسح ع راسها وأمش دموعها : بس فديتج بس خلاص اسكتي خبريني انتي منو وياه يايه عسب أعرف اتصرف
ولا ارمست فاتصلت بأحمد ،،،
: تعالو عندي وحده ضايعه
رد عليه وهو يضحك : دوري أهلها
زاعجت عليه : أحمد عن السخافه يلا تعال البنت تصيح
: تولي شلنا خص فيها أنا أريد ألعب
: أحممممممممممد ..؟؟
: خلاص خلاص انزين انتي وين ..؟
: مدري عند المطاعم صوب KFC عند الكراسي لي جباله
: خلاص نحن يايينج ..
رديت أطالعها حاولت أسيطر ع مشاعري بس ما قدرت سبحان الله من أشوفهم الاشمئزاز يسيطر عليه ،،
: انتي كله تصيحين انزين خبريني ويا منو يايه [ صياح ] مع ماما ..؟؟
هزت راسها وهيه تصيح
: انزين هيه وين الحينه .؟
هزت راسها بالنفي يعني ما تعرف
: انزين انتو وين كنتو آخر مره .؟؟
أشرت لي عند الألعاب وهيه تصيح
: أففف انتي شعنه ما ترمسين بس تهزين هالراس [ سكت وقلت بعد شوي وأنا أدور بعيوني على أحمد وعلي ] انزين هب حافظة رقم ماما ..؟؟
هزت راسها بالنفي ،، كنت برمس بس ظهرت عقدها لي كان ع شكل أي دي كان منقوش على ظهره اسمها ،، ملاك ،، تاريخ ميلادها 6-1-2008 ،، فصيلة دمها o- ،، رقم موبايل اتصلت من غير أي تردد بالرقم من غير لا أسألها حتى منو رقمه ها رن رن رن ورن بس محد رد عليه ،، كنت برد أتصل بس وصلو أحمد وعلي
: جان تأخرتو زياده البنت حشرتنيه
علي : منو بنته هاي ..؟؟
: شعرفنيه ..؟ اشو اسويبها الحينه ..؟
أحمد : انتي شعنه سرتي عندها
: عيل أخلي هالشباب يشلونها
أحمد : انـز ...
قطعه صوت فوني لي يرن،، يلست أطالع الرقم فمديت الرقم لأحمد : رد ان كانت حرمه عطنيه برمس واذا ريال رمسه حصلت الرقم ها عندها
أحمد : كيف عندها ...؟؟
: منقوش ع قلادتها شي معلومات عنها ورقم حد من هلها رد قبل لا يسكر
أحمد وهو يرد : ألو .... مرحبا خويه ... شحالك عساك بخير ..؟؟ ....... شو علومك ان شاء الله بخير ؟؟..... سامحنيه خويه قعدتك من رقادك ........ ترا انت ما تعرفنيه ولا أنا أعرفك ...........
قاطعته وأنا كاتمه ضحكتي : انت شو تسوى خبر الريال عن البنيه داق تتعرف عليه ..؟
أحمد وهو يضحك : انزين اصبري لازم ارمسه بهدوء تبينيه مره وحده اقوله بنتكم ضايعه بيختض لازم آخذ وأعطي وياه بالرمسه
: أحمدوه عن العبط الريال ع الخط و البنت بتموت علينا
أحمد وهو يرد يرمس : هلا خويه هيه وياك أنا ...... لا خويه بس بنتكم ضايعه بالقرية و حصلنا هالرقم عندها ...
: قوله اسمها ملاك خله يتصل بامها تقول انها يات ويا امها
أحمد وهو يهز راسه : البنت اسمها ملاك ............... شفيك ما سوينا بها شي........ يا بويه لا تزاعج طريت طبلة اذني ......... ما بنسويبها شي هيه عند الرضيعه الحينه ... يا خويه هيه بالحفظ والصون بس انت خبر امها تيي تاخذها تراها تصيح ..... نحن عند الكراسي المجابلة للـ KFC ....... لا لا ان شاء الله .. فداعه الله
أحمد وهو يسكر : اشو هالريال يتحرانا بنخطفها اشو نبابها عندنا صغاريه حاشرين البيت ما نبا زياده عدد
علي : تصدق أحمدوه لو انك ترمسنيه بهالاسلوب ما بعرف انه انت
أحمد : ليش اشو قالولك ما عنديه اسلوب .!!
علي : لا لي اعرفه انك دفش وما ترمس الا بصراخ واستهبال
أحمد : محد أهبل غيرك
قلت وأنا أكتم ضحكتي : بس ما صدقت البنت تسكت افف منكم لازم تتناقرون
علي : الساعه الحينه ثمان ونص
: ياربيه بنتأخر ،، ترا اذا ما وصلنا ع الوقت ما شي طلعه ثانيه
أحمد : بس رمسه أصلا أبويه أحس انه ما يقدر يقولج لا .. لو انه نحن لي نطلب منه مستحيل يرضى للحينه هب مصدق انه رضى
علي : يعني بعد هاللعب كله لي لعبته و هب مصدق
أحمد وهو يطالع فوني لي يرن بيده : هكو اتصل اسكتو .... [ رد ] هلا خويه ............ لا لا نحن فمكانا .........[ قال يرمسني ] يقول شي ثنتين بين الحينه هن جريبين منا ، لابسات نقاب وياهن البشكارة بحجاب أحمر
يلست أدور ع ثنتين من هالأوصاف من بين جماهير الناس العابره // من حصلتهم صحت بفرحه :: هاذن شفتهن خلاص
أحمد وهو يرد يرمسه : خلاص شفناهن ......... العفو خويه ...... لا لا معذور ...... بالحل خويه ... لا لا ماصار شي ... فداعه الله
شليت البنت لي كانت ع وشك ترقد من تعب الدموع ومشيت عندهن لي من شافن ملاك عنديه قربن بسرعه قالت وحده شكلها أمها لأنها سحبتها و يلست تلمها وتبوسها : تسلمين فديتج ،،
اكتفيت بأنيه أبتسم لها وأنا أتأمل لي وياها ،، كانت تتطالعنيه بنظرة اشمئزاز حتى ما كلفت ع روحها تشكرنيه ،، طنشتهم بعدها ورديت لعند أحمد وعلي وربعنا بعدها للسيارة ..
وقفت السيارة عند باب الفلة الساعه 9:03 ،، أول ما نزلنا قمنا نربع للباب ونحن نتخرطف كل شوي ومن يتجدم حد فينا يسحبه الثاني عسب يسبقه أول ما بطلنا دروازة البيت كانت رولا باستقبالنا جان افر عليها الجنطة وأربع ورا أحمد وعلي لي سبقوني
وأنا أصرخ : أحمدوه علاوي اصبرو ويا هالويه
أول ما وصلت غرفة الطعام جان أوقف وراهم لأنهم كانو واقفين ولا ادخلو ،،
: بلاكم ...؟؟
أحمد : ادخلي انتي أول
: ليش ما تدخلون انتو .؟
علي : بس ليديز فيرست (Lades first )
: الا قولو وي آر سكيرد (we are scared )
أحمد : نعم نعم ...
علي : .. أف كورس
قلت وأنا أبطل الباب : عادي بي كول ......
دخلت وأنا أبتسم بس تلاشت البسمة وأنا أشوف أكتافه العريضة من ورا الكرسي ، كان قاعد بنفس المكان لي تعودت أيلس فيه لااااا يعني هذا مكانه وأنا احتليته ،،
لا لا مستحيل ليش ما خبروني ليش خلونيه أسبوع بطوله أيلس بمكانه حسيت بقشعريرة تسري بجسمي وقمت أنتفض حتى انيه رجعت جم خطوة ورا وصدمت بعلي لي كان ورايه ،،
كنت بطلع بس ياني صوت عميه ناصر
: رادين مبجر جان تأخرتو بعد
صديت صوبه تأملته حاولت أتكلم بس ماقدرت حسيت بخنقة وإن الكلام وصل لبلعومي
بس ما يقدر يظهر مقدر أهمس بحرف حتى ،، قمت أرجف بقوة وأنا أتذكر ذاك اليوم مسكت راسي
وأنا أنتفض حسيت ان قواي خارت وكنت بطيح فاستندت بأحمد لي كان واقف عندي
أحمد لي حس برجفتي همس : الريم شفيج ..؟
همست : ماشي ماشي ،،[ رفعت راسي لعميه وقلت بهدوء ] ،، اليوم الخميس و زحمة شرات ما تعرف ونحن ما تأخرنا غير 3 دقايق ،، المهم أنا تعبانة أستأذن بسير أريح
طلعت من غير لا أسمع حسهم ولا أرد أصد عنده ،، طلعت بسرعه برا البيت وربعت لعند الكراسي لي تعودت أقعد عندهم كل صباح وأنا أتريا أحمد وعلي يخلصون ريوقهم حتى أوصل للمدرسة وأسير بعدها ع دوامي ،، سندت راسي بالكرسي فصخت نظارتي وفريتها ع الطاولة باهمال
وقمت أهوس على عيوني ،، مدري جم مر من الوقت عليه بس الأكيد انه وقت طويل ،،
طلعت فوني من جيب الجاكيت بعد ما سمعته يرن رديت بهدوء
: هلا بأغلى انسان ،، هلا باللي أحبه حب ما حبيته أحد ،، هلا باللي فراقه عليه صعب ،، هلا باللي بدونه أنا تايهه وحيده ،، هلا باللي أدعي ربي بكل ليلة يحفظه لي ويرجعه سالم
ضحكه قصيرة : لا خلاص انا بييج الحينه ع أول طيارة لو حرمتي ما بتقولي كل هالرمسه
رديت بضحكة مماثلة سكت شوي وبعدها قلت : محتاجة لك وايد
: شفيج ..؟؟
نزلت دمعه خانتني : مشتاقة لك ،، تعال خذني مليت والله مليت
قال بهمس : هاييل أهلج يالريم لازم تتعودين عليهم
: تعبت تعبت والله كل ما اقول اليوم حلو يصير أردى من اللي قبله ،، صرت ألازم حجرتيه بس عسب مـ ................................
قاطعتنيه موجة كحه طويلة يات من صوب خاليه فقلت بلهفة : خاليه شفيك ...؟؟ خاليه رد عليه شفيك ..؟
رد عليه بعد شوي بصوت قريب للهمس : لازم تتعودين خلاص أنا بديت أتعود
قلت بألم : بس الكحات بدت تزيد وصوتك بدأ يتغير
ضحك ضحكته القصيرة : ما عليه ان شاء الله بعد العملية كل شي بيتغير
بدت دموعي تشق طريقها : حددو موعد العملية ..؟
قال وهو ياخذ نفس قصير : شي فحوصات نتايجها للحينه ما طلعت ،، لا تفكرين أنا بخبرج يومها ،، زين هالحينه يا وقت دواي بخذه وبرقد برمسج باجر ان شاء الله
همست : ان شاء الله
سكرت من عنده ،، رجعت فوني بجيب جاكيتي وأنا أرفع ريولي للكرسي وأضم روحي مع هزات بسيطة وشهقاتي تزداد ،، يالله كيف تغير صوته أكيد علامات المرض بدت تظهر عليه أكيد وزنه بدأ ينقص ،، يعني شكله بيتغير خلاص ،، زادت شهقاتي وأنا أحاول أتخيل شكله ،، وقفت ومشيت بسرعه وبديت أربع يلين ما وصلت جريب الفلة شفتهم كانو 4 ،، بس ماقدرت أميزهم من بين دموعي ،، يلست أمسح دموعي بكف يدي وييت بمشي بعيد عنهم بس سمعت صوته يقول
: الريم بلاج ..؟؟
قلت من غير ما أصد صوبه : ماشي
تقرب منيه : كل هالصياح ومافيج شي
وصلت الريحة لرآسي رفعت نظريه من الارض حتى استقرت عيني على الكائن لي بين أصابعه اعتصر قلبي ألم قوي رفعت نظريه له بألم وعدم تصديق لاحظت انه استغرب،، فسحبته من بين أصابعه بقوة فريته ع الأرض وبديت أدوس عليه وأدفنه بريلي بالرملة
: حرام حرام والله حرام عليك [ بديت أضربه ع صدره ] انا بسبته بفقد خاليه بفقد
أغلى انسان بحياتي مابا أفقد انسان بغلاه بعد حرام والله حرام
يتــبعْ // ..
|
27-03-11, 03:43 PM
جديد مواضيع قسم القصص المكتمله من وحي قلم الاعضاء
العرض العادي
