كأنك نويت اتذل هالراس أخطيت

(الجزء الثاني )
وقف ابو ماجد وبصرخه :اطلع برى وخذ هاالخمه معك اطلع برى

وقف ماجدبيروح
وام ماجد اتناظره بالم وترجع تناظر زوجها بترجي :الله يخليك يابو ماجد افهم

ابو ماجد بعصبيه : ماجد مات انا ابو سعد وناظر بماجد اللي نزل ياخذ ولده : وانت لااشوفك

ام ماجد بين دموعها :طلبتك هالمره سامحه

ابو ماجد بعصبيه : كل مره اسامحه طلق بنت عمه بدون سبب وسافر يدرس برى بدون مانعرف عنه قلنا طيش شباب ويرجع ويعقل ويرجع بنت عمه ويصلح غلطاته يرجع لنا بولد


ام ماجد وهي تمسك كتفه وعيونها كلهم دموع وهي تشوف ولدها طالع بولده اللي صحى ويبكي كانه يعرف اللي يسير لابوه

ام ماجد وهي تترجى بكل خضوع وبكي: طلبتك سامحه علشاني طلبتك صرخت لماجد خلك هنا لاتطلع

وقف ماجد بمكانه ولف شاف امه كيف تترجى ابوه كره نفسه اللي حط نفسه بالهموقف ومن داخله يبتسم بسخريه هذا ذنبك ياحنان جالس ادفع الثمن طردتك بدون سبب

صرخ ابو ماجد :يامره لو ماسكتي عليك يمين الطلاق
طلع ماجد بعد ماشاف حال امه ماقدر يهدم حيتها وانسحب من المكان وهو يضم ولده


وموني ومريم مسكو امهم يبعدوها عن ابوهم
لايقع عليها الطلاق




وقت العصر جالسه تقراء مجله معها كاسة كوفي بس

بالها مو مع المجله فاتحتها بس كذاتنهدت ياربي كيف

اقدر اخليها تحفظ لسانها هالبنت بتهبل فيني الله يرحمك
يمه كانها الكبيره وانا الصغيره كيف اقدر اخليها هاديه كل

هالمده والله لتهبل فينا واعرف جدتي كيف تغلي ساره

زوجة عبدالعزيز وكيف تكره رغد

قطع افكارها صيته جالسه جنبها هذي شكلها بتجر شكل

بسكت اعرفها تسمني بكم كلمه وتقوم تحسب اني

ساكته خوف انا ساكته لان الرد عالسفيه مذله

قطع افكارها كلام صيته اللي خلى الكوب ينكب عالارض والمجله اطيح تلقائيا ناظرت بصيته بعدم تصديق ابتسمت صيته بشماته : يؤ يؤ كل هذا لانو قلت ماجد رجع


ماقدرت تتحمل اول مره اعصابها تفلت وقدام مين صيته حاولت توقف رجفت يدها فضلت الهروب على الجلوس معها طلعت فوق وكل شي يرجف فيها قلبها يدينها حتى

رجولها يالله تمشي وصلت لغرفتها مئواها من كل الالم

والهم اتمسكت بالسرير بقوى هذا هو المنشود رمت

نفسها عليه بنهيار وهي تبكي رجع ورجع الالم معه تكره

تحبه خاين وتموت فيه حقير وهو دنيتها هو المها وهو

دواها تناقض كبير شهقت بالم وهي تبكي كل الايام اللي
فاتت كوم ووجوده بنفس المكان كوم ثاني اكيد بيجي

بكره وبتشوفه ياهم قلبها هماه ليش ذ بحني كنت اكرها

وخلاني احبه ليته ظل يكرهني ماعاملني كاختها
غمضت عيونها بالم

ناظرت فيه وهو يضحك :قلت لك ياحنان خليني اطبخ

ابتسمت وهي تستمتع بضحكته :اوه قلت لك مااعرف

اطبخ امي مدلعتني تبيني اطبخ جيب جاهز شغاله عندك

ابتسم : افا فيه اخت تجوع اخوها

طعنه قويه ابتسمت ابتسامه باهته : خسى الجوع باستهزاء ياخوي
بكت بالم بكت بحرقه جرحه ماجد لمن تركها ومارحموها الناس من كلامهم رجع ليش يبي يكمل عليها عذبتني يماجد وبتعذبني اكثر برجوعك





رمت البلوزه في الشنطه والله لهبل فيكم ياعيال الذيب انا

رغد تبون تزوجوني هالشيبه ايش شايف نفسه ماكفاهم

حنان اذا ماحرقت قلبوكم كلكم مين يطولني رقبتك ياعزيز

اخنقك اذبحك اقطعك شالت بنطلون من الدولاب ورمته

بالشنطه وانا غصب لازم اروح بس خليني اروح وارفع
ضغطهم ماراح اخليهم يتهنون بشي وانا بنت حصه ناظرت

الساعه اوف صلاة المغرب بروح اصلي راحت صلت

وطلعت من غرفتها نزلت تحت اوف يعني مااشوف الا وجه

البومه يلا اطقطق عليها اشوي راحت واخذت جهاز الرموت


من قدام صيته وجلست حطت رجل على رجل ولفت عن القناه صيته بعد مااستوعبت الوضع :يابنت انتي ماعندك حشمه

ضحكة رغد بتريقه : صيتوه هذي وين يبيعوها

صيته عدلت جلستها وبنظرات حارقه : صدق كيف تعرفينها يابنت حصه

رغد بابتسامه عريضه : ايه تدرين بعد انا بنت حصه بنت مطلق اللي ماقدرتي توصلين لمستوها اذكرك مكانك

صيته بتريقه :عارفه مكاني انا بنت الذيب وعمي عزام
مو انت وامك بس اللي بنات اصل

ضحكة رغد بصوت عالي تبي ترفع ضغطها : اوه مااقصد مكانك الاجتماعي اقصد قلب عبد الرحمن الذيب تعرفينه اللي يقولون كان ابوي


دخل وهو يسمع اخركلام بنته وناظرها بقهر: يعني واللحين مو ابوك


لفت عليه ولاهز لها جفن ناظرت بصيته اللي سكتت مره

وحده وناظرت بابوها وابتسمت بسخريه : ايه اللي رمي بنته على واحد حقير


قطعها بصرخه : شكلي صدق ماعرفت اربي هذا ولد عمك لاتقولين عنه كذا


وقفت وهي تصرخ : اصلا انت عايش بهالدنيا كل يومك شغل ولا عند اخوانك مثل مارم ماجد بنتك بيرميني هالواطي الثاني


كف قوي صداه بالبيت كله صمت خيم عالمكان من غير ابتسامت شماته بردقلب صيته

سارت تتنفس بسرعه وقهر هالكف ماراح تنساه ناظرت

فيه بكل حقد وبصوت واطي يرجف بدموع محبوسه :من

اليوم لساني مايخاطب لسانك وعيوني ماتشوف عينك

لانك من اليوم ميت الله يرحمك يبه الله يرحمك يبه

طلعت فوق وهو واقف وكان الارض تهتز من تحته ولا

يتخيل اكيد هذا حلم كابوس اه يامقاوها عند الله يابنت
الغاليه يامقواها عند الله قربت منه صيته وسندته لين

جلس عالكنبه فتح ازرار ثوبه برجفه وصيته بخوف تساعده

بصوت مبحوح :جيبي مويه


راحت صيته وهو سرحان يتامل هالكلام الكبيره بنته تبرت

منه يااخر الزمن ياعبد الرحمن يااخر الزمن ياعبد الرحمن

نزلت بعد ماقررت انها ماتجلس بروحها شافت رغد تدخل

بسرعه ماحبت تكلمها من بعد ماهزئتها مالها عين


اتكلمها وصلت للصاله اللي تحت شافت منظر ابوها كسر قلبها وجرت له مسكت كفه بخوف :يبه ايش فيك

جت صيته بكاست المويه وبقهر: جايه اتكملين عليه بعد اختك

ناظرتها حنان بصمت يعني رغد

ابوها بصوت واطي: خلاص ياصيته


صيته بقهر: خلها تعرف سوات اختها اللي هبلت فيك ولافيه بنت ترفع صوتها على ابوها


قامت حنان بقهر وصيته تمد كاست المويه وتخفي

ابتسامتها قالت هالكلام وهي تعرف انها بتشب بين
حنان ورغد طول عمر حنان تموت في ابوها وافقت غصب

على ماجد وهي ماتبيه لعيون ابوها ومع انها اطلقت بس

مالامت ابوها حتى لما لام نفسه



فتحت الباب بقوى وبكل قهر شافتها جالسه عالكومدينا وساكته وعيونها مليانه دموعه مو راضيه تنزل وخدها احمر بس ماقدرت مااتتكلم : تبين تذبحينه انتي صاحيه يالمجوننه ابوك


ناظرتها بهدوء وصوت هادي: مات

قربت منها بخوف :مين

ناظرت الفراغ:الله يرحمه

هزتها بقوى وهي تصرخ :مين اتكلمي مين

رغد بهدوء :ابوي

كف ثاني على نفس المكان بس هالمره الكف اقوى لانه

من الغاليه هالمره مو يد تنمد عالوجه لاخنجر قوي ينطعن

فيه القلب والروح الام الثانيه خسرت الابو بتخسر الاخت بس ماكان فيه فرصه تتكلم لان حنان اسم على مسمى

الحنان صفاتها ضمتها بقوى على صدرها وهي تبكي بس رغد ولادمعه نزلت صمت رهيب كن الروح فارقت الجسد كان الهوى اختفى والخنجر فعل فعايله



لانطعن الواحد تروح الروح وهي مريضه الطعنه تذبح تذبح وتحرق لسارت من اغلى البشر بهالدنيا


ناظرت فيها وهي ساكته ولاكلمه ولاحتى دمعها سحبتها معها كانها تسحب جسد فاضي نومتها عالسرير غطتها وجلست جنبها وسارت تمسح على راسها ودموعها تغرق شعر رغد ورغد لاحياه لمن تنادي

بدت بصوت غارق بالبكى وبغصات تغني : رغوده ياحيات اختك وهي تهزها ورغد ساكته
كملت تغني وهي تبكي بالم
:نامي يابعد عمري انا جنبك ياغلا روحي

رغود يااحلى بنوته كل العشيره يحبونها اجمل من كل البنات وعينها مثل الغزلان رغوده يابنت امها رغوده ياخت اختها بكت وماقدرت تكمل وهي تدفن نفسها جنب اختها معاد تتحمل اليوم انهارت ومافيها شده عالالم

ورغد ساكته وكان كل شي ماسار معها وبس عيونها تلف بالغرفه لمن سكتت حنان لفت عليها وشافتها تبكي ودافنه نفسها قربت منهاوضمتها وبصوت واطي هادي:
لو منتي امي الثانيه كان ذبحتك

ابتسمت بين دموعها رغم كل الالم بس رضى رغد شال هم كبير كانت بتشيله رفعت راسها وشافت ابتسامه خفيفه قالت بين ادموعها :طلبتك
رغد بهدوء :ايش
حنان برجفه :عمري ماكرهت ولا احب احد ومااعرف اخذ حقي من احد ابيك تحرقين قلبوهم مثل ماحرقو قلبي


تنهدت رغد :ماطلبتي بخليهم يتندمون عالساعه اللي عرفونا فيها وساروه


قطعتها حنان :لا مالها أي ذنب ماجد ماجد وبس ماجد


ضمتها رغد بهدوء: ماجد وام ماجد وابو ماجد وطوايف ماجد وحتى ابوك
قطعتها حنان :ابوي لا طلبتك


رغد باستهزاء :اطلبي بس


هدوء
اتكلمت بعدها حنان :تدرين صعب انك تكرهين انسان لحد الجنون وتحبينه لحد الجنون

رغد بهدوء :ماجد


حنان وهي تبكي وتهز راسها :ماجد






شمس جديده طلعت تعلن عن يوم جديد بحيات الجميع

بيت ابو عبد العزيز نزلت بشنطتها السماويه كبيره من

القماش وبيدها الثانيه الاب توب صرخت :انا جاهزه


ابتسم فهد :واخير الاميره ديانا ابوي لودرى عنك ياويلك انا قايله بنلحقكم اللحين هم في بيت عمي ابو ماجد


نزلت بسرعه :اول شي تخسي ديانه تاصل لنص جمالي ابتسم فهد باستهزاء صرخت عليه لاتبتسم ثاني شي العروسه هدوه اخرتنا كله فوق


ضحك فهد :ههههههههههه والله ماتدرين وين ربي حاطك هدى راحت مع ابوي

فتحت عيونها :قول قسم هالنذله


سحبها من شنطتها :يلا بس اطلعي لايوريك ابوك كملي دعى بالسياره




بهدوء ووبصوت ثقيل : ماعليك انت بس تعال لنا بكره المزرعه ومايسير الا اللي يرضيك


براحه :والله اني عارفك انك ماتردني خايب
ابتسم :ولو نبي خدمه لك


قفل جواله لفت عليه بحزن :ماجد
ناظر لها وبهدوء : ليش كل هالحزن مصيرهم يتصالحون


رفعت الفاين تمسح دمعه :بس ابوي حلف على امي بالطلاق يعني السالفه مو هينه


مسك يدها ولف عليها :لعيونك هالحلوه اطير العالم كلهم واسوي استنفار عند كل الرجال واخليهم يسامحونه ويبسون فوق راسه ايش تبين بعد


ابتسمت :الله لايحرمني منك يااغلى عزوز

ناظرها بنص عين ضحكة :اقصد حبيبي وعمري وحياتي عبد العزيز رضيت

ابتسم وهويرفع حاجب :اكيدبرضى ياقلب عبد العزيز

ابتسمت : يلا ننزل كل شي تحت وابوك راح


ابتسم وهو يعدل وقفته : يلا مشينا مسك يدها ومشت معها وهم نازلين بصوته الثقيل :ساره
ابتسمت وهي تعدل اللثمه :يلبيه
ابتسم :الله لايحرمني منك
ساره بفرح: ولامنك







صرخت بصوت عالي :يلا يابنات تاخرنا
نزلت حنا ن بسرعه : نازله يلا
صيته وهي تلف طرحتها : تاخرنا ينتظرونا عند بيت ابو ماجد

وقفت بثبات وهي تبلع ريقها بخوف نزلت رغد بصوت عالي : ياوجه البومه ايش هالصوت يجيب اخر الدنيا


ناظرتها صيته بقهر : انتي ماتنهدين


ابتسمت رغد تغايضها :لا ياقلبي ماانهد اشرت على قلبها هذا مثل الصخر ومشت تتمخطر قدام صيته اللي شبت قهر وحنان ماسكه ضحكتها وطلعت مع رغد


ناظرتهم صيته بقهر : الله يحرق اعصابكم مثل ماتحرقون اعصابي ولايبين فيكم كل يوم تزيدون قوه
لحقتهم وركبت السياره كانت هدوء السواق يسوق وابو راكان جالس جنبه والبنات وصيته ورى مشى السواق لبيت ابو ماجد







يلا ياعيال اخواني راحو ناظرت فيه وهو جالس : وانت مو رايح
ابتسم وهو يناظر شاشة الاب توب :لاتخافين بلحقكم مو طاير
نزل وهو يعدل شماغه :يافديتك ياقلبي جاهزه
ناظرته بقهر : لا ابدا


ابتسم وهو يغني : لاتزعلون منور من يزعل منور يزعلني
ابتسمت غصب : بس شاطر بالكلام يلا مروان تأخرنا

ابتسم مروان وهو يضبط العقال :من عيوني يااحلى ام مروان

لف من شاشة الاب توب : اللحين تستعجلينه وبنتك الدلوعه فوق تتمخطر

نزلت بهدوء ونعومه وبدلع : اوووووه فيه ناس يغارون مني يحشون فيني الله يسا محهم

قال بتريقه وهو يتمسخر: اوه في ناس يحشون ياشين الدلع عالبقر
صر خت بدلع :مامي شوفيه يقول عني بقره لفت عليه هين ياتروك

ابتسم مروان وهو يضبط ازرار ثوبه :اصلا ايش عليك منه انتي احلى بقره ضحك مروان وضحك تركي

دانيه خبطت برجلها على الارض: مامي شوفيهم يتريقون علي

ام محمد : بس انت وياه بتذبحنا السوالف واخواني اجتمعو بس ينتظروني بسرعه

مدت بوزها دانيه وطلعت وطلع وراها مروان امهم لفت على تركي اللي رجع لشاشه وانت قسم عظيم لو ماشفتك اليوم المغرب بالمزرعه ياويلك
ضحك تركي : من عيوني ياام محمد بتشوفيني المغرب يوم تردين


طيرت عيونها فيه ضحك :اليوم اليوم لاتخافين

ناظرته بقهر : الله المستعان على كذا عيال وطلعت وتركي يضحك

ركبت السياره وهي معصبه :اخرتونا عن اخواني

ضحك مروان :يمه كلها الشارع الثاني وحنا عندهم
مشى لين وصل البيت

كان تقريبا الكل وصل الا عمه ابو راكان نزل عندالشباب وامه واخته دخلوا







دخلت السياره وقلبها يدق خوف ماتبي تشوفه ماتبي

تحزن لو بيدها ماجت اصلا جالسه بقلق على اعصابها



اول مادخلو ناظرت الشباب واقفين على جنب ايش كثر

اكرهكم يعيال الذيب وينه هالخايس مسوي فيها كبير مع

الكبار هالشيبه حست نفسها مكتومه ونفسها تفش

حرتها باحد بس مو قادره

نزل ابو راكان وصيته فتحت الباب بتنزل صرخت عليها رغد بقهر : هيه هيه انتي وين رايحه

ناظرتها صيته بقهر :استحي على وجهك تكلميني بهالاسلوب سكوتي عنك مايعني خوف

ضحكة رغد :كل هذا وساكته يرحم امك لو تكلمتي شتسوي وبعدين لاحقه على الحش انتي وخواتك ارجعي خلينا نطلع بس


صرخت عليها بقهر لدرجة الشباب لفو عالسياره وكان الكل يسمع صوتها صيته فلتت اعصابها وماحست باحد
: انتي ياقليلة الادب ماتعرفي تمسكي لسانك يبيلك احد يربيك من جدوجديد ماتعرفين تحترمين الاكبر منك حسبي عليك من سلعوه


ضحكة رغد ترفع ضغطها وصلت صيته حدها وقفلت الباب بقوى بجيت ابو ركان :ايش سار


صيته بقهر وهي اشوي وتبكي :بروح مع واحد من عيال خواتي هذي مو راكبه معها

وراحت نادها سعد وهو مقهور وحاس انها اكيد هالسوسه الله يستر منها والله بتخزبقنا كلنا

لفت عليه صيته ابتسم لها : ايش رايك يخاله تخاويني

بهدوء : ايه بخاويك

كان واقف وهو يشوف نظرات الكل عليه حتى الحريم اللي

لحقو اخر كلام صيته مشى بهدوء عادي والمفاتيح بيده

وهو يمر على سيارته ناظر نظره عسيارة عمه لو تهد

جبال انهدت لتفجر اصخور اتفجرت قطع صغيره

قلبها اهتز خوف ناظرت باختها اللي مارف لها جفن كان

باب السياره مفتوح النظره مباشره بس ياجبل مايهزك ريح
قالت لها بخوف : رغد مو كذا

رغد بهدوء : طلبتك مو كل بعد موقف مسكتتني انا اوعدك اذا احد ماغلط علي مااتعرض له بس لتكلمو ببهدلهم

حنان :طيب ليش فجرتي بصيته

ضحكة رغد :ههههههههه فشت حره

دخل السياره وهو يسمع ضحكتها وبصرخه : انتي ماتستحي

ولا كلمه لف عليها لقها اطالع من الشباك على برى ولا كانها تسمع شي حس بالقهر نفسه ينزل وبعقال يعلمها كيف الادب صرخ بقهر :حنان قفل الباب

قفلته حنان وهي ترجف وحمدت ربها ماشافت ماجد






جهز الاكل اخوانك قربو يوصلو

جلست عالارض جنب امها :خلاص كل شي جاهز
امها بتوعد :سمعيني ياهند قسم بالله لو تغلطي على زوجات اخوانك مالك دخل فيهن انا عارفه ان هالملسونه ماراح تعدي الموضوع على خير

هند بقهر: وكانها مي بنت ولدك مثل غيرها
ام سالم :مالت عليها من بنت ولد طالعه على امها حصيص الله لايكسبها كانها


قطعتها هند :يمه الله يرحمها وبعدين رغد مااحد يلومها لو ايش ماتسوي تبون تزوجونها غصب

ام سالم :تحمد ربها وتشكره انها ببتزوج عبد العزيز الذيب اللي تهتز له مجالس رجال مسوي لي فيها مابقى الا هي فدية بنيتي اللي الله بلاها بضره مثلها

هند بضيق : يمه ترى رغد بنت ولدك مثل ماساره بنت ولدك وتقولين ليش تغلط لانك اصلا ماتعامليها زين كله تفدي ببنات عيالك وهي ماقلتي كلمه الا مسبه بامها


ام سالم وهي تشرب الشاي :قفلي السيره اصلا ايش في امها ينحمد مافيه شي تشكر عليه غير انها جابت هالحنان الطيبه مو اختها النسره
سكتت هند بقهر






فارش حصيره وجالس عند باب البيت دخلت السيارت كلها وصل الكل نزلو يسلمو عليه

في سيارة ابو ركان
حنان بهدوء: طلبتك بدون مشاكل
رغد بعصبيه :ليش مكتوب على جبهتي مشكله اذا هم سكت انا ماارد بس اذا احد تكلم بقص له لسانه

حنان :رغد

قطعتها رغد :انزلي بس شوفي الراس الكبيره ينتظرنا اقص يدي اذا ماكان هو ورى زواجي من هالخايس

حنان وبقهر وهي تفتح الباب: الكلام معك مايفيد اروح اسلم على جدي احسن وساعدي سورامي بتنزيل الاغراض

رغد وهي تفتح بابها :خلي صيتوه تساعدها

مشت حنان جهت الجد اللي كان الرجال حوله والحريم دخلوا داخل يسلمو عالجده سلمت عليه وباست راسه وبصوت هادي :كيفك ياجدي انشاء الله بخير

ابتسم بتسامح :من شفتك يابنتي انا بخير

غصب عينها لفت بالموجودين وحمدت ربها انه موموجود يمكن صيته كانت تستفزها راحت حنان تدخل

رغد بعد مانزلت من السياره كانت تشوف جدها وابتسامته وهو يرحب بحنان وهي من يشوفها يعتسف الله لاكان جاب الغلا بيننا يا ابو سالم مشت بخطوات ثابته كلها غرور ومهمها احد كانت بتمر من جنبهم بدون سلام

بس سمعت صوته بعصبيه :مافيه سلام يابنت عبد الرحمن

لفت شافته وهو مثبت يده على مركاده ونادها ثاني : تعالي
قربت منه بهدوء ماتدري ليش راحت تسلم
واقرب شي له هو عبد العزيز وعمها سالم وابوها والباقي مو موجودين ناظرت بعبدالعزيز بكل حقد وهو ناظرها بابتسامة تحدي انقهرت منه نزلت وباست راس جدها وبهدوء :كيفك
ابو سالم بحقد :توك تسالني ماكنتي بتمشي بدون ما تسلمي على جدك هذي تربيت مطلق اكيد


ناظرته بحقد يدور أي شي على جدي قالت بتحدي :تربيت ولدك اللي انت مربيه

عصب ابو سالم : قطع هالسان


رغد بتحدي : ماقلت شي غلط ليه غلط بالتربيه تراه ولدك

ابو راكان بعصبيه :يابنت استحي على وجهك ادخلي داخل لابهالعقال

ماناظرت فيه كانت نظرتها متركزه على جدها وابوها ورها
عصب الجد وهو يسند عمره كانه يبي يقوم لها ابوها صرخ ثاني وهي ولاكانها تسمعه

الوضع قدامه غلط هالبنت يبي لها تربيه ترك جده وجلسه وقف قدامها وعطها كف صداه بالمكان كله

ناظرت فيه بحقد وبصوت يرجف : مين انت اللي تمد يدك
بس هذي مو افعال رجال
وصل حده منها قبض على يده ماسوها انه يضرب وحده ومو من شيمه بس هي تستفزه وبوصت كله ثقل وهيبه وهو ضاغط على اسنانه :راسك وزوجك قريبا يابنت عمي

صرخت وهي تناظره: تخسي بيوم اكون لك النجوم اقرب لك مني

وراحت بسرعه وهي ترجف من القهر والعبره خانقتها بس مو هي اللي ادموعها تنزل بسهوله والله لاتندم ياعبد العزيز

ربت جده على كتفه:كفو ياولدي هالحريم مايتسنعن الا اذا لقن اللي يوقف بوجههن ناظر بولده وانت ماترد بنتك لاحيا ولامستحيا

ابو ركان وراسه بالارض :يبه والله عجزت فيهاالبنت راسها يابس

ابو سالم بعصبيه :كسر راسها الله لايكسبها من بنت فورة دمي

قرب منه عبد العزيز وسند كتفه وهو يبتسم :خلاص اعصابك يالغالي هالنتفه تفور اعصابك وهذا انا بربيها لاتخاف

ابو سالم بابتسامه :كفو والله ولدي

ابو ركان بضيق :ترها بنتي

انتبه عبد العزيز لعمه وماحب يزعله : ولانها بنتك بحطها بعيوني بس عنادها ياعم
تنهد ابو راكان وهو يروح لحقه عبد العزيز ربت على كتفه :خايف عليها معي تظن باضرها

ابو ركان بابتسامة سخريه :خايف عليك منها بنتي مو سهله ياعبد العزيز واحس اني ظلمتها ادري انك

ماتزوجتها الا لان جدك طلب منك وانك بس تبي الولد

ماقدرت اكون لبناتي الابو اللي يسندهن زوجت حنان

غصب عنها وانا عارف انها ماتبي بس لانها ماتقدر ترد لي


طلب شهرين بس وتطلقت واللحين رغد متوقع اطلقها ثاني يوم


ناظره عبد العزيز بهدوء وهو يمشي معه :لاتخاف ياعم انا

رجال اخاف الله في اهلي وفي ناسي واذا على حنان

ربي يعوضها وبنتك رغد انت ادرى بعنادها بس انا طويل

بال بس اليوم لان الموضوع يخص جدي وانت تدري بغلاته
سكت ابو ركان وتنهد بهدوء








مرت بسرعها بدون ماتسلم على احد طلعت فوق غرفتها

وغرفة اختها والله مااعديها لك ياعبد العزيز وانت ياجدي

ادري انك ورى زواجي من هالثور حقود ماينسى شي

قلعت عبايتها ولبست بجامه ولادمعه راضيه تنزل من

عيونها رغم الالم بخدودها يمكن عزت نفسها حتى وهي

بروحهاا تمنعها تبكي لان عبد العزيز مايستاهل ولادمعه

شافت نفسها بالمرايه الكف مو باين الحمد الله بس اللي

استغربته عمي سالم جالس ولاسمعة له كلمه بالعداه

صوته يلعلع احسن يعله بالبلا






جالسه جنب جدتها باتسامتها الهاديه البنات كلهم

جالست على جنب يسولفو واالحريم عند جدتها وحولها

مستغربه من نظرات ام ماجد الحاقده بغت تضحك باستهزاء مين المفروض يحقد


قطع تفكيرها صوت هند باستهزاء لام ماجد : سمعنا ان ماجد رجع ماشفنا وجهه


تغير لون ام ماجد وقلب حنان يدق بقوى حاولت
تخفي أي ردت فعل بس بكل كلمه تنقال حست بخناجر تذبحها والخنجر المسموم يذبح الطعن بالميت حرام كانت بتصرخ الطعن بالميت حرام كل كلمه طعنه

ام ماجد وللجده : ياعمه وابوه طرده من البيت يمكن تقدورن تسون شي

ام سالم برحمه : ياويل حالي على ولدي واذا جاب ولد
مافيها شي هو كان يبي يصون نفسه من الغربه بس لاتخافين قلب سالم مصيره يبرد يابنيتي

ناظرت هند امها بقهر يعني عادي يسافر ويطلق حنان

ويتزوج غيرها ويرجع بولد لو كان واحد غيره كان قومت

الدنيا هذي وهي تقول حنان غاليه شكل حنان ورغد

بيتحول لهم الحقد اللي على امهم لااخر العمر

مابغت تقوم تبي تحسسهم عادي ولاكان شي سار بس هي من جوى مكسوره متحطمه






عند البنات
موني :واااااااااااااااااي بنات فله وناسه اليوم ابي اطلع كل اللي بنفسي

دانيه بدلع :وانا بعد ابي

هدى بصوت واطي لموني :وين ست الحسن والدلال ماطلعت

موني بقهر :مالك دخل حنا جينا نستانس لاتجلسي ادقي فيها وتبد المخانقت انا مالي دخل كافي اللي ساير عندنا واللا ترى بخبر عليك حبيب القلب

لون وجهه هدى من الخجل :انثبري مااحد يقولك كلمه ولفت الجهه الثانيه

ضحكة موني :هههههههههههههه



ساره جنب مها
مها بقهر :ومالقى غيرها لمن قالي محمد بغيت انجلط

ساره بهدوء :نصيب

مها بقهر :بكل برود نصيب لو محمد قطعته ووزعته عالكلاب

ضحكة ساره بهدوء
مريم بقهر :شفتي قلت لك اكلمها وكان المعرس اخوها مو زوجها
دخلت رون بهدوء :اوها انتم باقي ترى الرجال بيتزوج حتى لو حرقت اعصابها وبعدين لاتخربون بيتها ناظرت بساره وانتي اسمعي من هناوطلعي من هناك


ضربتها مريم على كتفها :انتي انثبري بس

صرخت رون بدلع :اوف ايش هالهمجيه يوجع
قامت من جنب مريم وراحت جلست جنب دانيه بابتسامه :اخبارك ياعسل

دانيه بنعومه :بخير من شفتك

موني :اقول ياحلوه ايش رايك نروح ندج بالمزرعه

رون حطت رجل على رجل :اوسوفاج مو ندج اسمها نحوم

ضحكو البنات :هههههههه

هدى قامت وهي تعدل عبايتها :يلا صبايا نروح

لفت لهم مريم :وين

موني بتريقه :نحوم ياماما بدك شي

مريم :بسم الله علي لو امك بتصيبني جلطه
وقفو البنات يتجهزو يلبسو العبايات والطرح


دخلت عليهم والكل هدوء حتى البنات كانو يلفو الطرح لفو عليها ابتسمت رغد بسخريه ومشت تسلم على جدتها
اشوي ورجع الوضع عادي البنات لبسو عباياتهم وتحجبو وطلعو

والحريم ساكتت قربت رغد باست راس جدتها :كيفك يالفاليه

صدمه الجمت االكل حتى الجده ساكته
ابتسمت رغد :انشاء الله بخير
ناظرتها حنان بصدمه ايش تحت راسك يارغد والله مانتي بخاليه

ام سالم بهدوء: بخير يابنيتي

لفت رغد على حريم اعمامها

وسلمت عليهم وكل وحده تحت الصدمه ورغد كاتمه الضحكه على اشكالهم

بعد ماسلمت راحت جهة ساره والباقي كان مافيه الامها وساره ومريم اللي شايطه من رغد

قربت منهم رغد بابتسامه سلمت على مها بكل برود وبعدها ساره لمن جت تسلم على مريم مريم مارضت تسلم عليها

ضحكة رغد باستخفاف وهالشي

فور مريم بس ساره مسكت يدها وكانها تهديها

رجعت وجلست بين عمتها هند وحنان اختها






وقفت رون وهي تصرخ :بنات فيه منجا هنا

قربو كلهم

موني :شكلهم خطير باكل منها

هدى سحبتها :اقول يلا نكمل نرجع لها

رون وقفت عندها :انا مابروح ابي منجا

دانيه وهي تسحب موني مع هدى :حنا بنروح مافيني اوقف بمكان

رون :اوه انتبهي على نفسك ياقلبي عن تنحرقين

ضحكة دانيه بتريقه :ه ه ه مايضحك
ومشو
اندمجت مع الشجره تنقز تبي تقطع وحده فوق

نقزت لين اخذتها ابتسمت بنصر بس صرخه ورها خلعتها خلتها تنقز وتصرخ باعلى صوت

البنات ضحكو بصوت عالي وهم يشوفها تنقز وتصرخ :ههههههههههههه

رون بقهر: نذلات والله طيحتو قلبي اللحين لو صابني عقم والاجتني سكته قلبيه بيضل ذنبي برقبتكم

سمعو صوت وراهم وكلهن لفن
:ايش ساير ليش هالصراخ
كل وحده ناظرت بالثانيه
اتكلمت دانيه وهي تعدل حجابها : مافيه شي بس كنا نمزح
قال بعصبيه : والصراخ مزح لو سار لكم شي وقلنا هذا مزح

دانيه بقهر: لاتعصب قلنا لك نمزح ماله داعي تعلي صوتك

صرخ فيها :لك عين ترداين بعد يالبزر

دانيه بقهر :انت البزر مو انا

قربت هدى منه بهدوء : خلاص فهد هدي ماراح نصرخ ثاني ولاتحط عقلك بعقلها توك تقول بزر

صرخت دانيه وهي تناظر في هدى نست وجود فهد حطت يدها على خصرها وبصوت مقهور بنغمة دلعها : انا مو بزر اخوك البزر ونزلت دمعه من عيونها وراحت

راحت موني وراها ورون قالت لفهد مع انها خايفه لان فهد لاعصب مايعرف احد بلعت ريقها بخوف : الله يهديك تعرف انها حساسه وانت كل ماقبلتها هزئتها

ناظرها بطرف عينه راحت تلحقهم جري

ابتسم غصب عنه وهدى واقفه جنبه ابتسمت :ايه كذا ياابو شباب شوف حلات ابتسامتك مو قبل معصب

فهد ناظر فيها بعين قويه وتركهاوراح

هدى بضحكه :هههههههههههه قسم بالله مو صاحي

مشت ماراح ارجع بروح اشوف الباقي مشت لين راحت

جهت الغنم والبقر يارب والله الريحه تجيب المرض

اوه هذي جمال صدق فراغه عند جدي يربي كل هالحيوانات

وصلت لعند زريبة الغنم ابتسمت وهي تتذكر كانو وهم

صغار دائما يجون هنا ويلعبون مع الغنم ويرضعون الصغار

ويركبون الكبار انرسمت ابتسامه لاارديا عالذكر الجميل


:ثوفها كيف تخوف

مسك يدها وهو يسحبها :خليك قويه وقربي منها لاتخافي منها

ناظرته بعيون بريئه وبخوف :بث اخاف اطيحني

ابتسم لها وهو يسحبها :تخافين وانا معك

تنهدت بابتسامه حست بشي وراها لفت وجهه

والتقت عينها بعيونه كانه حاس انها تفكر فيه انقلب وجهها احمر ماقدرت تقول شي

حس بالفرح والشوق يذبحه ابتسم لها بعذوبه :كيفك هدى
بخجل وصوت واطي: بخير كيفك يا مروان


ابتسم مروان وبصوت عذب :دامي شفتك وبردت شوقي اكيد بخير


حست باحراج كبير مشت من جنبه وراحت
ابتسم وهو يتأملها ياانا كنت مشتاق لك

سمع صوت جاي من وراه : اموت انا عحب الطفوله

ضحك مروان :هههههههه

سعد ابتسم :الله يجمعكم على خير

مروان من قلب :امين اه ياسعد بردت نار الشوق اللي بقلبي من شفتها احبها وابي اتزوجها

سعد :طيب تقدم لها

مروان تنهد :ماتعرف عمتك منيره يقلد صوت امه :خلي اخوك الكبير يتزوج رجع لصوته كاناحريم الكبيره تتزوج قبل الصغيره مو كانه تركي تزوج وترمل

ضحك سعد :هههههههههه والله انك تحفه وعمتي رهيبه طيب حاول فيها اوا حاول بتركي يتزوج

مراون بسخريه : مستحيل تروك الاخ عاجبه الوضع وانا احرق بدمي يقولي تزوج ايش دخلني فاقع مرارتي واللي يزيد عاجبه الوضع ومايحاول بامي يقول
بتدعي لي بعدين
ضحك سعد :ههههههههههههه






دخلت غرفة عمتها وشافت دانيه جالسه تبكي ورون وموني يهدونها

قالت بفرحه : اه ياقلبي شفته شفته يابعد قلبي بغى يطيح قلبي

رفعت راسها دانيه وهي تمسح دموعها :مالت عليك وعليه مالقيت غير مروانوه ثقيل الدم تحبينه ياويل انتي غلط تدرين ليش لان اخوك المتوحش فهد وحبيبك اخوي الوحش


ضحكو موني ورون :ههههههههههههههه

هدى بدفاع: لاوالله حبيبتي مرواني ماتسبينه اخوي خذي راحتك فيه

دانيه :مروان اخوي اسب فيه مثل ماابي

ناظرتها هدى وهي رافعه حواجبها وهي ترفع اكماما عبايتها :ياحسره عليها ياحسره عليها

نقزت دانيه بخوف : لاخلاص فديتهم كلهم حلوين

ضحكو البنات وهدى تسدحت عالسرير من الضحك وشكل دانيه الخايف دانيه نعومه وماتحب الضرب والمزح الثقيل






رغد بشماته : زين انه مجاك مدمن ولا سكير بعد ماتدرين ايش كان يسوي اذا على الولد محلوله اذا مكان ولد حرام

انقهرت ام ماجد وبقهر : اعرف ولدي زين تربيتي الدورواالباقي على اللي تلف عالرجال وتلحس مخه تعرفينها هذولي كثير ينخاف منهن الله يكافي

فهمت رغد النغزه وبابتسامه وكانها مافهمت شي: مافيه رجال ينحلس مخه وعقولهم توزن ديره واللي نعرفه الرجال هو اللي يلحق المره مو المره اللي تلحق الرجال


نغزت هند رغد وسحبتها معها ودخلو المطبخ : اشفيك

انتي اتوقعت بتسيرين مسالمه من اليوم ساكته لمن

جت سيرة ماجد طلع لسانك قلت يمكن ربي هداك

رغد بقهر :كان خليتيني ابرد على قلب اختي شفتي

حنان كيف جالسه هاديه اعرف اختي اكيد تغلي من داخلها
سمعوصوت يقول ياولد رفعت رغد لثمتها هند ناظرتها :البنات كلهم يكشفون ابي اعرف ليش انتي الوحيده اللي تتلثمين

ابتسمت رغد بفخر: تربيت مطلق

هند بضحكه: لو ابوي يسمعك
علت صوتها فوت

دخل سعد وشاف عمته هند سلم عليها وهو مبتسم لمن لف عرف انها رغد الوحيده من بنات عمه اللي ماتكشف عليهم


سعد بهدوء مع انه مقهور من حركتها بخالته :كيفك

ماحبت ترده ماشفت منه شي قالت بادب: الحمد الله بخير كيفك انت

سعد بابتسامه :الحمد الله على كل حال


ناظر بهند :الله يسلمك الغدا جدي مرسليني اناو ماكمل كلامه الا ومروان داخل وهو رافع ثوبه ماسكه باسنانه ويتنفس بسرعه

مروان :يلا الغدا الشايب بياكلنا

ضحكت هند وسعد :هههههههه
مروان بفشله لمن شاف رغد :كيفك رغد

ابتسمت رغد بهدوء: الحمد الله مابسال عن حالك اشوفك مخزبق

ضحكو كلهم :ههههههههه

ومروان بمزح : افا ماهقيتها منك تشمتينهم فيني

ابتسمت رغد :ماعش من يتشمت فيك ياولد عمتي

سعد يبتسم :هذا وانتا مستعجل

قربت هند وجلست تقلب الصحون هي ورغد معاه
ا
وسعد ومروان جلسو عكراسي طاولة المطبخ

سعد بضحكه :عشتو بالمزرعه وطاوله وكراسي بالمطبخ

ابتسمت هند :تدري ان هذا بيتنا يعني اكيد بيكون مثل أي بيت
دخل بهيبته وابتسامته على وجهه :السلام عليكم

سمعت صوته حست بالقهر يحرق صدرها نفسها ترد له

الحركه باي طريقه الكل رد السلام الا هي والكل لاحظ

الجو سار متوتر اما هو واقف ثابت وياجبل مايهزك ريح
وبصوت ثقيل : مطولين

هند وهي تناظر رغداللي بدت يدها ترجف من القهر وهي تحسبها ترجف من الاحراج :لااشوي بس

سعد بتريقه : انظم الى فوج المنتظرين هنا بس بصراحه
جدي مو هين يرسل البق بوس عزوز مره وحده
ناظره عبد العزيز بابتسامه جانبيه

سعد يمثل الخوف : كله ولانظره منك يااخي لو النظرات تقتل كان نص العالم ميتين من نظراتك

ضحك الكل حتى عبد العزيز ضحك بخفيف
دخلت وهي تشوفه يضحك ورغد موجوده بنفس المكان اول مره تحس بالغيره من اول ماعرفت بالموضوع
قالت بصوت كله غيره : السلام انت هنا

سعد بتريقه : لاهناك
سكتت ساره بقهر وعبد العزيز حس فيها قال بابتسامه : سارونه ابي كاست مويه

سعد بصرخه :اوه ياخطير ونعرف ندلع بعد

ناظره عبد العزيز :تعرف تروقنا

لف لساره اللي جابت له كاست المويه ابتسم وهو يناظر عيونها مباشره وبصوت واطي مايسمعه احد :تسلم يدك ياقلبي

كل شي تبخر الغير القهر كل شي عيونه لوحدها تنسيها كل شي ابتسمت له بحيا : الله يسلمك

كانت تشوف كل شي نظراته لها وابتسامته له دامه

يحبها ليش يبي يتزوجني دام حياتهم سعيده ليش

يقضي على حياتي بس حامض عليك توصلي ياعبد العزيز
رفعت صحن بعد ماعبته توجهت لسعد ماتجاهله وجود
عبد العزيز اللي واقف جنبهم هو وساره ابتسمت :سم

ابتسم سعد وهو ياخذه :سم الله عدوك اخذه وطلع وهو ملاحظ حركتها انها طنشت عبد العزيز ايش براسك ياعبد العزيز وراس جدي

ناظرها باحتقار عالحركه اللي سوتها وهالشي عجب

ساره ولاهز شعره من رغد اخذ مراون الصحن الثاني وطلع

وبقى هند وساره اللي توزع السلطه ورغد وعبد العزيز
وقفت رغد بتلف بس وقف بوجهه عبد العزيز :ترى منتي بقدي يابنت ابوك

رفعت راسها وبنظره حاده :ماهزيتني ياولد امك

قرب منها وسحب يدها وبقوى ولفها سار ظهرها على صدره وهو يلف بيدها وساره وهند مصدومين وعبد العزيز بهدوء وصوت ثقيل: ماسمعت

رغد بعناد مع الالم اللي تحسه بيدها :مااظن انك اطرش ماتسمع ياولد امك

انتهى البارت
لطلب الكثير والبعض لم يفهم الروايه
نزلت هالجزء
وجزء الاربعاء نازل بإذن المولا

يابنت الناس اذا ماانتي مكملتها لاتعشمينا الصراحه
وانا قريتها*******وخلصتها بعد عشان كذا قاعده اقارن بينها احس الأولى افضل عنصر الحماس قوي
واحسها هنا الإحداث مختصره بقوه

وماادري هو انتي تذكار نفس الكاتبه والا لا

بس عمومآ بتابعك وان شاءالله ماالخبط بينهم