لمشاكل التسجيل ودخول المنتدى يرجى مراسلتنا على الايميل liilasvb3@gmail.com






العودة   منتديات ليلاس > القصص والروايات > قصص من وحي قلم الاعضاء > القصص المكتمله من وحي قلم الاعضاء
التسجيل مشاركات اليوم اجعل كافة الأقسام مقروءة

بحث بشبكة ليلاس الثقافية

القصص المكتمله من وحي قلم الاعضاء القصص المكتمله من وحي قلم الاعضاء


مشاهدة نتائج الإستطلاع: ما هو مستوى القصه حسب رأيك ؟
ممتاز 196 75.38%
جيد 51 19.62%
ضعيف 13 5.00%
المصوتون: 260. أنت لم تصوت في هذا الإستطلاع

إضافة رد
نسخ الرابط
نسخ للمنتديات
 
LinkBack أدوات الموضوع انواع عرض الموضوع
قديم 29-04-10, 11:15 PM   المشاركة رقم: 176
المعلومات
الكاتب:
اللقب:
عضو راقي


البيانات
التسجيل: Apr 2010
العضوية: 161149
المشاركات: 1,789
الجنس أنثى
معدل التقييم: بسمة براءه عضو على طريق الابداعبسمة براءه عضو على طريق الابداعبسمة براءه عضو على طريق الابداع
نقاط التقييم: 222

االدولة
البلدSaudiArabia
 
مدونتي

 

الإتصالات
الحالة:
بسمة براءه غير متواجد حالياً
وسائل الإتصال:

كاتب الموضوع : نبــ القصيم ــض المنتدى : القصص المكتمله من وحي قلم الاعضاء
افتراضي

 

السلام عليكم ..

غاليتي نبض القصيم ..

احداث الروايه قمة في الروعه والترابط ..

على الرغم من الاطاله في الاجزاء الاخيره لكن هذا لا يفقد الروايه حقها من الروعه ..

رونق .. قصة مأساه .. اصعب شي بالدنيا الظلم واللي ذاقته رونق مو اي ظلم الظلم بالشرف من اجل غيره اطفال شي يأسي ويحزن بصراحه ..

اتمنى ان تلاقي الفرج قريبا ..
خصوصا وان اول عواقب الظلم تعود على عزام بان يحب زوجته بس هي ما قدرت تحيه شفى القليل من الغل ..

حنيييييت على تركي لما وصف رونق بطفلته وعدم مقدرته على تغيير حب الطفوله من قلبه رغم ان زوجتها اختها .. واه من اختها .. باقي نعرف اش فايدتها من ظلم رونق .. هل هو مكنون حب قديم لتركي وبغت تتخلص منها ..

اتوقع ان اسماء بتموت وسلطان ياخذ رونق .. واتمنى بصراحه يصير هالشي عشان ترتاح اسماء من المرض وترتاح رونق من الظلم ..


ع العموم احنا بانتظااااارك واتمنى ما تطول غيبتك .. اكثر ..



 
 

 

عرض البوم صور بسمة براءه   رد مع اقتباس
قديم 30-04-10, 08:50 PM   المشاركة رقم: 177
المعلومات
الكاتب:
اللقب:

البيانات
التسجيل: Nov 2009
العضوية: 151911
المشاركات: 146
الجنس أنثى
معدل التقييم: نبــ القصيم ــض عضو على طريق التحسين
نقاط التقييم: 86

االدولة
البلدSaudiArabia
 
مدونتي

 

الإتصالات
الحالة:
نبــ القصيم ــض غير متواجد حالياً
وسائل الإتصال:

كاتب الموضوع : نبــ القصيم ــض المنتدى : القصص المكتمله من وحي قلم الاعضاء
افتراضي

 

اقتباس :-   المشاركة الأصلية كتبت بواسطة بسمة براءه مشاهدة المشاركة
   السلام عليكم ..

غاليتي نبض القصيم ..

احداث الروايه قمة في الروعه والترابط ..

على الرغم من الاطاله في الاجزاء الاخيره لكن هذا لا يفقد الروايه حقها من الروعه ..

رونق .. قصة مأساه .. اصعب شي بالدنيا الظلم واللي ذاقته رونق مو اي ظلم الظلم بالشرف من اجل غيره اطفال شي يأسي ويحزن بصراحه ..

اتمنى ان تلاقي الفرج قريبا ..
خصوصا وان اول عواقب الظلم تعود على عزام بان يحب زوجته بس هي ما قدرت تحيه شفى القليل من الغل ..

حنيييييت على تركي لما وصف رونق بطفلته وعدم مقدرته على تغيير حب الطفوله من قلبه رغم ان زوجتها اختها .. واه من اختها .. باقي نعرف اش فايدتها من ظلم رونق .. هل هو مكنون حب قديم لتركي وبغت تتخلص منها ..

اتوقع ان اسماء بتموت وسلطان ياخذ رونق .. واتمنى بصراحه يصير هالشي عشان ترتاح اسماء من المرض وترتاح رونق من الظلم ..


ع العموم احنا بانتظااااارك واتمنى ما تطول غيبتك .. اكثر ..


لا أدري ما أقول ,, أي أحرف أنتقي و أي الجمل أختار ,, لا أعلم ما يوفيك حقك يا غاليه ,, فقد كان ردك في وقت تراودني فيه الأفكار بإنهاء الرواية على أي شكل كان ,, و لكن بعد قراءتي لأحرفك انتعش فيّ حس الكتابة و أبيت أن أقتل أفكاري ,, فتقرر ما يلي :
1- اكمال الرواية بكل أحداثها دون ملل أو كلل ..
2- اعتبار بسمة براءه أختا لي و داعمه و مشجعه ..

و في النهاية أختي تقبلي ودي و كوني بجانبي حتى نرسم النهاية معا ..










.

 
 

 

عرض البوم صور نبــ القصيم ــض   رد مع اقتباس
قديم 30-04-10, 09:04 PM   المشاركة رقم: 178
المعلومات
الكاتب:
اللقب:

البيانات
التسجيل: Nov 2009
العضوية: 151911
المشاركات: 146
الجنس أنثى
معدل التقييم: نبــ القصيم ــض عضو على طريق التحسين
نقاط التقييم: 86

االدولة
البلدSaudiArabia
 
مدونتي

 

الإتصالات
الحالة:
نبــ القصيم ــض غير متواجد حالياً
وسائل الإتصال:

كاتب الموضوع : نبــ القصيم ــض المنتدى : القصص المكتمله من وحي قلم الاعضاء
افتراضي

 

.



السلام عليكم و رحمة الله و بركاته ..
كان الجزء جاهز عندي بالأمس لكني آثرت أن أدخل عليه الحدث الأخير لذا تأخرت ..








الجزء السادس عشر :~
( حتى القمر به نمش )
ذكرى كلماتهم و لو كانت حلوه إلا أنها تنقش الجرح بتفنن ..




تركي ,, الصبح .

طلعت من البيت و قفلت الباب ,, مديت ايدي و حاولت أفتحه مره ثانيه عشان أتأكد إنه انقفل .. طلعت و ركبت سيارتي و انطلقت ,, كان راسي يدوووور ,, حاس إن الصداع بيذبحن و صوت مي وهي تترجان أوديه لأخته يرن بأذاني و طبعا ماكان ردي عليه إلا الرفض القاطع ,, خللت أصابعي بين شعري و تنهدت بوجع ,,,

آآآآهـ يا حياتي , كئيييبه و مقلقه إلى أبعد الحدود ,, من زواجي و الأيام تمر بطييئه علي ,, ذبحن التفكير برونق كل ما جيت أنادي مي ناديته بإسم إخته و بنفس الوقت الشك يعج براسي بـ مي ,, كل يوم أطلع بعد ما أتأكد إن الأبواب كله مقفوله و كل همسه أو غمزه يكون له ألف تأويل براسي ..

أدري بهذلت مي بنت عمي و هي ماله ذنب بس وش أسوي ؟؟ من بعد ما خانت رونق صار عندي قاعده وهي إن كل الحريم مالهن أمان و كلهن الخيانه من طبعهن ..

دخل عيني النوم و غفيت و أنا أسوق ,, سمعت بوري قوي ,, مسكت الفرامل و الدنيا اختلطت قدامي ,,
شفت الزحمه و العالم اللي تهاوش علي ,, ساعته تأكدت إني حي و ما صار لي شي ,, حركت بعد ما حمدت الله اللي سلمن و عيون الكثير تناظرن بحقد ..


ــــــــــــــــــــــــــــــــــــــــــ
بعد يومين ..
رونق ,, الصبح

رفعت ايدي و مسكت يد هدى و تكلمت : بس يا هدى شبعت .
ردت هدى : رونق كملي ما أكلتي ..
رديت و أنا أمسح أفمي بمنديل : لا بس شبعت ..
تكلمت المره اللي بالسرير اللي جنبي بلهجته البدويه : يا بنتي ترا الأكل هو اللي يرم العظم و يرد الصح ..
ردت أختي هدى : هاتي صحنتس يا أم نايف أحط لتس شوي ..
ردت أم نايف : أبك بينشق بطني من هالشويربه ..
هدى : بالعافية يا أم نايف .
قامت أم نايف و تكلمت : أبروح للحمام قبل يجي ولدي .
هدى : هاتي ايدتس أمسكتس .
سحبت ايده أم نايف عن هدى و عدلت برقعه و ردت : لا بالله أنا أقوى أمشي الحالي .
و كملت و هي تمشي : لا جاء نايف عين أمه قولوله يحتريني لا يروح لين أجي ..
ردت هدى : إن شاء الله .


بعد ما طلعت أم نايف قامت هدى و سكرت الستاره اللي بيني و بين أم نايف تحسبا لجية ولد أم نايف و جلست على كرسيه ( كرسي المرافق ) .

التفت لأختي هدى و تكلمت : هدى طلبتس روحي لبيتس .
هدى : لا منب رايحه و أنتي .......
قاطعته : تخافين أهج و إلا أطلع مع أحــ .....
قاطعتن هدى : لا تقولين هالكلام !!
تنهدت و رديت بشويش : ليش ما أنكرتي كلامي !!
و كملت : هدى أنتي إلى الحين تشكين ببرائتي صح !!
تنهدت هدى و ردت : رونق خلاص !
أنا بعصبيه : لا موب خلاص ..
قاطعتن هدى : رونق حنا سمعنا كلامتس ,, رونق أنتي قلتي ما أتخلى عنـ...
خلاص ما عاد أقدر أتحمل اللي أسمعه : هدى بس ..
و كملت و دموعي ماليه وجهي : هدى روحي لبيتس خلاااااااااص .
حطت هدى ايده على ايدي تحاول تهدين : رونق اهدي .
عضيت على شفتي و تكلمت : أبهدى بس تكفين روحي لبيتس ..
و كملت و صوتي مخنوق : محتاجه أقعد لحاااالي و خالد يبي يجي الظهر و مريم و هند بيجون العصر ..
هدى : طيب خلاص أبروح بس تراي أبجي العصر .

هزيت راسي بمعنى إيه و لبست هدى عباته و طلعت..


حطيت الشرشف على وجهي و بديت أجهش ببكاء موجع !!

قهر إنك تثق بإنسان و يشك فيك و بعد ما يشك فيك ترجع تثق فيه مره ثانيه و يرجع يشك فيك ,, ساعته بس تقدر تقول إن هالدنيا ما به إنسان وفي ..

كلهم يشكون بي حتى خالد الشك باين بعيونه ,, أحيانا أعذره لأنه إلى الحين ما شاف أي دليل على برائتي و أحيانا أقول لاااا المفروض يسأل قلبه و قبل قلبه يسأل عقله هل معقول إن الإنسان اللي يحتفظ بكتاب الله بصدره يسوي معصيه مثل هذي ..

أقدر أقول لهم إن مي اللي خانت ثقتكم موب أنا بس أكيد ما راح يصدقونن لأن مي ما فيه شي يدل على إدانته ,, غير إن هالشي يمكن ينعكس علي و يكرهونن أخواني أكثر مما هم كارهينن ,, آآآآآآآآآآه يالدنيا ,, لا قسيتي على أحد ما رحمتيه ..

كان صياحي مكتوم ,, ودموعي اللي تمشي على خدودي هي الدليل على صياحي ,, لكن شهقاتي ما يرحمنن و بين الفتره و الثانية يعلى صوتهن ..

مع إني منهاره إلا إني حريصه إن اللي بالغرفه ما يسمعونن ,, يمكن لأني ما أبي أشوف نظرات الرحمه و الاحتقار بعيونهم زي اللي كانت من أخواني ..


مر وقت و أنا على حالتي لين تخلل مسامعي صوت : رونق أنتي صاحيه ..

موب غريب هالصوت ,, لا موب غريب أبد ,, أكيد هذا هو نفس الصوت اللي واسان بحزني و باركلي بكل لحظات الفرحه اللي مرت علي بحياتي ,, صوته إلا صوته ,, آآآآآآهـ و من ينسى هالصوت اللي قتلن بلحظة ,, و بدد كل أحلامي بكل قسا ,,

كتمت نفسي و تعوذت من الشيطان ثلاث مرات و ما زال الصوت يتردد عندي ,, شلت الشرشف عن وجهي و تأكدت ظنوني لما شفت مي !!!

كانت واقفه و رافعه غطاه عن وجهه الكريه ,, عيونه الدامعه اللي بكل عمري أظن البراءه عنوانهن صارن الحين رمز للخيانه و النذاله ,, كان جسمه الهزيل كفيل برواية حياته الكئيبه ,, فرحه سرت بداخلي على حاله أحسن تستاهل هذا الظالم لا يمكن يرتاح وهو مستمر على ظلمه ,,

تكلمت مي : رونق وشلونتس ؟؟

عضيت على شفتي أمنع عبرتي تطلع ما أبي أشكي لأحد و خصوصا هذي !!
استجمعت قوتي و نطقت : يهمتس تعرفين حالي ..

نزلت راسه مي و رجعت رفعته : أكيد موب أنتي أختي !!

رسمت على وجهي ابتسامة استهزاء و رديت : و وين كانت الأخوه يوم تسوين اللي سويتيه ..

تنهدت مي و جلست : رونق و الله إني كنت أحسبه يحبن ما دريت إنه كذاب !!

ركزت نظري بالسقف و رديت : مي أنتي ما كنتي قد الثقه اللي عطوتس أمي و أبوي ,, كلمتي رجال ما تعرفينه ,, تدرين أنتي حتى ما استشعرتي إن الله يراقبتس وكان همتس نفستس و بس .
.
قاطعتن و دموعه ماليه وجهه : رونق و الله نادمه بس وش يفيد الندم ,, تدرين و الله إني بعد اللي صار لتس ما كنت أبي أسكت عن اللي صار لكن يوم شفتهم كلهم ما لاموتس بالعكس لاموا أمتس الشامية حسيت إني انتقمت لأمي منه ,, أنتي تدرين إنه ذوقت أمي الويل و أمي يا بعدي ما شكت و لا بكت ,, صحيح أنه حتى ما عمره تكلمت عن أمتس لا بشين و لا بزين ,, و مع ذلك كلام الناس عنه كرهن به ..

أنا : تنتقمين من أمي بي !!

مي : يمكن موب كله إنتقام بالبدايه كان خوف من المواجهه لكن بعدين خفت على أمي موضي ,, و تعرفين الناس يبي ياكلونه بالكلام اللي زي السم ..

رديت : مي تعرفين من هو اللي كان يكلمتس ؟!!

ردت مي : وليـــ...

قاطعته : لا يا غبيه هذا عزام ولد عمي ..

لاحظت الصدمه على عيونه و كملت : ماكان يبيتس لا ,, كان كل مطلبه إنه يوصل لبنت الشامية ,, أعماه اسم الشامية و توقعن مثل وصف الناس لأمي ,, ما درى إني أقل خواتي بالجمال ...

ضمت مي ايدينه و تكلمت بعدم تصديق : لا لا ما أصدق رونق لا تكذبين هذا موب صوت عزام ..

رديت : و أنتي من متى تعرفين صوت عزام وبعدين لا تنسين إن مجتمعنا محافظ يعني ترانا عمرنا ما تكلمنا أو حتى سلمنا على عيال عمي ..

مي : يا ربي هالكلب دمر حياتنا !!
رديت و أنا أقاوم دموعي : لا بالله ما دمر حياتس أنا اللي ذبحن و أنا حيه و أنتي اللي عطيتيه السكين ,, عطيتين السماعه عشان أوقفه عند حده و أمنع عنتس الشر و يوم منعته طاح على راسي و ما لقيتس إلا عدوتي ..
مي : رونق و الله إني ..........

قاطعته و دمعت عيوني و تكلمت بحشرجه : تدرين يا مي من يوم اللي صار و أنا أتمنى الموت ,, جسمي ذاق من الضرب ما يكفيه وعقلي تعب من التفكير بالمستقبل ,, حتى تركي تكاثرتيه علي و أخذتيه من ...

قاطعتن مي : و الله ما أبيه بس هم غصبون يقولون إنه وصية أبوي ..

غطيت وجهي بإيديني و تكلمت بصياااااح : ما فكن من ظلمه حتى بعد ما مات .
مي حطت ايده على كتفي و تكلمت و هي تصيح معي : رونق خلااااص ,, تدرين أول كنت خايفه أحد يمس أمي بكلمه لكن الحين خلاص أبقولهم و اللي يصير يصير ..

كان الصمت هو عنوان الحديث لحظات ......



" توجسين شي يا بنيتي "
" توجسين شي يا بنيتي "
" توجسين شي يا بنيتي "
تردد صدى كلمة أمي موضي براسي ... يا الله يا ميمتي كنتي تخافين علي من الهوا الطاير ,, تعبتي علي و شلتي همومي قبل لا أشيله أنا ,, عطيتين و ما انتظرتي من أعطيتس ,, شفت الحب بعيونتس بعكس أبوي اللي أتقن تصنع الحب ,, وشلون بعد كل اللي شفته منتس يمه أتنكر و ما أشيل لو جزء من جميلتس ..

تنحنحت ثم تكلمت و الثقه تملأ صوتي : حلفتس بالله يا مي ما تقولين لأحد ..

ردت مي باعتراض : و أنتي ....

قاطعته : حلفتس بالله ما تكلمين ترى أمي موضي غاليه بالحييييل علي ..
مرت ثواني و حنا ساكتين لين تكلمت مي ..


تنهدت مي و ردت : ربي يا رونق ما يضيع حق أحد ,, تدرين وشلون أنا عايشه الحين ؟

التفت عليه بدون لا أتكلم و كملت مي : تركي شكاك و ما عاد يثق بأحد ,, يقفل الباب قبل لا يطلع و يرجع بنص الدوام يخاف أكون سويت شي بغيابه ,, آآآآآهـ حاسه إني عايشه بكوكب ثاني حتى الجوال انوخذ من ..

رديت بنقمه : تستاهلين و هذا أقل من جزاتس ..



: مي !!

صوت يا ما انطربت لسماعه و الحين صار أشبه بصوت الزجاج على الحديد ,, صوت مؤذي لأبعد حد و ما يوصل المعنى أي صورة تشبيه بهالعالم ,, باختصار صوت جالب للماضي السعيد و الحاضر المؤلم ...


ردت مي : سم سم هذاي جيت ..

قامت بسرعه و لبست عباته و مدت ايده تصافحن لكني خيبت ظنونه و ما مديت ايدي ,, سحبت إيده بخذلان و طلعت لتركي اللي ينتظره ...


ــــــــــــــــــــــــــــــــــــــــــــــــــ

الشخصيه هذي جديده لكن راح يكون له دور كبير بالقصه ..


مطلق

ما كان لي خاطر أجي لأني عارف إني أبسمع نغزه من نغزات أمي ,, لكن نايف أخوي طاح و التوت رجله و كلم علي يبين أروح لأمي عشان لا يضيق صدرها علاه ..

من دخلت المستشفى و نظرات الناس علي ,, كان لثوبي المصفر و شماغي المعصوب على راسي أثر بجذب الانتباه لي ,, لكن ما فيه وقت أغيره أنا عند بعاريني و مكالمة نايف أرعبتني ,, هذي أمي و منيب ناقص عشان تجي تهاوشني و تزيد همومي ..

سألت وحده من السسترات عن غرفتها و وصلتني للغرفه و لسريرها بعد ,, دخلت و سكرت الستاره و جلست أنتظر أمي ..

مر وقت علي و أنا أسمع صياح مره ,, شدني الصوت لأنه كان مكتوم و باين إنها موجوعه بالحيل ,, آآآآآآآه يا حظكن يالحريم أي شي يجيكن تنزلن هالدموع و ترتاحن لكن حنا لاااااااااا صعب نرتاح لأن الدموع على قولتهم ميب للرياجيل ,, و نضطر نكتم همومنا و لو كثرن و فاضن بهالقلب ..

أرهفت سمعي للمريضه اللي بجنب سريري أمي ,, تمنيت أعرف وش فيها ,, عارف إن الموضوع و لو كبر موضوع حريم تافه و ماله أي معنى لحد ما تناهى لمسامعي صوت ثاني ,,

اختلطت الأصوات علي لكني ميزت كل كلمه انقالت,, ما كان الكلام اللي قالوه صعب عشان أفهمه ,, كان كل شي واضح ,, خانت و لبست التهمه أختها البريئه بمجرد إنها أختها من أبوها أو مثل ما يقولون بنت الشامية ,, بريئه بكلامها و بتأكيد أختها المذنبه ,, قاست و عانت و ما لقت من يوقف جنبها و يسندها و يشيل حمولها ...
كل هذ يصير بالدنيا لكن الشي الوحيد اللي خلا راسي يفتر ,, و تمنيت أوقف احترام لها إنها ترفض إعلان براءتها مقابل برها بأمها اللي ربتها ,, شي كبير سرى بداخلي و أنا أتخيل الإنسانه العظيمه اللي ترقد على بعد كم شبر من ,, و عقدت العزم بداخلي على........

: نايف يمه جيت ..

التفت لأمي و رديت : أنا مطلق يا أم مطلق ..
اقتلبت ملامحه إلى العبوس و ردت : أنا أم نايف يا ورع .
انعصر قلبي على هالكلمه أنا الولد الكبير عند أمي لكنه ترفض إنه تسمى بي من يوم صار اللي صار..
و كملت أمي : اخس عليك وش جايبك ..

رديت بلا مبالاة مصطنعه : نايف جاوه رياجيل و قال لي أجي بداله ..
أمي : عود من وين ما جيت و قل لنايف لا منه ما بغى الجيه لا يكز أحدن بداله ..
قمت من مكاني و تكلمت : تبين شي يمه قبل لا أطلع ..
ردت أمي و هي لافه وجهها عن : لا عاد تجي مرة ثانية ..

طلعت و أنا مغمض عيوني بألم قهر إذا عاملوك الناس على إنك ظالم و إنت مظلوم ..



: بسم الله ,, ما تشوف !!

حسيت بالارتطام اللي صار و فتحت عيوني و أنا ناوي ألعن خيّر الشخص اللي قدامي لكن قبل لا أرد ترجم عقلي الصوره اللي قدامي ...

أنا : خلووووود الحضري ..
عقد خالد حواجبه و ابتسم و رد : مطلق البدوي ..
ضميته و سلمت عليه و هوقابلن بنفس حرارة السلام أو أكثر ..

أنا : وين أنت يا شيخ وش هالقطاعه ما تسير علانا مثل قبل ..

ضحك خالد و رد : أنا أدرس برا الحين ..
رديت : وووه وش تبا بديار الكفار .
رد خالد بعد ما حط ايده على كتفي : تعال للكوفي نسولف و آخذ أخبارك ..
رحت مع خالد للكوفي و قعدنا نسولف مع بعض شوي لكن المكان عام و أنا ما تعودت على هالأماكن ,,

حس خالد بضيقتي وتكلم : خلنا نمشي لبيتنا نسولف هناك .
ارتحت لرايه و رديت : شورك و هداية الله .

مشينا طالعين من المستشفى و كانت الأفكار تتراود على راسي تذكرت إن خالد كان ماسك ستارة السرير اللي بجنبنا ,, جاء بنفسي شي لكني استبعدته موب معقوله تكون قريبه لخالد ,, خالد حضري و رياجيل الحضران كنهن بنات وش لون عاد حريمهم ,, لكني سألته عن سبب تواجده بالمستشفى : خالد أبك وش اللي جايبك للمستشفى .
ابتسم خالد : نفس اللي جايبك .
أنا : و أنت تدري وش جايبني ..
خالد : جاي تزور أحد ,, إلا منهو اللي لك مريض ؟
تنهدت و رديت : أمي !!
التفت لي خالد و تكلم : عسى ما به شي كايد ؟
أنا : لا بس السكر مرتفع علاها .
خالد : أجل وراك تتنهد و أنت تتكلم !!
رديت : سالفه طويله ما قلته لأحد لكن تدري إني على قل شوفاتي لك إلا إني أرتاح لك ..
و كملت : إلا أنت وش اللي جايبك ؟
رد خالد : أختي رونق تعبانه ..
رديت : أبك يالحضري تقول اسم أختك ..
ضحك خالد : عااااادي و بعدين ما قلت لك ترى أختي بجنب أمك ..

كمل خالد طريقه أما أنا وقفت ,, لا لا أكيد خالد يكذب ,, معقوله اللي تكلمت حضريه و لا بعد أخت خالد ..

: مطلق وش بك ؟!!

رفعت راسي لخالد اللي سبقن و رديت : لا لا ما بي شي ..

لحقته بخطوات مستعجله لحد ما استقرينا بالسياره و الأفكار تعج براسي ,, كان يتكلم و ما كنت معه لحد ما رفع جواله و تكلم ...
خالد : الو هلا فيصل ..
خالد : الحمد لله ..
خالد : ايه اسمع ابو محمد ..
خالد : أبيك تروح لرونق ,, كنت رايح له تو بالمستشفى لكني يوم بغيت أدخل عليه شفت واحد و طلعت معه ..
خالد : ايه مالك دخل ..
خالد : هههه المهم كنت مواعده رح له الحين تغدى معه
خالد : ما عليك خل تركي يدخلك ولد عم ببلاش ..

تركي ولد عمه ,, يا الله بس لو أفهم وش سالفة هالتركي معه هي و أخته !!


: مطلق أكلمك وين وصلت .

رديت : عندك .

ابتسم خالد : بالحيييييل عندي !!



ــــــــــــــــــــــــــــــــــــــــــــــــ

مي
بعد ما طلعنا من رونق حصلت لي كم تهزيئه من تركي و بعده سأل ...
تركي : عسى ما صحتي عنده .
رديت : وش رايك يعني ؟؟
صر تركي على اسنانه و رد و هو معصب : مي لا تستهبلين و ردي على قد السؤال ..
تأففت و رديت : ايه صحت غصب علـ ....
قاطعن : بس أنتي كذا ضايقتيه و اكيد صاحت معتس ..
انفعلت و ما قدرت أكبح جماح غيرتي و تكلمت : و لهالدرجه تهمك رونق و ما تبيه تصيح ؟!!
رد تركي بتردد : موب كذا بس لأن حالته الصحيه ما تسمح ..
بلعت الموقف زي ما بلعت قبله كثييييييييييييير و حاولت أداوي جروحي بنفسي ..
مشيت ورا تركي اللي كثر ما أهديله من حب و احترام ما أقابل منه إلا الحب لغيري ,, مشيت و أنا أجر وراي جروووح أنا اللي تسببت به لنفسي ,, و تسببت به لغيري من قبل و صدى كلمه تردد بداخلي
" الله ما يضيع حق أحد " ..
" الله ما يضيع حق أحد "
" الله ما يضيع حق أحد "


ـــــــــــــــــــــــــــــــــــــــــــــ

رونق
نزلت ايدي بعد ما شفت الساعه وحده و ربع ,, غريبه خالد قايل يبي يجين الظهر ,, أنا متأكده إني سمعت صوته بس ليش ما دخل علي ,, يا ربي لا يصير به شي ,, يمكن أسماء به شي ,, لا يا ربي لاااااا ....

: هلا و غلا .
رفعت راسي و شفت فيصل بابتسامته العريضه قدامي ,, ابتسمت له لكن على طول جاء ببالي خالد ,, سلمت عليه و بالي مشغول و ما صدقت يستقر جالس على الكرسي و بادرته بالسؤال ..

أنا : أسألك بالله يا فيصل قلي وش اللي صاير ؟؟
عقد حواجبه فيصل و رد : وشو ؟
رديت بقل صبر : خالد لا لا أسماء ,, أسماء وش به ؟؟
اعتدل فيصل بجلسته و رد بجديه : و الله إن أسماء على حاله و خالد ما به إلا العافيه حتى هو اللي كلمن أجي لمتس .
رديت بشك : احلف !!
فيصل : قسم بالله العظيم إني صادق ..
تنهدت و رديت : الحمد لله .
فيصل : تقهريييين أنتي و أفكارتس .
رديت : وش أسوي خالد عقب ما سمعت صوته عند الستاره اختفى , , الصراحه إني خفت ..
ضحك فيصل و ثواني و ملت قهقهته المكان : مهبول هالخالد ما يتعب نفسه بالتفكير قابل واحد يعرفه و طلع معه .
ابتسمت و رديت : لا تسب أخوي .
فيصل : الله و الإخوان عاد .
أنا : فيصلوه احترم ابوك و عمومتك ..
ناظرن فيصل بطرف عينه و رد : أشوفنا راضين عنهم اليوم .
رديت : و الله ما رضيت و لا أنا بناسية اللي صار لي منهم أبد ..
فيصل : أنتي الحين فكري بصحتس و بالدراسه اللي بترجعين له اذا طلعتي من المستشفى إن شاء الله .
أنا : أرجع للدراسه !!
فيصل : إيه .
رديت : الله يكتب اللي فيه الخير ..

و سكتنا شوي لكني سالت فيصل : الا تعال وش صار على دراستك ؟
حط ايدينه فيصل ورى راسه و تسند و رد : غايص بين هالتفاضل و التكامل .
أنا : بأي مستوى ؟
فيصل : السادس .
أنا : اييييييه أحد طقك على ايدك و قالك ادخل رياضيات .
فيصل : أقول بس هناااااااااك !!
ضحكت و رديت عليه : احترم عمتك .
فيصل : ان شاء الله عمتي .
رديت بجديه : فيصل وش رايك نروح نشوف أسماء و الله إني ما شفته من صحيت من الغيبوبه ..
فيصل : لا أخاف ما تتحملين !!
مسكت ايده و تكلمت بترجي : فيصل و الله إني مشفقة عليه .. ( مشفقه عندنا يالقصمان يعني ميتة من الوله عليه )
و كملت : و تراي متوقعته بأسوأ حاله ..
فيصل : ما أدري ..
أنا : فيصاااااااال الله يخليك .
فيصل : خلاص بس .....
أنا : آآآآمر .
فيصل : أولا ما حنا بمبطين و و ثانيا لا تتوقعين إنه بترد عليتس ..
أنا : عارفه بس يله .
قام فيصل واقف و سأل : تمشين و إلا أجيب لتس عربيه ؟
رديت و أنا ألف الطرحه : لا أقدر أمشي عادي ..
قمت و عطان فيصل عباتي من الدرج لبسته و حطيت جزء من الطرحه على وجهي و تكلمت : جاهزه ..

مسك فيصل ايدي و كأنه يبث لي شي من الأمان و مشينا خطوة على قدام و خطوتين على ورى ..

دخلنا للعناية المركزه ,, شفت جسد ملقى على السرير ,, لكني ما أشوف من هالجسد إلا رجلينه لأن الجزء الأمامي غطي بجسم ثاني ,, كان سلطان رجل أسماء بلحيته الكثه و وجهه السمح منكب يقرأ على أسماء ..
وقفنا وراوه بالضبط و تخللت مسامعي " و إذا مرضت فهو يشفين " كان الصوت خاشع ,, لدرجة إنه ما حس بنا ,, كانت العبرات تخشن الصوت ببعض المقاطع ,, لكن هذا ما كان إلا يزيد من جمال القراءه ..

كان قلبي يرجف و أنا أشوف سلطان بهالحاله ,, مر وقت لحد ما انتبه إننا وراه ,, تضايقت إنه انتبه ما كنت أبي أقطع عليه هاللحظه الروحانيه و لا كنت أبي أشوف أسماء ,, أعتقد إن ضعفي انتصر على قوتي و سيطرت على جسمي رجفاتي و غمضت عيوني ..

سمعت فيصل يهمس لي : رونق سلطان طلع ..

عضيت على شفتي و التزمت الصمت أخاف أفتح أفمي و تطلع عبرتي ..

سمعت صوت فيصل مره ثانية : رونق ما تبين تسلمين على أسماء ..

لما سمعت اسم أسماء تكلمت : فيصل تكفى أبطلع خلاص هونت .

شدد فيصل من قبضته على ايدي و سحب الغطاء عن وجهي و رد : رونق فتحي عيونتس أسماء قدامتس ..

من قال أسماء قدامتس فتحت عيوني ,, طاحت دمعتي لما شفت اللي قدامي ,, معقوله هالجسم الهزيل اللي قدامي أسماء لا لا أكيد يكذب هذي جلد على عظم ..
قربت له و تحسست ايدينه كانت بارده و كأنه ثلج ..
مررت ايدي على وجهه لا حواجب و لا رموش ,, تحسست وجهه و كأني أدور أي دليل على إن هاللي قدامي هي أسماء ,, لمست النمش اللي فوق فمه وأبعدت إيدي بسرعه و صوت قديم لأسماء يرن براسي
: " سلطان يقول حتى القمر به نمش "
" سلطان يقول حتى القمر به نمش "
" سلطان يقول حتى القمر به نمش "

قبضت ايدي و ضميته و شهقاتي تعلا و ترتفع أسماء تعباآآآآنه ...
حسيت بنفسي بين ايدين فيصل رفعت راسي و تكلمت : فيصل أسمـ...ـاء ..
فيصل : اقري عليه .
سحبت نفسي من فيصل و اتجهت لأسماء ,, حطيت راسي على صدره و أجهشت ببكاء عميييييق .. حسيت إن قلبي يوجعن من كثر الصياح و يدين انتزعتن من صدر أسماء ,,
فيصل : رونق و بعديييييييييين ..
أنا : خـ....ـلاص أأأبـ...ــقـ..ـرى .

افتكيت نفسي من بين ايدين فيصل و انحنيت على راس أسماء ..
كنت أبي أدعي لكن كتاب الله اللي أحفظه بين ضلوعي نسيت كل آياته ,, حتى الأدعيه نسيتهن ,, بس ربي يسمعن و عارف وش أبي ,, تكلمت باللي بخاطري : ربي يا حبيبي خله لنا و و ووو قـ...ـومه بالسلامه , يا ربي لا تموته تكفى يا ربـ.....ـي إهئ إهئ ...

طبعت قبله على جبينه و صديت بسرعه و اتجهت لفيصل مسكت ايده و طلعت بسرعه ,, عارفه إنه مستغرب من القوه اللي كست ملامحي فجأه لكن أنا تذكرت شي ,, تذكرت إن ربي هو اللي بيقبل دعائي اتجهت لدورات المياه و توضيت ,, طلعت و رحت للغرفه ,, فليت السجاده و كبرت و هذا كله تحت نظرات فيصل ..........


ـــــــــــــــــــــــــــــــــــــــــــ

خالد ,, الظهر

شريت غدى بطريقي للبيت و تغديت أنا و مطلق ,, لكن مطلق غييير عن مطلق قبل كان مهموم و حزين و هذا باين بعيونه ,, سألته عن همه لكنه ما رضى يقول لي لكن يوم سألته عن ساري ولد عمه انفجر يصييييييح و قال لي قصته هو و صديقه و ولد عمه ساري ,, هديته و ذكرته إن الموت حق بعد ما عرفت إن ساري توفى ,, سويت شاهي و جلسنا بعده نسولف عن هالدنيا ,, قصيت له ميتة أمي و ابوي بدون لا أجيب سبب لميتتهم ,, سألن عن أختي المريضه و قلت له قصة الحريقه ,, استغربت سؤاله عن الحريق بالتفصيل لكن هالإستغراب تبدد لما سمعت اللي عنده ...

أنا : مطلق .. اشرب شاهيك لا يبرد .
أخذ مطلق البياله و شربه و رجع يسأل هالسؤال مرة ثانية : خالد وش رايك بي ؟؟
استغربت ترديده لهالسؤال و رديت للمرة الثانيه : قلت لك يا مطلق من قبل رجال من ظهر رجال .

لا حظت شبح ابتسامه مر عليه قبل يرد : خالد أنا أبي أختك المرضانه حليلة لي ..
تفاجأت من كلامه و ركزت عيوني عليه و الكلام ضاع من لكنه سبقن و تكلم : نسبكم يشرف إلا إذا بصدرك شك بي ..
تكلمت بسرعه : لا بس أختي أختي ما تناسبلك . ( ما قدرت أوافق عارف إن مطلق بدوي و لو يوصله شي من اللي وصلنا عن رونق كان ذبحه لكني بنفس الوقت ما أبيه يعرف السبب اللي خلان أرفضه لأنه كبيره بحقي إنه يتخيل إن أختي ........)

قطع علي أفكاري مطلق : يمكن تشره علي لكن لا تواخذني يا خوك ,, أنا يوم جيت أزور أمي كانت مهيب بفراشها و دار كلام بالغرفه سمعته ,, و سمعت لي علم عن خيتك .
رديت ببلاهه : هاه !!
رد مطلق : رغم إن اللي صار لها طعنها بشرفها إلى إني يا خوك أبيها و لاني ظان إنكم بتردوني .
معقوله مطلق يعرف إن أختي غلطت ,, طيب وين غيرة البدوي !!
رفعت راسي و سألته بقهر من رونق و حرج كبيييييير من مطلق : وش اللي تعرفه عن أختي ؟
رد مطلق : من المكالمه لين الحريقه ..
نزلت راسي بحرج كبييير موب عارف وشلون أحط عيوني بعيون مطلق و هو عارف باللي سوته أختي !!
سمعت صوت مطلق : أنا يا خوك ما قلت اللي قلته أعايركم أنا ما قلت إلا اللي سألتني عنه و بعدين ترى بنتكم ميب لاقية إلا الحشيمه و الكرامه عندي ..

نزلت راسي للأرض وأنا أفكر أوافق وإلا لا ؟؟ و بعدين حتى لو وافقت رونق ميب موافقة تاخذ بدوي ,, آآآهـ يا رونق لو تعرفين هالبدوي كان عفتي كل الرجال على الأرض عنده !!
تذكرت الإتصال اللي جان من الجامعه يأكدون لي إنه بعد اسبوعين تبدأ الإمتحانات و لازم أروح لكن لو رحت رونق من بتقعد عنده عند محمد اللي إلى الحين ما سمحت نفسه يسلم عليه و إلا عند عبدالرحمن اللي احترقت و هي بوسط بيته ,, لا لا ما راح أسمح لهم يذبحونه و هي حيه !!

رديت بعد ما عزمت على رايي : جاك ما طلبت يا أخوي بس عطن فرصه أكلم أخواني ..

رد مطلق : قصدك تشاورهم ؟!!

رديت بثقه : لا قصدي أبلغهم بالموضوع !!!!









.

 
 

 

عرض البوم صور نبــ القصيم ــض   رد مع اقتباس
قديم 30-04-10, 09:06 PM   المشاركة رقم: 179
المعلومات
الكاتب:
اللقب:
عضو راقي


البيانات
التسجيل: Mar 2010
العضوية: 157113
المشاركات: 1,181
الجنس أنثى
معدل التقييم: البنت العنقليزية عضو له عدد لاباس به من النقاطالبنت العنقليزية عضو له عدد لاباس به من النقاط
نقاط التقييم: 108

االدولة
البلدAustralia
 
مدونتي

 

الإتصالات
الحالة:
البنت العنقليزية غير متواجد حالياً
وسائل الإتصال:

كاتب الموضوع : نبــ القصيم ــض المنتدى : القصص المكتمله من وحي قلم الاعضاء
افتراضي

 

.. السلام عليكم والرحمة..
الله حيوو نبووضه
كيف حالتس اربتس بخييييير..
بارت اليوم ولا اروووع
تفاجأينا بسير الاحداث ..واللي كانت
لا على البال ولا الخاطر
..كل مااقول اليوم بتظهر شمس الحق
..وبتننكشف الاوراق ...تتأجل..
بس اهم شي انو مطلق عارف ببرائة رونق ومتأكد
انها مظلوومه يكفي انه سمع الحديث بإذنه
والله مايضيع حق احد...
..بس يبقى السؤال ياترى
تركي ايش بتكون ردة فعلة
هل بيرفض انه رونق تتزوج غيرة..
صدق انه تزوج بس اكيد ماجاء بباله..انو حتى
رونق بيجي يوم وبتتزوج..يكفي انو حبها لحد الان
يمشي بعروقة مجرى الدم
..تصدقين رحمته لما عصب على مي
وقال اكيد صحتي عندها
خايف على رونق ودموعها...
ليه الحبيب ماغفر غلطته محبة..دام انك تحبها هالكثر
والانسان موب معصوم عن الخطأ..ليتك سامحتها
..بس تصدقين لو انا مكان مي
مابستحمل اعيش بتأنيب الضمير
طول هالمدة...والمفروض رونق
تكسر ظهرها بطيبتها ولما حكت لاتخبرين احد وحلفتها
...لو انا بمكانه بخبرهم بالحقيقة
ثمن ..تصوم تكفير لحلفها..
..بس لمتى بتتستر عليهم وهم ولايستهلون
كلن عايش حياته
...بس سبحان الله
الظالمين مهوب عايشين براحة
عندك
تركي...ومي
..تركي لحد يحب رونق
ومايحب مي<<تستاهل مي
وبرضو اصبح شكاك درجه اولى
وماهوب مخليها تعيش مثل الخلق..
ويناديها بـ أسم رونق...<<

عزام..ندى
..عزام على كبر الحب اللي يحمله لندى
وندى ماتبادله الحب
تقابله بالصدود...
يستاهل بسبب عملته الشينه بالمسكينة واخوة
فرق بينهم
,,,,,,,,,,,
ودعوة المظلوم مستجابه
...تصدقين ممكن لو
حاولو يكفرون هو ومي
عن الذنب اللي اقترفو
كود تتسهل حياتهم ويعيشون براحه...<<بس هذا عقابهم بالدنيا
ومافكر و بالاخرة ..تموت مثلا" رونق وهي مهيب محللتهم
ولابايحتهم...

ومطلق.هالشخصية الجديدة والبدوية حبيتها
...وكويس طلبهامن خالد
احس بيعوضها عن ايام الشقى والظلم
..وبرضو جاني احساس انو
مطلق احترم رغبة رونق وماوضح الحقيقة
لـ خالد والحوار اللي دار بين رونق ومي..
مع اني مااخفيك تمنيت وبقوة
يخبر خالد انو رونق مظلومة...
..بس الايام جاية
وهي بتكون كفيلة
..وبرضو حسيت مطلق برضو يعاني
مثل رونق ...من الظلم

ومعاملة امه له موب كويسة
اكيد حس بشعور هالضعيفة والمسكينه..
كل واحد يواسي الثاني<<اتخيل اشكالهم خخخخخخ
وياترى ام نايف بتوافق
مطلق يعرس ع رونق
ماادري حسيت كأن ودها رونق لنايف خخخخخخخ
مجرد توقع
على العموم
اشكرتس على التزامتي الطيب
لاعدمناك
ونحتريك الاسبوع المقبل
بالبارت الجاي
همسة تصدقين لحد الان
اطلق شخصية وحبيتها بكل مافيها
من عيوب ومزايا
مطلق وه بث
رونق تستاهله
لاتركي اللي تخلا عنها من اول عقبة
ماراح يصونها ويحفظ قدرها سوا مطلق
الرجل البدوي النشمي وه بث
كومساميد
اريغاتو كوسايمس .
.

 
 

 

عرض البوم صور البنت العنقليزية   رد مع اقتباس
قديم 30-04-10, 10:00 PM   المشاركة رقم: 180
المعلومات
الكاتب:
اللقب:
عضو راقي


البيانات
التسجيل: Apr 2010
العضوية: 161149
المشاركات: 1,789
الجنس أنثى
معدل التقييم: بسمة براءه عضو على طريق الابداعبسمة براءه عضو على طريق الابداعبسمة براءه عضو على طريق الابداع
نقاط التقييم: 222

االدولة
البلدSaudiArabia
 
مدونتي

 

الإتصالات
الحالة:
بسمة براءه غير متواجد حالياً
وسائل الإتصال:

كاتب الموضوع : نبــ القصيم ــض المنتدى : القصص المكتمله من وحي قلم الاعضاء
افتراضي

 

السلااااام عليكم ..

احم احم احرجتيني بصراحه ياذووق ..

اسمحي لي باناديك .. غاليتي ..

غاليتي نبوضه ..


يعطيك ألف ألف عاااااافيه .
جزء راااااائع ومليان مفاجأت ..

رونق ..

يا اسطوره من الروعه اللامتناهيه كل مره احبها اكثر .. مواقف تدل على قوة الايمان والصبر والوفااااااء .. يا ترى هل بيكون مطلق نهايه الحزن وبدايه ظهور الحقيقه ..

الاهم هل خوانها بيوافقون على هالزواج بدون مشاكل ولا عوار راس والا بتتعقد .. بعد ..

مطلق وساري .. لغز جديد .. بس اتوقع ان موت ساري له علاقه بمطلق يعني اتوقع من سواليف القنص والرصاص الطايش << مجرد احساس ..


فييييصل .. اروع واحن شخص على رونق .. بعدين زميل دراسه لازم اسولف عنه شوي ..


تركي ... مدري ازعل عليك والا لك .. مأساه الوقوع بالشك والتعايش على هالاساس وما بين القلب والعقل ما في اي اتزاااااان .. خايف على دموعها ليش ما ترويت بالاول ..


مي .. تستااااااااااااهلين حقك وما جااااااك ومن هالحال واردى وان شا الله ما يحبك ابد .. ويرجع عليك الظلم ظلمات بالدنيا قبل الاخره ...


يا قلبي على سلطان واسماء الوضع متأزم وما في اي دلاله لا لخير ولا لشر ..


منتظرينك على احر من الجمر .. ومشكوره على الكلام الطيب اثلجتي صدري << وحده تتوحم وقافله معها ..


ان شا الله ما يطول الانتظار ..

ويعطيك ألف عااااافيه .. استمــــــــــري ..





 
 

 

عرض البوم صور بسمة براءه   رد مع اقتباس
إضافة رد

مواقع النشر (المفضلة)

الكلمات الدلالية (Tags)
الكاتبة نبض القصيم, رواية بنت الشامية للكاتبة نبض القصيم, قصة بنت الشامية
facebook



جديد مواضيع قسم القصص المكتمله من وحي قلم الاعضاء
أدوات الموضوع
انواع عرض الموضوع

تعليمات المشاركة
لا تستطيع إضافة مواضيع جديدة
لا تستطيع الرد على المواضيع
لا تستطيع إرفاق ملفات
لا تستطيع تعديل مشاركاتك

BB code is متاحة
كود [IMG] متاحة
كود HTML معطلة
Trackbacks are متاحة
Pingbacks are متاحة
Refbacks are متاحة



الساعة الآن 04:13 AM.


 



Powered by vBulletin® Version 3.8.11
Copyright ©2000 - 2024, Jelsoft Enterprises Ltd.
SEO by vBSEO 3.3.0 ©2009, Crawlability, Inc.
شبكة ليلاس الثقافية