كاتب الموضوع :
غموض
المنتدى :
قهوة ليلاس
hello again
أعذرونى يا بنات لأنى مكتبتش حاجه تانى لغاية دلوقت , مشغوله كالعاده زى ما انتوا عارفين و بتمنى اليوم بيقى 72 ساعه عشان يكفى كل الحاجات اللى ورايا
زمان كان الوقت فيه بركه و اليوم طويل لكن دلوقتى الأسبوع بيعدى زى الهوا , عايزين الحق البركه قلت فى كل حاجه دلوقتى الصحه و الفلوس و حتى لقمة العيش
كان نفسى أعيش فى أيام زمان , بحس الناس زمان كان عندهم نوع من البراءه يعنى مكنش فى العنف و الجرايم اللى بنشوفها و بنسمع عنها كل يوم
أنا عارفه إن عيشيتهم كانت صعبه بس كان ربنا مباركلم فى كل حاجه , يعنى لما جدتى كانت تحكيلى عن حياتها كنت بحس إن كان عندهم راحة بال و سماحه و حب ملوش حدود و كانت الناس لبعضهم
دلوقتى اللى سكن فى عماره مش بيبقى عارف شكل اللى ساكن قصاده إيه
بحب قوى الناس الكبيره فى السن يعنى بحس إنهم كلهم جدودى و لما بشوف راجل كبير فى السن بيعدى الطريق لوحده و لا قاعد لوحده بيصعب عليا قوى ببقى عايزه أخد بأيده و أساعده و لما بسمع عن الأولاد العاقيين اللى بيرموا ابوهم و لا أمهم فى دار للمسنين ببقى هتجنن و اقول يعنى دى آخرتها بعد العمر و التعب ده كله يحصل فيهم كده
معلش قلبتها دراما بس بجد الواحد سمع و شاف الموضوع ده كتير
طيب ننقل لحاجه تانيه تضحك شويه , أصل أنا فريحيه و فرفوشه و مش بحب الدراما و النكد
انا بحب القطط قوى , يعنى أفتكر طول عمرى فى بيت بابا و انا بأربى قطط و أقضى معاهم اليوم كله ألعبهم و أسرق اللبن من التلاجه و أديهم
بخاف موت من الكلاب يعنى مفيش عمار بينى و بينهم
ههههههههه
مش بحب العصافير اللى فى القفص لأن ده مش مكانهم
إيه تانى , إيه تانى يا ربى......
اه افتكرت , هاتكلم بقه عن المطربين اللى بحبهم
عبد الحليم و عبد الوهاب و محمد فوزى و فريد و شاديه و فايزه احمد و فيروز
و من المطربين الشباب محمد منير , حماقى و على الحجار
فى أغنيه حلوه قوى لمحمد منير إسمها " أشكى لمين " تقدروا تقولوا إن دى فلسفتى و نظرتى للحياه كأنى أنا اللى كتبتها و بغنيها
أشكى لمين .. وأحكى لمين .. الدنيا بتلعب بينا
تهنا سنين .. ولا عارفين .. بكرة جايب إيه لينا
بينا .. بالفرحة بينا .. قبل الجراح ما تدق بابنا
بينا .. دى الدنيا لينا .. بكرة الزمان يسرق شبابنا
و ليه هنضيع عمرنا ليه ؟
إيه راح ناخد من دا إيه ؟
إيه راح ناخد من دا إيه ؟
هما يومين .. مش دايمين .. مكتوبين علينا
نقضى ساعات .. فرحانين .. و ساعات بتبكينا
لينا .. الفرحة لينا .. بالحب ننسى كل اللى فاتنا
ويا الرحلة الطويلة .. ننسا اللى فات كله فى حياتنا
و ليه هنضيع عمرنا ليه ؟
إيه راح ناخد من دا إيه ؟
إيه راح ناخد من دا إيه ؟
ضحكتنا .. شمعتنا .. بينوروا ليالينا
خطوتنا .. رحلتنا .. بتقرب أمانينا
لينا .. أحلى أمانينا .. ليه الزمان يكسر قلوبنا
بينا و مادين إيدينا .. واللى يصيبنا أهو من نصيبنا
و ليه هنضيع عمرنا ليه ؟
إيه راح ناخد من دا إيه ؟
إيه راح ناخد من دا إيه ؟
هاه إيه رأيكم كلماتها تحححححفه
يالا أسيبكم دلوقتى و نتقابل بكره .......تصبحوا على خير
|
16-04-09, 01:04 PM
جديد مواضيع قسم قهوة ليلاس
العرض العادي
