كاتب الموضوع :
عذبة التجريح
المنتدى :
الارشيف
قطع فهد كلامه على صوت القرع على الباب.. وهو يرفع راس شهد من على صدره ويقبل جبينها بكل خفه ونعومه..
ويقول : الجيش شكله وصل وناطر بره.. ولازم ننزل تحت.. وراح انكمل كلامنا عقب.......!!
طق طق طققققققققق..
فهد راح يفتح الباب واهوه يتأفف.. إلا طلال بويهه ورافع حواجبه علامة السؤال.. ويحرك راسه وكأنه يسأله بس بالحركة بمعنى اشفيك..!!
فهد رد عليه بنرفزه : أأأأأووووووووفففففففففف.. نعـــم..!! يعني ماتخلي الواحد ياخذ حريته مع مرته..؟؟..!!
طلال ومازال على نفس التعبير المضحك على وجهه : بسك ماشبعت..!! صارلك ساعتين ويا شهد وماطمنتنا عليها..!!
فهد : ليش أمي طيبة ماطمنتكم عليها..!! وإلا لازم تبون تطمنون بالصوت والصورة..؟؟!!
طلال : أقول موجنه عطيناك وجهه وايد.. يالله اشوف روح ناد شهودة وانزلوا تحت أبوي يبيكم..
فهد بنرفزه : مووو المشكلة محد مأخرنا غير هالشهودة.. سنة على ماتاكل لها لقمة..!! بالزور والمحايل مثل اليهال.. ولا بعد بالتهديد كلت لها بس لقمتين..!!
طلال : ههههههههههههههههههههههه.. الحين بتاكلها عدل يافهد.. وبتصير بصراع انت وياها على هالأكل..
فهد : انا بعرف..!! في وحده حتى مع الماي تبي معبوج..!!
طلال : ههههههههههههههههههههههههههههههههههههههههههههههههههههههههه
وينج ياشهود تعالي سمعي ريلج شيقول عنج..!! ههههههههههههههههههه..
شهد بعد ماعدلت وتشيكت على شكلها بالمنظرة.. واهي تطل من ورى ظهر فهد لإنه وايد طويل : إيــــــه.. قعدوا وتطنزوا علي.. بس براويكم الحين عند أبوي..!!
وحاولت شهد إنها تعديهم وتنزل تحت.. بس فهد مسكها من خاصرتها وهو يغمز لطلال : ها شرايك نتغدى فيها قبل لاتتعشى فينا..؟؟..!!
طلال : ههههههههههههه.. والله لو تسوي المستحيل.. ابوي راح يوقف بصفها ومايصدقنا هذه شهد يافهد.. هذي دلوعة ابوها واخوانها الكبار.. وحتى خالد دوم صاف وياها ومايرضى عليها.. ناسي قبل اشكثر خذينا الزف من تحت راسها..
فهد وابتسامة على ويهه : أقول شرايك الحين ناخذ بثارنا منها..!!
طلال غمز لفهد يعني يلله موافق.. شهد حست بالخطر منهم ومن انتقامهم منها.. حاولت تنحاش وبتنزل الدري بس فهد كان أسرع منها ومسكها من خصرها مرة ثانية وكان يضحك بصوت عالي مع طلال.. ونزلوا تحت مع بعض وهم يضحكون..
وفهد مازالت ايده محاوطة بخصر شهد ماتركها.. ليمن اوصلوا تحت لآخر الدري وراحت شهد فكت نفسها من بين إيد فهد الفولاذية وبسرعة راحت عند ابوها واقعدت بين ابوها وأخوها وبوحمد وكأنها أميرة مدللة بينهم..!!
بوخليفة واهو يلم بنته ويبوسها على راسها ويقول : ها اشلونج الحين يُبه..؟؟ عساج بخير..!!
شهد : الحمد لله انا بخير دامك بخير يابعد عمري..
بوحمد : بصراحة تصببت عظامنا من الخرعة عليج.. وماتسوى عليج حبيبتي كل هذا من قل الأكل الله يهديج..!!
فهد : وانت عبالك كلت شي اهيه الحين.. كلت لها لقمة صغيرة وقامت تقول الحمد لله شبعت.. والله حتى الطير لو ياكل قد اكلها بيحوشه جفاف وتيبس ( تجف ، تنشف ) مصارينه من اليوع..!!
بوحمد : وليش ماكلتي يُبه..؟؟..!!
شهد واهيه منحرجه : ماعليك منه اهو قام يبالغ وايد بالحجي.. انا كليت على قد معدتي ولله الحمد..!!
فهد : اللي يسمع معدتها يقول الله وأكبر.. حتى معدة بنات ناصر أكبر من معدتها..
وضحك الجميع على رد فهد ماعدا شهد واللي كانت بعالم ثاني من التفكير بوضعها الجديد وآخر التطورات اللي احصلت لها.. واهي الحين زوجة فهد رسمياً.. يعني مافي أي مجال للتراجع والرفض..!!
شهد وتوجه الكلام لأبوها وأخوانها الكبار : عن اذنكم بروح عند الحريم.. بشوف أمي طيبة..
بوخليفة : الله معاج حبيبتي..
وراحت شهد عند مجلس الحريم والأطفال.. وهناك كان الوضع شي ثاني يوم شافوها.. الكل قام وسلم عليها وقعدوها وقامت الأغاني والرقص من بعد ردت شهد بخير عليهم..
واسهرت العائلة متيمعة على الضحكة والفرحة.. حتى تعبوا وكلن راح لغرفته..
فهد ماسك شهد من خصرها ولامها.. وشهد والنوم يغلب على جفونها واهيه سانده راسها على صدر فهد.. مو محبة ولا خضوع لاااااااااااا.. بس ليش إنها تعبانه من الأحداث السريعة.. ويكفي إنها مونايمة صار لها جيمن يوم.. وهم مالها خلق اتناجر أو تعارض فهد بأي شي.. وكان ماخذها وموديها غرفتها عشان تنام وتستريح.. وعند الباب وقف وباس جبينها وكان بيطلع بس تذكر إنه الفستان ماراح تقدر تبدله لأن الزراير من الخلف..
( اشفيكم لاتفهمونه غلط.. اهو يبي يساعدها فقط )..
وقبل لاتدخل شهد مسكها فهد ودخلها داخل الغرفة وصك الباب وراه.. واهني شهد افتحت عيونها من الخرعة حتى النوم طار من عينها..
وتقوله : نعم فيه شي..؟؟..!!
فهد والبسمة على شفاته الماكره وبكل نعومة رد عليها : إيـه فيه..
وبدون أي مقدمات وكلام زيادة سحبها ولف جسمها.. وشهد خافت وماقدرت تقاوم.. ورفع شعرها الحريري المتمرد على كتفها.. وبدأ يفك الزراير لفستانها إلى أن وصل لنصف الظهرها.. وأهني شهد مدت يدها لظهرها محاوله بتوقيف فهد عند هالنقطة ولا يكثر..!!
فهد والإبتسامة شاقة حلجة من إحرجه لشهد.. وكلمها بنعومه وبرائه مصطنعه : اشفيج خليني اكمل ليلحين في زراير وايد.. وماراح تقدرين تبطلينهم..!!
شهد وصوت تنفسها بدا يعلى من الخوف والإحرج : لاااا.. لاااا أقدر مشكور وماقصرت..
فهد حب يلعوزها اشوي : انزين خليني أشوف تقدرين وإلاااااااا لااااااء..!!
شهد وويهها صار بلون الدم من الإحراج واهيه تواجهه : لااا.. لااا أقدر ومافي داعي تكمل.. (( وراحت عند الباب وافتحته )) لو سمحت اطلع بره أنا تعبانة وبنام..!!
قمت ( كبت ) فهد الضحكة اللي كانت بقلبه من منظر شهد وخوفها منه.. ومشى بتكاسل ووقف عند الباب ومواجها.. ودنق راسه علشان يصير قريب من مستوى راسها..
وقال بصوت ناعم امبطن بالمكر : على فكرة.. ترى عندي إذن من عمي وورقه شرعية تثبت امكانيتي المبيت اهني ومن الليلة.. بس ذوقاً مني راح أخليج ترتاحين.. وبعد أسبوعين مالج أي أمل تطرديني من الغرفة اللي تكونين فيها.. سمعتني يالقطوة..؟؟
شهد ماردت عليه ولفت ويهها للناحية الثانية.. واستغل فهد الفرصة ودنق عليها وباسها على خدها بخفه.. وطلع بره الغرفة واهو يضحك على منظر شهد.. وبنفس الوقت فرحان ومو مصدق نفسه إذا كان بحلم وإلا بعلم.. وقهقه بالضحك لما سمع باب غرفتها ينصفق بكل قوة تعبير عن غضبها واعتراضها .....................!!!
:
:
:
:
وعــدى الليــــــــــــل عـــــلى مهــــله
:
:
:
:
صباح اليوم الثاني من بعد الملجة
الساعة 11:00 صباحاً
بالحديقة الأمامية وعلى الطاولات والكراسي
والأشجار والشجيرات والزهور وجميع النباتات.. تضحك لضوء الشمس الدافئة.. وتدغدغها الفراشات بألوانها.. وهناك يرقص النحل على كل زهرة.. وقطر الندى يبلل وريقات الأشجار ويغسلها فرحاً مع بتلات الزهور.. والنسيم يعبق بعطر الرياحين والياسمين المتسلق.. ويكون ظلالاً لتستريح تحت ظلالها الكراسي حاملة أحلى ذكريات أفراد اسرة عائلة الـ... ومازالت حتى اليوم..
بوخليفة : أشوف الكل متيمع ماعدا المعاريس..؟؟
شاهين : فهد توني كلمته في غرفته.. وبعد اشوي بينزل..
أم خليفة : أنزين ماتبون تتريقون.؟؟.. صرنا الحين بالضحى العود ومابقى شي على اللأذان بس ساعة زمان..!!
بوخليفة : من عقب اكل البارح.. مابي غير الشاي بالنعناع.. أو سويلي شاي أخضر مع الهيل عشان أقدر اهضم اللي كليته..
أم ناصر : عمي جنك قمت اتحجي نفس شهد بالأعشاب وخلطاتها السريه..؟؟
بوخليفة : هههههههههه.. وشهد خبيرة بهالأمور.. والله فكتنا من الأدوية وبلاويها.. وقبل ليثقلنا بالأكل قمنا بلعنا بهالأدوية والحبوب عشان تشيل الحارج والحموضة..
فهد يطل عليهم واهو بكل همه ونشاط والإبتسامة على ويهه الوسيم : السلام عليكم.. من ياب طاري الأدوية..؟؟
الجميع ردوا السلاو واضحكوا : وعليكم السلام والرحمة.. ههههههههههههههه..
طلال : إيـــه لك منافسة قوية يافهد.. والكل متفق وياها على محاربة الأدوية الكيميائية..
فهد : ههههههههههههههههه.. تقصد شهد..!! أسكت الله يخليك لاتيي وتنط علينا مثل القطو.. وبعدين شيفكنا من حنتها أم لسان..
أم خليفة : أقول فهد صج أنك واحد من عيالي وعزيز وغالي يُمة.. بس عاد حدك شهد ماكو عليها.. ولسانها ينقط عسل..
عبدالله وشاهين ومنى قالوا مع بعض : من يشهد للعـــــــــــروس...!!!!
والجميع اضحكوا : هههههههههههههههههههههههههههههههههههههههه..
شهد واهي نازله عليهم ومتوجهه ناحية أبوها وأمها واتبوسهم على راسهم : أشوف متيمعين عالضحكة إن شاء الله دوم مبيوم..
الجميع : إن شاء الله..
شهد : السلام على الجميع ورحمة الله وبركاته..
والجميع : وعليكم السلام ورحمة الله وبركاته..
بوخليفة : ها يُبه مو يوعانة.. تعالي اكليلج لقمة تعالي..!!
شهد واهي تتذمر بصوت واطي : وااايييييي بدينا بالموال اليومي..........
وكملت بصوت أعلى لأبوها : يُبه الله يخليك هالكلمة أكرهها.. متى مايعت أكلت ماني ياهل.. ويكفي أكل البارحة ليمن الحين على جبدي..!!
أم خليفة : عيل وراه كل دقيقة والثانية طاحية علينا وصارعتنا يُمه..!! لو انج تاكلين عدل جان ماصار اللي صار..!!
شهد : واااااي الله يخليكم ترى انسدت نفسي... من الصبح محاضرة عن الأكل.. جني ياهل بالروضة..!!
فهد بستهزاء : لااااا من قال.. من قال انج بالروضة..؟.... حتى اليهال بالروضة ياكلون احسن منج..
شهد واهيه امعصبه : اااهههووووو ليطاح الجمل كثرت سجاجينة..؟؟ اشوف الكل ضدي شالسالفة..!!
أم خليفة : لاااا يُمه محد ضدج الكل معاج وقلبه عليج يابنتي.. وانتي الله يهديج دومج جبريت.. ( كبريت ) شابه ضو..؟؟!!
فهد : هذا من قل الأكل.. وكثرت الفلفل اللي تاكله بشراهة يُمه..
والكل ضحك على شهد.. واهي شبت نار من تعليق فهد (( طبعا الأخت فايقة ورايقة من بعد ما اشبعت نوم والكل حاضر جدامها يعني مافي خوف من ردت فعل فهد عليها قالت أشعللها ))..
شهد بتهديد مبطن توجهه كلامها ناحية فهد وطلال اللي واقفين يم بعض : والله مو بس اللي ياكلون الفلفل جباريت ويشبون ضو.. أكو ناس بدون فلفل يولعون حرايج في البيوت..!!!!!!
شاهين بطريقة مسرحية يقول : ياكافي الشر منو بعد شاب حريجة يا أخت شهد..؟؟
شهد واهيه تحط عينها بعين فهد وتكاسره : والله اللي على راسه بطحة يتحسسها..!!
فهد وطلال عرفوا شهد شتتكلم عنه : طالعوا بعض وتبلموا وبعدين بكل مكر.. افقعوا من الضحك على كلام شهد.. وابصوت واحد قالوا لها : ياك الموت ياتارك الصلاة.. ههههههههههههههههههههههههههههههههههههههههههههههههه..
الكل ضحك بس ماعرفوا شالسالفة مابين هالثلاثة....!!!!!!
شهد وبتحدي : يعني تهديد عيني عينك اشكره.. ولا جنا نسينا ماجرى..!!
الخوف لكم مو بلي يــــا....؟؟!!
طلال بتهديد : جــب ولا كلمة.. واللي بِيبَدي بالكــــلام.. يقــــول على نفسه الســــــلام........
واللي مايحفظ العهد ويخونه....
(( وكمل وياه فهد العهد القديم )) : بالنعل نرميه ونفقع عيونه..
وضحكوا الأثنين : هههههههههههههههههههههههههههههههههههههه..
شهد توجه كلامها لطلال : هذا وانا اختك اتقول لي جذيه عيل اشخليت للغريب..؟؟
فهد واهو يقرب منها ويمسك ايدها بإيده ويبوسها.. لأنه عارف بأنها ماراح تقدر تعارض قربه منها جدام أهلها : ماعليج منه زيـــــــن..
(( ولمها ونزل ايده على خاصرتها واهو يقربها صوبه وكمل )) : مايقدر يسويلج شي انتي عندي ومرتي وماله سلطة عليج.. وانتي بأمان ياأم لسان فتان..
(( ونزل راس يساسرها بإذنها )) واللي يفتـن الله يحطـه بالنـــــار......!!!!
شهد ويهها صار أحمر من قرب فهد لها وطريقة لمه لها جدام أهلها..
وقالت علشان تداري حرجها بصوت عالي شوي : يعني يكون طمنتني الحين..؟؟..!!
مو انت واهو واحد.. ويهين لعملة وحده ( وجهين لعملة واحدة )..!!
الكل ضحك على تعليق شهد..!!
بس شنهي السالفة......!!!!
محد سأل....!!
:
:
:
:
من بعد صلاة العشاء.. التمت العائلة بالحديقة عشان بيجهزون المشاوي للعشاء.. بس على مايطيح الفحم ويصير يمر ( جمر ).. كانوا ملتمين الرياييل بصوب والحريم وعيالهم بالطرف الثاني.. والسوالف كانت تنسمع من عند الطرفين.. والضحك والفرح باين في عيونهم وعلى وجوههم..
قام فهد وراح عند شهد.. وقومها يبي يتمشى معاها بروحهم.. وفهد استغل الفرصة جدام الأهل علشان ماتقدر تعارضه شهد أو تفتح حلجها بأي كلمة جارحه ضده.. واهو مو هين هالفهد..
فهد والابتسامة على ويهه وماد إيده وفارد كفه جدام شهد علشان تحط إيدها بإيده وتقوم معاه.. ويقول بصوت ناعم : الجو حلو وحرام نضيعه بالقعده.. ودي أتمشى معاج حوالين المزرعة..
شهد والصدمة على ويهها بس ماتبي تبين هالشي علشان أهلها.. وتحاول تخلي ردها يكون طبيعي : الحين العشا.. لو تخليها بعد العشا يكون أحسن..
بوخليفة داري بخبايا بنته وعارفها ليبقت تتنحش.. فحب يسد عليها الباب وقال : قومي يابوج العشا تو الناس عليه.. روحي تمشي مع ريلج ووسعوا صدوركم.. ومثل ماقال فهد الجو حلو وحرام تضيعينه بالقعدة.. ولي جهز العشا دقينا عليكم علشان تييون..
شهد حست بويهها شب نار من الحقد على فهد والاحراج من أهلها من الصوب الثاني.. وماقدرت تسوي شي غير إنها تمثل جدام أهلها وتحط إيدها بإيد فهد وتقوم توقف علشان تروح معاه تتمشى.. وماطافت عليها نظرة الانتصار بعين فهد.. وابتسامة استهزاء على طرف شفايفه.. نزلت عينها ومشت معاه..
بس ابتعدوا شوي عن الأهل.. حاولت شهد تسحب إيدها من بين قبضة إيده الكبيرة ولكن ماقدرت..
فهد وبنبرة واطية فيها من الاستهزاء : انتي ليمن الحين عندج أمل بالهروب مني..!!
شهد تمت ساكته وماردت عليه لأن دقات قلبها بدت تتسارع وتعلو من الخوف والاحراج : .................................................
فهد حس بالتخبط الداخلي اللي حاصل لها بهاللحظه.. وخفف من نبرته شويه وقال بنبرة حانية أكثر : شهد أنا ماأخذتج علشان التحدي.. إنتي تدرين أكثر من غيرج عمق المشاعر اللي أكنها لج.. بس دوم تكابرين وتعاندين من وانتي صغيرة..
شهد تحاول تفك إيدها من قبضته.. وويهها تحسه شاب ضو من الاحراج.. وإيدها بدت ترتجف من الربكة وتخبط المشاعر اللي تعتمل فصدرها..
فهد وقف جدامها وحاوط خصرها بإيده اليسار.. وفك قبضة إيده اليمين من إيدها.. ورفع ذقنها بإيده اليمين.. وقال بصوت هادي وحنون : شهوده......... شوفيني ابيج تحطين عينج بعيني.. وتوشوفيني إذا كنت اجذب عليج والل لاء..!!
شهد من بعد محاولات يائسه بالهروب من بين إيدينه.. استكانت بمكانها وتمت مغمضه عيونها.. والدموع تنساب لااراديا من بين جفونها وتبلل رومشها الطويله.. وترسم على صفحة ويهها الصافي خط من النهر الجاري.. وويهها مرسوم عليه كل ملامح للألم والعذاب.. والغربة والتشتت والضياع.. وعدم الاستقرار والخوف من المجهول.. الخوف من الوحدة..
وحتى الخوف من الأمــــــــل بالسعادة..
فهد وقف يتأمل كل هالمشاعر المرتسمه على ويهها.. وحس بالهاللحظة بشعورها باليتم مع إنها بين اهلها..
وماقدر يقاوم احساسها ورجفة جسمها اللي ياما تحمل قسوة هالبشر..
اللي من مشرط ( المبضع ) الجراح مارحمها..
واللي مارحمها من فقدها لعضو هام من جسمها..
واللي مارحمها مع إنه أقرب الناس لها من لحمها ودمها..
:
:
وبهاللحظة فقط لمها فهد بكل جوارحه ورحمها..
وبهاللحظة بثها كل الحنان والأطمئنان وماتركها..
فهد يانهر جاري ضمها بأحضانك ولبر الأمان رسي حلمها..
واحميها من كل الأفاعي وضمها..
لاتتركها بهالزمن القاسي للي مارحمها..
وعطها من حنانك ولاتحرمها..
شهد من بعد فقد الأخو أفقدت امها..
وعاشت هالزمن من بعد محنة ومعاناة يتمها..
تجاري الناس ببسمة.. ومحد عرف شي عن ألمها..
شهد طول عمرها للناس وفيه.. ولكن ولد خالتها ظلمها..
ونورية حاربت العالم لتقرن شهد بعصام ولدها وتضمها..
قامت من بعد الحادث اتجرح فيها وللأســف.. هذي أخت أمها..
وتمت شهد على صدر فهد متكومه تبكي حالها وألمها.. وفهد تم يمسح على راسها وظهرها.. ويبثها الأمان والحنان والأطمئنان..
وتمت شهد على هذا الحال أكثر من ساعة أغسلت فيها كل المشاعر اللي كانت تعتمر بصدرها.. حتى حست بنفسها خلاص ماعادت تقدر توقف على حيلها من التعب.. شالها فهد مثل الطفل الصغير بكل خفه.. ورجعها لبيت المزرعة ودخلها من الباب الثاني علشان محد يشوفهم ويخوفهم عليها بدون داعي.. وصعد لغرفتها وحطها بسريرها.. وفصخها الجوتي ( الحذاء ) اللي بريلها.. ورفع الشال عن كتفها علشان تاخذ راحتها بالنوم.. وغطاها وقعد دقايق يتأمل فيها.. وبعدين دنق عليها وباسها على راسها.. وطلع من الغرفة وسكر الليت عليها.. ونزل تحت عند الأهل علشان يقولهم يخلون شهد نايمة علشان ترتاح ..!!
:
:
ومرت الأيام جميلة على العائلة.. وشهد كل مالها تتعلق بفهد أكثر وأكثر مع انها تنفي هالأحساس في نفسها وتعاند.. لأنها تخاف من تكرار التجربة القديمة..!! بس قلبها كل ماله ويميل....................!!!!!!!!!!
:
:
:
:
:
:
وياهل ترى هل ستستطيع شهد مقاومت تلميحات وتقرب فهد لها.....؟؟
وماذا سيحدث بالمزرعة خلال هذا الأسبوع.......؟؟
وهل ستكتشف شهد الحقيقة بوظيفة فهد.......؟؟
ماهي توقعاتكم للبارت القادم
خالص المحبة والأحترام والتقدير لكم أحبتي في الله
أختكم المحبة
عذبة التجريح
|
12-02-08, 11:05 PM
جديد مواضيع قسم الارشيف
العرض العادي
