كاتب الموضوع :
عذبة التجريح
المنتدى :
الارشيف
بصباح اليوم الثاني اجتمع فهد بعمه وعيال عمه الكبار عشان يتفق معاهم على اللي يبونه.. وقالهم عن ضرورة اتمام الزواج بأسرع وقت ممكن.. عشان شهد احتمال كبير يوصلها الخبر من أيٍ كان وتعرف الحقيقة اللي مخبينها عليها.. ويفضل اتمام جميع الأمور بالمزرعة عشان ماتختلط شهد بأي غريب وتحصل على الخبر بحقيقة وظيفة فهد.. ووافقوا على هالشي جميعهم وباركو هذي الخطوة.. وكلهم امتنان لفهد على تفكيره وتدبيره للأمور.. وكلن قام وراح للي بيسويه..
:
:
انزلت شهد الصالة تحت بعد ما صحت من النوم وصلت الضحى.. وهي ماره من صوب باب الفرندة الخلفية واسمعت كلام داير مابين فهد وبو ضاري مع طلال وشاهين كانوا قاعدين بره يسولفون وفهد لمح شهد وهي نازلة من الدري بالمنظرة اللي كانت معلقه بالصالة الداخلية وانعكاس صورتها كانت واضحه لفهد من موقعه.. ويايه صوبهم واهيه اتصوخ عليهم ( تستمع أو تتجسس بالسمع عليهم )..!!
قال فهد بكل مكر وبصوت عالي شوي حتى يسمع شهد الكلام : على فكرة بوضاري أنا طول عمري كنت اتمنى إني أسوي عرس كبير وأعزم كل الأهل والمعارف والحبايب.. عرس أخلي الناس تتكلم عنه سنة.. وانت عارف إن شهد تستاهل الأفضل..
شاهين : والله حقك.. وعاد صج خاطرنا بعرس كبير..!!
بوضاري : ماكو مشكلة راح نحجز بفندق حق الحريم.. والرياييل بديوان العائلة..
فهد : أبي أطلب فرق شعبية للعرضة والفريسة.. والزفة بتكون من ديوان العائلة لين الفندق اللي بيصير فيه عرس الحريم..!!
وشهد كانت تسمع الحجي وقلبها كان يسابق الخيل من الخوف.. وإذا كان بيسون عرس يعني معناتها إنه راح يصير فيه معازيم وايد.. وناس ماتعرفهم وناس غير مرغوب فيهم.. واهي بتكون بينهم.. وتخطط براسها علشان تخرب على فهد وتنكد عليه.....
ولهت نفسها بقية اليوم.. بس ماقدرت لأن الأفكار كانت تاخذ من قوتها الكثير.. بس أذن الظهر اصعدت لغرفتها وصلت.. وتمت تدعي ربها انه يطلعها من هالمشكلة.. ويمنع زواجها من فهد..
انسدحت على سريرها وتمت تفكر وتكلم روحها :
هـــــــين يافهـــــــــــــــيد إن ماخربت عليك وناستــــــــك وحلمـــــــــــــــــك ماكون شهـــــــــــــد الــ..........!!
وخاطرك بالعرس.. وأنا راح أحرمك منه.. وأحرق قلبك..
تبي تاخذني بالغصب ولويت لي ذراعي عن طرق ابوي..
وأنـــــــــــــــــــــــا بلوي لك أرقـبـتــــــــــــــــك بطريقتي الخاصة
هــــــــــــــــــــــين وشوف شللي بيييك منـــــــــــــــــــي.......
انا لازم اطلع خطة عشان مايسون العرس..
انا مافيني اقابل ناس ويطالعوني طول الوقت ويتهامسون علي..
والعرس يعني وايد معازيم.. اللي يسوى واللي مايسوى راح يحضر..!!
وتكــون خـالتـي نـوريـــة معـاهــم...لاااااااااااااااا..
لا يمكن يارب ساعدني يارب انا اسألك وأتوسل إليك.. واطلب رجاك كون معاي ولا تكون ضدي.. اللهم آمين..
:
:
إيــــــــه.. لقيتها عرفت بشنو راح اتحجج عشان مايسون العرس..
وصبرك علي يافهد الزفت انا لك بالمرصاد..
ههههههههههههههههههههههههههه
واستعد للحرب من الحين ياولد عمي.. وبتشوف شهد شراح تسوي عشان تخليك انت بنفسك تعافي الزواج وتقول يالله نفسي..
:
:
:
:
وبعد صلاة العشاء وبالصالة الكبيرة
شهد نزلت وراحت عند أبوها وبراسها مخطط التخريبي واللي قعدت فترة الظهيرة كلها تخطط فيه عشان تحرق قلب فهد..
الكل كان جالس وحاضر من أبوها وأخوانها وفهد.. واهي تأكدت من حضور الأخير.. لازم يكون حاضر لأنها بتحرق قلبه مثل ماحرق قلبها.. وبتخرب عليه كل مايتمنى..!!
شهد وبصوت واطي متردد : السلام عليكم..
الجميع : وعليكم السلام ورحمة الله وبركاته..
وراحت شهد عند أبوها وقعدها يمه.. وأهي تكلمه بصوت مهزوز بس تحاول تخليه مسموع : يُبـ...ـه..
بوخليفة : هلا يُبه خيــر..!!
شهد بصوت واطي بس مسموع وصوت دقات قلبها هم مسموع من شكلها : يُبـ....ـه اااانـ...ـااااا..
واسكتت شوي ابلعت ريجها وطالعت صوب فهد وشافت عيونه منصبه عليها.. وهالشي عطاها دافع أكبر وكملت وهي تطالع أبوها وبدفعه وحده قالت جملتها وبسرعة : انا عندي شرط على قبول الزواج..
بوخليفة والدهشة مرسومه على ويهه : خير يابوج وشنهو شرطج..؟؟!!!!!!!!!!!!!!
شهد بلعت ريجها مرة ثانية وعلت صوتها شوي : إاااذاااا تبونـ...ـي أااااواااافـ...ـق..
ونفس الشي تكلمت بدفعه وحده وبسرعة : ماأبيكم تسون أي عرس للحريم أو حفلة وحتى للملجة مابي أسوي أي حفلة..!!
بوخليفة عصب شوي لأنه عرف شللي يدور براس بنته وصوته ارتفع شويه : وليش عاد.. قاعدين بعزا لاسمح الله..؟؟؟!!!!
شهد وارتجفت من الخوف بس اصرت بعناد وقالت بدفعه وحده : يُبه هذا شرطي وماراح أتنازل عنه..!!
بوخليفة واهوه مستغرب طـالع فهد.. مثل اللي يستفسر شللي يسوي..!!
لأنه عارف شهد بس تيبس راسها تخرب كل شي بنوه..
ورد عليه فهد وعيونه بعيون شهد بكل برودة اعصاب : مو مشكلة يُبه واللي تآمر فيه شهد احنا حاضرين.. يّــهه غــــالي والطلب رخيص..
وسكت فهد شوي وعينه لازالت بعين شهد وفيها كل التحدي وتلمع بكل غرابة ويسألها : بس ماراح تغيرين رأيج عقب..!! تهونين وبالأخير تقولين غيرت رايي وأبي أسوي عرس..؟؟!!
شهد بكل عناد واصرار : ولا بأي حال من الأحوال.. العرس رافضته وماله داعي هالمصاريف.. وكلمتي لايمكن اتنازل عنها..
بوخليفة وهو ماسك نفسه لايهد عليها ويعصب : انزين العرس وآمنا بالله.. والملجة ليش ماتبين تسوين حفلة..!!
شهد بترجي ودموعها على طرف عيونها : يُبــه الله يخليك الحفلة يعني فيها ناس غرب وأنت عارف أني..... ( وسكتت ماهي عارفه شلون تبرر موقفها وكملت ) : ماأبي..!!
بوخليفة واعصابه بدت تحمى : وليش ماتبين عطيني سبب مقنع.. وشنقول حق الناس.. قّلوْا ( رموا ) بنتهم وتخلصوا منها..!!
شهد وجهها صار أحمر ودموعها بدت تنزل : انا ماأبي أقابل أي أحد.. وإذا بتسون حفلة أو عرس ماراح أحضر.. لأني مابي الناس.. ( وبدى صوتها يعلى ).. ماااااااابي أحد..
وقعدت تبجي وترجف من القهر.. واشلون أبوها موراضي يفهمها ويوافقها بالراي..!!
بوحمد حس بمعاناة شهد وباللي تقصده.. وحب يهدي الوضع قالها بكل هدوء : انزين إذا سوينا حفلة الملجة صغيرة وملمومة.. بس بينا وبين بعض.. يعني إحنا أخوانج بس وحريمنا وعيالنا..!!
شهد بخضوع وبصوت واطي واهي تمسح دموعها : إذا جذي ماعندي مانع..
وارفعت صوتها بتهديد وكملت وقالت : بس بدون مصاريف وطقطقة وهالخرابيط..!!
فهد حب يضرب ضربته وقال يوجه الكلام لعمه وعينه لازالت على شهد.. وبنظرة فيها من التحدي مع ابتسامة ارفعت ضغط شهد.. مع إن قلبه ينعصر واهو يشوفها شلون تبجي وترفض مقابلة الناس.. وببروده المعتاد ولا كأنه محترق من قرار شهد..
فهد : ياعمي إذا شهد ماتبي العرس وحفلة للملجة عيل ماله داعي نأخر الزواج.. ونخلي الملجة والزواج بنفس الليلة اللابلة ( بعد بكره ) إن شاء الله..
شهد اشهقت وقلبها انتفض واصرخت : لااااااااااااااااء.. زواج لاااااااااااااء...!!!!!
وحست على روحها وحبت تنقذ الموقف وهي ماتدري عن تخطيطهم.. وكملت بصوت اوطى شويه : ماأقدر يايُبه ماكو وقت عقب يومين..
فهد بتحدي : ليـــــــــــــــــش ماكو وقت.. وأنا اللي أعرفه إن الناس يسون العرس ويأخرون فيه لأنهم ياخذون وقت على مايدوّرون لهم سكن ويأثثونه وعقب مايجهزون هالشي.. تبدي العروس تفصل نفنوف للعرس وأنتي ماتبين أي عرس أو حفلة على قولتج..!!
وكمل فهد يوجه كلامه لعمه : وأنا ياعمي ومثل ماأنت عارف.. بيتي كبير وجاهز.. ومأثث كله من مجاميعه ويديد.. وهو جاهز للسكن.. وشهد تقدر بعدين تغير اللي مايعجبها..!!
بوخليفة وعيونه تلمع من طريقة تفكير فهد ورده اللي يفحم فيه شهد وكابت ضحكته لإنه عارف بنوايا بنته : خلاص عيل يابوك.. مثل ماقلت عيــــن العقل.. وخير البر عاجله..
شهد وعيونها اطلعت من مكانها من الخوف : لااااااااااااااااااااا.. مايصير يايُبه.. اشلون تبيني اتزوج.. وأنا لازم أتجهز وأنت مثل مانت عارف إحنا قاعدين بالمزرعة.. وبقى لنا أكثر من ثلاث اسابيع تقريبا على ماننزل الديرة.. يعني لازم آخذ وقتي في التجهيز والتسوق.. وإلا ماتبيني اتجهز..؟؟..
طلال وهو ماسك ضحكته رد عليها وقال : بس اللي نعرفه كلنا انج ماتحبين تروحين السوق وكل اللي تبينه دوم تطلبينه من منى..!!
شهد بتحدي : هذا مومعناته اني ما اتجهز..!!
فهد وهو يسد كل الطرق على شهد وبكل ثقة : ماحاجه لكل هالشكليات.. عمي أنا عندي أقتراح أفضل دام إن شهد ماتبي أي عرس أو حفلة.. على الأقل حفلة للملجة تكون عائلية صغيرة اهني بالمزرعة ومابينا وماعندنا أي غريب.. وعقب أسبوعين تقريباً ننزل أنا وشهد الديرة.. علشان نجهز حق السفر لشهر العسل ومنها بنطل على أمي.. ومن بره تقدر تشتري اللي تبي.. يعني مالها لزمه كل هالطواله.. وعقب باجر خالد بييب الملا اهني علشان نملج.. وشهد إذا بخاطرها تتشرى أي شي أنا مستعد مع طلال نوديها باجر وماعندي أي مانع لو تفتر على جميع الأسواق والمولات طول اليوم.. وناخذ معانا منى إن بغت.. وبالنسبة لحفلة الملجة فهي عائلية ومحفوفه ومافيها أي غريب.. وشهد ماتبي على قولتها أي مصاريف وطقطقة وخرابيط..!!
بوخليفة وبصوت واضح ومايقبل الناقش أو التنازل : خلاص يابوك كل شي محلول وماكو أي مشكلة.. الـلابـلـة المـلـجـة وعقب اسبوعيــن بيتم الـزوااااااج إن شاء الله..
شهد توهقت ووقفت متصنمة من الموقف اللي حطها فهد فيه..
بغتها طرب صارت نشب..
وانقلب السحر على الساحر..
هههههههه..
عين شهد مازالت تلمع بالخوف والغضب والكره اللي زاد على فهد.. وقلبها يسابق الخيول بسرعة نبضها وصوته اعلى من قرع الطبول.. وفهد بنظرة المنتصر والتحدي بإنها تتجرئ وترفض أو تعارض حتى ماتقدر..
فهد كان متعمد بللي سواه عشان يقرب موعد زواجه من شهد.. وبهالطريقة نجح وكسر راس شهد.. وهو بالأساس خايف إن شهد تدري عن وظيفته وبالتالي مافي أي أمل إنه يتزوجها.. ويكون قريب منها كل مااحتاجته.. واهو كان متفق مع عمه واخوانها على هذا الشي..!!
فهد يكلم نفسه :
إيــــه ياشهود الحين اضمن باني راح اتزوجج بسرعة.. وماأخلي لج أي فرصة للتراجع والرفض.. بس آآآه ه ه ه.. متى بيي عقب باجر ويتم العقد اللي راح يربطنا للأبد.. وتكونين معاي طول العمر.. أأأأأأخخخخخخ ياشوقي لج ياقطوتي المتمردة..!!
شهد تكلم نفسها :
هيــــن يافهد الزفت.. أكرهك كره العمى.. وإن ماراويتك شغل اللعانة والنذاله.. والله لزهقك فعيشتك.. واكسر هالغرور اللي براسك.. على بالك أنا سهله وبسرعة بيلين راسي.. بـــــس هـيِِــــن يالنحيس.. عيل أنا تحطني بهالموقف السخيف يالسخيف.. وتحرجني جدام أبوي وأخواني وتحكرني وتشل حركتي ومقاومتي.......!!!!!
اللـــــــــــــــــــــــه يســـــــــــــــــــتر مـــــن اللــــــــــــــــــــــــــي بيصــــــــــــــــــــــــير
!!!!!!!!!!
:
:
:
:
وعلى صبيحت اليوم الثاني
وقبل الملجة بيوم..
شهد ارفضت تنزل مع فهد ومنى وخالد الديرة عشان تشتري لها شيء من السوق للملجة.. وفهد ماعارض وسكت عنها وطنشها.. ونزل الديرة مع خالد أخوه ومنى.. وكانوا العصابة الصغيرة متفقين على هالشي.. علشان المفاجأة اللي بيسوونها ليوم الملجة..
وبعدها كل شباب العائلة اللي قدر يحدر الديرة بس عشان ياخذون ملابس حق الحفلة اللي بيسونها.. واللي ماقدر ينزل الديرة.. وصى غيره على الشي اللي يبيه..
:
:
الساعة 11 الصبح
شهد : يُمه منى ماقالت لج شي..؟؟
أم خليفة : شي.... مثل شنو..؟؟
شهد : يعني المدام نازله مع ريلها الديرة اشحقه..!! وتاركه اعيالها اهني معانا.. وخصوصاً نواري الحنانة ماتسكت إلا بحضن أمها..؟؟!!
أم خليفة : أهم مابيباتون اهناك.. منى قالت تبي تييب لها جمن غرض حق اليهال من بيتها وبترد.. يعني مو بمبطين إن شاء الله..
مشاعل توجه كلامها لعمتها شهد: عمتي انتي ليش رافضة تسوين العرس..!! والله حرام خاطرنا نفرح وخصوصاً إنه بيكون عرسج مع عمي فهد..؟؟!!
شهد بقلبها ووع والكوبه بفهد..
شهد : أنا ماأبي عرس ولا حفلة.. أنتو كيفكم بتهيصون واترقصون.. طلعوا ينونكم كله اهني بالمزرعة.. بين بعضنا عادي ماراح أمانع.. بس عرس وربكة والناس اتيي واتطمش هذا الشي اللي ماأبيه..!!
مشاعل : انزين وإذا حطينا اهني مسجلة وغناوي عيل مابتعارضين..؟؟
شهد لينت صوتها عشان ماتصير جافه مع اهلها وقالت : لا ياحبيبتي أنتوا أهلي وفرحكم من فرحي بس الغرب ماأبيهم ولا راح ارتاح معاهم..
عواطف مرت محمد : أهم شي الله يتتم عليكم بالخير ويسعدكم.. والفرحة بالقلب أكبر من العرس ياعمه..
مريم مرت ناصر : إي والله.. بس عمتي اشرايج انزينج ونحطلج مكياج ونسرح شعرج باجر..؟؟
مشاعل : إي والله خوش فكرة عمتي الله يخليج.. خليني اطبق عليج اللي خذيته بالدورة.. صدقيني راح اخليج ولاأحلى عروسة بالكون.. وأنتي ماشاء الله عليج من غير شي تهبلين.. الله يخليج عمه وافقي..!!
شهد بسرعة ردت : لاااااااااااااا.. أنا مابي هالخرابيط وأصلاً حتى ملابس ماعندي للحفلات.. عشان جذيه بتصير مثل تجمع عائلي ومايحتاي نسوي الهوايل ونتلبس ولا راح ألبس غير الثياب اللي يايبتهم معاي.. بس خلونا نمشيها مسجل وغناوي ورقص مابينا فقط..
وتكمل شهد بقلبها وتقول : هذا اللي ناقص بعد.. فهود يتزوجني غصبن عني.. وأقعد اتزين له واصير له مثل العروس.. والله ماأهنيك يافهد المغرور..!!
عائشة أم حمد : ليش الله يهديج ياشهد..؟؟ المفروض إنتي عروس.. وهالشي اللي تسوينه يزعل عمي وفهد وعلى ماأظن حتى أخوانج موبراضين.. والله حرام الوحدة فينا تحلم وتنتظر هاليوم بس عشان تفرح فيه وتفرح والدينها وأهلها.. وأنتي حرمتي هالشي عن نفسج وأهلج...!!!
شهد : ياأم حمد.. مو كافي إني مغصوبه على هالزواج.. وتبيني أمثل إني مستانسة وأصير مطنزة للي يسوى واللي مايسوى..؟؟
أم حمد : وليش مغصوبة ياشهد....؟؟ صدقيني ماراح تلقين أحد أحن عليج من فهد ولد عمج.. وإنتي الله يهديج اشوي عصبية.. صدقيني فكري بالموضوع عدل وراح تعرفين إنج غلطانة بحكمج على فهد..
شهد وهي تحاول تداري بالموضوع عشان امها : أنا ماقلت عن فهد إنه شين.. لاااااا.. بس ماني متزوجة أنا جذي مرتاحه.. ويكفي تجربة وحدة بحياتي وخلتني اكره شي اسمه عرس وزواج.. وبعدين فهد دومه يناجرني ويغايضني وانا ما استحمل.. يعني بتم جذي طول عمري وياه....؟؟ والله قهر..
أم خليفة : والله يُمه فهد من محبته لج يناجرج يوم يشوفك كله معارضة ومعصبة ولسانج طويل عليه.. خفي اشوي على الريال.. واهو بيخف عليج وماراح يلعوزج ويطفرج..!!
اضحكوا الجميع ومر اليوم هادي وبسلام على شهد والجميع
:
:
بالليل الساعة 11:30
وصلوا العصابة الصغيرة.. فهد ومعاه منى وخالد وكانوا محملين بالجياس والكراتين.. وراحوا سيدة يخشون أغراضهم ومفاجأتهم عن شهد.. وانزلوا عند البقية اللي وصلوا عشان يخططون لباجر واشراح يسون.. دام إن شهد راقدة بهالحزة.. وهم مودارين عن الصراع اللي داير براس شهد ونفسها..!!
:
:
:
:
هل ستتم ملجة فهــــد على شهـــــد.........؟؟
تهقون شهد شراح تسوي.......!!
:
:
بنتظار توقعاتكم للبارت الجاي
ولاتحرموني من تفاعلكم وتواصلكم
ولكم خالص محبتي واحترامي
أختكم المحبة
عذبة التجريح
|
30-01-08, 12:05 AM
جديد مواضيع قسم الارشيف
العرض العادي
