منتديات ليلاس - ترويض المتمردة

تذكير بما حصل بنهاية الجزء السابق

طلعت شهد تتمشى بالحديقة وكانت لافه جسمها كالمعتاد بالشال الهندي الكشميري الطويل.. وشعرها الناعم الغجري مفلول ومتمرد على طول ظهرها وكتوفها.. وبعض الخصلات طايحة على وجها الملائكي.. وهي تحبه مفلول كطبيعتها ماتحب التقيد.. تحب الحرية والإنطلاق والتمرد بكل شيء وعلى أي شيء.. وهذا طبعها من صغرتها..
قعدت على كرسي الطويل بالحديقة مجابلة النافورة وهي سرحانه.. والشمس أرتفعت بالسما وكانت باردة.. وبإيدها كوب النيسكافيه ترشف منه.. وتتنطع بطعم مرارته كمرارة أيامها وقسوة سنينها.. وتفكر بعمرها اللي قام يعدي ويركض.. وبعد ثلاثة أشهر بيصير عمرها 29 سنة وهي بدنيتها وحيدة.. ومن تقاعدت حتى صديقاتها اهجرتهم بسبت حالتها النفسية.. واللي محد كان يستحملها غير أهلها اللي عارفين بمقدار الألم والغربة اللي تحس فيها..!!

وخرجت تنهيدة الآآآآآآه والألم من جوفها.. ودمعة شارده اهربت من عينها.. انزلت وسالت على خدها الحرير.. وكان منظرها لوحة فنيه حزينة ورائعة بنفس الوقت واسحرت قلب اللي قاعد يناظرها بدون علمها..!! ورجفت عضلة قلبه وزاد النبض فيه.. وصرخت جوارحه كلها بحب وعشق بنت عمه.. تقرب منها وهيه موحاسة فيه.. وقعد على يسارها بالكرسي الطويل وقريب منها..
وقال بصوت هامس حنون يوصل لها : الدنيا ماتسوى نذبح نفسنا عليها ياشهد.. وربج يعطي كلن رزقه بهالدنيا.. والإنسان ماعليه إلا انه يحمد ربه بالشدة والرخاء.. وبالصحة والمرض ويتوكل عليه.. ولاييأس من رحمته سبحانه..!!

شهد وهي سرحانه وسمعت كلامه تنهدت.. وبعدين استوعبت من اللي قاعد يمها ويكلمها..
لفت راسها عليه وهي تقول بهمس مسموع : الحمد لله على كل حال..
وبلحظة انقلب مزاجها المتمرد وقالت بصوت أعلى شوي : أنت ماتعرف تخلي الواحد يقعد بروحه..!! يعني لازم تلاحقني بكل مكان وتناجرني...؟؟!!

فهد : بُــــلْ.. توج شحليلاتج أمداج قلبتي يالقطوه..!!

وطبعا فهد أنسحر بتغير لون عيونها بلحظة.. بحسب مزاجها من الأصفر العسلي الفاتح إلى لون غريب وجميل يدخل معاه اللون الأخضر.. وضحك حتى يغيضها وكمل : ههههههههههههه.. وصج من سميتج القطوه.. حتى عيونج تقولب بلونها نفس القطاوه..!! (( وقام قلد صوت القطوه بس عشان يغيضها )) مِـيَــــاووووْ وهو يقولها كان يطل بويهها.. ويضحك عليها..

شهد بكل ترفع وغرور ردت : الحمد لله والشكر.. الطول طول نخلة.. والعقل عقلـ......

وقبل لا تكمل كلامها فهد فتح عينه عليها بنظرة تهديد.. ومسكها من ايدها وقال : حطي بالج زين.. وقرب وجهه من وجهها وهو يقول لها بالهمس وبتهديد : تأدبي وأنتي تحاجين ريليج
يالقطوه المتوحشة.. وإلا ترى لسانج بقصه لج يالحلوه..

شهد منصدمة بكلام ولد عمها.. وتحاول تسحب ايدها من ايده بس طبعا وهو شدد عليها.. وتم ماسكها وهو مقرب من وجهها.. ويطالع كل مايختلج بعينها وبكيانها من غضب وخوف واحراج.. وكان نبضها يسابق الخيول بهاللحظة.. وبدت تحس بالدوخه والدوار.. لأنها مو ماكله شي من أول أمس.. وزاد عليه الأضطراب من قرب فهد لها.. والحمد لله إن كوب القهوه اللي بإيدها كان فيه شوية قهوة وبردت.. طاح الكوب من إيدها وهي توقف على حيلها وتناثرت القهوة على ثيابها.. وزادت عليها الدوخه وترنحت بوقفتها مسكها فهد بسرعة وسندها عشان ماتطيح.. وقام شالها بسرعة ودخلها داخل وسدحها على الجلسة اللي بالصالة الكبيرة.. ومسك إيدها من الرسغ عشان يشوف نبضها.. وكان حاط عينه على حركة صدرها عشان يشوف تنفسها.. وطبعا كل هالأشياء ماانتبهت عليها شهد.. وعرف انه عندها هبوط وضعف عام من الرجفه.. وعدم الأكل لأكثر من 24 ساعة.. وقام المطبخ بسرعة يجيب لها أي نوع من العصاير علشان لايغمى عليها.. وبالمطبخ صادف منى وقالها تطلعله أي شيء حالي.. حتى لو قطعة كاكاو حق شهد وعطته الكاكاو.. مع بطل الماي ورجع لشهد.. وخلاها تاكله وشربها الماي..

وبعد ربع ساعة صارت أحسن.. قامت بتطلع غرفتها مسكها فهد من إيدها وقال لها بحزم : وين رايحة..؟؟!! خلج الحين منى بتييب الريوق وقعدي تريقي عدل.. وبعدين أنحاشي وين ماتبين..!!

سكتت عنه شهد وماردت عليه لين حطت أختها منى الريوق.. ومع إنها مو من أنصار الريوق من فير الله.. بس من شمت ريحة الخبز المحمص ومعدتها قامت تحن وتعزف الألحان من اليوع.. ومن سمع فهد صوت معدتها وهو ومنى أنفجروا بالضحك عليها.. وطبعاً شهد صار وجهها طماطة من الفشيلة والأحراج.. بس اليوع مايرحم.. أكلت لمن أشبعت واحمدت الله وشكرت اختها منى وقامت بتطلع فوق..

وفهد يتحلطم بصوت عالي : الحين أنا المتعني اللي شلتها ووكلتها وشربتها.. حتى كلمت مشكور مافيه...!!!
يالله معليه كله يهون في سبيل العيون الذباحة..!!

طنشته شهد وكملت لين غرفتها.. وانسدحت ونامت مرة ثانية..

:
:
:
:

الجـزء الرابـ 4 ـع

يوم الجمعة.. ثاني يوم بالمزرعة

الساعة 12:30 الظهر

نزلت شهد بعد ماخلصت الصلاة وقرأة سورة الكهف.. وراحت تدور على أمها.. لأنها قامت ومزاجها معتفس على اللي صار لها بآخر 24 ساعة.. وكان عندها صداع.. وهي متعوده من عقب الحادث كل ماحست بالصداع تاخذ لها خلطة زيوت مثل زيت ( السمسم ، واللوز ، وزيت الزيتون ، .... الخ ).. وتحطهم في بادية صغيرة وتاخذه سيده لأمها طيبة.. وتقعد تحت عند ريلها علشان تدلك لها أمها راسها بخلطة الزيوت.. وعقبها تحس بالراحة ويفتج الصداع عنها ويخف عليها.....
( وهذا الشيء مجرب وحقيقة )..

أم خليفة كانت طالعة تتمشى مع أم حمد وأم ضاري بالمزرعة.. و شافتها هيا أم ناصر مرت أخوها سعود.. وقالت لها أنا أدلك لج راسج.. وقعدت شهد عند ريل أم ناصر وصارت تدلك لها راسها بخلطة الزيوت.. وصارت تسويلها مساج على فروة راسها لأكثر من نصف ساعة.. لين حست شهد بالراحة وافتج الصداع عنها.. باست شهد أم ناصر على خدها واشكرتها..

شهد بالأساس تحترم جميع حريم أخوانها الكبار( أم حمد ، وأم ناصر ، وأم ضاري ).. واهمه
همن يحبونها ويعاملونها معاملة بنتهم أو أختهم الصغيرة..

طلعت شهد مع أم ناصر تحت المظلة بالحديقة.. وقعدوا يشربون الشاي ويسولفون وانضمت وياهم منى وعقب يَوا مريم ومشاعل ونورة بنات أخوانها خليفة وسعود.. وصاروا يسولفون ويضحكون..
لين الساعة 2:30 بعد الظهر.. قامت شهد ودخلت داخل بتروح فوق لغرفتها تبي تدخل الحمام وانتوا بكرامة عشان تستحم وتغسل راسها من الزيت..

وبدربها داخل الصالة شافت أبوها قاعد مع أخوانها الكبار خليفة وسعود وناصر وطلال ومعاهم
ولد عمها وفهد..

ناداها أبوها وقعدها يمه وسألها : ها اشلونج الحين يُبه إن شاء الله أحسن وبخير..؟؟

ردت عليه بهزه من راسها علامة النعم..

وكانت بتقوم تستئذن علشان بتغسل راسها من الزيت.. بس أبوها قالها : صبري يُبه أبي أكلمج بموضوع جدام أخوانج..!!

وقام فهد من مكانه بيطلع من الصالة.. بس عمه بوخليفة وقفه وقاله : رد بمكانك يافهد انت واحد من عيالي.. والموضوع يخصك انت بعد..

رجع فهد وقعد بمكانه وهو ساكت وكان عارف بالموضوع اللي عمه راح يفاتح شهد فيه.. وبصراحه كان متضايق وماكان يبي يحرج شهد بوجوده في مناقشة هالأمر.. ولكن كلام عمه لازم يسمعه..

هنيه حست شهد بشي مخطط ومدبر ضدها.. وخفق قلبها وانتفض من يت عينها بعين فهد..
تمت ساكته تنطر القنبلة اللي بيفجرها أبوها بوجهها.. وقلبها زاد خفقانه وجسمها قام يرجف من الخوف..وكانت تتسائل بنفسها : اهيه ليش تحس بهالأحساس الغريب لما فهد يكون موجود..!!

وبو خليفة حب يفاتحها بالموضوع جدام أخوانها عشان يساندونه بالكلام.. ويخلون شهد مالها أي حجة للرفض..

وقال بوخليفة بصوت هادي علشان مايخليها تنفعل : يابوج البارح فهد ولد عمج طلب ايدج مني.. وأنتي مثل منتي عارفه إن هذه رغبتي ورغبة كل أخوانج.. والأهم إنها وصية عمج أحمد رحمة الله عليه.......
وتم ساكت شوي.. وشهد زاد ارتجاف جسمها وغورقت عيونها.. وحست بالوحدة واليتم بهاللحظة.. مع انها قاعدة بين أبوها وأخوانها..

وكمل بوخليفة بنفس النبره الهادية : وولد عمج شاريج ويبغيج.. وأنتي مالج غنى عنه وهو ماله غنى عنج يابوج..

شهد وهي منحرجه من أبوها وأخوانها.. وبصوت متهدج : يُبه الله يخليك مو وقته الحجي هذا.. ممكن تأجله شوي...؟؟
أنا تعبانه معاي صداع وبروح أرتاح..!!

بوخليفة رحم حالها من شافها وشلون جسمها يرجف.. بس قال لها بإصرار بعد ماداس على قلبه : انا ابغيج تفكرين بالموضوع يابنتي زين.. وخذي وقتج حبيبتي.. وكل الأمور بتصير بخير إن شاء الله..

قامت شهد حبت راس أبوها.. ودموعها بدت تنزل ولفت بتطلع من الصالة.. ومن يت عينها بعين فهد.. شافت نظرة غريبة بعيونه.. وعيونه كانت تلمع بطريقة عجيبة.. نظره ماعرفت شلون تترجمها عدل..!!

رمت عليه نظرة كلها كره وغضب وطلعت ركض وصعدت لغرفتها.. دخلت الحمام وانتوا بكرامة.. وخذت لها شور طويل بماي دافئ.. وطلعت بدلت وصلت العصر.. وكانت خدامتها نور موجوده عشان تساعدها.. وتنشف لها شعرها وشهد اقعدت تحلل الأمور بعقلها وقلبها يسابق الخيول بالخفقان..!!

انا من شفت هالفهد وانا حاسه إن قلبي منقبض..!!
واللحين عرفت ليش كان يكلمني بهالطريقة والأسلوب..!!
ولااااا حضرته بيتزوجني واهو واثق من نفسه..!!

والمشكلة إن أبوي قال : فكري بالموضوع يابنتي زين.. وخذي وقتج حبيبتي.. وكل الأمور بتصير بخير إن شاء الله..!!
يعني ماقال إذا وافقتي أو لأ....!!!

وشيقصد أبوي من هالكلام....؟؟

وحتى ماقالي صلي استخارة..!!

ولاااا.. فوق كل هذا قام يذكرني بوصية عمي أحمد..!!
يعني شنو..!! أنا ملزمة بتنفيذ هالوصية..؟؟!! رضيت وإلا انرضيت..؟؟؟

أأأأأأأأأوووووفففففففففف...
الله يستر أبوي شكله بيجبرني على هالزواج....!!

وفهيد شلون كان يطالعني...!!
كانت عيونه فيها نظرة تحدي وانتصار وشماته....!!

لااااااا.. لاااااا.. لااااااااا.. لاااااااااااااا..
لايمكن.. لايمكن آخذ المينون فهيدان..
واحنا من عمرنا كله اهواش بهواش
صج قلبي يميل له وشكله حلو ووسيم.....
بس لاااااء.. لااااا يمكن..
يخسى إلا هو... أنا اصير زوجة هالمينون..!! وهو 24 ساعة يهددني
إنه بيروضني...!!!

يعني شنو بيروضني...؟؟؟!!
يعني بيكسر راسي وبيخليني أخضع له....؟؟
لايكون مصدق نفسه هذا بعد...!!

لاااااااااااااااااااااا.. لايمكن مستحـيل..

ماراح اكرر مأساتي مره ثانية..
تجربة وحده تكفي بتحطيم حياتي..
ماني مستعده اعيش نفس المأساة وأكرر الخطأ مرة ثانية..

انا لازم أرفض بكل اصرار.. وما اتنازل عن موقفي..
والأدهى والأمر حق منو ألجأ.. وكل أخواني بيكونون مع أبوي وفهد..
ياربي ماني عارفه واشلون ادبر نفسي.. وارفض هالزواج المسخرة..

والمشكلة حتى خوال مثل الأوادم ماعندي..!!
ماعندي غير خالتي نورية.. وهذي مستحيل ألجأ لها عقب اللي استوى من تحت راسها..

لااااااا.. انا على حق وأقدر ادبر أموري بنفسي..!!
وبعدين الزواج موبالغصيبة.. احنا وين قاعدين بالعصر الحجري والا الجاهلي..!!

إن ماخليتك يافهيدان تعافي عمرك وهالزواج.. ماكون انا شهد الـ........!!
والله لاوريك الأدب على أصوله.....
وأخليك تنحاش وترفض الزواج...
هـــــــــــــــــــيــــــــــــــــن
يافــــــــــــــــهــــــــــــــــــــد

وعلى هذه الأفكار اللي تضرب وتعصف براس المتمردة شهد...
وتهديدها بالويل والوعيد لفهد..

الله يستررررررررررررر..

وتمت شهد تفكر طول الوقت على هالحال.. ومن خلصت نور الخدامة من تجفيف شعر شهد.. وقرضت لها أظافر إيدها.. لأنها عاجزة عن فعل هذا الأمر.. وطلعت خدامتها من الغرفة.. وراحت شهد وانسدحت على سريرها وتفكر بالمصيبة اللي أهيه فيها..

وتمت على حالها وسرحت بخيالها لين ما وصلت بذكرياتها يوم كان عمرها سبع أو ثمان اسنين.. وهني كان فهد خلص من الثانوية العامة.. وكان يجهز عمره للسفر عشان يكمل تعليمه بأمريكا.. وشهد كانت صغيرة وكانت متعلقة بفهد لأقصى درجة.. ومن درت إنه بيسافر للخارج وانها ماراح تشوفه مرة ثانية.. طاحت مريضة عليهم.. وكانت تتذكر ذيك الأيام عدل.. وشلون فهد ياها بيطيب خاطرها.. وخذاها مع طلال وطلعوا فيها بالسيارة يفترون فيها.. وتموا بره البيت لوقت كان حزتها حيل متأخر.. وبذيك الأيام ماكان في شيء اسمه موبايل.. وأمها من الخوف عليها لأنهم بطوا وايد بالردة.. دقت خبرت أبوها وأخوانها الكبار.. وتذكرت حزتها حتى عمها أحمد الله يرحمه كان موجود.. ومن اوصلوا البيت تذكر بأن الزف صار كله على راس فهد وطلال.. واهيه اللي كانت مأخرتهم عن الردة بس مهما كان ولأنها صغيرة.. فالكبار ياخذون الزف واللوم كله.. وقبل لاتدخل عشان يحممونها وتنام.. ناداها فهد وراحت له وكان خاش ورى ظهره شي.. وقال لها عندي مفاجأة لج.. وراحت انقزت عليه تبي تعرف شنهي المفاجأة.. وقام طلع لها لعبة ( عروسة ) حبتها وايد وسمتها لولو واهي ليمن اللحين محتفظه فيها..

وتمت شهد عايشة بهالذكريات ليمن غفت عينها ونامت واهي ماتدري شللي مخبي لها القدر..!!

:: ::
:: ::
:: ::
:: ::

يـتـبـــــــــــع

وبعد خمس أيام بالمزرعة
الساعة 3 بعد العصر

والعائلة مجتمعة على الغداء بالحديقة.. وكانوا مسوين المشاوي والمندي....
طبعاً كلنا عارفين إن شهد غرامها الطعام البحري بجميع أنواعه
وعشقها الكبير للقباقب (( سلطعون أو كابوريا )) والربيان (( جمبري أو قريدس ))..
وفوق كل هذا تموت على شي إسمه بطــــــــــــــــــــاط خصوصاً إذا كان مشوي أو مخبوز بالفرن..

ياعيني...... هههههههه قمت أبولع بريجي

كانت شهد قاعدة مع الكل بالحديقة مشاركة بوجودها فقط.. ولكن بالأكل مامنها رجا ابدا..
وكانت قاعدة الحصيرة المفروش على الثيل بقرب طاولات الحديقة.. وفارشين على الحصيرة سماط ( السفرة ) عشان اليهال.. ومجمعه عيال أخوانها وأحفادهم حواليها.. وتوزع عليهم السندويتشات اللي مسوينها لهم وتسولف معاهم.. والعيال كلهم يحبون عمتهم شهد.. وكلن يحاول يكسب رضاها..

بس من أقرب واحد لقلبها وهي قريبة له.. ( فهد ولد أخوها طلال ).. كان قاعد ولازق يمها.. وما كان يرضى أي أحد من اليهال يلزق فيها غيره..!!

فهود : عميمة..

شهد : ياروح عميمة..!!

فهود : كل واحد جم صمونه ياكل علشان يصير بطل..؟؟

شهد : كل واحد ياكل على قد بطنه حبيبي.. ومو زين الواحد ياكل أكثر من بطنه..

فهود : بس أمي تقول اللي ياكل وايد بسرعة يكبر ويصير بطل وقوي..

شهد : لأ ماما مو الأكل الوايد يخلي الواحد قوي.. الأكل المعتدل والمفيد..

فهود : يعني اشلون عمة..؟؟

شهد : يعني تاكل على قد بطنك مو أكثر.. وتنوع بالأكل الزين.. مثل الفاكهة والخضراوات مثل السلطة.. واللحوم والسمك والدجاج.. واهم شي تشرب الحليب.. وتاكل من كل شي مفيد.. والأهم انك ماتكثر من اكل الحلو والكاكاو..

هههههههه.. قولي حق نفسج يالفهيمة.. وانتِ حتى الأكل عايفته..!!

فهود : انزين انا ماشفتج تاكلين ويانا على الغدا ليش..!!

شهد : ههههههههههه.. ومسوي علي محقق مع ويهك..!!
لا حبيبي انا باكل بعدين لأني ماني يوعانه الحين..

فاطمة بنت طلال تكلم طيبة بنت حمد : ثفتي عمة ثهد.. تقول موذين تاكلين وايد يالدبه..
( شفتي عمة شهد تقول موزين تاكلين وايد يالدبه )

طيبة بنت حمد ترد عليها بحمق : أنا دبه ياعثلة.. أنا اكل وايد عثان اتقج وماتقدلين تقلبيني..
( أنا دبه ياعصلة.. أنا اكل وايد عشان اطقج وماتقدرين تغلبيني )

فاطمة بنت طلال : بث جيمن مله ماقدلتي تثبقيني يالدبه..
( بس جيمن مره ماقدرتي تسبقيني يالدبه )

طيبة بنت حمد : احين بنلوح نتثابق وأوليج الدبه ثنو تثوي بالعثلة..!!
( الحين بنروح نتسابق وأوريج الدبه شنو تسوي بالعصلة )

شهد : أنتو الثنتين جــب وقعدوا كملوا غداكم.. واللي تقوم مو مكمله صحنها... ياويلها..

فاطمة بنت طلال : بث عمة ثهد أنا ثبعت وما أقدل بتني تأولني..!!
( بس عمة انا شبعت وما أقدر بطني تعورني )

شهد اكتمت ضحكتها على كلام هالثنتين.. ولفت ويهها تكلم بقية اليهال عشان تحفزهم على الأكل..

شهد : من فيكم يحب الله..؟

العيال كلهم بصوت واحد وبصراخ : أأأأأنااااااااااااااااا

شهد : انزيــــن.. ومن فيكم يحب الشيطـــــــــــان..؟؟؟

العيال : .........................
كلهم اسكتوا عشان يبينون لها كرهم للشيطان..

شهد : اللي يحب الله ياكل كل اكله ومايرمي منه شي.. واللي يحب الشيطان يترك بقية الأكل
حق الشيطان عشان ياكله..

واليهال بكل أنبهار ومبطلين عيونهم ومندهشين شلون جذي وليش..؟

طيبة بنت حمد بكل تحدي لعمتها : اثلاً الشيتان مايقدل ياكل أكلنا..!!
( اصلاً الشيطان مايقدر ياكل أكلنا )

شهد : يالدبه الحين بتعرفين الشيطان اشلون يقدر ياكل من أكلج ومعاج..

ردت شهد تقول لهم : اللي مايكمل أكله.. وين راح يحطون بقايا الأكل..؟

اليهال : راح يكبونه بالزبالة..

شهد : أنتوا تدرون إن الشيطان يقعد دايماً عند الزبالة علشان يلقط الأكل المرمي وياكله..

واليهال تبققت عيونهم بهالمعلومة..

وكملت شهد : بس إحنا نقدر نغلب الشيطان.. ونخليه يموت من اليوع..

فهود الصغير : وشلون عمه نموت الشيطان من اليوع..!!

شهد : أول شي قبل مانبدي بالأكل شنقــــــول..؟

اليهال وبصوت واحد وعالي : بســم الله..

شهد : صح عفيه عليكم.. انتوا تدرون انا الواحد لي قال بسم الله قبل مايبدي بالأكل الشيطان ينعمي ومايقدر يشوفنا ويقعد معانا على الأكل..

واليهال منبهرين بالمعلومات اللي ياخذونها من عمتهم..

شهد تكمل لهم : وبعدين لي بغينا ناكل نحط لنا أكل قد مانبي مو أكثر.. وناكل كل أكلنا وما نرميه بالزبالة.. حتى لو قطعة خبزة صغيرة.. واهني الشيطان بيموت من اليوع لأنه ماأكل معانا.. ومايقدر يحصل أكل حتى من الزبالة.. لأن مافي أكل زايد عشان ينكب بالزبالة..
وأهني حتى الله سبحانه وتعالى راح يبارك لنا في أكلنــــا..

واليهال من بعد ماسمعوا المعلومة من عمتهم كلن قام يتسابق علشان يموت الشيطان من الجوع.. ومايعطيه حتى لو قطعة خبزة.

( وهذا الأسلوب حقيقةً أتبعته مع عيال أخواني.. وبصراحة نجحت بهالشي فياليت تتبعون مع الأطفال هذا الأسلوب المحفز..... جربوه وصدقوني ماراح تندمون.. وخصوصاً مع الأطفال اللي ماياكلون.. أو يلعبون بالأكل وبعدين يرمونه.. )

وعلى طريقة شهد ومعاملتها للأطفال وطريقة محاورتهم.. وأسلوبها بإقناعهم كان فهد يطالعها والأبتسامة شاقه حلجه.. ويكلم طلال ويقوله بهمس عشان ماتسمعهم : ياحلاتها مع اليهال تصير وحده منهم.. بس من تصير وياي تقلب ذيبة أم لسان.. ههههههههه..

طلال : أسكت الله يخليك لاتسمعك وتفضحنا..

حمد حب يسوي مقلب فيهم.. قال وبصوت عالي يكلم فهد وطلال : علامكم تتساسرون وتضحكون.. شاركونا معاكم..!!

فهد فتح عينه على حمد وقال : لا بالله إنفضحنا.. ماصادوهم يبوقون صادوهم يتقاسمون.. ههههههههههه.. وشكله بينوبنا من طشار العمة عـُلــــــوم..!!

وضحكوا الثلاثة مع بعض بصوت عالي.. ولفت شهد تشوفهم علامهم يضحكون..
وطاحت عينها بعين فهد وشافت نظرة تحدي بعيونه لها.. شاحت شهد بوجهها لصوب الثاني وقامت وقعدت بعيد عنهم تحت المظلة.. لأن الشمس احرقتها.. وهي بصراحة عيون فهد ونظراته لها طول الوقت اللي احرقتها ومو الشمس..!!

وبعد ماخلصوا من الغدا.. وطبعا فهد اهو ملاحظ إن شهد ماطبت ولا لقمة بحلجها.. وكلم طلال بهالشي..
فهد بتساؤل : إلا بسألك شهد ماكلت شي عالغدا.. وماتريقت اليوم الصبح ليش اهيه متبعة نوع معين من الرجيم..؟؟

طلال بستهزاء : ياعيني على العاشق اللي يحاتي حبيبته زوجة المستقبل.. شرايك تروح وتسألها..؟؟
هههههههههههههه..

فهد بصوت جاد : لااااا طلال أنا أكلمك بجد.. أنا ملاحظ أكلها وايد قليل أو تقدر تقول شبه معدوم...!!
وطبعا هالشي مو بزين على صحتها.. وشوفها شلون صايره صفره وعصلة..!!!

طلال : كلنا عارفين بهالشي.. وياما كلمناها وغصبناها بس ماكو فايدة.. وشكلها عندها فقر في الدم..!!

فهد : إنزين انتوا سويتولها فحوصات للدم..؟؟

طلال بستهزاء : تنكت أنت حضرتك.. ومن يقدر يقنعها تروح المستشفى علشان تسوي الفحص..؟؟
وهي من عقب الحادثة.. جميع المستشفيات والمستوصفات وجميع العاملين بوزارة الصحة
صاروا لها من الممنوعات والسموم الضارية..!!

فهد مستغرب : انزين وإذا مرضت أو تعورت أو انجرحت شتسوي ووين تروح...؟؟؟

طلال : لاااااااا.. إذا مرضت ســـيده على الأعشاب.. وتعالج نفسها بالأعشاب.. ههههههههه..
ولاااا أزيدك من الشعر بيت.. حتى أمي وأبوي تعالجهم بالأعشاب.. واللي يمرض فينا جدامها
هم تطبق نظام الأعشاب عليه.. هههههههههههه..
وأسأل بوحمد وبو ضاري شمسمينها..؟؟!!

فهد بجدية واهو عاقد حواجبه : شنو..؟؟

طلال : شهد العطار.. هههههههههه..

فهد وبفضول أكبر : انزين وإذا انجرحت أو أنزفت..؟؟؟

طلال : عندها حل لكل شي.. وتصدق مرة واحنا هني بالمزرعة مشاعل انجرحت إيدها بجرح عميق.. وانزفت دم وايد.. والحمد لله إن شهد ماشافتها.. بس من درت عنها قالتلهم يحطون لها على الجرح عسل ويغطونه.. وباليوم الثاني الجرح كان ملتئم وباني الجلد عليه سبحان الله............

(( وهذا الشي جربته انا بنفسي حقيقةً.. لأني أكبر جبانة في العالم من الأطباء والأبر ))

وسكت طلال شوي وتذكر سالفه ثانية ورد قال لفهد : إيـــــه.. مرة أحمدوه ولد خالد طاح وانشقت ريله ( قدمه ) وقام ينزف.. من شافت شهد الدم أغمى عليها.. وبصراحة ما اسهتمينا على أحمدان كثرها..

فهد وقاعد يفكر وسرح في شهد وهو يطالعها قاعدة تحت المظلة.. وقام يفكر فيها.. واشلون يلقى حل لعلاج مشكلتها..؟؟

طلال : هــــيْ فهــــــــــــــــــــــد شفــيك وين سرحت بخيالك..؟

فهد : لا بس كنت أفكر.. بطريقة أشلون أطلع شهد من مشكلتها...؟؟؟؟؟!!!!!!

:
:
:
:
:

مرت الأيام حلوة وجميلة على افراد العائلة وهم بالمزرعة مستانسين

يوم الجمعة
30 / 1 / 2004

وبعد مرور أسبوع بالمزرعة
وبعد صلاة العصر والغداء

فهد : عمي لو سمحت أنا بقيت أعرف رد شهد بموضوع الزواج شنو رأيها..؟؟

بوخليفة : وليش مستعجل يابوك..؟؟

فهد : أبداً يُبه بس أنت عارف كل ماعجلنا بالموضوع أفضل مثل مافهمتك.. وشهد إلى الآن ماتعرف عن وظيفتي أي شي.. وأنا بصراحة خايف ياعمي إنها تعرف بأي طريقة وبعدين تصير مشكلة كبيرة في إقناعها.. وأنت أدرى بحالها....!!!

بوخليفة تم ساكت يفكر شلون بيقنع شهد : ...............، خلني أشوف طريقة نقنعها فيها يابوك.. والله إني أحاتيها ليل ونهار والنوم ماقمنا نذوقه من كثر التفكير وبللي راح يصير عليها..!!

فهد : إن شاء الله مايصير إلا كل خير يايُبه.. تفائلوا بالخير تجدوه..

بوخليفة : ماني عارف يابوك وشلون بقنعها..!! وما أحب اضغط عليها.. يكفي ماجاها المسكينة..

فهد : عمي أنت عارف إني بتزوج شهد مو بس عشاني دكتور واعالجها لااء..
شهد انا احطها بقلبي وبعيوني.. هي أغلى ماعندي................

وتم ساكت وبعدين كمل.. واهي يوم ياخذها عصام.. أنا انصدمت وعلشان جذي تزوجت من اجنبية.. بس عشان أتم قاعد هناك وابعد قد ماأقدر...

قاطعة بوخليفة : سامحني ياولدي مع إن أبوك رحمة الله عليه وصاني.. ونسيت الوصية.. والحمد لله إنهم انفصلوا قبل لايتزوجون..

فهد : يُبه الله يخليك أنت مو بس عمي.. أنت أبوي اللي رباني وأنا رجائي بانك ماتحرمني من شهد..

هني دمعت عين بوخليفة على فهد.. واشلون فرقهم من قبل عن بعض من غير قصد
بس الحين ناوي على تصليح الخطأ بأسرع وقت.. وكله علشان خاطر اعياله شهد وفهد
واهوه بيحاول حتى لو يغصب شهد على هالزواج.. لأن من مصلحتها..

بوخليفة : خلاص يابوك اليوم بكلمها وبحاول فيها ليمن ترضى..!!

فهد دنق على راس عمه وباسه: الله لايخلينا منك يايُبه ويطولنا بعمرك إن شاء الله..

:
:
:
:

شراح يصيــــــــــــــــــــــر...... ؟؟؟؟؟؟؟؟؟

تعتقدون راح توافق شهد على زواجها من فهد......!!!

يا هل ترى هل يستطيع فهد إيجاد حل لمشكلة شهد....؟؟

بنتظار توقعاتكم وانتقاداتكم..

مع خالص حبي وتقديري للجميع

أختكم المحبة

عذبة التجريح