|
ينساب من بين اصابعنا بهدوء شديد ولا نشعر به ابداً نتفاجأ بمروره ونصعق بأثاره هل عرفتموه؟؟ انه الزمن نقف فجأةً ونرى ما حصل نتلمس التغيير الحاصل وتسآئل يلوح في الافق هل مضى دون ان نشعر به ليأتي الجواب سريعا و دون مهادنه لا.... . لقد شعرنا به لحظة بلحظه وعشناه بتفاصيله لكنه طبع الزمن يأتي ليذهب ويترك اثر اً وتختلف الاثار من شخص لأخر الاكيد ان الجميع مربه الزمن وترك بصماته عليه ورغم مامر بي من صعاب وعثرات وخيبات امل الا انني لازلت احن لايامي معهم معهم كنت انا معهم كان لي كيان معهم كنت زهره الانسانه و هذا يكفيني |
الجزء الاول
الجزء الاول ـــــــــــــــــــــ ّّ~~معه من كان لي العوض~ :كم تبي :الي تجيبه :امسك هذي عشرة اريل ماهنا غيرها ونزل الشنط التفت وناظر اللي جالسه ورى يله انزلي وصلنا "تفحصت البيت من برى بنظري شفت بيت متواضع جدا نزل هو قبلي وفتحلي باب السياره وانتظرني انزل نزلت وانا متمسكه بغطاي خايفه يطيره الهوا نزل سواق الاجره الشنط وحطهن عند الباب البني :ادخلي وشال شنطه وانا شلت الشنطه الثانيه :حياتس الله في بيتس زهره بحيا : الله يحييك ابوناصر : تعالي اوريتس حجر البيت دار بي في بيته ودخلني غرف البيت وكانعباره عن حوش كبير وثلاث غرف ومطبخ بطرف الحوش حمامين واحد داخل البيت والثاني في الحوش معهم من كانو لي الاهل في بيت مجاور : يمه يمه ام فيصل : وهي ترفع عيونها لبنتها جنا ن :نعم جنان : يماه جارنا ابو ناصر ام فيصل : وش فيه ؟ جنان بحماس : شفته مع السطح ام فيصل بصوت غاضب افرضي احد شافس وش بيقولون بنات ابو فيصل في السطوح يترززن جنان بتضيع السالفه : يمه ابو ناصر دخل بيته ومعه حرمه ام فيصل بشهقه: ايش حرمه!! جنان: أي والله ومعهم شنطتين كبار ودار فيها البيت ام فيصل ما حبت تتمادى مع بنتها :بس خلاص ويا ويلس لو ادري انس وايقتي من السطوح مره ثانيه يا عوبا وروحي جهزي العشا ابوتس لا جاء من صلاة المغرب يبي العشا جاهز جنان بتذمر : يمه اليوم ماهو دوري اليوم دور سلمى ام فيصل : طيب روحي قولي لها تجهزه ابو ناصر طالع لصلاة المغرب وانا جالسه في غرفة النوم دارت عيوني على جدران غرفة النوم الخضرا القديمه والمطرحه اللي مطبقه في طرف الغرفه والمخده الطويله الساتان والزوليه الحمرا المخططه بأسود وخيوطها متأكله من القدم كل هذا ما همني حاسه اني في قصر بصوت فيه نغمة الراحه والفرح " يالله واخيرا صار لي بيتي الخاص الحمد لله فتحت شنطتي الاولى شفت ملابسي الجديده وتحسستها بسعاده اول مره يكون عندي شي جديد سعيد ه انا بحياتي هنا على انها اول ليله لي بس حاسه ان الجاي احلى ان شاء الله ********* معهم من كانو ا الجيران والاصحاب ؛ ؛ في بيت مجاور اخر :ستي بتقولك هاتي من الحلاوة اللي جابها البارح ابويا مهجه : روحي قولي لستك ان ابوكي ما جاب حاجه البارح يظهر انها خرفت فتو بتعجب : ياماما تبغي اقول لستي هادا الكلام مهجه واقفه فوق الغساله وبصوت ساخر : ايوا يا حبيبتي روحي راحت فتو وبكل براءه الاطفال : ستي ستي امي تقولك ابويا ماجاب حاجه يظهر انك خرفتي انتفضت ام امجد وبكل ثقل وزنها الثقيل قامت من سريرها واستندت على عصايتها وببطئ وهي تعدل طرحتها البيضا على راسها : فينها امك يا فتو امك بنت الاصول انا خرفت والا هيا مخبيه الحلاوه عني فتو : امي في الحوش تغسل الهدوم ام امجد : يا مهجه يامهجه فينك يا بنت اخويا انا خرفت انا تقولي عني هادا الكلام الحق مو عليكي الحق على ولدي اطلب منو الحاجه وبدل ما يديني هيا ... مهجه قاطعت عمتها : يا عمتي يا عمتي اشبك تصرخي فيا ولدك ماجاب حلاوه والله ماجاب يعني انا حخبيها عنك ام امجد ترفع عصاها في وجه مهجه : اسمعي حركاتك وصوتك العالي ما حيخوفوني انا عارفه انك تبغنيي ازعل واروح عند بنتي مريم في الطايف بس بعينك هادا بيت ولدي ما حطلع منو الا على قبري سامعه مهجه :ترفع عيونها على فووو ق وتاخذ نفس وتخرجه وب عقل وطولة بال : اللهم طولك يارووح انتي يا عمتي ظالمتني والله انا ولا لحظه فكرت بالهرجه هادي دخل امجد من باب البيت وكالعاده سمع صوت امه وزوجته العالي : ايش بكم ايش الهرجه مهجه بتعب : تعال وقل لعمتي انت جبت البارح حلاوة والا لا ام امجد بصوت عالي : تعال يا ولدي ونزلت عينها على الكيس اللي مع ولدها : ايش هادا اللي معاك ؟ امجد ب ابتسامه : هادي الحلاوه اللي تحبيها يا امي مهجه ب فرحه شفتي يا عمتي انك ظلمتيني ام امجد ب ابتسامه خجوله : سا محيني يا بنتي انتي عارفه اني ست كبيره واحيانا عقلي يفوت مهجه في نفسها " احيانا دايما تفوتي والنتيجه علقه على راسي : عمتي الله يخليكي لنا انت بركة هادا البيت وانا ما ازعل منك فتو : ستي اديني من الحلاوه ام امجد تمد يدها داخل الكيس وتعطي لحفيدتها حلاوتها المفضله امجد يغمز لمهجه ويهمس له "ا شكرا ممتن لها لتحملها عمتها الكبيره النسايه والصعبه في التعامل في المسجد السلام عليكم ورحمة الله السلام عليكم ورحمة الله انفضت جماعة المصلين وفرغ المسجد الا من بعض الرجال : ابو فيصل استنى شوي :هلا ابو ناصر وتبادلو السلام ابو فيصل : ما شاء الله غايب من كم يوم وينك ياجارنا ابو ناصربوجه معبس ومهموم : رحت يم العم ناصر وبكل هم نطقها "" وحلف الا يزوجني وزوجني البارح ابو فيصل تفاجأ باللي قاله جاره بس فرح بنفس الوقت : مبرووووك تزوجت عل البركه منك المال ومنها العيال ابو ناصر بهم : الله يسامحه ورطني والا انا وين والعرس وين ابو فيصل حاول يغير من نفسية ابو ناصر :لا ياخوي لا تقول كذا يمكن يكون هالزواج خير لك تفاءل بالخير ابوناصر بعدم اقتناع هز راسه :يمكن ابو فيصل ترى عشاكم عندنا بكره ابو ناصر : ماله داعي يا بو فيصل ابو فيصل : العشا ماهو لك العشى للعروس خلها تتعرف على ام فيصل والبنات ابو ناصر بتفكير ( أي خلها تعرف على ام فيصل وبناتها ) :خلاص تم بس لا تكلف الله يرحم والدينك ابو فيصل : ما علينا من هالكلام شلون ناصر ال... ابو ناصر: بخير يا سبحان الله صار نسخه من ابوه الله يرحمه يوم شفته دمعت عيني غصب ــــــــــــــــــــــــــــــــــــــ رجعت بي الذكرى لذاك اليوم اللي تغيرت فيه حياتي : زهره العمه ام ناصر تبيتس زهره تركت الي في يدي ولبست منديلي على شعري ورحت بسرعه العمه ام ناصر هي اكبر زوجات ابو ناصر التاجر وهي اللي تتولى امور البيت ومن فيه من عبيد وخدم دقيت الباب ودخلت "السلام عليكم عمتي طلبتيني ام ناصر جالسه على كنب وثير ولابسه ثوب مزموم من تحت الصدر ويدها تملاها الاساور الذهبيه 12 اسواره من النوع الثقيل وخاتم بفص ازرق وسلسال حلبي معلق بنحرها ينتهي بتعليقه ضخمه معشقه بأالماس حر شعرها مفروق بالنص ومغطى بطرحه حرير بكل طيبه : تعالي يازهره تعالي اجلسي جنبي وبنفسها تقول" الله يصلحك ياناصر وش لون اقولها هالخبر وياربي مالقيت الا ابو ناصر !! زهره بحيا جيت وجلست جنبها ام ناصرتحسس خاتمها بيدها وتفره يمين يسار : كم عمرتس الحين يازهره رديت بحيره : والله مدري كم عمري ياعمه ام ناصر با ابتسامه رحيمه وبتفكير عميق : اممم انتي يازهره يوم يتوفون اهلتس كنتي بعمر خمس سنوات والحين كملتي عندنا ثلاثين سنه "زهره ابتسمت وبنفس الوقت خفت قلبي نغزني من هالكلام مادري ليش ام ناصرتكمل مهمتها الثقيله على نفسها : اسمعي يازهره عمتس ناصر زوجتس " شهقت ودمعت عيني عارفه اني ماأقدر أعارض او حتى أبين اني معارضه او حتى أسأل عن اللي زوجوني له ام ناصر حاسه بالذنب وبتقوم بواجبها على اكمل وجه مع بنتها اللي ربتها : مبروك يا زهره ومهرتس وجهازتس على عمتس ناصر لا تخافين انا بجيبلتس اللي تبين واكثر " مسحت عيوني وبخضوع ابتسمت : الله لا يخليني منكم يا عمه ام ناصر:يوم الخميس بتروحين مع رجلتس بنسوي لتس عرس ونفرح فيتس صعقت " بعد بكره عرسي بعد بكره عرسي نبضات قلبي تتسارع واحساس عجيب اول مرره احس فيه ــــــــــــــــــــــــــــــــــــــــــــــــــــــــــــ ـــــــــــــــــــــــ ابو فيصل منسدح على فراشه وبنته تهمز رجوله وام فيصل ترتب وعقلها في الحرمه اللي شافتها جنان مع ابو ناصر ياترى منهي اللي اعرفه ان ابو ناصر ماعنده احد يزوره كانت حصه الله يرحمها هي اللي دايم تجيه هي وبناتها :ام فيصل :يماااه انتبهت ام فيصل من افكارها على صوت جنان " يمه ابوي من اليوم يكلمس وانتي مسرحه ام فيصل تبسمت باحراج : هلا يابو فيصل ابوفيصل : اقولس ترى ابوناصر تزوج ام فيصل بتعجب :ماشاء الله تزوج تزوج !! ابو فيصل ضحك :ههههاي والله تزوج ويقول ناصر ال.... زوجه غصب لو تشوفين وجهه تقولين ميت له احد ام فيصل ناظرت بنتها جنان : يمه خلاص روحي نامي وسكري الباب وراس طلعت جنان وهي ما تبي تطلع تبي تعرف تفاصيل زوااج ابو ناصر جارهم كملو كلامهم ابو فيصل وام فيصل وعلمها بعزيمته لهم بكره ورحبت وهلت ام فيصل بضيوفها وانحل لغز الحرمه اللي كانت مع ابو ناصر بالنسبه لام فيصل ــــــــــــــــــــــــــــــ :تعالي يمه : مانمت يا ولدي : لا والله ما جاني نوم كنت افكر بابو ناصر احس اني تعجلت يوم زوجته زهره ام ناصر جت وجلست جنبه وهي تبي تهون عليه الزواج وصار وماله داعي الكلام فيه : لا تعجلت ولا تفكر فيه انت سويت فيه خير خله يمكن الله يرزقه بولد وزهره بعدخلاص خلها تشوف حياتها بعيد عنا هالبنت طيبه مرره والبنات هنا اخذات حقها وهي ولا عمرها اشتكت مسح على وجهه :يارب ما اكون غلطان بس اليوم الصبح وهو جاي يودعني حسيت انه مهموم اكثر منه فرحان ام ناصرلوت فمها بسخط : ماعليك منه من يوم كان يشتغل مع ابوك وهو كذا معبس وشايل هموم دنيا الا انت وش اللي خلاك تزوجه زهره بالذات ناصربكل صراحه : ام خالد ابلشتني تقول زوجها زوجها وما فكت عني الا يوم علمتها اني زوجتها ام ناصر بغضب وبنقمه على ام خالد(شريفه : الله يصلحك صحيح اني ابي زهره تزوج بس كان علمتني عن شريفه وزنها عليك ام ناصر تفرك يدينها ببعض :اه يالقهر من يوم دخلت شريفه هالبيت وهي حاطه نقرها من نقر زهره المسكينه ناصر حب راس امه : يمه خلاص تكفين انا حاس بالذنب من ناحية ابو ناصر لا تشيليني هم زهره بعد ام ناصر وقفت بتطلع من الغرفه : ادعي ربك ان زهره تتقبل ابوناصر وترضى بالعيش معه وعسى ربي ييسر امرهم _______________________________ كح كح شهق بقوووه وهو يكح ركظت زهره تعطيه كاس ماء زهره : سم اشرب ابو ناصر :كح كح اخذ الكاسه وشرب ورجع انسدح بفراشه زهره " واقفه عند رجوله وأ تأمل هالانسان اللي قدامي نا يم من بعد صلا ة ا لعشا ورفض يتعشى من السندويشات اللي جابهن لي حاولت ا نام ما قدرت البيت حار وما فيه الا مروحه وحده في سقف الغرفه ومزعجه تدوور ولها صرير مزعج منسدحه بفراشي اللي في طرف الغرفه غمضتعيوني بس مع التفكير ترجع تفتح واخر شي قررت اني اجلس وجت عيني على وجه ابو ناصر "نايم وشكله تعبان اكيييد بيكون تعبان رجال كبير و بتفكير عميق " ياترى كم عمره "اممممم يمكن يكون عمره 60 سنه كح ح وقطع عليها كحت ابو ناصر ــــــــــــــــــــــــــــــــــــــــــــــــــــــــــــ ـــ اوهوه علينا ايش بك يا حرمه اهجدي خلينا نعرف ننام مهجه: خبطته على كتفه لا تقلي حرمه انا ليا اسم وبعدين انا ابغى اعرف من فين جبت الفلوس دحينا تقلي احمد ببرووود : بعت السياره مهجه طلعت جنونها : اش اش اش بعت السياره واحنا كيف حنسافر لجده انت عارف كم باقي على اجازة الصيف احمد بعصبيه : ايوه بعت السياره خلاص والسنه هادي جالسين ما حنسافر مهجه فصلت اسلاك عقلها وتخصرت : نعم نعم ماحنسافر ليه يا خويا حسافر يعني حسافر والا شاطر تسفر امك كل سنه رجلي على رجل عمتي زي هيا ماحتروح انا كمانا حروح زيها امجد صوته بدى يعلى : يا حرمه اهجدي وعيب ترفعي صوتك عليا مهجه بعدم عقلانيه : حرفع صوتي وامد يدي كمان لو لزم الموضوع امجد رد عليها برد واحد : كف قوي على وجهها مهجه ردت عليه بكف بس هو مسك يدها ولواها ورى ظهرها :تمدي يدك اكسرها لكي واعلقها في رقبتك سامعه يابقره مهجه رفعت صوتها بالصراخ والشتم :انا بقره يارمه انابقره ياعرة الرجال وتبادلو الشتم والسب وبالصوت العالي وما راعو مشاعر الجيران ــــــــــــــــــــــــــــــــــــــــــــــــــــــــــــ ـــــــــــــــــــــــ سلمى وهي تسد اذنها : وش هالازعاج والله ما يستحون كل كم ليله كذا عيييييييب عليهم هو يضرب وهي تصرخ وهو يسب وهي ترد عليه تعبت والله منهم هناء تتمسخر :لا واللي ادهى وامر لا جت زياره عند امي تقول يابنات صوتكم يوصل لعند غرفتنا انا وجوزي ابو فتوو جنان : هههههه من زينه عاد ابو فتوووو اللي لا كشخ كشخ لبس وزار وفانيله علاقي سلمى وهناء بضحك مشترك : ههههههههههه سلمى : والله ما أرحم الا الضعيفه بنتهم كل ما تضاربو جت عند ابوي تستنجد فيه هناء :خخخخخخ ما انسى يوم يجي عبد الله وعمي يخطبوني ونامو عندنا سلمى قطعت عليها كلامها : اييييه ذيك الليله يا فشيله بس هناءوخجل فعلي وهي تسترجع الموقف : والله فشيله صدق وقفت عند باب المقلط وتصرخ يا عميابو فيصل الحق ابويا ضرب امي والسبب ستي وانا اجر فيها ابيها تتحرك من قدام الباب لايصحووون وهي ماشاء الله عليه مثبته رجولها بالارض سلمى وجنان : ههههههههه هناء : ويا فشيله عبد الله بعد ما تزوجنا بفتره يسألني وش سالفة البنت اللي كانت تستنجد بعمي ابو فيصل |
الجزء الثاني
الجزء الثاني ـــــــــــــــــــــــــــــــ مع صياح الديك واشراقة شمس الصباح كان يمارس عادته الصباحيه تجهيز القهوة كان مايشرب قهوة كثير بس يحب يسويها يتسلى فيها شال دلته وفنجاله وتوجه لفراش تحت نخلته اليتميه اللي تتوسط حوش بيته جلس وصب لنفسه فنجال شرب فنجاله الاول وارتكى وجالت عيونه في بيته وتفاصيله وركز على شباك غرفة النوم " ( ياربي شسوي بهالمسلمه اللي بلاني فيها عمي ناصر )) ما يعرف عنها شي غير اسمها وانها يتيمه ومربيتها العمه ام ناصر رفع بصره للسما ودعا من كل قلبه " يارب يارب انت اعلم بحالي يارب استر علي قبل مماتي زهره "وعيت من النوم وكل عظمه تشتكي وتصرخ من الوجع بحياتي ما نمت على الارض انا لازم اقوله يشتري لي سرير ما اقدر على كذا دخلت الحمام وتوضيت واحساسي بالذنب عظيم تأخرت بصلاة الفجر والسبب سهرتي مع المروحه اللي تسولف علي طول الليل لا انا اللي نمت ولاهي اللي بردت علي صليت ورحت فتحت شنطتي وطلعت لي جلابيه خفيفه أتبرد فيها بهالصبح الحار وغيرت وطلعت اتشوف وينه عريس الغفله زين الشباب شفته جالس تحت النخله وعنده دلته زهره : السلام عليكم : ابو ناصر : وعليكم السلام "سكت ما دري وش اقول ابو ناصر يناظر في كل مكان الا انا فجأ ه نطق ابو الهول قصدي ابو ناصر : الليله عشانا عند جارنا ابو فيصل بعد صلاة العشا تكونين جاهزه تبسمت وقلت : طيب ان شاء الله ورجع الصمت مرره ثانيه رجع نطق ابو الهول ابو ناصر: جيبي لتس فنجال عشان تقهوين رحت ودخلت المطبخ وصعقت من منظره مطبخ قديم مافيه حتى دولاب هوحوض المغسله الحجر وعليه المواعين مجمعه جلت بعيني ادور فنجال قهوه لقيت فنجالين وكلها مشطبه اطرافها لقيت كاسة شاي وغسلتها ورحت عند ابو ناصر بالحوش ناظر الكاسه اللي في يدي وسألني ما لقيتي فناجيل قهوه "الا لقيت بس مشطبه وانا ما اشرب بفنجال مشطوب هز راسه وبنفسه " بدينا من الحين بتطلع عذاريبي بعينها الله يستر" "ومديت يدي اتناول من الدله عشان اصب لنفسي حلف علي " والله ما تصبين انا اصب لتس غصبا عني ارتسمت على وجهي ابتسامه عريضه والله ابو الهول ذرب " اول مره بعد كذا انا اقهويك سألته " تحب قهوتك الصبح بدري كذا " ابو ناصر أي اصلي الفجر واقعد بالمسجد الى الاشراق واجي للبيت واتقهوى تحت هالنخله " طيب متى تبي فطورك؟ ابو ناصر :مع القهوه والا بعدها بشوي ساد الصمت مدري ليش ماخذه راحتي معه اسولف واتحرك شعور بالراحه وانا معاه هذا اللي حاسته يمكن عشانه رجال كبير يمكن ملامحه السمحه هي اللي مطمنتني ودي انه يتكلم يعلمني عن نفسه شوي رشفت رشفات من قهوتي فجأه قام من مكانه وطلع ساعته من جيبه الفوقي وتأملها دقيقه كأنه يدقق بالوقت " اسمعي يا.... رديت بسرعه وانا اوقف قدامه " زهره اسمي زهره رد ابو ناصر " معليش انا نسيت اسمتس ما تعودت ومع الايام ما بنسااهان شاء الله تردد شوي وبعدها قال : اسمعيني انا عارف ان البيت خرابه وقديم وما ينفع للسكن وانتي متعوده على عيشة القصور بس انتي شوفي وش تبين تغيرين وانا اوديتس للمحلات ونشتري اللي تبينه "ابتسمت بامتنان له " شكرا يا بو ناصر متى ما تبينا نرووح انا جاهزه انا شفت المطبخ يبيله اشياء كثير وبعد غرفة النوم محتاجين سرير ابوناصر بقلبه " هه تبي سرير اول البشاير وانهى الكلام بقوله :خلاص باكر الصباح ان شاء الله نروح وخذي كل اللي خاطرتس تشترينه والحين اسمحي لي بطلع تبين شي من برى " سلامتك بقوم اشوف ايش ناقص البيت ـــــــــــــــــــــــــــــــــــــــــــ : يا بوي الله يخليك لي افهمني انا ما جلست هنا كذا انا قاعد اخذ خبره وللحين باقي لي الدكتوراه ناصر : اقولك معك لين اخر هالسنه تنهي امورك وتجي خالد: يابوي الله يرحم والدينك اسمعني انت ليش تبيني ارجع فهمني بس ناصر بصوت حازم: تجي يعني تجي خلاص كم سنه وانت بعيد ومن دون اسباب ترجع يله مع السلامه وقفل ناصر التلفون والتفت على زوجته شريفه وبنبره شديده : شوفي من هالحين اعلمتس ما اقبل أي واسطه له يرجع يعني يرجع شريفه وهي تنفخ على اضافرها الطويله الملونه باحمر :ياربي وش فيك على هالولد خله علامك مستعجل عليه للحين ما خلص دراسته ناصر يتلمس جيوب ثوبه وهو واقف: انا ابيه يرجع ابيه جنبي ابيه يتزوج راح عمره وهو يدرس بضحكه : هالحين كل هالصجه عشان تبيه يتزوج شف ياناصر الزم ما علي سعادة ولدي وهو سعاد ته ومطلبه دراسته لا تنكد عليه طلع من الغرفه وهي تلحقه ناصر: ممكن اتغاضى عن رجعته لو تزوج شريفه : لوت فمها ما اعتقد بيوافق بس ببلغه بشرطك ناصر :انا رايح للمكتب وفي الليل عندي عشا عمل شريفه رجعت لغرفتها وجلست تتفرج على التلفزيون "اكييييد بيمر العجوز امه ويبلغها بمستجداته كالعاده ــــــــــــــــــــــــــــــــــــــــــــــــــــــــــــ ــــــــــــ خالد بيأس " ياربي من ابوي ماهو قادر يفهمني انا ما ابي ارجع هالحين يعني كل هالسنين وانا هنا ادرس من يومني بالمتوسط ولا عمره احتج او اعترض يجي هالحين يوم وصلت لاهم مرحله (الدكتوراة )ولا تخصصي دقيق ومهم وماهو موجود باي مكان انا لازم ارجع اكلمه انسدح وحط يده على عيونه بيستعد للنوم دق تلفون البيت " ياربي منهو المزعج اللي داق على هالوقت رفع السماع : الوووو ام خالد" السلام عليكم خلوودي بعد عمري خالد فز من سريره وجلس " يا هلا وغلا بام خالد اللي لا سمعت صوتها تهون علي الدنيا بكل ما فيها من مشاكل ام خالد بحب وبحنان : شلونك ابوي شلون دراستك عساك مرتاح خالد تنهد من اعماقه : يمه انا بخير الحمد لله بس اكييد عرفتي ابوي وش طلب مني ام خالد بضحكه بارده : اي دريت اصلا يكلمك وانا عنده شف هو يبيك ترجع ومصر على رايه خالد يشد شعره ويصر على اسنانه : يمه والله حرام يعني هالحين يومني قربت احقق حلمي يبني ارجع وبيأس: شجاه علي ما عمره تكلم معي بالاسلوب وفجأه طلبه ذا ام خالد: اسمع قبل شوي كلمته وعرفت ليش يبيك ترجع خالد بلهفه لمعرفة السبب : لييييييش ام خالد:يبيك تزوج خالد بابتسامه باهته : يمه من صدقتس الحين هذا كلام ابوي والا كلامتس ام خالد بحب وبتملك : انا يا خلودي ودي انك تتوفق في حياتك وتكمل دراستك والا الزواج وغثاه لاحق عليه " وبقلبها هو انا مجنونه ازوجك عشان تاخذك بنت ابليس عني خالد: يمه يعني ابوي لا تزوجت بيخليني اكمل دراستي هنا ام خالد بنرفزه : ايه هذا شرطه بس انت ما عليك منه سوي اللي براسك مصيره بيرضى خالد: يمه حبيبتي انتي وابوي اهم واغلى من خلق ربي ورضاكم عندي اساسي وسبب توفيقي من الله ام خالد بخوف وبهمس: يعني بتوافق على طلب ابوك خالد بحيره : مدري يمه افكر واكلمه واشوف وش بيقولي ام خالد بخيبة امل عارفه انه في النهايه اكيد بيرضخ لرغبة ابوه : شف انا معاك واعرف اني ما يهمني بالدنيا غيرك انت واختك ــــــــــــــــــــــــــــــــــــ "يمه وين رايحه ياولدي الليله فيه عشى عند بيت ابو فيصل وتوها دقت ام فيصل تعزمني حسين:يمه هالحين تبين تروحين وهو يناظر الساعه يمه الساعه 3 الظهر باقي شوي ويأذن العصر ام حسين وهي تغطي وجهها : عادي ام فيصل متعوده علي اجيها بأي وقت حسين يهز رأسه بيأس " مستحيل امي تقر ببيتها مستحيل بعذر ابوي تزوج عليها ـــــــــــــــــــــــــــــــــــــ دخلت مثل العاصفه الهوجا يمه شوفي لس حل مع ام حسين " ام فيصل تشرف على تجهيزات العزومه : جت ام حسين سلمى بتأفف ايه جت العله ام فيصل : عيب يمه ام حسين اكبر مني سلمى وبصوت فيه ملل: عارفه بس تراني طفشت منها كل ما شافتني تدعي علي بالموت ام فيصل جت جنب سلمى وبحنان : يمه تراها ما تقصدس تقصد طبينتها سلمى : ادري بس تراعي مشاعري مو كل ما شافتني " تغير صوتها مثل ام حسين وتقلدها "" يعلتس الموت يا سلمى يا علتس ما تهنين بمنامتس ولا زادتس ام فيصل : خلاص مادام عارفه طنشي وارتاحي فجأه طبت عليهم ام حسين المطبخ وشافت سلمى وبدت موشحها لا تذكرت طبينتها : عساتس للموت يا سلمى طلعت سلمى وهي تتأفف بصوت عالي وام حسين تتبعها بنظرها وبكل براءه تسأل ام فيصل : وش فيها بنتس تنافخ ام فيصل : ههههههههه خفي على بنتي كرهتيها اسمها ــــــــــــــــــــــــــ "ياربي من هالحاله اذن العصر وعريس الغفله ما شرف وين راح وتركني قمت وصليت العصر وبعدها رحت لشناطي ادور وش بالبس الليله بعشى جيراننا فتحت الشنطه وشفت فستان زواجي "هههه رفعته قدام عيوني وتحسست قماشه الوردي بالله ذا فستان عرووس يفشل مدري منين جابته العمه شريفه " ما انسى وجه عمتي ام ناصر يوم شافتني وان لابسته ام ناصر بتساؤل : زهره وش هاللي لابسته ناظرت بالعمه شريفه ابيها تتكلم ناظرتني وقرصت عينه بتوعد لي لو تكلمت " بالله وش تبيني اقول مدري شقول العمه شريفه للاسف تكرهني وبكل وضووح ما تجاملني ابدا درت بفستاني اتباهى فيه وكأنه اجمل فستان : شرايس يا عمه بالله مو حلو يجنن علي صح ام ناصر على بالها الفستان من ذوق زهره : يا ماشا الله وش زينه عليتس وبوست خدودي وحشرت بكفي شي مدري وشهو انا صكيت كفي عليه بقوووه عشان ما تشوفه العمه شريفه وجلست انتظر مباركة البنات ******** ان شاء الله الجزء الثالث يوم الجمعه وهذا موعدنا كل اسبوع |
الجزء الثالث
السلام عليكم ورحمة الله وبركاته يسعد مساكم الجزء الثالث ـــــــــــــــــــــــــــــ من بعد صلاة العشاء "ياربي هذا وين راح ماسكه عباتي وجالسه انتظر ابو ناصر قلق والله اكيييد انه ناسي اني في البيت استناه قمت احرك رجولي شوي احسها تخدرت من كثر ما جلست وانا انتظره وقفت عند مراية المغسله 0 اتفقد روجي وكحل عيوني اتأمل ملامحي السمرا برضا اول مره اشوف نفسي حلوه يمكن عشان نفسيتي مرتاحه سمعت صوت الباب وهو يفتح وشفته يدخل ابو ناصر "السلام عليكم رديت عليه " وعليكم السلام وينك وين رحت الله يهداك قلقت عليك ابو ناصر بحرج " معليش السموحه تعطلت السياره علي رديت عليه "اهم شي انك بخير ابوناصر يتهرب بعيونه عني " جاهزه رديت عليه : ايه جاهزه ابوناصربعجله : دقيقه بغير ثيابي ودخل داخل البيت وانا انتظره بالحوش والنسمه تلعب \بشعري دقايق طلع ابو ناصر وهو كاشخ كشخة شيبان " يالله كتمت ضحكتي يا حليله كاشخ والله لابس ثوب بني بعز الصيف ووبشت بنيه وشماغه البرتقالي طبعا كله مجعد وغير مكوي " يله مشينا نطقها وهو يمشي قدامي "تأملته وتعجبت هذا من صدقه يبي يروح للناس على هالشكل "ابوناصر ليه ما قلت لي اكوي لك ملابسك عطنياها خليني اكويها ابو ناصر:بعد نظره سريعه على ثيابه "ماله داعي تأخرنا على ابو فيصل امشي امشي وطلعنا من البيت ـــــــــــــــــــــــــــــــــــ هناء يا هناء علامتس ما تردين هناء بنص ابتسامه " هلا ام حسين امري وش تبين ام حسين ترفع فنجال القهوه : جديده هالفناجيل اول مرره اشوفها متى شريتوها ما شفتها قبل كذا سلمى بصوت حاد ترد على ام حسين : أي جديده وش عندس هناء وهي كاتمه ضحكتها : سلمى عيب عليتس سلمى : وانا صادقه لازم تعرف عن كل شي ام حسين رشفت فنجالها كله وناظرت سلمى " سليم هاتس فنجالكم ما نبيه وحذفت سلمى فيه سلمى تفادت الفنجال اللي طاح وارها والحمد لله ما انكسر سلمى مصعوقه من حركة ام حسين " وتهمس لهناء: شفتي شفتي انها مجنونه انا قايله لكم هناء انفجرت ضحك "تحب المعارك والمناوشات اللي تدور بين ام حسين واختها سلمى ههههه" سليم" ههههه وهي تحط يدها على بطنها : اه حسبي الله عليكن انتن الثنتين والله حاسه اني بولد من كثر الضحك ااااه سلمى كشرت زعلانه من ضحك هناء " والله ما فيه شي يضحك هالحين انا اعاني منها وانتي تضحوكين ام حسين زادت عليها : يا علتس للجدري ياسلمى هناء زااااد ضحكها وطفرت عينها بالدموع :ههههههههههه ام حسين بظرافه " سليم يامي صبي لي فنجال سلمى وهي طفشانه منها : ابشري ا م حسونه من عيوووني وهناء مستمتعه على الاخر بالمشهد الكوميدي ـــــــــــــــــــــــــــ دخلت جنان المطبخ وهي شايله ريم بنت فيصل : يمه شوفي من معي ام فيصل بابتسامه عريضه " يا هلا والله بريومه واخذت حفيدتها من جنان "وين امها جنان " في غرفتنا تنوم دحومي بعدها بلحظات طلت عليهم منيره زوجة فيصل : السلااااام عليكم انا جيييت وسلمت على خالتها ام فيصل : وحبت راسها معليش يا خالتي سامحينا تأخرنا بس دحومي مسخن وتونا راجعين من المستشفى ام فيصل : يا قلبي عليه علامه تعبان؟ منيره: ابد روشته وجى تحت المكيف واخذله لفحة هوا على كيف كيفتس ام فيصل : ادهنيه بفكس ويطيب احسن له من هالادويه منيره توافق خالتها بالكلام : ابشري ياخاله اصلا الفكس دواء لكل شي جنان بقرف : وع مدري شلون تستخدمونه ام فيصل بصدق : الله يرضى على من سوااه يامااا دهنتس فيه وانتي تونين من الحمى جنان :يماااه كاني سمعت صوت الباب يندق برووح افتح يمكنها العروووس جنان فتحت الباب لقت ام امجد ومهجه وبنتها فتو دخلت ام امجد بعد ما حشرت نفسها في باب البيت السلام عليكم يا بنتي وجرت جنان لحضنها تسلم وتبوس بحراره كانت ام امجد تحب جنان وتشوفها من ألطف البنات جنان خجلانه منها : هلا والله خالتي ام امجد الله يحيكم تفضلي وهي تسحب نفسها من حضن ام امجد مهجه واقفه على الباب تنتظر دورها : يالله يا عمتي ادخلي انا واقفه في الشارع ام امجد وهي تتحرك على مهلها وعصاها في يدها: : اصبري اصبري اشبك حتدخلي بس خليني املي عيني من حبيبة قلبي جنان والا ما عندك صبر تنفست مهجه بعمق وهي تحاول تهدي نفسها وواخيرا افسحت لها عمتها المجال ودخلت :عمتي الله يخليك لينا اناحفطس من الحر وانا مغطيه وتمسك جنان وتضمها وتسلم عليها بحراره فهي تستلطف جنان ايضا مهجه بفضووول شديد: جنو يا عسل من عندكم جنان بابتسامه خجوله : ما احد جى الا ام حسين عبست مهجه وجهها " بس جنان : منيره موجودة مهجه : كويس في غير العجوزه ام حسين جنان حطت يدها على فمها تكتم ضحكها بعدها بدقائق دق باب البيت وفتحت سلمى : دخلت زهره ورحبت بها سلمى اشد ترحيب و جت ام فيصل وهي ترحب وتهلي بضيفتها ياهلا والله ياهلا وغلا زهره " طلعنا من بيتنا ومشينا عن يسار البيت كم خطوه وقفني عند باب الحريم ودق الباب ووقف بعيد ويوم شافني دخلت راح دخلت بيت ابو فيصل واستقبلتني اول شي بنت شابه ماشاء الله عليها من اجمل ما شافت عيني بسم الله عليها ورحبت وهلت فيني وبعدها جت حرمه كبيره بوجه سمح وطول معقول وصوت دافي من شفتها ارتحت لها وحبيتها واخذت بيدي ومشت معي لجلسة الحريم عرفتني على الجالسين وقالت : هذي ضيفتنا عروسة ابو ناصر جارنا قامن الحريم ودرت اسلم عليهن الصراحه كلهم وجيههم مرحبه والابتسامه كانت الميزه للمجلس ودقايق دخلت علينا بنتهم الكبيره هنااء وكانت مسكينه يالله تمشي من ثقلها شكلها والله العالم تنتظر ولادتها باي لحظه سلمت علي ورحبت فيني بحفاوه مر الوقت وانا بينهن وكانت جلستهن حلووه وفجأه ومن دون مقدمات سألتي مره كبيره بالسن الا انتي وش اسمتس ؟ "رديت اسمي زهره ردت عاشت الاسامي يازهره بس ما قلتي لنا وش اللي جابتس لابو ناصر احرجتني مررره ردت ام فيصل بحرج : الله يهداتس يا ام حسين وش ها لسؤال اكيد النصيب ام حسين : بلقافتها المعهودة اكيييد النصيب بس وش اللي يخلي بنت صغيره تاخذ لها شايب اقووول يا ورده انتي مطلقه والا ارمله رديت بحرج شديد " لا ابو ناصر اول بختي قالت ام امجد بلهجتها الحجازيه : يا حبيبتي سيبك منها هادي حرمه تحب تحشر نفسها في اللي ما يخصها اخسريها مهجه غمزت لي : اسمعي كلام عمتي هادي عجوزه مخرفه وتموت لو ما رمت الهرجه ام حسين : انتن وش تقولن عساكن بس ما تحتسن عني هناءتحاول تغير الموضوع : الا يا ام حسين وش اخبار ابو حسين من زمان ما سمعنا اخباره ام حسين كشرت وبقوه : الشايب العايب بدل ما يقول يالله حسن الختام جانا قبل يوميين وهو صابغاً لحيته سودا يتشبب لعجوزه الثانيه سلمى يعلها يعجز عنها كفنها الا على دخلت سلمى المسكينه وسمعت دعوة ام حسين على سلمى الضره ــــــــــــــــــــــــ انتهى دوام خالد في المستشفى وقرر اذا وصل للبيت يتصل على ابوه ويتكلم معاه في شرط الزواج وتكميله للدكتوراه وصل شقته واتصل على ابوه ووكان ابوه جالس عنده امه ام ناصر في صالة بيتهم بعد السلامات والتحيات تكلم خالد يوم شاف ابوه معاه جاف : يبه انا تحت امك وطوعك باللي تامرني فيه امي قالت لي انك شارط زواجي لجلوسي هنا وتكميلي للدكتوراه انا ما اقدر على زعلك رضاك بالدنيا عندي ناصر: ببتسامه أي هالحين انت ولدي تزوج واقعد هناك مثل ما تبي اهم شي اتطمن عليك متزوج ومرتاح خالد : خلاص لا جيت في الاجازه بعد شهرين ان شاء الله اخلي امي تدور لي ناصر : خلاص على خير ان شاء الله وصدقني لا تزوجت يا ولدي انت بتدعي لي عشان ريحتك خالد طيب يبه سلم على امي وجدتي ناصر يوصل ان شاء الله وانتبه لنفسك ـــــــــــــــــــــــــــــــــــــــــــ في نفس الليله بعد مارجعنا من عشى جارنا ابو فيصل مد فراشه ابو ناصر ونام ولا كلمني ولا كلمه وجلست انا لحالي فرشت فراشي وتمددت حاولت انام وطبعا مثل البارح المروحه تسولف علي عجزت ما فيني نوم رحت عند شنطتي وفتحتها ابي ارتب اغراضي وشفت كيس صغير مخمل ازرق تبسمت يوم تذكرت وش فيه وتذكرت عمتي ام ناصر يوم دسته في يدي الله يجزاها خير والله انها امي اللي ما جابتني فتحت الكيس وتناثرت بيدي الجنيهات الذهب 20جنيه بعد ما انتهت حفلة عرسي مسكتني ام ناصر على جنب وقالت لي بصوتها الحنون " اسمعي يازهره هذي هديتي لتس احفظيها وان شاء الله ما تحتاجينها بس لا احتجتي في يوم تلقينها " حبيت راسها وانا ادعي لها بطول العمر والصحه ذيك الليله نمت بغرفتي مع البنات ويوم اصبحنا قالو يله يازهره العريس بيمشي البسي عباتس طلعت وانا يالله اشوف من نور الشمس اللي جهرني وركبنا سيارة الاجره وشفت العريس اخيرا شفته شيخ الشباب قصدي شيخ الشياب جاني تبلد وبروود عادي مهما كان عمره وكان سنه وشكله اهم شي يخاف الله فيني ولحد الان شكله من اللي يخافون الله رتبت الشنطه وقفلتها وقمت ابي اشرب ماء ودخلت المطبخ واخذت كاسه مويه وصبيت لنفسي وشربت طلعت من المطبخ ودخلت غرفة النوم و حسيت بشي يمشي على رقبتي وااااااااااا واصرخ ذيك الصرخه اللي فزعت شايبي المسكين واااااااا ابوناصر بفزعه وقلبه يرقع من الخووف: وش فيتس وش فيتس رديت عليه في شي مشى على رقبتي وشكله على شعري جى قرب مني وناظر بتمعن ومد يده وسحب من راسي صرصووور كبير ابو شنبات >>> وع اكره شي هالمخلوق ابو ناصربزعل يروح يرميه بالحوش وقالي : هالحين هالصراخ كله عشان صرصور باحراج رديت عليه : معليش سامحني بس انا اخاف من الصراصير ابو ناصر يهز راسه ويرجع لفراشه سألني : الحين من اكبر انتي والا الصرصور رديت وانا مستغربه سؤاله : اكيد انا تبسم لي : اجل ليش تخافين من شي اصغر منتس رديت بسرعه وانا متقرفه من نفسي ودي اروح اتفرك بالصابون عقب ابو شنبات صرصور افندي " هو ماهو خوف كثر ماهو قرف منه ضحك علي وغمض عيونه ونام رحت سحبت منشفتي وركظ على الحمام ــــــــــــــــــــــــــــــــــ شوفي يمه ابتس تدورين لخالد عروس تكون بنت حلال ابيها على ذوقتس ام ناصر بمكر العجايز : وامه وينها ليه ما تدور له ناصر حب يد امه : يمه الله يخليتس لنا انتي البركه هنا وانا ابي وحده لولدي تكون من اختيارتس وما ابي شريفه تدري عن شي ام ناصر : هووو ليش يا حافظ امه هذي واكيييد بتشوف له الزين ناصر يهمز رجول امه : يمه انتي هالحين من صدقتس شريفه لا يمكن تدور لولدها عروووس لو على كيفها ما تزوجه ابد وان اختارت ما اضمن اختيارها هي ان زوجته بتزوجه وحده من بنات خواتها او اخوانها وانا ما ابي حظ ولدي مثل حظي ام ناصر : طيب بدور له الله يعين بس لا صار مشاكل بينك وبين شريفه انا مالي دخل ناصر هز راسه باسى : يمه المشاكل حاصله حاصله بس دعواتس بالتوفيق لخالد وترى ما عندس وقت اقل من شهريين قامت ام ناصر من مكانها ويدها بيد ولدها رايحه لغرفتها : ربي يكتب اللي فيه الخيره ـــــــــــــــــــــــــــــــ صباح اليوم الثاني صحيت وانا مكسره وعرقانه شعري لاصق بوجهي وحاسه بخموول بس اللي صحاني واقف على راسي ناظرت فيه بصعوبه وجلست ولميت لحافي علي استر رجولي ناظرني ابو ناصر وقالي : ي الله قومي "سألته ويين ابو ناصر : قومي نفطر وبعدها نمشي للسوق فزيت بسرعه وقمت غسلت وجهزت الفطور اللي هو جايبه شايبي الحبيب جايب فول وتميس وجلسنا تحت النخله بالحوووش على انه حر بس كان الذ فطووور بعدها بساعه كنا متوجهين للسوق قبل ما ننزل من السياره مسكني ابو ناصر بيدي وقالي : شوفي يازهره الي تبينه خذيه لا تستحين كل شي بخاطرس خذيه سامعتني هزيت راسي وقلت: سامعه ابو ناصر من ليلة البارح وهو مخطط ينزلها السوق وما يخلي في خاطرها شي " دام الله منعم علي خليني افرح هالضعيفه دخلنا محلات الاثاث وشفت غرف نووم كثيره كلها حلوة بس في وحده تنحت عندها احلى غرفة نووم شفتها في حياتي شا فني ابو ناصر واقفه اتأملها سألني : تبينها بصراحه انحرجت قلت له: هي حلوه بس غاليه ناظر ني بحنان : قلت لتس اللي تبينه انتي اشري بس قلت له وانا في قمة الخجل: لا خلاص تركني وراح للبايع وسأله عنها سمعت سعرها شهقت سمعت ابو ناصر يقول وانا شريت "يالله هذا الحيين منين له حق الغرفه انتظر ردودكم الحلوووه |
| الساعة الآن 07:55 PM. |
Powered by vBulletin® Version 3.8.11
Copyright ©2000 - 2024, Jelsoft Enterprises Ltd.
SEO by vBSEO 3.3.0 ©2009, Crawlability, Inc.
شبكة ليلاس الثقافية