|
السلام عليكم ..
يعطيك العافيه نبوضه ، .. جزء صغير يبين كيف بداية علاقة ومشاعر رونق بـ مطلق .. والعكس .. أتوقع إن رونق تنصدم لما تعرف إن أم مطلق هي نفسها أم نايف .. وراح تواجه صعوبه بتقبل حياتها مع نمط حياة مختلف وأشخاص مختلفين .. .. الله يوفقك إن شاء الله وينور دربك وييسر لك إمتحاناتك .. ومشكوره على تلبيه طلبي ^_^ يعطيك ألف عافيه وربي يجزيك بالخير .. بانتظارك القادم بإذن الله .. |
السلام عليكم .. كيفك نبوضه والله الك وحشه ما تعرفي سعادتي لما شفت البارت نازل وكان فعلا روعه واخيرا رونق بدات بدايه جديده مع مطلق احمدلله شكل مطلق انسان ممتاز والايام بتثبت بس الله ايعينها على امه لانها شكلوفي مشاكل معاها بينها وبين مطلق كان نفسي تحكلنا عن عزام وتركي وردة فعلهم على العرس حبيبتي بانتضارك دمتي بود اختك شبيه الريح |
السلام عليكم
مرحبااااااااا نبوضه اشتقت لك ولرونق وكل ربعنا اللي هنا عدا عزامووو الزفت ومي الله يعطيهم مايستحقون وياحسافه تروك ونهى فيهم (على ان شايله بقلبي عليك ياتركي بس ماعليه توني اقراء الاجزاء اللي مارديت عليهم واوووووووو وش ذا التطورات الخطيره نبوض بغى يغمى علي من طاري الحريق والا وجه رونق تخيلتها بتتشوه بس الحمد لله صارت غيبوبه بس (فيس يهون المصايب على روحه *********** خالد ياااي الله يجعل كل الاخوان مثله على انه بعده شاك برونق الا انه يعاملها زين بصراحه ونعم الاخ مو عبد الرحمان العله اللي ماغير يضرب في الضعيفه محمد وطريقته بالتفكير برونق وانه اللي رباها واهتم فيها واوووو بصراحه خيال وربي وصفتي يانبوض وحسستيني بمشاعره اللي دمعت عويناتي على ذا الموقف صدق لاقالو الجرح على قد المعزه ******** فيصل وندى خلاص نبوض منى بتزوجين ذا الاثنين احسهم مره لايقين لبعض وقلوبهم نضيفه ويحبون رونق خلاص خلي فيصل يكمل دراسه ويعرس وياويلك لو تزوجينه غير ندوشش فيس جهز فستانه يحضر العرس موب عرس رونق اللي ما لبست فستاني اطريت اخليه لاي مناسبه ثانيه ************ ام نايف ليه ذا الموقف من مطلق وشهو مسوي احس له علاقه بموت ولد عمه بس ليه امه مقاطعته لو ابوه قلنا ماعليه يمكنه بعد موت ولد العم اعتزل اهله والا سوى شئ كايد والا اللي حوله اعتبروه سواه وهو مظلوم (فيس عجز من التفكير في ذا السالفه ********* مطلق ورونق صراحه بدايه روعه لعلاقتهم شكلهم بيتفاهمون تمام لان واضح ان مطلق شخص يعترف بالحق ولاتاخذه العزه بالاثم هذا استشفيته من سالفه الدخان يوم يقول عندكم يالحضر علوم تغلبونا فيها بس العثره الوحيده هي سالفه رونق مع عزام لانهي ماتعرف ان مطلق سمعها وهو لو ماعلمها بتضل خايفه وفاقده للامان وحاسه انه تخدع زوجها فمافي حل الا المصارحه موقف ام نايف لا درت منهي اللي ماخذه ولدها ؟؟؟؟اكيد ردة الفعل بتكون مساويه للي سواه مطلق وزعل به امه نبوض انتظر القادم بشوق فلا تخلين انتظاري يطول |
مساء الخير ياوجه الخير
بنت الشاميه روايه اسمع بها من فتره طويله لكنها في البدايه لم تشدني لا اعلم لماذا 00000000000 لكنني قررت ان احكم بنفسي واقراها,,, بالامس بدات قراءتها واليوم انهيت الاجزاء المكتوبه وبت على احر من الجمر بانتظار القادم000هذا اقصى ما استطيع التعبير عن مدى اعجابي بالقصه00000000000 رونق صحيح ظلمت وتعذبت لكن من اتكل على الله وجعله حسيبه فستقبل الافراح حتما لحياته ويظهر الحق000000 وبداية الافراح زواجها من مطلق(فيس بدوي يتفدى كل البدوان فديتهم) اهم شعور بين المراه وزوجها الراحه وهذا هو يلوح لها بالافق تقترب منها الراحه والسكينه مع مطلق وهو الذي راته قبل ساعات رجل غريب لا تعرف عنه شيء غير اسمه وانه بدوي0000000000 استغرب من يتصور ان البدوي رجل خالي من المشاعر همجي لا يهتم الا بالبر والحلال والمقناص0000000لكنهم اهل المشاعر--مثقفون-- ومنهم من يعتلي مناصب عليا--فيهم الوسيم--والظريف--والمتدين (فيس يقاتل بالدفاع عن البدو)00000000000 وشكرا0000000 |
السلام عليكم
كيفك اختي نبض القصيم يعطيك العافية على الابداع ماشاءالله احداث جدا رروعه سبحان الله كل واحد يجني ما زراع عزام يجني مازرع من خلال كره نهى له ويعاني والله عاقبه فيها يشوف بعيونها الكره والصد ولا يقدريسوي شئ فقط يتعذب وانشاء الله من الحال واردى مي وتركي ومعنات مهي منتهيه ابد وتجني سكوتها عن الي صار من خلال معاملت تركي لها وتركي لو صدق يحب رونق لا يتلفض عليها لكنه اناني يبهى تقعد كذا رونق ومطلق ان شاء الله يعوض صبرها خير في مطلق وان شاء الله تحب البدو من خلال مطلق ومرره متشوقه لعلاقتهم كيف حتكون اذا رحو الحفر والتقو بام مطلق والله يوفقك في امتحناتك الدنيا والاخره وبالتوفيق اختك ندى |
الجزء التاسع عشر : ( بداية صعبه ) مهما كانت الحياة صعبة و جافه فالمشاعر كفيلة بترطيبها !! رونق التفت لمطلق و أنا مستغربه من خروجه عن الطريق ,, لف يمين و استمر يمشي مع طريق رملي تلبد من أثر السيارات ,, كان الصمت يعم المكان و اهتزاز السياره هو سيد الموقف ,, لحظات و انتصر خوفي على حيائي و سألت : وين رايحين ؟؟ التفت علي و ابتسم و رجع عيونه على الطريق و رد : لأهلي !! رديت أبين له سؤالي : طيب ورانا ما رحنا مع الشارع ؟ ضحك مطلق و رد : أهلي موب بالحفر نفسها .. اختفت ابتسامتي و سألت و أنا عاقده حواجبي : هاااه . رد مطلق بجديه : أهلي بهجره قريبة من هنيا اسمها صبره .. رديت باستغراب : و الحفر !! التفت علي و رجع ركز بطريقه و تكلم : قريبه من الحفر يعني خمسين كيلو جلد ( جلد يعني بدون اسفلت ) رجعت ركزت نظري بالطريق المضيء بفعل نور السياره و أنا أتبلع ريقي بصعوبه .. زادت اهتزازات السياره و أختفى أثر السيارات تلفت أشوف المكان بخوف ثم التفت على مطلق بخوف و سألته : طيب ما نضيع !! ابتسم و تحولت ابتسامته لضحكه هزت السياره و أنا مستغربه من ردة فعله ,, ما قلت شي يستاهل ضحكه ,, سندت ظهري بقهر و أنا أشوف اهتزاز جسمه من الضحك .... ما كانت إلا ثواني و تعدل و ناظرن بطرف عينه و رجع يضحك ,, عقدت حواجبي ولفيت وجهي لجنبي اليمين ,, حاولت أشغل نفسي بمراقبة الرمث المتوزع بكل مكان على الأرض .. سمعت صوته بعد لحظات : هو فيه أحد يضيع بيتهم ؟؟ سكت و ما رديت و أنا أسمع تعليقه لكني حسيت بإيده تسحب ايدي اليسار و التفت عليه .. رد مطلق : لا تصيرين زعول !! رديت : ما زعلت . ضوق عيونه و ركز نظره علي و رد : ما صدقتي يالحظريه . شتت نظراتي للحظات و رجعت أرد : كم بقى و نوصل ؟ حسيت إنه فهم التصريفه لأنه ضغط على ايدي و رد : الحين ان شاء الله .. ـــــــــــــــــــــــــــــــــــــــــــــــــــ مطلق . حسيت بخوفها و نظراتها اللي كانت تتفحص كل حبة رمل قدامنا ,, ضغطت على يدها أبيها تتذكر إني معها و ما تخاف ,, مرت لحظات و يدي بيدها لكن مع الوقت شلت يدي و انشغلت بالسواقه ... مر الوقت وأنا أتلافى الكثبان الرمليه ,, و هالكثبان دليل على اقترابنا لــ صبره ,, لاحت لي هامات البل ,, و سمعت رغاها ,, يااااه يا حي هالصوت و الله ,, صوت داري و صوت أهلي و صوت حلالي و صوت الغايب كلها أسمعها بصوت البل !! : شف النور .. التفت على صوتها ورجعت لفيت عيوني أتبع اصبعها و المكان اللي تأشر عليه ,, لاح لي نور خافت ,, رديت و أنا أتجه لهالنور : هذا بيتنا . و كملت و عيوني مركزه على البيت : ما أبي أي صوت لا دخلنا لأن الشايب نايم بالحوش .. ردت و عيونه مفتوحه على الأخير و ايدينها تفركها ببعض : طيب هم ما يدرون عن العـ ... قاطعتها : الصباح رباح .. وقفت السياره بعيد شوي عن البيت حتى لا يقوم الشايب و نزلت و أنا أشوفها بجسمها الضئيل تتبعني بخطوات سريعه ,, أخذت شنطتها من الصندوق و مشيت متجه للباب اللي معلق على بابه سراج .. ما كان يحتاج الباب إلا دفه بسيطه و ينفتح بحكم إن كل أهل صبره يتعارفون و كأنهم اهل بيت واحد .. دخلت و مسكت يد رونق و مشيت متجه لغرفتي و أنظاري تراقب الجسد الصغير القابع تحت الفراش ,, دخلت غرفتي و سحبت رونق معي و سكرت الباب .. و تلمست طريقي لزاوية الغرفه ,, وصلت و ما لقيت اللي أبي ,, تلمست مره ثانية و حسيت بشي ,, سحبته و كان الكشاف ,, أخيرا لقيته ,, فركت حبته و انفتح النور ,, ما كان نور عالي إلى ذاك الحد لكنه كان يكفي للغرض .. : ظلااااام .. ابتسمت على خوفه و رديت و أنا مركز نور الكشاف على وجهي : أنا عندك لا تخافين .. بلعت ريقه و ردت : طيب ليش ما به نور . رديت : فيه ماطور لكن لا جوا ينامون يطفونه . ردت : بس ..... لاحظت صمته و حيرته ,, عارف إنه صعب تتقبل المكان لأنه غريب عليه ,, غير خوفه من أهلي اللي ما تعرفهم !! ـــــــــــــــــــــــــــــــــــــــــــــــــــ رونق ما كنت خايفه لااااا كنت ميته من الخوف ,, أشياء كثيره متداخله ,, حاسه إني متلخبطه و كل شي يصير لي مرعب ... : نامي و لا جاء الصبح يصير خير . تكورت دموعي و طاحت و التفت للجهه الثانيه عشان أخفي دموعي عنه ,, درت بعيوني و دارت يد مطلق اللي به الكشاف على المكان ,, غرفه شبه فارغه إلا من طاوله خشبيه بالزاويه و شي مكوم بآخر الغرفه مدري وشو !! و كأنه قرأ أفكاري لأن ايده كانت تأشر على الشي اللي ما أدري وشو و تكلم : افرشي الفراش و نامي .. تعلقت عيوني و جمدت للحظات : هذا فراش !! ما حسيت بنفسي و أنا أعلي صوتي و ما حسيت إن صدى حروفي لامس مسامع مطلق إلا بعد ما سمعت رده : نامي عليه الليله و بكرى يصير خير .. عضيت شفتي بقوه ,, أنا غبيه وشلون أعلي صوتي ,, أخاف يحسبن استهزئ به ,, بس و الله موب كذا ,, أووووه أنا وش سويت ؟!! حسيت بطعم الدم بافمي ,, حررت شفتي من بين سنوني و التفت لمطلق اللي يراقبن .. " لازم أعتذر عن الخطأ اللي صار من دون قصد " جمله ترددت بداخلي و سعيت لتنفيذه و سط نظرات مطلق !! فصخت عباتي و طويته و حطيته على الطاوله و تقدمت لطرف الغرفه ,, أخذت البطانية المهتريه و فرشته على الأرض و رجعت أخذت البطانية الثانية و فرشته فوقه بعد ما حطيت المخده ,, ما كان المكان يكفي إلا شخص واحد !! التفت لمطلق و رديت : ما تبي تنام ؟!! و كأنه انتبه من غفله لأنه " نز " يوم ناديته و لما استوعب كلامي دار نظره على الفراش و رجع رفع راسه و ابتسم لي ,, رديت الابتسامة .. مطلق و هو مركز نظره على الفراش : لا نامي أنتي أنا ما بي نوم !! رديت : ما تعبت من السفر ؟ رد و هو يتجه لبرى الغرفه : لا عايدي أنتي نامي الحين و ريحي . سألته بسرعه و بخوف : بتطلع ؟ التفت علي و تحسفت إن أمي جابتن و رد : بالبيت مانيب مبعد بس أنتي لا تطلعين أخوي نايف هنيا ! كان كل حرف منه يبشرن بنجاتي من خطأ ارتكبته ,, و كأني نسيت إنه من الأشياء المحرمه عادة إن المره تسأل زوجه وين رايح و هذا الشي تعلمته بمدرسة أبوي عبدالله العادل !! انتبهت إنه طلع من الغرفه قبل لحظات و لفت نظري الكشاف المفتوح اللي تركه على الطاوله ,, أخذته بخطوات سريعه و درت به على المكان ,, ما فيه شي يستدعي الاستكشاف فرشه و بطانيتين و طاوله عليه كم كتاب .. تنهدت و أنا أشوف البطانيه مع إنه مهتريه إلا إني هلكانه و ما بي حيل .. اتجهت لشنطتي اللي عند الباب و سحبته و حطيته جنب الطاوله ,, فتحته و سحبت لي جلابيه بدون تفكير ,, الوضع هنا ما يبيله تفكير ساكنه مع أهل مطلق البدو يعني أكيد الجلابيه هي الأنسب لأغلب الأوقات .. نزلت الكشاف و فكيت سحاب فستاني الوردي الشيفون بسرعه و عيوني تراقب الباب و لبست الجلابيه بسرعه أكبر !! أخيرا خلصت ,, شلت فستاني و حطيته بشنطتي باهمال و مشيت و الكشاف بايدي و شلت البطانية و دخلت تحته و أنا شوي و أختنق من ريحة الغبار ,, ما كانت ثواني إلا و أنا رايحة للعالم الآخر !! ـــــــــــــــــــــــــــــــــــــــــــــ مطلق من شفت نظرات الإحتقار بعيونه و أنا مقهووووور ,, صحيح أي بنت بتنتقل من عيشتها لعيشتنا بتسوي أعظم من اللي سوته رونق ,, لكن أنا توسمت بها الخير و توقعتها أعلى من هالتفاهات بكثير !! لا يا مطلق اصحى ترا رونق ماهي ملك رونق انسانه تحس و تغلط ,, لكن هي غييير !! هي إذا غلطت اعتذرت ,, و هذا اللي صار منه تو .. كان شكله و هي تفرش البطانيه و كأنه من أهل البيت و ابتسامته اللي تبين ندمه على كلمته كفيله بثبات صورة الملاك اللي صار ملكي !! سحبت نفس من الزقاره اللي بإيدي و صورته قدام عيوني ,, نفثت الدخان و أنا أتخيل موقف أمي و أبوي اذا دروا !! يمكن يلوموني على تسرعي بنظرهم ,, لكن الجريمه الحقيقيه بعيونهم هي زواجي من حظريه !! أدري إنها ما بها زود غير بياضها و شعرها الأشقر !! أدري إن بنات صبره أزين منها ,, لكن اللي داخلها ما أحد مثله ,, رونق ضحت بكل شي حلو بحياتها عشان أمها ,, رونق جمالها الداخلي غييييير !! : أنت جيت . ارتعد جسمي على هالصوت و رفعت راسي و لقيت الشايب بجسمه الضئيل و هيبته اللي تجاوز أميآآآآآل !! وقفت بسرعه بكل احترام و تقدمت عشان أحب راسه ,, لكن ايده اللي امتدت و كأنه تمنعن من التقدم ,, كانت كفيله بوقفتي و القاء السلام من مكاني و أنظاري تعانق الأرض .. أنا : بشر عن أخبارك و حالك ؟ تجاهل أبوي سؤالي و رد و هو يتوجه لباب الشارع : اسرع بس لا تفوتك الصلاة . درت نظري على الحوش و رميت الزقاره و دعسته بقهررر .. ــــــــــــــــــــــــــــــــــــــــــــــــــــــــ نايف بعد صلاة الفجر قعدنا نتقهوى أنا و أبوي و أمي و مطلق ,, كالعاده كنت أنا اللي أصب لهم القهوه من بعد اللي صار لمطلق ,, و أمي و أبوي يسولفون بأشياء عامه لكن اللي لفت نظري إن عين مطلق ما فارقت باب حجرته.. قربت راسي منه و سألته : تبي شي أجيبه لك من حجرتك . لاحظت إن عيونه ضاقت و ركز علي نظراته المرعبه و رد : كان تبي أقص رجولك عتبها !! فتحت عيوني مستغرب من كلامه و شاركوني أمي و أبوي بهالشي بحكم إن صوت مطلق كان عالي ... أبو مطلق : وش بكم تلاقطتوا ؟!! رد مطلق و عيونه على أبوي بثبات : يا بوي أنااااااا ..... تزوجت !! للحظات ما كان يدور بيننا إلا النظرات المكذبه لكن مطلق قطع نظراتنا بكلامه : أنا عرست يا بوي !! قاطعته أمي : تخسى يا ورع !! عضيت شفتي و أنا مقهور من اسطوانة التحقير اللي تعاد على مسامع مطلق كل يوم و كل لحظه من أمي و أبوي و تكلمت : مطلق أنت صادق تقوله . رد مطلق : ايه بالله صادق !! كان لصوت أبوي هيبه و هو يتكلم : و علامهن بنات صبره ما خذيت منهن ؟! رد مطلق : بنات صبره ما أباهن .. ردت أمي : أبك ما تقولي وش ناقصهن ؟ رد مطلق : خطبت منهن بس هن اللي ما بغنّي . ردت أمي و هي تقوم من مكانه بصعوبه : كله من فعايل ايدينك .. تحركت بصعوبه لغرفته و ايده تسلل تحت برقعه و تمش دمعاته .... كان شكله بحد ذاته مؤثر ,, آآآه يا مطلق بديت تتصرف مثل الورعان و إلا هذا شي تسويه بدون شور والدينك !! تكلم ابوي و طرف عصاه يرسم غضبه المكتوم على الأرض : و من هم انسباك ؟! رد مطلق : بنت حشيم و مطيعة لله يا بوي !! قاطعه أبوي بحده : أسألك عن نسبها ! رد مطلق : ما هي من هنيا .. رفع أبوي نظره و تكلم بسرعه : لا تصير جايب لنا من متمدنة من الحفر . قاطعه مطلق : لا يبه هذي من ..... من القصيم !! شهقت و التفت علي مطلق و خزن بنظره حاره و تكلم : ناسبت عبدالله العادل ... سأل أبوي : العادل !! و كمل : من أيات بطن من بطون قبيلتنا .. رد مطلق بدون مبالاة : ماهي منا ,,هي قبيليه ........لكنها حضريه !! غمضت عيوني و أنا أتخيل أبوي يموت بعد هالصدمه ,, حضريه !! العصا اللي بيده انغرست بالأرض الجافه من شدة غضبه تكلم و هو صار على سنونه : طلقها و أنا اللي بزوجك من بنات صبره .. رد مطلق : حرمتي بحجرتي يا بوي .. ارتفعت أنظار الوالد لغرفة مطلق للحظات موب شويه ثم رجع ركز على مطلق و تكلم و صوته مخنوق : بيت بن عايض ما ينضام به أحد .. و كمل و و يتنهد بقهر : و دامها دخلت لبيتي لها الحشيمه مثلها مثل بناتي . و رفع ايده يأشر على مطلق : و أنت لازم تعلمها سلومنا و إن فشلتنا بربعنا و جماعتنا ترى مالها مقعاد عندنا .. و قام أبوي من عندنا و طلع و كأنه ولد العشرين بسرعته ,, سمعنا الباب يتسكر و التفت أشوف مطلق أبي أتأكد هاللى صار حلم و إلا علم .. و سألته لما شفت عيونه معلقه على الباب اللي طلع منه الشايب : مطلق ليه كل هذا استوى !! لف وجهه علي و رد : تزوجت على سنة الله و رسوله .. لاحظت ايده المنقبضه و تصرفت بسرعه ,, قمت و حبيت راسه و تكلمت : مطلق ما يطقها مايله ,, مبروك يا خوي .. تنهد و ابتسم و لف راسه يطالع غرفة أمي بدون لا يرد ,, فهمته !! مطلق ما يغمض له جفن و العجوز زعلانة عليه ,, رديت و أنا أربت على يده : بترضى لا شافتها .. و كملت لما سمعته يتنهد : تدري يا مطلق أمي تعجبها البنيه العاقل السنعه ,, و أنت ما أظنك إلا صويّب برمياتك ,, كيف و هي مريتك .. و أخيرا رد مطلق بهدوء : تزوجتها البارح !! رديت باستغراب بعد ما عدلت جلستي : وشلون زوجوك بدون أهلك .. ابتسم و رد : أخوك ينشرا يا نايف . رديت بابتسامه : و نعم و الله .. رد مطلق و هو يقوم : ما عليك زود .. راح لغرفته و عيوني ما فارقته ,, من زمان ما شفت الفرحه بعيون مطلق ,, الله يديمها من سعاده يا خوي !! ـــــــــــــــــــــــــــــــــــــــــــــ رونق .. حسيت بازعاج و فتحت عيوني ,, كان الجدار المتشقق قدامي ,, عقدت عيوني أحاول أتذكر ,, لكن صوت شبه مألوف وصل لمسامعي .. : ما عاد إلا خير يا مره قومي .. التفت للصوت و شفت مطلق قدامي ,, ابتسم لي ,, نهضت بسرعه و أنا أرتب شعري ,, لا حظت النور اللي منتشر بالغرفه و سألت: كم الساعه ؟! رد مطلق : سبع إلا عشر !! عقدت حواجبي و رديت بانزعاج : ما صليت الفجر !! رد مطلق : الحين صليها .. قمت واقفه و تذكرت الحمام كيف أروح له ,, لكن مطلق بادرن بكلامه : البسي غطا و اطلعي للحمام اللي بطرف الحوش .. لبست عباتي و طلعت من الغرفه ,, كان الحوش صغير و فيه بطرفه فرشه و واحد عليه ثوب و لاف شماغه و شكله غارق بهواجيسه .. حسيت بيد مطلق تربت على كتفي رفعت راسي و شفت ايده تأشر على الحمام اللي بطرف الحوش ,, اتجهت للحمام عشان أتوضى لصلاة الفجر بدون أي كلام .. . . . . السلام عليكم و رحمة الله ,, السلام عليكم و رحمة الله .. مع تسليمتي الثانيه شفت مطلق منسدح على البطانيه ,, كسر خاطري شكله تعبان ما نام ,, قمت من السجاده و طويت عباتي و قربت له أبي أشوف هو قايم و إلا نايم .. : صاحي .. شهقت و تراجعت على ورى ,, لكنه قام و ابتسم و تكلم : هههه ثره موب بس الظلماء اللي تخافين منها .. عضيت شفتي و ابتسمت و أنا أشوف ايده تواسي شعره المبعثر و تكلمت : ما خفت بس نزيت !! ضحك و رد : ما انشقت بس تخر .. ضحكت على كلامه ,, لكن شي جاء ببالي و قطع ضحكتي : أهلك ... قاطعن مطلق : دروا و الحين امشي معايه سلمي على أمي .. بلعت ريقي و صورة المرة الشريره تنرسم بمخي و مشيت بخطوات متردد ورا مطلق ,, لكني وقفت بسرعه و ناديته : مطلق اصبر شوي .. رحت بسرعه لشنطتي و طلعت منه مرايه صغيره و الكحل ,, كحلت عيوني و تأملت شكلي ,, ما كان بوجهي إلا الكحل حتى شعري قصير فوق كتفي !! ابتسمت و أنا أشوف مطلق يدخل راسه يبي يشوف نفسه بالمرايه .. و تكلم مطلق : شوفي هالوجه عند وجهتس و بتعرفين ساعتها إن الله أنعم عليتس .. ابتسمت و تحولت ابتسامتي لضحكه لكن مطلق سحب ايدي و رد : ايه فرحتي انتس ازين من ,, امشي يالله .. مشيت مع مطلق طالعين من الغرفه بعد ما تغطيت ,, درت نظري على الحوش الفاضي ,, و ما طال تأملي لأن يد مطلق قادتن لغرفه بالجانب الثاني من الحوش .. و صلنا للغرفه و ترك يدي و دخل و مشيت أنا وراه .. ما تبين لي شي من الغرفه لأن غطاي ثقيل و توتري أعمى عيوني عن اللي قدامي .. لكني سمعت مطلق يتكلم : يالله حيها الغاليه .. شفته متكومه لكني ما انتبهت لملامحه و ما سمعت أي رد منه إلا من مطلق لما كمل كلامه : هذي حرمتي ,, شيلي غطاتس يا مره ما هنا أحد .. شلت الغطاء عن وجهي و طاحت عيوني بعيونه ,, هذي أم نايف !! جمدت بمكاني من الصدمه لكن صوته الحاد أخترق أذني : الحضريه ؟!! و كملت : يا حيها اخت هدى .. ابتسمت و طاحت غشاوة الرعب اللي عمت قلبي من دخلت هالبيت و تكلمت بصدمه و فرحه : أم نااااااايف !! اتجهت لأم مطلق بخطوات متسارعه و طحت بحضته و دموعي ترسم له خوفي من هالمواجهه اللي ما كانت لا على البال و لا على الخاطر !! ــــــــــــــــــــــــــــــــــــــــــــــــــــــــــــ مطلق " أم ناااااااايف " " أم ناااااااايف " " أم ناااااااايف " أكره هالكلمه و أي أحد يقوله ,, صعب على أي واحد أنه بين يوم و ليله تتنكر له أمه و تتسمى باسم أخوه اللي أصغر منه ,, كانت تردد براسي و كأنه حديد يضرب راسي ,, و خصوصا إذا جت من أحد ما تتوقع إنه تجي منه " رونق " !!! . . . شفت دموعه اللي غسلت وجهه و هذا أكثر شي أسعدني ,, هي حبت أمي و أمي حبتها ,, الواضح إنهم يعرفون بعض ,, سريره جنب سرير أمي بالمستشفى ,, معلومه غابت أو غيبت عن بالي !! يا ربي لك الحمد اللي فرجت لي هالكربه يآآآآآ رب !! نهاية الجزء التاسع عشر .... |
كلمتين بقولهن للقراء .. شكرا يا أحسن منتدى ,, و معليش بوف تنزيل لأن امتحاناتي تأثرت .. آآآ سفه لكن قدروا ظروفي .... |
عذرك معك نبوض ننتظرك بعد الاختبارات ان شاء الله
لي عوده بالرد بعد القراءه ************** وهذي عوده بعد القراءه البارت اليوم متركز وبقوه على شخصين رونق ومطلق بدايه حلوه تفهمهم لبعض مراعاتها لشعوره وهو لطفه معها وخوفه عليها من جرح المشاعر من هله *********** موقف ام مطلق وضيقه مطلق وراحته بعد ارتياح رونق وراحتها بين يدين امه جد جد موقف مؤثر نبوض ننتظر القادم بشوق بس لنا شروط بليزززز بليززز طولي البارت القادم شوي |
ياهلا وغلا ببنت القصيم00000اشتقنالك00000وعذرك معك الله يوفقك0000
رونق و مطلق : وما تضيق حتى تفرج باذن الله ,,ليس كل مايتمنى المرء يدركه خصوصا في مسالة الزواج ,, فالبدايه تكون صعبه على الطرفين لكن مع العشره والتعود يتاقلم كل من الزوجين وهذا ما نستبشره بين مطلق ورونق 000فما اراه يلوح امامي بالافق موده رقيقه خالصه بينها لطيبة قلبيهما وحاجة كل منهما للاخر000000ظلما من قبل اقرب واحب الناس لهم00000000كسرا وذلا من ناس احتلت في قلبيهما الكثير وبزواجهما00000000لن يجدا رفيق مناسب ياوي كل منهما اليه سواهما من خلالها ستذوب كومة الجليد الصاعقه في مشاعر اهله تجاهه,, فهي قلب تعجز القلوب الا تحتويه00000وبطيبة قلبها ستقرب ابواه اليه فالاب انسان خير تقبل وجودها من دون ان يراها حتى او يلتمس اخلاقها الطيبه0000000000 ومن خلاله سترى الحياه والحب والثقه اللتي لفتقدتها منذ زمن00000 مشكووووره على البارت الحصري بمطلق ورونق00000000 |
........السلام والرحمة
يسلموووو نبوووضه على هالبارت من يد مانعدمهااااااا مطلق ورونق اتوقع ام مطلق...يكسسر خاطري~ مطلق لآجل هييك بقول ام مطلق مانيب قايله ام نايف ههههههه اللحين مطلق رونق جرحته بالصميم من دون ماتعرف...ياترى لو عرفت انو مطلق الاكبر هل بتظل تناديها بـ ام مطلق او بـ ام نايف بس اتوقع رونق بتصلح الامور بينهم~ واكيد في سوء فهم بين ام وابو مطلق واكيد انو مطلق مظلوووم معقوله وحده من بنات متبليه عليه بشي لاسمح الله .......................... افتقدنا نهى ومي وعزام وتركي~ اكيد االامور بينهم من اسوء لـ اسوء |
السلام عليكم ..
يعطيك العافيه نبوضه . والله يوفقك و ييسر لك أمرك .. جزء يبين بداية علاقة رونق مع طبيعة حياة مطلق اللي أصدمتني بصراحه .. طلع الرجال بدوي بدوي مو أي كلام .. الله يعينك يا رونق ع الجاي مهما كانت متفهمه أكيد راح تواجه صعوبه بحياتها .. ظهور نايف و حديثه عن أخوه ولباقته وأحترامه الشديد ما أتوقع جاي من فراغ ، يمكن هـ النايف يحل مشكله أو يكون له قصه مع أحد أبطالنا بالقادم .. إهتمام مطلق بوالدته راااائع جداً و إن شاء الله ترضى عنه قريباً .. يعطيك العافيه وربي يوفقك إن شاء الله و تبشرينا بنجاحك يا رب.. |
الله يوفقج حبيبتي وايسر امورج
تسلمين فديتج عالبارت<< الفيس راعي الورود رونق ومطلق تعالي اهني يعني لازم تعلين صوتج.. زين لج زعلتي الريال<< فيس يحرك راسه..لا شكلك مسوي شي جايد اللقاء بين ام نايف ورونق لقاء رائع<< فيس خنقته العبرة نترياج فديتج<< الفيس راعي الورود http://www.liillas.com/up3//uploads/...29afe633ce.gif |
اهلين يعطيك العافيه على البارت
والله استانست ان رونق اخذت مطلق وتركت الكل ومنهم تركى لكن زعلت على روحتها برا القصيم وترك اهالها وخاصه فيصل وين الى عرفت ام نايف وحبتها على الاقل ترتاح شوى يعطيك العافيه ومقدرين ضرفك ياالغاليه والله يوفقك بمتحاناتك وترجعين بالسلامه |
:Welcome Pills4:
تشكررررررررررررررررررات ع البارت ترى البارت كلمة رائع قليلة عليه لمعرفة السابقة بين رونق وام مطلق بتكون سبب قوي لتخفيف توتر رونق من العيشة في مكان بعيد عن اهلها لكن ف نفس الوقت الخوف كل الخوف ليطله حاسد يدمر العلاقة بينهما ابو مطلق لا تخاف ترى رونق اهل السنعوبتترتحومعها وبتكون سبب سعادة بينكم السؤال اللى محيرني ايش سبب زعل مطلق وابوه :dancingmonkeyff8: موفقة باذن الله ف دراستك بس لدى همسة لا تتاخري كثير ترى يفقد القصة وبهجتها البعد وع قوله المثل اللى بعيد عن العين بعيد عن القلب الا انك ف العين والقلب يا نبووووووووضة:friends: |
السلام عليكم و رحمة الله و بركاته بعد الاختبارات عدت لأقرأ الأجزاء الأخيره ثم عدت لكم بجزء متواضع ,, الجزء العشرين : ( كلن يغني على ليلاه ) قبل أن ألتقي بنفله و وضحى تخيلت أنه لا يوجد هم يضاهي همي ,, و لكن الآن أيقنت أني لست الوحيده الحزينه فثم أناس حولي لديهم ما يثقل كاهلهم من الهموم !! رونق ما أدري ليه يوم شفت أم نايف نسيت الدنيا كله ,, سلمت عليه و سألته عن حاله و سألتن عن أحوالي ,, أخذنا وقت و حنا نسولف و ما انتبهت لمطلق اللي تركنا و طلع ,, شفت أنظار أم نايف توجهت للباب ,, خفت ألتفت و ألقى واحد من أخوان مطلق لكني سمعت أم نايف تتكلم : يا حيها بنت عايض .. التفت و شفت البنت اللي واقفه بالباب ,, كانت طويله و نحيله و يغلب عليه البياض ,, كانت شايله بين ايدينه لفه بيضاء و حواجبه معقوده و عيونه الواسعه تتفحصن ,, تكلمت أم نايف : هذي بنتي نفله ,, هاتي الورع يا بنت هاتيه .. تقدمت البنت بهدوء و حطت اللفه البيضاء بين ايدين أمه ,, صاح المولود و حرك ايدينه ببطء ,, ركزت نظري عليه للحظات ثم رفعت راسي للوجه القريب منّ ,, لاحظت إنه ما زالت عاقده حواجبه و تتفحص وجهي باستغراب ,, التفت لأم نايف لقيته لاهيه مع البزر اللي بين ايدينه !! رجعت التفت لنفله و تكلمت بعد ما بلعت ريقي : أنا رونق !! ما زالت نظراته مستغربه لكني قطعت عليه و كملت : مرت مطلق .. كتمت ضحكتي اللي ما تناسب الموقف و أنا أختم حروفي لأن ارتباط اسمي بإسم مطلق شي مضحك فعلا !! لاحظت إن عيونه شخصت و ركزت نظره للبعيييييد ,, كان فيه شي غريب بعيونه ,, حزن مع شي غرييييب يمكن خيبه أو قهر .. ما سمعت منه أي " هلا " أو " حياتس الله " و هذا المتوقع وسط نظراته الغريبه .. أم نايف : وش أخبارتس يا نفله ؟!! بللت نفله شفايفه و ردت و عيونه تتفقدن : الحمد لله يمه !! نزلت راسي و رجعت أرفعه لكني شفت بنت ثانية تدخل بسرعه و تتجه لنفله ,, أم نايف : وضحى قطعتس الله سلمي على مرت أخوتس .. التفتت وضحى و ركزت نظره علي للحظات ثم تكلمت بفزع : و نوره !! ردت أم نايف : علامها نوره !! ردت وضحى : أخوي يبي نوره !! جمدت عظامي مع هالكلمه ,, فيه بنت ثانيه بحياة مطلق ,, للحظات حسيت إن صدري ضاااق و ما عاد يحتمل اللي بداخله لكن حروف تسللت لأذني ........ أم نايف : يا بنت أنا ما أقصد نايف أنا أقصد أخوه ؟!! ردت وضحى : مرت من .. مـ... مـ...ـطلق !!!!! كانت تنطق حروفه ببطء شديد و هذا اللي خلان أستوعبه ,, مع إني استغربت إن خالتي أم نايف ما نطقت اسم مطلق إلا إن شي من الراحه دب بأوصالي !! أقبلت وضحى تسلم علي و أنا ودي أدفه بسبب الموقف اللي سوته بي ,, موتتن من الخوف عشان هاللي اسمه نوره و أخر شي تصير مرت نايف !! بعد ما سلمت علي جلست و بدت تسألن عن اسمي و من وين أنا ,, كنت أجاوب على أغلب أسألته و اللي ما يعجبن أتلافاه بسؤال ثاني ,, وسط نظراتهم المتعجبه من وجودي بينهم ,, كنت بين اللحظه و الثانيه أسمع أم نايف تهاوش وضحى على أسألته الكثيره لكن وضحى ما تسكت شوي الا و ترجع تسألن ,, وسط هالمعمعه كانت نفله تراقبنا للحظات و تنشغل بمولوده بلحظات ثانية ,, حالته غريبه و صمته أغرب ,, ما كان يشابه صمته إلا كل جدار بهالبيت و ما كان يشابه شكله شي بالدنيا جميله لكن شي منكسر بعيونه ,, يمكن هم أو غم أو حتى بقايا من قهررر !! كان الوقت يمر بسرعه مع أسئلة وضحى اللا منتهيه ,, لحد ما سمعت وضحى تنطق بكلمات احترت به وشلون أجاوبه !! وضحى : أبك وشلون أهلتس زوجوا مطلق من دون أهله ؟!! انتظرت أم نايف تزجر وضحى أو تقاطعه ,, انتظرت التمثال " نفله " تتكلم , انتظرت حتى الصغير يصيح ,, لكن أي شي من اللي أتمناه حصل ,, كانت عيونهم تترقب الاجابه و أولهم أم نايف ,, بللت شفايفي و أي كلمة مجامله بقاموس حياتي نسيته ,, : هم شروا ولدتس يمه !! التفت للصوت و طاحت عيوني بعيون مطلق اللي تقدم و حب راس أمه ,, لكن أمه أطرقت راسه بسكون عجيب ,, ابتسمت لمطلق بامتنان و أنا أشوفه يتخذ مكان بيني أنا و وضحى ,, لمحته و هو يسولف مع أمه و يخطف بين اللحظه و الثانية نظره لنفله ,, ركزت نظري عليه و غرقت بهواجيسي و ما نبهن إلا يد وضحى الممدوده ..... وضحى : فنجالتس لطعني يالحظريه اخذيه . مديت ايدي بسرعه و تناولت الفنجال بحياء ,, حطيت الفنجال بالأرض بعد ما رشفت منه رشفه و رفعت راسي ,, طاحت عيني بعين مطلق و ابتسمت له ,, ما أعرف ليه ابتسمت لكن الأكيد إنه كان نفسي أقوله بأعلى صوتي ,, شكرااااااااااا !!!!!!!! ــــــــــــــــــــــــــــــــــــــــــــــــــــــــ مطلق ,, بعد اسبوع ... دخلت البيت و نزلت السطل على الأرض و توجهت للحمام ,, أخذت ماء بين ايديني و كبيته على بقعة الحليب بثوبي ,, ضربت مكان البقعه بإيدي و رجعت كبيت عليه ماء مرة ثانية و ثالثه لين تفتحت البقعه لكن الماء ما زال يرسم آثاره على ثوبي الرصاصي .. طلعت من الحمام و لقيت رونق شايله السطل و متجهه للمطبخ ,, كان البرقع اللي عطته أياه أمي مضحك عليها ,, كان وجهها عريض و عيونها صغار يعني ما كان البرقع يناسبها لكن بياض بشرتها يضفي على البرقع شي ثاني أو يمكن سحر ثاني !! تبعتها بخطوات خفيفه متجه للمطبخ لكن قبل لا أوصل شفت أمي طالعه من المطبخ ... أمي : قواتس الله يا بنيتي . ردت رونق : الله يقويتس يا عمه .. و دخلت رونق المطبخ من دون ما تحس إني أمشي وراها ,, تقدمت و ألقيت السلام على أمي .. لكن أمي كالعاده ردت علي بسرعه و أقفت رايحة للمجلس و كأني أصغر بزر بالديره ,, طلعت رونق من المطبخ يوم سمعت صوتي .. رونق بابتسامه : هلا و الله جييييت !! نسيت أو بالأحرى تناسيت اللي سمعته من أمي و رديت بضحكه و أنا متسند على باب المطبخ : لا قدني عند النياق . ضحكت رونق على كلمتي و غرقت بضحكته حتى عيونه الصغار راحن مع الضحكه ,, كنت أتأمل شكله البريء لين سمعت صوت أبوي و هو يتنحنح داخل للبيت .. تعدلت بوقفتي لما سمعت صوت أبوي اللي كله مهابه و أسدلت رونق برقعه على وجهه لما سمعت صوت أبوي بالسلام يتبعه صوت نايف أخوي .. و ردينا السلام أنا و ياها .. سألت رونق أبوي بعد ما شافت نايف دخل المجلس : أصب لك رويبه يا عم .. لكن أبوي كمل طريقه من غير ما يرد ,, الواضح إنه ما سمع صوت رونق الهادي !! علّت رونق صوته و تبعت أبوي بخطوات سريعه : عمي أبو نايف ,, عمي أبو نايف !! وقف أبوي بجسمه الهزيل و التفت على رونق ,, و بادرته رونق بالسؤال مره ثانية : أصب لك يا عمي رويبه !! رد أبوي : لا يا بنتي ما أشتهي !! تراجعت رونق بخطوات بطيئه ما تشبه أبدا ضربات قلبي العنيفه ,, مر اسبوع و أنا أحاول أتعايش مع الوضع لكن اللي أسمعه لا يطااااق ,, أبو نايف أم نايف ,, أبو نايف أم نايف !! و مطلق وين رآآآآآح ,, نسيتوه و إلا الزمن نسّاكم ؟!! كلهم كنت أتحمل اللي أسمعه منهم إلا رونق لا و ألف لا ,, صريت على سنوني و شديت على قبضة ايدي و أنا أشوفه تمر من عندي متوجهه للمطبخ ... لفيت إيديني العريضه على عضده الهزيل و سحبته لي بقسوه و قربت أفمي لأذنه و همست : يا ويلتس إن سمعتس تنادين أمي و إلا أبوي بنايف !! ــــــــــــــــــــــــــــــــــــــــــــــــــــ رونق تلاشت صورته من قدامي بعد ما امتلت عيوني دموع ,, مررت ايدي على عضدي و أنا أنطق الآآآهـ متقطعه من الوجع اللي أحسه بإيدي ,, مررت ايدي تحت البرقع حتى أمش دموعي بأطراف أصابعي ,, سمعت أصوات اختلطت تقرب من المطبخ ,, أسرعت بخطواتي داخله للمطبخ و جلست بجنب القدر و فتحت الغطاء و أنا أسمع وضحى .. وضحى : يقولون يبون الغداء .. بلعت ريقي و رديت و البخار اللي منتشر من القدر يغطي المكان : هالحين . ردت وضحى : وش بتس ورا صوتس تسذا ؟؟ تنحنحت و رديت : لاااا بس شرقت من البخار .. تمنيت إنه كان عندي الشجاعه أسأله لكن أسأله عن إيش أنا ما أعرف ليه مطلق عصب علي ,, وش الغلط لاناديت عمتي أم نايف أو حتى عمي !!! حاسه إني بلغز موب عارفه وشو غلطي ؟؟ : وراتس ما تتنــــتســـــبينه " تنكبينه "؟؟ رفعت راسي لوضحى و قمت بسرعه من مكاني ,, أخذت الصحن الدائري منه ,, حطيته على الأرض ,, مررت الملاّس على الرز أفكك تكتلاته ,, بديت أغرف الرز و أحطه بالصحن لين بدت تختفي الورده الحمراء المرسومه بوسط صحن الغرش ,, شلت الصحن الثقيل و قربته لوضحى اللي بدت تنقى زين اللحم و تحطه على الرز ,, شلت الصحن بصعوبه و شالت وضحى اللبن و الدهن و مشينا متوجهين للمجلس ,, ــــــــــــــــــــــــــــــــــــــــــــــــــ وضحى على دخلة أبوي للمجلس طلعت ,, لكن قبل لا تعتب رجلي باب المجلس شفت مطلق الثاني ,, مطلق اللي إذا عصب ما يشوف حتى النار اللي بطريقه ,, وقفت بمكاني و انحنيت أحك رجلي ,, ما كنت أبي أطلع و أحرج رونق ,, حاولت أتأخر قد ما أقدر و انتبهت على صوت أبوي .. أبوي : علامتس يا وضيح !! رفعت راسي بسرعه و رديت : ما بي شي يبه !! تقدمت بخطواتي و عيوني على أبوي اللي جالس و متسند على المركى ,, حسيت بارتطام جسمي بشي قاسي ,, جدار بالأحرى !! : شوفي طريقتس و أنتي تمشين !! رفعت راسي و شفت مطلق بجسمه العريض يتلافان داخل للمجلس ,, كملت طريقي للمطبخ بخطوات سريعه .. كنت عارفه إن رونق متضايقه لكن منيب عارفه وش اللي صار و هذا اللي يخلين ما أقدر أتدخل ,, كلمته و عرفت من صوته إنه متضايقه أو حتى صايحه ,, مع إني ما أدري وش اللي صار بينهم لكن المفروض إن مطلق ما يسوي شي و هو مالهم إلا اسبوع معرسين !!!!!!! خلصنا منــتســبين الغداء و توجهنا للمجلس ,, و عند باب المجلس لاحظت تردد خطوات رونق بعد ما وصلنا للمجلس .. أنا : وراتس وقفتي ؟؟ التفتت علي رونق و ردت : هاه لا هذاي ما وقفت !! تابعت رونق خطواته داخله للمجلس و حطت الصحن بعد ما حطيت السفره ,, يمكن تستغربون بس هذي عادتنا أهل البيت ياكلون جميع ,, كانت أمي لابسه البرقع لأن عاداتنا الحريم يلبسن براقع اغلب أوقاتهن حتى بحضرة رياجيلهن ,, حتى رونق لابسه البرقع لأن نايف يتغدأ معنا أما أنا لاااا لأني ما أحب البرقع و عساي أتحمله اذا طلعت ,, رونق كانت بيني أنا و أمي ,, سمينا و بدينا نأكل بعد ما صبينا الدهن على أكلنا باستثناء حافة رونق .. بالعاده تسرق نظرات لمطلق بين الفتره و الثانيه لكن اليوم عيونه ما فارقت الصحن .... ــــــــــــــــــــــــــــــــــــــــــــــ رونق : من بعد الغداء ما شفت مطلق صليت العصر و راسي يعج بآلاف الأفكار ,, حسيت إني توصلت لشي يمكن أنا ناسيته ,, مطلق جسمه أكبر من جسم نايف ,, و نايف يحترم مطلق و كأنه الكبير ,, يمكن هو الكبير و أنا ما أدري ,, طيب وش اللي يخلي أمه و أبوه يتسمون بإسم نايف ؟؟!! شي يحيّر ,, يمكن مطلق ميب ولدهم أوووو ,, ما أعرف و الله ما أعرف لازم أسأل أحد بس وش أقولهم ؟؟!!! أخاف يحسون بشي ,, ياآآآآآآآآ الله !! إيــــــــه أسألهم من هو أكبر واحد .. يووووه يبي يحسون إني ما أعرف شي ,, إييييييه تذكرت أسأل عن مطلق و نفله أيهم أكبر و بكذا أقدر أخلي وضحى تخر لي السالفه كله .. طلعت من غرفتي بعد عدلت برقعي و لبست جلالي شفت وضحى تفتح الباب طالعه لكن صوتي استوقفه : وضحى !! التفتت علي و عيونه الواسعه مع بشرته السمراء راسمه صوره أحلى للبرقع عليه : هاه .. رديت : وين أنتي رايحه .. ردت و هي تلفـّت : أبروح أحطب مع بنات خالي .. حسيت إنه هذي فرصتي أطلع معه و اسأله بالطريق : طيب ما يخالف أروح معتس .. أقبلت علي بخطوات بطيئه بعدين ردت بارتباك : ايه تعالي أوريتس بنات خالي .. مشيت بسرعه متجاهله ارتباك وضحى و طلعت معه نجيب الحطب ,, كانت الديره صغيره و البيوت به ميب كثيره ,, و موزعه بشكل عشوائي ,, كان فيه عدد قليل من النياق السايبه بينهم ,, كان الزي السائد لذكورهم على مختلف أعمارهم هو الثوب مع اختلاف ألوانه من البني للرصاصي للأبيض المصفر من الغباااار !!! : أعجبتس الديره ؟؟!!! سكت لما سمعت سؤال وضحى لأن جوابي ما راح يعجبه ,, يمكن أعجبتن الديره لكن ما اعجبتن عيشة التقشف به ,, عمري ما كنت مدلعه ببيت أهلي لكن عمري ما مريت بالحياة الشاقه و لا حتى بالحلم !! تابعت وضحى كلامه لما ما سمعت من رد : يمكن ما تعودتي على عيشتنا لكن مع الأيام تبي تتعودين و تحبينها ,, حياتنا على قساوتها إلا إنها فيها اللي يخلينا نحبها .. ابتسمت و أنا أتلافى الرمث اللي قدامي و تكلمت : و وش اللي يخليتس تحبينها ؟!! حسيت من سكوته إنه تخفي شي لكنه تكلمت : قولي و الله ما أعلم أحد !! ضحكت و رديت : يمه شكل عندتس شي خطير !! ضحكت و ردت : أو احلفي و أقول لتس .. رفعت اصبعي و تكلمت : قسم بالله ما يدري أحد بس اصبري أكيد سرتس يخص نفله .. ردت وضحى : لا وش دخل نفله .. رديت : ما أدري نفله غريبه !! ردت وضحى بحزن : و الله موب هاذي هي ,, بس بعد موت ساري ولد عمي صارت تسذا !! رديت : هي أخذه ولد عمه .. ردت وضحى : ايه و ساكنه عند عمي الحين عشان ولده .. مر وقت و حنا ساكتين كنت أحاول اصيغ سؤالي اللي أبسأله اياه لكنه سبقتن بكلام ثاني : تعرفين بنات خالي فيحان .. رديت : شفتهن مره ببيتكم .. كملت وضحى : المهم إنهن صديقاتي و من يوم أنا صغيره وحنا نحطب مع بعض ,, كانت أسرارنا عند بعضنا لكن فيه سر واحد ما أحد يعرفه عن .. رديت بشغف : وشو ؟؟ ردت بعد سكوته للحظات و كأنه ترتب الكلام اللي بتقوله : أنا أحب القرايه (القراءه) و بنات خالي يتطنزن علي دايم ,, تعرفين بالديره من يبي يجيب لي كتب ,, لكن أحيانا يجيب لي مطلق و أقراهن كم مره لين أحفظهن ,, عاد مره ذكرت لي مها بنت خالي إن أخوها سطام عنده كتب .. رديت : أيهم مها الوسطى .. ردت وضحى : لا مها الكبيره و بعدها ساره وأصغرهن وضيح سميتي .. و كملت لما أشرت براسي علامة لــ إيه : ايه قلت لتس إن أخوهن سطام عنده كتب و سطام هذا مستحيل يفرط بكتبه غير إن خواته يخافن ياخذن شي منه لأنه يخوف ,, ضحكت و رديت : شكله مخوفتس أنتي بعد .. ردت وضحى : قسم لا شفته ينغرف قلبي من الروعه .. و كملت : المهم إني حلم حياتي أخذ من هالكتب اللي عنده خصوصا لا سمعت مرت خالي تتويـّّل من حوسة غرفته و كثرة كتبه و دايم تقول لو هو بدال هالقراطيس شارين له ناقه أحسن له .. ضحكت و علا صوتي و أنا أرد : يا حبيله أمهم على نياته !! ردت وضحى : عاد ودتس تشوفيني يوم طلبت من مها تجيب لي كتاب كنت أتنافض أكثر منه ,, رديت بسرعه : جااااابته ؟!! ردت وضحى : بعد الموت طاعت .. رديت بشهقه : منتب صاحيه !! ضحكت وضحى : لو تدرين وش لقيت بالكتاب ,, وقفت و مسكت ايده : وش لقيتي ؟؟ ردت : لقيت كم بيت من القصيد كاتبهن بحدا الأوراق و كاتب اسمي بهن .. و ضحكت بحياء !! قرصت طرف عيني و رديت بلعانه : يمكن ما يقصدتس .. ضحكت : قلت مثلتس بالأول همن يوم ركزت بكل اللي يسويه لاحظت إنه معي غير صح إنه ما يبيـّن لي شي و لا عمري سمعت منه إلا السلام لكن جيته للمحطاب كل يوم بزعم إنه يتطمن على خواته .. و أشياء كثيره تأكد لي إنه يشيل بقلبه شي لي ,, لكن عزة الرجل ما تخليه يعترف باللي بقلبه .. رديت : عزته و إلا غروره .. مشت وضحى و تابعت كلامه : الحمد لله إنه ما اعترف لأن الدنيا ميب على كيفنا و أنا ما ودي إني أعلق روحي به بس وش أسوي ؟؟ رديت : وراه وش المانع ما تتزوجينه .. ردت بحزن : باقي لعمي ولد واحد و أكيد يبي يزوجوني اياه . شهقت و رديت : ملفي ؟؟ ردت بحزن : ايه ملفي ,, شفتي ملفي على وجهه يعني حبيّب على قولة العرب و مع ذلك يغطي عيوبه و خفة عقله إنه ولد عمي ,, آآآه يا رونق لو تشوفين البزران لا لحقوه قسم يتكسر قلبي عليه و على نفسي من قبله اللي أبصير حرمته بيوم من الأيام !! : يا حيها الحضريه معكم .. التفتنا على الصوت و شفنا ساره تركض جايه لنا و وراه خواته مها و وضحى يتسابقن .. ساره و هي تلهث من التعب : جيتن قبلنا اليوم .. ردت وضحى : القطي نفستس ثمن احتسي !! ساره : مالتس دخل !! ردت مها بعد ما وصلت : يا هب يا هاللسان ما يمل من الشتايم .. وضيح و هي تلهث : و الله ما تقولينها قدام سطام !! ضحكنا و انتشرت قهقهاتنا بالمكان لكن حمرة وجه وضحى بعد ذكر سطام خلتن أغير رايي و ما أسأله هالحين !! ــــــــــــــــــــــــــــــــــــــــــــــــــــ نفله حطيت الحطب على النار و بديت أنفخ ,, شي من الدخان دخل لصدري لأني بديت أكح ,, كان صوت ولدي و هو يصيح عند أذاني لكن المفروض إني ما اترك شغلي بحضرة عمتي ,, كنت أسمع صياحه يزيد و أهمس بصدري : بس يمه هذاي جيتك .. وقف الصوت ,, دق قلبي و رفعت راسي بسرعه ,, شفت عمتي تضمه له و تهزه ,, رجعت قربت راسي للضوء و بديت أنفخه مره ثانيه لكن ايد سحبتن .. رفعت راسي لنوره اللي تتكلم : قومي رضعي ولدتس أنا قضيت شغلي خلين أكمل عنتس !! نهضت و نفضت الغبار عن ثوبي و تناولت نايف من عمتي متجاهله عيونه الصارمه ,, حطيته بحضني و ألقمته ثديي بعد ما أسدلت الجلال علي ,, كنت أراقب عيونه و خشمه و أفمه ,, كل شي به يذكرن بساري اللي يرحمه ,, سالت دمعه من عيوني و طاحت على خد نايف ولدي ,, نز وليدي يا بعد كلي و صاح ,, مسحت الدمعه من خده و تابعت رضاعته و أنا أسمع كلام نوره : تحملي يا نفله عشان ولدتس و لا تحسسينه بشي باتسر يبي يكبر و ما يبي يشوف الدمعه بعين أمه .. سكتت شوي و رجعت تابعت : و لا تشيلين بخاطرتس على أمي تراها طيبه مير اللي صار خلا أمي يطير عقلها هذا ساري الغالي ماحد تحمل فقده !! عضيت على شفتي و أنا أتمتم : الله يرحمه و يصبرني يآآآآآآ رب !! ـــــــــــــــــــــــــــــــــــــــــــــــ رونق دخلنا البيت و حطينا الحطب بالحوش ,, نفظت الغبار عن ثوبي و مشيت متجهه للمطبخ أبعجن للعشاء المغرب ما باقي عليه شي ,, لقيت عمتي طالعه من المطبخ ,, حبيت راسه و سلمت و ردت علي السلام ,, أنا : تبين شي يا عمه قبل أروح أعجن !! ردت : لا ارتاحي يا بنيتي أنا عجنت و أنتي من الصبح ما قعدتي .. ابتسمت و رديت : طيب تعالي أصب لتس فنجال بالمجلس .. ردت عمتي و هي متجهه لغرفته : لا أبروح لحجرتي جيبي القهوه هناك و تعالي سولفي علي .. رحت باستعجال للمجلس و أخذت القهوه اللي بجنب الجمر و أخذت معه فنجالين و طلعت متجهه لغرفة عمتي و أنا أحاول أرتب السؤال اللي أبقوله له .... ـــــــــــــــــــــــــــــــــــــــــــ نايف كنت قاعد مع ابوي عند النياق ,, من زمان و أنا أتحرى أبوي يصير خاطره زين و الواضح إنه اليوم مسفهل ,, حبيت يد ابوي و تكلمت .. أنا : يبه طلبتك .. سحب أبوي ايده و رد : تعدل يا ولد و اهرج هرجة رياجيل .. تكلمت و أنا فاقد كل معنى للشجاعه لأني مرتبك : يبه ودي أعرس .. ركز أبوي نظره علي و تابعت كلامي : بنت عمي لي يبه و أنا أريد العرس .. ابتسم ابوي و رد : أقول لعمك و يصير خير ان شاء الله .. ضحكت و قمت بسرعه حبيت راس أبوي و اتجهت للنياق ,, كنت أتلفت بين النياق لين شفت أخوي مطلق ,, أسرعت بخطواتي متجه له و ضميته و أنا أضحك .. مطلق : علامك وش مونسك ؟؟ رديت بضحكه : أخوك يبي يعرس يالشيخ .. ابتسم مطلق و رد : و الله و جابت راسك بنت عمي .. : وش حيثك تعرس حتى أنا أبعرس .. شلت نفسي من مطلق و أنا أسمع ملفي يتأتأ بكلامه و رديت و أنا راحم أختي اللي أكيد تبي تصير من نصيبه : الله يجيب اللي به خير يا رب . رد مطلق بعد ما اقتلب وجهه : روحوا لأشغالكم و خلوا عنكم الهرجه الفاضية !! ــــــــــــــــــــــــــــــــــــــــــــ رونق تعشينا خبز من اللي خبزناه أنا و وضحى مع الحليب الحار اللي يناسب الهواء البارد اللي بدأ يهب ,, كنت أكله و كأني أكل جمر ,, عجزت أتخيل وشلون مطلق تحمل اللي يسمعه من اسبوع كامل !! يآآآآآآ الله ,, و الله يا أنا قهرته بشكل !! شفت مطلق يدخل للغرفه بعد العشاء ,, كانت عيوني على باب الغرفه و أنا أغسل المواعين .. وضحى : روحي يا رونق .. ابتسمت بحياء و رديت و أنا عارفه وش تقصد : لا اذا خلصنا رحت .. سحبتن وضحى مع ايدي لين وقفت ,, و تكلمت : أقولتس قومي قضينا ما بقى شي .. غسلت ايديني و عدلت برقعي قبل لا أطلع من المطبخ وهمست : شكرا وضحى .. ضحكت وضحى و ردت : روحي بس !!! ضحكت عليه و مشيت بطريقي متجهه للغرفه ,, فتحت الباب و دخلت بخفه ,, كان نور السراج الخافت كفيل بمسح جزء من الظلام .. سكرت الباب و فسخت برقعي و أنا أشوف الجسد الضخم مستلقي على الفراش ,, تزايدت ضربات قلبي و أنا أتذكر شراسة مطلق الظهر و قسوته و عمّت الرجفه كل عضو بجسمي !! حسيت إن العبره سدت حلقي لكني تبلعت ريقي أكثر من مره و تكلمت : أنا آآآسـ..ـفـ..ـه !! ما سمعت إلا السكون المخيف بالغرفه لكني ما يأست و تكلمت مرة ثانية : مطلق و الله آسفه ....... و نفس الشي ما جاوبن إلا السكون ,, قربت له و مست ايده الممدوده و تكلمت : قسم بالله ما دريت إنك أكبر منه و الله العظيم ,, حتى بالمستشفى هي قالت لنا إن إسمه أم نايف أنا وش يدرين و الله إني صادقه .... ما شفت منه إي ردة فعل غير إنه سحب ايده و تغطى زين !! ملت الدموع عيوني و أنا اشوفه يحط ايده على عيونه و كأنه ما سمع أي كلمه !! اتجهت للطاوله و حطيت جلالي عليه ,, ثم اتجهت للجانب الثاني من الفراش و أنا ألعن بنفسي على هالخطأ اللي صغرنّ بعين مطلق .. انسدحت و تغطيت بطرف البطانية ,, سرقت نظره لمطلق كان على نفس نومته و بعد مرور ثواني حسيت إنه نام من تنفسه المنتظم !! مع نومته كانت العبره سادة حلقي ,, حتى الهم زاد بقلبي و كبر ,, التفت للجانب الثاني بحيث إن الجدار قدامي و مطلق وراي .. كانت دموعي ترسم طريقه على وجهي ,, أدري إني غلطانه بس و الله إني شرهه ما صار لنا الا اسبوع متزوجين و بعدين ميب ناقصن إلا هو هموم أهلي و هم أهله و يجي همه بعد هو !! ـــــــــــــــــــــــــــــــــــــــــــــ مطلق اليوم راسي مصدع و بي نوم و مع هذا ما قدرت أنام و أنا ما شفته ,, أدري إني اليوم زعلته بس غصب علي ,, كان ودي أكلمه و أخذ بخاطره ما أبيه تنام و هي زعله ,, انتظرته لحد ما جت و مجرد ما سرقت له لمحه تراجعت عن كل اللي ناوي أسويه ,, هي اقهرتن ,, خله تاخذ جزاه !! سمعت كلامه و أنا متأكد من صدقه قبل لا تقوله لكن شي بنفسي ما زال مقهور ,, حسيت بلمسة إيده اللي كهربتن و عضيت على شفتي حتى ما أتكلم لكن مع استرساله بالكلام حسيت إن أعصابي استرخت و كأن لساني بدأ يتهيأ لطور الكلام ,, سحبت ايدي بقسوه و تغطيت زين و كأني غير مبالي بكلامه و أنا أبعد ما أكون عن اللامبالاة !! مرت لحظات و أنا أراقب جسمه ,, كانت موجهه وجهه للجدار لكن مع مرور الوقت حسيت باهتزاز جسمه تحت البطانية ,, تصـــــــــــيــــــــح !!! رونق تصيح منك يا مطلق و أنت اللي حلفت إنك تعوضها عن ظلمهم لها !! مديت ايدي و سحبت ايدها ,, التفتت هي مع ايدي و كأنها منتظره هاللحظه ,, حسيت بارتطام راسها على صدري و شددت من قبضتي عليها مع زيادة صياحها ,, يآآآآه يا مطلق وش سويت بها !! حاولت أبرر لها موقفي بكلامي : قهرتيني يا بنت عبدالله !! : قهرتيني يا بنت عبدالله !! ـــــــــــــــــــــــــــــــــــــــــــــــــ رونق حاولت أكتم نفسي و عضيت على البطانيه عشان ما ينسمع صوتي لكن مافيه شي يغيب عن الصقر !! حسيت بالإيد القاسيه اللي مسكتن الظهر لكن هالمره كانت غير كانت أبعد ما تكون عن القسوه !! غمضت عيوني و أنا ألتفت مع أيده اللي سحبتن ,, دفيت راسي و كلي و ارتطمت بصدره ,, و أجهشت ببكاااااااااء !! حسيت بنفسي صغيييييره قدام كلامه : قهرتيني يا بنت عبدالله !! : قهرتيني يا بنت عبدالله !! كنت نادمة عن خطأ اقترفته عن غير قصد و تكلمت بصياح و أنا حاسه بإيده الضخمه تطبطب على ظهري : و الله ما دريت إنك أنت أكبر منه و الله !! لكن صوته الهامس سكتن : أووووص خلاص !!! ــــــــــ نهاية الجزء العشرين .. |
السلام عليكم
يا هلا والله بنبوضه ، حمدلله على السلامه ، آخر الغيبات << فيس مشتاق لك رونق .. حياتها الجديده .. تأقلم رائع و إهتمام حلو منها لآهل زوجها ، تقبلها لحياتها اهم اساس تقدر تبني عليه حياتها الجديده .. بس اش قصة نفلة زوجة ساري ،، بصراحه شدني اسم الولد نايف بعد .. حزينه على فقد زوجها او على سالفته مع اخوها او على تيتم طفلها الصغير .. ننتظر و نشوف وضحى .. اعتقد راح يصير شي بسبب رونق او مطلق يقلب الموازين و ياخذها اللي يحبها << فيس يدعي لها مطلق .. تحبهاااااا واااو احسن شي خليك دايم حبوب معها حرام عليك لازم تنفذ وعدك لنفسك و انت عارف البير و غطاه .. نبوووضه وين أهل رونق نبي نشوف تركي و نهى و فيصل و أمجاد و ندى و أسمااااااااااء ......<< فيس مو متذكر الاسماء الباقيه .. نبي نعرف ردة فعلهم و كيف عيشتهم بعد ما تخلصو من حمل رونق و مشكلتها اللي معقده حياتهم .. ننتظرك نبوضه لا تطولين .. |
السلام عليكم
اهلين نبوضه منوره موقع القصه وهالله الله بالاجزاء الكثير فيس يقولك خلاص خلصت الاختبارات ************ رونق والحياه الجديده والله ما اعرف اشلون بنت عز متعوده على الراحه والشغاله تقضي اغلب حوايجها تقدر تتاقلم مع اهل رجلهابالقريه واسلو ب حياتهم الصعب يعني ما حد ينقد اغلاطها ويتصيد زلاتها (فيس خابر العجايز ومناقيدهن *************** يمكن اللي مسهل حياه رونق راحه البال مطلق وزعله من رونق كان عتب اكثر منه زعل بس مسيكينه هيوش ذنبها اكيد انه ماتعرف منهو الكبير *********** الصلح وتبريد الخاطر وعتاب الاحباب راح يطيب قليب رونق ************** ولد العم ملفي ليه ماياخذ ارمله اخوه ويربي ولده ويخلون وضوح لولد خالها يكون ابرك (فيس يقترح ************** يامرحبا مليون نبوضه وننتظر الجاي بشوق |
روايه ولا أروع تسلمين عليها :flowers2:
ياقلبي عليك يا رونق بجد تحزن :frown: ياليت تكثرين المواقف بين مطلق ورونق :ZlY04550: ونبي نعرف وشي صار على أخوانها وبذات محمد موفق بإذن الله ... لك مني أجمل تحية . |
هلا وغلا بالقصيميه وببنت الشاميه
من طول الغيبات 000000بس غيبتك اثمرت غنايم فديييييت انا البدوان كلهم واولهم مطلق0000احسه احن مخاليق الله واعتقد ان زعل اهله له علاقه يمكن بنفله وبوجودها عند عمها بعدوفاة زوجها او بوضحى وزواجها الغريب الغير متكافيئ من ملفي لمجرد انه ولد عمها رونق دايم وهي القلب الحنون ومع ذلك احس انها قووووووويه لانها تاقلمت وبقوه مع اهل زوجها ومع حياته مع انها موب طايقه قبل حياة الفقر والبدو واشوفها اليوم بدويه لبست لبس زوجها وتعيش عيشته عشان ترضيه شي صعب لكن هي قدرت تاقلم عمرها مشكووووووووره على البارت ونستنى القادم |
الحمد لله عالسلامه نبوضه
تسلمين فديتج عالبارت<< الفيس راعي الورود رونق ومطلق الله يوفقج في حياتج اليديده..باين انج تحاولين تتاقلمين وياها.. بس بعد الفرق الشاسع ين حياتج قبل والحينه بيكون لها اثر في تصرفاتج<< فيس متاكد.. حلوو تجاوبج ويا هل ريلج.. بس لازم تكونين واعيه ع تصرفاتج<< فيس ينصحها..وانته<<فيس يلومه.. كنت يايه بهد عليك زين اللي راضيها ولا جان ما برمسك<<فيس شديد ضحى تعالي اهني.. تصدقين انيه حبيتج<< فيس مبتسم.. هي يا بنت الحلال لا تودرينها اروحها.. ايلسي وياها ونسيها<<فيس يوصيها.. الا بتخبرج شو هالملفي اللي بتاخذينه..ارفضيه وانا بتبناج<< فيس شيطان نترياج فديتج<< الفيس راعي الورود http://www.liillas.com/up3//uploads/...29afe633ce.gif |
السلام عليكم و رحمة الله و بركاته ما زال قدامي كم يوم حتى أخلص الجزء .. اعذرون أدري بعضكم يقول خلصتي اختبارات بس اللي ما تعرفونه إن كاتبتكم أخفقت بمادتين .. خلصت المحمول هالأسبوع عطون فرصه أبلع ريقي ثم أنزل لكم جزء معتبر !!! >> و لا تنسون إني نزلت لكم الأسبوع اللي راح جزء و أنا مشغوله مررره بالإختبارات .. آآآخر طلب>>أدري تقولون طولتيه بس تحملون طلبتكم لا تكثرون الردور لين أنزل الجزء |
السلام عليكم ورحمة الله وبركاته
نبض القصيم واصلي قصة ممتازة واللهجة من اروع مايكون مطلق و رونق : حياة جديدة مشرقة بس ودي اشوف رد فعل رونق لادرت ان مطلق يدري بكل شي لك اشكر والتقدير وعجلي لاتبطين |
سلام\
يارونق وينك ؟ اشتقنا نعرف وش سويتي مع مطلق وتركي الخايس وش صار عليه |
السلام عليكم و رحمة الله و بركاته .. لكل من سأل عني .. افتقدني أو غضب مني !! أقسم بالله العظيم أني غادرت منطقة القصيم و لم أعد إلا في مساء الأربعاء محملة بفيروسات "الانفلونزا" .. كأني أسمع أحدكم يسأل و لماذا لم تكتبي !! لذا سأجيب لا أحد من أهلي يعلم أني أضع مولودتي الأولى بين أيديكم سوى أختي ,, لذا قدروا أنني لا أستطيع الكتابه أمامهم . الجزء الحادي و العشرين : (( معتقدات تافهه )) قد تكون لهم طبائع يعظمونها حتى تبدو كالعقائد ,, عاشوا عليها ثم أتوا ليجبرونا أن نلتزم بها ,, تبا لها من معتقدات فلقد ضاعفت أحزاننا .. (( صفقت بإيده و أخفضت رأسه و هي تضحك ثم رجعت تتكلم : و الله إن بنياتي ماهنا مثلهن !! بهاللحظه تسللت طفله صغيره و أقحمت رأسه داخل الطرحه السوداء المعطرة بريحة الحنا مع العود .. كان لون بشرته الفاتح كفيل بتعريف الناس إن هالطفله مابينه هي و صاحبة الضحكه العذبه أمومة نسب ,, لكن الحنان اللي انهمر على الطفله كفيل بتعريف الناس مدى حب هالمره لطفلته اللي ماحملت به و لا ولدته)) غمضت عيوني و سحبت نفس طويييييل و أنا أشم ريحة أمي موضي ,, أطلقت نفسي و فتحت عيوني و امتد نظري للجدران اللي تحيط بي .. رجعت غمضت عيوني و دارت بي الدنيا لين توقف العالم كله على هالصوره ,, صورة أسماء على السرير الأبيض .. صورة أسماء و هي شبه ميته !! بهاللحظه طاحت دموعي حزن على حال الغاليه ,, صار لي ثلاث أسابيع ما أدري عنه ... : عسى ماشر !! من سمعت الصوت امتدت ايديني و مسحت بقايا الدموع اللي ارتسمت على وجهي لكن ايد مطلق اسحبت ايدي وجسمي معه لين جلست .. و نطق وجع ايديني اللي أخفيته من أيام عن مطلق : آآآآآهـ . رد و عيونه تتفحصن : علامتس ؟ رديت بعد ما جلست و أنا أشتت عيوني : ما بي شي . ركز بعيوني ثم شد من قبضته على ايدي لكني ما قدرت أتحمل و صرخت : آآآآآآآآآآآآهـ . فتح ايدي و تحسسه ,, كانت مليانه جروح .. كنت أراقبه و أنا أتبلع ريقي أخاف يضغط عليه لكنه بادرن بسؤاله : منين لتس ذا . رديت : من .... ذاك اليوم أبقطع رمث أثري جرحت ايدي . عقد حواجبه و رد : يوم انتس ما تعرفين تحطبين وشوله تروحين ؟ رديت و عيوني على الأرض : أوسع صدري مع البنات نسولف و نقطع حطب .. ابتسم على كلمتي و قام و أخذ علبة الفازلين و جاء و جلس قدامي ثم أخذ ايدي و بدأ يدهنه بينما تخترق عمله بعض الأهات من و الضحكات منه ,, مطلق : أجل تقطعين الحطب هههههه ! رديت ببلاهه : إيه !! ضحك و رجع رد : اسمها أحطب مهب اقطع الحطب ههههه . رديت و أنا مكشره :ايه كله واحد . ابتسم و رد : أبك يالحظريه كلامتس يضحك !! رديت بقهر : لا تقولي يالحظريه اسمي رونق . رد يعاند : أجل أبقول بنت الشاميه .. فتحت عيوني على وسعهن و رديت : إلا هذي .. ابتسم و رجع رفع عيونه لي و ركز علي ,, مرت لحظات و هو يناظرن و هو ساكت لحد ما قلت له : وش فيك ؟! رد علي مطلق و هو مازال مركز علي : أنتي اللي وش بتس ؟!! رديت : ما بي شي ! رفع حواجبه و رد و ايدي بين ايديه : و الدموع منين جت ؟ تنهدت و رديت : و الله بس ....... و تابعت لما شفته منصت لكلامي : بس .... تذكرت أختي أسماء !! هز براسه و رد و هو يضغط علي ايدي : الله يرفع عنها الضر و يعافيها .. تنهدت و رديت : يآآآآآآآ رب !! قام مطلق متجه للطاوله و أخذ يفتش بكتبه القديمه .... ناديته و أنا أشوفه معطين ظهره رايح للطاوله : مطلق !! التفت بجسمه الطويل و العريض لكني تابعت كلامي قبل لا ينطق : ودي أروح أشوف اهلي !! عقد مطلق حواجبه و رد بحده وهو موطي صوته : يا مره مالنا الا ثلاث أسابيع من أعرسنا و أنتي تطرين أهلتس ,, لا عاد تسمعتس العجوز و الله إن تطيحين من عينها !! بلعت ريقي و العبره معه و رديت و أنا مستغربه : طيب ولهت عليهم ودي أشوفهم أو حتى أعرف أخبارهم . قرب مطلق و مسكن مع ذرعاني و رد و هو مركز عيونه علي : يا بنت أنتي وش بتس أقولتس لو تسمع العجوز إنتس مطريه أهلتس هالحين كان قالوا مالها مقعاد عندنا . و بلل شفايفه الجافه و رجع كمل بعد ما تنهد : ما يكفي إن الشايب يتحرى أي زله من الحضرية ,, رديت : وشوفة أهلي زله ؟!! رد مطلق و عيونه مركزه على عيوني : لا اله الا الله يا رونق استهدي بالله و بعدين ترى هذي سلومنا البنت لا اعرست على رجال بديرة ثانيه ما تروح قبل تجيب لها كم بطن !!!!!!!!!!! كان صوت شهقتي كفيل بتشتيت نظر مطلق ,, أبعد عيونه حتى لا يأذي مشاعره و تركن وسط حيرتي بأشياء و معتقدات تافهه المفروض إني أؤمن به ,, سحبت ايديني و التفت عنه و عطيته ظهري ,, كانت الدنيا كله تدور قدام عيوني ,, جلست على الأرض و حطيت راسي على ركبي و أنا ضايعه !! دورت على حل و فتشت لكن ما لقيت !! حتى العبره و هي العبره ما لقيته !! تلفت أبي أصرخ عليه أفهمه إن اللي يقوله كلام فاضي لكن المكان فاضي ,, طلع ,, انسحب و تركن بأحزاني بعد ما زادهن أو بالأحرى ضاعفهن !! ــــــــــــــــــــــــــــــــــــــــــــــــــــ وضحى بعد ما صليت العصر طلعت أبحطب بس شفت سياره مدبرة عن الديره ,, ركزت عيوني أبشوف من اللي راح بس ما قويت أشوف لأن السياره بعيده .. : وضيح وش عندتس ؟ التفت للصوت و شفت خالي فيحان بقصر قامته و عرضه و رديت و أنا متجهه له : هلا بك يا خال !! و سلمت عليه و حبيت راسه .... خالي فيحان : أمتس ماجوده . رديت : ايه وين تروح ,, حياك اقلط تلقاها منيّا بالحوش . رد خالي : روحي للبنات شوفيهن . و دخل خالي للبيت وسط صوت أمي و هي تهلي به يصدح بالأرجاء !! للحظات توقف تفكيري عند كلمة خالي روحي للبنات وراه وش بهن ,, أخذت طريقي لبيت خالي و أنا أتعوذ من الشيطان ... ـــــــــــــــــــــــــــــــــــــــــــــــــ رونق لبست برقعي و عدلت جلالي ,, أبطلع أكلم عمتي ,, مالي شغل بخرابيط مطلق ,, هذولا أهلي موب معقوله أبقعد ما أشوفهم !! فتحت الباب و تهادى لأذني صوت خالتي أم مطلق : الله يشفيها و ينزع الضر عنها يا خوي مريتك مطيعة لربها .. : الحمد لله حنا على ماقال ما جزعنا من حكمة الله و هذا سطام معها بيداريها و يشيل عنها .. خالتي أم مطلق : الحمد لله أجل خل البنات يجن عندي . : لا يا وخيتي البنات قدهن صارن حريم خلي عوالتس عندتس و بنياتي عندي . رجعت و سكرت الباب و تسندت عليه ,, يا ربي أكلم عمتي أو لا ,, خل أطلع و أشوفه .. تسللت للحوش بهدوء و أنا أسمع عمتي تستغفر : أستغفر الله أستغفر الله . قربت له و حبيت راسه و جلست قدامه بالفرشه ,, كانت تمرر ايدينه على عيونه ,, الواضح إنه تمش دموعه . سألته و أنا عارفه جواب سؤالي : عسى ما شر يا خاله . ردت و صوته به بحه : مرت وخيي تعيبينه !! سألته و أنا أهمز رجله الممدوده : وش به عسى ما شر ؟! ردت بعد ما تنهدت : صايبتها الخنقه .. رددت كلامه باستغراب : الخنقه !! ردت خالتي : هذي كانت تجيها يوم إن ما معها الا سطام حتى نفسها ما تقدر تاخذه ,, و أحيان الله يستر علينا تتكشف !! رديت و أنا مركزه أكثر بكلامه : صرع !! ردت خالتي : ايه يا يمه و هذا سطام الله يسعده راح بها للشيخ اللي قرا عليها بأول وقتها .. ضميت ركبي و تندت و رديت : الله يشفيه يا رب !! حسيت بيد خالتي الثقيله تتركى على كتفي و شفته و هي تتعدل واقفه ,, ثم مشت لغرفته و هي تهز بمشيه !! وقته أيقنت إن كلامي لخالتي بهالوقت أشبه بالمستحيل !! ــــــــــــــــــــــــــــــــــــــــــــــــــــــ وضحى دخلت لبيت خالي و أنا أشوف وضيح قدامي ,, سلمت عليها لكنه ردت علي بهدوء غريب عليه ,, سألته : وش بتس عسى ماشر ؟!! لكنه ما ردت علي ,, انسحبت و دخلت لغرفته هي و خواتها ,, لحقتها و أنا خايفه من اللي أبسمعه .. شفت مها جالسه على سجادتها و تقرأ قرآن بينما وضحى منكبه على فراشها و تصيح .. ضرب قلبي على شكلهن المحزن و انتبهت لي مها اللي تركت المصحف و قامت سلمت علي ,, سألتها : مها عسى ماشر وش اللي صاير ؟ ردت بصوت مبحوح : أمي يا وضحى .. رديت : علامها ؟ قامت وضحى و ردت بصوت باكي : جاتها الخنقه إهئ إهئ ... و رجعت حطت راسها على فراشها .. ارتسمت دموع مها على وجهها فضميتها و رديت : الله الشافي يا مها لا تجزعين .. كنت أسمعها تون على صدري لكني همست لها : هذا و أنتي الكبيييره يا مها خلتس قويه عشان خواتس .. ردت علي بهمس باكي : عجزت يا وضحى عجزت لا أملك قوة ساره .. أبعدتها عن و رديت : ساره !! ردت مها : ايه تلقينها تسوي العشاء . شلت نفسي و رحت للمطبخ أبي أشوف ساره و قناع القوه اللي لابسته !! هم يظنون إن ساره قويه لكن ما يدرون وش اللي قواها !! ما يدرون بهم ساره يحسبونه أول هم له بهالدنيا . شفت ساره واقفه عن باب المطبخ و تتأمل السماء بجمود ,, قربت لها و تكلمت : ساره .. التفتت علي و ردت : هلا وضحى .... تابعت ساره بعد لحظت صمت مرت بيننا : شفتي وش صار لنا يا وضحى ؟ رديت بعد ما تنهدت : أنتي أقواهن يا ساره .. ردت ساره : هه و أنتي تدرين وراي قويه !! رديت : همتس يا ساره انتهى .. رفعت راسه للسماء و تحركت بسرعه بالحوش و صوته مخنوق : كل يوم يا وضحى كل يوم ترجع صورته لبالي ,, آآآآآهـ ,, صوت صياحه عند أذاني كان طفل صغير ما سوى شي غير إن أمه تزوجت أبوه كزوجه ثانية ,, وضحى أنا ..... أنا شفت ايدين مشعل الضخمه تغرقه بالسيل ,, ما أتخيل وشلون قدر يغرق أخوه من أبوه ,, آآآآآآهـ يا وضحى بس ودي بشي واحد بهالدنيا ودي أذبحه أخنقه أرتآآآآح منه . قربت لها و ضميتها و أنا أهمس : ربي بيحاسبه يا ساره أنتي بس انتبهي لخواتس انتبهي لهن .. ردت و صوتها مخنوق و هذا طبع ساره مستحيل تصيح لكنه تكتم و هذا اللي يتعبها : و أنا يا وضحى أنا ؟! رديت : هن يحتاجن لتس الحين . أبعدت ساره عن و ردت : أنا عندهن و أنا عضيدهن .. رديت بعد ما تنهدت : و هذا العشم يا بنت خالي .. ثم سألت : طيب من راح معها ؟ ردت ساره بعد ما تنهدت : تقصدين أمي راح بها سطام من لنا غيره !! بلعت ريقي على ذكرى سطام و تذكرت إني المفروض أنسى كل شي يخصه و أنشغل بهمي المتوقع الليله . ودعت البنات بعد ما وصيتهن على بعض و طلعت للبيت بعد ما بدأ يرسم الشفق الأحمر لوحته على السماء .. ــــــــــــــــــــــــــــــــــــــــــ نوره كنت قاعده بالمطبخ أحضر العشاء لكن صوت صياح نايف المزعج أقلقن ,, غطيت القدر و شلت نفسي و طلعت أتبع الصوت ,, دخلت غرفة نفله و أنا أشوف الصغير مغشى من الصياح ,, قربت له و شلته بين ايديني ,, هزيته و لعبته لكنه ما كان يوقف صياحه للحظات الا و يرجع يتابع .. نزلته على فراش نفله و نحيت نظري عن أي زاويه بهالغرفه ممكن تفتح جروحي و طلعت .. رحت لورى المجلس و شفت نفله تكسر الحطب : أنتي هنيا و أنا أدورتس .. التفتت و ردت : وش تبين تدوريني ؟! رديت : نايف يصيح .. ردت بعد ما رجعت تكمل شغلها : أسمعه ! رديت : طيب روحي له شكله جوعان . تنهدت و ردت : شوي و اقضي ثم أروح له . سحبته مع ايده و أنا أشوفه كأنه جثه تتحرك ,, تشتغل و كأنه آله : نفله روحي لولدتس و أنا أكمل عنتس . سحبت ايده و تابعت شغله : ما نب مبطيه .. عضيت شفتي و رفعت راسي أتأمل السماء ,, أنا عارفه إن نفله خايفه من أمي بس هذا ولد ساري و حفيد جابر اللي ما يجوع الضيف عندهم وشلون لا صار ولدهم .. نزلت راسي و اتجهت لنفله و سحبت ايده ,, وقفته قبالي بعصبيه و تكلمت : لو ساري حي كان زعل عليتس .. لمحت دمعه طاحت من عينه و ردت : بس ساري ماااات .. نفضت جسمه النحيل بين ايديني و رديت : أنتي تحبين ساري ؟!! و كملت يوم شفته تعض شفايفه و تغمض عيونه : ساري من حبه لنايف وده يقطع تسبده و يعطيه اياها ,, صدق إنه ما عاش معه الا أربعين يوم بس إنه عطاه كل اللي يقدر علاه ,, و الحين أنتي المفروض تعطينه كل اللي تقدرين علاه . انتفض جسمها و فتحت عيونها كانت تتبلع ريقها تبي تتكلم لكني سبقتها : روحي رضعيه قده مات العيّـل من الصياح !! راحت و شفتها تتلاشى لداخل الغرفه و ماكانت إلا لحظات و انسد رمق الطفل و هدأ صوته !! تابعت شغل نفله و أنا أتوارى عن الأنظار عن لا تشوفني أمي و ...... : وينها ما كملت !! رفعت راسي لأمي و تركت المكنسه اللي بين ايديني و رحت أركض لأمي ,, حبيت ايدينه و تكلمت : يا ميمتي نايف قده يصيح و أنا اللي قلت لها تروح ترضعه .. حسيت بنبرة أمي حاده و هي تتكلم : لا خلصت تروح ترضعه !! رديت و دموعي ملت وجهي لأني مأيسه من كسر حاجز القسوه اللي بنته أمي على قلبها من موت ساري و رديت : هذا ولد ساري يمه ما نبي الشوكه تجيه وشلون عاد لا جاااع .. آآآآآآآهـ و اختلط أنيني بصوت تسكيرة باب غرفة أمي ,, شكلي فتحت جروحها و ذكرته بروح قلبه سآآآآآري !! و راحت لملفأ أحزانه ,, آآآه يا يمه حنا ما فقدنا ساري بس حنا فقدنا روحتس يمه معه و بقيتي بيننا جسد خاوي بلا روح !! ــــــــــــــــــــــــــــــــــــــــــــــــ رونق بعد يوم . من بعد كلامي مع مطلق أمس ما جبت له طاري الموضوع أدري إنه مستغرب بس أبي أأجله لين تهدأ الأوضاع و تتحسن حالة مرة خالهم ,, لكن فيه موال ثاني يرن براسي ,, وش اللي يخلي كل العائله ينادون خالتي بأم نايف و يتجاهلون مطلق فيه سر وراء هالسالفه و هالسر هو اللي يفسر لي نظرات الإحتقار من خالي و خالتي ناحية مطلق ,, فكرت كثير لكن ما لقيت أي تفسير !! فكرت أسأل وضحى لكن حالته هاليومين ما تسر ,, من عرفت بمرض مرت خاله و سفره هي و ولده و هي محتاسه و ضايق صدره عليهم غير زيارة العم ابو ساري اليوم عشان يزيد الطين بله بشتات الأخبار عن نيتهم خطبته لملفي !! و عمتي ما أدري أخاف أسأله !! و حتى نفله مستحيل أسأله !! ما فيه غيره مطلق !! التفت و شفته منسدح و حاط ايدينه تحت راسه ,, قاعد يهوجس و مركز نظره للجدار .. ناديته بصوت متردد : مطـ...ـلق !! لف عيونه علي و هو بنفس وضعيته و رد : آمري . بلعت ريقي و نزلت راسي و الاف الأفكار تعارض اللي أسويه لكن لحظه شيطانيه أجبرتن على المتابعه و رديت : مطلق أأأأ ....أ ... رد مطلق : علامتس ؟!! بللت شفايفي و رفعت راسي ,, ركزت نظري على عيونه و أطلقت الكلام اللي عندي بدون لا أوزنه : مطلق ... أ أأ أمك ينادونه بأم نايف وراه ؟؟ شفته غمض عيونه فتابعت كلامي : وش السبب اللي يخلي نفله ما تسلم عليك و اللي .......... قاطن بعصبيه و هو يجلس بسرعه و يأشر باصبعه يهدد : لا تتدخلين باللي ما يخصتس ؟؟ كانت عيونه تخوف و قلبي يا دافع يضرب طبول ,, للحظه حسيت إني كبيت البنزين على النار لما شفته يأشر على الباب و يتكلم بصوت أعلى : اطلعي برا !! ناظرت الباب و رجعت أناظره مستغربه من طلبه لهالدرجه سؤالي صعب و نرفزه ,, شفت ايده ما زالت تأشر على الباب و تكلم بصوت أهدأ : أبنام لي شوي يالله !! قمت و شلت جلالي بين ايديني ,, كنت أتحرك و جسمي كله يرجف من عصبيته فتحت الباب و اخترق اذني صوته مره ثانيه : ويييييييييين ؟! التفت و جاوبت ببلاهه : أنت قلت لي اطلعي !! تنهد و رد و هو صار على سنونه : لا اله الا الله يا بنت تطلعين تسذا برقعتس وينه ؟ شهقت و ضربت على صدري و رديت : يا خزياه نسيته !! انسدح مطلق و رد : المفروض ما تنسينه !! طلعت بسرعه من دون لا أرد يعني نسيته وش أسوي و لو أقعد أناقش مطلق بيأذن المغرب و أنا عنده .......... مشيت بخطوات بطيئه و أنا أسحب رجليني ,, مافي شي أسويه لكن بالي مليااان أفكار ,, أشياء كثير أجهله و أجهل التصرف معه ,, مشاكل كثير ما نيب عارفته فطبيعي ما أعرف حله و ما أعرف أتعامل مع الأشخاص اللي داخلين بهالمشكله حاسه إني عايشه وسط دوامه !! كان فيه صوت أنين مكتوم جاي من المطبخ .. تسللت بخفه لين دخلت مشيت بخطوات بطيئه و العيون الواسعه الجميله تناظرن لكن هالمره كانت مليانه دموع .. قربت و جلست على ركبي على الأرض قدامه و تكلمت : نفله وش بتس ؟ شدت جلاله عليه أكثر و شتت نظراته و ردت : مـ...ــا بي شـ..ـي !! مديت ايدي و مسحت على شعره لكنه نفضت ايدي عنه و تراجعت لورى أكثر .. ما كانت تبي تتكلم معي بسبب صياحه ,, ركزت عليه و بلحظات جتن فكره لو أتكلم معه بأي شي لين ترتاح لي ثم أسأله عن سب حزنه .. ما كنت عارفه أنا أبي أغير الموضوع عشان ترتاح لي زي ما قلت أو عشان أسباب ثانيه !! يمكن تغلبت أنانيتي على روح الايثار داخلي لأن الموضوع اللي جبته يخدم مصالحي لا أكثر و لا أقل !! أخذت نفس و سألت : وش سر مطلق يا نفله ؟؟ كان الصمت جواب نفله ,, عضيت على شفتي بقهر و أنا أشوف عيونه مركزه علي بكل حقد الدنيا ,, هي ليه تكرهن ,, أكيد لأنه تكره مطلق ,, طيب وش مسوي له مطلق عشان تكرهه هي و أمه و أبوه ؟؟! نطقت بكلام جارح لي أكثر من غيري : وش السواة الشينه اللي سواه مطلق و خلت أمه و أبوه يكرهونه ؟ عضت على شفته و ضمت ايدينه و ردت و هي تنتحب : يقولون إنه هو بس أنا ما أصدق ؟!!! ــــــــــــــــــــــــــــــــــــــــــــــــــــــ مطلق من بعد كلامه حاولت أنام بس اختنقت ,, لازم ما تعرف ,, رونق لازم ما تعرف ,, لأنها بتلومني مثلهم و لا هب عاذرتني ,, أكيد بتقول مثلهم كلهم ساري مات على ايد مطلق !! آآآآآهـ يا ساري و الله لو يدرون بخوّتك بقلبي كان ما قالوها !! حسيت بذكرياتي بدت تلفي على بالي ,, تعدلت قاعد ثم وقفت بعد مالبست شماغي ,, خل أروح للنياق أوسع صدري بدل هالغلقه !! فتحت الباب و طلعت ,, مشيت بخطوات سريعه للباب لكن صوت قلبي وقفن ,, وشلون أطلع من دون لا اشوفها ,, أدري إنها زعلانه علي بس ما نيب مراضيها بس بشوفها و بطلع .. مشيت بخطوات بطيئه و أنا أرهف السمع بكل جهه أدور على أي صوت يدلن على مكانها ,, سمعت صوتها ,, تنطق اسمي لكن ما أدري وش تقول ,, يا لبآآآآآآآآآآه يا هالصوت !! قربت اذاني للمطبخ وتهادى لأذني أحب صوت لقلبي ينطق بأكره جمله سمعته بحياتي .. و كالعاده مسكت نفسي و صبرت زي ما أمسك نفسي كل ما سمعت كلام جارح لكن هالمره صبرت شكليا بينما انهار اللي بداخلي !! و قاومت عضله صغيره و تحركت و انطلقت معه نداءاتي : رونق ,, روووونق !! ـــــــــــــــــــــــــــــــــــــــــــــــ رونق كنت مركزه بكل حرف قالته نفله بجملته الوحيده ,, و ما لقيت أي خيط يوصلن للحقيقه ,, لكن صوت ثاني انتشلن من تعمقي بالتفكير ,, صوت مرررعب لما يجي بحلظه مثل هذي .... قمت و مشيت برجلين مرتجفه متجهه للباب و أنا أردد : يا رب ما سمع ,, يا رب ما سمع .. لكن قبل لا أوصل وقفت و ضغطت على فخوذي أبي رجفته توقف لكن جزء من الرجفه انتقل لايدي ,, توالت النداءات مره ثانيه فتابعت خطواتي بسرعه أكبر و رجفه أكثر !! للحظات حسيت ان الهواء انقطع ,, غمضت عيوني و أنا أحس برجليني ترتفع عن الأرض ,, فتحت عيوني و أنا أشوف عيونه تقدح شرار ,, كان فاير موب معصب ,, حتى إن نفسه السريع و الحار ينبئ عن قدوم بركان !! : لا تفتشين عن خطأ غيرتس دام خطاتس مسكت عنه ! تهاوى جسمي على الأرض بعد ما ارتطم بالجدار من أثر دفة مطلق !! مرت لحظات و أنا موب مستوعبه شي ,, انفجار نفله و عصبية مطلق و الفاجعه الكبييييييييييييييييييييييره !! مطلق يعرف قصتي ,, من قاله ,, يا ربي أكيد خالد ,, إلا أكيد خالد ,, ما يعرف مطلق إلا خالد ,, آآآآآآهـ يا خوي الله لا يسامحك و لا يبيحك على اللي سويته بي !! مرت لحظات و أنا أون ,, بالأول كان همي أثبت برائتي قدام أخواني و بعد زواجي انشغلت و نسيت همي لكن الحين لا لازم أبين له إني بريئه و لأهلي بعد ,, ضميت ركبي و حطيت راسي و أفرغت نقطه من بحر حزني .. مرت لحظات لحد ما حسيت بإيد تتحسس راسي ,, رفعت راسي بهدوء و أنا ناويه أضربه و أصرخ عليه أهم شي يفهم إني بريئه ,, لكن كانت العيون الدامعه قدامي نطقت بصوت هادي مبحوح ... نفله : قومي يا رونق صلي لتس ركعتين ترا لا ضاقت ما يفرجها الا هو !! عضيت على شفتي و أنا أشوف الجبل الصامد قدامي ,, نفله الصابره بعد موت زوجه و قسى أمه معه .. سحبت نفسي و دخلت غرفتي بدون لا أرد عليه ,, سكرت الباب و سويت ما أملاوه علي ضميري و عقلي و قلبي ,, التجأت للي ما يخيّب عبد رجاوه و طق بابه .. ـــــــــــــــــــــــــــــــــــــــــــــــــ وضحى بعد صلاة المغرب طلعت و بديت أسوي العشاء ,, غريبه رونق ما بينت ,, بالعاده تجي و تعاونن لكن مدري وش عنده .. شوي و سمعت خطوات ,, التفت و شفت رونق .. رونق : السلام عليكم .. رديت السلام و أنا مشغوله باللي بين ايديني ,, و حتى بالي مشغول بزيارة عمي المشكوك بأمره !! قربت رونق و بدت تشيل و تحط معي ,, لكن كانت غريبه ,, صمته اليوم وراه شي .. لمحته قامت و جلست بطرف المطبخ ,, قربت له و جلست قباله ,, حطيت ايدي على ايده و تكلمت : رونق وش بتس . رفعت راسه لي و همست : لا مابي شي . رديت : و الله اللي رفع سبع و وطى سبع انتس مغتمه !! تنهدت و ردت : اللي يسمعتس يقول انتس منتب مهمومه أنتي بعد . عضيت شفتي و رفعت أنظاري للسقف و رديت : آآآآهـ يا رونق يا شينهم لا حكموا عليتس باللي ماتبينه .. و تنهدت و رجعت أكمل : و الله إني ما ابي الا رجل معه كامل عقله ,, مابي الرجل اللي يجي و يروح برأي الناس .. حسيت بإيده تضغط على ايدي و ردت : ما تضيق إلا و تفرج يا وضحى . حسينا بخطوات جايه من برى التفتنا كلنا و شفنا نفله أختي .. سلمت بهمس مثل عادته و ردينا السلام .. قربت و جلست بيننا ,, كان باين إنه عنده كلام لكني سبقته بسؤالي : وش أخبار عمتس معتس ؟؟ تنهدت و ردت : هه يآآآآ ليت همي بس من مرت عمي !! و حطت راسه بين ركبه و صاحت و هي تردد : فاقدته بالحييييل !! حطيت ايدي على خصره و لميته لي و أنا أهمس له : راح عند الكريم يا خيتي راح عند اللي ما ينظام عند أحد .. رفعت راسه و نشقت ثم همست و عيونه فوق : يا الله إنك ترحمه برحمتك !! ردينا أنا ورونق : آآآمين .. التفتت رونق على نفله و ردت : اعذرين يا نفله لا أخطيت عليتس .. مسحت نفله على ايد رونق و ردت : لا ما عليتس ... استغربت من كلام رونق مع نفله و الأغرب إنه صاير بينهن شي لكني ما اهتميت كثير لأن فكري شطح بعيد ....... مرت لحظات و حنا ساكتين و كلن لاهيه بهمومه ,, لحد ما سمعنا أمي تنادي : رونه يا رونه !! مع إنه لحظات حزينه إلا إن الابتسامه ارتسمت على ملامحنا حنا الثلاثه ,, نطق أمي لإسم رونق يضحك !! : رونه ما عاينتي نفله ؟!! ردت نفله : قدني هنيا يمه . ردت أمي و هي تدخل المطبخ و نايف الصغير بين ايدينه : اخذيه يمه نيميه .. أخذت نفله و لده نايف و جلست و حطته على رجله تنيمه بينما تناهى صوت مطلق و نايف : يا ولد يا ولد .. كانوا ياخذون طريق و هذا طبعا اللي يدور ببالهم لكنهم ما دروا انهم أخذوا طريقهم على قلبي و انحروا حلمي الوحيد !! ارتجف كل عظم بجسمي و تهاوت كل قوتي جلست بالزاويه و لميت رجليني وحطيت راسي بينهم .. انتظرت عمي يطلب ثم يردون عليه بـ..جتك بنتك يآآآعم !! انتظرتهم يربطون اسمي باسمه و التزمت الصمت أسمع دقات قلبي المجنونه .. ـــــــــــــــــــــــــــــ نهاية الجزء الحادي و العشرين .. |
.........
وعليكم السلام والرحمه الله حيوو نبوضه وتسلمين ع البارت والحمدلله ع سلامتس.... ... ايوااا اللحين انكشف شوي عن سر مطلق اجل شكلهم متهمينه بمووت ساري الله يرحمه الله يعينه و الله..... ممكن مات صدق بسببه بس من دون قصد مطلق بهالشي~ .....؟؟ اللحين رونق همها تكشف وتوضح برائتهااا عن مطلق مادرت انو عارف انها بريئه وهالاامر مفرووغ منه يالله متحمسه كيف بتوضح لسي مطلق تبين الجد رونق ملقووفه المفرووض ماسألت... عن السبب اللحين لو انا بمكانه اكيد بفكر وراسي بتجيه الف وست مية وعشرين جواب<<اي هين بس ممكن ماراح اصيب خخخخخخ<<مناك وتولهنا واشتقنا لتركي ومي ونهى وعزام"" نشوف كيف امورهم وهل نوى انوو يوضح الحقيقه لآجل اموره تزين ورونق المظلوومه تسامحه..؟؟ عوافي~ |
شكرا
ع البارت بس تراني ماشبعت من البارت< طماعة تريد المزي الله يكون ف عون نفلة غريبة عمتها مارحمت بكاء الصغير رونق ف بعض الاحيان الجهل ارحم من المعرفة فخليش ف حالش احسن |
كالعاده متالقه وعاذرينك كلنا تغلبنا الظروف
البارت حزين وفيه كشف خبايا عرفنا واخيرا خيط سري من قصة مطلق لكن وش التتمه نستناه معك قلبو |
سلامتج حبيبتي.. ما تجوفين شر
وتسلمين عالبارت<< فيس الاوكيك بارت بدا بكشف الحقائق.. مطلق واتهامه بقتل ساري.. اتوقع ان مطلق كان في مسرح الجريمه وما رام يساعده.. عسب جي كلهم شكو فيه نترياج فديتج<<الفيس راعي الورود http://www.liillas.com/up3//uploads/...29afe633ce.gif |
السلام عليكم
حمدلله على سلامتك نبوضه و الله يعطيك الصحه . بداية مع هجوم الذكريات لرونق و الألم الكبير اللي حسته و تحسه مع هاللي ما تتسمى فعليا الا معتقدات تافهه .. اسماء مو بس رونق منشغل باله حتى احنا انشغل بالنا مع هالغياب الطويل للي حصل لها .. مطلق .. صمت حبيب تحت وطأة مسمى الرجوله و المعتقدات راح تحطم أي رحمه له بقلب رونق و تنسف أي حلم تحلم فيه .. مرض زوجة الخال و حال بناتها و دوره بالاحداث غير متضح بالفعل بالنسبه لي . لكن الله يشافيها لبناتها ويصبر قلوبهم يا رب . ما اتمنــــــــى ابداً هاللي احسه و اعتقده .. اعتقد ان بسبب حالة وفاة راح تزور رونق اهلها و تضطر تكسر القوانين المنصوصه منذ الازل . علاقة مطلق بموت زوج نفله و كره اخته له ما زال محفوف بالغموض و الحذر .. بانتظار كشف الستار عن اللي بيصير . مصير وضحى المتعلق بكلمه من هالمعتقدات .. اعتقد بيصير شي يمنع هالزواجه و يا رب يصير شي يمنعها بدون ضرر لاي حد .. ارجو ان ما يطول انتظارنا اكثر و نحظى بجزء واحد على الاقل قبل رمضان و يكون طويل و يشبع الفضول للجميع .. أمجاد ، فيصل ، ندى ، نهى ، عبدالرحمن ، محمد ، أسماااااااااء و مصير مرضها ، عزام و نتايج فعلته ، تركي وعلاقته بمي ، والبقيه اذا بقى حد ما ذكرته .. |
السلام عليكم و رحمة الله و بركاته .. همسه :~ عشت معها أحببتها كأخت أكثر من صديقه !! مضت الأيام و الأعوام حتى تزوجت .. لا زلت أذكر خوفها من تلك الليله .. و لا زلت أذكر شوقها و تلك اللهفه !! فقد توغل حبه في قلبها .. و تتابعت الأشهر !! اثنا عشر و تزيد بسته !! أخبرتني بأنها تنتظر مولودها الأول !! فامتلأ القلب فرحا من أجلها .. غابت و غبت في غياهب الدنيا .. ثم أرسلت لي , دعواتك له فقد توفي !! و فقدت معه جنيني !! رحمك الله يا زوجها و عوضك الله خيرا يا شمس !! الجزء الثاني و العشرون : ( الحزن لأجلهم ) قد نحزن و نبتئس ,, نبكي و ننتحب ,, كله لأجلهم ,, لأجل من أحببنا ,, همومهم هي همومنا و الشوكة عندما تصيب أحدهم فهي تتوغل أولاً في قلوبنا ,, كل هذا لأننا أحببناهم في الله !! كنت امشي و أسابق خطاي ,, منيب مصدق إن أبوي الليله بيطلب لي نوره من عمي ,, و معنى إنه يطلبه يعني أكيد بتصير حليلة لي لأنه بنت عمي و أنا أولى به !! فتحت باب المجلس و أنا أردد : حياكم الله يا هلا !!! دخل أبوي ثم عمي بحكم كبر سن أبوي و استقر أبوي بصدر المجلس و عمي عن يمينه و بجنبه ملفي ,, قهويتهم ثم استقريت بجنب مطلق اللي بآخر المجلس .. عمي : نياق ابن صافي أنت شفتهن . التفت ابوي لعمي و رد : لا سألته أمس و قالي قدهن جايات . رد عمي : ما شاء الله لو تشوفهن !! أبوي : أبك أنت شفتهن ؟! رد عمي : ايه قدني معاينهن حد النفد الغربيه . التفت لمطلق اللي مركز بحديثهم و همست له : ياليل متى بتقضي هالسالفه . التفت علي مطلق و رد بهمس : اصبر يا رجال . رديت و الملل بدأ يداهمن : من وين تبي الصبر يجينا و السالفه به نياق ... ورجعت التفت عليهم و أنا أكمل :أنت تدري إن السالفه اللي به نياق ما تنتهي . لمحت طرف ابتسامته و قرص عينه على ملفي ,, التفت أشوفه ,, كانت ايده تنغز أبوه و ابوه يرده بإيده,, كتمت ضحكتي و اكتفيت بابتسامه لكن انقطعت ضحكتي على صوت عمي العالي ... عمي : بس يا ولد !! رد أبوي ينهره : اتركه يا جابر لا تنهره . و كمل أبوي : وش تبي يا ملفي ؟! ناظر ملفي عمي بطرف عينه و رجع نزل راسه بدون لا ينطق بحرف ... رد عمي : أنت يا خوي عندك سالفه تبيني فيها قلها يا عايض ! رد أبوي : و أنت علامك ما تخلي الولد يقول اللي بخاطره . رد عمي : علي الطلاق ما أقول و لا يقول ولدي لين نسمع منك يا وخيي . رفع راسه أبوي و ركز علي للحظات ثم بدأ يتكلم : ماهنا يا خوي إلا إني أبي بنتي نوره لـ......... لـ..ـــولدي مطلق !! مرت لحظات و دقات لبي ماله حس ... حسيت بضغط مطلق على رجلي و انتبهت على كلمة عمي : إلا ذي يا خوي أنت ..... أنت تدري إني ما أبيه يكون أبو لعوالي .. رد أبوي : صدقت يا خوي يهبأ ياخذ بنيتنا سود الله وجهه .. طاحت عيني على مطلق عاض على شفاته ,, ضغطت على ايده و أنا أهمس : اذكر الله يا خوي .. نفث الهواء اللي بداخله و فز واقف ,, وقفة مطلق ما تغيرت دايم رافع راسه مثل الصقر و هذا اللي يخلين متأكد إن مطلق بري من دم ساري .. شفته يتحرك طالع من المجلس و أنا متأكد إنه الحين كتلة نار تمشي على الأرض .. التفت و أنا أسمع كلمة أبوي : و اذا قلت لك لنايف .. ابتسم عمي و رد : نايف يجي ياخذها الحين كانه يبيها !! رد أبوي : أجل عقب يومين عرس الغليم على البنية ,, و ترى الرياجيل بوسط الديره و الحريم ببويتنا .. رد عمي على خير إن شاء الله بس يا خوي أنا عندي شي أبا أقوله . رد أبوي باهتمام : سم يا وخيي . نزل عمي راسه يفكر ثم رجع رفع راسه و تكلم : أبزوج ولدي ملفي ياخوي . ورد أبوي : ملفي ولدي و ما ألقى له أحسن من بنيتي وضحى . ـــــــــــــــــــــــــــــــــــــــــ وضحى كان بيتنا صغير و الحرف اللي ينقال بآخره ينسمع بأوله ,, كان كل صوت أسمعه تزيد معه رجفتي ,, سمعتهم حددوا عرس نايف و حمدت الله لأني حسيت إن عمي نسى سالفته اللي جاي عشانها ,, إلا إن شيطانه ما ارتاح لأنه ذكره بهلاكي !! كان كلام أبوي القاسي صدمه بالنسبه لي ,, عمي عرض عليه موضوع الزواج و أبوي اللي طرح فكرة إني أمثل دور العروسه . كنت أتأمل إن عمي يرفض أو حتى ..... مدري مدري !! لكن من رد عمي على أبوي عرفت إنه أصلا مبيت النيه إن وضحى لملفي .. حسيت راسي دار و تعطلت كل حواسي ,, كنت أسمع ازعاج لكني ما قدرت أميزه ما عدا صوت واحد اخترق اذني : مابي وضحى أنا أبي نفله ,, أنا أحب نايف ولد ساري !! مرت لحظات لحد ما استوعبت الكلام اللي انقال لكن من صوته هذا موب صوت عمي و لا صوت , لا لاااااااا هذا هو الا هذا صوت ملفي !! قمت من مكاني و أنا أشوف كل العيون متوجهه على باب المجلس ,, أمي و نفله و رونق و أنا ,, تقدمت و طلعت للحوش بخطوات سريعه ,, أبي أوقف الهبال اللي يصير ,, نفله ناقصه هموم عشان تزيدونه !! ما كنت أحس بنفسي و أنا أمشي و لا كنت أشوف طريقي من الدموع اللي ملت عيوني لكن حسيت بإيد خلعت كتفي ,, ايد وقفتن و سحبتن معه للمطبخ .. رفعت راسي و شفت مطلق بوجهي ,, صرخت بوجهه لكن ايده سبقتن و سدت افمي ,, مرت لحظات و أنا بين ايدينه أونّ ,, لحد ما قرب اثمه لأذني و همس : تبين تفضحينا عند الرياجيل !! رفعت حواجبي أبرد لكن مطلق كمل و هو ساد أثمي : باتسر نلقى ملفي يدور بين الناس و يقول بنية عمي تدخلت بأمور الرياجيل .. زادت همومي و أنا أسمع هالأعذار الواهيه لكل مشكله تصير ,, حسيت بايد مطلق تتركن لكني ما تحركت من مكاني لأن كل قوتي انهارت ! بعده بشوي شفت نفله داخله ,, قربت لي و بعيونها الف دمعه ثم ابتسمت و قالت بصوت مبحوح : ماعليتس يا وضحى ملفي أحسن من غيره على الأقل يخاف الله بولد أخوه !! ما رديت عليه و ما شافت غير دموعي اللي ماليه وجهي و تابعت كلامها : أصلا تدرين لو ما تزوجت ملفي أكيد يبي يزوجونن أي واحد يشوفونه رجال لأن .... لأن قعدة المره بلا عرس تزيد هروج الناس عليها .. كانت صابره لكن جروحها تئن ,, كانت كاتمه لكن حبها لساري مفضوح ,, تعبت من كلامها المواسي لي و كأني أنا صاحبة المصيبه و سحبتها لي ,, سحبتها لصدري و ضميتها و أنا أصييييييح ,, كنت أحلف لها إني ما ودي إنه يصير لها اللي صار ,, كنت ماودي .............. لكن شي وقفن شي تمنيته من زمآآآآآآآآآآآآن !! نفله تصيح ... و أخييييييييراً !! شديت من قبضتي عليها و أنا أهمس ,, إيه يا وخيتي انثريه هنيا ,, انثري الهم هنيا و لا تشيلينه الحالتس .. مرت لحظات و دموعنا ما وقفت ,, لحد ما حسينا بالحنونه تهمس : اذكرن الله يا بنياتي . تركت نفله اللي طارت و ضمت أمي .. كانت أمي تهمس بـالمعوذات و تنفث عليها ,, مرت لحظات و نفله تصيح لحد ما سمعنا صوت الشايب : جهزوا البنيه عقب يومين عرسها على ملفي .. ردت أمي : ان شاء الله .. و كمل الشايب : و لا تروح لبيت عمها إلا بيد رجلها ! و ردت أمي : على أمرك . مشى الشايب و دخل لغرفته و كأنه ما نثر هالهم بيننا ! على صفقة الباب أبعدت أمي ايدها عن أثم نفله و تركتها تكمل ونينها على صدره ,, و كأنه حرام نطلع الدمعه عند أبوي .. كان صدر نفله يرتفع و ينزل بسرعه من شهاقها بينما أمي تذكر الله عليها بثبات و كأن الحزن عمره ما طرق صدرها .. ـــــــــــــــــــــــــــــــــ رونق من دخلت للغرفه و أنا ناسيه الهوشه اللي بيننا أنا و مطلق نظرا لأن الظروف أكبر من هوشتنا ! كنت حاطه راسي بين رجليني و أصيييييح و بين اللحظه و الثانيه أرفع راسي و أشكي على مطلق . ما همّن كلام عمي و هو يخطب نوره لمطلق و لا همن كلامهم و هم يهينون مطلق إلا إن اللي أتعبن و أوجع قلبي نفله المسيكينه .. رفعت راسي و أنا أشوف مطلق ماسك المصحف و يقرأ على نور السراج و تكلمت و أنا أشاهق : طيب كلم عمك يمكن يلين . رفع راسه و رد : صار لتس شهر بيننا يا رونق و ما فهمتي سلومنا . و كمل لما ما سمع من رد : أنتي تظنين أنه عادي عندي ,, لا يا رونق ,, نفله غاليه علي و لا أرضاها عليها بس السواة سواة الله ما بيدينا شي !! رديت و صوتي مبحوح : و نفله المسيكينه حرام عليكم تخلونـ... قاطعن مطلق و رد بعصبيه : كلامهم مشى علينا كلنا و مالنا به حيله و نفله هذا قدرها و لازم ترضى به . و قرب و مسكن مع ايديني و كمل وعيونه علي : رونق لا قلت لتس سلومنا صعبه ...... تراي أعنيها !! حطيت راسي على صدره و أنا أجهش بصياحي : مطلق تكـ...ـفى مطلق إهئ إهئ .... مطلق ترا اللي جـ....ـان بحياتي يكفين لا تزيـ...ـده عليّ . ما أدري ليش أنا لجأت له يمكن لأني خايفه و هو الوحيد اللي قدامي أو يمكن لأني ارتحت له ..... ما أدري و الله ما أدري بس اللي أعرفه إني أحس بالأمان و أنا معه ! همس و ايدينه تحاوطن : لااا تخافين موب ظايمتس أحد يا بعد طوايف مطلق ! ـــــــــــــــــــــــــــــــــ ساره سحبت بطانيتي لي أكثر و صوت صياح العيّل يتردد عند أذاني ,, لميت نفسي و تنفست بعمق و أنا أذكر الله .. رجعت لي الصوره مره ثانيه لكنه كانت لوجه بغيض ,, شفت زوله و انتفض جسمي .. التفت على جنبي الثاني و رجعت غمضت عيني لكن كانت الصوره أوضح والوجه أقرب ,, شهقت و قمت قاعده و أنا ألهث من الروعه و التعب !! كانت اعضاي ترجف من الخوف و وجهي معرّق .. حسيت بصوت مها أختي ,, رفعت راسي و شفتها عليها جلال صلاتها و تسمي علي ,, رددت معها بصوت خافت و تعبان . مها و ايدها على كتفي تكلمت : لا يضيق صدرتس يا ساره ربي هو الشافي و هو اللي بيعافيها .. بلعت ريقي و رديت : تجيني أحلام يا مها تخوف .. بلعت ريقي و رجعت أرد : كل ما غمضت عيني رجعت لي .. ردت مها : قومي توضي و صلي لتس ركعتين و لا عاد تقولينها لأحد حلم السوء ما ينقال . قمت بمساعدة مها و توجهت للحمام و أنا أتعوذ من شيطان الجن و شيطان الإنس !! ـــــــــــــــــــــــــــــــــــــــ رونق من بعد الفطور و حنا قاعدين بالحوش ,, شمس الشتا دافيه .. من قومتي و أنا أراقب نفله و لقيته عاديه يمكن على قولته ملفي و لا غيره !! انتبهت لوضحى ,, اليوم وجهه غير ,, وجهه منور و كأنه اليوم مولوده !! فضى المكان إلا من أنا و وضحى .. عمي و العيال راحوا لأشغالهم و عمتي راحت تشوف وحده من الديره مولده و نفله بالسطح تنشر ثياب ولده . قربت لوضحى و همست : الله يرد لنا حبايبنا . تلفتت بسرعه و رجعت ناظرتن و ردت : أصصص يا مال الماحق انطمي لا يسمعتس أحد . رديت وأنا أضحك : مبسوطه . تنهدت و ردت و عيونه لفوق : بالأول بغيت أموت من الهم بس يوم فكرت بكلام نفله اقتنعت به ,, ملفي و لاغيره !! رديت : الله يعينه .. إلااا ما تدرين عن مرت خالتس وش أخباره ؟ ردت : الله يشفيها يا رب !! مرت ثواني و كل وحده منا سارحه بحياته لحد ما قطعت الصمت و تكلمت : وضحى أنااا .... أنا عندي مشكله و أبيتس تساعدينن . رفعت حواجبه و رجعت ردت : أبك أنتي ما تعديننا خوات .. رديت و أنا مركزه على ملامحه : مطلق ....... عجزت أفهمه ,, أحيانا يعصب على شي تافه و احيانا اذا غلطت أحس إنه بيحرق البيت علي و ما أشوف إلا رضاه أو حتى لا مبالاته لغلطي .. و تابعت : مطلق عنده سر و هالسر هذا هو السبب بإن عمي و عمتي يتسمون بنايف و يحقرون مطلق . ردت وضحى بعد ما تنهدت : الأحسن إنتس تطلعين من هالموضوع و تنسينه . رديت : لا يا وضحى أنا تعبت أبي أعرف ! ردت وضحى : رونق انسي ! رديت : لاااا أقولتس تعبت .. ردت وضحى و هي تتلفت : طيب بس ......... مطلق صح طلع . رديت : ايه . ردت وضحى : أجل خلينا نروح لحجرتس . قمت مع وضحى و أنا أقدم خطوه و أأخر خطوتين ,, خايفه من اللي أبسمعه و اللي على قولتهم أحسن إني أجهله !! ـــــــــــــــــــــــــــــــــــ وضحى بعد ما جلسنا بغرفة رونق أخذت لي دقايق و أنا أرتب الكلام اللي بقوله ,, ما نيب عارفه من وين أبدأ لكن نظرات رونق الحاده خلتن أتجرأ و أبدأ بسرد ذكريات مؤلمة .............. تنهدت و بديت بالكلام : شوفي يا رونق أنا أبقولتس القصه و أنتي احكمي .. ثم سكت شوي و رجعت أكمل بعد ما تنهدت : يمكن تلتبس عليتس القصه ووو.... ,, ويمكن حتى تتهمين مطلق مثلهم كلهم بس ..... مدري و الله لكن يمكن تصيرين مثلي ..... يعني .... شي داخلي يقولي ان مطلق بري من دم ساري ... و كملت : آآآآآآآآه يا رونق .. ردت رونق بعد ما شافتن ضايعه : قولي القصه يا وضحى . كنت عارفه إنه متلهفه تبي تسمع القصه بس وش أقول ... بلعت ريقي و أطلقت العنان لذاكرتي و بديت بسرد القصه : العام بشهر شعبان كانوا مطلق و ساري رايحين للحفر و هم بالعاده ما يروحون للديره إلا كل شهر أو شهرين ,, المهم إنهم راحوا يشرون المونه .. لاحظت إن رونق ميب فاهمه فوضحت أكثر : المونه يعني اللي نحتاجه من ماكل أو مشرب أو حتى ملبس ! و كملت : المهم إن ساري الله يغفر له كان مواعد أخوه عقاب بياخذه معه ,, و راحوا ثلاثتهم يم الحفر .. : يقول مطلق إنهم برجعتهم كان ساري هو اللي يسوق ,, و مدري وش صار لهم و قلبت السياره , المهم إن مطلق سلم ,, يقول يوم طلعت من السياره و أروح أبطلع ساري ,, يقول فتحت الباب و ألقى الحديد صاك على رجله وأحاول أطلعها و يوم طال بنا الوقت قال لي ساري رح طلع عقاب أول .. تنهدت و رجعت أكمل : ساري الله يرحمه كان يغلي عقاب بالحيل ,, عاد يقول مطلق رحت و طلـّعت عقاب ثم رجعت على ساري يقول يوم رجعت له حسيت بريحه قويه ,, يقول يوم إني تلفت و أشوف البنزيم يسرّب ,, ساعته بس عرفت إن السياره تبي تحترق ,, يقول و أحاول أسحب رجله منيا و مناك بس ما هنا حل ,, لين مل ساري من الانتظار و الخوف و كسر القزاز اللي قدامه و عطانيها يقول اقطع رجلي يا خوك ,, يقول مطلق ماقدرت أقطع رجله على قولته بس إنه بدأ يصيح بعالي صوته و يصرخ بغير وعيه يقول اقطعها أبروح لنايف ولدي اقطعها لا تحترق السياره يا خوك .. نشجت و رجعت أكمل بصوت مخنوق : يقول مطلق يوم إني شفته يصيح رحمته أومير أرحمه و أطلع خنجري عشان ألبي مطلبه ,, و أقوم و أمرر الخنجر على رجله ,, يقول و الله إني تقل أمررها على قلبي بس وش اسوي !! و عضيت على شفاتي للحظات أمنع صوتي يعلا لحد ما قدرت أمسك نفسي ثم رجعت أكمل : يقول مطلق إني أسمع صراخ العيل وراي و صراخ ساري قدامي ,, يقول و الله إنها مره وحده اللي مررت الخنجر على رجله أومير تبدأ تحترق السياره و يزيد معها صراخ ساري يقول ابعد عقاب ابعده ,, يقول مطلق ما مدان أدفه بإيدي إلا و سيارة المستشفى واقفه و معهم الشرطه يقول طلعوا ساري و أول ماطلعوه انفجرت السياره ,, يقول بذاك الوقت مدري وش اللي صار لي بديت أركض و أبعد عن السياره و أنا شاد على ايديني باللي بهن ,, يقول يوم إني أبعدت عن السياره و أشد على ايد عقاب أكثر لأنه منهبل يبي يلحق ساري .. يقول مطلق أخذت لي دقايق و أنا أشوف سيارة المستشفى اللي شالت ساري مقفيه و لا قويت أتبعها و لاني قادر أسوي شي .. ثم مسحت دموعي و رجعت أكمل : المهم إنها ما غابت شمس ذاك اليوم إلا و مطلق و عقاب و جثة ساري عندنا . ردت رونق و هي متأثره : طيب وشلون مات و الاسعاف أخذوه .. رديت : يقولون إن ساري نزف دم واجد و هو أصلا عنده فقر بالدم بس إنه ماعلم به أحد حتى نفله . عضت على شفته و ردت : يعني مطلق ما ذبحه !! رديت بحسره : مطلق رجع و ايدينه و خنجره بهن دم ساري و ماعلى لسان عقاب إلا مطلق ذبح ساري ,, ما أمسينا بذيك الليله إلا و عقاب ما يتكلم ,, جته اللطمه يوم إنه شاف اللي صار قدامه .. ردت رونق : بس مطلق كان يبي يساعد ساري !! رديت بحسره : لكنه ذبحه يا رونق . طاحت دموعه و هي تبرر : هو يبيه يعيش ما يبيه يموت !! تعجبت من تبرير رونق لمطلق مع إنه ماله إلا شهر بيننا و تيقنت ساعته إن قلبه تشرّب حب مطلق .. رديت أوضح له أكثر : ما حد يقدر يبرر غير عقاب و عمي ما يبينا نذكـّـر عقاب بشي لأنه بغى يموت ذيك الأيام من الهم . و نشجت ثم رجعت أكمل : أنا مثلتس يا رونق قلبي متأكد إنه بري بس ما بيدي شي !! ـــــــــــــــــــــــــــــــــــ نوره من سمعت بخبر عرسي على نايف و أنا ميب سايعتن الدنيا من الفرحه ,, يا ما عديت الأيام و الشهور و أنا أحلم بهاليوم ,, صح إني منيب كبيره أصغر من نفله بسنه يعني عمري ثمان طعش سنه ,, لكن كنت خايفه إن أبوي يزوجن لمطلق ,, يمكن ما كنت أكرهه من قبل بس بعد موت ساري كرهته كثر كل هالدنيا و يمكن أكثر من فرحتي الحين !! و نفله يا عمري فرحت له بالحيل ,, أدري إنه تحب ساري و أي رجل كامل بهالدنيا ما يرضاها على زوجته إنها تحب غيره لكن ملفي ما أتوقع يهتم لهالشي و هذا اللي يبي يخلي نفله ما تشيل همه غير إن نايف بيبقى معها و ما هيب منظام دام إنه ببيت جابر !! : نوره !! رفعت راسي لأمي و رديت : سمي يمه . ردت أمي : يمه الطيور طارت بأرزاقها و أخوتس قده بطنه خاوي ما ذاق العيشه !! التفت و شفت عقاب مغمض عين و مفتح عين قمت بسرعه و حطيت له من القرص اللي قرصته و شوي سمن و جبت له من حليب النياق .. طلعت من المطبخ لقيته غافي بالحوش ,, قربت له و حطيت الفطور قدامه و أنا أناديه : عقاب قم يله تفطر !! فتح عيونه و ناظرن و هو نصه نوم ثم تعدل بجلسته و قرب للصحن ,, قطعت له الخبز و تركته يأكل و اكتفيت بتأمله ! عقاب عمره سبع سنين ,, قبل سنه كان مع ساري يوم وفاته و من ذاك اليوم اللطمه بلسانه ,, من ذاك اليوم و هو ما ينطق و حتى لو نطق ما ينفهم منه شي ,, أرحمه و يقطع قلبي لكن الحمد لله إنه يسمع غير إني إذا شفت ملفي أقول ألف الحمد لله إنه باللسان و لا بالعقل !! أكثر ما يقطع قلبي أبوي ,, بعد موت ساري و هو يشوف ساري بعقاب ,, مع إنه غير بأشباهه لكن نفس نفخة صدره و نفس أطباعه عناده ! حسيت بإيده تنغزن و انتبهت له و أنا أرد : هاه .. ابتسم و ضغط على ايدي ,, حسيت إنه امتنان منه على الفطور .. ابتسمت له و أنا أرد : ابو جابر يامر و حنا نلبي . شفته يأشر براسه علامة لا و رجع يأشر على نفسه ثم يأشر على غرفة ساري .. ما فهمت وش يبي و رديت عليه : ما أدري يا عقاب وش تبي ؟ : هو ابو نايف هو يقول تسذا !! رفعت راسي و شفت ملفي داخل ,, ابتسمت له و أنا أشوف عقاب يأشر على ملفي يأكد كلامه .. التفت لملفي و سألته بعد ما طلع عقاب : ملفي ... وش اللي ... وش اللي خلاك تختار نفله ؟؟ ناظرن للحظات ثم جاوب : نايف ما عنده أبو ,, أنا قلت نفله عشان أنا أصير أبوه .. ابتسمت و أنا أحمد الله اللي سخر ملفي لهالصغير نآآآآآآآآآآآيف .. ـــــ>> تكمله |
رونق فتحت الباب و دخلت للغرفه ,, شفته لابس شماغه و واقف شكله بيطلع !! تكلمت : مطلق بتطلع ؟! رد : ايه تبين شي ؟! رديت : لا بس هالحين حر !! ابتسم و رد و هو رافع حواجبه : تخافين علي . ابتسمت و نزلت راسي بحيا ثم تكلمت بسرعه عشان أضيع الموضوع : أأأ...أنا ما أشوفك إلا بالليل اقعد نسولف شوي .. ابتسم و قعد ثم رد : و هذاي قعدت يالله سولفي ! رديت بعد ما قعدت بجنبه : أنت سولف علي أنت اللي تطلع و تدخل .. ضحك و رد : و الله و الطلعه أبعد شي أروح له النفد الشرقيه و النياق .. عضيت شفتي و أنا أحاول أصيغ الموضوع اللي عندي لكن مطلق حس بي لأنه قال : صار لنا شهر متزوجين بس... بس أحس إني فاهمتس و فاهم اللي تبينه .. فتحت عيوني على وسعن و رديت ببلاهه : هآآآه . رد مطلق: أنا ما أعرف اللي تبين تقولينه لكن أدري إن عندتس شي .. نزلت راسي للحظات ثم رفعته و أنا محتاره بالطريقه اللي أبفتح به الموضوع لكن عيون مطلق اللي تراقبن خلتن أتجرأ على الكلام و تكلمت : مطلق أنت تقول صار لنا شهر متزوجين ... بس هالشهر على قصره إلا إني عرفت عنك أشياء .. و سكت شوي ثم رجعت كملت : أنت تعصب بسرعه ووو ... و ساعات أحس إنك بتحرق الدنيا بس ترجع و ترضى بسرعه ,, يمــ .... يمكن عشان قلبك طيب .. بـــ.... بعد عرفت شي عنك .. ابتسم و رد : وش هو ؟ رديت بعد ما أخذت نفس عميق : تحب الخير للناس و ما تبي تظلم أحد حتى لوو ,, حتى لو كان بعيد فكيف للقريب . ناظرن بطرف عينه و قال : و المغزى ؟! رديت : أنت ما سويت شي لـــ .....ساري أنت ما ذبحته !! مرت لحظات و عيونه معلقه علي بحده ,, توقعته يصرخ يعصب يسوي أي شي بس ما توقعت هذي ردة فعله !! تكلم بهدوء : وش اللي يخليتس متأكده إني بري ! رديت : مطلق أنت ما تضر أحد وشلون لا صار صاحبك و ولد عمك .. نزل راسه للحظات ثم رجع رفعه و رد : طيب صكي هالسالفه . و تحرك يبي يقوم لكني مسكت ايده و رديت بسرعه : لا ..... التفت بسرعه معصب من ردي فكملت بسرعه : ما نيب ساكته عنهم لاصاروا ظالمينك .. و كملت : أنت.....أنت لازم تعلمهم إنك بريء . رد و هو يضغط على كل حرف يقوله : رونق تذكرين وش قلت لتس قبل لا تفتشين عن خطأ غيرتس دام خطاتس......... قاطعته بسرعه : مطلق أنا ما أخطيت . رد بسرعه : طيب برري لي .. حطيت راسي بين ايديني و مرت لحظات و أفكاري مشوشه وش أقول له ؟ وش أبرر له ؟ أقول أختي غلطت علي ؟ أعلمه بالحقيقه و أخلي حتى مطلق ينتقد تربية أمي موضي ؟ لا لا مانيب قايله يكفي أمي اللي شافته من أبوي !! رد لما شافن ساكته : رونق . و قرب و لثم جبهتي ثم كمل : أدري انتس ما غلطتي و برتس بأمتس هو اللي كبرتس بعيني .. للحظات حسيت إني صغيره ,, حسيت إنه ينقد على أمي و بسرعه تكلمت و عيوني مليانه دموع : مطلق و الله إن أمي موضي ما غلطت معنا ,, هي اللي ...... قاطعن بسرعه و هو يشد على ايديني : أدري أدري و عارف كل شي بالتفصيل ,, عارف اللي ما عرفوه أخوانتس ! ثم نزل راسه و رجع رفعه و كمل : بس بس يا رونق سالفتي غييير و ماله حل فلا تتعبين عمرتس . رديت بسرعه : نسأل عقاب يمكن يعرف . رد بسرعه و هو شاد أكثر على ايديني : حلفتس بالله ما تسألينه ,, عقاب مسيكين كافيه اللي جاوه ,, و عمي روحه به .. ثم كمل بعد ما احمرت عيونه : يكفين إن ساري يدري إني ما ذبحته .. رديت : مطلق تكفـ.... قاطعن : أنتي اللي تكفين لا تسببين لي مشاكل و انسي اللي عرفتيه .. ثم شال نفسه و طلع بكل كبرياءه !! طلع بسرعه قبل لا ينثر همومه عندي ... ــــــــــــــــــــــــــــــــــــــــ بعد اسبوع ...... نفله ,, الظهر أتعبن اليوم نايف بالصياح و عجزت أنيمه ,, حطيته بفراشه و انسدحت بفراشي و أنا أسمع صياحه ,, ما أخذت لي ثلاث دقايق إلا و ملفي داخل بسرعه للغرفه و شايله .. أنا : ملفي تكفى لا تاخذه خله ينام . رد ملفي و هو يحاول يفك مهاده : منيب مخليه يصيح . رديت بتعب : وش أسوي به هلكني بصياحه .. رد ملفي و هو شايل نايف بلا مهاد : أنا أسكته الحين .. انسدحت على فراشي و اكتفيت بتأملهم ,, كان ملفي شايل نايف و يدور به بالغرفه ,, كنت أسمع صوت ملفي و هو يعلمه قل يا بوي يا بوي و نايف الصغير يدور بعيونه مهو فاهم شي ,, مرت لحظات لحد ما اخترق اذني صوت عمي ينادين .. قمت بسرعه و لبست برقعي ,, مع إن البيت مافيه أحد أتغطى عنه بس هذي سلومنا ,,طلعت لعمي بعد ما وصيت ملفي على نايف .. أنا : سم يا عمي .. رد عمي و هو حاط ايده فوق عيونه يصد الشمس : جيبي لي نايف يا ابوتس قدني متوله عليه .. رديت بسرعه : سم يا عمي . دخلت بسرعه أباخذ نايف ,, ولقيت ملفي على حاله يدور بنايف ,, تكلمت بسرعه : ملفي ما يصير تعوده على الشيل . رد علي : لااا ولد ساري ما يصيح . عضيت على شفتي لما ذكروا الحبيب الغايب و تناولت نايف من ايدين ملفي و أنا أحاول ألم الجروح قبل لا تنزف و تكلمت : عمي يبيه .. أخذته من ايدين ملفي و طلعت أدوّر على عمي ,, سمعت صوته جاي من المجلس ورحت له لكن قبل لا أدخل سمعت صوت عمي يهاوش و وقفت .. عمي : أبك أنتي يا مره ما تفتهمين ,, البنيه منضامه من ميتة رجلها و أنتي تزيدينها ,, ماهي هي اللي ذبحت ساري ,, هي مرت ساري و أم ولدنا ,, هي بنت الأصول اللي ما رضت يربي ولدنا ببيت أهلها و ظلت ملازمتنا على شين منطوقتس معها .. تراجعت كم خطوه و أنا عارفه مع من يتكلم عمي ,, أكيد يقوله لعمتي ,, حسيت بصوت وراي و التفت ,, شفت ملفي وراي ,, ناولته نايف و انسحبت لحجرتي عشان أبعد عن أي شي يصير !! ــــــــــــــــــــــــــــــــــــــــــــ نوره .. العصر كنا قاعدين نسولف بالحوش ,, سمعت باب الغرفه ينصك و سمعته يتنحنح ,, عضيت على شفتي و أنا أشوفه يقرب للفرشه و عيونه علينا .. نايف : السلام عليكم . ردينا كلنا بأصوات متفرقه : و عليكم السلام . سأل نايف : أجل أمي وينها عنكن ؟! ردت وضحى : راحت تشوف مرت خالي فيحان !! سأل بسرعه : أبك هي جت ؟! ردت وضحى : قدها جايه ! رجع نايف يسأل : وش أخبارها ؟ ردت وضحى : عطوها علاجات و قرأ عليها الشيخ و ان شاء الله إنها بطريقها للعافيه . تنهد و رد : الحمد لله و الشكر يالله أجل أنا أبروح أسلم عليها ثم أروح للنياق .. ثم رجع نايف سأل : تبن شي يا بنات ؟ ردت وضحى : قل تبين شي يا نوره ترانا فاهمينها .. ضحكت و ضحك نايف ثم رجع قال : وش فيها لا سألت حرمتي و إلا وش رايتس يا أم ساري .. ردت رونق و هي منزله راسها مثل عادتها إذا تكلمت مع الرجال حتى الظفر ما يبين منها : كلامك مابه قصور يا خوي . ضحك و هو طالع و عاد كلامه و هو يضغط على كل حرف يعاند وضحى : تبين شي يا نووووره ؟!! ضحكنا كلنا و ردت وضحى : إيه هين الله لنا .. ـــــــــــــــــــــــــــــــــــــــــ وضحى بعد ما طلع نايف قلت للبنات خلونا نروح نسلم على مرت خالي ثم نطلع نحطب و نتمشى بعدها .. جازت لهن الفكره و أسرعنا و عجنا العجين ثم خليناها تخمر .. و يوم قضينا طلعنا لبيت خالي فيحان و قطعنا الطريق بالسوالف .. من يوم أقبلنا على البيت شفنا سيارة غريبه ,, أضفينا الغطا علينا و دخلنا من الباب على روس أصابعنا ,, قطعنا الحوش متجهين لغرفة البنات لكن صوت وقفنا .. : وضحى . التفت بسرعه على الصوت ثم رجعت عطيته ظهري و رديت : سم .. رد سطام : الحريم بحجرة أمي هنيا .. التفت بسرعه و شفت اصبعه مأشر على الحجره ,, شلت نفسي و مشيت بخطوات سريعه للغرفه و أنا ناسيه رونق و نوره !! دخلنا الغرفه و شلت برقعي ثم سلمت على مرت خالي و حبيت راسها : الحمد لله على سلامتس يا عساها سلامة دايمه .. ردت أم سطام : الله يسلمتس . سلموا بعدي نوره و رونق .. ثم سلمت على مها اللي قالت لي : وراتس تقل ملحوقه .. ضحكت و رديت : يمكنـّي ملحوقه !! اخترق اذني صوت أمي : بعيد الشر لا تقولينه ترى يقول الله وجب . ضحكت و أنا أسلم على ساره و همست ساره بإذني : أحلف إنتس شايفته بطريقتس ! ضحكت بحياء و غمزت له ثم شلت نفسي و سلمت على وضيح ... قعدنا يمكن نص ساعه عند مرت خالي ثم ترخصنا نبي نروح نحطب ,, قامن معنا ساره و وضيح و قعدت مها تزين العشاء .. يوم طلعنا تذكرت شي و سألت : إلا يا بنات منهي له السياره اللي عندكم .. ضحكت رونق و ردت : و الله من الشرافه .. ردت بسرعه وضيح : ايه ما دريتوا ؟؟ ردينا كلنا : وشو ؟ كملت وضيح : هذي سيارة واحد من ديرة ثانيه لقى أمي و سطام متعطله سيارتهم و جابهم بسيارته .. سألت نوره بسرعه : الله يبعد عنا الشر مهب توكم شارينها .. ردت ساره : إلا بس أمي تقول إن سطام نسى يملأ البنزيم .. ردت وضيح : يمكن باله منشغل بأمي و هذا اللي نساه البنزيم . قربت رونق اثمه عند راسي و ردت : ما نساه البنزين إلا إنه خاف تطير الشيهانه ما ايده . ضحكت و نغزته بكوعي و أنا أشوف بنات ابو مشعل مقبلات علينا ... ـــــــــــــــــــــــــــــــــــــ ساره كنت ناسيه كل شي أو بالأصح متناسيه ,, و ما أفكر إلا برجعة أمي لنا .. اليوم الجو بالبيت غير حتى الدنيا كله غير ,, اليوم السماء زرقاء و الرمل أصفر و كل شي له لونه ,, بعكس أمس و اللي قبله يوم الدنيا كلها باهته !! كنت أمشي و عيوني الظاهره من البرقع تدور على كل حبة رمل ,, سمعت صوت نوره : ساره شكل قلبتس طايح بعشق الغريب . رفعت حواجبي و أنا مستغربه لكن فهمت قصده و رديت بسرعه : توني ست طعش سنه روحي زوجي مها أكبر مني بسنه .. ضحكت رونق و ردت : بس مها ما هوجست مثلتس . ابتسمت و رديت : يا ويلكن من ربكن اتفقن علي حريم عيال عايض .. ضحكوا كلهم و ملت ضحكتهم المكان لكن سرعان ما انقبض قلبي لما شفتهن مقبلات علينا ,, بنات ابو مشعل !! حسيت بإيد وضحى تضغط على ايدي و التفت عليه ثم ابتسمت أطمنه .. أقبلن علينا و مدن ايديهن يصافحن ,, صيته ثم شمه .. سلمت عليهن و أنا أحاول أصد عن ملامحهن المرتبطه بأخوهن مشعل !! ما قدرت أتحمل الضيقه اللي جتن و سحبت نفسي و رجعت بسرعه للبيت ,, لحقتن وضحى و هي تنادين : ساره وقفي وين رايحه ؟؟ رديت و أنا أمشي : أبروح للبيت .. حسيت بإيده تمسكن بقوه ,, التفت عليه و رديت : فكين أبروح .. ردت و هي تناظر البنات اللي أبعدنا عنهن : اصبري يالخبله و بعدين هن وش دخلهن بأخوهن .. رديت بسرعه و العبره ساده حلقي : وضحى تكفين أبروح أزين العشاء مع مها و وضيح تجيب الحطب .. تنهدت و مشت معي : أجل أبوصلتس ثم أبرجع للبنات .. أشرت براسي علامة الـ إيه و مشيت بطريقي للبيت ... ــــــــــــــــــــــــــــــــــــــــ مطلق كنت جالس ورى النفد الشرقيه ,, ايديني تتعبث بالتراب ,, كلام رونق براسي ,, وراه ما أثبت لهم برائتي ,, بس وشلون ؟؟؟ بالخنجر المليان دم و إلا بثوبي و إلا بكلام عقاب قبل اللطمه !! تنهدت و أنا أتخيل لو يشوفون حياتي ,, من بهم اللي قهره موت ساري كثري ؟! يمكن يحسون إني أنا اللي ذبحته بس و الله إنها ماهي نيتي ,, و الله إني أبيه يعيش لي و لنايف و نفله و لأمه و ابوه و لكل أهل صبره !! يآآآآآه يا ساري يا صعب فقيدتك ياخوي !! حكيت راسي و رجعت أراقب صبره من بعيد ,, بيوت متناثره و عوال يلعبون منيـّا و نياق مناك ,, راح علي الوقت و أنا أراقبهم لين طاحت عيني على سلامه ,, سلامه هي ناقة ساري ,, شفت عقاب راكب على ظهرها و لجامها بيد عمي ,, و يمشي رايح جاي ,, تنهدت و أنا أبعد أي فكره بموجبه إني أفتح السالفه مع عقاب لأن عمي هده موت ساري و لو تمس الشوكه عقاب كان راح فيها عمي جابر .. ـــــــــــــــــــــــــــــــــــــ مها مرت لحظات و أنا موب مستوعبه اللي انقال ,, أنا أتزوج !! و بهالسرعه !! و حتى أمي مريضه !! قمت بسرعه وطلعت من المطبخ متجهه لأمي ,, طحت عليه و ضميته و أنا أشاهق و أصيح و أشكي !! أنا : يمــ.....يمه ماودي بالعرس !! و كملت بصياح : يمه أبقعد عندتس أداريتس .. حسيت بيد أمي تمرره على ظهري و سمعته تهمس بذكر الله ,, مرت لحظات و أنا أخربط على راسه لحد ما سمعته تشد علي و تكلمت : يمه يا مها أنتي الحين قلتي كل اللي عندتس خلين أحتسي .. سكت بينما تكلمت أمي و شاركها شهاقي : البنيه مالها إلا بيت رجلها !! رديت بسرعه و أنا أشاهق : يمه ماودي يمه .. قاطعتن و كملت : محمد يمه ولد ناس أجاويد هو اللي وصلنا لبويتنا و لا قصر معنا و لا عاده غلط علينا و ما سمعنا منه إلا المنطوق الزين غير إنه يا بنيتي غاض طرفه .. و كملت : يا بنيتي أبوتس أهداتس له لأنتس غالية عليه و ما يبيلتس إلا الزين ,, و حنا ودنا لو إنه ما تعجل بالذهاب لو إلى باتسر بس هو عيا يقول إنه معه دواء أبوه و ما يقدر يتوخر إلى باتسر .. نشجت و دفنت راسي بصدر أمي و أنا أصيح : يمه هو موب من ديرتنا يعني لا رحت مانيب جايه إلا عقب سنين !! ردت أمي بثبات : يمه الرجل الشهم ما يهم لو هو بالعراق .. و كملت بعد ثواني : روحي يا بنيتي كملي عشاتس و سدي جوع رجلتس و ضيوف أبوتس ثم عقب العشاء البسي لتس هندام زين و روحي معه !! مرت لحظات و أنا أصيح على صدر أمي لحد ما سمعت أذان المغرب و رجف قلبي ,, لأول مرة أسد أذاني و يرعبن هالصوت ,, مرغت وجهي على صدر أمي و كأني بعمر السنتين ,, كنت أحاول أخفي نفسي عن تصاريف القدر !!! ــــــ نهاية الجزء الثاني و العشرين . |
حلو البارت والاحلى الحقايق اللي انكشفت تثبت براءة مطلق اللي اشغلنا بقصتة طول المده اللي فاتت الغريب ان عقاب ياكد ان مطلق ذبح ساري ليش هو ماسمع الحوار اللي دار بين ساري ومطلق وان ساري هو اللي طلب من مطلق يقطع رجله000؟
ماشاف محاولات مطلق انه يطلع ساري 000؟ لو انه يبي يذبحه كان خلاه يحترق بالسياره الحقيقه عند عقاب وكلام رونق صحيح لازم يحاكي عقاب ويخليه يثبت براءته انا متاكده ان عقاب ورا الحكايه وفيها ان00000000!! واللي حبيته ان زي مامطلق متاكد من براءة رونق فرونق بدورها متاكده من براءة مطلق ملفي راح يكون خير ابو لنايف رغم انه ضعيف وعقله على قده لكن انا مستبشره به خير ونفله بكل تاكيد بترتاح لهالوضع لانها بعد ساري ماتبي زوج بتكتفي بابو لنايف يربيه ويهتم فيه وضحى واخيرا عتقك ملفي لوجه الله ان شالله يكون سطام من نصيبك الله يعطيك العافيه على هالبارت نتحرى الجاي |
:toot:يااااااااااااااااااهلا ومرحبااااا
:dancingmonkeyff8: بارت راااااااائع بجد كشف الكثير من الغموض منها حادثة ساااااري الله يرحمه نفله : تفكير صائب منها ملفي ولا غيره ما ينعرف ايش بتكون تصرفاته ما اعرف ليش احس ان ملفي بتتغير سلوكياته بعد الزواج وبيكون شخص اخر غير اللي كان :55: رونق : ف بعض الاحيان كشف المستور ما يجي بعده الا التعب الله يكون ف عونش :7_5_129:اخيرااا منتظرنش بكل شوق |
تسلمين فديتج عالبارت<< الفيس راعي الورود
بارت كشف لنا الغموض المحيط بحياة مطلق.. واتوقع ان مطلق يتكرح ويحاول يبري عمره.. خصوصا عقب الرمسه اللي قالتها له رونق<< فيس يتوقع وزواج نفله من لافي.. افضل حل لها ولولدها.. بجي محد بيروم يشل ولدها عنها وبيتم في بيت ابووه نترياج حبيبتي http://www.liillas.com/up3//uploads/...29afe633ce.gif |
السلام عليكم
اللهم أرحمة رحمة واسعةً من عندك ، اللهم أربط على قلوب ذويه و ثبته عند السؤال ، اللهم إجعل قبره روضة من رياض الجنه . يعطيك العافيه نبوضه .. جزء رائع و كشف من الحقائق الكثير و اجاب على تساؤلات كره اهل مطلق له .. اما العُقد اللي محاوطه رونق شي غريب ، يعني بالاول عزام وغيرته الطفوليه والحين ولد عم زوجها لزوجها نفس الشي بسبب تعلق طفل باخوه تصير مصيبه فوق رووس الكبار . مطلق .. هل راح تأثر عليه رونق و يقدر يكشف براءته قدام الكل او راح يستمر بالصمت و الرضا بالحال المايل اللي عليه . من سخط والديه الى كره اخته . وضحى .. صحيح افتكت من ملفي بس الان هل راح يصير لها ولد خالتها والا بيجد شي ثاني . بصراحه انفجعت لما شفت الخطبه بالبداية رايحه لمطلق يعني الحين رونق مهدده باي لحظه يزوجون زوجها و هي و اياه ما لهم راي . زواج نفله و ملفي .. معاكي لكل تصوراتي .. بس فعلاً دامها مجبوره و مجبوره هو احسن من غيره . ساااااااااره ؟؟؟؟؟؟؟؟؟؟ وش سالفتها لايكون احد معتدي عليها ، او يمكن يمكن فيها سحر والا مس – لا سمح الله - بصرحه حالتها غريبه والا ليكون الاخرى فيها حاله نفسيه . ننتظر و نشوف وش سالفتها ؟ يا الله يعجبني دفاع رونق عن امها موضي وفائها و اخلاصها يدل على تربيه موضي الله يرحمها . زواج مها و الغرريب .. حدث جديد مجهول الهويه ؟ يعطيك العافيه نبوضه و ربي يجزاك بالخير . بانتظارك. |
شوفي بااقول لش حاجة انتي مبدعة ماشاء الله عليش
والصراحة ارتفع ضغطي وانا ادور في راسي وش قصة مطلق لكن دامها كذا فالحمدلله شئ اهون من شئ وبعدين ابي اسألك هل رونق قبيحة اتخيلها بيضاء عيونها صغار وانفها صغير والحالة حالة باتقولون الشكل مو مهم اقول الا مهم وفوقه زود ابي مطلق معاد يشوف الا هي مسيكينة يكافيها اللي جاها ووضحى قلبي يرقع معش كنت خايفة من ملفي لكن ربش خلصش منه جات منه يا فديت الروح الطيبة تصدقون اني راحمه نفله بعد ساري تزوجت ملفي لكن اهم شي وليدش رجالن يهتم فيه ولا رجال يتهزبه في المجالس وانا فاقع كبدي عقاب وش ذا القالعة ماجاب الصدق لبارك الله فيه وش قصة ذا الكذوب عز الله ان مطلق وقع ولاحد سمى عليه اقول هذرتي واجده والله الله نزلي البارت ننتظرش |
.
أعلم أن الكثير منكم ان لم يكن كلكم قد غضب مني بسبب انقطاعي !! لم أشأ أن أبتعد عن صديقتي و أنيستي الا أن ما يحل بالمرء من امور حياتيه تأتي مجبرة لنا لا مخيّره .. أعزائي القراء : كلما اعيتني الظروف همست لنفسي تابعي فثمة أناس ينتظرونك .. لذا آمل ان لا يدور بفكر أحدكم أن أهجرها خصوصا و أنه لم يبقى عليها سوى ثلاثة أو اربعة أجزاء .. سأرهقكم اذا قلت أنني سأنزل كل اسبوع و لن أنزل قبل ذلك .. لن يكون لي موعد فهي اربعة اسابيع لا غير و أخط اليكم الختام .. دعواتكم لي بتغيير الحال و راحة البال .. الجزء الثالث و العشرين : ( بدايات ) هنا قد تكون بدايات الحب .. و بدايات الحياة ... و من ثم بدايات النهاية .. مها سحبت نفس عميق و أنا أشم ريحة الحناء بيديني ,, مرت لحظات و أنا محتفظه بنفسي لحد ما أطلقته و أطلقت معه حياتي الماضيه .. أبعدت ايديني عن وجهي و تركت لهم المساحه حتى يمسحون دموعي و يكحلون عيوني ,, مر وقت بسيط بالنسبه لي لحد ما شفتهن يطلعن بعد ما قيدنن بالذهب اللي بين ايديني ... شفتها بآخر الغرفه قاعده و عيونها معلقه بي ,, تأملتها للحظات و أنا ضآآآآآيعه ,, شفت الدمعه بعيونها مدري دمعة فرح لي أو دمعة حزن لفراقي .. حسيت بخطواتها المثقله بالمرض متجهه لي ,, و شفت جسمها اللي هده التعب مقبل علي ,, حاولت أرسم ابتسامه على وجهي ما ودي أفارق هالبيت و أترك اللوعه بصدرها ودي تشوف فرحتي بهالعرس ودي تنسى الألم لو بهاللحظه .. و من لامست ايدها لإيديني رسمت أحلى ابتسامه على وجهي مع إني أبعد ما أكون عن الابتسامه .. حسيت بضغطها على ايديني و حسيت بقربها لما همست لي : الله يوفقتس يا يمه و ينور لتس طريقتس .. ابتسمت و رديت بحياء مصطنع و قلبي يحترق : آمـ..ـيـ..ــن . شفت ساره متجهه لنا و كالعاده ساره بهيئتها القويه اللي ما يهزها شي !! ساره مسكت أمي مع كتفها و ردت : يمه لا تصيحين و تضيقين صدر مها تراها على طرف الصيحه .. : من هي اللي بها الصيحه ؟!! من سمعت الصوت المرعب نزلت راسي بحياء و غسلت وجهي الحمره .. سمعت صوت أمي ترد : اقرب يا وليدي يا سطام تعال يمه .. سمعت سطام يرد : يا عساه مبارك يا وخيتي .. نزلت راسي أكثر و انكمشت ,, و ما رد على سطام غير صمتي .. ردت أمي بصدق : قل آمين يا وليدي عساي أشوفك معرس قبل ما أموت .. مجرد ذكر الموت عصر قلبي لكن سطام بادر برده : بسم الله على قليبتس يمه و ان شاء الله تشوفين عيالي و تزوجينهم .. ضحكت أمي و سحبت برقعها و ركزت على سطام و ردت : يله أخطبلك .. ضحك سطام و رد : قريب ان شاء الله يمه . ثم سمعت صوته مره ثانيه : يمه يله لبسوها بشتها رجلها يبي يمشي .. ارتجفت عظامي و عضيت على شفتي ,, شفتهم يلبسونن بشتي ثم يسلمون علي و يباركون لي لكن ما يرد عليهم غير صمتي .. لما سلمت عليهم كلهم لمحتها بينهم ,, شفت ساره كالعاده ماللدموع أثر بعيونها ,, ركزت نظري عليها للحظات أبيها تسوي كل شي خططت أسويه لأهلي ,, كأنها فهمت حاجتي لها و قربت لي و همست : روحي و لا تخافين يا مها روحي . قربت اثمي لأذنها و همست : انتـ...ـبـ..ـهي لها يا سـ..ـاره تراها تتحمل الوجع و تكـ....ـتم .. ردت ساره بهمس : لا توصينن على أميمتي !! ضميتها و شديت عليها ,, تمنيت أتغبى بداخلها و بين ضلوعها و ما أطلع لهالدنيا أبد ! مرت ثواني لحد ما حسيت بإيدها تبعدن .. حسيت بدفاء يد أبوي و اختفت ايدي الصغيره داخل قبضته الكبيره ,, ثم غبت للحظات داخل العباة الفضفاضه السوداء و تبعت ابوي بخطوات مرعوبه .. . . . من ركبت السياره و أنا غاطسه راسي لكني لمحت بيتنا يبعد أو بالأحرى حنا اللي نبعد إلى ما شاااااااااء الله .. مرت لحظات و أنا أسمع كلامه لكني ما شفت إلا طرف ثوبه !! لحد ما مل من حياي أو بالأصح صمتي المطبق و رفع راسي بإيده و تكلم : يا مها ردي علي أو حتى ناظرين .. رفعت نظري و شفت كلام أمي بين عيوني : " يمه الرجل الشهم ما يهم لو هو بالعراق " شفت اللي أثلج صدري ,, شفت لحيه سوداء كثه تحيط بوجه مطمئن .. ساعته بس نزلت راسي بحياااااء العروس و الراحه بدت ترتسم على محياي .. ـــــــــــــــــــــــــــــــــــــــــــ رونق اليوم بس فهمت معنى اليأس ,, و تبدد كل أمل بقلبي ,, اليوم بس شفت الليل بسواده و كرهته و كرهت معه صــــــبــــــره !! من شفت اليأس بعيون مها و أنا مكتئبه ,, كانت متضايقه لأنه ميب جايتهم إلا بعد سنين ,, كانت الدنيا كله صاكه بوجهه .. ما أدري ليش زواجه ذكرن بزواجي لكن مها عارفه اللي يبي يصير له بينما أنا كنت أجهل مستقبلي .. هي بنتهم و عارفه سلومهم و فاهمه إنه مافيه مفر من هالعادات لكن أنا لا ,, ما كان عندي خبر و لا حتى اقتنعت بهالعادات ,, مر وقت و أنا أفكر ,, من قناعة مها و يأسه أدركت إن كلام مطلق عن زيارتي لأهلي حقيقه و أنا اللي توقعته بينثني عن قراره بيوم من الأيام . لاحت صورة مها قدامي و عضيت على شفتي و أنا أحس بدموعي تملأ وجهي ,, خلاص ما عاد يهمن شي خل يشوف دموعي خل ينقهر مثل ماهو قاهرن ... جلس قدامي على ركبه و عيونه تتفحص وجهي ,, كانت نظرات الاستغراب على وجهه و سأل : علامتس يا بنت ؟! لفيت وجهي عنه و رديت بقهر : بي هم و غم و تكة صدر !! بلع ريقه و رجع سأل : رونق تكلمي وش بتس ؟! عضيت على شفتي و التفت عليه بسرعه و رديت بعصبيه : ابعد عن وجهي مالي خلقك !! شفت نظرات التعجب على وجهه لكنه زاد اصرار و رجع يسأل : أول قولي لي وش بتس ؟ رديت بسرعه و أنا معصبه : وش اللي موب بي ؟؟ كل شي بي ,, كل شي .. و غطيت وجهي بيديني و انفجرت أصيح ,, حسيت بإيديه تبعد ايديني ,, وقته كرهت كل الدنيا كرهت ضعفي و كرهت نفسي و كرهت كرهي لحياتي .. لما شفته ماسك ايديني يحاول يبعدهن تفلتّ منه ,, حاول يرجع يمسكهن ثانيه لكني دفيته بإيديني كلهن و طاح على ورى من ضربتي .. للحظات انصدمت من اللي سويته ,, أنا أدف مطلق !! لا يا ربي لاااااا !! شفته يقوم بهداوه و يرجع على نفس قعدته ,, شفت عيونه برعب فظيع و أنا أنتظر العقاب المرتقب من سوء فعلتي !! مرت لحظات لحد ما حسيت به يسحبن مع كتوفي ,, حسيت بارتطام وجهي على صدره ,, وقته انفجرت أصييييح ,, كنت يائسه من كل شي بدنيتي ,, ضايعه و عيوني ما تشوف الا الظلام ,, خايفه و مالقيت الأمان !! مرت لحظات و أنا أصيح و أجهش بصياحي ,, ما كان يختلط مع البكاء الا شهقاتي بين لحظه و الثانيه ,, و استمر مطلق يربت على ظهري .. و مر الوقت لحد ما حسيت إني فرغت شي كبير من الضيقه اللي بصدري ,, و غلب صمتي على صوتي ... بعد شوي سمعت همسه : منتب قايلة لي وش بتس ؟ رديت بصوت متقطع : مـ..ـابي شـ..ـي !! تنهد و رد : قولي كل اللي بخاطرتس !! سحبت نفسي من صدره ثم أخذت نفس عميق و أنا مقابلته ,, أطلقت نفسي و أطلقت معه لساني : مادري ,, بس .... بس متضايقه .. درت نظري على المكان أحاول أدور أي كلام يوصف اللي بداخلي ثم رديت و أنا مركزه عيوني عليه : مها ... مها ودعت خواته لأنه تقول منب شايفتكم الا بعد سنين ,, و كملت كلامي و أنا متفاعله أضوق عيوني و أرجع افتحهن أبيه يستوعب اللي بي : و ووو وبعد هي حياته تخوف زي حياتي ,, أخذت واحد غريب ما تعرف غير اسمه يعني مثلي ,, و بعدين هي تعرف سلومكم بـ...ـس أناااااا مـ..ـا أعرف !! و كملت : هي مقتنعه لأنه عاشت على هالعادات بس أنا لاااا !! و دمعت عيني و أنا أرد : مطلق و الله إني بالأول تحملت العيشه هنا عشانك ,, حتى شغل البيت و الديره كلهن حبيتهن عشانك ,, بس كل ما مشى الوقت أحس اني ما اقدر أصبر عن أهلي و الله مـ....ـا أقــ....ــدر !! مسك كتوفي و تكلم : رونق و الله ماهي بيدي ,, شفت بعيونه العجز و زود الهم فسالت دموعي ,, سمعت همسه : عشانتس أبجيب أخبارهم لا رحت أجيب المونه عقب باتسر !! رديت بسرعه : و أنا وراه ما أروح معك تكفى مطلق .. رفع راسه فوق و تنهد ثم رجع طمّـنه و رد : والله اللي رفع سبع و طمّن سبع لو يدري الشايب كان حلف ما تقعدين بالبيت .. عضيت شفتي و رديت : و أنا وش ذنبي ؟ بلع ريقه و رد : ذنبتس إنتس لهفتي قليب مطلق !! بلعت ريقي و أنا مصنمه ,, لأول مره مطلق يعترف بحبه لي ,, دايما كنت أشوفه مطلق البدوي صاحب الثمانيه و عشرين سنه ,, دايما كنت أشوفه الرجل الطويل الأسمر صاحب الملامح الحاده القاسي نوعا ما .. ـــــــــــــــــــــــــــــــــــــــ مطلق قلبي اللي حكى ماهو لساني ,, بعد ما اعترفت لي تحت نور السراج إنه حبت صبره عشاني ,, حبت الصحراء بجفافه و قسوته عشاني مع انه لا عاشت و لا كانت هنيا !! يعني حبتن ......... شفته بشكله الآسر ,, بشره بيضاء ما مرت على صبره من قبل و شعر أشقر و عيون صغيره و شفايف ورديه من البياض ,, كانت كأنه لوحه لكن الدموع أفسدت طعم البراءه به و حسستن وش كثر هالجسم الصغير يحمل من هم !! ساعته بس اعترف له قلبي بالمشاعر الصادقه اللي تتزاحم به ,, وتبددت صورة مطلق الرجل البدوي بصلابته !! أدري ان بنات صبره أملح من رونق بس هي اللي خطفت قليبي مهيب هن !! ـــــــــــــــــــــــــــــــــــــــــــ مطلق بعد اسبوع شفته ترتب ثيابي بداخل الصندوق الصغير ,, و منهمكه بشغله ,, ابتسمت على شكله و استحليت أني أعصبه !! ناديته و أنا منسدح : رونق . التفتت بسرعه و ردت : سم !! رديت : تعالي أبقولتس شي .. ردت بسرعه : ثواني بس أخلص اللي بيديني و أجي .. رديت بمكر : طييييب أوريتس كاني قلت لتس .. تركت اللي بيده و جت بسرعه و الضحكه بعيونه و جلست بجنبي ,, ابتسمت رونق و سألت : هاه وشو ؟ رديت و أنا متجاهل سؤاله : أشوف الوجه منور من عقب ما جبت لتس أخبار أهلتس !! ابتسمت و ردت : أكييييييد هذولا أهلي !! و كملت رونق : و بعدين سلامة أسماء أحسن خبر سمعته .. رديت بمكر : طيب لاصاروا هذولاك أهلتس أجل أنا وشو ؟؟ ضحكت بحياء ثم ردت : زوجي .. ضحكت و ملت ضحكتي المكان ثم رديت : أبك قولي رجلي وشهي زوجي هذي .. ضحكت رونق و ردت : منتب تقولي يالحضريه خل كلامي حضري أجل .. ابتسمت و رديت : خلاص أبقولتس يالبدويه .. فتحت رونق عيونه على وسعهن و ردت : لا ان شاء الله .. سويت نفسي معصب و رديت : و البدو وش بهم ؟ ردت بسرعه : لااااااااااااا ما بهم شي ؟؟ رديت بلعانه : أجل لا صرتي ما تبين الحضريه و لا البدويه أبسميتس بنت الشاميه !! اخترقت شهقته العاليه اذني و ردت : مطلق اعقللللل !! ضحكت و حطيت ايدي على راسي و أنا منسدح لكن رونق قاطعتن : قل انك تتهرب من اللي تبي تقوله ! رديت : أنا ؟! ناظرتن بطرف عينه و ردت : لا أنا ؟؟ و كملت رونق : قل اللي عندك تراي تحمست ! قمت و تعدلت بقعدتي و رديت : رونق اللي أبقوله لتس لاحد يدري به يعني تراه بيني و بينتس !! ناظرتن باهتمام و ردت : و الله ما أقول لأحد . تكلمت بجديه : سطام ولد خالي فيحان مكلمني يبي وضحى !! شفت الضحكه بعيونه و ردت : صدددددق ؟! رديت بسرعه : لا أكذب يعني وش رايتس ؟! ابتسمت رونق و عضت على شفاته ثم ردت : موب قصدي بس انصدمت .. رديت عليه : تدرين اني فرحت به سطام رجال و ماعليه كلام .. ابتسمت رونق و ردت : الله يكتب اللي فيه الخير يا رب.. رديت : هو قال لي و الا المواجيب انه يكلم أبوي بس يقول إنك صويحبي و هذا اللي خلان أقولك .. ردت رونق : الله يجزاه خير .. ضحكت ثم رديت : و الله لو يدري الشايب إني قايل لتس كان تفل بوجهي ثم ضحكت و رديت : مير أنتي يالحضريه خربتين حتى غديت كني حضري .. ضحكت و ملت ضحكته المكان ثم ردت : هههههه تخيلتك حضري ماااا يلبق !! قرصته مع رجله و انا أرد : أبك يالحضريه و الله ما ناقصني الا سروال و فنيله و أصير مثلهم .. ما رد علي غير صدى ضحكاته اللي انتشرت بالغرفه .. ــــــــــــــــــــــــــــــــــــــــــــــــــ بعد اسبوع .. سطام رفعت المشلح و أنا أرقى العتبه اللي عند الباب ,, و ما إن استقريت بداخل الغرفه حتى لاح لي القمر قدامي ,, شفت وضحى ,, حلم حياتي و ملهمة قصايدي .. قربت و أنا ودي أحد يقولي هو أنا بحلم و الا بعلم ,, لحد ما وصلت لعنده ,, تأملته بحب و أنا أجلس بجنبه .. مرت لحظات لحد ما حسيت بنفسي ,, من دخلت و أنا ساكت ,, وين سطام اللي تهابه خواته قبل العدى ,, وين سطام اللي ما يرتب القصيد أحد مثله !! بلعت ريقي و أنا أستجدي القوه و رديت : وضحى .. زاد تنفسه و نزلت راسه أكثر ! رديت مره ثانيه : وضحى يا حياتس الله ببيتس !! رجعت رديت و أنا أحاول أجمع الكلام : نذر علي لأحج لربي اللي استجاب لدعاي .. بلعت ريقي و أنا موب قادر أصف كلمتين على بعضهن ,, فرحتي فوق ما أنا أتصور ,, حاس إن الدنيا كلها توقفت عند هاللحظه ,, يا ربي لك الحمد يـآآآآآآآ رب !! لمحت السجاده مسفوطه بطرف الغرفه ,, قمت بسرعه و تركت مشلحي على الأرض ,, فرشت سجادتي و كبرت لله الكــــــريـــــــــــم . ــــــــــــــــــــــــــــــــــــــــــــــ ساره حسيت اني اختنقت من هالناس ,, شوفة أمه و خواته ذكرنن به و ذكرنن بصراخ البزر بين ايدينه .. سحبت نفسي بخفه و أنا أشوفهم متجمعين يتعشون و لبست عباتي بسرعه و طلعت بدون لايشوفن أحد .. كانت الساحه اللي برى مليانه رجال و عوال صبره و عقود الأنوار فوقهم ,, كانوا يتحركون و باينه الفرحه على وجيههم من أكبرهم إلى أصغرهم .. مشيت بخطوات سريعه متجهه لبيتنا و عيوني تترقب الطريق الأظلم اللي سلكته مبتعده عن الأنظار ,, لاح لي بيتنا بين الظلام مثل الشبح .. اتجهت له بخطوات سريعه و أنا أتعوذ من الشيطان .. حسيت إن أحد دفـّن على ورى حتى طحت على الأرض .. لمحت رجل بيده حصاة و يضرب بالأرض ,, ركزت نظري و اتضح لي انه يضرب شي .. قام واقف و تكلم : كملي طريقتس يا بنت الحيه و ذبحتها .. كان الظلام شديد لكني قدرت أتبين ملامحه ,, هو هو و الله هو !! سحبت عباتي علي أكثر و أنا أشوف الصوره اللي ترعبن كل ما غطت عيني بالنوم ,, و بدت ضربات قلبي تزيد و معدل تنفسي يعلى .. شلت نفسي بسرعه و رجعت أركض لبيت عمتي مثل المجنونه ,, كان الطريق اللي رجعت به للبيت غير طريق روحتي ,, لأني ما كنت أشوف قدامي الا البيت المنور ,, ما همي يشوفن أحد أهم شي عندي أبعد عن الشبح اللي وراي .. دخلت البيت بسرعه و سكرت الباب و تسندت عليه و أنا ألهث من التعب , حسيت بإيد تسحبن مع الدرج ,, كنت تعبانه و هلكانه و خايفه و استسلمت لهاليد ,, مشيت معه لحد ما شفته تتركن بوسط السطح ,, طحت على الأرض و أنا ألهث و أراقب عيونه الخايفه لحد ما تكلمت : ساره بسم الله عليتس وش بتس .. بلعت ريقي و دموعي تغسل وجهي , و بديت أتأتأ : شـ..شـ....شفته يـ...يا رونق شفته .. حسيت بها تضمني لصدرها ,, ساعتها صحت من قلب و أنا أسمعها تقرأ علي آيات من القرآن و الخوف باين على عيونها .. مر وقت لحد ما هديت شوي و رونق ما زالت تمسح على ظهري ,, مسحت دموعي و همست لها : أنا كنت رايحه لبيتنا وووو .... و لقيته بطريقي ... أبعدتن رونق عن صدرها و تكلمت و وجهها مقابل لوجهي : من هو ؟ رديت : مـ...مــ...ـــشعل .. ردت رونق بشك : من هو مشعل ؟ عضيت على شفتي و رديت : هذي سالفه طويله .. ردت رونق : و الله إن تقولينها لي .. رديت : أنا خايفه .. إهئ إهئ .. هزتن مع كتوفي و ردت : وش اللي صار قولي ؟؟!! سحبت نفس و رديت عشان أبعد الصوره اللي تخيلتها رونق عن : من زمان يعني قبل كم سنه جانا سيل و صارت كل صبره مناقع ماء .. و كملت وأنا أشاهق : كان فيه منقع سيل وراء النفد الجنوبيه ,, أنا شفت مشعل هناك ,, كان ..... كان يحاول يغرق أخوه من أبوه .. ثم شهقت و غطيت وجهي بعيوني ,, مرت لحظات و أنا أصيح ثم رجعت مسحت دموعي بسرعه و أنا أكمل : تو كنت راجعه لبيتنا بس شفته بوجهي .. حسيت بها تشدني على صدرها ثم همست لي و أنا اصيح : هذا زمآآآآآن يا ساره زماآآآآن انسي .. سحبت نفس و رديت و أنا أصييييييح : بس تو شفته .. ردت رونق و هي تمسح دموعها : بس ما يقدر يلمس ظفرتس .. سحبت نفس طوييييييييل و رديت : بس صورة العيّل إلى الحين بين عيوني يا رونق .. ردت رونق : ربي ما يضيع حق أحد يا ساره .. رديت و أنا عاضه على شفتي : يا رب اهلكه يا رب .. حسيت برونق تضغط على رجلي ,, رفعت راسي و شفته تتكلم : امسحي دموعتس و انزلي .. و رجعت كملت رونق كلامه : ترى ما شافتس أحد ,, أول ما دخلتي هجيت بتس فوق خفت أحد يشوفتس بهالحاله و يظن بتس سوء عاد تعرفين الديره صغيره و الحتسي ينتشر بسرعه .. دار الكلام بخاطري ,, آآآآه يا رونق ليتهم كلهم يدرون بسوء فعلته و أفتك من صورته اللي بين عيوني ,, عضيت على شفتي و قمت و قلبي ما زال يضرب من الروعه بينما أطرافي جمدت من الهواء البارد . ــــــــــــــــــــــــــــــــــــــــــــــ وضحى من بكرى الصبح . دخلت الغرفه و أنا شايله الصحن بين ايديني ,, نزلته على الأرض و تلفتت أدور سطام لكني مالقيته .. سكرت الباب ثم قعدت و فكيت برقعي و حطيته بحجري بينما احتفظت بالجلال علي لأني كنت مستحيه أشيله .. سمعت الباب ينفتح ,, و لمحت طرف وجهه يتقاطر ماء !! ثم نزلت راسي بحياء و أنا أسمعه : سلمتي يا بنت الأجواد . و رديت بصوت هامس : الله يسلمك .. اتجه للطاوله الخشبيه اللي تزاحمت عليه الكتب و أخذ الفوطه و مسح وجهه .. رجع و قعد مقابلن و الابتسامه مرسومه على وجهه ,, نزلت راسي أكثر و أنا أشوف عيونه تتفحصن ,, و ملت الحمره وجهي .. سمعت قهقهته و هو يقول : يابنت راستس غط بالسمن .. رفعت راسي بسرعه و عيوني تدور صحن السمن و أول ماشفته على حاله ما تغير فهمت خرط سطام و نزلت راااسي .. بهالمره حسيت بإيده تلامس وجهي ,, زادت ضربات قلبي و أنا اشوفه يرفع راسي و يركز على عيوني .. لحظات و تكلم : صرتي حليلتي يا وضحى لاعاد تنزلين راستس لا صرت عندتس قدني ما شبعت من شوفتس . عضيت على شفتي و أنا أبي أوقف كلامه اللي أحرجن ,, مسكت الدله بسرعه و صبيت فنجان و مديته له و تكلمت : سم تقهوى لا تبرد .. أخذ الفنجال و ارتشف منه ثم حطه قدامه و هو مازال مركز أنظاره علي ,, رجع ياكل تمر بعد ما صرف أنظاره عن ,, مدري علامي نسيت نفسي و نفثت كل الهواء اللي بداخلي و كأني ارتحت من نظراته المحرجه مجرد ما ارتكزت عينه على صحن التمر ,, بلعت ريقي و أنا اردد بداخلي يا رب ما انتبه يا رب .. رددت لا ما انتبه ماااااا انتبه !! حاولت أتجاهل صورته و هو عاض على شفايفه لكن اهتزاز كتوفه نبهتن انه دخل بموجة ضحك !! غطيت وجهي بإيديني كلهن و رديت : لاااااا تضحك علي .. كنت ميته من الفشل و ما ودي ابعد ايديني لكن ايدينه أجبرتن ,, سمعته يتكلم : ابك مادريت انتس هالكثر تستحين . بلعت ريقي و رديت : غصبن علي !! رجع تكلم : الله يخليتس لي أنتي وحياتس ... سكت لساني حياء بينما ردد قلبي .. آآآمين .... آآآآآآآمين .... يتبع ــــ |
.
ساره بعد اسبوعين .. دخلت المطبخ و أنا أسمع صوت امي ,, حطيت اللي بين ايديني و ركضت ناحية المجلس ,, شفته بجسمه الضئيل قاعده تزيد الحطب على الضوء ,, تقدمت و أنا أردد : سمي سمي يمه .. تراجعت أمي على ورى و أخذت الدله و ثبته بين الجمر ,, ثم تراجعت و جلست ,, أشرت لي بالمكان اللي جنبه ,, تقدمت و جلست و بادرته بالسؤال : عساتس ما تانسين شي يمه .. ابتسمت و ردت : اللي عنده بنيّ قرمات مثلكن يا يمه منين يونس الوجع .. رديت : الله يخليتس لنا يمه .. ردت أمي بسرعه : الاقط جمعتيه ؟! رديت بسرعه : قدني جامعته .. رجعت أمي سألت : لا يصير به رطابه ؟! رديت بسرعه : لا توكدت انه ناشف . تنهدت أمي و رجعت ردت : الله يوفقتس يا يمه ... اسمعي يا ساره أنتي الحين قدتس كبيره تميتي الست طعش و ما بينتس انتي و مها الا حول . و كملت امي : و البنت زينتها ببيت رجالها .. بلعت ريقي بعد ما فهمت قصد أمي و نزلت راسي بحياء أنتظرها تكمل !! و كملت أمي : ابو مشعل طلبتس على سنة الله و رسوله لولده مشعل و أبوتس قالــ ................. من ذكرت امي اسم مشعل انعصر قلبي ,, شهقت ثم سحبت نفس ثقيييييييييييييل و أنا أضم ايديني لصدري ,, حسيت ان الحجره مابه هواء ؟! انعاد الاسم براسي مرات و مرات و انا احاول استوعب اللي اسمعه !! زادت ضربات قلبي و ارتجف جسمي ,, مازلت غير مستوعبه لكني حركت لساني ببطء أنطق الاسم : مـ....ـــشـ ........ و اسودت الدنيا بعيني ............... ــــــــــــــــــــــــــــــــــــــــــــــــ وضحى ,, العصر كنت قاعده أراقبه و هو يلبس شرابه ,, سطام غريب بكل شي أحسه يعني كلامه و لبسه غير عن اخواني و عن كل رجال صبره هم اذا تكلموا مثل ابوي و غيره من الرياجيل يعني ثقافتهم على قدهم لكن سطام غير يعرف الشعّار الأولين و يعرف قصيدهم و حتى لبسه غير!! ههههههههه يمكن تستغربون من ان لبسه غير لكن تراه موب لذيك الدرجه لكنه يعني شخصيته غير و يهتم ببياض ثوبه و الشراب شي ضروري عنده .. شفته يقوم واقف و شكله لاحظ شرودي و من يوم ما ركز نظره علي انتبهت و صرفت نظري عنه ,, ما كان حياء لااااا بس خفت من اللي ناويه أقوله ... شفته قرّب و هو مبتسم ,, بادلته الابتسامه بارتباك و تكلمت : تبي أبخرك . و تحركت أبروح أجيب المبخره من المجلس لكنه مد ايده معترض طريقي و تكلم : موب قبل لا تقولين لي وش بخاطرتس .. عضيت على شفتي و التفت له و أنا منيب عارفة من وين أبدأ ,, كانت تدور ببالي صورة سارة و هي رافضه فكرة الزواج كله لأنها تكره مشعل و هالكره اللي ما احد يعرفه غيري ,, ما تقدر تقول لهم ما أبيه كل اللي بيدها ترفض العرس كله لحد ما يعرس مشعل ثم تشوف طريقها بهالدنيا .. سمعت سطام تكلم بسرعه و قطع هوجاسي : قولي وش بتس ؟ بلعت ريقي و رجعت أتكلم و أنا أناظره بترجّي : سطام .. أأ .. أنت تشوف حال وخيتك ساره ,, صار لها اسبوع من يوم خطبها ابو مشعل لولده و هي لا حيه و لا ميته ,, ساره ماتبي العرس يا سطام . شفته التفت بهدوء و اتجه للباب بدون لا يرد علي و كأنه يقول هالأمر منتهي لكني ما سمحت لنفسي أتركه يروح بهالبرود و ساره تتقلب على جمر الخوف .. لحقته بسرعه و مسكته من عضده ورديت و أنا اترجاوه : تكفى يا سطام كلـّـم الشايب عشان سـا.... قطع كلامي يوم التفت و تكلم بعصبيه : ساره اليوم و الا باتسر بتروح لبيت رجّـالها و مشعل رجال من ظهر رجال .. تراجعت على ورى و تكلمت باندفاع : بس ساره ما تبيه .. عقد حواجبه و رد : نعم ؟ وش اللي ما تبيه ؟؟ رديت بسرعه أبرر و العرق غسل وجهي : هي ما تبيه لا هو و لا غيره توها بالست طعش صبركم عليها . تنهد سطام و رد : وضحى انتي علامتس ناسية سلومنا و الا وش بلاتس ,, دام البنيه ميب مخطوبه و الرجل يستاهل علامنا نرده و الا تبين الرياجيل يقولون فيحان بن سطام يرد الشور لبناته . بلعت ريقي و أنا أفقد كل أمل بصرف نظر سطام عن رايه ,, و ناظرته بضعف وسط هيجانه ,, تمنيت للحظات إني ما تكلمت أصلا لأني بس زعلت سطام .. سمعت صفقة الباب و عرفت انه طلع ,, جلست بمكاني و تسندت على الجدار و أنا أراقب الباب صار لي اسبوعين متزوجه ... يمكن عطيت نفسي أحلام أكبر من الواقع ,, يمكن نسيت أو حتى تناسيت ان سطام واحد من عيال صبره و ان هالعادات صارت فريضه عليه مثل كل عيال صبره و كأن ثقافته ما كانت و لا صارت .. بلعت ريقي و أنا أتذكر ساره يا ربي وش بقولها ,, توقعت ان سطام بيقنع ابوه لكن حتى سطام ما اقتنع ,, يا ليتي ما أملتها ,, يا ليتي ما وعدتها بالفرج .. آآآآآآآهـ عليتس يا ساره و على حظتس يا بنت خالي .. ـــــــــــــــــــــــــــــــــــــــــــــــــ رونق أخذت الدله الصغيره و حطيته بصينيه غلب عليه الصدأ ,, و مدت لي نوره فنجالين من طاسة الماء و حطت أحد صحون التمر .... قمت من مكاني بعد ما عدلت جلالي لأن نايف موجود ,, بهالجلسه .. نزلت وأخذت الصينيه لكني ما أن اعتدلت واقفه حتى سمعت صوت خالتي يستوقفن .. فهمت انه تبين أصبر و راقبته و أنا واقفه .. طلعت خالتي صرة من مخباه و فكته و طلعت من كسره و حطته بفنجال و مدته لي ,, نزلت الصينيه لمستواه لحد ما حطته و ردت خالتي : عطيه رجلتس كوده يطيب . ابتسمت من تحت برقعي و أنا أشوف حنانه اللي طالما مثلت انه تخفيه لكنه ما تقدر و خوفه على ولده انفضح .. لاحظت نظرات الشايب الغير راضيه عن فعل أم مطلق لكني التفت بسرعه و أنا أحتفظ بصورة ام مطلق الخايفه على ولده .. تمنيت أوصل بسرعة البرق لغرفتي عشان أشوف مطلق وش صار عليه .. فتحت الباب و دخلت و أنا أشوفه حاط ايده على عيونه ,, حسيت انه نايم فحطيت الصينيه بهدوء ,, فسخت برقعي و حطيته بجنبي و نزلت جلالي على الأرض ,, بانت جلابيتي الحمراء اللي يغلب عليه التطريز الأسود .. مديت ايدي و تحسست ايد مطلق ,, شفته يتحرك شكله انتبه علي .. شفته يشيل ايده و يتنهد بصوت مسموع ,, و تكلمت : سلامتك . رد بعد ما التفت علي و ابتسامه متعبه مرسومه على وجهه : الله يسلمتس . صبيت له قهوه على الفنجال اللي عطتن اياوه عمتي و فاحت ريحة المره و تكلمت : هذا الفنجال مخصوص من عمتي تقول عطيه رجلتس كوده يطيب .. ابتسم و رجع ضحك و هو يقول : أجل رجلتس هاه . ضحكت و رجعت تكلمت : ههههههه لا تتطنز أويلاااه . نفخت بالفنجال و هزيته يمين و شمال أبيه يبرد لحد ما حسيت انه برد شوي مديته لمطلق ,, شفته يجلس ثم أخذه .. قربت له و حطيت ايدي على جبهته أشوف حرارته ,, حسيت ان حرارته أهون من العصر ,, حتى انه يقدر يجلس بعكس العصر ماكان يقدر يتحرك من التعب و الدوخه .. حسيت بتعرجات جبهته و شلت ايدي و أنا أشوفه مكشر من الطعم اللي يشربه ,, ضحكت و تكلمت : لا تصير بزر كمله .. حطه على الصحن و قال : عطين تميره تروح المراره من حلقي . مديت له صحن التمر و أخذ تمره و أكله ,, و تكلم و هو يمضغه : صبيلي فنجال عدل مهوب ذا العلقم .. ضحكت و رديت و أنا أصب له فنجال : ترى اللي بالقهوه مره موب شي . أخذ الفنجال و حطه قدامه ثم أخذ تمره و مده لي و تكلم : كولي شوفي وجهتس أصفر . ابتسمت بارتباك و كلام الجازي بنت الشيخ مساعد يدور ببالي ,, أخذت التمره و مضغته ببطء و فكري بعيييد ,, الجازي قالت لي وشلون أعد ,, مديت ايدي و صرت أعد و أنا ساهيه .. : واحد و خمسين يوم ؟؟!! التفت لمطلق اللي يسمعن و أنا أعد بصوت مسموع ,, اقتلب وجهي و شتت نظري بالغرفه و أنا اقول : لا لا موب شي .. ــــــــــــــــــــــــــــــــــــــــــــــــــ ـــــــ سطام حطيت راسي و عيوني هلكانه من التعب ,, اليوم وسمنا نياق و حملنا الشعير من سيارة الشيخ مساعد لحوش الأرزاق و .... حسيت بوضحى تدخل الغرفه ... وضحى : السلام عليكم .. رديت : وعليكم السلام . شفتها كتمت ابتسامتها و كأنها فرحت اني رديت عليها بعد تطنيشي لها اليوم كله .. أدري تطنيشي له عقاب كلامها اللي تناست به سلومنا لكني ما عاقبتها على الشي الثاني اللي اقهرن أكثر .. التفت و أنا أشوفها تحط جلالها و متجهه للفراش و رديت قبل تاصل : عطين الفكس .. شفت الدهشه على عيونها ثم تراجعت خطوتين و فتحت الدرج الأول و أخذت الفكس و تقدمت لي .. كانت بعيونها أسئله كثيره أدري نفسه تعرف ليه ابيه و أدري ان الخوف علي أكل قلبها !! بمجرد قعدتها عند راسي فسرت كمي حتى بانت البقع الزرقاء الصغيره على عضدي !! ما تكلمت و لا قلت له شي ,, حتى عيوني كانت موجهه لفوق أنتظرها تكمل شغلها .. مرت ثواني و هي ساكنه التفت عليها أبيها تستعجل و أنا منقهر منها لأنها ما فهمت شي لكن بمجرد ما طلحت عيني عليه حتى تأكدت انها فهمت من نظرة الصدمه بعيونها .. كانت فاتحه عيونها الواسعه و الكحيله و الدموع ماليتهن و تكلمت بهمس : أنـ.......ـــا اللـ..ـي حطيـ..ـت هالـ ....... و راح صوتها و مع صوتها اللي راح طاحت على ايدي و بدت تلثمها ,, كانت تصيييح بشكل موجع ,, كنت أحس بأنفاسها الحاره و دموعها على ايدي .. كانت تتمتم بحروف متقطعه : اللــ...ـه يـ..ـهلـ..ـكن .. مجرد ما استوعبت انها تدعي على نفسها نزعت قناع الجمود و شديت راسها لصدري ,, سمعت شهقاتها و رديت : بس يا وضحى بس .. تكلمت وضحى بصوت متقطع : و الله اني ما دريـ..ـت قسم بــ...ـالله العـ..ـلي العظيـ... قاطعتها و أنا أشد عليها : أدري و الله .. مرت لحظات لحد ما حسيت بها تهدى ,, سمعت تنفسها انتظم و الشهقات خفت .. تكلمت و بهمس : وضحى و اللي خلقتس ان لتس غلا بقلبي ,,, بس... بس هذا موب معناته أني أضيع الشيمه و أنسى سلومنا .. سمعته ترد : و الله ما أعيده و الله .. دخلت أصابعي بين خصلات شعرها و أنا أكمل : و هذا اللي أنا أبيه ,, ابي اللي صار هالمره درس لتس تعلمينه بناتس .. سمعت تمتمتها بخفوت : تآآآمر .. ــــــــــــــــــــــــــــــــــــــــــــــــــ ـــ ساره مر اسبوع من يوم انخطبت و أنا كل يوم أخاف أكثر من اللي قبله ,, لحد ما جاء اليوم ,, مدري وشلون مر بسرعه من دون ما أحس يمكن لأني ودي أوقف الوقت أو يمكن مدري مدري بس الأكيد اني كارهه اليوم بكل تفاصيله ... تذكرت اني ببيت الناس و ان ايد ابوي هي اللي جابتن لهالمكان ,, بالعاده المعرس هو اللي ياخذ حرمته من بيت أهله بس شكل ابوي خاف اسوي شي لأنه شاف خوفي اللي موب قادر يفسره الا كخوف عروس !! تلفتت أشوف الغرفه اللي أنا قاعدة به ,, مسندتين بطرف الغرفه الضيقه و بالطرف الثاني دوشق اسفنج ,, يمكن ولا وحده بخواتي أو ببنات صبره تحلم انه تنام على هالفراش اللين لكن أنا بس اللي تحقق لي مع اني كارهه هالشي أو بالأحرى خآآآآآيفه .. غرقت بأفكاري و ما حسيت باللي دخل الا يوم وقف قبالي ,, حسيت ان قلبي انشلع من الخوف و شهقت بصوت مسموع ,, شفت اقبح ابتسامه على وجه الأرض و تراجعت على ورى .. ما كنت فاهمه الصدمه اللي ارتسمت على وجهه لكني تراجعت على ورى بسرعه ,, شفته يتقدم ناحيتي ,, حطيت ايديني أغطي وجهي و أجهشت ببكاااااء موووجع ,, كنت أصيح و أشاهق و أنطق من بين دموعي : ابعد ابعد ...... بهاللحظه حسيت بإيدينه انغرست بيديني و سمعته يقول : علامتس يا بنت ؟!! كان قلبي يضرب و أطرافي ترجف من الخوف ,, لكن هو طلب تبرير ,, ما كنت قادره ابرر و أنا بهالصوره لكن مرت على بالي صورته و البزر يصرخ بين ايدينه ,, زاد صياحي و زاد ضغطه على ايديني ,, حسيت ان كل خوف هالدنيا تجمع بي ,, رديت بضعف و كلامي متقطع : البـ..ـزر أنت ذبحـ..ـته أنت.... الا و اللـ..ـه أنت أنت أغـ..ـرقـ..ـته بالسـ..ـيل . مع كل كلمه أقوله كنت أحس بارتخاء ايدينه لحد ما افتك ايدينه و تراجع على ورى ,, ركز نظره علي للحظات وسط شهقاتي اللي أحاول أكتمه بلا جدوى .. شفته راح ناحية الباب و فسخ بشته و علقه بالمسمار اللي ورى الباب ,, و الحقه بشماغه ,, اتجه بعدها للفراش و انسدح عليه معطين ظهره .. مجرد التفاتته و غياب وجهه الكريه عن عيوني حسّسن بمقدار من الأمان .. قعدت بمكاني متسنده على الجدار و أنا أراقبه ,, و مر الليل و أنا على حالتي لحد ما غلب التعب علي و نمت قاعده .. . . . . . فتحت عيوني على صوت الشيخ ابو مساعد يأذن ,, هذا أنا نومي خفيف و أي صوت يقومن ,, درت نظري بالغرفه و شفت الكريه نايم للحين قمت و تسللت بخفه لخارج الغرفه ,, أحسن شي ببيتهم أنه فيه ثلاث حمامات واحد منهن يتبع الغرفه موب مثل بيتنا حمام واحد للدنيا كله .. . . طلعت من الحمام و لبست عباتي شفت سجاده مفروشه على الأرض اتجهت له و كبرت لصلاة الفجر .. . . . مرت لحظات و أنا على سجادتي لحد ما سمعت طلعت الشمس ,, سمعت أصوات برى ,, رقــّـت لهاتي على الطلعه ابي أبعد عنه بس أخاف يهاوشن ,, بلعت ريقي و ادعيت اللامبالاة و أنا متجهه لشنطتي ,, فتحته بخفه و أنا كل شوي التفت عليه ,, أخذت الجلابيه اللي قالت لي أمي ألبسه و تسللت بخفه للحمام . رجعت و أخذت جلالي و برقعي من الشنطه و طلعت و عيوني تراقب الوضع ,, بمجرد ما طلعت شفت شنطه كبيره بالحوش ,, رجعت دخلت و تركت فتحه صغيره حتى أراقب ,, دخلت بنت متبرقعه شكله صيته .. شفته شالت الشنطه و صوّتت : فااهد .. شفت ولد بعمر الثمان سنين جاء يركض و طلع ,, ثم طلعت صيته و سكرت الباب وراه .. طلعت من الغرفه و أنا أناظر الباب ,, شوي و سمعت صوت السياره تتحرك .. : علامتس ما قومتين أصلي الفجر ؟! التفت بسرعه للصوت و انا مرعوبه ,, شفته يتوجه للحمام بدون لا ياخذ من جواب ,, تنفست براحه يوم راح و اتجهت للمطبخ ,, شفت المطبخ فاضي غريبه ,, طلعت للحوش المتوزعه على أطرافه الغرف ,, حاولت اتسمع لكن السكون يعم البيت ,, حسيت ببطني يوجعن ,, مررت ايدي عليه و تذكرت اني من متى ما اكلت !! رحت للمطبخ و بمجرد ما دخلت سمعت صوت وراي : الفطور بالمجلس تعالي .. جمدت بمكاني و أنا أشوفه يتقدم و يسحب ايدي ,, زادت ضربات قلبي و سحبت ايدي بخوف منه و ضميته .. بانت الخيبه على وجهه و و تكلم و هو راص على سنونه : اذا ما مشيتي قدامي للمجلس أبشيلتس لأن أهلي مشوا للعمره و البيت فاضي ما هنا الا أنا و انتي .. تحركت بسرعه و دخلت للمجلس و سط خطواتي الخايفه و خطواته الواثقه .. بمجرد ما دخل رقع بالباب و رقع معه قلبي ,, مدري وش يبي يسوي هالمهبول أخاف بيذبحن ؟!! شفت تسند على الباب ثم تكلم : شوفي يا بنت الناس ,, الوكاد انتس ظلمتين يوم انتس تقولين اني ذبحت البزر .. قاطعته و أنا اصرخ عليه : أنا شايفتك بعيوني هذولي .. شفته يقرب ,, غمضت عيوني و أنا أحسه يمسكن من عضدي ,, سمعت كلامه : البزر اللي شفتيه هو أخوي فاهد و هذاه حي ما مات .. بمجرد ما سمعت اسمه تذكرت الولد اللي شفته تو مع صيته و رديت : البزر ما مات ؟!! و كملت لما استوعبت انه حي : و بعدين وشلون سمحت نفسك تغرق أخوك ؟! رد و هو يهزن و راص على كل حرف يقوله : فاهد أخوي من ابوي و مرة ابوي اللي هي ام فاهد ياما و ياما ذبحتن يوم أنا صغير و كنت متحمل و ساكت بس يوم انها بدت تمد يدها على خواتي ما قدرت أتحمل ... بلع ريقه و رجع كمل : مرة ابوي تبيع الدنيا كلها ولا يجي فاهد مخش ,, عرفت بغلاته عندها قمت أخذته ,, أخذت أخوي فاهد و أغرقته ,, أدري انه ما مات بذيك الساعه لكني يوم رجعته و ثيابه غرقانه ماء عرفت ام فاهد ان الله حق و فهمت ان أي شي ياصل خواتي بيصير لفاهد .. رديت و دموعي أخذت طريقه على وجهي : بس هذا اخوك !! رد و هو يتنهد : و هذولي خواتي .. ترك ايديني ورفع ثوبه لحد كتفه التفت و بانت أثار على ظهره و رد : يوم انها تعلـّم على ظهري ما قلت شي .. و نزل ثوبه و التفت و كمل : بس خواتي لااااا ... تنهد و التفت شاف صحن الفطور بالمجلس ,, ابتسم و التفت و رد : هه من ذاك اليوم و هي تهابني أكثر من ابوي حتى !! و كمل و هو يتجه ناحية الفطور : و الا من يصدق انها بتسوي لي فطور صباحية عرسي .. مديت ايديني و مسحت دموعي ,, حسيت بالحلم اللي شفته سنين يتبخر ,, معقوله كل هذا صار و أنا ظلمته ,, مدري مدري .. تذكرت وجه ام فاهد كانت طيبه مره بتعامله مع صيته و شمه بس هن ما يبنه و يكرهنه ,, دايم استغرب من هالشي بس عمري ما دورت له تفسير . سمعته يرد و هو يعلك : تعالي افطري . حسيت بأصوات بطني و تقدمت ببطء ناحية الفطور و أنا حاسه براحه جزئيه لأنه الى الحين قاهرن إنه أخذ حقه بالبزر اللي ماله ذنب !! جلست و أخذت الخبزه اللي مده لي و بفعل الجوع أكلت و نسيت الدنيا كلها ... ـــــــــــــــــــــــــــــــــــــــــــــــ نفله مثل كل ليله ما ينام نايف الا على صدره ,, شفته قبل شوي يلعبه و الحين لقيتهم نايمين ثنينهم ,, قربت و أخذت نايف بخفه و حطيته بجنبي , ثم رجعت و غطيت ملفي .. كنت قاعده أراقب ملفي و أتذكر التغيرات اللي صارت عليه من العرس .. ما أبالغ و أقول سويت و سويت لأن عقله هو عقله ما يتغير يعني على خفه لكني قدرت أخليه يتطبع ببعض الأطباع مثل صب القهوه و استقبال الضيوف و القعده مع الرجال بكل وقت ,, كان دايما يتذمر لكن أوّل ما أقوله ان نايف لازم يتعلم المرجله منك لا كبر على طول يلين و ينفـّـذ .. حتى عمي لاحظ تغير ملفي و خصوصا بحنـّـته لا بغى شي ,, ابتسمت يوم تذكرت كلمة عمي " ملفي من عقب عرسه كبر عشر سنين " حتى عمتي رجعت علاقته الطيبه بي مثل يوم كان ساري حي ,, ما أدري هي تحسفت و الا وش سالفته ,, بس عاد أنا ما سألته اللي راح راح و الجروح ما ينسأل عنه !! التفت لنايف ولدي و مررت ايدي على وجهه ,, ارتسمت قدامي صورة أبوه !! آآآآهـ يا ساري يمكن عيب أو حتى حرام أتذكرك و أنا على ذمة غيرك بس وش أسوي و أنت تارك حبك و وليدك عندي .. تنهدت و همست بإذن نايف عشان ما يسمعنا ملفي : بالجنه ان شاء الله ابوك !! ــــــــــــــــــــــــــــــــــــــــــــــــ ساره مر اسبوعين على العرس ,, يمكن بعد اعتراف مشعل صرت طبيعيه و عشت مثل أي عروس بهالدنيا لكن بقى بعض الحذر بتصرفاتي مدري اسأل ام فاهد و الا وحده من البنات لا جو من العمره عشان ارتاح راحه كامله أو أسكت و مصير الزمن يعودن .. : وش مسويتلنا بنت فيحان غداء ؟!! التفت و ابتسمت و أنا أشوف مشعل داخل للمطبخ و رديت : أنت جيت ؟! ضحك و رد : لا قدني عند النفد . ضحكت و التفت له : مسوية كل خير .. وقف قدامي و رد : ما يجي من هالوجه الا كل خير . عضيت على شفتي أكتم ابتسامتي و التفت بسرعه للقدر اللي على النار و أنا أحاول أكتم حياي ثم رديت : شكلك جيعان الحين أحط الغداء .. حسيت بايدينه تحاوطن و سمعت همسه : و مييير تهج بنت فيحان !! ضحكت بصوت عالي ,, هذا اسلوبه دايما يضحكن ,, سمعت همسه مره ثانيه : ودي أحط اخوتس سطام على راسي لولا عرسه كان ما خذيتس .. افتكيت نفسي منه و التفت عليه : صدق عاد وشلون شفتن بذيك الظلماء . ضحك و رد : مثل ما شفت الحيه تحتس .. ضحكت و رديت : ماشاء الله عليك الله لا يضرك . رد و هو مبتسم بخبث : ترى ما عندي مشكله أقعد هنيا ما اقوم أبد دامتس تتغزلين بي . فتحت عيوني على وسعهن ثم كشرت لكني ما اقدرت أكتم الضحكه أكثر و ضحكت ... ـــــــــــــــــــــــــــــــــــــــــــــ رونق دخلت للغرفه و أنا مستغربه من الموضوع اللي يبي يقوله مطلق ,, شفته قاعد و حاط ايده على خده و من حس بدخلتي رفع راسه ,, ابتسم لي و بادلته الابتسامه .. أشّر على مكان على يساره و رد : هنيا .. تقدمت و جلست بالمكان اللي أشر عليه ,, و أنا أنتظره يبدأ بالكلام .. حسيت بإيده اليسرى حاوطت ظهري و قربتن أكثر له ,, و ايده اليمنى مسكت ايدي ,, ابتسمت و رفعت راسي و رديت : وش فيه يا مطلق ؟! ابتسم و رد : أنتي اللي قولي لي وش بتس ؟!! ضرب قلبي و خفت من كلامه ,, حسيت انه شاك بس تباعدت هالشي و سألت : وش تقول ؟ ووو بعدين أنت اللي قلت لي تبين ؟ نزل راسه و رد : يعني ما هنا شي تبين تقولينه لي ؟ رديت بارتباك : لاااا شي مثل وشو ... رفع عيونه و ركز على عيوني بينما أنا شتـّـت نظري و ضربات قلبي تزيد حسيت بإيده تمتد و تلامس بطني و رد : شي مثل هذا !! . . . فتحت عيوني على وسعهن و أنا موب مصدقه انه عرف و تكلمت بسرعه أبرر : و الله اني خفت يصير موب صدق و الله .. حسيت بإيد مطلق اليسار تشد علي أكثر و سمعته يقول بعتب : و الى متى ناويه تغبين عن ّ . هالمره أنا اللي ركزت نظري عليه و قلت له بصدق : قسم بالله العظيم أني ما أدري للحين يعني .. قصدي ما تأكدت .. كملت و أنا أشوفه ينتظرن أكمل : و الله اني خفت أصير مثل أسماء أختي هي مرّه تحسبه حامل و يوم كشفت قالوا له لا .. رد و هو يناظرن : و أسماء قالت لرجالها ؟؟ رفعت ايدي و حطيته على كتفه : أوّل شي قالت لأمي ........ و سكت عند هالكلمه " أمـــــي " قوّّه مفتقدته ابي شوره و أبي نصايحه ,, عضيت على شفتي و كملت : بس أمي رآآآآحت .. حسيت بإيده الثانيه تسحبن لصدره ,, مجرد ما لامس راسي صدره رديت : مطلق لاااااا . سحبت نفسي منه و كملت و أنا أمسح طرف دمعه : أخاف أصيح و أنا ما ودي .. شفته ابتسم و رد : لا تكتمين . ضحكت و رجعت أقول : موب كذا بس أحس اني قوه فرحه . و كملت : لا يا ربي ما ودي أفرح قوه أخاف مثل أسماء . ضحك مطلق و رد : تميتي شهرين و تقولين مثل اسماء لا أنتي حامل . مسك وجهي بين ايدينه و لثم خشمي و رجع رد : تدرين اني داري من زمان لأنه ماهنا رجال يجهل بعلوم مريته .. تلون وجهي و شتت نظري .... و كمل مطلق : يااااا أم ساري . فتحت عيوني الصغار بقوه و رديت : ساااااااري ؟!! ـــــــــــــ نهاية الجزء الثالث و العشرين |
السلااااام عليكم ...كييفك نبوووضه
اول شى الحمدلله على السلااامه وربي يعطييك الصحه وراحه الباال ثانيا ماتصدقيين قد ايش مشتاقين لابطاالناا الحلويين وفييه تطوراات صااايره كثيير في هذااا البااارت ....اهمهااا حمل رونق وزوااج وضحى من اللي تحبه وزوااج ساااره من اللي كاانت خااايفه منه وتحلم فييه ....بس طلعت ظاالمته كثيير .... والحمدلله على سلاامت اسمااء ....بس يااليت تقولينااا ايش صاار على تركي ومي ....ياااترى اكتشف كذبهاا ولا لسه ...ولا اخووه صااحب المصااايب اللي صااارت هذي كلهااا كييف صااارت حياااته .... ومنتظريينك على خييير انشاااء الله ,,,,,, |
اقتباس:
عزيزتي وردية الخد : روايتي هي من بنيات أفكاري ,, كتبتها حرفا حرفا ,, أوجدت أبطالها ثم قسمتهم ألى بدو و حضر و شوام ,, أسميتهم لأنني أنا من صنعتهم و سلكت بهم من الأحداث ماراق لي .. اذن في النهايه أنا من يختار لغة حديثهم فلا يلمني أحدا حتى لو جعلتهم يتحدثون اللغة الصينية !! همسه : لو لم يكن للبدو حيزا في قلبي لما تركت لهم الدور الأنبل في الرواية ... |
اختي ورديه شكلتس ماقريتي الروايه يمكن قريتي حوار او حوارين وبنيتي عليه كلامتس اول شي الكاتبه ماقالت اكتب عن بدو او حضر البنت اجتهدت في تصوير المجتمع الحضري القصيمي المحافظ وابدعت في وصفه وتكلمت عن المجتمع البدوي وعاداته وتقاليده وتميزت بصراحه
بصراحه مع انها من نسج خيالها حسستني اني اقراء روايه من الواقع من كثر ماهي مقنعتني باللهجه وبالطبايع وبالعادات والتقاليد نبوض سيري حبيبتي دربتس خضر وكلن له رايه بس تاكدي ان الاغلبيه مقتنعين منتس نبوض ابي منتس طلب اهل رونق معاد جبتي سيرتهم وين المقاطع اللي عنهم نبي نعرف حالهم بعد رونق اشتقولها ولا نسوها وتركي والمجرمه ميوه وشصار عليهم حياتهم كانت على حفة الهاويه ومعاد جبتي طاري عنهم وهذا اخو تركي اللي ورط رونق وخذا اختها نسيت اسمه واسمها خبري بهم ماتفقو والبنت ماتقبلته ابيتس تورينا حوبة رونق فيهم تدرين على ان مطلق يحب رونق وحالف يراعيها ولا يكدر خاطرها بس بصراحه ماحبيت حياتها عندهم ولله ان عذابها عند اهلها اهون من عيشتها عند اهله وععععع كرف ويومها كله كاتمه عمرها بنقابها وجلال ولا اذا رجعت الغرفه عاد الله وذا الغرفه وععععع كلها غبار وقرف وشلون بتعيش كذا بصراحهااحسها ماراح تقدر تستحمل تكفين خلي مطلق يتوظف بالقصيم وتنقل رونق ومطلق ويخلون صبره لا زاد وغطا ذا الشايب اللي مايبيها تروح لاهلها اقول ولله انك ياخالد ماسويت خير بختك وقطيتها ذا القطه كنت اتوقع ان مطلق يصير له شي وتطلق رونق وترجع لاهلها وعقب يعرف تركي بسالفة مي واخوه وبرائة رونق ويتزوجها بصراحه صعب ابدال دكتور براغنم وحلال لكن عقب ماحملت رونق فقدت الامل بس عسا تكون فيه معجزه وتترك رونق صبره الله وكبر الحين يقال حالها تغير وتصلح يحياتي عليتس جعل ماجاتس تكفير ولله ماربح منذا السالفه كلها الا مي ماشاءالله عليتس قدرتي تصورين بنات صبره كل وحده بشخصيتها بمنتها الدقه لا من وضحى او نفله او مها وساره بعد حتى نوره الكل وحده شخصيتها صدق نبوض ولله انتس كاتبه تحفه اعجبني موقف مها من ديرتهم وكيف بتعاني اذا تركتها بس هون عليها الامر واستسلمت للامر يوم شافت وجه الرجال وسماحته وارتاحت له خاصه يوم شافت الحيه والوقار ولالتزام اتمنى نبوض مايصيبتس مكروه وتكتمل الروايه على خير ولله انا اعرف الكل انسان ضروفه الله يعديها عليتس على خير يارب نبوض تاكدي ان اي كلام يقال عن الروايه ارى فرديه مهوب جماعي والروايه ابد ماعليها كلام |
هلا وغلا نبوضه يعطيك الف عافيه
وقلوبنا معك دائما انا كتبت رد على البارت اول ما نزل بس مدرى وين راح يمكن انحذف او انمسح منى رونق وتغير عيشتها من اهلها لحيات جديده عليها وعادات وتقاليد اول مره تختلط فيها احسها صعبه تتعايش وتتاقلم معها حتى لو مطلق يحبها صعب البعد عن الاهل والانقطاع عنهم نهائيا اسماء ومى وتركى واخوانها ومحمد وفيصل وينهم عنها كلهم محد سال عنها جدعوها على مطلق ونسوها بنتظارك بكل شوق وبنتظار الابداع |
يالبييييييييييييييييييييييييييه واخيرا انعشتي قلوبنا اللي على شفا من الموت؟
والاحداث متسارعه ماشالله وتركض ونركض معها بس بارت عجييييييييب نبوضه لاتزعلين من بعض الاراء لان احنا بدو ومتابعين لك بقوه فيه ناس كذا مازالوا على طبايع اجدادنا ليش ننكر يكفي انك بينتي نبض الشهامه والقوه بالشخصيات اللي تمثل البدو والحلو تعايش هالناس سوا بدو وحظر هذي نقطه تحسب لك والكلام طريقه لهجة البدو فيه اقوى من كذا واشد بداوه يعني انتي مقنعه جدا بالرغم انك قصيميه شي رائع وصدقيني انا فخوره بالجانب البدوي من القصه فيه بساطه وخفة ظل وشهامه وقوه وتحمل وصبر النساء يادون دورهم على اكمل وجه تضحي لبيتها ولعيالها واهلها وتعيش مع الصعاب بحب والرجال فيهم شهامه وقوه وحنيه بجد التمستها فيهم كثيررررر اسمحيلي اهنيك على سطورك الرائعه اللي تعيشنا الحلم واقع والخيال حقيقه |
نبض القصيم
يا حيا الله هل القصيم كلهم تدرين اني البارح مسكت قصتس وماقدرت ارفع عيني عنها الا وانا مخلصه كل الاجزاء رونق يا حبي لرونق ويا عزي للي ما عندها ام بس رهييب وصفس لمشاعرها وخيباتها وتأثرها وصفتس لها وللي حوالينها من اشخاص او اماكن حبيت خيالس تخيلت روحي ببريده واني في مزارعها و اني ادل بيت العادل حسيت اني اعرفهم تدرين شوقتيني اروح القصيم مع اني قريب رحت نجي للشخصيات ابو محمد عبد الله العادل وجع وجع لها الاشكال الي لا اخذ حرمه ثانيه على زوجته دلعها وشالها على راسه وحذف الاولى ولا جحدته الجديده رجع وهو يقسقس تقل كلب عندالاولى ام محمد امي موضي نموذج لشريحه كبيره من الحريم الصابرات اللي تخاف الله في زوجها وتبي رضاه بس مع انه ما يستاهل مي الغلط راكبس من البدايه للنهايه شلون تطيق عمرها ذي الاشكال وتستاهل كل اللي يجرى لها عبد الرحمن ماينلام في البدايه بس لازم الانسان يسمع اول بعد كذا يحكم عقله الحين قدامي شخص واثق فيه وبأخلاقه اصدق فيه على طول لازم ابحث واشوف ليش سوى كذا الحقيقه لها اكثر من وجه محمد حبيت مشاعرك مع رونق بس اللي ماحبيته ظلمك لها وجفاك دور الحقيقه يمكن في سر هذا بنتك العاقله هند عجبتني في وقفتها مع رونق دائما عهلى انها تتصنع الشر بس ماتقدر فيصل الله يكثر من امثالك تركي وجع ان شاء الله انت ما صدقت على الله وقالك عمك طلق طلقت تزوج تزوجت بس احسن ربي بلاك بمي تستحقون بعض ام رونق لا تستحق مني كل احتقار واشمئزاز لهها وللي مثلها عزام بصراحه مالك عذر بللي سويته مع رونق ابدا وبعذر ربي يوم زع كرهك بقلب نهى الضعيفه الله يعينها وربي انها تحزني العن شي تعيش مع شخص تجبر نفسك عليه الحلوات ندى وامجاد يا حبي لهن ولفزعاتهن اتوقع ندى من نصيب فيصل وامجاد من نصيب سليمان نجي لولد عمي البدوي يا زين البدو اللي انت منهم يا مطلق رجال وسنافي وقد الحمل يازينه يومي يقول لرونق انها خطفت قلبه حتى اعترافه بحبه لها راقي بس ياليت توافق لها تروح لهلها وان كانك خايف من شايبك خل على الاقل تكلمهم وبعد يا خي بدوي صحيح بس ماهو معقوله ما تجيب لك غرفتن زينه على الاقل عوض المسكينه شوي عن هاك الفراش المغبر المهتري ملفي يحزني وبنفس الوقت اعجبني يومنه اصر على نفله عشان يربي ولد ساري اخيرا حبيت اسجل حضوري والحمد لله اني لحقت عليس قبل لا تنتهين منها حبيت اقول ان الحضر والبدو واحد ومافيه فرق بيننا لكن ابليس يلعب بعقول الناس يحثهم على العداوه في النهايه كلنا مسلمين والفرق والفضل للاتقى سواء بدوي والاحضري |
السلام عليكم ورحمةالله وبركاته
هلا والله بنبض القصيم والقصيم كله حبيت اسجل اعجابي الشديد بروايتك الرائعه من حيث القصه والحبكه والعقده والتسلسل في الاحداث صراحه روايه تجبرك على متابعتها ومااقول الا ماشاء الله تبارك الله على انهاروايتك الاولى بس ماشاءالله تعتبرين روائيه رائعه واتمنى لك مزيدا من التقدم والابداع تسلم يدينك :::::::::::::::::::::::::::::: اتمنى لرونق انها تزين احوالها ومايقصر معها ولد عمي على قولة ام رنا ياالله تلحلح يارجال وودها لهلها تشوفهم ولا تكلمهم على الاقل باالجوال وخلها تسمع اصواتهم ويبردقلبها شوي اتمنى يجي ديرتهم سيل (استغفرالله)بس مايموت احد لكن بعده تكون الديره ماتصلح للسكن عاد مالهم الا بريده يسكنون فيها يازين بريده زيناه >>>فيس يمدح ديرته اللي ساكنها اخيرا ياقلبي اقولك يازين لهجتك البدويه وابدعتي في اللهجه البدويه مثل القصيميه>>>وترى حنايالبدولنا كثير لهجات تختلف من قبيله لقبيله لاوبعد من فخذ لفخذ مع ليش ياقلبي طولت عليك في الرد والهذره الواجد وسامحيني وانا والله لي فتره مااكتب ردوود لاني تعبانه لاتنسوني من دعائكم بارك الله فيك وجزاك الله خيرا سبحانك اللهم وبحمدك استغفرك واتوب اليك |
[B]
السلام عليكم [/B]اقبليني متابعة جديدة لروايتك الجميلة آآآه يا رونق يا ترى هناك ملائكة كرونق في حياتنا الواقعية القاسية والجاحدة ..... احس انه هناك تقشف في المواقف بين رونق ومطلق....فبالنسبة لي هم الابطال الرئيسية .... يا ترى كيف رح تنتكشف الحقيقة واي تانيب عظيم اللي رح يحسوا فيه اخوانها اللي ظلموها.... ننتظرك ...... |
.
الجزء الرابع و العشرون : ( روح جديده ) أبنائنا ما هم إلا قطع منّا الا أننا نحبهم أكثر من أنفسنا .. كان يتردد صياحه عند أذني ,, حسيت بتعب و تمنيت أني أتجاهل صوته و أكمل نومتي لكن صياحه المستمر ما خلا النوم يفكر يرجع لي ,, فتحت عيوني و وجهت أنظاري للفه البيضاء اللي جنبي ,, ابتسمت و رديت بلكنه غريبه عنّ : دوعااان يا لوووح امك .. ما رد علي الا صياحه ,, تواسيت و جلست ,, أخذته و حطيته بحجري ,, مسحت على شفـّـته الصغيره بلطف ثم فتحت زرار قميصي و رضعته ,, مجرد ما وصل الحليب لأثمه هدأ و استكان و تابع الرضاعه ببطء .. مر الوقت و أنا ألاحظه و أفكر ,, اليوم تميت سنه متزوجه ,, سنه راحت من عمري ,, كأني بهالسنه كبرت عشر سنين !! عمري ما كنت أتخيل أني أبصبر على فرقى أهلي سنه كامله , عمري ما كنت أتخيل اني ابتحمل العيشه الصعبه بهالصحراء .. أصلا حتى عمري ما سمعت بصبره !! مسحت على حواجب وليدي و تبسمت له بحب و أنا أقول له : ابوك وعدني انه بيخلين أشوفهم بعد ولادتي و هذا انا ولدت و جبتك يمه و قربت شوفتي لهم ,, عضيت على شفتي و كملت : قدومك قدوم السعد يا قلب امك !! حسيت بالباب انفتح رفعت راسي و شفت عقاب ولد ابو ساري ,, سترت نفسي بسرعه ثم رفعت راسي له و لقيته للحين مفهي !! ضحكت و ناديته : عقاب وش فيك ؟ أشر براسه يعني لا ثم أشر على اللفه البيضاء اللي بحجري .. رديت عليه و أنا موب فاهمه بالضبط وش يبي : تبي تشوف ساري تعال .. قرب بخطوات متردده ثم جلس قريب من ,, شلت ساري و قربته له ,, مد عقاب ايده و لمس ايد ساري ,, فق خشته ثم رفع راسه لي و ابتسم !! مر الوقت و عقاب عندي قاعد يراقب ساري و كأنه موب مصدق ان هاللفه بشر !! كنت قاعده أراقبه و أفكر ,, كم مره و مره حاولت أكلمه و افهمه اللي صار لساري أخوه ,, كنت ابيه يفهم ان مطلق بريء لكن بكل مره أحاول ألقى مطلق يحذرن اني أتدخل ,, اتراجع كم يوم أو حتى شهر ثم أرجع افكر بالموضوع ,, و أحاول من جديد اني استخلي بعقاب بدون أي تدخل ,, لكن مااا ألقى أي فرصه !! الحين هذا هو قدامي ,, ايييييييييييييه قدامي أقدر اقوله كل اللي ابي بدون ما أكون خايفه احد يسمعنا !! ابتسمت على هالفكره و أخذت ساري ,, أشرت لعقاب يقرب و قرب لي ثم شلت ساري و حطيته بحجره ,, لاحظت ابتسامته اللي شقت وجهه و كأنه موب مصدق !! بلعت ريقي و بديت أتكلم : عقاب أنت رجال صح ؟ أشر براسه موافقن و نفخ صدره .. كملت و أنا أبتسم : طيب تدري هذا سميناه ساري على من ؟ رفع كتوفه و نزلهن علامة الـ ما أدري . تابعت كلامي و عيوني عليه : عقاب حبيبي ساري الصغير سميناه على اخوك ساري الله يرحمه .. لاحظت تغير ملامحه لكني ما باليت و تابعت بسرعه : هذا ولد مطلق و سماه ساري لأنه يحب أخوك ساري ,, تذكر ساري يوم يموت ؟!! تدري ليش مطلق بدأ يقطع رجله لأنه ما يبيه يمــ ... : عقاااااااااااااب . رفعت راسي للصوت المرعب اللي اقتحم الغرفه و شفت مطلق بهيكله الضخم و حواجبه المعقوده بعصبيه .. حسيت بالبروده تمتد لأطرافي و تجمدت و أنا أناظره ,, وشلون دخل و ما حسيت به أو حتى سمعت خطواته !! حسيت بساري بحجري ولميته لي أكثر و أنا أستجدي منه الأمان و عيوني تراقب عقاب اللي سطعت الشمس بعيونه و هو مقابل الباب و بحركه طفوليه مسح دموعه بكمه و طلع و هو يركض !! . . و جااااااااء وقت الحساب !! . . سكر مطلق الباب و تسند عليه ,, صر على سنونه و تكلم بعصبيه : أنتي علامتس تتدخلين باللي مالتس فيه !! همست بخوف و انا أشوف مطلق بحالة عصبيه نادره : ااا.. اذا أنت بتسكت عن حقك أنا و ساري موب ساكتين .. ما كملت كلامي لأني شفته التفت بسرعه و فتح الباب ,, وقف قبل لا يطلع و قال : لو صار شي لعقاب بيروح وراه عمي !! و طلع و رقع بالباب ,, كان باين انه ثاير من صوت الباب القوي .. يآآآآ الله وش السواة معه بعد هذا ,, هذا جزاي اني ابي له الخير ,, أوووف خير تعمل شر تلقى !! ــــــــــــــــــــــــــــــــــــــــــــــــ وقفت سيارتي و ضربت على الدركسون ,, حاس اني ضيعت بس وشلون ,, قالوا لي خمسين كيلو جلد من جنوب و هذا انا تابع كلامهم ,, وش الغلط ,, يا ربي المفروض الحين وصلت موب صار لي ساعتين أحوس بهالنفد . نزلت من السياره و بديت اتلفت , ما شفت غير صحراء ممتده ,, رفعت نظري للشمس الحاره و مسحت قطرات من العرق تسللت على جبهتي ,, اتجهت للسياره و ركبت الحين الظهر حررر ,, أبصبر لين يجي العصب بعدين اكمل تدوير .. سندت راسي و بديت افكر يا ربي يا رونق وشلون قدرتي تعيشين بهالحياة .. مرت لحظات لحد ما خفت حدة الشمس بفعل الغيوم الماره من فوق الشمس ,, حسيت بالجو بدا يلطف شوي ,, فتحت الباب عشان يدخل الهواء و سدحت المرتبه .. . . . سمعت صوت ,, كأني أتخيل !! أو لااا لااااااااا هذا صدق موب حلم ,, قمت قاعد و شفت الرجل القصير المليان قدامي , مسحت على عيوني و ناظرته لثواني ... : تبا شي يالغريب .. بلعت ريقي و أنا اشوف اللي قدامي ,, موب صاحي أجل مصحين عشان يقول تبي شي ,,, تذكرت اني بهالصحراء و قلت بنفسي ايه اشوى بعد لو تركن نايم كان نسيت نفسي و ضعت بهالبران .. تكلمت و أنا ما زلت أتفحص شكله الأقل من عادي : ضيعت الطريق .. رجع يسأل و كأنه يهاوش : وين تبا وين موجه ؟؟ عضيت شفتي و بلعت العافيه و انا أشوفه يهاوش بر ابوه ذا عشان يجي يزمر علي !! طاحت عيني عليه و هو يمسح وجهه بطريقه غريبه ما اشوفه الا مع البزران ,, الصراحه اني شكيت بامره .. غاصت رجلي بالرمل و تعدلت واقف ,, كانت عيونه تلتهمن من فوق لتحت بنظرات غير طبيعيه ,, بادرته بالكلام حتى أتأكد من شكي : وشلون جيت بهالصحراء ما تخاف الحالك .. تحرك بسرعه و رد بعصبيه : انا رجال من ارجل الرياااجيل و حتى عندي ولد !! ابتسمت لما تأكدت و سألته و أنا أجاري لهجته : وش اسمك و من ايّآآآة عرب ؟ نفخ صدره و رد : أنا ملفي من صبره .. . و كأن الخير انصب علي لما قال صبره أخيرااااااا !! حسيت اني لقيت كنزمستحيل أتركه ,, سألته بسرعه : ملفي وين صبره ؟ رد بسرعه : عن غرب بعد نفودين .. و اشر بيده لجهة الغرب و كمل : منّآآآك . ركبت سيارتي و شغلته ,, و اشرت له بيدي و تكلمت : اركب .. ابتسم و رد : لا أنا بروح مشي .. تنهدت و انا مالي خلق تلزيم يكفي الشمس اللي طبختن : ملفي يرحم والديك اركب اخاف اضيع ثانيه .. و كأنه ثارت بنفسه عزيمة البدوي و راح بسرعه للباب الثاني و ركب . من سكر الباب حركت متجه لصبره و أنا أدعي " الله يصبرناااا " ـــــــــــــــــــــــــــــــــــــــــــــــــــــــ رونق الظهر .. كنت قاعده بغرفتي اليوم تميت تسع طعش يوم و البيت مليان رجال و استحي اطلع و انا نفساء ... الصراحه اني مليت و حتى ساري تعب من كثر ما ألعبه !! يــــــــــا عمري هو من كثر ما أمل أشغل نفسي بتلعيبه .. سمعت طرقات خفيفه على الباب ما يوازيه الا نعومة نوره مرة نايف ,, انفتح الباب و ما خاب ظني ,, شفته داخله و شالت البرقع و الابتسامه شاقه وجهه ,, بادلته الابتسامه و ردت بسرعه : ما ودي اني ازعجتس بس ودي اظف غرفتس قبل يجي الرجال .. عقدت حواجبي و رديت : أي رجّال ؟؟ ابتسمت و ردت : رجّال من صوب هلتس قاعد يتقهوى مع مطلق و عمي و ابوي و ......... قاطعته بشهقتي ورديت بسرعه : أهلي ؟!! ردت بسرعه : ايه من هلتس بس عاد تراي مدري منهو لا تنشدينن .. حطيت ساري على الفراش و قمت بسرعه ,, وصلت الباب و رجعت للفراش ,, حسيت بإيدين نوره تمسكن : يا رونق اهجدي أنا ابنظف الغرفه و انتي نفساء ما يصلح تطلعين له بالمجلس غير انه يبي يجيتس الحين بس خليه يشرب فنجاله .. ما أدري وشلون تكلمت : بس أخاف يروح و ينسى يمرن .. ابتسمت نوره و هي تعدل مهاد ساري و ردت : يا بنت الحلال حتى فنجاله قده ما برد .. قمت بسرعه و عدلت الفراش ثم تلفت اناظر الغرفه ,, الحمد لله اني مرتبته ,, شفت نوره تطلع بسرعه بعد صوت نداءات من عمتي .. جلست بسرعه على طرف الفراش و عيوني على الباب ,, أنتظر اللي يدخل ,, محمد و الا عبدالرحمن و الا خالد ..... أو حتى يمكن فيصل ! كانت ضربات قلبي ترقع و جسمي انتشرت فيه النفـّـاضه .. عضيت على شفتي و عصرت الشرشف بين ايديني و أنا أشوف الباب ينفتح ,, من شفت زوله جمدت حسيت اني ودي اضربه !! أكفخه أسوي له أي شي قاهرن قاهرن ,, لكن كل هذا ما منعن اني اقوم له و ما ان وصلت له حتى ضربت بقوه على كتفه ثم ارتميت على صدره أصيييييييييح ,, كانت ايدينه تحاوطن و دموعه تشاركن . سمعت صوته يتعذر و هو يصيح : اعذرين يالغاليه و الله موب بإيدي .. ماكان ينسمع الا شهاقي و صياحي المتواصل لكن من قال اعذرين حسيت صدق انه جابه على الجرح .. أبعدت راسي و رديت و أنا اشاهق : كلــ...ــهم أأصـ..ـدق انهم ينسونن إلا أنــ..ـت ياآآآ فيــ.....صـــ...ــل .. حسيت به يسحبن مره ثانيه و يضمن بقوه و رد و هو ينوح على كتفي : قسم ما نسيناتس بس موب بإيدينا قسم .. . . . . مرت لحظات و حنا نتبادل العتب و اللوم ,, أعتب عليه و يعتذر و من يعتذر أتذكر الجرح اللي تركوه !! سنه كآآآآآآآآآآآآآآآمله لا حس و لا خبر عنهم و لا فكر احد منهم يسأل عن ّ !! و الله لو انا بسه ما نسيتون وشلون عاد بنتكم !! . كل هذا و أكثر قلته له ,, تصدقون اني ضربته و لعنته !! قسم بالله ما هنا شي الا وقلته له ,, كان الوقت يمر و هو حليم و انا مجروووحه !! سمعنا الباب ينفتح و شفت مطلق يدخل ,, من دخل بدا يهلي و يرحب بفيصل ,, حاول يدخلن بالسالفه بس لما شاف ان صمتي طال و زعلي كبر قال اللي عنده .. مطلق : شوفي يا رونق ترا فيصل ما يدري وين أنتي ,, كل اللي يعرفه انتس بالحفر .. رفعت نظري له و شفت عيونه تأكد كلام مطلق ,, ما صبرت و رديت : يقدر يسأل خالد و الا عبدالرحمن أو حتى ابوك وراك ما سألته ؟؟ رد فيصل : خالد سافر بعد زواجتس بيوم و كل ما سألناوه عن عنوانكم أو حتى رقم يوصلنا لكم رفض يعطينا اياوه .. رفعت نظري له و رديت بسرعه : ورااااه ؟ اكتفى خالد بالصمت بينما رد فيصل : تدرين وشو السبب ؟!! و تابع لما شافن منصته : يقول يوم انه عندكم شافت الويل بعد عين امي و ابوي .. و تابع بألم : يقول ذوقوا من الكأس اللي ذوقتوها اياوه .. عضيت على شفتي و أنا أفكر بخالد هالعوج ,, يبي يعاقبهم عشاني ما درى انه عاقبن معهم !! و رديت بسرعه : طيب ما تسألون عنّ . رد فيصل بصدق : و الله اننا نسأل عنتس دايم .. ضحكت و رديت : و خالد مثلا يدري وش اخباري . رد مطلق بسرعه : أنا أكلم خالد كل ما رحت للحفر و أعطيه أخبارتس .. . . بلحظات تنكشف الحقائق ,, و تطيح الأقنعه !! رديت بقهر و دموعي على وجهي : و تقولي انك ما تدري عن أهلي ! رد بسرعه يبرر : قلت اذا صار لأحد شي بقولتس و الحمد لله كلهم بخير . غمضت عيوني بقهر ,, يا ربي لااااا شي يلهد قسم بالله !! حسيت بضغطة فيصل على ايدي و سمعت همسه : كلنا نحبتس و نبيلتس الخير و الله .. فتحت عيوني و درت نظري عليهم ,, فيصل احس اني عذرته شوي بس ما زالت فيه شوي شرهه بقلبي ,, أما مطلق لااااااا قسم اللي أحسه شي كبييييييير قهر لما يخدعك شخص عشان مصلحتك على حد قوله !! انا أدرى من كل العالم بمصلحتي .. حسيت بإيد مطلق تضغط على ايدي و سمعت همسه : أنا أبطلع أصلي العصر و لي كلام ثاني بعدين .. سحبت ايدي بعصبيه و رديت : الله معك .. كان الجو متوتر من حركتي مع مطلق لكن من طلع مطلق رطب فيصل الجو كعادته !! : رجال ما يمشون الا بالعين الحمراء .. فلتت ابتسامه من اثمي غصبا عنّ ,, أخفيته بسرعه بعد ما انتبه له فيصل و رجعت للجديه : فيصل ... امممم طيب وشلون عطاك خالد العنوان هالمره ؟! ابتسم و رد : أول ما ولدتي دق علي و قالي ابقول لك مكان رونق بشرط انه ما أحد يدري .. كمل كلامه و هو مركز أكثر : قالي ابيك تروح له لأنه ولدت و ابيك تتطمن عليه قسم فرحت اني ابزورتس و فرحت بولدتس .. و تلفت ثم سأل : الااااا وينه هالمفعوص !! مسكت ايده و سألت : و ابوك يعني ما درى ؟ عقد حواجبه و رد : ابوي متأثر قوه و منقهر من خالد بس ما بيده شي ,, تدرين حتى يوم بغيت اجي قلت له اني ابروح للصيد ,, شهقت و رديت : وراه ما قلت له .. رد فيصل : عمي خالد محلفن ما أعلمه يقول انه هو بيجي بعد شهر و نص و يعلمهم ثمن تتوالى الزيارات بيننا و بينكم و تسذا . مغصن بطني يوم قال زيارات و تذكرت عادات صبره البغيضه لكن نافذة أمل انفتحت لما تذكرت وعد مطلق لي اني بشوفهم و ابتسمت . و رد فيصل و هو مبتسم : عاد لو انا داري انتس بتصفقينن كان ما جيت . رديت بسرعه و أنا اناظره بغرور : تستاهل يالشين قسم انك قاهرنننننن .. و سألت بسرعه : الا أسماء وش اخباره عقب طلعته من المستشفى يا عمري يا بناته تلقاهن فرحن به .. نزل راسه و عقد حواجبه ثم رد : رجعت للعنايه !!!!!!!!!!!! . . ركزت على عيونه لوقت و أنا أحتريه يقول امزح بس ما قال غير ان المرض مابه مزح ,, رديت بسرعه و أنا أحرك لساني ببطء و أنا موب مصدقه : وراااه ؟ رد و هو يناظرن بحزن : نكس ( رجع ) عليه المرض الشين و دخلت العنايه قبل أربعة أيام . . . . ما أدري كم مر من الوقت و حنا نتشاكى لكن لو قلنا كل دمعه بثانيه معناه اننا استهلكنا مالا نهاية من الثواني الغرقانه بدموعناآآآ !! يتبع ,,,, |
.
ساره بما اننا آخر العصر البيت هادي عكس الطالعي ,, مشعل و عمي طالعين و البنات بالمحطاب و فهاد يلعب مع العوال و حتى خالتي ام فهاد .. كنت قاعده اعجن للخبز و السكون من حولي لكن صوت أكرهه جخر اذني ... : قدتس تعجنين يالبارده .. سحبت نفس طويييييل ثم نفثته و أنا أتعوذ من الشيطان ثم رديت : هذا اللي ربي عطان .. نزلت راسي و كملت عجن و أنا أسمعه : خلصي بسرعه ثم خمي الحوش قد البنات بيجن من المحطاب و هن مقصرات و أنتي مرتاحه هنيا .. يآآآآآآآ الله هالدميه وش فيها ؟!! يعني تبين أفهم انها حريصه على البنات !! تذكرت كره صيته و شمه الدفين لها نتيجه لمعاملتها القاسيه لهم و تذكرت نفله لما أكدت لي كلام مشعل ثم ابتسمت و رديت بلا مبالاة : يعني تبين صيته و شمه يرتاحون ؟! ردت بعصبيه من حتسيي: قومي خمي الحوش ثم ارتسبي على العشاء . عضيت على شفتي و كتمت غضبي كالعاده ,, أدري اني اقدر اقوله لا و اخلص من هذا كله بس ما ودي تكبر السالفه و توصل مشعل ,, ما ودي انكد عليه و أدخله بمشاكل و وجع راس خصوصا لا شفت ظهره و نقش الزمان اللي عليه .. قمت و رفعت العجين و تركته يخمر ,, أخذت المكنسه و بديت أكنس تحت نظرات خالتي الشامته !! كنت تعبااااانه و فكري بعيييد عن الكنس ,, لكن كل شوي أسمع هواشها على شغلي !! كنت مطنشه و سافهتها و أشتغل بهدوء لكن وقفت شغل يوم سمعت صوتها : ساره و مرض جيبي القهوه لفهاد .. رفعت راسي و ناظرته و هي جالسه وأنا منقهره ,, زياده على تعب البيت أخدم ولدتس بعد ,, كان هذا الحتسي اللي ببالي لكن ما تجرأت أقوله لها بس صوت ثاني تجرأ و تكلم : سويره ما تخدم أحد سويره تنخدم .. التفت بسرعه لمشعل و ابتسمت له بامتنان ,, مشعل رجع لي جزء من كرامتي بكلمته هذي .. اقترب مشعل من فهاد اللي واقف بوسط الحوش و كمل كلامه: سويره بتروح لحجرتها و بتاصلها قهوتها هناك .. توقعت كلامه حتسي يجي و يروح لكني انهبلت يوم شفته يأمر بالقهوه لحجرتي . شفت الحقد يطغى على ملامح وجهه أم فهاد ,, حسيت انه بتحرق الدنيا كله بهواشها و لجتها المعتاده لكن ايد مشعل اللي ربتت على راس فهاد رجعتها لسنييييين ورى .. شفتها ركزت نظرها على فهاد للحظات ثم بلعت ريقها و ردت و هي تقوم من مكانها : الحين تجيكم القهوه . أول ما دخلت أم فهاد للمطبخ شفت مشعل يلثم جبهة فهاد و وقته حسيت بحب مشعل لأخوه لكن هالحب ما لازم تعرفه ام فهاد حتى ما تستغله .. : أدري اني مزيون بس عاد تراني حيي . ابتسمت بحياء على نظراتي الخارقه لمشعل و استحييت أكثر بعد كلامه !! ثم سمعنا الباب ينفتح و دخلن البنات بأكوام من الحطب ,, حطن الحطب ثم فكّن براقعهن و ردت شمة و هي تحب راس مشعل : حيا الله ابو سند .. و تقدمت صيته و كررت اللي سوته اختها الصغيّره شمه ثم سمعنا شمة تسال : أبوي مشى ؟! رد مشعل : قده ماشي . سألت صيته : وين عزمه هالمره ؟ رد مشعل : ناصين الرياض .. سألت صيته : ابوي بيقضي عمره و هو يدوج بين الديار . رديت انا : أحد يصبر عن فقد صبره ؟! ضحك مشعل و رد : اثر عشقتس لصبره كايد يالبدويه ! ضحكنا كلنا و ملت ضحكاتنا الحوش بينما عيون حاقده علينا و خايفه على ضناه كانت تراقبنا مع دريشة المطبخ . ــــــــــــــــــــــــــــــــــــــــــــــ رونق العشاء .. مهدت ساري و هزيته ,, لحظات مهيب شويه لحد ما هدأ و نام ,, حطيته بمكانه ثم مشيت بخطوات هاديه لفراشي .. أول ما جلست و غطيت رجليني بالشرشف سمعت صوته : رونق . رديت بدون نفس بعد ما شفته يحط المصحف اللي بين ايدينه و يجلس قدامي : نعم . تكلم مطلق : بعدتس زعلانه ؟! رديت بقهر : أنت وش رايك ؟! رد بعد تفكير سريع : لتس حق تزعلين لو انتس ما تدرين وشو عذري بس هالحين انتي عرفتي .. فتحت عيوني على وسعهن و رديت : عذرك ؟! تسمي انك خفت لا أشتاق لأهلي اذا سمعت اخبارهم عذر ,, غمضت عيوني ثم فتحتهن و كملت : مطلق بالله هذا عذر . رد مطلق : طيب تدرين كم مره كلمت اخوتس خالد بهالسنه . رديت بسرعه : لا و ما يهمن أعرف ! انسدحت و تغطيت بالشرشف و أنا منهيه الحديث لكن صوت تطرق لأذني : خمس مرات كلمته بهالسنه لأني ما اروح اجيب المونه من الحفر الا كل شهر ونص أو شهرين .. شي بنفسي خلان أتجاهل أعذاره التافهه اللي صغرت بعيني كل أهلي حتى اني ظنيت بنهاية الأمر أنهم نسوا انه لهم بنت اسمه رونق !! ـــــــــــــــــــــــــــــــــــــــــــــــــــ مطلق نفخت السراج و انسدحت بمكاني و أنا منقهر من رونق ليش ما تفهمن؟!! حسيت برونق صاحيه لكني سويت نفسي ما انتبهت ,, مر الوقت لحد ما حسيت ابها تتحرك ,, سكنت و مثلت اني نايم و أنا أشوفها تقرب لوجهي عشان تتأكد اني نايم !! شفتها أخذت شي من الطاوله ثم فتحت الباب بهدوء و طلعت ,, شي من الخوف دب بعروقي ,, قمت بسرعه و وقفت ورى الباب شفتها تلبس جلالها بالحوش و هي معطيه الباب وراها ,, ثم تسللت بخطوات سريعه للمجلس ,, كنت واقف بمكاني أراقبها و أنا مصدووووم ,, وش عندها ؟ شفتها افتحت باب المجلس ثم دخلت راسها بخفه ,, ثواني و طلعت راسها ثم رجعت بخطواتها للحجره ,, رجعت بسرعه لمكاني و انتظرتها تدخل و أنا أفكر باللي صار ,, معقوله رونق تفكر بهالشكل ,, يا ربي كل هذا خوف ان فيصل يروح ؟!! تنهدت و أنا أشوفها تدخل لكنها ما انتبهت لي ,, قربت رونق بعد ما فسخت الجلال و انسدحت بجنبي ,, شفت عيونها معلقه بالسقف ,, حسيتها متضايق و خايفه يروح فيصل .. مديت ايدي لها و مجرد ما تلامست ايدي بكتفها حسيت ابها التفتت ثم ردت ايدي لمكانها ,, كنت مصعوق من ردة فعلها لكنها متضاااايقه و شرهه علي و ما يشره القلب الا على الغالي !! ركزت عيوني لفوق و رديت : وش اللي يرضيتس يا بنت عبدالله ؟! انتظرته ثواني و ردت : روحتي لأهلي !! . . . وقف قلبي مع كلامه و دب الخوف بكل جسمي !! رونق تبي تروح لأهله يعني تبي تتركن معقوله ؟! رديت بسرعه بصوت أعلى : اهدي يا بنت الأجواد ما صار شي يخليتس تتركين بيتس . سمعت توضيحه لكلمته اللي رجع النبض لقلبي : قصدي زوارتي لأهلي ! بلعت ريقي و رديت : بإذن الله بتروحين لهم زايره . . . انتظرت اسمع منها كلمة تأييد أو حتى عدم تصديق لكني ماسمعت منها أي شي ,, باين ان زعلتها هالمره كبييييره لكن ماهي بعيده على ولد عايض ,, برضيتس ان شاء الله لو على موتي . مرت لحظااااات لحد ما سمعت تنفسها المنتظم ,, ساعتها بس هنى لي النوم و ارتخى جفني !! ـــــــــــــــــــــــــــــــــــــــــــــــ رونق .. الصبح ... بما اني اليوم تميت 20 يوم قمت و دخلت المطبخ أبعاون نوره لكنه عيت علي و اكتفيت بمراقبته ,, حطينا الفطور للرجال ثم أفطرنا حنا ,, و بعد الفطور راحت نوره تكمل شغله بالمطبخ بينما أنا مسكت الدله أقهوي خالتي ام مطلق .. كانت تسولف علي و تعطين من النصايح ما الله به عليم ,, كنت أشوف الحنيّـه بعيونه و هي تهدهد ساري !! دار الكلام ببالي ,, أقول و الا لاااا ؟!! عضيت على شفتي و تردد صوته بين اذاني : اللي تريدك ليتها عشر عيال في بيتها خارجين داخلين سارين كبيدها واللي ماتريدك ليتها عشر بنات في بيتها عايرات بايرات فاحسات كبيدها ابتسمت على اخر كلماته و نطقت بكلامي من دون لا أستوعب الموقف استيعاااب كامل : خاله ودي اقولتس شي .. نزلت ساري و حطته لى رجلينه ثم رفعت راسه و بدت تحنده و هي مركزه علي ثم قالت : احتسي يا بنيتي . كلمة يا بنيتي خلتن أتشجع و أقول : ودي اروح أشوف اهلي .. كنت مركزه بملامحه اللي تتغير مع كل حرف أقوله لحد ما اكتملت جملتي و اكتملت معه معالم الدهشه على وجهه .. شفته ترفع راسه بترد لكن قبل تنطق بحروفه رد صوت ثاني : روحي و لا تعودين .. التفتنا كلنا للصوت و شفنا عمي ابو مطلق مقبل علينا و هو مسفط كمومه و الماء يتقاطر من وجهه و يدينه ,, استشفيت انه كان يتوضى و سمعنا !! عضيت على شفتي و أنا اسمع خالتي ترد : اذكر الله يا ابو مطلق . رد عمي و وجهه متجهم : ألف من ذكره .. رديت بسرعه أدافع عن نفسي : عم و الله اني ما تكلمت و قلت ابروح الا يوم شفت اختي بالمستشفى . رد عمي و صوته أعلى : منتب رادة عنها الشر لا صرتي عندها ,, خلتس عند رجلتس و وليدتس . رديت بسرعه و أنا آقف : عمي كله يومين أشوفه و اريح قلبي و ارجع .. قاطعتن خالتي : يا شييييخ يا كبير صبره ,, ترى البنيه تعودت على سلومنا و راضية ابها بس صحة خويتها مقلقتن نومها ,, أبك ما تشوفها مزفي ( مقفي ) لونها من تالي .. رد عمي بسرعه : ويلتس يا مره تبين الناس ياكلوني بالحتسي لا دروا ابها . ردت مرة عمي بسرعه : يا رجال تراها حافظتن كلام الله بصدرها ,, و أنت تدري ان ما هنا أحد مثلها بحريم صبره !! نزل راسه للحظات لما أحرجته و ذكرته بحفظي للقرآن ,, و كأنه تذكره انه لازم يوافق عشان هالنقطه .. رفع راسه و هو متجه للباب طالع و رد : تبي تسيـّـرين علاهم روحي بس ولدنا ماله طلعه من بويتنا .. و سمعنا بعده صفقة الباب ,, التفت على خالتي و رديت : خاله أروح مع فيصل و أخليه يرجعن .. نزلت راسه و هدهدت ساري و هي ترد : ما يقصد مطلق يا بنيتي مطلق رجل و شوره بيده .. فتحت عيوني و مشيت بخطوات بطيئه متجهه لخالتي و رديت و قلبي بدأ يصْـفق من شكي : أجل من يقصد ؟!! . . كان صوته الحزين و هي تنطق كلامه موووجع و الموجع أكثر معنى كلماته لما استوعبتهن : هو يقصد ساري يا يمه !! . ــــــــــــــــــــــــــــــــــــــــــــــــــ مطلق الظهر .. مرت عيني عليه من جيت و أنا اشوفه تشتغل معهم ,, أدري انه مدخله روحه غصب رغم رفضهم لإتعابها لكن وش يسوون و هي اللي تدور التعب !! أدري وش بها و لا أحد يدري باللي بها كثري ,, أدري ان خاطرها مليااااان و تدور على اللي ينسيها همها ,, بغباء فكرت هي انها اذا اشغلت نفسها بتنسى أهلها ,, حسيت بعمق جرحها ,, و حسيت بكبر حزنها و حيرتها بين ولدها أو أختها !! خيرها الشايب الله يلين قلبه عليها و علينا بين أصعب خيارين !! أدري انها احتارت بالبدايه و أدري انها اختارته بالنهايه و اختارت معه البعد الموجع عن أهلها الى ماشاء الله .. . . و ما زلت أراقب و القهر يزيد بصدري ,, وش ذنبها تنقهر يا رب وش ذنبها !! شفت المطبخ فضى و رحت لها بخطوات سريعه ,, ادري انها اركنت نفسها بأحد زواياه أو حتى بين قدوره .. دخلت المطبخ و شفتها واقفه بعد ما غطت القدر ,, تقدمت و مسكت ايدها ,, التفتت و مشّت دمعه على طرف عينها .. آآآآآآآآهـ يا شينها لا طاحت الدمعه بعين غاليك ودك لو انها منك و لا منه !! حوطت ايدي على كتوفه و قربتها لي ,, كانت مستسلمه لأنها أشبه بالجثه ,, تتحرك و هي باااارده .. قربت اثمي و همست بإذنها : نذر علي ان تشوفين اهلتس قريب يا بنت عبدالله .. حسيتها اهتزت و رفعت راسها لي بعدم تصديق لكني بادرتها و قلت : البدوي ما يكسر كلمته كيف عاد لاصار نذر .. حسيت بها تبعد يوم سمعنا صوت نايف اخوي من الحوش : انتسبن الغداء يا حريم الضيف وراه طريق . تركتها و طلعت عن المطبخ على دخلة نوره .. اتجهت لضيفي و ما يدور ببالي الا وعدي لرونق ,, أنا نذرت و بوفي بنذري سواء رضى ابوي او حتى زعل !! ــــــــــــــــــــــــــــــــــــــــــــــــــــ فيصل الظهر نشفت ايديني بطرف شماغي بعد ما غسلت ,, بينما عيوني مسحت الحوش ادور على أثره ,, غريبه هالبنت اليوم ما شفته الا الصبح !! سمعت صوت نايف : اقلط يا ابو محمد .. ابتسمت و تقدمت و حبيت راس الشايب و هو يغسل ثم رديت : اعذروني ابترخص وراي سفر .. رد علي الشايب : تقهو ثم تيسر . رديت بسرعه : زاد فضلك يا عمي انا من جيتكم و انتم قايمين بواجبي و الله ما شفت منكم القصور غير ان سفري بعيد و ابوي يحتاجن . رد الشايب : على هواك يالضيف .. و تبادلنا السلام يعني توادعنا ثم همست بإذن مطلق قبل لا أطلع : وينه أبسلم عليه ؟ رد مطلق : قلت لها الحين تلقاها جايه .. ما كملنا كلمتنا الا و سمعنا صوته : فيصل بتمشي ؟ كانت باينه الحشرجه بصوته و وجهه المحمر مبين تأثره بروحتي ,, ما كان بيدي شي و لا بيده الا اني فتحت ايديني له عشان تنثر اللي كابتته .. حسيت بدموعه و سمعت صياحه ,, كانت متعلقة بي بقوه لدرجة ثوبي خطر يتقطع بين اصابعه ,, ضميته لي أكثر و همست بإذنه : بتجين قريب ان شاء الله مطلق وعدن ,, مطلق ما يثني كلمته .. شفته ارفعت راسه ثم ناظرتن بعيون دامعه تبي تقول شي لكن صوت مطلق قاطعه : أنت وش تساسر مريتي .. ضحكت و رديت : هذا بين الحضر بس لا صرت حضري تعال اقولك .. شفته ضحك ثم توجه للباب المفتوح و طلع .. الباب المفتوح هذا من أحسن طبايع البدو ,, كلن فاتحن بابه عشان ما يرد الضيف شي و هذا دليل على كرمهم .. بوسط تفكيري هذا سمعت صوته مره ثانيه : فيصل طمنن على اسماء . رديت عليه و أنا أحرره من بين ايديني : ان شاء الله مطلق يبي يكلمن و بعدين تراتس منتب مبطيه و تجيننا .. ردت بسرعه بصوت يائس : ما ظنيته !! رديت بسرعه و أنا اضغط على ايده : اليوم الأحد أشوفتس يوم الخميس ان شاء الله !! علقت نظره علي للحظات ثم أشرت براسه علامة الموافقه .. لكنه كأنه عادت فهم الكلمه و قالت : وش تقوووول ؟ رديت بسرعه : اللي سمعتي بس هاه لا يدري مطلق اني قلت لتس . سألتن و هي عاقده حواجبه : وشلون و الشايب ؟ رديت بسرعه : يبي يساحره مطلق .. شفت الخيبه رجعت كست ملامحه بعد ما غطاه للحظه شعور التفاؤل .. كنت أبطلع يوم سمعت صوت سيارتي اللي شغله مطلق لكني ما حبيت اتركه و دموعه بعيونه و قلت قبل لا اطلع : ما عليتس من الشايب هو وحده من ثنتين يا يلين يا اجي و العنه .. شفته فتحت عيونه على وسعهن ثم حطت ايده على اثمه و ضحكت ,, ساعته بس طلعت و أنا محتفظ بهالصوره ببالي !! ـــــــــــــــــــــــــــــــــــــــــــــــ وضحى العصر بعد يومين .. مرن يومين و رونق حالته غريبه ,, دايم تهوجس و باين ان باله موب معه ,, أدري وراه و أعذره ,, بنات صبره اللي ينولدن على هالعادات ما يتحملنهن كيف بوحدة جتنا و هي ما تعرف بعاداتنا شي !! مدري وراه وسّـع صدري اللي صار اليوم ,, هوشتهم و زعاقهم ,, حسّــــسن بحب مطلق لرونق ,, مطلق اللي ما يرد الكلمه للشايب ولو هي على قص رقبته وشلون قدر يرفع صوته اليوم بمجلسه .. شي واحد يفسر اللي صار : ان حب رونق بقلب مطلق كبييير أكبر من كل شي حتى انه اعماوه عن كل شي .. و استنتاج واحد أتوقع يصير و هو ان مطلق يلبي رغبة رونق و حتى لو عارضوه كل أهل صبره مهيب بس ابوي .. شفتها قاعده تمهد ولدها اللي أخيرا نام بعد ما اتعبها و الهاها عن التنصت معي على الهوشه ,, شفت الحزن بوجهها أو بالأحرى نقدر نسميه يأس ,, شي بنفسي خلان أقولها : رونق . كانت شارده و لاهب يمي .. رديت مره ثانيه و بصوت أعلى : رونق .. رفعت راسها بسرعه و ردت : هاه . قربت لها بما اننا بالحوش و الصوت ياصل مع الهوى و قلت لها بصوت واطي : تدرين ان مطلق اليوم حتسى على ابوي بروحة أهلتس . فتحت عيونها على وسعهن و هي ميب مصدقه ,, أكيد يأست بعد ما انتظرت مطلق يسوي أي شي بهاليومين و ما شافت شي .. كملت بسرعه : رونق الشايب الى الحين معيي بس واضح ان مطلق ملزم و مطلق صقر و الصقر لازم يحوش اللي يبيه . شفتها نزلت راسها ثم ردت : وش الفايده دام ابوتس عـيّـا ؟ رديت بعد ما تنهدت : أقولتس مطلق ماعمره قال للشايب غير سم و تامر ,, بس هالمره أشوفه جازم و يبي الروحه غير انه يوفي بوعده لو على قص رقبته .. ابتسمت بطرف اثمه مدري هي تسكتن أو صدق فرحت !! ـــــــــــــــــــــــــــــــــــــــــــــ رونق المغرب ,, بعد يومين . سمعنا صوت نايف ينادي : يا ولد ياولد ,, طريق يا بنات .. دخلنا المطبخ بسرعه لأنهم أكيد جايبين معهم ضيف .. سمعت صوت خالتي تشهق و تنادي : الشر ابعده عنا يا ربنا . فضولي او يمكن الخوف اللي اشتركنا به انا و نوره خلانا نطل مع دريشة المطبخ .. شفت ملفي طلع و شفت نايف و مطلق قاعدين و عندهم خالتي ,, صوت خالتي و هي تتويل و تسأل "علامه و وش به " خلان أركز أكثر عليهم .. شفت نايف قام و قرب لكتف امه و قال له : اذكري الله يمه تراه سلم منها .. نسـّـفت خالتي ايدينه و هي تقول : أي خير و رجله غامتينها بهاللفايف .. و على أخر كلامه استقرت ايده على رجل مطلق !! أمعنت النظر أبي أتأكد ,, هو مطلق و الا لا ,, يا ربي لاااا ,, حسيت بإيد نوره تربت على ايدي : هو بخير يا رونق لا تستهمين . طلعت بسرعه بعد ما عدلت برقعي و أعيوني تدور مطلق و تبعتن نوره .. قربت للفرشه ثم تقدمت و رديت : عسى ما شر يا ابو ساري . رد مطلق و التعب باين بعيونه : ما شر يا بنت عمي بس طحت من ظهر البعير .. بلعت ريقي و أنا أشوف الجبس اللي على رجله وأسمعه ثم همست بصدق : بسم الله على قلبك !! . . . ساعه مرت و حنا بالحوش و أنا مشغوله بحالة مطلق و أحس بتعبه من ملامحه .. بعد هالوقت شاله نايف و دخله للغرفه ,, كنت ألف بالغرف و أجيب له هذا غطا و هذي مخده ,, كنت أبي أي شي يريحه و مافيه ببالي الا رجله المكسوره .. غطيته بعد ما تعشى وقمت ابودي العشاء برى ,, حسيت ابه يمسك ايدي و التفت له و رديت : لبيه ! رد بعد ما تنهد : الجبس ما ينفك قبل أربعة أشهر و حركتي صعبه بهالوقت .. " راحت السكره و جت الفكره " كلمه دايما يقولونه لكن عمري ما حسيت به مثل هالوقت ,, يعني أبقعد اربعة أشهر عندهم ,, يآآآآآ الله !! كنت متخيله انه يمكن تصير معجزه و اروح الخميس لكن الحين حتى المعجزه صارت مستحيله !! حسيت بالقهر و الرحمه شعورين عمرهم ما اختلطوا و كانوا باتجاه شخص واحد لكني بشعوري هذا جمعتهم .. سمعت صوته و كلماته اللي رجحت الرحمه عندي : جهزي نفست لأني لو أفكه اليوم بنمشي من باتسر !! يعني متى ما فكيته أبمشي .. فتحت اثمي و دموعي طاحت ,, مطلق ما يقهرن ,, ما يقهرن الا ديرتهم "صبره" هي اللي تقهرن و تقهره معي !! نهاية الجزء الرابع و العشرين .. |
القصة منتهى الروعة وانتِ مبدعة حتى الصميم قلمك مبدع لاقصى الحدود ويتحدث عن صمت قلب مفعم بالوجع وعن دمعه خانت صاحبها وولت هاربت من درع العين ... كلماتكِ تدخل الروح التي مستها جروح الزمن بقسوة لتريها ان هناك من له وجع كوجع رونق شكرا لكِ لان الكلماتكِ لامست روحي وشغفت قلبي |
هلا وغلا منوره والله
مدرى ليش حسيت ان مطلق هو الى عور نفسه وطيح نفسه من البعير او يمكن مابه شى وما طاح والا شى بس هو جبرها عشان ما قدر على زعل ابوه وما يبى يزعل رونق عشان الروحه وسوى بنفسه كذا لين تهدى الامور ويحاول يقنع ابوه وبعدين وش هالعاده الشينه وين صله الرحم ومهما كان يعنى الوحده ما تقدر تشوف اهلها بعد ما تتزوج مشعل عجبنى انه ماسك على ام فهاد شى عشان تتحمل خواته وزوجته رائعه نبض وبنتظارك اتمنى نشوفك قريبا |
نبوووضه.. تسلمين فديتج عالبارت
رونق و مطلق شي طيب انهم يحاولون يرضون بعض.. ويسوون كل اللي يرومون عليه لاسعاد بعض<<فيس الاوكيك.. بس لو ابوه المخرف الله يهديه<< فيس معصب جان الدنيا بخير.. ما علينا الحمد لله ع السلامة.. ما تجوووف شر يا مطلق<< فيس نيرس.. رونق .. رقت عينج بجوفة ولد اخوج.. عقبال هلج الباجيين<< فيس مبتسم مشعل ووضحى زين اللي خذا حقج.. ولا جان الحينه حرمة ابوه ماسحه فيج الارض<< فيس يهز راسه نترياج حبيبتي http://www.liillas.com/up3//uploads/...29afe633ce.gif |
الجزء الخامس و العشرون : ( فرحة دامية ) حينما يختلط الحزن بالفرح يشكلان مزيجا خانقا به من المرارة ما يلجم الأفواه و يدمي العيون !! رونق راقبته و هو يمشي جاي للغرفه ,, بالرغم من انه ما فك الجبس الا اليوم الا انه أصر نمشي للقصيم ,, يمكن أنانيتي هالمره تغلبت على رحمتي و فضلت السكوت و عدم اقتراح تأجيل السفره لبكرى ,, موب بيدي بس و ربي ولهت على أهلي و نسيت أو تناسيت كل شي حتى راحته .. دخل و هو يتسند على عكازه ,, ابتسم لي و بادلته الابتسامه بضحكه .. رد مطلق : أبك أنتي قضيتي يا بنت ؟؟ رديت و أنا أوقف : ايه كل شي عطيتك اياوه !! رد مطلق : أجل أبروح أسلم على الشايب دامتس تلبسين بشـــتس .. رديت بسرعه : سم الحين ألبسه .. تناولت عباتي و لبسته ثم أخذت طرحتي و لفيته و ربطت نقابي ,, يآآآه يا قدمك يا نقابي من يوم جينا لصبره و أنا ألبس برقع .. فتشت وجهي بعد ما رفعت عباتي على راسي ثم درت نظري أدور غناتي ,, اتجهت له و شلته بين ايديني ,, ضميته و شميت ريحته حتى حسيت انه وصلت لمخي !! حسيت بإيدينه الصغيره تتعلق بي ,, ثواني و سمعت صياحه ,, يا عمري هو أول مره أضمه بهالقوه شكلي كتمته .. أبعدته و أنا أشوف عيونه الدامعه و شايفه و هو مبوز ,, قربت افمي له و حبيته مع خدوده و جبهته و افمه و هو ما زال يصيح بين ايديني .. : لا تشيلين هم يا رونق ساري بعيوني . رفعت راسي لنوره و رديت و أنا أهز ساري : أدري انتس منتب مقصره بس ......... و احترت وشلون أعبر عن اللي بداخلي لكني أوجزته بكلمات : بسسس أبفقده .. حسيت بإيده نضغط على كتفي ثم سمعته ترد : منتب مطوله بس بتشوفين أهلتس و ترجعين .. مديت وليدي لنوره بعد ما شتت نظري عنه .. تغطيت و رديت : مع السلامه .. طلعت من الغرفه بسرعه و أنا أتلافى اني التفت على جنيني .. كأن نوره حسّت بي و احترمت رغبتي لأنه ما طلعت من غرفتي .. شفت عمتي و سلمت عليه و ودعته و دورت عمي لكنهم قالوا انه راح للنياق .. طلعت و ركبت و أنا أشوف مطلق يحوس بالأوراق اللي معه .. مرت ثواني و أنا ودي أقوله يمشي لكني صبرت ,, جيت أبسأله وش فيه لكني حسيت ان الكلمه نشبت بحلقي ,, أدري اني لو أحتسي كان صحت .. بلعت ريقي عدة مرات ثم تكلمت بغصه : وراك واقف .. رد مطلق و هو يحط الأوراق بالدرج اللي قدامي : رددي معي أستودعتك الله اللي ما تضيع ودايعه .. بلعت ريقي و رديت وراه و أنا أشوف السياره تتحرك .. ـــــــــــــــــــــــــــــــــــــــــــــــــ مطلق تعدينا الزلفي و رونق الى الحين حالتها ماهي عاجبتن ,, باين ان فقدها لساري أكل قليبها .. أدري انه ولدها و انه منكسر قلبها عليه بس تتجمل بالصبر ,, انا بعد انغثيت عليه و حتى الوداع ما ودعته خفت أضعف و أهون ,, أنا ما ابيها تمثل انها مرتاحه لكن أبيها تصير صابره مثلي على الأقل و بعدين كلها اسبوع و حنا جايين اذا مهيب اقل !! مديت ايدي و مسكت يدها ,, ضغطت عليها ثم رديت : ساري عند امي و مرت نايف يعني ما عليه شر بإذن الله .. ردت رونق بعد ما تنهدت : أدري انه بخير بس قوووه فاقدته .. سكت شوي بعد ما سمعت تشديده على كلمة قووه و كأنه تبي توصل لي وش كثر هالفقده كبيره و ما تنوصف .. لكن سكوتي ما طوّل لأني تذكرت شي يمكن يفرحه و رديت : ما علمتس ؟؟ ردت رونق ببرود : وشو ؟ رديت عليها : خالد تخرج .. ردت بسرعه و حماس : بالله ؟! ضحكت ثم رديت : اتسذب يعني ؟!! شفته ضحكت و حطت ايده على اثمه ثم ردت : لا و الله موب قصدي بس من الفرحه له هالشين . ابتسمت و رديت : ليته يخلص اوراقه و يرجع دامنا بالقصيم .. سندت ظهره و ردت : يااااا ليييييييييييييت !! ــــــــــــــــــــــــــــــــــــــــــــــــــ نايف حيبت خشمه اللي احمر من عظتي و رديت و أنا أضحك : أخيرا استفردت بك يا ولد مطلق .. ضحكت نوره و ردت و هي تحاول تاخذه من : حرام عليك هاته .. ضحكت و ضميته لي و رديت : يا طعمه طعمآآآآه ولد مطلق .. شفته يصيح و خرق اذني صوته ,, حاولت أسكته لكن ايد نوره كانت أسرع منّ ,, أخذته و هزته لحد ما سكت .. كنت أراقبها و فكري بعييييييد ,, فكري عند ولدي اللي أتخيله كل ليله و كل دقيقه ,, شفت حنان نوره عليه و تمنيت الله يرزقنا ببزر يملأ علينا البيت .. سألت نوره و أنا اشوفها تمسح على شعر ساري و هو بحضنها : اثرتس تحبين ولد مطلق أكثر منّ .. رفعت راسها و ابتسمت ثم تحولت ابتسامتها لضحكه و ردت : ابك تغار يا رجال ؟!! سويت نفسي زعل و رديت : ايه أغار موب يقولون اللي ما يغار ابوه حمار !! ضحكت نوره على كلمتي ثم ردت : كل الناس غار منهم الا ساري !! ابتسمت و رديت بكذب : عاد وش اللي فيه زين عشان تحبينه ؟! لثمت نوره جبهته و ردت : جنه يا ناس جنـّه .. ابتسمت لكن هالمره شي من الحزن لاح على وجهي ,, تمنيت ولدها اللي بين ايدينها و تسمّعه هالحتسي الزين .. سمعت صوتها اللي نبهني من هوجاسي : عد ثمانية أشهر و يجي ولد عمه .. . . رفعت راسي و ناظرتها أطلب منها تفسير للي قالته لكن الحياء اللي زينها وضح لي معنى كلامها .. ضحكت و نقزت بسرعه لعندها ,, تكلمت بسرعه : أنتي حبلى يا بنت ؟! ضحكت و ردت و هي منزله راسها: أيـ....ـــه . ابتسمت و رديت و الدنيا كلها ترقص قدامي : يا رب لك الحمد يااارب .. أخذت ساري بين ايديني و شلته ثم وقفت و زقـّـــفته .. اختلطت ضحكاتي مع ضحكات ساري المسموعه و مع تأنيب نوره لي !! باختصاااار كانت ضحكتي غيييير و كأني أول مره أضحك أو يمكن أول مره أعرف وش معنى الفرح .. ــــــــــــــــــــــــــــــــــــــــــــــــــــــ رونق من اتصالنا على فيصل اللي ما يرد و قلبي ناغزن ,, مدري وش بي ؟! فكره تجيبن و فكره تودين .. كنت أستغفر الله بهمس و أتعوذ من الشيطان .. زادت ضربات قلبي مع نزولي من السياره ,, و اضطرب تفكيري مع أول قدم داست الشارع .. مشينا متجهين للاستعلامات و عيوني تدور بين وجيه الناس على وجه مألوف بالنسبه لي . شفت مطلق تقدم لموظف الاستعلامات و أشر لي بيده يعني ارجعي ,, رجعت على ورى و أنا أشوف الموظف رجع يحوس بالكمبيوتر قدامه .. ما كان بي صبر عشان أنتظر ,, و مسكت أول ممرضه مرت من عندي سألته بسرعه : لو سمحتي أأ ... أسماء اللي بالعنايه وين غرفته ؟؟ ردت الممرضه الهنديه : أسماء مدام مستر سولتااان . رديت بسرعه : ايه ايه هي .. سمعت الدكتور يناديه من بعيد و التفتت علي و ردت بسرعه و هي ماشيه : مستر سولتان فيه روه بيت أشان موت !! و اختفت بسرعة البرق من قدام عيوني ,, و معه اختفت الحياة قدامي ................. ـــــــــــــــــــــــــــــــــــــــــــــــــ مطلق طحت على الكرسي بتعب جسدي و ذهني ,, مانيب مصدق ان رونق حامل او بالأحرى كانت حامل و صقطت .. غمضت عيوني و بلعت ريقي و سندت ظهري على الجدار و مسلسل طيحته يمر قدامي من رد الهنديه عليها لين طيحتها ثم دخولها لغرفة العمليات .. ياآآآ الله و ربي كرهت الأخضر منهم ,, الأخضر بصبره نحبه ,, الصغير و الكبير يحبه لأنه الخير و العشب بس هنيا كريييه ما يلبسه الا اللي يجزرون بهالعالم !! حسيت بحركة قدامي فتحت عيوني و شفت السرير يمر من قدامي ,, لحقته أبي أتطمن بعد ما تأكدت ان اللي بالسرير رونق ,, شفت الدكتوره تمشي وراي وقفت و التفت عليها و سألتها : يا دكتوره مرتي وشلونها ؟ ردت الدكتوره : أنت جوز رونق ؟ رديت : أيه انا . ردت و هي عاقده حواجبها : مجرد تنظيف مافيه شي خطير .. ابتسمت و رديت : الحمد لله جزاتس الله خير يا اختي .. توجهت بخطواتي للغرفه و قطع علي صوتي جوالي ,, رديت و أنا أسمع صوت فيصل : هلا أبو ساري .. رديت بصوت تعبان و هادي : حياك ابو محمد وينك ما ترد ؟! رد فيصل : ناسي جوالي بغرفتي . رديت : اييييه انا بالقصيم . سمعت شهقته و ابعدت الجوال عن أذني ,, ثواني و رجعته و أنا أسمع صوته : وينك يا مطلق .. رديت بهدوء : أسمعك بس خرقت اذني . رد فيصل : وينكم طيب ؟ رديت بعد ما تنهدت : جينا ندور أسماء بالمستشفى .. قاطعن فيصل : أسماء ببيته .. رديت : ايه بس وحده من الممرضات خربطت على رونق عاد هي داخت و هذاي عنده .. سمعت لهجة الخوف بصوت فيصل اللي رد بصوت المهتم : عسى ما شر وش به ؟؟ رديت بعد ما تنهدت : حامل و صقطت .. سمعته يحوقل ثم رد : بمستشفى الولاده و الأطفال هي ؟؟ رديت بسرعه : لا لا بالتخصصي لأنه طاحت عندهم . رد بسرعه : خلاص هذاي اجي ثم أدق عليك .. رديت : طيب احتريك . سكرت منه و دخلت بخطوات مثقله على رونق ... ـــــــــــــــــــــــــــــــــــــــــــــــــ فيصل ناظرت ساعتي اللي تأشر على ثلاث و خمس ,, و رجعت حطيت راسي على طرف السرير ,, مرت ثواني و حسيت بالصداع ,, رفعت راسي و شفت مطلق يدخل و معه كاس كوفي و بيده الثانيه عكازته .. أخذت الكاس بعد ما مده لي و رشفت منه رشفه ثم تكلمت : ابو ساري نم لك شوي شكلك تعبان . رد مطلق و هو للحين واقف : و الله اني هلكان بس أخاف تقوم رونق . رديت عليه : أنا عنده و مانيب متحرك . تنهد مطلق بتعب و رد : أجل أنا أبروح أنام بسيارتي و اذا قامت دق علي .. مديت له مفتاح السياره و رديت : نم بسيارتي أوسع و ادق عليك ان شاء الله .. أخذ المفتاح من ايدي و مشى طالع من الغرفه و هو يعرج ,, باين شكله هلكان من التعب,, فجزمت بقرارة نفسي اني ما أصحيه و خصوصا و هو قايم من الفجر .. . . . مر الوقت بطيء لحد ما نمت . . . حسيت بتنهيدات رونق ,, رفعت راسي و شفت عيونه مفتحه .. مسكت ايده و وقفت و أنا أقول : الحمد لله على السلامه أم ساري .. دارت عيونه على الغرفه بعدين ردت : الله يـ....ـسلمـ..ـك . و كأنه تذكرت شي و ردت و هي مضوقه عيونه : أسما.... قاطعته بسرعه : أسماء بخير و الحين هي عند رجله و بناته . عقدت حواجبه و ردت بتعب : الممرضه تقول ... و سكتت ,, فهمت ان الكلمه اللي عنده صعبه تنقال فرديت عليه أبرر له كلام الممرضه : رونق ام سلطان هي اللي توفت . شفته عضت على شفايفه ثم ردت : الله يرحمه و يغفر له .. ثم رجعت تسأل : وش اللي صار لي ؟ ابتسمت و رديت : ما صار الا الخير بس ..... و كملت لما شفته مركزه على كلامي : بس كنتي حامل و صقطتي . غمضت عيونه و ردت : ياااااا رب انك تعوضني خيييير . ـــــــــــــــــــــــــــــــــــــــــــــــــــــ مطلق يوم قمت شفت الساعه لقيته تسع و نص ,, غريبه فيصل ما دق ,, أخذت جوالي و فتحت القفل أتأكد لكنه فعلا ما دق . ضغطت على زر الاتصار بعد ما اخترت اسمه و ثواني و وصلت مسامعي الــ هلا من افمه .. رديت بسرعه و أنا متلهف للجواب : بشر عن ام ساري ؟ وصلن صوته : ايه هذاه صاحيه عندي .. شي من الغضب دب بجسمي و رديت : وراك ما قومتن ؟!! رد فيصل : بلاك ما شفت نفسك البارح و الله لو يشوفك اليهودي كان رحمك . ابتسمت و رديت : خل عنك بس و قل لي وش أخبار رونق ؟ رد بصوت عادي : ايه بخير الحين .... ثم خفض صوته و كمّل : هذاي طلعت من الغرفه مطلق .. رديت : لبيه . كمل فيصل : تعال شفه تراه بالحيل ضايق صدره على اللي فقدته .. عضيت على شفايفي و رديت : جايك الحين .. سكرت من فيصل ثم نزلت من السياره و أنا أتمغط ,, لبست ثوبي المنشور بالمرتبه ورى ثم لبست شماغي و أخذت طريقي لداخل المستشفى . . . . فتحت باب الغرفه و شفتها معلقه نظرها على الغماء ,, تقدمت بخطوات هاديه ووقفت عنده ,, انتبهت لوجودي و ابتسمت له ,, بادلتن الابتسامه بابتسامه ذابله ,, قربت و لثمت وجبهتها ثم تناولت ايدها بين ايديني و لثمتها .. سمعت تنهيدتها و كأنها تبي توصل لي وش كثر هالهم عمّـــر بصدرها ,, احتفظت بيدها بين ايديني و رديت : ماراح معوّض يا بنيّـه . شفتها بللت شفايفها بطرف لسانها ثم ردت : الحمد لله . رديت بابتسامه : خلي ابو مطلق يتدلع علينا توه صغير . شفت ابتسامة خبث على وجهها و سمعتها ترد : لااااع ما ابيه يسمي ولده مطلق . عضيت على شفتي و سويت نفسي منقهر : وش فيه مطلق ان شاء الله ؟!! ابتسمت و ردت : أحسن بدوي بهالدنيا . ابتسمت و غيرت مجرى الحديث : هاه وشلون النفسيه و اخوانتس بيزورونتس اليوم . حسيت بالفرحه بانت بعيونه و ردت : وه بس ودي اسحب الساعات سحب عشان يجون بسرررعه .. ــــــــــــــــــــــــــــــــــــــــــــــــــ رونق وه بس يا ناس قسم بالله حتسي مطلق ريحن شوي و طلعن من ضيقة الصدر اللي كاتمتن ,, سألن عن نفسيتي و انا أبشوف اخواني و عجزت أعبر غير بكلماااات : وه بس ودي اسحب الساعات سحب عشان يجون بسرررعه .. : ما يحتاج تسحبينهن هذانا جينا .. التفتنا على الصوت و شفنا أخوي محمد عند الباب .. دخل محمد و اتجه لي ,, ضمّـن و أجهش ببكااااء موجع ,, كنت أحس باهتزاز جسمه , و أسمع صوته المتقطع و هو يتكلم : لا تلومينن يا أميمتي بس الجرح كبييييييير .. اختلطت دموعي بدموعه و رديت بصوت متقطع : و الله لا لااااا ... قاطعن و رد : لا تقولين شي خلاص قضينا .. رديت و قلبي ينزف قهر على هالهم اللي يدورن بكل مكان : قضينا بس ما نسيناااا .. رد محمد بعد ما تنحنح : تنسينا الأيام و هذاه بدت .. أجهشت بصياااح مووووجع و أنا بين ايدينه ,, و حسيت اني فقدت أخر خيط أمل بنسيانهم لذنبي اللي ما ارتكبته و قلت بصوت فيه نبرة ترجـّـي : متى ان شاء الله عقب خمس و الا عشر سنين حرام عليك و الله ..... لكن صوت محمد قاطعن : اذكري الله يا امي .. أبعدت عنه و مسحت دموعي ,, و صرفت نظري لمطلق أدوره أبي عيوني تقوله وش كثر هالخيبه ملت دنياي بهالساعه . قرب مطلق لمحمد و سلم عليه بعد ما عطان نظره حسستن انه معي و يتوجع مثلي .. سألوا عن الحال و الأحوال ثم جلسوا عندي ,, ما مر وقت طويل و هم يسولفون لحد ما دخل فيصل و غيّر الجو بكلامه ... فيصل : يبه ودك لو انت شايف ولد رونق .. ضحكت و رديت يوم سمعت طاري جنيني : يا حياة قلبي هو .. تلفت محمد ثم رد : وينه ؟ تلعثمت وش اقوله و هو ما يعرف عن قوانين صبره المقدسه لكني تدخلت عشان أنقذ نظرات مطلق الحايره بالجواب !! و رديت بسرعه : تركته عند خالتي . رد محمد : حرام عليتس كان جبتيه يشوف خواله . رد مطلق و حسيت بلهجة الصدق بكلامه : مره ثانيه ان شاء الله .. : السلاااااام عليكم .. ابتسمت و أنا اشوف عبدالرحمن مقبل علي ,, سلمت عليه بحراره لكنه اقل من حرارة سلامي على محمد ,, يمكن لأن محمد أبوي و أغلى عندي من عبدالرحمن أو يمكن لأن عبدالرحمن كانت معاملته لي قبل لا أتزوج متذبذبه بعكس محمد الجاف ,, يعني سلامي على محمد كان به شرهه و عتااااب كبير ترجمته الدموع !! مسحت دموعي و أنا أشوفه يتجه لمطلق و يسلم عليه ,, مر وقت و حنا نسولف ,, سألتهم عن كل شي صار بغيابي و عطون أخبار و علوم ,, أفراح و أحزان ,, لكن بالنهايه حطوا قدامي جمل ناااااقصه تنتظر التوضيح ..!! فيصل و خطبته !! مي و تسقيطه !! نهى و طلاقه !! |
.
الجزء السادس و العشرون : ( لقااااااء بعد فراق ) هم أخوتي ,, دمي هو دمهم ,, و سأظل أحبهم حتى لو ابتعدت عنهم مئة سنه لأني أعلم أنا مافي قلبي من حب ما هو الا نسخة لما هو في قلوبهم .. .. إذن هم حتى لو كابروا فأنا أعلم بحبهم لي .. كانوا يسولفون و أنا أدور بنظري بينهم ودي أشبع منهم بس عجزت ,, كل ما التفت لحداهم اشتاق للثاني و ترجع عيوني تدوره , مر الوقت سريع لحد ما سمعنا صوت الحق ينااادي ... " الله أكبر " " الله أكبر " قام محمد واقف و رد : أذن يله يا شباب على المسجد . رد مطلق و هو يوقف : أنا أبجي معك .. مشى محمد باتجاه الباب : يله أجل مشينا و اسرعوا يا عيال لا تفوتكم صلاة الظهر . طلع محمد و وراه مطلق و تبعتهم بعيوني .. : ياااااهوه تراهم راحوا خلاااص . التفت بسرعه للصوت و شفت عيون فيصل تطالعن بخبث ثم كمل كلامه : طلع مطلق خلاااااص .. ضحكت و حطيت ايدي على افمي و رديت : حرام عليك !! ابتسم عبدالرحمن و رد : هاه وش أخبارتس مع مطلق ؟؟ قولي كل اللي بقلبتس دام انه طلع ؟ ضحكت و رديت بحياء : بخير الحمد لله .. قام عبدالرحمن و هو يردد : يا ربي لك الحمد على هالنعمه .. اتجه للباب و رد : تأخرنا يا فيصل بيقيم تراه .. ضحك فيصل و وقف : الحين جاي وراك .. تحرك فيصل لكني سبقت خطوته و مسكت ايده ,, التفت علي و سبقته بكلامي : أجل خطبه و سنع !! ضحك و التفت علي بكامل جسمه و رد : قسم بالله ما صار فرصه اقولتس .. قبصته مع ذراعه و رديت : لااااه أجل ما صار فرصه ؟!! ضحك و هو يمسح على ذراعه ثم رد : وش أسوي بتس صادة بالحفر .. ضحكت و رديت : اقول بس لا تضيع السالفه و قل لي من هي ؟؟ عقد حواجبه و رد : من هي اللي من هي ؟ رديت باستفسااار : الشينه اللي بتاخذك .. ضحك و رد : لا تسبين امرتي .. رديت بضحكه : من زينك عاد أنت وياه . ضحك و رد : سبين انا عادي بس ندى لاااا . . . . شخصت عيوني يوم سمعت الاسم و بمجرد استيعابي شهقت ,, تعلقت عيوني بفيصل و كأنه فهم علي لأنه جاوب على السؤال اللي تردد بداخل نفسي : ندى بنت عمتي هدى .. ابتسمت و تحولت ابتسامتي لضحكه .. شفته دخل طرف اصبعه بإفمه ثم رد باستهبال و هو طالع : ترى أستحي !! عضيت على شفتي لما فضت الغرفه من زوله و ابتسمت براحه و أنا أتمتم : يا ربي وفقهم يا رب !!! ــــــــــــــــــــــــــــــــــــــــــــــــــ ـــــــ أسماء بعد ما صليت الظهر قال لي سلطان عن رونق و أنا على سجادتي ,, قمت بسرعه و أخذت عباتي حتى بدون ما أستأذنه ... لبست عباتي بسرعه و أنا متلخبطه ,, فرحه و خوف و كل شعور تجمع بهالوقت .. كنت حايسه أنا و عباتي لأني اذا ارتعت أتلخبط ... حسيت بإيد سلطان تقبض على ذراعي ,, و داهمتن ريحة دهن العود اللي تملأ لحيته الكثه ,, رفعت راسي له و سألته بسرعه : وشو سلطان .. رد سلطان : أنتي تعبانه كلميه بالجوال يكفي .. أشرت براسي بمعنى لا و رديت : لي سنه و نص عنه و الله ما أقعد ... و كأني شفته عقد حواجبه من اللهجه اللي كلمته به فتابعت كلامي : و الله اني بخيييير و الله .. حسيت بإيده الثانيه تمسكن مع ذراعي الثاني و قابلن بجسمه و رد : أسماء هي بتطلع بكرى و بتجي تزورتس . رديت بسرعه و عناد : لاااااا أنا ابروح الحين أشوفـــ ... قاطعن و ضغط على ايديني اكثر : قلت لاااااا بكرى يعني بكرى .. عقدت حواجبي و بوزت و بثواني انفجرت أصيييح ,, سلطان ما يعرف باللي بقلبي لرونق ,, قسم ان قلبي آآكلن عليه و هو و لاااا عليه !! رد سلطان باستغراب : أسمااااااء ؟! مسحت دموعي بطرف ايدي و رديت : سلطان هذي اختي .. تنهد سلطان و رد : البسي يالبزر أوديتس .. عضيت على شفتي و مسحت بقايا دموعي ,, حطيت غطوتي على وجهي و رفعت عباتي على راسي ,, فتشت وجهي و حطيت ايدي بإيد سلطان الممدوده .. مشينا متجهين للباب لكن يد بنتي ربا تشبثت بعباتي ,, التفت بسرعه و سحبت عباتي منه بدون اهتمام ,, و كملت طريقي بسرعه .. وقف سلطان و سحب ربا و ضمه لصدره ,, شفته تجهش بصيااااحه و تردد : لا تروحون للدكتور بيخليكم تقعدون عنده كثيييييييييييير .. شفت سلطان يبعده عن صدره و يقابله و يشرح له : لا يا بابا بنروح نشوف خاله رونق و نجي .. ردت بشهاق : اوب جايين الا بعد كذا ,, و فتحت يدينه كلهن علامة عشره .. رد سلطان بعتاب : يعني بابا كذااب .. ردت بسرعه : لا لا بس ... قاطعتهم بسرعه و رديت : ربا يا ماما بنشوف خاله شوي و نرجع .. مسح سلطان دموع ربا بطرف شماغه و كمل : اذا جينا بوديكم للبقاله همآآآآه .. ملت وجهه الضحكه و ما كأنه اللي كانت حزينه تو و ردت : أبأحتريكم .. ضحك سلطان و لثم خدوده و رد : روحي لسيتي تلبستس . و علمي فطوم و رغد . أشرت برأسه علامة الإيه و دخلت بسرعه لداخل بخطوات سريعه .. ــــــــــــــــــــــــــــــــــــــــــــ هدى من وطت رجلي لأرض المستشفى حسيت الدنيا دارت بي ,, ضغطت على ايد بنتي ندى و كأنه حست باللي بي و شدت على ايدي اكثر .. تبعنا فيصل بخطوات سريعه ,, لحد ما وصلنا للأصنصير وقف فيصل يحتسي على رجل طويل و أسمر و جثل و ملامحه حاده .. أبعدت عنهم و وقفت ندى وراي ,, فركت اصابعي بارتباك و أنا واقفه أحتريه ,, شفته تلفت يدورن ,, رفعت ايدي أأشر له و مجرد ما شافن جاء باتجاهي هو و الرجل اللي معه .. برغم ارتباكي و خوفي الا اني سحبت ايديني و سترتهن داخل عباتي و مثل اللي صار لإيديني صار لندى اللي انكمشت على نفسه و غبـّت جسمه وراي .. : بالخير يا ام صالح .. رديت بصوت هادي : يا هلا .. رد سأل الرجل : بشرري عن أحوالكم ؟ رديت بسرعه : بخير الله يجزاك خير .. كان باين علي اني ما عرفته لأني ما سألته عن نفسه ,, لكن فيصل اشر عليه و رد : عمه هذا ابو ساري رجل رونق .. من قال رونق نشف حلقي ,, بلعت ريقي و رديت : هلا و الله حياك الله بشر عنك أنت و رونق ؟ رد ابو ساري بسرعه و عيونه متجهه للبعيد : بخير يا علتس للخير . رديت بسرعه : بشّر عن والديك ؟ رد ابو ساري : كلهم بخير .. ثم كمل : أخليكم تروحون تشوفون ام ساري بخاطركم .. مشى ابو ساري بخطوات بطيئه بسيب المستشفى ثم تحرك فيصل للأصنصير و تبعته أنا بخطوات سريعه و خايفه و ندى وراي لكن خطواته كانت مرتبكه بسبب وجود فيصل .. ــــــــــــــــــــــــــــــــــــــــــــــ رونق شديت الغطاء علي أكثر مع برودة التكييف المركزي و صكيت سنوني .. سمعت صوت عبدالرحمن : بردانه ؟؟ ابتسمت و رديت : شوي . حسيت بيد محمد تلحفن أكثر بالغطاء و رد : موب برد و الله بس أنتي تعبانه . رديت : لا الحمد لله أنا بخير . . . شوي و سمعنا صوت هادي : السلام عليكم .. اعتدلت جالسه و أنا أشوف أسماء تدخل ,, وقف محمد و سلم عليه و بعده عبدالرحمن ,, كل هذا و أنا ودي انط أسلم عليه ,, أحس انهم اقعدوا ساعه مع انهم ما أخذوا ثواني !! من أقبلت علي اسماء استقمت بقعدتي و لو اني اقدر كان قمت له ,, وصلت أسماء و ضمتن بأكبر قوه تقدر عليه و أنا استسلمت له ,, مرت دقايق و حنا ساكتين و ما تنسمع الا أنفاسنا !! لا صحنا و لا نحنا كل اللي سويناوه اننا التزمنا الصمت و كأننا موب مستوعبين شي !! ما أدري وش اللي صار لي يوم شفته قلبي بدأ يضرب و الحر كسى جسمي و من حطيت راسي على صدره بديت أتنهد ,, تشبثت به أكثر و أنا موب متخيله إني بغيت أفقده .. أسماء هي أمي الثانيه بعد امي موضي و لا به أحد يجي مثله يعني قدره الكبير هو اللي خلان أتشنج و ما يصدر من أي ردة فعل !! مر الوقت و أنا متشبثه بعباته و هي واقفه ,, حسيت بارتخاء جسمه و ضميته لي أكثر لكن كانت أثقل من اني أشيله و أنا بحالتي .. كأن عبدالرحمن حس به قبل لا تطيح لأنه شده معي و جلـّــسه على طرف السرير ,, تسندت على ظهري و ضميت راسه لي و هي مرتخيه و منسدحه على صدري ,, من شفت دوخته و ضعفه بدت عبرتي تتجمع بصدري ,, مررت ايدي على ظهره و أنا أشوفه معلقه عيونه علي ,, شفت دمعه حايره بين رموشه و من شفته طاحت دموعي و أنا أناظره ,, دفنت وجهي بشعره القصير و أجهشت بصيااااح موووووجع .. ما كانت الا أمي و أختي و بنتي و حياتي كله تتألم بين يديني .. و ما كان ألمه الا ألم جسدي اختلط معه آلآآآآآم نفسيه .. كانت شهقاتي عاليه و نحيبه موجع ,, سمعنا استرجاع محمد و استغفار عبدالرحمن لكن كله ما زحزحنا مقدار شعره !! ما مر وقت طويل الا وحسينا بإيدين حاوطتنا ,, ما كلفت نفسي أرفع راسي و أشوف من لأن صبره و الزمن ما نسنن ريحة أختي هدى و بنته ندى !! حسيت به تضمنا و تشابكت ايدينه هي و ندى ,, و ترجمن الشوق اللي بصدورهن عن طريق دموعهن . ما كنـّــا بذيك الساعه الا أشبه بعقدة الخيوط !! ـــــــــــــــــــــــــــــــــــــــــــــــ نهى بعد صلاة المغرب .. " أم دميعه " لقب أطلقته علي أمجاد بنت اخوي محمد و مع ان هاللقب لازمن كل الفتره اللي عرفتهم الا اني اليوم مثلته بصورته الصحيحه !! من دخلت على رونق و انا كل دقيقتين ألوذ و أمسح دمعتي بطرف المنديل اللي بيدي ,, فاقدته كثييييييييير !! يمكن البعض أو حتى الكل يستغرب اني فقدته و انا ما عاشرته كثير بحكم اني ما تعرفت عليه الا بعد وفاة ابوي عبدالله لكن سبحان الله من قابلته ارتحت له ,, فيه بقلبي اشياااء كثيره و هموم أكثر محتاجه أطلعهن لرونق بعد ما أخفيتهن عن الكل .. : وين وصلتي . رفعت راسي لرونق و ابتسمت ثم رديت : هناا . ردت رونق : موب على كيفتس تخلينهم يروحون بزعم انتس انتي اللي تبي ترافقين عندي همـّـن تسهجينن !! ضحكت و رديت : هذاي معتس قسم ما سهجتس . حطت رونق ايده على ايدي و ضغطت عليه و ردت : تطلقتي يا نهى . ابتسمت براحه و رديت : مرتاحه كثير يا رونق بعد الطلاق لكن ما تدرين وش كثر تعبت عشان اتطلق . ردت رونق باهتمام : وشلون قدرتي تقنعينهم انتس تتطلقين ؟ رديت بابتسامة سخريه : جاااء الفرج من ربي .. ابتسمت رونق و ردت : أويلاآآآه قولي وش سويتي .. رديت بجديه : اسمعي تعرفين خالتي لطيفه اللي بالمدينه ؟ ردت رونق : قصدتس عمتي لطيفه أخت ابوي و اخت عمتي منيره .. رديت أوضّــح : و عمتي منيره هي امي من الرضاع يعني أنا تصير عمتي لطيفه و خالتي لطيفه .. ردت رونق بسرعه : أوميييير و الزبده ؟ كملت قصتي : أول أنتي تدرين اني كارهته ,, و تدرين انه كثر ما أكرهه كثر ما يحبن .. و تابعت لما شفته مهتمه : عاد انا ساحرت امي منيره و حتسيت (حكيت) على اخوي محمد و كلهم يقولون انه ولد عمتس و انه شاريتس ,, المهم اني مئيسه قوه .. ردت رونق : طيب و بعدين ؟ كملت سالفتي : خالتي لطيفه مرضعة عزام عقب ما ماتت امه و مرت ولده الكبير سليمان مرضعتن .. حسيت ان رونق سطـّـلت فرديت أوضـّــح : يعني عزام يصير عمي من الرضاع . اخترقت شهقة رونق اذاني و ردت : يا ربيييييييي !! و كملت يوم شافتن سادة اذاني : و عمتي لطيفه وراه ما حتســت قبل تعرسين . رديت بهدوء : تدرين انه من تالي خيط و خيط .. سألت رونق : و مرت سليمان ؟؟ رديت على سؤاله : مرت سليمان ما دريت ان خالتي مرضعة عزام .. تنهدت رونق و ردت : لا تقولين لي بعد ان عمتي منيره ما تدري !! رديت بعد ما تنهدت : أمي تدري ان خالتي مرضعة عزام بس اللي ما تعرفه امي ان خالتي خلـّت مرت سليمان ترضعن بالسر لأنه على قولته ما تضمن الدنيا تبي لو يجي امي شي بسم الله عليه تصير تقدر تاخذن لأن عمتي لطيفه تدري ان ابوي مستحيل بياخذن !! تنهدت رونق و سندت راسه على السرير : فقعتي راسي ,, كل شي توقعته الا تسذا .. تنهدت و رديت : فقعت راستس بس انا ارتحت من الهم .. تنهدت رونق و ردت : قولي الحمد لله على كل حال . همست بعد ما انسدحت على سرير المرافق : الحمد لله على كل حال .. التفتت رونق و سألت من جديد : طيب هو وش سوى ؟!! ما أدري ليه تحاشت تنطق اسم عزام و نسبت له ( هو ) كإشاره له !! تنهدت و تكلمت بحزن صادق : رحمته قسم ,, قوه تأثر حتى هند اخته تقول انه عيا يجي عنده و عيا يرجع لبيت ابوه ما غير صاك على روحه بالبيت .. و كملت لما ما سمعت منه صوت : رونق طول عمري اتمنى آخذ رجل يطير بي و يصير يحبن و يوم كتب الله أخذته بس صار أبغض علي من كل شي بالدنيا . التفت على رونق و لمحت ابتسامه على وجهه ,, انتبهت لي و عقدت حواجبه ثم غطت وجهه بالشرشف و قالت : أبنام اذا قمتي تصلين العشاء لا تطلعين صوت همآآه .. رديت بعد ما تنهدت : ان شاء الله .. و فكري يدور بين ذكرياتي المزعجه و بين الابتسامه اللي كست ملامح رونق بغير وقته !! ــــــــــــــــــــــــــــــــــــــــــــــــــ ـــــ خالد الساعه 8:30 العشاء ما علمت أحد بموعد وصولي لأن حجزي كان انتظار غير اني كنت مخطط من بكرى أبمسك خط للحفر عشان أشوف رونق .. من خطت رجلي بأرض المطار دقيت على فيصل و بلغته اني وصلت لكنه فاجئن بخبر تسقيط رونق و بدون لا اكسب خبر ركبت مع أول ليموزين و اتجهت للمستشفى بدون لا أنتظر فيصل !! . . بما ان وقت الزياره انتهى دخلت من بوابة العيادات ثم تسحبت بين الأسياب لحد ما وصلت الغرفه المطلوبه .. فتحت الباب بشويش و وصلت لمسامعي أصوات العبدات خواتي .. : مها الكبيره و بعده ساره و أصغرهن وضحى . دخلت و أنا أسحب رجليني و شفت رونق تسولف و هي منسدحه و عيونه معلقه بالسقف ,, أما نهى منسدحه على سرير المرافق و عيونه بعد فوق !! شفت نهى ردت : يا خي هذولا وش عندهم طافين باسم وضحى . و صلن صوت رونق ترد على نهى : أقول أها بس لا تتطنزين بحمولتي .. . . رديت و أنا متكتف : الله و الحموله عااااد !! التفتن بسرعه و الروعه باينه بوجيههن اللي اقتلبت ألوانهن ,, و ما ان استوعبن وجودي بينهن حتى صرخن جميع : خاااااالد .. تقدمت و سلمت على رونق و ضميته لي قووووه ,, لثمت راسه ثم اتجهت لنهى و سلمت عليه مثل رونق .. ردت نهى بعتاااب : و يوم انهم صاروا و الله و الحموله وشوله تناسبهم .. ضحكت و رديت و أنا أقعد على طرف سرير رونق : و الله لو تدورين الدنيا كله ما تلقين رجاال مثل مطلق . ردت نهى : صديقك دافع عنه .. معطت شعر نهى بخبث ثم رجعت أكلم رونق وسط ضحك نهى ... و قلت : أخبارتس يا أم ساري . من نطقت اسم ساري اتسعت ابتسامة رونق حتى وصلت اذانه ,, و ردت : بخير عساك بخير بشـّـر عنك أنت ؟ رديت : بخير الحمد لله . سألتن نهى : جبت الشهاده ؟؟ ضحكت و رديت : أكيد و الا وشوله رايح .. ابتسمت رونق و ردت : يعني خلاص مافيه سفره ثانيه ؟ ابتسمت بخبث و رديت : الا أبدور الدنيا كله بأم عبدالله لا جت .. ردت رونق : ياااا بثرك يا شيخ .. ضحكت على كلامه ثم تلفــّــت و سألت : ما عندكم قهوه ؟ ضحكت رونق و ردت : وقت عشى ذا موب وقت قهوه .. رديت أنا : طيب ما عندكم عشاء .. ردت نهى بعد ما فسرت ايدينه ( رفعت كمومه ) : أغدين أطزز لك الحين . رديت بلا مبالاة : على لحمة حاشي تراي ما احب الغنم . انشدّت ملامح نهى لأقل من ثانيه ثم انفجرت ضحكته المكبوته و ملأ صداه الغرفه و شاركناه أنا و رونق .. ــــــــــــــــــــــــــــــــــــــــــــــــــ ـ رونق الساعه 3:30 الظهر . حطيت فنجال القهوه على الطاوله اللي قدامي و رديت : بس .. مدت مريم ايده : واحد . رديت : لا بس رويت و الله . ردت هند : يمكنتس ما تعودتي على قهوتنا طحتي بقهوة الحفر . ردت أمجااد : الله يالدنيا كل عمره تكره المسمار بالقهوه و الحين تعودت عليه !! رديت بسرعه : يالشينه تراي ما أكرهه بس احب علي القهوه لو تصير بدون مسمار .. : يا ولد .. قطع علينا صوت مطلق ,, رفعت راسي للباب و رديت : لبيه .. رد فيصل : تغطوا بندخل .. تغطوا كلهم و أضفوا عليهم العبايات بينما أنا بقيت بمكاني .. شفت فيصل يطل مع الباب ثم رد : تغطي يا رونق .. أخذت عباتي من الدرج اللي بجنبي و حطيته على راسي و أسدلت جزء منه على وجهي .. شفت مطلق يدخل و هو مبتسم و بين ايدينه شي !! ايد صغيره ثبتت على افمه ,, ركزت نظري على الجسم الصغير مع مطلق ,, و أوّل ما استوعبت ان هالجسم جسم وليدي صرخت : سااااااااااااري .. مديت ايديني لمطلق اللي حط ساري بحجري و اوّل ما أخذته ضميته لي بقووووه ثم دخلته داخل غطاي و لثمته مع كل مكان بجسمه و أنا أردد : ولهت علي يا روح امك ؟ رجعت ضميته و شميت ريحته ,, حسيت بإيدينه الصغيره تحاول تتحرر من ! شكله تضايق من الظلام تحت الغطاء فطلعته للنور و حطيته على حجري و بديت أتأمله و أنا ناسيه كل اللي حولي .. سمعت صوت : الله يجعلها سلامة دايمه يا ام ساري .. رفعت راسي و شفت نايف يدخل و ماسك خالتي ام مطلق فرديت عليه : الله يسلمك .. ثم كملت أكلم خالتي : حيا الله خالتي .. سلمت علي خالتي و هي تلهث ,, حبيت راسه ثم جلست هي على الكرسي و ردت : الله يجعل ما طاح تكفير للخطايا .. رديت : آمين يا رب الله يجزاتس خير .. سمعت صوت نايف : بخاطركم نبي نطلع حنا .. رد مطلق بسرعه : علامك وين تبا تروح ؟ رد نايف : ابروح أنا وياك و فيصل .. رد مطلق : مشينا .. من طلعوا شلنا غطياننا كلنا الا خالتي ما فكت برقعه مثل عادته ,, و قامن حريم اخوتي , مريم و هند , و بنات اخوي امجاد و نوف و سلمن على خالتي .. جلسنا نسولف و وليدي ما طاح من ايدين أمجاد و نوف ... و مع السواليف جت سالفة نوره مرت نايف .. خالتي ام مطلق : يوم انتس رحتي صارت نوره حبلى و ما امست بذيك الليله الا و هي تنزف ,, عاد وداها نايف للدختر اللي بالحفر و قالوا لا تقومين من محلتس .. رديت بحزن على نوره : يا عمري هي ما تصبر تقعد . ردت خالتي : لا نايف محلفها ما تقوم غير ان الحمد لله اللي ربي ثبته .. ردت مريم : ايه و الله الحمد لله .. ردت هند : و كم له حامل . ردت خالتي : بهالستين و شوي . رديت أنا : ايه شهرين الحمد لله بقى سبعة أشهر .. ردت خالتي : ايه و الله كل شي يهون يوم ان ربي ما ضيع فرحة نايف .. و كملت خالتي بعد ثواني : يوم اننا درينا بتس قلنا للشايب حنا نبي نسري و العيـّـل ما نقوى نخليه عند نوره و هي عليها قل صح و عقبها طاعنا نأخذه معنا . صاح ساري و أخذته من أمجاد ,, حطيته على حجري بعد ما لثمته و أنا مبتسمه و غطيته بعباتي و ألقمته صدري ,, حاول يتحرر من الغطاء لكن من وصل له طعم حليب أميمته سكن و انسجم برضاعته .. ــــــــــــــــــــــــــــــــــــــــــــــــ مطلق كنت أناغيه و هو يضحك ,, رفعته و حبيت خدوده ,, حسيت بيد فيصل تاخذه من و استسلمت له .. أخذه فيصل و حبه ,, رفعه و بدأ يناغيه لكن ولد ابو ساري ما أرضى فيصل .. فيصل مد لي ساري و بدأ يمسح ايده ثم رد : قليل الأدب ولدك هذا يبي من يأدبه .. ضحكت و رديت : أحد قالك خذه ؟؟ رد فيصل و هو عاقد حواجبه : أجل أنا فيصل العادل يسعبل علي هالصغنطوط ... قطع فيصل كلامه و رد و هو موجه كلامه للشخص المار من عندنا : هلااا تركي .. سلم تركي على فيصل و هو مبتسم و من طاحت عينه على ساري ,, سأل : من هو ذا ؟؟ رد فيصل : هذا ساري ولد مطلق .. ثم كمـّـل فيصل يوضــّح يوم شاف فيصل عاقد حواجبه : ولد عمتي رونق .. كنت عارف ان وقع الخبر عليه بيكون قوي لكنه حاول يبين انه ما فيه شي و سلّم علي ثم انصرف بسرعه بحجة انه عنده مرضى !! ـــــــــــــــــــــــــــــــــــــــــــــــــ رونق اليوم نبي نطلع من المستشفى لبيت أخوي محمد و معنا خالتي و نايف بنقعد لنا ثلاثة ايام ثم نمشي لصبره .. طلعت مع مطلق من الغرفه و هو ماسك ايدي ,, و بإيده الثانيه شنطتي .. و ساري أخذته أمجاد معه و سبقتنا للبيت .. كنت أمشي ببطء و السواليف آخذه مجراه بيني أنا و مطلق ,, مروا من عندنا ناس مرضى اللي يشوفهم يحمد ربه ألف مره على اللي صار .. رديت و أنا أشوف ولد صغير يمشي قدامنا : وهـ بث يا دينهم !! ضحك مطلق و رد : باتسر يصير ساري كبره الدنيا تركض .. ابتسمت و رديت : يآآآ رب !! لمحت من بعيد زول ميب غريب علي و همست لمطلق : مطلق شف ذا موب ابو مشعل ؟!! ناظره مطلق و رد : الا بالله هو .. و كمل : اقعدي هنيا على ذا الكرسي ابروح اشوفه و اجي . رديت و أنا أجلس : ان شاء الله . راقبته و هو يسلم على ابو مشعل اللي هو ابو رجل ساره بنت خالي فيحان .. مر الوقت و سمعت صوت موب غريب علي ,, أرهفت سمعي و تلفتّ أدور صاحب الصوت ,, شفته مار من عندي !! تركي ؟!! الا هو و الله هو ؟!! وزعت نظري على كل شي الا هو و انصبـّـت كل الذكريات على راسي بذيك الساعه .. سمعته يقول بصوت مقهور : وش اسوي قسم بالله ما توقعته يطيح اللي ببطنه . رد الدكتور الثاني : أنت الله يهديك وشوله الشك .. رد تركي بعد ما تنهد : قسم بالله غصب علي .. رد الدكتور الثاني : بس هذي بنت عمك و زوجتك .. رد تركي : و الله موب بإيدي الشك غصب عليّ . رد الدكتور الثاني : منتب تسذا من أول ّ!! رد تركي و هو يسحب نفس طوييييل : حسبي الله على من كان السبب !! راحوا و اختفى طيفهم و معه أختفت ذكرياتي الغبيه .. و أقبل اللي يسوااااهم كلهم ,, أقبل مطلق عسى عيني ما تبكيه .. قمت واقفه و مديت ايدي ,, و ايده الكبيره احتضنت ايدي الصغيره و سألته : عسى ما شر وش به ؟؟ رد مطلق : لا خير ان شاء الله جاي يزور له واحد .. رديت براحه : الحمد لله .. و مشينا رايحين لبيت محمد و ايدينا و قلوبنا متماسكه .... ــــــــــــــــــــــــــــــــــــــــــــــــــ ــ ندى بعد يومين اليوم مجتمعين ببيت خالي محمد ,, كلنا الا خالتي أسماء لأنه تعبانه و رونق راحت لمه ببيته .. مليييييت من رونق و نهى و أمجاد و تعليقهن علي و كأنه ما أعرس أحد قبلي ,, يعني من جددد دبلن تسبدي و خصوصا هالمصريه أمجاد !! المهم ان ناديه أختي قالت لي طنشيهن و انا سويت بنصيحة أخيتي .. يكلمنن و يتطنزن و أنا موب لمهن و بالأخير يوم صدز انفقعت مرارتي طلعت من المطبخ رايحه لمجلس الحريم .. و قبل لا توطى رجلي مدخل المجلس سمعتهم يسولفون .... أم مطلق : الله يوفقهم و يرزقهم الذرية الصالحه .. ردت أمي : آمين الله يجزاتس خير .. سمعت صوت هند مرت خالي عبدالرحمن : عاد لا تخلوننا يا أم مطلق .. ردت أم مطلق : و الله ما ندري عن الشايب يطيعنا لو لا .. ردت مريم مرت خالي محمد : بتجون ان شاء الله نبي نصير ولهين عليكم .. سألت هند : حددتوه ؟!! ردت مريم : بــ 6/7 ان شاء الله .. بلعت ريقي يوم سمعت الموعد و مديت ايديني أحسب كم بقي لكن صوت أمي كان أسرع من : بعد شهر و نص ... وقف قلبي و بلعت ريقي !! و الله موب مصدقه اللي أسمعه ,, أنا قلت لهم ايه بس ما توقعتهم يحطونه الحين ,, يا ربي قهررررر قسم بالله ,, تلفت و أنا حايره وش اسوي ,, لكني تذكرت اني طرت و الا وقعت موب مغيرينه أمي و ابوي و أنا اعرفهم !! شلت نفسي و رجعت للبنات و أنا أغلي من القهر عليهم كلهم !! ــــــــــــــــــــــــــــــــــــــــــــــــ خالد سكرت الخط بعد المكالمه الطويييييله مع رونق ,, موب مصدق ان خويي مطلق صار له كل هذا !! توفى ولد عمه و خوي عمره بين ايديه ,, و صبر !! و اتهموه بذبحه ,, و صبر !! و احقروه أهله و ربعه و جماعته ,, و صبر !! و الأغرب من هذا كله إن براءته عند عقاب ولد عمه يعني بين ايدينه و لا هوب راضي ياخذه ,, يآآآآآآه يا مطلق قسم بالله ان نسبك مكسب !! سمعت طرق على قزاز سيارتي ,, التفت و شفت مطلق ,, فتحت الدريشه و سمعته يقول : وش عندك قاعد هنيا عسى منتب تتغزل لك ببنية ؟؟ ضحكت و رديت : هههههه ما لقيت الا أنا !! ضحك مطلق و رد : و الله انك تسويها عقب العجم اللي أنت جاي منهم .. انفجرت أضحك عليه ثم رديت : خل عنك بس و اسمع العلم .. تحولت نظرة مطلق للجديه وهو يقول : هات ما عندك .. رديت بجديه و فيه موال يدور براسي : أنتم بتروحون باتسر لديرتكم و أنا الله يسلمن أبجيكم عقب باتسر .. ابتسم مطلق و رد بفرحه : حياك الله بديرتنا و الله ان العين اوسع لك من المكان و الله ان ............ و كمل مطلق معلقة الترحيب من فرحته بي بينما أنا راح فكري مع دكتور الأعصاب " خالد العادل " و مريضه الجديد " عقاااب " . ــــــ نهاية الجزء السادس و العشرين .. ما قدرت أجمع كل االأحداث بهالجزء و أنهي الروايه لأني بكون اختصرت و ظلمت الروايه ,, كل اللي بقوله ان الجزء السابع و العشرين بيكون هو الأخير ,, لا تستعجلون علي طلبتكم !! |
الجزئين نزلتهم بالمنتديات الثانيه بس ليلاس عجزت ,, يعني ما أقدر أنسق النص فاستعنت بمساعدة منتديات ثانيه ,, ما أدري البلا باللاب و الا بي أنا !!
|
لااااااااااااااااااااااا بتنتهي قريب
نبوضه وربي اني احب اقراها هالروايه متربعه بقليبي حاولي تنهينها بعدين موب الحين تكفييييييييييييييييييييييييييييييييييييييييييييييييييييييييي يييييييييييييييييييييييييييييييييييييييييييييييييييييييييييي يييين |
آلسلآم عليكم ورحمه الله وبركاته :) نبض آلقصيم آوٍل روآيه اقرآءهاا لك .. اسلوب مبدع الصراحه وبقوووووه ،/ حقيقهُ تمٍ آضآفتك في قآئمه آفضل آلكتآب بآلنسبه ليَ = تكفين محدن درى عنتس :p امممم عجبني اسلوبك وعجبتني اللهجه القصيمه وبقوووووووووووووووووووه عجبتني القصه صراحه صح تمر علينا فكرة البنت اللي تنفضح عند اهلها = لكن ان تتم معالجة حالها و حال اهلها بالدقه اللي اتبعتيها ماشفت حبييييييييييييييتك ياابت حبيت اسلوبك صراحه وحبيت قصه رونق لكن اممممممم احس انك قصرتي في وصف حالة [ مي و عزآم ] بما ان لهم يد في تكوين البطوله فالقصه يعني لازم نعرف لو شوي عن حالهم وحياتهم = عشان تبرد كبودنا عليهم :s خصصصصصوصاا مي = صراحه قاهرتني من قلب :( واحس اني حاقده على " تركي " الحيوان من قلب وعقل وكل شي :@ وامممم ياعمري بس يافيصل = حبيت تصرفه مع عمته وطيبته معاها واسلوبه ومساندته لهاا عبدالرحمن = كرهته من قلب ولاتلوميني = اكره ماعندي الظلم صح ان " محمد " ظلمها و " هدى " ظلمتها بقص شعرها واسلوبها فالبدايه معاها لكن عبدالرحمن حسسسسسسسسسسسيته قسى عليها من قلب :( يعني ليته اتخذ سياسه التطنيش ولا عذبهاا كذا :( لكن ربي عوضها بـ الصقر = مطلق ..~ عجبتني شخصيته وقوته لكن ماعجبني موقفه يوم سكت عن حقه << الصبــــــــــــــــــــــــره >> مـــــــــــــــــآآحبيتهاا :( مدري والله كيييييييييييف عايشين فيهاا :( اصلا ماتخيل كذاا صح حياتهم حلوه ببساطتها بس مدرري يعني افكر فيهم الحريم مايروحون السوق ؟ كيف يشترون ملابسهم ؟ طيب اغراضهم كل شي ؟؟ رجالهم هم اللي يختارون لهم ويجيبون لهم ؟ ماحبيت هالشي والله :( ولا حبيت عادتهم البنت ماتشوف اهلها بعد زواجها ؟؟؟ سسسسسسسسسسلآماات ؟ :s يعني وش يحسون فيه بالضبط امي ابوي اخواني خواتي = انسسسسسسساهم = اللا بعد ماجيب لي كم ورع ؟ !! يعني ياحرام والضعيفه اللي كتب لها ربي ماتجيب عيال وش تسوي :s مدرري بس حسيتهم يكآفئونها على حملهاا وولادتها ؟ = بشوفة اهلها :( ماحبيت هالطبع فيهم والله وامممممم متحمسه للبارت الاخير وبانتظاره على احر من الجمر الله يسعدك ويوفقك باختباراتك يارب بانتظارك ، ولاتطولين علينا :) |
نبووووووووووووضه.. تسلمين فديتج عالبارت
والسمووحه ع القصور رونق وساري بدايه النهايه.. وعودة المياه لمجاريها.. واخييرن ردو هلج شرات قبل<<فيس ارتاح.. وانته جي يا ساري<< فيس الاوكيك.. اخير شي فيك انك تراعي رونق وتدور راضاها<<فيس مرتاح عزام طلقتها.. زين دواك تستاهل.. هاي كلها حوبه رونق المسكينه.. وخليت هلكم ينبذونها<<فيس يستمر الكره نترياج فديتج<<الفيس راعي الورود http://www.liillas.com/up3//uploads/...29afe633ce.gif |
الجزء السابع و العشرون ( الأخييييييير ) : (براءاااات) للبراءة نكهة لذيذه !! رفعت ايدي المليانه رمل و فتحت اصابعي ,, تركت الرمل ينزل بسلاسه و اكتفيت بتأمله .. رمل ناعم ما يشابه وعورة العيشه بهالمكان .. دارت عيوني على البعارين قدامي و سجّــيت بهواجيسي !! : خالد !! وش اللي ماخذ عقلك ؟! التفت بسرعه لنايف اللي اتخذ مكانه بجنبي و رديت بمزح : ام عبدالله . ضحك نايف و رد و هو يلف شماغه على راسه : الله يجيبها هي ثم عاد فكر بعبدالله .. ضحكت و رديت : يعني قولك ادورها ؟! طيب هنا و الا بالقصيم ؟ ابتسم نايف و رد : يفدونك بنات صبره . ابتسمت و رديت : لي الشرف اني اخذ منهن بس انا رجال ما مليت من العزوبيه .. ابتسم و رد بجديه : و الى متى بتقعد تسذا انت رجال دختور و الدختر شي طيب بين العربان يعني ما تلقى لك مبغض بين العوايل . رديت منهي السالفه : انا خل اشوف مشكلة عقاب اول . رد نايف باستفسار : الا على طاري عقاب و الله يا عمي مستبشر خير بجيتك . رديت : الله يعين و يقدرن على علاج ولده . رد نايف و هو يربت على كتفي : قدها يا اخوي قدها !! رديت عليه : ما عليك زود ....... و لمح لي عقاب من بعيد يركض .. ناديته : عقااااااااااب ..عقااااااااااااااااااااب . وقف و تلفت يدور الصوت و من شافن عبس بوجهه !! دخلت ايدي بمخباتي و تحسست اللي بداخله ,, قلم و اوراق و شوي تراب !! حسيت بملمسه الدائري وابتسمت و طلعته ,, رفعت ايدي فوق و اشرت بالحلاوه .. من شافه اسفهل وجهه و جاء يركض .. سمعت ضحك نايف تخللته كلماته : اعقب يا رجال تهزك حلاوه .. ضحكت و مسكت ايد عقاب ثم رديت : عقاب رجال بس عاد يحب الحلاو .. ابتسم عقاب على المديحه اللي سمعه و اخذ الحلاوه من ايدي .. تكلمت : أخبارك اليوم يا عقاب ؟ رفع راسه و رد و هو يأشر براسه علامة الإيـــه : أأأااههمم .. رجعت سألته : تاكل دواك ؟ أشر براسه علامة الايه ... رجعت رديت : يله ردد معي ..... و ابتدت حصه من الحصص التدريبيه لـلسان عقاب على أمل الشفاء !! ــــــــــــــــــــــــــــــــــــــ رونق الضحى .. تنهدت بعد ما رفعت فراش خالد ,, و مشيت بخطوات سريعه ثم ركنته بزاوية المجلس بجنب شنطته .. حسيت بخرفشة أوراق ,, دخلت ايدي للشنطه و سحبت منه الدفتر ,, تصفحت اوراقه و عيوني مركزه بالكلام المكتوب .. سكرت الدفتر بعد ما تأكدت اني مستحيل أفهم هالكلام ,, ههه شكل خالد متعني يكتبه بالانجليزي عشان ما أقراوه !! رجعت الدفتر بمكانه و بكذا انتهيت من ترتيب المجلس و معه انتهيت من ترتيب البيت كله .. طلعت من المجلس متجهه لنوره بغرفته .. طقيت الباب بطرقات خفيفه خفت لا تكون نايمه و اقومه .. : حياتس يا رونق .. دخلت و الابتسامه مرسومه على وجهي : وش دراتس اني انـــــا .. ضحكت نوره و ردت : من يبي يطق تسذا الا انتي . ابتسمت و رديت بعد ما جلست قباله : هاااه بشري عنتس الحين ؟! ردت نوره بتأفف : مليت يا رونق و الله مليت يا خيتي من النومه .. ربت على كتفه و رديت : باتسر لا جاء وليدتس نسيتي التعب . ابتسمت نوره و ردت : ايييييه الله يسلمه لين يجي .. رديت : آآآمين , هاه تبين شي قبل لا اروح اسوي الغداء ؟ مسكت نوره ايدي و ردت : و الله انه ودي اعاونتس بس الشكوى لله . رديت بعد ما وقفت : ما يجي منتس قصور يا نوره بس انتي حافظي على وليدنا و هذا اللي نبيه كلنا . ردت نوره : الله يحلي ريقتس بكل علم يسرتس . طلعت بعد ما رددت : آآآآمين . ــــــــــــــــــــــــــــــــــــــــــــ نوره بعد صلاة العشاء .. كانت عيوني مركزه بنقطه بثوبه ,, اما تفكيري بعيييييد ,, لو يموت اللي ببطني وش يبي يصير لي ,, نايف بيعرس علي و الا بيدور غيري !! كانت نفثه من نفثاته و هو يقرأ علي كفيله برجعتي لواقعي ,, تعوذت من وساوس الشيطان بداخلي و اصغيت لهمسه العذب بقراءة آيات القرآن . . . . حسيت بمكان ايده الدافيه على بطني يبرد ,, ناظرته بعد ما أبعد ايده و رديت : الله لا يحرمك الأجر . ابتسم و رد : و لا يحرمتس انتي بعد . اكتفيت بالابتسامه لكنه رجع يسأل : تعشيتي ؟ رديت : ايه الحمدلله . رفع حواجبه و رد : تلقينتس اكلتي اكل دجاجه . ضحكت و حطيت ايدي على افمي ثم رجعت رديت بحماس : اكلت اللي يكفي ولدك . ابتسم و ربت على كتفي و رد : أهم ما علي تاكلين اللي يكفيتس انتي و الا ولدي ميب ميت و هو عند نوره .. ابتسمت و نزلت راسي بحياء ,, مشاعر نايف تنفي أي وساوس ممكن اتخيله بأي وقت !! رديت بعد ما حررت شفتي من بين سنوني : الله يخليك لي يا رب .. و تركت سيل الدموع ياخذ طريقه على خدي .. سمعت صوت نايف : لا لا وش هالدموع .. حسيت بايده تمسح دموعي فابتسمت بارتباك و رديت : العذر يا ولد عمي . رد نايف : خلي العذر اللي ماله داعي و سولفي لي وش علومتس اليوم و من زارتس .. ابتسمت و بديت بموجة سواليف جديده ... ــــــــــــــــــــــــــــــــــــــــــــــ مطلق العشاء .. : يرحم والديك نم خلاص !! ابتسم و اختفت عيونه الصغيره مع ابتسامته .. لثمته بين عيونه ,, كنت أشوف كل الدنيا بهالعيون !! عيون ساري ,, ابتسمت و نزلته على حجري ثم تكلمت : الحين تجي أمك و تفكن منك .. كان يبتسم بمجرد كلامي معه شكله مستلعب .. سمعت صوت الباب ينفتح و شفت رونق تدخل .. ردت رونق : السلام عليكم . رديت : و عليكم السلام أخيرا جيتي .. ضحكت رونق و ردت و هي تفك جلاله و برقعه : عشان تصدق لا قلت لك ولدك شقي . ابتسمت و رديت بعد ما حطيته بجنبي : انا تعبت ابناااام خوذيه فكين منه .. ردت رونق بعد ما أخذته : لا تنااااام تكفى ما شفتك اليوم . رديت بعتاب : تكفيتس شوفة اخوتس أجل من متى و أنتي رايحة تفرشين فراشه هااااه ؟!! ردت رونق بسرعه تبرر : و الله انه قعد يسولف علي شوي ما أبطى . رديت بعد ما حطيت ايدي على عيوني : اها بس لا تحاولين منب راضي .. ردت بسرعه بترجي : مطلق تكفى لا تزعل ..... ابتسمت على صوته المليان عبره و رديت بعد ما شلت ايدي : ما زعلت و الله بس ولدتس اتعبن و انا بي نوووووم .. ابتسمت رونق و ردت : يعني منتب زعلان أبد ؟! رديت بابتسامه : و الله منب زعلان و لا شي .. رجعت ايدي على عيوني بعد ما شفت ابتسامته اللي شقـّـت وجهه .. ماكانت الا لحظات و حسيت به تلثم خشمي ,, ابعدت ايدي أول ما استوعبت اللي صار و لقيته جالسه ,, سألته و أنا ناوي أحرجه : أحد حب خشمي .. ردت بعد ما رفعت حواجبه بغرور : تحلم كمّـل نومتك !! ضحكت و رجعت ايدي على راسي مره ثانيه والابتسامه مرسومه على وجهي .... ــــــــــــــــــــــــــــــــــــــــــــــــــ مرت الأيام و تعدت الشهر و نص بيومين !! . . . نايف بعد صلاة العصر .. عند النياق . كنت أراقبهم بصمت ,, خالد يحتسي و عقاب يردد وراه !! مافيه شي ما سويته عشان ابين لهم براءة مطلق لكن مع كل هذا عجزت !! و الحين براءة مطلق قدامي !! كنت مثل الضميان اللي قدامه بير ماء ,, ودي اصبر بس شوقي لفرحة اوخيي اكبر ... عضيت شفتي امنع نفسي أتدخل ,, لكن شي بداخلي ما رضى يصبر .. و رديت مقاطعهم : عقاب أنت بديت تحتسي الحين صح ؟ قاطعن خالد و رد : نايف وش فيك ؟ سهجت خالد و رديت سألت عقاب : عقاب رد علي ! رد عقاب بتأتأه : أأأ ..أيــــه . مديت ايدي و حطيته على كتفه و سألته : عقاب تذكر يوم ساري الله يرحمه يموت ؟ تغيرت ملامح وجهه لكني تابعت : عقاب كانك رجال قل لي وش اللي صار يوم وفاته ؟ تدخل خالد و رد : عقاب يا ابوي انت رجال قل لنا وشلون مطلق ذبح ساري ؟ ناظرت خالد بامتنان ثم التفت على عقاب .. من قال خالد اللي قاله احمرت عيون ساري و بدأ يقص السالفه بتأتأه و صعوبه بالنطق : مـ..مـ.. مطلـ...ـق قطع اجل ( رجل ) ساري بـ .. بـ...بـ.. بالخنجـ....ـر و طططـ.. طلع دمه !! كان عقاب بطيء جدا و هو يقص السالفه و غير تسذا يفصل حتسيه كل شوي بشهقه أو حتى يمسح دموعه !! يمكن حماسي اني اسمع السالفة اسرع من سرد عقاب ,, تدخلت و قلت : مطلق ذبح ساري ؟!! رد عقاب بعد شهقه : و الله قطع اجله !!! رديت سألت بصوت أعلى : وراااااااه قطع رجله ؟ رد عقاب بتفاعل اكثر : سـسسسـ... ساري قال له ؟ من نطق و قال ساري قاله حسيت ان براءة مطلق طلعت !! قمت واقف ابنصى بيت عمي ,, لكن ايد خالد سبقتن ,, التفت ابحتسي عليه لكنه سبقن و قال : اصبر يا نايف الأمور ما تنوخذ بهالسرعه .. رديت بسرعه : ابقول لعمي و ابوي ابيهم يدرون ان مطلـ... قاطعن خالد برده و هو معصب : اصبر يا نايف لا تخرب علي تعب شهر و نص . بلعت ريقي بعد كلامه و جلست و أنا أشوف عقاب يمسح اللي بقى من دموعه .. شفت خالد قرب لعقاب ثم لثم راسه ,, و رجع قرب لأذنه و همس له بكلام مـــــااااا أعرفه !! ـــــــــــــــــــــــــــــــــــــــــــــــ خالد بعد ما سلمت و انهيت صلاتي مع الامام التفت ادور مطلبي .. شفته بوسط الصف بجنب ابو مشعل ,, تعلقت عيني به احتريه يقوم ,, قام و أدى سنته ثم اتجه للباب ,, لحقته بخطوات سريعه لكن خطواته كانت اسرع !! ناديته بعد ما طلعنا من المسجد : عم ابو ساري !! وقف و التفت و من شافن كست وجهه الابتسامه و رد و هو مقبل علي : ارحب يا ولد الأجواد .. سلمت عليه و بادلته الترحيب ... ثم رديت : ابو ساري ترى عقاب عازمن على القهوه عندكم . اسفهل وجه ابو ساري و رد : أنت راعي البيت يا ولدي و والله يا قدرك أكبر من فنجال لكن .. قاطعته : فضلك سابق يا ابو ساري انا ما نسيت العزايم و الذبايح اللي قامت بصبره عشاني . مشى ابو ساري و هو ماسك ايدي ثم رد : شويه عليك يا الأجودي .. رديت بحياء لأول مره يجين : ما سويت شي يا عمي ! . . . دخلنا البيت و بعد ما شربت لي فنجال قهوه بديت أحتسي .. أنـــــا : ابنشدك يا عمي عن اللي بينك و بين أخوك عايض . رد ابو ساري مستغرب من سؤالي : ما بيننا الا الخير هو اوخيي و صويحبي و مالي غيره بهالدنيا . رديت سألت و أنا أدور على هدفي : لو يخيرونك بين حياتك و الا حياته ايّه تختار ؟ قطب حواجبه و عدل جلسته ثم رد : وش اللي تبي توصل له يا خالد . رديت أتكلم : اسمعني يا عمي و لا تقاطعن للاخير .. ثم أسهبت بكلامي بعد ما شفت عيون عمي المستغربه : أنا يا عمي سمعت بقصة واحد و صحيـّـبه ,, طلعوا يكشتون ,, و قابلهم سيل ,, واحد منهم شالته الجزامه و طب بالسيل ,, أنت تشوف أن خويه ينقذه و الا يتركه ؟ رد ابو ساري بدون تفكير : الا ينقذه و ينقذه مهوب هو خويه !! رديت أسأل : بس يمكن يموت اذا انقذه ؟ رد ابو ساري : السنافي ما يهاب المهالك . تنهدت و رديت : السنافي أنقذ خويه لكنه غرق هو !! رد ابو ساري : هذا الخوي اللي ما ينتفرط فيه ! ابتسمت و أنا أشوف الحماس بعيون ابو ساري و رديت و انا حاس اني وصلت لمطلبي : تدري من هو السنافي اللي انقذ خويه و غرق هو ؟؟ رد و هو مقطب جبينه : من ؟ رديت : مطلق !! ثم كملت يوم شفت الصدمه بعيونه : مطلق ولد اخوك يا ابو ساري !! مطلق اللي انقذ ساري يوم انه بالخمس طعش و عرض نفسه للموت ,, أنت تظن انه يخونه و هو رجال . رد ابو ساري و التأثر باين بعيونه : اقطع هالسالفه يا خالد و أنت محشوم !! رديت بسرعه بحماس : انت تذبح اخوك يا ابو ساري ؟؟ و الله ما تسويه وشلون تبي مطلق يسويه ؟ ضرب ابو ساري الوجار بيده ثم رد : بيده دليل يجيبه ما بيده يقطع و لا يرسل لي وسايط .. عدلت جلستي و رديت : و الله ما ارسلن واسطه بس انا اللي اكتشفت انه بريء .. قاطعن ابو ساري بعصبيه بعد ما مد ايده : هات الدليل !! بلعت ريقي من عصبيته المفاجئه ثم التفت على عقاب اللي جالس بجنبي و رديت : قل اللي شفته يا عقاب .. لاحظت برود ابو ساري اللي التفت و صب له فنجال و كأن الأمر ما يعنيه .. تكلم عقاب : أأأأ.. أنـــا ششششفت ساري يصوّت للللللمطلق ييييــ يقول له تتتتتتتعال اقطعها .. لاحظت عيون ابو ساري اللي تحمس مع السالفه ثم التفت لعقاب اللي كمّل كلامه : ققـ..قام مطلق ترك سسساري ووووو ابعد بس سسسساري صوّت تكفى يا مممممطلق الموتر ييييييـ.. يبي يحترق ,, عععـ..عـاد رجع مطلق و ذبح اجله بخنجره .. كان هالكلام كفيل بتوضيح الحقائق لكن ابو ساري كابر مع ان التأثير باين عليه .. رديت عليه : ابو ساري مطلق قطع رجله بعد ما خاف يحترق بالسياره .. ثم كملت يوم شفته شاد على فروته و مغمض عيونه : مطلق عرّض روحه للخطر عشان ساري و أنت تجازيه تسذا .. كملت متجاهل تنهيدة ابو ساري اللي طلعت من أعماقه : انت ما تذبح اخوك وشلون تبي مطلق يذبح اخوه .. رد ابو ساري يسكتن : بس يا خالد بس !! تجاهلت كلامه و كملت : ساري مات لا تذبح اخوه مطلق يا عمي .. قاطعن ابو ساري بتأثر : خالد بسسس .. سكت شوي انتظره يتكلم لكنه تأخر ,, شفته يتأمل الضوء اللي قدامه ثم أخذ طرف شماغه و مسح به دموعه ,, مر وقت لين سمعت شهقته !! ابو ساري يصيح !!!!!!!!!!!!! تركته يعبر عن حزنه و اكتفيت بالانتظار .. شوي و رجع تكلم بعد ما بدأ يرجع لحالته الطبيعيه : ساري هو روحي و مطلق مهوب ارخص منه .. و الله انه اهون علي بألف مره لو انه ميت ميتة العالمين و ما صارت على يد اخوه .. قاطعته بقهر : قلنا لك مطلق يبي ينقذه من الموت خاف لا تحترق سيارته و هو بداخله !! عض ابو ساري على شفته و رد بحسره : الله يرحمه كان يغلي مطلق بالحيييييل .. رديت : هو يغليه بس انت ما حفظت الغلا اللي بينه و بين صحيـّبه .. سكت ابو ساري شوي ثم رد : الليله ما تغمض عيني الا و مطلق راضي عني ! بلعت ريقي و غمضت عيوني برآآآآحه و أنا أسمع أبو ساري يصوّت : قم يا ملفي و جب راسين حلال نذبحهم و قل امك تجهز القهوه ترى عشاء رجال صبره هنيا !! ـــــــــــــــــــــــــــــــــــــــــــــــــ مطلق بعد صلاة العشاء شفت عمي ابو ساري عزم رجال صبره كلهم ,, و بطبيعة الحال أنا ما عديت نفسي معهم لأن عمي ما يداني شوفتي كيف اروح لبيته !! : مطلق .. التفت لنايف اخوي و رديت : نعم . سأل سؤال كنت متوقعه : منتب رايح لبيت عمي ؟! رديت بجواب حافظه : وشوله أنكد عليه ؟ ابتسم نايف ثم رد : و اللي يقولك ان العزيمه عشانك . قطبت بحواجبي و أنا مستغرب و رددت : عشاني !! ضحك خالد و ضرب على كتفي ثم رد :عقاب قال لابو ساري كل شي .. التفت لخالد ثم ناظرت نايف و أنا موب مصدق اللي اسمعه لكن ضحكة نايف اللي طلع صداه بالمسجد الخالي الا من أطيافنا الثلاثه أكدت لي !! بلعت ريقي ثم رجعت سألت : وشلون قال عقاب السالفه لعمي ؟! ابتسم خالد و رد : هههه انا و نايف وراه ليت طلعنا السالفه منه .. ضحكت و حطيت ايديني الثتين على وجهي مسحت عليه و أنا أردد : الحمد لله الحمد لله !! مشيت معهم متجه للباب و ألف شي و شي براسي أولهن ودي امسك ولدي ساري و اقوله ان ابووووووك بريء !! بعد ما خطت رجلي على الرمل تذكرت اني نسييييييييييت أهم شي !! رجعت بخطوات سريعه بعد ما قلت لهم يسبقونن لبيت عمي ,, دخلت للمسجد و ببالي حتسي كثييير ودي اقوله لربي ,, ودي ادعيه و اشكره على كل نعمه عطان اياه !! طحت على اقرب سجاده ,, سجدت و بمجرد وصول جبهتي للأرض انعقد لساني ,, ودي اقول أي شي بس ضااااع الحتسي ,, يمكن اللي بصدري اكبر من اني اطلعه أو يمكن مدري مدري !! اللي اعرفه و احسه الحين ان دموعي غسلت وجهي و بللت حتى السجاده المهتريه تحتي !! |
رونق من سمعت بخبر براءة مطلق و دمعتي ما وقفت ,, شي بداخلي فرحان لمطلق و شي ثاني فرحان اني كنت السبب بهالبراءه !! لكن مع ذلك حسيت بالغيره كثيييير لما قال لي خالد انه كم واحد من رجال صبره أهدى عليه بنته !! سمعت الباب ينفتح ,, التفت و شفت مطلق بوجه ثاااااني غير اللي أعرفه !! راحت ذيك النظره الحزينه و ما أشوف قدامي الا ابتسامه و فرحه .. أقبلت و وقفت قدامه ,, رفعت نفسي على أطراف أصابعي و حبيت جبهته و أنا أردد : الحمدلله على برائتك ! رد مطلق و هو يمسح على راسي : الحمد لله الحمد لله .. ابتسمت و رديت بطريقه طفوليه مضحكه : مطلق أنا قووووه فرحه !! ضحك مطلق على تعبيري و لثم راسي : الله يديمها علينااا يا رب . مع زيادة صوت ضحكته رديت : بسسسسسس .. عقد حواجبه مستغرب لكني تابعت : ابو مطلق نيم .. التفت للباب و معه التفاتته انفجرت أضحك و رديت : موب ابوك .. رجع ناظرن و رد : أجل من هو غيره ابو مطلق ! رديت بضحكه و أنا أأشر على فراشي : وليدي ساااري .. مد مطلق ايده و حطه على كتفي ثم رد و هو ماشي لساري : تدرين وش ودي !! ابتسمت و رديت بعد ما حطيت عيني بعينه : وشو ؟ رد مطلق : ودي أنااااام شهر ! ــــــــــــــــــــــــــــــــــــــــــــــــــــ بعد شهر .. . . . رونق.. الظهر .. من مشى خالد أمس للقصيم و أنا منغثه ,, أدري اني مستحيل ابقدر أروح للقصيم غير ان عرس ندى ما يبطي .. . طلعت من المطبخ بعد ما قضيت مسبعة مواعين الغداء و شفت مطلق بوجهي ,, رسمت ابتسامه على وجهي مع انه فيه شي من الضيق بصدري و كملت مشيي متجهه للمجلس . حسيت بإيده تخترق ايدي و رديت : آآآي .. سحبن مطلق لين وقفن قباله ثم رد : وراه خاطرتس متكدر ! ابتسمت و رديت : مابي شي . رد و قال : وين تبين ؟ رفعت كتوفي و نزلتهن ثم رديت و عيوني على المجلس : ابروح اظف المجلس . ابتسم و رد و ايده تأشر على المجلس : بتلقين اللي يسرتس هناك .. عقدت حواجبي مستغربه ثم رديت باستفسار : وشو ؟ رفع كتوفه و نزلهن علامة مدري و بطريقته هذي كان يتطنز بي .. جريت خطواتي المرتبكه و مشيت رايحه للمجلس .. بمجرد دخولي انقبض قلبي !! ثلاثتهم قدامي ,, محمد و عبدالرحمن و خالد !! درت عيوني عليهم أدوّر الخبر ,, أسماء لا لا يمكن هدى أو حتى يمكن ...... شفت محمد قام واقف ثم اقبل علي ,, رجعت بخطواتي على ورى لما فتح ايده لي و رددت بصوت خافت : وش بكم أحد به شي ,, أسماء به شــ.... قاطعن محمد : كلنا بخير و الله و أسماء ما عنده خلاف . من سمعت كلامه تطمنت ,, شفت ايده الممدوده ,, صار لي فوق السنتين ما خميت ابوي ,, ولهت عليه و على ريحته و على همسه و على سواليفه .. مشيت لمه و ضميته متناسيه أي جروح سببه لقلبي ,, من لامس راسي صدره أجهشت بصيااااااح ,, مر وقت و أنا اصيح و محمد يمسح على ظهري ,, كان الصمت مطبق على المجلس و ما ينسمع غير صياحي !! حسيت اني فرغت جزء كبر الذره من شرهتي على محمد ,, عضيت على شفتي و قشعت نفسي من صدره ثم رديت بصوت مخنوق : وراكم ؟ جلس محمد و هو ماسك ايدي و جلست معه ثم بدأ يتكلم : .... ــــــــــــــــــــــــــــــــــــــــــ عبدالرحمن كنت اشوف انفعاله مع السالفه و أنا متوقع هالشي .. علا صوته و هي تنطق جملته : بعد سنتين اعترفت مي !! و وش الذمه اللي جته فجأه ! رد محمد و ايده على كتفه : مي حالته حاله !! تركي بعد اللي صار بدا ما يثق بأحد .. تدخلت و رديت : رونق أدري بتشرهين علينا و من حقتس بس تدرين ان الشرف ميب هين .. شفته بلعت ريقه ثم ردت بزعل : و الحين وش المطلوب من ! رد خالد : نبي السموحه يا رونق . تابع محمد و ايده ضغطت على رونق : ترى ما أزعلنا الا غلاتس و الا لو انتي رخيصه كان ما اهتمينا . شفت دموعه بدت تمشي على خدوده و التفتت لمحمد و قالت : يبه و الله انكم قهرتون ,, ضربتون و كل شي كل شي سويتوه موب ذنبي ان امي شاميه !! كانت تكلم محمد بكلام ملخبط و بين كل كلمه و الثانيه تشهق ,, غير ان محمد مهوب معه ,, محمد من سمع كلمة يبه و دموعه تهل !! كان كل ذاك الوقت خاص لمحمد و رونق ,, تشكي عليه ثم يضمه لصدره ,, تفرغ اللي به ثم ترجع تشكي و يرجع يضمه ,, باختصااار كانت حالتهم تصعب على الكافر !! ــــــــــــــــــــــــــــــــــــــــــــــ خالد شفت ساعتي اللي تشير لخمس العصر ,, رجعت التفت لرونق اللي واقفه بالباب تودعنا و عيونه به كلاااام كثييير ,, كانت كل زيارتنا أربع ساعات و ما كانت كافيه لتفريغ كل العتب ,, حسيت بالسؤال من عيونه ,, أنا أعرف رونق و أدري به . شفت محمد و عبدالرحمن طلعوا بعد ما ودعوه على أمل اللقاء به بعرس ندى .. قبل لا أطلع سلمت عليه و همست له : ترانا ما علمنا تركي عن برائتس . شفته عقدت حواجبه و ردت : ليش خايفين على مي ؟ رديت عليه : لا و الله بس تركي سمع الشريط باذنه ومستحيل بيصدق بالعكس لو بنقوله بيتهمتس انتي و مي لذلك كتمنا الأمر بين العائله . و كملت : و بعدين تركي مطيـّـن عيشة مي بلا ما نقوله غير اننا ما نبيه يطين عيشتس انتي و مطلق .. شفته تأشر براسه علامة الايه و أنا متأكد انه موب مقتنعه أبدأ بهالكلام !! طلعت بعد ما أخذت وعد من ابو مطلق انهم يجون لعرس ندى بعد اسبوعين !! ـــــــــــــــــــــــــــــــــــــ مــــا بــعــد النهايه .... بعد مرور أربع سنوااااات ... خالد .. شفت نفسي بالمرايه ثم طلعت من الغرفه ,, مشيت متجه للصاله و أول ما دخلت سمعت زغااااريد خواتي ,, ابتسمت و رديت و أنا حاط اصابعي باذاني باستهبال !! حسيت بهدى تقبص ذراعي ,, ابعدت ايدي و مسحت عليه بسرعه ثم التفت على هدى و تكلمت : لا تشوهينن وراي عرس باتسر .. ابتسمت هدى و ردت : يا رب ان سهى تعقلك .. رديت باستهبال : خلقه انا عاقل . ردت أسماء : حنا نزغرد لك و أنت ساد اذانك .. ابتسمت بشررر و رديت : ايه ما ودي أسمع صوت غير صوت سهى .. ضحكت رونق و ردت : يا بثرك يا شيييييخ !! ضحكت و تربعت بين خواتي بوسط الصاله و علي بشتي : المهم زين البشت علي و الا أرجعه .. ضحكت نهى و ردت : لا يهبل عليك بس افسخه لا يتوصخ .. صبيت لي فنجال و رديت : مالتس دخل ما دفعتي به ريال .. ردت رونق بسرعه : اللي يسمعك يقول دافع به .. سويت نفسي معصب و رديت على رونق : ياخي درينا ان رجلتس اللي شاريه لي بتذليننا يعني !! ضحكوا كل خواتي على تمثيلي للعصبيه لأني ما أجدت هالدور !! أقبلت أمجاد و بيده كاميرا ثم ردت : صفوا بجنب عمي خالد أبصوركم عشان أتذكر اني بهاليوم تخرجت .. صفوا كلهم عن يميني و يساري خواتي و بزارينهن ما عدا مي اللي ما طاع تركي يجيبه .. شفت ندى قامت و هي تقول : لا أنا مابي اصور اخاف يزعل فيصل .. يا ربي و الله يا انا اكره الحريم لا صارن سامجااات !! سحبته مع ايده و عصرت بين ايديني و انا أبتسم لموضي بنت رونق اللي جلسته بحجري ,, و أخذنا أحلى صوره تذكاريه !! و هذا حنااااااااااا عيال موضي !! هدى على حاله .. أسماء عايشه مرتاحه هي و بناته و مقتنعين ان الله عطاهم 3 بنات لكن غيرهم ما عنده شي .. مي عنده بنته رؤى 3 سنين و حامل ,, تركي أهون من أول لكنه ما زال عسر غير انه فيه شوي شك . رونق عنده ساري 5 سنوات و موضي سنه و نص . و علاقتهن مع بعض أحسن من اول بكثييير ,, ما اقول انهن رجعن مثل زمان لكن بينهن احترام و شي قليل من الود !! نهى تزوجت صديق خالد و جابت منه ابراهيم سنتين . ندى عنده يزن سنتين و حامل . عزااام ,, رونق ما فضحته لأن اللي فيه كافيه ,, ربي فضحه بشي ثاني ,, عمره يمشي و هو لاهي بسفراته و سهراته غير القضيه الأخيره اللي فضحته " قضية مخدرات "انسجن فتره ثم طلع و رجع يلهي بدنياه .... كل هذا و هو موب مرتاح بحياته ,, فاقد قلبه و عقله و كل شي مع نهى !! نرجع لديرة صـــــــــــــبـــــــــــره !! رونق ما زالت عايشه بصبره لكنه تزور أهله بمعدل زياره وحده بالسنه و هذا شي غريب جدا على أهل صبره !! نوره جابت ساري 4 سنين فاهد سنتين . نفله جابت اخو لنايف سموه ساري و عمره 3 سنين و نص . وضحى عنده بنت نوفه عمره 3 سنين . و ساره بعد تعب و علااااج جابت خالد عمره شهرين . . . و مها تذكرونه بعد اربع سنين و نص من زواجه جت تزور أهله و هي تشيل بين ايدينه بناته المها و الجازي . النهااااااااااااااايه .. " شكرا " أقولها لكل من قرأ روايتي ,, سواء نقدها أو مرّ عليها من دون أن يعطرها .. " شكرا " أهمس بها لكل قراء ليلاس .. دمتم بود .. " نبــ القصيم ــض " |
الف مبروك على الناهيه الاكثر من رائعه نبوضه انتي مشروع كاتبه مميزه ننتظر جديدتس وعلى فكره مانبيه
الا باللهجه القصيميه لانها بصراحه معديه الروايه رونق خاص فيها <<<يمديتس على رونق |
احلى شي عادات اهل صبره وحتسيهم ..
تحسينها عادات بدو صح ... وحتسي القصماان شي جديد على الروايااات بس حلوووو .. .. النهااايه روووووعه مع اني مااقتنعت بالحيل من حاال تريكي .. ودني انه عررف ببرائتها واحتر قليبه .. ومي القرده ودي انها أردى من حالهاا ذا .. يعطيتس العااافيه نحتريتس في روااايه جديده .. ومبرررررررررررروك انهائتس لبنت الشاااميه .. |
آلسلآم عليكم ورحمه الله وبركآته
نبض مبروك آكتمــآل روآيتك بنت آلِشآميه ابدعتيَ وتميزٍتي فيهااً اسلوٍب روعه قصه متميزه فكرهَ تقريبا موجوده لكن باسلوبك وبالوانك انتي وعباراتك وافكارك خليتيهاا تحفه فنييييييييييه اكثر ماعجبني ربطك بين العالمين عالم اهل القصيم وعالم اهل الصبره يعني خليتينا نشوف الفراقات وفتحتي عيونا على حال الناس اللي كذاا وكيف عايشين زين سوويتي يوم ماخليتي تركي يدري انها مهاا سبب اللي صاار رحمه لها والله يكفيهاا شك زوجهاا والعلاقه اذا دخلها شك = على راحه البال السلام يعني بتكون دائما عايشه في تهديد وخوف من بكره والمستقبل الله يسلم راس خالد على مجهوده مع عقااب مطلق مابعد عسر اللا يسر الله يسعدك يارب وينورهاا عليك عجبتني مفااجاءه خالد ونايف لك القصه كامله كـ فكره واسلوب = روعه :) لكن عندي انتقاد بسيط = اذا تبين تاخذين فيه زين :) واذا بيضايقيك ومايعجبك = تغاضي عنه وسوي كنك ماشفتي :d نبض = لاحظت فيك شي ؟؟ اختصارك للاحدااث تختصرين الحدث حسيتك تبين تخلصينهاا وبس حتى بعض الشخصيات ماعطيتيهاا حقهاا كامل من حيث انه نشوف حواراتهم ولا احداث حياتهم ويومياتهم مع بعض رغم انهم عناصر مهمه فالقصه و من المشتركين في تكوين البطوله يعني انا صراحه معجبتني فكرتك وعاجبني اسلوبك ماشاءالله عليك لكن اختصارك قهرني حسيتك تمشين تمشين سريع سريع يمكن لظروف اختباراتك و للا لظروفك الخاصه بحياتك والله يعيناا اجمعين لكن ظلمتييييييهاا من رايي الشخصي روايه فكرتهاا مثل كذا وواسلوبك انتي كـ كاتبه مثل كذاا خساره ان روايه روعه مثل روايتك هذي تختصر احداثهاا ويهضم حقهاا اسمحي لي يالطيبه وانا اسفه لو الكلام ضايقك يمكن نقدي هدام مو بنااء = لكن والله هذا اللي في بالي من قريت روايتك اسمحي لي يالغلااءء وبانتظار مولدتك الجديده وفقك الله لـ مايحبه ويرضاه بنشتآق لك :) |
رائعه رائعه ر ائعه قد لا تكفي والله يا نبض قصيمنا الغاااالي مبدعه وربي والابجديه بنبض نبوضه تخونن وزاد الحلا كله الحستي اللي عطى للقصه بريق آخاااااذ ومزيج رائعه جدا مخلوط بطيب وعذوبة اللهجه تابعت فــ استمتعت وربي يا نبوضه وعسى الجديد القادم من هــ الحلا وأحلى ومبرووووك لنا ولتس ختآم هــ الرائعه |
شكرا على النهاية الرائع اختي نبض القصيم
واخيرا ظهرت برائة رونق ومطلق ولكنني تمنيت ان مي تعترف براءة رونق امام الجميع بما فيهم تركي وليس امام اخوانها فقط وايضا تمنيت فضح عزام بما عمله في رونق صحيح ربنا انتقم منه اشد انتقام لكن اظهار الحقيقة كامله لها طعم اخر فرونق حتى لو عرف ببرائتها اخوتها تظل في نظر الباقية متهمة بالخيانة صحيح يكفيها ان زوجها يعرف مدى برائتها وطهرها ولكن تمنيت ان يعرف الجميع حتى تركي وشكرا نبض القصيم على النهاية وفي انتظار روايتك القادمة اختي المبدعة |
الرواية كاملة على ............ ملف ورد http://www.liilas.com/up/do.php?id=8181 على تكست للجوال http://www.liilas.com/up/do.php?id=8182 |
نبوووضه
الف الف الف الف مبروك وصولج لخط النهايع نهايه مرضيه وحلوووة.. بس لو ذبحتي هالتركي هذا<<فيس شيطان.. ولا علقتيه ف المروحه وشغلتيها للخمسه<< الفيس اللي فوق.. جان يمكن يقل شره شوي تسلمين فديتج بانتظار يديدج http://www.liillas.com/up3//uploads/...29afe633ce.gif |
يعطيييييك العااااااافيه نبووووضه مااااقصرتتتي يااااقلبي
ومبروووك اتمام الرووووووووايه وان شاء الله نشوووفك بروايه ثاانيه جـــــ,ـــــ,ــــــودي |
أخيراً اكتملت الرواية الرائعه ،،، الله يعطيك العافيه ،، روايه مميزة واللي محليها اللهجه القصيميه ،،، تسلمين يالغاليه ،،،
|
رواية رائعة
تسلمين بما اني ماكنت من المتابعين بس ابدعتي يالغلا ننتظرك في ابدااااع اخر تقبلي مروري |
آلحمد لله علىآ النهـآيه آلحلووه .. آلنهـآيه كـآنت مرضيه من جميع آلجهـآت مـآعـآد تركي تسـآن خليتيه يدري ويطلق مي وتنتهي ه آلسـآلفه .. تسلم يديينكـ كوني بخير |
0_0 انا من شفت الجزء الاخير بغيت اصيح
مبروك نهاية روايتك الاولى وننتظر الثانية والثالثة والرابعة والمليون >>طماعة مطلق مبروك ثبوت برائتك رونق اجل تعودتي على الحتسي البدوي يالبى قلبك بث انزين نبوض ما في رواية بالطريق ولا لو فكرة _-_ هنودي |
مبررروك على تكمله الروااايه
بسسسسسسس ياااليت تركي درى عن براءه رونق ....وفعااايل مي وعزااااام .....لان الروااايه كااانت نهااايتهااا جداااا رااااائعه ....مااعدى نهااايه تركي ومي ....تمنيت انه لادرى يطلقهاا ويحرق قلبهاااا.....مثل ماااطلق رونق وحرق قلبهاااااا لان الدنيااا داااايماا سلف ودين ... |
ما اتوقعت النهاية كدا
البراءه جاءت مختصره كثير و حسيتها ناقصه و تركي ما عرف ان رونق بريئه و لا اكتشف حقارة اقرب الناس ليه زوجته و اخوه حاسة بخيبة امل شوي مع ذلك روايه رائعه و اسلوبك تحفه مبروك على النهاية |
ؤهااايو
أختى نبض لقصيم الف الف مبروك على أكتمال روايتك الرائعه (بنت الشاميه) الي يميزها اللهجه القصيميه مبدعه بأسلوبك وفكرتك مع انك طولتي علينا في النهايه وفي الأخير صارت مختصرة أختي نبوضه اعتبريني من المتابعين لك وانتظر جديدك هنااا أختك 2188 |
السلام عليكم ورحمة الله وبركاته
افكار حلوه تطرقتي لها عادات قبائل لا نعلم عنها بين طيات الكثبان الرمليه التمسك القاتل بعادات لا تمس لدين بصله لكنهم تشربوها بعروقهم كشرب الماء ليروي ضماء الصحراء وجفافها هناك احداث كثيره بشخصياتك جعلتيها كهوامش مجرد احداث لم تكتمل حياة الاخوه وانقطاع رونق عنهم طوال سنه لم تطرقي لنقل صوره عن حياتهم في غيابها السر الذى دفن بين الاخوه وعدم اظهار برائتها امام كل من عرف خبرها وضلت بنظرهم المتهمه حياة عزام ليس بالضروره الندم يوصل الى ماوصل اليه لو تصفي حاله حين علم ان زوجته هي شقيقة بالرضاعه هنا مقطع جدا موثر لتدمير اسره بسبب جهل بالاعتراف حتى وان كانت زوجته لا تحبه كان بودي ان تصفي لنا حال رونق حين انتقلت من مدينه وسكن مترف الى باديه وحياه متعبه وخصوصا باعمال المنزل من طبخ وغيره وصفك بحال المنزل كان رائع لدرجه انه انتفض قلبي على حالها وكيف تصبر على هذه الحياه الشاقه لا اريد ان اطيل عليك موفقه وانتظر جديدك |
السلام عليكم ورحمة الله وبركاته عزيزتي نبض القصيم صباجك جوري مبارك عليك مولدتك الأولى فهي رائعه بروعت حروفك ورقي ابجدياتك فيها طرحتي قضيه مهم وهي الشرف وطرحت جزى المتلاعب بالشرف ايضا طرحتي ثمار الصبر وحلاوة قوت الأيمان وصفتي معاناة رونق فاجدتي الوصف فانا اتمنى من المولى انا اقراء لك ابداع اخر مع ودي |
السلام عليكم ورحمة الله وبركاته
الف الف الف مبروووووووووووووك النهايه يانبوضههههههههههههههه وكانت نهايه سسسسعيده للجميع ننتظظظظظظظظظظظظظر جديددك يانبوضه سلمت يداك والله يعطيك العافيه :::::::::::::::::::::::::::::::::::::::::: لااله الا انت سبحانك اني كنت من الظالمين |
نبض القصيم
كاتبه متميزه وروايه رائعه موضوع مميز وغريب ولهجه راقت لي رغم صعوبتها تلك الاختلافات بين البدو والحضر تلك الحياه الصعبه البسيطه اولئك الاشخاص ذووي التفكير البسيط المتمسكين بعادات انمحت في وو قتنا الحالي رائعه بحق تعجز كلماتي عن تسطير مدى اعجابي بما خط قلمك تحياتي لك مبارك عليك انها مولودتك الاولى اتمنى ان ارى لك قريبا مولودة جديده دمت بوود |
تسلم يدينش والله يعطيش العافية
انا توني قريت القصة امس وبصراحة اعجبتني واجد وتاثرت وبكيت واجد مع الاحداث هذا ان دل دل وصفك الرائع للاحداث .. موفقة بإذن الله |
اقتباس:
الله يبارك فيك حبيبتي .. و ربي كلمة شكرا قليله بحقك يا نوفي يكفي تعليقك على كل جزء انزله ,, يا عمري اللهجه القصيميه و اهلها يفتخرون بقرائتكم لها !! اقتباس:
اهلا اهلا اختي .. النهايه مقنعه من ناحية تركي لأنه مستحيل تصير كل النهايات زي ما نبيهن ,, ممكن ما تكون اللي رسمناه بخواطرنا انه بيعرف ببراءة رونق ثم بيتحسف ثم ... ثم ..... ,, لكنه أخذ جزاءه على عدم ثقته برونق !! بس لو قلبناه بنشوف ان تركي رجال مثل ابوي و اخوي و اي رجال نجدي او قصيمي بيسمع باذنه شي يهز شرفه بنعذره بأي تصرف يسويه ,, يعني من وجهة نظري ان تركي معذور !! الله يبارك فيتس حياتي .... |
اقتباس:
لا لا يا خيتي من يقول اني ازعل من النقد !! و الله ان كلامتس على راسي و انا عارفه ان كل الكلام اللي قلتيه صحيح لكن اعذرين يا اختي لأني بالبدايه كنت كاتبه الروايه كامله و بعد ما بديت أنزل الأجزاء الأولى غيرت أحداث كثيره و زودت شخصيات ,, و الشي هذا اجبرن اني اشطب الاجزاء الاخيره و اغير بهن اشيااااااء كثيييير !! يمكن لأني ما كنت عارفه ان ضروفي بتتغير ,, أدري اني استعجلت بس و الله لعيون اللي يحترونن !! و ادري ان اكثر ناس هضمت حقهم بنات فيحان , و ندى و امجاد ... شكراااااا ألف لكل من نقد قصتي مثل هالنقد الراااائع البناء ... |
اقتباس:
أخجل و الله من أن أكتب أحرفا تنثني خجلا من عبق ثناؤك .. و لكن قد تفي " شكرا " ببعض ما يخالج صدري !! اقتباس:
العفو اختي .. كل عائلة رونق يعرفون ببرائته ,, و المقصود بكل العائله يعني اخوانه الثلاثه و حريمهم و خواته الأربعه و ندى و فيصل و امجاد ,, و هذولا هم بس اللي يعرفون اصلا بذنبه من قبل .. أما تركي فتصرفه واقعي ,, و حتى لو عرف السالفه كامله ما راح يعذّر لرونق إنه تكلم رجل بحجة انقاذ اخته و غير كذا اخوانه ما حبوا يدمرون بيت مي و تركوها تعيش ببيت فيه مزيج من السعاده و الجحيم ,, جزاءه على سواته بأخته !! " شكرا " يا خيتي ... |
ماشاء الله مره ابداع الروايه عجبتني القصه والاسلوب بس شويه اتلخبطت في اللهجه بالذات بين المذكر والموئنث
ننتظر جديدك |
السلام عليكم
ألف مبروك إنتهاء رائعتك على خير ولو إنها حيييييل متأخره . النهااااية رااااااائعه و متكامله ولو انها الاحداث تسارعت بشكل مفاجيء اخر الاجزاء و لكن هذا ما افقد القصه اي جماليه بنظري و حبيت النهايه الواااقعيه حيل من ناحيه منطق كشف الحقائق و التوازن اللي فيها . بصراحه كنت اتمنى اتلذذ ببراءه رونق و ظهورها بشكل حلو و كنت ابي اتشفى بعزام اكثر و اكثر .. اللي صاير لمي جزاء الظلم و اللي صار لتركي صدمة حبيب عجز ينسى محبوبته بشكل منطقي جدا و اعجبني مرررره . تسلم ايدينك نبوضه و ننتظر ابداعك القادم ان شاء الله . استمري نبوضه عندك قدره رائعه و رايقه بتوصيل الفكره . |
بجد القصة رائعة و حلوة جدا جدا
سلمت اناملك ننتظر جديدك بكل شوق متتاخريش علينا |
السلام عليكم
رواية جميلة وبانتظار جديدك |
مرحبتين
صراحه ما قدرت اقاوم رغبه اني اكتب لك رايي لانها من جد تستحق القراءة وتستحق الرد لان هذي الروايات الصحيحه اللي فيها نضج وعقل مو تحسيها كتابات مع احترامي للغير خربشات من المراهقه لان بعضها تحسسك ان الكاتبه صراحه باقي طفله او مراهقه عقليتها ضمها وباسها والى أأأأأخرة *فهمتي علي* واعتذر اذا كان ردي صريح فهو والله من الراخه اللي بحصلها في زي كذا كتابات ناجحه واتمنى لك كل التوفيق وننتظر جديدك بفارغ الصبر الله يسعدك وينور قلبك |
كتير حلوي بالتوفيق
|
يعطيكِ العافية نبض القصيم
رواية جدااا راائعه واااي بس سا انها بكتن بكا الله العالم بنتظار المزيد ع النوم وانا افكر بحالة ساره الله يكون بعونه مودتي لكِ |
رد: بـــنـــت الـــشـــــامـــيـــة
الرواايه رائعه. رجعت اقراه من جديد.
|
رد: بـــنـــت الـــشـــــامـــيـــة
ما شاء الله رائعه وحميله
وقمة التميز زالابداع تسلم ايدك حبيبتي ووفقك الله |
رد: بـــنـــت الـــشـــــامـــيـــة
يسلموووووووووووووو على الرواية الجميلة
|
رد: بـــنـــت الـــشـــــامـــيـــة
اخذتن الذكريات للقصه ورجعت من جديد قريته
|
| الساعة الآن 10:02 PM. |
Powered by vBulletin® Version 3.8.11
Copyright ©2000 - 2024, Jelsoft Enterprises Ltd.
SEO by vBSEO 3.3.0 ©2009, Crawlability, Inc.
شبكة ليلاس الثقافية